2024-25 സാമ്പത്തിക വർഷം പദ്ധതി അടങ്കലിൽ വകുപ്പിന് എത്ര തുകയാണ് വകയിരുത്തിയതെന്നും നാളിതുവരെ എത്ര ശതമാനം ചെലവഴിച്ചുവെന്നും വിശദമാക്കാമോ?

സംസ്ഥാനത്ത് ഡാറ്റാബാങ്കില്‍ ഉള്‍പ്പെടാത്തതും നിലവില്‍ കൃഷി ഇല്ലാത്തതുമായ ഭൂമി തരംമാറ്റുന്ന നടപടികളുടെ ഭാഗമായി എത്ര പേര്‍ക്ക് ഭൂമി തരംമാറ്റി നല്‍കാന്‍ കഴിഞ്ഞിട്ടുണ്ടെന്ന് അറിയിക്കാമോ;

കാസര്‍ഗോഡ് ജില്ലയില്‍ ഭൂമി തരംമാറ്റാനുളള എത്ര അപേക്ഷകള്‍ നിലവിലുണ്ടെന്നും അവ എന്നത്തേക്ക് തീര്‍പ്പാക്കാന്‍ സാധിക്കുമെന്നും അറിയിക്കാമോ?

കാട്ടാക്കട പട്ടണ വികസനത്തിനായുള്ള ഭൂമി ഏറ്റെടുക്കൽ നടപടി സംബന്ധിച്ച വിശദാംശങ്ങൾ ലഭ്യമാക്കാമോ; പ്രസ്തുത ഭൂമി ഏറ്റെടുക്കൽ നടപടികൾ എന്ന് പൂർത്തിയാക്കാനാകുമെന്ന വിശദാംശങ്ങൾ ലഭ്യമാക്കാമോ;

പൊട്ടൻകാവ്- നെല്ലിക്കാട് റോഡിന്റെ ഭൂമി ഏറ്റെടുക്കൽ നടപടികളുടെ വിശദാംശങ്ങൾ ലഭ്യമാക്കാമോ; പ്രസ്തുത ഭൂമി ഏറ്റെടുക്കൽ നടപടികൾക്ക് കാലതാമസമുണ്ടാകുന്നതിന്റെ കാരണം വിശദമാക്കാമോ; ഭൂമിഏറ്റെടുക്കൽ നടപടികൾ വേഗത്തിലാക്കുന്നതിന് നടപടി സ്വീകരിക്കുമോ?

പാലക്കാട് ജില്ലയില്‍ ഭൂമി തരംമാറ്റം നടത്തുന്നതിനായി കഴിഞ്ഞ ഒരു വര്‍ഷത്തിനുള്ളില്‍ എത്ര അപേക്ഷകള്‍ ലഭിച്ചിട്ടുണ്ടെന്നും അവയില്‍ എത്ര അപേക്ഷകള്‍ തീര്‍പ്പാക്കിയിട്ടുണ്ടെന്നും എത്ര എണ്ണം നിലിവില്‍ ബാക്കിയുണ്ടെന്നും നിയോജക മണ്ഡലം തിരിച്ച് അറിയിക്കാമോ;

പ്രസ്തുത ആവശ്യത്തിന് ലഭിക്കുന്ന അപേക്ഷകളിലെ കാലതാമസം ഒഴിവാക്കുന്നതിന് നടപടികള്‍ സ്വീകരിച്ചിട്ടുണ്ടോ; എങ്കില്‍ വിശദാംശം നല്‍കാമോ?

അങ്കമാലി മണ്ഡലത്തിലെ ചന്ദ്രപ്പുര ജംഗ്ഷനില്‍ മഞ്ഞപ്ര വില്ലേജ് ഓഫീസ് സ്ഥിതിചെയ്യുന്ന സ്ഥലത്തെ പൊതുജനം അനുഭവിക്കുന്ന ബുദ്ധിമുട്ട് വകുപ്പിന്റെ ശ്രദ്ധയില്‍ കൊണ്ടുവരുന്നതിനായി 10/09/2024 ന് ലാന്റ് റവന്യൂ കമ്മീഷണര്‍ക്ക് എം.എല്‍.എ. നല്‍കിയ കത്തിലെ ഉള്ളടക്കം പരിശോധിച്ചിരുന്നോ; എങ്കില്‍ ആയതിന്മേല്‍ സ്വീകരിച്ച നടപടി വിശദമാക്കാമോ;

പ്രസ്തുത വിഷയത്തില്‍ ലാന്റ് റവന്യൂ കമ്മീഷണറുടെ കാര്യാലയത്തില്‍ എല്‍.ആർ.(ജെ7)9025/24 നമ്പര്‍ ഫയല്‍ പരിശോധിക്കുന്നതിന് എത്ര ദിവസം വേണ്ടിവന്നുവെന്നും ഫയല്‍ തീര്‍പ്പാക്കാന്‍ കാലതാമസം ഏത് ഓഫീസിലാണ് നേരിട്ടതെന്നും വ്യക്തമാക്കാമോ;

മേല്‍ വിഷയത്തില്‍ എം.എല്‍.എ. നല്‍കിയ കത്ത് കമ്മീഷണര്‍ക്ക് ലഭിച്ചതായോ തീര്‍പ്പാക്കിയതായോ ഉള്ള മറുപടി നല്‍കാത്തതിന്റെ കാരണം വ്യക്തമാക്കാമോ; ഇത് സംബന്ധിച്ച് അനേഷണ റിപ്പോര്‍ട്ട് തയ്യാറാക്കിയ ഉദ്യോഗസ്ഥന്‍ കത്ത് നല്‍കിയ എം.എല്‍.എ.യില്‍ നിന്നും വ്യക്തത വരുത്തിയിരുന്നോയെന്നത് സംബന്ധിച്ച വിശദാംശം ലഭ്യമാക്കുമോ?

ഈ സര്‍ക്കാര്‍ അധികാരത്തില്‍ വന്ന ശേഷം ആരംഭിച്ച വിഷന്‍ & മിഷന്റെ ഉദ്ദേശ്യലക്ഷ്യങ്ങള്‍ എത്രത്തോളം ഫലം കൈവരിച്ചുവെന്ന കാര്യത്തില്‍ സോഷ്യല്‍ ഓഡിറ്റിങ് നടത്തിയിട്ടുണ്ടോ; ഉണ്ടെങ്കില്‍ വിശദാംശം ലഭ്യമാക്കുമോ;

മന്ത്രിയുടെയും വകുപ്പിലെ ഉന്നത ഉദ്യോഗസ്ഥരുടെയും സാന്നിധ്യത്തില്‍ ജനപ്രതിനിധികള്‍ നേരിട്ടും രേഖാമൂലവും പരിഹാരം ആവശ്യപ്പെട്ട വിഷയങ്ങളിന്മേല്‍ പൂര്‍ണ്ണമായും പരിഹാരം കാണുന്നതിന് കഴിഞ്ഞിട്ടുണ്ടോ; വിശദാംശം ലഭ്യമാക്കുമോ;

വിഷന്‍ ആന്റ് മിഷനില്‍ അങ്കമാലി മണ്ഡലത്തിന്റെ ജനപ്രതിനിധി തുടര്‍ച്ചയായി ഉന്നയിച്ചിട്ടുള്ളതും അവസാനം കൂടിയ യോഗത്തില്‍ നല്‍കിയ കത്തിലെ ഒന്‍പത് വിഷയങ്ങളില്‍ ഏതെല്ലാം കാര്യങ്ങളാണ്‌ തീര്‍പ്പാക്കിയതെന്നും നയപരമായി തീര്‍പ്പാക്കാന്‍ ശിപാര്‍ശ ചെയ്ത കേസ്സുകളില്‍ തീര്‍പ്പാക്കിയവയുടെ വിശദാംശങ്ങളും ലഭ്യമാക്കുമോ;

വിഷന്‍ ആന്റ് മിഷനില്‍ തീര്‍പ്പാക്കുമെന്ന് ഉറപ്പ് നല്‍കിയ വിഷയങ്ങള്‍ അടിയന്തരമായി തീര്‍പ്പാക്കുന്നതിന് നടപടി സ്വീകരിക്കുമോ; അങ്കമാലി മണ്ഡലത്തില്‍ നയപരമായ തീരുമാനം വേണമെന്ന് ശിപാര്‍ശ ചെയ്ത വിയങ്ങളിന്മേല്‍ തീരുമാനം വൈകുന്നതിന്റെ കാരണം വിശദമാക്കാമോ?

സംസ്ഥാനത്ത് നാളിതുവരെ സ്മാർട്ട് വില്ലേജ് ഓഫീസുകളാക്കി മാറ്റിയ വില്ലേജ് ഓഫീസുകൾ എത്രയാണെന്നും സ്മാർട്ട് വില്ലേജ് ഓഫീസുകളിൽ എന്തെല്ലാം സൗകര്യങ്ങളാണുള്ളതെന്നും അറിയിക്കാമോ; എത്ര വിസ്തീർണമുള്ള കെട്ടിടങ്ങളാണ് ഓരോ വില്ലേജ് ഓഫീസിനുമുള്ളതെന്നും ഇതിന് പൊതുവായ രൂപരേഖയോ നടപടിക്രമമോ നിലവിലുണ്ടോയെന്നും വ്യക്തമാക്കാമോ;

സ്മാർട്ട് വില്ലേജ് ഓഫീസുകളാക്കി മാറ്റിയ വില്ലേജ് ഓഫീസുകൾ ഏതൊക്കയെന്ന് ഇതിന് ചെലവാക്കിയ തുക, പൂർത്തിയായ വർഷം, ജോലി നിർവഹിച്ച ഏജൻസി എന്നീ വിവരങ്ങൾ സഹിതം വിശദമാക്കാമോ;

സ്മാർട്ട് വില്ലേജ് ഓഫീസുകളുടെ നിർമ്മാണം നിലവിൽ എവിടെയെല്ലാമാണ് പുരോഗമിക്കുന്നതെന്നും നടപ്പ് സാമ്പത്തിക വർഷം ഇതിനായി ബജറ്റിൽ അനുവദിച്ചിട്ടുള്ള ഫണ്ടിൽ കുറവ് വരുത്തിയിട്ടുണ്ടോയെന്നും അറിയിക്കാമോ?

സംസ്ഥാനത്ത് വിവിധ താലൂക്കുകളിലായി എൽ.ആർ.എം. സംബന്ധിച്ച് എത്ര പരാതികളാണുള്ളതെന്നും ഏതൊക്കെ വിഭാഗത്തിലുള്ളതാണെന്നും എത്ര വർഷം പഴക്കമുണ്ടെന്നുമുള്ള വിവരം ജില്ല, താലൂക്ക് അടിസ്ഥാനത്തില്‍ വേർതിരിച്ച് ലഭ്യമാക്കാമോ;

2016 മുതൽ 2021 വരെയും 2021 മുതൽ 2025 ജനുവരി മാസംവരെയും എത്ര എൽ.ആർ.എം. പരാതികളാണ് പരിഹരിച്ചതെന്നും പരാതി പരിഹരിക്കാൻ എന്തെല്ലാം നടപടികളാണ് സ്വീകരിച്ചതെന്നും അറിയിക്കാമോ;

ഭൂനികുതി ഓൺലൈനായി അടയ്ക്കാൻ എത്ര വില്ലേജുകളിൽ നിലവിൽ സംവിധാനം ഏർപ്പെടുത്തിയിട്ടുണ്ടെന്നും ഇനിയും രേഖകൾ ഡിജിറ്റലാക്കി മാറ്റാത്ത എത്ര വില്ലേജുകളാണുള്ളതെന്നും പ്രസ്തുത വില്ലേജുകള്‍ ഏതൊക്കെയാണെന്നുമുള്ള വിവരം ലഭ്യമാക്കാമോ;

രേഖകൾ ഡിജിറ്റലാക്കി മാറ്റിയപ്പോൾ ഡാറ്റ എൻട്രിയിൽ വന്ന പിഴവുമായി ബന്ധപ്പട്ട് എത്ര പരാതികൾ താലൂക്കുകളിലോ വില്ലേജുകളിലോ പരിഹരിക്കാൻ ബാക്കിയുണ്ടെന്നും ആയത് പരിഹരിക്കാന്‍ എന്തെല്ലാം നടപടികളാണ് സ്വീകരിച്ചതെന്നും അറിയിക്കാമോ?

ചങ്ങനാശ്ശേരി മണ്ഡലത്തില്‍ നിന്ന് ഭൂമി തരം മാറ്റം നടത്തുന്നതിനായി കഴിഞ്ഞ ഒരു വർഷത്തിനുള്ളിൽ എത്ര അപേക്ഷകൾ ലഭിച്ചിട്ടുണ്ടെന്നും അവയിൽ എത്ര അപേക്ഷകൾ തീർപ്പാക്കിയിട്ടുണ്ടെന്നും എത്രയെണ്ണം നിലവിൽ ബാക്കിയുണ്ടെന്നും വ്യക്തമാക്കാമോ;

ഭൂമി തരം മാറ്റത്തിനായി ലഭിക്കുന്ന അപേക്ഷകളിലെ കാലതാമസം ഒഴിവാക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

കടുത്തുരുത്തി മണ്ഡലത്തിലെ കടുത്തുരുത്തി, കുറുപ്പന്തറ, കോതനല്ലൂര്‍ റെയില്‍വേ മേല്‍പ്പാലങ്ങൾക്കുള്ള സ്ഥലമേറ്റെടുപ്പ് നടപടികളുടെ പുരോഗതി വിശദമാക്കാമോ; പ്രസ്തുത നടപടികൾക്ക് നേരിടുന്ന കാലതാമസം ഒഴിവാക്കുമോയെന്ന് അറിയിക്കാമോ;

കടുത്തുരുത്തി റെയില്‍ ഓവര്‍ ബ്രിഡ്ജിന്റെ ബ്രിഡ്ജ് വാല്യു റിപ്പോര്‍ട്ട് തയ്യാറാക്കുന്നതിനുള്ള നടപടികൾ ഏതു ഘട്ടത്തിലാണെന്ന് വിശദമാക്കാമോ;

കുറുപ്പന്തറ റെയില്‍ ഓവര്‍ ബ്രിഡ്ജ് നിർമ്മാണത്തിനായുള്ള സ്ഥലമെടുപ്പിനെതിരെ ഡബ്ല്യുപി(സി) 18680/2021 നമ്പർ കേസിന്റെ വിധി ആയിട്ടുണ്ടോ; എങ്കില്‍ സ്ഥലമേറ്റെടുപ്പിന്റെ തുടര്‍നടപടികള്‍ ആരംഭിച്ചോയെന്ന് വിശദമാക്കാമോ;

കോതനല്ലൂര്‍ റെയിൽ ഓവര്‍ ബ്രിഡ്ജ് സ്ഥലമേറ്റെടുപ്പുമായി ബന്ധപ്പെട്ട് കണ്ടിജൻസി ചാർജ്ജ് ലാന്റ് അക്വിസിഷന്‍ ഓഫീസര്‍ക്ക് കൈമാറിയിട്ടുണ്ടോ; ഇല്ലെങ്കിൽ ഇതിനുള്ള കാലതാമസം വിശദമാക്കാമോ?

ലൈഫ് ഭവന പദ്ധതിയിലും പ്രധാനമന്ത്രി ആവാസ് യോജനയടക്കമുള്ള ഭവനപദ്ധതികളിലും ഉൾപ്പെട്ടിട്ടുള്ള പുനലൂര്‍ താലൂക്കിലെ ആര്യങ്കാവ് വില്ലേജിലെ ഇരുളൻകാട്, രാജാച്ചോല, വെഞ്ചർ, ഒൻപതേക്കർ, പത്തേക്കർ, നാൽപ്പത്തേഴുമല, കോട്ടവാസൽ, അച്ചൻകോവിൽ, കൂട്ടത്തിമണ്ണിൽ പ്രദേശങ്ങളിൽ താമസിയ്ക്കുന്ന കുടുംബങ്ങൾക്ക് വില്ലേജില്‍ നിന്നും കൈവശ സർട്ടിഫിക്കറ്റ് ലഭിയ്ക്കാത്ത സാഹചര്യം ശ്രദ്ധയില്‍പ്പെട്ടിട്ടുണ്ടോ; ആയത് പരിഹരിയ്ക്കുന്നതിന് എന്ത് നടപടി സ്വീകരിയ്ക്കാനാകുമെന്ന് വിശദമാക്കാമോ;

വന മേഖലയോടു ചേര്‍ന്ന് കിടക്കുന്ന പ്രസ്തുത പ്രദേശങ്ങളില്‍ അൻപതു വർഷത്തിലധികമായി കൈവശത്തിലിരിക്കുന്ന ഭൂമിയ്ക്കു വിവിധ സര്‍ക്കാര്‍ പദ്ധതിപ്രകാരം ലഭിയ്ക്കുന്ന വീട് നിര്‍മ്മിയ്ക്കുന്നതിനായി ഭൂമിയുടെ കൈവശ സർട്ടിഫിക്കറ്റ് അനുവദിയ്ക്കാനാകുമോ; വിശദമാക്കാമോ; ഇവര്‍ക്കായി പ്രത്യേക അനുമതി ആവശ്യമെങ്കില്‍ ആയതിനുള്ള നടപടികള്‍ സ്വീകരിയ്ക്കുമോ;

പ്രസ്തുത പ്രദേശങ്ങളിൽ താമസിക്കുന്ന കുടുംബങ്ങളിൽ നിന്നും പട്ടയത്തിനുള്ള അപേക്ഷ ലഭിച്ചിട്ടുണ്ടോ; വിശദാംശം നല്‍കാമോ; പ്രസ്തുത അപേക്ഷകളിന്മേല്‍ സ്വീകരിച്ചിട്ടുള്ള തുടർനടപടികൾ വിശദമാക്കാമോ?

കോതമംഗലം മണ്ഡലത്തിലെ ഇരമല്ലൂര്‍ വില്ലേജില്‍ ഭൂമിയുടെ ഉയര്‍ന്ന ഫെയര്‍ വാല്യൂ വിഷയം പരിഹരിക്കാന്‍ നാളിതുവരെ സ്വീകരിച്ച നടപടി വ്യക്തമാക്കാമോ;

നടപടിക്രമങ്ങള്‍ വേഗത്തില്‍ ആക്കി ഫെയര്‍ വാല്യു പുനര്‍ നിര്‍ണ്ണയം പൂര്‍ത്തീകരിക്കുന്നതിനാവശ്യമായ നടപടി സ്വീകരിക്കുമോ; വിശദമാക്കാമോ?

റവന്യൂ വകുപ്പിൽ അഴിമതി വർദ്ധിച്ചു വരുന്നതായുള്ള മാധ്യമവാർത്തകൾ ശ്രദ്ധയിൽപ്പെട്ടിട്ടുണ്ടോ; എങ്കില്‍ അവ സംബന്ധിച്ച് പരിശോധന നടത്തിയിട്ടുണ്ടോ; വിശദമാക്കുമോ;

വിവിധ തലങ്ങളിലുള്ള റവന്യൂ ഓഫീസുകളുടെ പ്രവർത്തനം കാര്യക്ഷമവും അഴിമതിരഹിതവും ആക്കുന്നതിന് സ്വീകരിച്ചിട്ടുള്ള നടപടികൾ എന്തെല്ലാമാണെന്ന് വിശദമാക്കാമോ;

കടലാസ് രഹിത വില്ലേജ് ഓഫീസ് സംവിധാനം അഴിമതി കുറയ്ക്കുന്നതിന് സഹായകരമാണെന്ന് കരുതുന്നുണ്ടോ; വ്യക്തമാക്കുമോ;

റവന്യൂ വകുപ്പിൽ അഴിമതി കുറയ്ക്കുന്നതിനും പൊതുജനങ്ങളിൽ അവബോധം സൃഷ്ടിക്കുന്നതിനും പൊതുജന പങ്കാളിത്തത്തോടെ നൂതന പദ്ധതികൾ ആവിഷ്കരിച്ച് നടപ്പിലാക്കുന്നതിന് നടപടികൾ സ്വീകരിക്കുമോ; വിശദാംശം നൽകുമോ?

പ്രവാസി മലയാളികള്‍ക്ക് സ്വന്തമായോ കൂട്ടായ അവകാശത്തിലോ സംസ്ഥാനത്തുള്ള ഭൂമി സംബന്ധിച്ച എല്ലാ സേവനങ്ങളും ഓൺലൈനായി ലഭ്യമാക്കുന്നതിനുള്ള സാധ്യതകൾ പരിശോധനാവിധേയമാക്കിയിട്ടുണ്ടോ; വിശദമാക്കുമോ;

പ്രവാസികൾക്കായി ഭൂമി സംബന്ധമായ ഏതെല്ലാം സേവനങ്ങൾ ഏതെല്ലാം രാജ്യങ്ങളിൽ ഓൺലൈനായി ലഭ്യമാക്കിയിട്ടുണ്ടെന്ന് വ്യക്തമാക്കുമോ;

ഭൂമിസംബന്ധമായ സേവനങ്ങൾക്ക് അപേക്ഷ സമർപ്പിക്കുന്നതിന് പ്രവാസികൾക്ക് ഏതെല്ലാം തരത്തിലുള്ള സൗകര്യങ്ങളാണ് ഏർപ്പെടുത്തിയിട്ടുള്ളതെന്ന് വിശദീകരിക്കാമോ;

ലോകത്തിന്റെ എല്ലാ ഭാഗങ്ങളിലും താമസിക്കുന്ന പ്രവാസി മലയാളികള്‍ക്ക് അവരുടെ പേരില്‍ സംസ്ഥാനത്തുള്ള ഭൂമി സംബന്ധമായ വിഷയങ്ങളിൽ അപേക്ഷ സമർപ്പിക്കുന്നതിനും ഫീസ് ഒടുക്കുന്നതിനും സൗകര്യമേർപ്പെടുത്തുമോ; വ്യക്തമാക്കുമോ?

വയനാട് ജില്ലയിൽ 1947 ന് മുമ്പ് ബ്രിട്ടീഷ് കമ്പനികളും പൗരന്മാരും കൈവശം വെച്ചിരുന്ന എസ്റ്റേറ്റുകളുടെ വില്ലേജ് തിരിച്ചുള്ള ലിസ്റ്റ് തയ്യാറാക്കിയിട്ടുണ്ടോയെന്ന് അറിയിക്കാമോ;

1947 ന് മുമ്പ് ഓരോ വില്ലേജിലും എത്ര ഏക്കർ ഭൂമി വീതം ഏതെല്ലാം എസ്റ്റേറ്റുകൾക്ക് ഉണ്ടായിരുന്നുവെന്ന് വ്യക്തമാക്കാമോ;

ഇതെല്ലാം പാട്ട ഭൂമിയായിരുന്നോ എന്നും നിലവിൽ ഭൂമി ആരുടെ കൈവശമാണുള്ളതെന്നും വ്യക്തമാക്കാമോ;

പ്രസ്തുത ഭൂമി കൈവശം വെച്ചിരിക്കുന്നവർക്ക് ഭൂമിയിന്മേലുള്ള അവകാശം എന്താണെന്ന് വ്യക്തമാക്കാമോ?

വിവിധ വില്ലേജ് ഓഫീസുകളില്‍ പിന്‍തുടര്‍ച്ചാ പോക്കുവരവിനുള്ള അപേക്ഷകള്‍ വ്യത്യസ്ത രീതികളില്‍ കൈകാര്യം ചെയ്യുന്നതിനാല്‍ ജനങ്ങള്‍ ബുദ്ധിമുട്ടുന്ന കാര്യം ശ്രദ്ധയില്‍പ്പെട്ടിട്ടുണ്ടോ; എങ്കില്‍ നിലിവിലെ രീതി സങ്കീര്‍ണ്ണമായതിനാല്‍ പിന്തുടർച്ചാവകാശ സര്‍ട്ടിഫിക്കറ്റിന്റെ അടിസ്ഥാനത്തില്‍ ഇത്തരം പോക്കുവരവുകൾ നടത്തുവാന്‍ നടപടി സ്വീകരിക്കുമോ; വിശദമാക്കാമോ;

പിന്‍തുടര്‍ച്ചാ പോക്കുവരവിന് നിലവില്‍ അപേക്ഷകന്‍ നല്‍കേണ്ട രേഖകള്‍ എന്തെല്ലാമെന്ന് വ്യക്തമാക്കാമോ; പ്രസ്തുത അപേക്ഷകള്‍ക്ക് ഓണ്‍ലൈന്‍ സംവിധാനം ഏര്‍പ്പെടുത്തിയിട്ടുണ്ടോ; ഇല്ലെങ്കില്‍ മുന്‍ഗണന പ്രകാരമാണോ അപേക്ഷകള്‍ തീര്‍പ്പാക്കുന്നത്; വിശദമാക്കാമോ?

സര്‍ഫാസി നിയമപ്രകാരം കോടതി വ്യവഹാരത്തിലൂടെയല്ലാതെ ബാങ്കുകള്‍ ഏറ്റെടുത്ത ഭൂമി ലേലത്തില്‍ പിടിച്ച് രജിസ്റ്റര്‍ ചെയ്തുവാങ്ങുന്നവര്‍ക്ക് തണ്ടപ്പേരില്‍ ബാങ്കിന്റെ പേരില്ല എന്ന കാരണത്താല്‍ പോക്കുവരവ് ചെയ്യാതിരിക്കുകയും നികുതി സ്വീകരിക്കാതിരിക്കുകയും ചെയ്യുന്നതായി ശ്രദ്ധയില്‍പെട്ടിട്ടുണ്ടോ; വ്യക്തമാക്കാമോ;

സര്‍ഫാസി ആക്ട് പ്രകാരം ഏറ്റെടുക്കുന്ന ഭൂമിയുടെ ക്രയവിക്രയത്തിന്റെ ഭാഗമായി തണ്ടപ്പേരില്‍ തങ്ങളുടെ പേര് ചേര്‍ക്കേണ്ടതില്ല എന്ന് ബാങ്കുകള്‍ നിലപാട് സ്വീകരിക്കുന്നതായി ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ?

2018-ലെ നെൽവയൽ-തണ്ണീർത്തട സംരക്ഷണ നിയമ ഭേദഗതി നടപ്പിലാക്കിയശേഷം എത്ര ഹെക്ടർ ഭൂമി തരം മാറ്റം നടത്തിയിട്ടുണ്ടെന്ന വിവരം ജില്ല തിരിച്ച് താലൂക്ക് അടിസ്ഥാനത്തിൽ ലഭ്യമാക്കാമോ;

ഭൂമി തരം മാറ്റം നടത്തിയതിലൂടെ ലഭിച്ച വരുമാനം എത്രയെന്ന് വ്യക്തമാക്കാമോ?

2016-21 കാലയളവ് മുതൽ നാളിതുവരെ ഭൂമി തരംമാറ്റത്തിലൂടെ ലഭിച്ച തുകയുടെ വിശദാംശം സാമ്പത്തിക വർഷത്തിന്റെ അടിസ്ഥാനത്തിൽ വ്യക്തമാക്കുമോ; പ്രസ്തുത തുക ഏത് ശീർഷകത്തിലാണ് വരവ് വെച്ചിരിക്കുന്നതെന്ന് വിശദമാക്കാമോ;

ഭൂമി തരംമാറ്റത്തിലൂടെ ലഭിക്കുന്ന തുക കാർഷിക അഭിവൃദ്ധി ഫണ്ടിൽ നിക്ഷേപിക്കണമെന്ന നിയമ വ്യവസ്ഥ അനുസരിച്ച് തുക കൈമാറിയിട്ടുണ്ടോ; എങ്കിൽ തുക കൈമാറിയത് സംബന്ധിച്ച രേഖയുടെ പകർപ്പ് ലഭ്യമാക്കുമോ;

മേല്പറഞ്ഞ പ്രകാരം തുക കൈമാറിയിട്ടില്ലെങ്കിൽ പ്രസ്തുത തുക ഏത് രീതിയിൽ വിനിയോഗിച്ചുവെന്ന വിശദാംശം നൽകുമോ?

കൈപ്പമംഗലം മണ്ഡലത്തിലെ ദേവസ്വം ഭൂമി പ്രശ്നങ്ങൾ, നികുതി ഒടുക്കാത്ത ഭൂമി പ്രശ്നങ്ങൾ, അതിർത്തി തർക്കങ്ങൾ, മിച്ചഭൂമി പ്രശ്നങ്ങൾ തുടങ്ങിയവ പരിഹരിക്കുന്നതിന് ആധുനിക സാങ്കേതിക വിദ്യ ഉപയോഗിച്ചുള്ള ഡിജിറ്റൽ സർവേ മണ്ഡലത്തിൽ പൂർത്തീകരിക്കുന്നതിനുള്ള സത്വര നടപടികൾ സ്വീകരിക്കാമോയെന്ന് അറിയിക്കാമോ;

മണ്ഡലത്തിൽ പട്ടയത്തിന് അപേക്ഷ നൽകിയവരിൽ പട്ടയം ലഭിക്കാത്ത എത്ര പേരുണ്ടെന്നും ആയത് പരിഹരിക്കുന്നതിനായി എന്തെല്ലാം നടപടികളാണ് സ്വീകരിച്ചുവരുന്നതെന്നും വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം സംസ്ഥാനത്ത് ഭൂരഹിതരായ എത്ര പട്ടികജാതി/ പട്ടികവര്‍ഗ്ഗ വിഭാഗങ്ങളില്‍പ്പെട്ട കുടുംബങ്ങള്‍ക്കാണ് ഭൂമി നല്‍കിയിട്ടുളളതെന്ന വിവരം ജില്ല തിരിച്ച് ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ഇടുക്കി ജില്ലയിലെ ദേവികുളം താലൂക്കില്‍ എത്ര പട്ടയങ്ങള്‍ വിതരണം ചെയ്തിട്ടുണ്ട്; വര്‍ഷവും വില്ലേജും തിരിച്ച് വ്യക്തമാക്കുമോ;

ലാന്‍ഡ് അസൈന്‍മെന്റ് കമ്മിറ്റികള്‍ പാസ്സാക്കുന്ന പട്ടയങ്ങള്‍ വിതരണം ചെയ്യുന്നതിന് സ്വീകരിക്കുന്ന നടപടിക്രമങ്ങള്‍ വിശദമാക്കുമോ;

ദേവികുളം താലൂക്ക് ലാന്‍ഡ് അസൈന്‍മെന്റ് കമ്മിറ്റി പാസ്സാക്കിയ എത്ര പട്ടയങ്ങള്‍ നിലവില്‍ വിതരണം ചെയ്യുവാനുണ്ടെന്നും അവ വിതരണം നടത്താതിരുന്നതിന്റെ കാരണം എന്താണെന്നും വിശദമാക്കുമോ?

ഈ സർക്കാർ അധികാരത്തിൽ വന്നതിന് ശേഷം തൃശ്ശൂർ ജില്ലയിൽ തലപ്പിള്ളി താലൂക്ക് ചേലക്കര മണ്ഡല പരിധിക്കുള്ളിൽ വരുന്ന വില്ലേജുകളിലായി എത്ര പേർക്ക് പട്ടയം അനുവദിച്ച് കൊടുത്തിട്ടുണ്ടെന്ന് എണ്ണം, വില്ലേജ് എന്നിവ തിരിച്ച് വ്യക്തമാക്കാമോ;

ചേലക്കര മണ്ഡല പരിധിക്കുള്ളിലെ വില്ലേജുകളിലായി പട്ടയത്തിന് ലഭിച്ച അപേക്ഷകളില്‍ എത്ര എണ്ണത്തിൽ തീർപ്പുകൽപ്പിക്കാനുണ്ടെന്ന് പേരുവിവരം സഹിതം വില്ലേജ് അടിസ്ഥാനത്തിൽ വ്യക്തമാക്കുമോ;

ആവശ്യമായ അന്വേഷണം നടത്തി അർഹതപ്പെട്ടവർക്ക് സമയബന്ധിതമായി പട്ടയം നൽകുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

കോഴിക്കോട് ജില്ലയിലെ താമരശ്ശേരി താലൂക്കിലെ ഒരങ്കോക്കുന്ന്, മണ്ടോപ്പാറ നഗറുകളിലെ സാധാരണക്കാരായ താമസക്കാര്‍ക്ക് പട്ടയം നല്‍കുന്നതിനുളള അപേക്ഷ സര്‍ക്കാരില്‍ ലഭിച്ചിട്ടുളളത് എപ്പോഴാണെന്ന് അറിയിക്കാമോ; പ്രസ്തുത അപേക്ഷ തീര്‍പ്പാക്കി പട്ടയം അനുവദിക്കുന്നതില്‍ കാലതാമസം നേരിട്ടത് ശ്രദ്ധയില്‍പ്പെട്ടിട്ടുണ്ടോയെന്ന് വ്യക്തമാക്കാമോ;

മണ്ടോപ്പാറ, ഒരങ്കോകുന്ന് നഗറുകളില്‍ താമസിക്കുന്നവര്‍ക്ക് പട്ടയം നല്‍കുന്നതുമായി ബന്ധപ്പെട്ട ഫയല്‍ ഇപ്പോള്‍ ഏത് ഘട്ടത്തിലാണുളളതെന്ന് വിശദമാക്കാമോ?

തിരൂർ താലൂക്കിലെ എടയൂർ വില്ലേജിൽ പരേതനായ കൊട്ടംപാറ പരിവൈദ്യരുടെ നിലവിൽ പട്ടയമുള്ള സർവ്വേ നമ്പർ-110/1,2,3,4,5 പ്രകാരമുള്ള ഭൂമിയിന്മേല്‍ ചിലർ വ്യാജ പട്ടയം എടുത്ത് ആധാരം നിർമ്മിച്ചെന്ന വിഷയം ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

പ്രസ്തുത വ്യാജ പട്ടയങ്ങളും ആധാരങ്ങളും പരിശോധിച്ച് റദ്ദ് ചെയ്യുന്നതിനും ഇതിന് പിന്നിൽ പ്രവർത്തിച്ചവർക്കെതിരെ നിയമ നടപടി സ്വീകരിക്കുന്നതിനുമായി റവന്യു പ്രിൻസിപ്പൽ സെക്രട്ടറിക്ക് നൽകിയ നിവേദന പ്രകാരമുള്ള എൽ.ആർ./8287/2024-എൽ.ആർ.(ബി8), ടി.എൽ.കെ, റ്റി.ഐ.ആർ /2206/2023-എൽ2 ഫയലിൽ സ്വീകരിച്ച നടപടികൾ എന്തെല്ലാമാണെന്ന് വിശദമാക്കാമോ;

പ്രസ്തുത വിഷയം സംബന്ധിച്ച് 19-09-2023-ൽ നൽകിയ കത്തിൽ അന്തിമ നടപടികൾ സ്വീകരിക്കുന്നതിൽ കാലതാമസം നേരിടുന്നതിനുള്ള കാരണം എന്താണെന്ന് വിശദമാക്കാമോ;

സർവ്വേ നമ്പർ-110/1,2,3,4,5 ൽ ഉൾപ്പെട്ട കുറ്റിപ്പുറം എസ്.ആർ.ഒ.യിലെ ആധാരം നമ്പർ-1764/66 ഭൂമിയുടെ അതിരുകൾ നിർണ്ണയിച്ച് നികുതി അടവാക്കി നൽകുന്നതിനുള്ള നടപടികൾ സ്വീകരിക്കുമോയെന്ന് വിശദമാക്കാമോ?

അര്‍ഹതയുള്ള എല്ലാവര്‍ക്കും സമയബന്ധിതമായി പട്ടയം വിതരണം ചെയ്യുന്നതിന് എന്തൊക്കെ നടപടികളാണ് സ്വീകരിച്ച് വരുന്നതെന്നുള്ള വിശദാംശം നല്‍കാമോ;

ഈ സര്‍ക്കാര്‍ അധികാരത്തില്‍ വന്നതിന് ശേഷം വിതരണം നടത്തിയ പട്ടയങ്ങളുടെ വിശദാംശം ജില്ല, വര്‍ഷം എന്നിവ തിരിച്ച് നല്‍കാമോ;

പട്ടയ വിതരണ നടപടികള്‍ ത്വരിതപ്പെടുത്താന്‍ ആവിഷ്കരിച്ച സ്റ്റാന്‍ഡേര്‍ഡ് ഓപ്പറേഷന്‍ പ്രൊസീജിയറിന്റെ പ്രവര്‍ത്തനം ഗുണകരമായോ എന്ന് പരിശോധിച്ചിട്ടുണ്ടോ;

ഇടുക്കി ജില്ലയില്‍ വിവിധ താലൂക്കുകളിലായി പട്ടയം ലഭിക്കുന്നതിന് എത്ര അപേക്ഷകള്‍ നിലവിലുണ്ട്; വിശദാംശം നല്‍കാമോ?

താഴെക്കോട് വില്ലേജിലെ മംഗലശ്ശേരി തോട്ടം നിവാസികള്‍ക്ക് പട്ടയം അനുവദിക്കുന്നതിനുള്ള നടപടി ഇപ്പോള്‍ ഏതു ഘട്ടത്തിലാണെന്ന് വ്യക്തമാക്കാമോ;

ഇതുമായി ബന്ധപ്പെട്ട് ഇനി എന്തെല്ലാം നടപടി ക്രമങ്ങള്‍ പൂര്‍ത്തിയാക്കാനുണ്ടെന്ന് വിശദമാക്കുമോ;

മംഗലശ്ശേരി തോട്ടം നിവാസികള്‍ക്ക് പട്ടയം അനുവദിക്കുന്നതിന് അടിയന്തര നടപടികള്‍ സ്വീകരിക്കുമോയെന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം എത്ര പട്ടയങ്ങളാണ് വടക്കാഞ്ചേരി മണ്ഡലത്തില്‍ വിതരണം ചെയ്തിട്ടുളളതെന്ന് ഇനം തിരിച്ച് വ്യക്തമാക്കാമോ?

2016 മുതല്‍ സംസ്ഥാനത്ത് എത്ര പട്ടയങ്ങള്‍ വിതരണം ചെയ്തിട്ടുണ്ട്; 2011 -2016, 2016-2021, 2021-2024 എന്നീ മൂന്ന് കാലഘട്ടങ്ങളില്‍ വിതരണം ചെയ്ത പട്ടയങ്ങളുടെ വിശദാംശം ജില്ല തിരിച്ച് ലഭ്യമാക്കുമോ;

ആലപ്പുഴ ജില്ലയില്‍ തണ്ണീര്‍ത്തട സംരക്ഷണ നിയമത്തിന് വിരുദ്ധമായി നിലം നികത്തുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത്തരം ഭൂമി ഏതൊക്കെയാണെന്നും നിലം പൂര്‍വ്വ സ്ഥിതിയില്‍ ആക്കിയത് ഏതൊക്കെയെന്നും താലൂക്ക് തിരിച്ചുള്ള വിശദാംശങ്ങള്‍ ലഭ്യമാക്കുമോ?

കോതമംഗലം താലൂക്കിലെ അര്‍ഹരായ മുഴുവന്‍ കൈവശക്കാര്‍ക്കും പട്ടയം നല്‍കുന്നതുമായി ബന്ധപ്പെട്ട് നിലവില്‍ സ്വീകരിച്ചുവരുന്ന നടപടികള്‍ വിശദമാക്കുമോ;

പട്ടയ നടപടികളുമായി ബന്ധപ്പെട്ട് വനം വകുപ്പ് ഉദ്യോഗസ്ഥർ ഏതെങ്കിലും തരത്തിലുള്ള തടസ്സവാദങ്ങള്‍ ഉന്നയിച്ചിരുന്നോയെന്ന് അറിയിക്കാമോ;

ഈ സര്‍ക്കാരിന്റെ കാലയളവിനുള്ളില്‍ അര്‍ഹരായ മുഴുവന്‍ കൈവശക്കാര്‍ക്കും പട്ടയം നല്‍കുന്നതിനുള്ള നടപടികള്‍ സ്വീകരിക്കുമോ; വ്യക്തമാക്കാമോ?

കണയന്നൂര്‍ താലൂക്കില്‍ എളംകുളം വില്ലേജില്‍ സര്‍വേ നമ്പ‍ര്‍ 1038-ല്‍ പെട്ട മെയ്ദിന നഗറിലെ കൈവശക്കാര്‍ക്ക് പട്ടയം നല്‍കിയതെന്നാണെന്നും എത്ര പേര്‍ക്കാണ് പട്ടയം അനുവദിച്ചതെന്നും വ്യക്തമാക്കാമോ; പ്രസ്തുത ഉത്തരവിന്റെ പകര്‍പ്പ് ലഭ്യമാക്കാമോ;

പ്രസ്തുത ഉത്തരവില്‍ ഉള്‍പ്പെട്ടിരുന്നതും എന്നാല്‍ മകന് സര്‍ക്കാര്‍ ജോലിയുണ്ടെന്ന കാരണത്താല്‍ മത്സ്യത്തൊഴിലാളിയും സ്വന്തമായി ഭൂമിയില്ലാത്തതുമായ കാട്ടുംപുറത്ത് വീട്ടില്‍ കെ.എന്‍.ഉലകേശന് ഇരുപത്‌ വര്‍ഷമായി ടിയാൻ കൈവശം വച്ച് അനുഭവിച്ചിരുന്ന ഭൂമിക്ക് പട്ടയം അനുവദിക്കാത്തത് സംബന്ധിച്ച് എറണാകുളം ജില്ലാ കളക്ടര്‍ സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തില്‍ ലാന്റ് റവന്യു കമ്മീഷണര്‍ 01.06.2023 തീയതിയിലെ എല്‍.ആർ./1252/2021-എല്‍.ആർ(ജെ7) നമ്പര്‍ കത്ത് പ്രകാരം സര്‍ക്കാരിന് സമര്‍പ്പിച്ച റിപ്പോര്‍ട്ടില്‍ സ്വീകരിച്ചിട്ടുള്ള നടപടി വിശദമാക്കാമോ; ഇതു സംബന്ധിച്ച സര്‍ക്കാര്‍ ഫയല്‍ നമ്പര്‍ എത്രയെന്ന് വ്യക്തമാക്കാമോ ?

പൂഞ്ഞാര്‍ മണ്ഡലത്തിൽ എത്ര പട്ടയ അപേക്ഷകളാണ് തീർപ്പ് കൽപ്പിക്കാനുള്ളതെന്ന് വില്ലജ് അടിസ്ഥാനത്തിൽ വ്യക്തമാക്കുമോ;

പ്രസ്തുത അപേക്ഷകളിന്മേൽ സ്വീകരിച്ചുവരുന്ന നടപടികൾ വിശദമാക്കുമോ;

പട്ടയ വിതരണം കൂടുതല്‍ വേഗത്തിലാക്കാൻ നടപടി സ്വീകരിച്ചിട്ടുണ്ടോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം സംസ്ഥാനത്ത് എത്ര പേര്‍ക്ക് അവരുടെ കെെവശഭൂമിയ്ക്ക് പട്ടയം നല്‍കിയിട്ടുണ്ടെന്ന് വ്യക്തമാക്കാമോ;

പട്ടയം ലഭിച്ചവരുടെ എണ്ണം ജില്ലകള്‍ തിരിച്ച് വ്യക്തമാക്കുമോ;

പട്ടയത്തിന് വേണ്ടി സമര്‍പ്പിച്ച അപേക്ഷകളില്‍ വകുപ്പുതലത്തില്‍ ആവശ്യമായ അന്വേഷണം നടത്തി സമയബന്ധിതമായി പട്ടയം അനുവദിച്ചുനല്‍കുന്നതിന് എന്തെല്ലാം നടപടികളാണ് സ്വീകരിച്ചിട്ടുളളതെന്ന് വ്യക്തമാക്കാമോ?

നിലവിലെ സര്‍ക്കാര്‍ വന്നതിനുശേഷം തൃശൂര്‍ ജില്ലയിലെ തലപ്പിളളി താലൂക്കിന് കീഴില്‍ ഇതേവരെ എത്ര പേര്‍ക്ക് കെെവശ ഭൂമിയ്ക്ക് പട്ടയം നല്‍കിയിട്ടുണ്ടെന്ന് വ്യക്തമാക്കാമോ;

പട്ടയം ലഭിച്ചവരുടെ എണ്ണം സംബന്ധിച്ച വിവരം വില്ലേജുകള്‍ തിരിച്ച് വ്യക്തമാക്കാമോ; വിശദമാക്കുമോ?

റിവര്‍ മാനേജ്മെന്റ് ഫണ്ട് വിനിയോഗിച്ച് എന്തെല്ലാം പദ്ധതികളാണ് നടപ്പിലാക്കി വരുന്നതെന്ന് വിശദമാക്കാമോ;

നദികളില്‍ വേനല്‍ക്കാല നീരൊഴുക്ക് ഉറപ്പാക്കുന്നതിന് എന്തെല്ലാം പദ്ധതികളാണ് ചെയ്തുവരുന്നതെന്ന് അറിയിക്കാമോ?

കോഴിക്കോട് കോട്ടൂളി, എരണിപ്പാലം പ്രദേശങ്ങളില്‍ സ്ഥിതി ചെയ്യുന്ന സരോവരം പ്രദേശത്ത് അനധികൃതമായി തണ്ണീര്‍ത്തടങ്ങള്‍ നികത്തുന്ന വിഷയം ശ്രദ്ധയില്‍പ്പെട്ടിട്ടുണ്ടോ; എങ്കില്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

അനധികൃതമായി മണ്ണിട്ട് നികത്തിയ തണ്ണീര്‍ത്തടങ്ങള്‍ പൂര്‍വ്വ സ്ഥിതിയിലാക്കാന്‍ നടപടി സ്വീകരിക്കുമോ;

പ്രസ്തുത പ്രദേശത്ത് അനധികൃതമായി തണ്ണീര്‍ത്തടം നികത്തിയവര്‍ക്കെതിരെ ശക്തമായ നിയമ നടപടികള്‍ സ്വീകരിക്കുമോ; വ്യക്തമാക്കാമോ?

ഈ സര്‍ക്കാരിന്റെ കാലയളവില്‍ ഇടുക്കി ജില്ലയിലെ ദേവികുളം താലൂക്കില്‍ ഭൂമി തരംമാറ്റുന്നതിന് എത്ര അപേക്ഷകള്‍ ലഭിച്ചിട്ടുണ്ട്; വര്‍ഷവും വില്ലേജും തിരിച്ച് അറിയിക്കുമോ;

ഇവയില്‍ തരംമാറ്റൽ നടപടികള്‍ പൂര്‍ത്തിയാക്കി എത്ര അപേക്ഷകള്‍ തീർപ്പാക്കിയിട്ടുണ്ട്; വര്‍ഷവും വില്ലേജും തിരിച്ച് അറിയിക്കുമോ;

തീർപ്പാക്കിയ അപേക്ഷകളിലെ അപേക്ഷകരുടെ വിശദാംശം ലഭ്യമാക്കുമോ;

ദേവികുളം ആർ.ഡി.ഒ. ഓഫീസില്‍ ഭൂമി തരംമാറ്റ അപേക്ഷകള്‍ തീര്‍പ്പാക്കുന്നതില്‍ കാലതാമസം നേരിടുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇവ പരിഹരിക്കുന്നതിന് നടപടികള്‍ സ്വീകരിച്ചിട്ടുണ്ടോ; വിശദമാക്കാമോ?

സംസ്ഥാനത്ത് ഭൂമി തരംമാറ്റുന്നതിനുളള അപേക്ഷകള്‍ തീര്‍പ്പാക്കുന്നതില്‍ കാലതാമസം നേരിടുന്ന വിവരം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് സംബന്ധിച്ച് പരിശോധനകള്‍ നടത്തിയിട്ടുണ്ടോയെന്ന് അറിയിക്കാമോ;

ഭൂമി തരംമാറ്റുന്നതിനുളള നടപടിക്രമങ്ങളുടെ വിശദാംശം നല്‍കാമോ;

അപേക്ഷകളുടെ അതിവേഗ തീര്‍പ്പാക്കല്‍ ദൗത്യത്തിനായി സ്വീകരിച്ച നടപടികള്‍ വിശദമാക്കാമോ;

ഭൂമി തരംമാറ്റല്‍ വേഗത്തിലാക്കുന്നതിന് സ്വീകരിച്ച നടപടികള്‍ ഫലപ്രദമാണോയെന്ന് പരിശോധിച്ചിട്ടുണ്ടോ; വ്യക്തമാക്കാമോ?

കേരള നെൽവയൽ തണ്ണീർത്തട സംരക്ഷണ നിയമത്തിലെ ഇളവുകൾ പ്രകാരം ഭൂമി തരംമാറ്റുന്നതിന് ലഭിക്കുന്ന അപേക്ഷകളുടെ എണ്ണം വര്‍ദ്ധിച്ചുവരുന്നതായി ശ്രദ്ധയില്‍പ്പെട്ടിട്ടുണ്ടോ; ആയത് തീർപ്പാക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ;

ഇത്തരത്തില്‍ പട്ടാമ്പി താലൂക്കില്‍ നിന്ന് എത്ര അപേക്ഷകള്‍ ലഭിച്ചിട്ടുണ്ടെന്നും എത്രയെണ്ണം തീര്‍പ്പാക്കിയെന്നും ശേഷിക്കുന്നവ എത്രയെന്നും വില്ലേജ് തിരിച്ച് വിവരം നല്‍കുമോ?

ഭൂമി തരംമാറ്റല്‍ വേഗത്തിലാക്കുന്നതിന് എന്തെല്ലാം പദ്ധതികളാണ് ആവിഷ്ക്കരിച്ചിട്ടുള്ളത്; വിശദമാക്കാമോ;

വര്‍ഷങ്ങളായി വീടുവെച്ച് താമസിക്കുന്ന 'പുരയിടം' രേഖയില്‍ 'നഞ്ച'യായി തന്നെ കിടക്കുകയാണെങ്കില്‍ എളുപ്പത്തില്‍ തരം മാറ്റി നല്‍കുന്നതിന് നടപടികള്‍ കൈക്കൊള്ളാമോ?

ഏറ്റുമാനൂർ-എറണാകുളം റോഡിലെ അപകടകരമായ വളവുകൾ നിവർത്തുന്നതിനാവശ്യമായ സ്ഥലമേറ്റെടുപ്പ് മന്ദഗതിയിലാകുന്നതിനുള്ള കാരണം വിശദമാക്കാമോ; പദ്ധതിയുടെ പുരോഗതി വിശദീകരിക്കാമോ;

പ്രസ്തുത പദ്ധതിയുമായി ബന്ധപ്പെട്ട അടിസ്ഥാന വിലനിര്‍ണ്ണയ റിപ്പോര്‍ട്ട് തയ്യാറാക്കി  നല്‍കിയിട്ടുണ്ടോ; ഇല്ലെങ്കില്‍ കാരണം വിശദീകരിക്കാമോ; അടിസ്ഥാന വിലനിര്‍ണ്ണയ റിപ്പോര്‍ട്ട്, മഹസർ എന്നിവ തയ്യാറാക്കുന്നതിന് ഇനി എത്ര സമയം ആവശ്യമാണെന്ന് അറിയിക്കാമോ;

കാണക്കാരി, മുട്ടുചിറ, കടുത്തുരുത്തി എന്നീ വില്ലേജുകളിൽ ഉൾപ്പെട്ട ചില സബ് ഡിവിഷൻ നമ്പരുകളും വടയാർ വില്ലേജിലെ എല്ലാ സബ് ഡിവിഷൻ നമ്പരുകളും റീസർവേ നമ്പരുകളും റിക്വസിഷനിലും സർക്കാർ ഉത്തരവിലും ഉൾപ്പെടുത്തി ലഭ്യമാക്കണമെന്ന വിഷയത്തിൽ എന്ത് പുരോഗതി ഉണ്ടായിട്ടുണ്ടെന്നറിയിക്കാമോ;

ലാന്റ് അക്വിസിഷന്‍ കോസ്റ്റ് കണക്കാക്കുന്നതിനുള്ള നടപടികൾ ഏതു ഘട്ടത്തിലാണെന്ന് അറിയിക്കാമോ; ആയത് എത്ര സമയത്തിനുള്ളില്‍ പൂര്‍ത്തീകരിക്കാന്‍ കഴിയുമെന്ന് വിശദീകരിക്കാമോ?

കോഴിക്കോട് ജില്ലയിലെ പാവങ്ങാട്- ഉള്ളിയേരി- കുറ്റ്യാടി- ചൊവ്വ (പി.യു.കെ.സി) റോഡ് വീതി കൂട്ടി നവീകരിക്കുന്നതിനായുള്ള ഭൂമിയേറ്റെടുക്കല്‍ നടപടി നിലവിൽ ഏത് ഘട്ടത്തിലാണ്; വിശദമാക്കാമോ?

മാവേലിക്കര മണ്ഡലത്തിലെ മിച്ചല്‍ ജംഗ്ഷന്‍ നവീകരണത്തിന് ഭൂമി ഏറ്റെടുക്കലുമായി ബന്ധപ്പെട്ട് സ്വീകരിച്ച നടപടികള്‍ വിശദമാക്കുമാേ?

നെയ്യാറ്റിന്‍കര ജനറല്‍ ആശുപത്രിയുടെ വികസനത്തിനായി ഭൂമി ഏറ്റെടുക്കുന്നതിനുള്ള നടപടികളുടെ നിലവിലെ സ്ഥിതി വ്യക്തമാക്കുമോ; ഭൂമി ഏറ്റെടുക്കലിന് എന്തൊക്കെ നടപടികളാണ് പൂര്‍ത്തീകരിക്കേണ്ടതെന്ന് വിശദമാക്കുമോ?

മങ്കട മണ്ഡലത്തിലെ ഒരോടം പാലം-വൈലോങ്ങര ബൈപ്പാസ് നിര്‍മ്മാണവുമായി ബന്ധപ്പെട്ട സ്ഥലമേറ്റെടുക്കല്‍ പ്രവൃത്തിയുടെ എന്തെല്ലാം നടപടിക്രമങ്ങള്‍ പൂര്‍ത്തിയായിട്ടുണ്ടെന്നും ബാക്കിയുള്ള നടപടികൾ എന്തൊക്കെയെന്നും പ്രവൃത്തിയുടെ നിലവിലെ സ്ഥിതി അറിയിക്കുമോ;

പ്രസ്തുത സ്ഥലമേറ്റെടുക്കല്‍ നടപടികള്‍ അടിയന്തരമായി പൂര്‍ത്തിയാക്കുന്നതിന് ആവശ്യമായ നടപടി സ്വീകരിക്കുമോ?

കോഴിക്കോട് അന്താരാഷ്ട്ര വിമാനത്താവളത്തിന്റെ റൺവേ വികസനത്തിന് വേണ്ടി പുതുതായി എത്ര സ്ഥലം ഏറ്റെടുത്തിട്ടുണ്ടെന്നും ഇതിന്മേൽ ഇതുവരെ ചെലവഴിച്ച തുക എത്രയാണെന്നും എത്ര തുക ആർക്കെല്ലാം നൽകാനുണ്ടെന്നുമുള്ള വിശദാംശങ്ങൾ ലഭ്യമാക്കുമോ;

സ്ഥലം ഏറ്റെടുപ്പിനോടനുബന്ധിച്ച് നിലവിലുള്ള വീടുകള്‍, മറ്റു കെട്ടിടങ്ങള്‍, സ്ഥലങ്ങള്‍ എന്നിവിടങ്ങളിലേക്ക് പ്രവേശനം അപ്രാപ്യമായതിനെ സംബന്ധിച്ച് എത്ര പരാതികൾ സർക്കാരിന്റെ ശ്രദ്ധയിൽപ്പെട്ടിട്ടുണ്ട്; ഇവ പരിഹരിക്കുന്നതിന് എന്തെല്ലാം നടപടികളാണ് സ്വീകരിക്കുന്നതെന്ന് വ്യക്തമാക്കുമോ;

ഭാവിയിൽ ഉണ്ടാകാനിടയുള്ള വിമാനത്താവളത്തിന്റെ വികസനവുമായി ബന്ധപ്പെട്ട് പുതുതായി ഭൂമി ഏറ്റെടുക്കണം എന്നാവശ്യപ്പെട്ട് എയർപോർട്ട് അതോറിറ്റി സർക്കാറിന് പ്രൊപ്പോസൽ നൽകിയിട്ടുണ്ടോ; വിശദാംശങ്ങൾ ലഭ്യമാക്കുമോ;

ഭൂമി ഏറ്റെടുക്കാനുള്ള സർക്കാർ അനുമതിയോ 11(1) നോട്ടിഫിക്കേഷനോ വരുന്നതിനുമുമ്പ് ഭാവിയിലെ വികസനത്തിന് തടസ്സമാകുമെന്നുകണ്ട് വിമാനത്താവളത്തിനോട് ചേർന്ന് കിടക്കുന്ന ഭൂമിയിൽ വീട് വയ്ക്കുന്നതിന് നിരാക്ഷേപ പത്രം നൽകാത്ത എയർപോർട്ട് അതോറിറ്റിയുടെ നടപടികൾ ശ്രദ്ധയിൽപ്പെട്ടിട്ടുണ്ടോ; എങ്കിൽ ഇക്കാര്യത്തിൽ ഇടപെടുന്നതിനുള്ള നടപടി സ്വീകരിക്കുമോ?

കാസർകോട് ജില്ലയിലെ മൊഗ്രാൽ ഗവണ്‍മെന്റ് യുനാനി ആശുപത്രിക്ക് ഭൂമി അനുവദിക്കുന്നതിനുള്ള നടപടി നിലവിൽ ഏത് ഘട്ടത്തിലാണെന്ന് വിശദമാക്കുമോ;

പ്രസ്തുത വിഷയം സംബന്ധിച്ച പ്രപ്പോസൽ ലാന്റ് റവന്യു കമ്മീഷണർ കാര്യാലയത്തിൽ നിന്നും സർക്കാരിലേക്ക് അയച്ചിട്ടുണ്ടോ; ഫയൽ നമ്പർ സഹിതം വിശദവിവരങ്ങൾ ലഭ്യമാക്കുമോ;

പ്രസ്തുത ആശുപത്രിക്ക് ഭൂമി എപ്പോൾ ലഭ്യമാക്കുമെന്ന് വ്യക്തമാക്കുമോ?

ചിറയിന്‍കീഴ് മണ്ഡലത്തില്‍ മുദാക്കല്‍ ഗ്രാമപ്പഞ്ചായത്തില്‍ പ്രവര്‍ത്തിക്കുന്ന അയിലം ഗവ. ഹയര്‍ സെക്കണ്ടറി സ്കൂളിന്റെ അധീനതയിലുണ്ടായിരുന്ന എത്ര സെന്റ് ഭൂമി അയിലം പാലം നിര്‍മ്മാണത്തിന്റെ ഭാഗമായുള്ള അപ്രോച്ച് റോഡ് നിര്‍മ്മാണത്തിനായി ഏറ്റെടുത്തുവെന്ന് വ്യക്തമാക്കാമോ;

ഏറ്റെടുത്ത ഭൂമിക്ക് പകരമായി സ്കൂളിനോട് ചേര്‍ന്നുള്ള എത്ര സെന്റ് പുറമ്പോക്ക് ഭൂമി സ്കൂളിന് അനുവദിച്ചുവെന്ന് വ്യക്തമാക്കാമോ; പ്രസ്തുത വിഷയം സംബന്ധിച്ച് സര്‍ക്കാര്‍ പുറപ്പെടുവിച്ച ഉത്തരവിന്റെ പകര്‍പ്പ് ലഭ്യമാക്കാമോ?

നാദാപുരം മണ്ഡലത്തില്‍ വാടക കെട്ടിടത്തിൽ പ്രവർത്തിക്കുന്ന എടച്ചേരി സബ്ബ് രജിസ്ട്രേഷൻ ഓഫീസിന് കെട്ടിടം നിർമ്മിക്കുന്നതിനായി റവന്യു വകുപ്പിന്റെ പുറംപോക്ക് ഭൂമി അനുവദിക്കുന്ന വിഷയത്തിൽ നാളിതുവരെ എന്തൊക്കെ നടപടികൾ സ്വീകരിച്ചുവെന്ന് വിശദമാക്കാമോ?

വൈത്തിരി താലൂക്ക് ലാൻഡ് ബോർഡിൽ എത്ര മിച്ചഭൂമി കേസുകളാണ് നിലവിലുള്ളതെന്നും കഴിഞ്ഞ പത്ത് വർഷക്കാലം എത്ര ഏക്കർ മിച്ചഭൂമി ഏറ്റെടുക്കുന്നതിന് ഉത്തരവ് പുറപ്പെടുവിച്ചിട്ടുണ്ടെന്നും അറിയിക്കാമോ; പ്രസ്തുത മിച്ചഭൂമി ഏറ്റെടുക്കുന്നതിനുള്ള ഉത്തരവുകളുടെ പകർപ്പ് ലഭ്യമാക്കുമോ;

പ്രസ്തുത ഉത്തരവിന്റെ അടിസ്ഥാനത്തിൽ എത്ര ഏക്കർ ഭൂമി ഏറ്റെടുത്തുവെന്ന് വ്യക്തമാക്കാമോ;

രാജഗിരി എസ്റ്റേറ്റിന്റെ 200 ഏക്കർ മിച്ചഭൂമി ഏറ്റെടുക്കുന്നതിന് 2016-ൽ ഇറക്കിയ ഉത്തരവുപ്രകാരം എന്തെല്ലാം തുടർനടപടി സ്വീകരിച്ചുവെന്ന് വ്യക്തമാക്കാമോ;

200 ഏക്കർ മിച്ചഭൂമിക്ക് ആധാരം നിർമ്മിച്ച് വിറ്റത് ആരാണെന്നും വാങ്ങിയത് ആരാണെന്നും വ്യക്തമാക്കാമോ?

വയനാട്ടിലെ ചെമ്പ്ര എസ്റ്റേറ്റിൽ എത്ര മിച്ചഭൂമി ഉണ്ടെന്നാണ് 1976-ൽ താലൂക്ക് ലാൻഡ് ബോർഡ് ഉത്തരവിറക്കിയത്; അതിന്റെ പകർപ്പ് ലഭ്യമാക്കാമോ;

ഇതിന്മേൽ എന്തെല്ലാം നടപടികൾ സ്വീകരിച്ചുവെന്നും മിച്ചഭൂമി ഏറ്റെടുക്കാൻ കഴിഞ്ഞിട്ടുണ്ടോയെന്നും ഇല്ലെങ്കിൽ അതിന്റെ കാരണമെന്താണെന്നും വ്യക്തമാക്കാമോ;

വയനാട്ടിലെ രാജഗിരി എസ്റ്റേറ്റിൽ എത്ര മിച്ചഭൂമി ഉണ്ടെന്നാണ് 1976-ൽ വൈത്തിരി താലൂക്ക് ലാൻഡ് ബോർഡ് ഉത്തരവിറക്കിയത്; അതിൻറെ പകർപ്പ് ലഭ്യമാക്കാമോ;

ഇതിന്മേൽ എന്തെല്ലാം തുടർനടപടികൾ സ്വീകരിച്ചുവെന്നും നിലവിൽ മിച്ചഭൂമി ആരുടെ കൈവശമാണെന്നും വ്യക്തമാക്കാമോ?

കുന്നത്തുനാട് മണ്ഡലത്തിലെ വടവുകോട്-പുത്തന്‍കുരിശ് ഗ്രാമപഞ്ചായത്തില്‍ ഫാക്റ്റ് ഗേറ്റിന് സമീപമുള്ള 40 സെന്റോളം വരുന്ന റവന്യു പുറംപോക്ക് ഭൂമി പഞ്ചായത്തിന് ലീസിന് കിട്ടുന്നതിനുവേണ്ടിയുള്ള അപേക്ഷ ശ്രദ്ധയില്‍പ്പെട്ടിട്ടുണ്ടോ;

ഇത് സംബന്ധിച്ച് ലാന്‍ഡ് റവന്യു കമ്മീഷണറേറ്റില്‍ ഉള്ള എല്‍.ആർ.ജെ.റ്റി./554/224 ഫയലില്‍ സ്വീകരിച്ചിട്ടുള്ള നടപടികള്‍ വിശദമാക്കാമോ;

പ്രസ്തുത ഫയല്‍ ഗവ. സെക്രട്ടേറിയറ്റില്‍ ഉണ്ടെങ്കില്‍ ഫയല്‍ നമ്പറും സ്വീകരിച്ചിട്ടുള്ള നടപടികളും വിശദമാക്കാമോ;

പ്രസ്തുത സ്ഥലം പഞ്ചായത്തിന്റെ ഷോപ്പിംഗ് കോംപ്ലക്സിനോട് ചേര്‍ന്ന് കിടക്കുന്നതിനാല്‍ പഞ്ചായത്തിന് ലീസിന് ലഭിച്ചാല്‍ പ്രസ്തുത സ്ഥലം നല്ല രീതിയില്‍ ഉപയോഗപ്പെടുത്തുവാന്‍ കഴിയുമെന്ന ആവശ്യത്തിന്മേല്‍ വേഗത്തില്‍ നടപടി സ്വീകരിക്കുമോ; വ്യക്തമാക്കാമോ?

സംസ്ഥാനത്ത് ലാന്റ് ട്രിബ്യൂണലുകളില്‍ എത്ര കേസ്സുകള്‍ നിലവിലുണ്ടെന്നും ഈ സര്‍ക്കാര്‍ അധികാരത്തില്‍ വന്നശേഷം എത്ര കേസ്സുകള്‍ക്ക് തീര്‍പ്പ് കല്പിച്ചിട്ടുണ്ടെന്നും വ്യക്തമാക്കാമോ?

കാലവര്‍ഷക്കെടുതിയില്‍ തകര്‍ന്ന ഫ്ലഡ് റോഡുകളുടെ ശാശ്വതമായ സംരക്ഷണമുറപ്പാക്കാന്‍ സൈഡ് കോണ്‍ക്രീറ്റ് ഉള്‍പ്പെടെ ചെയ്ത് നവീകരിക്കുന്നതിന് പകരം റീടാറിംഗ് നടത്തിയാല്‍ അടുത്ത മഴയില്‍ റോഡ്‌ വീണ്ടും തകര്‍ന്ന് പോകുമെന്ന വിഷയം ശ്രദ്ധയില്‍പ്പെട്ടിട്ടുണ്ടോ; എങ്കിൽ പ്രസ്തുത വിഷയം പരിഹരിക്കുന്ന കാര്യം പരിശോധിക്കുമോ; വ്യക്തമാക്കുമോ;

വെള്ളപ്പൊക്ക നിവാരണ പദ്ധതി പ്രകാരമുള്ള ഫണ്ടുകള്‍ വിനിയോഗിക്കുന്നതിന് നേരത്തെയുള്ള മാനദണ്ഡങ്ങളില്‍ മാറ്റങ്ങൾ വരുത്തിയിട്ടുണ്ടോ; എങ്കിൽ വിശദമാക്കുമോ;

വെള്ളപ്പൊക്ക നിവാരണ പദ്ധതികളുടെ നേരത്തെയുള്ള മാനദണ്ഡങ്ങളും പുതുക്കിയ മാനദണ്ഡങ്ങളും സംബന്ധിച്ച ഉത്തരവുകളുടെയോ സര്‍ക്കുലറുകളുടെയോ പകര്‍പ്പ് ലഭ്യമാക്കുമോ;

വെള്ളപ്പൊക്ക നിവാരണ പദ്ധതികളുടെ നിലവിലുള്ള മാനദണ്ഡങ്ങള്‍ പുനഃപരിശോധിക്കുന്നതിന് എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ?

റവന്യൂ ഇ-സർവീസസ് പോർട്ടൽ വഴി ആധാറും തണ്ടപ്പേരും തമ്മിൽ ബന്ധിപ്പിക്കുന്നതിന് സമർപ്പിച്ചിട്ടുള്ള ഓൺലൈൻ അപേക്ഷകൾ കൃത്യമായി പ്രോസസ്സ് ചെയ്യുന്നതിന് എന്തെങ്കിലും സാങ്കേതിക തടസ്സങ്ങൾ ഉണ്ടോയെന്ന് അറിയിക്കാമോ;

തണ്ടപ്പേരിൽ ഒന്നിൽ കൂടുതൽ പേർ ഉൾപ്പെട്ടിട്ടുണ്ടെങ്കിൽ ഒരാളുടെ പേരിൽ മാത്രമായി ആധാറും തണ്ടപ്പേരും ബന്ധിപ്പിക്കുന്നതിന് അപേക്ഷ സമർപ്പിക്കണമെന്ന് റവന്യൂ ഇ-സർവീസസ് പോർട്ടൽ വെബ്സൈറ്റിൽ വ്യവസ്ഥ ചെയ്തിട്ടുണ്ടോ; എങ്കിൽ വിശദവിവരങ്ങൾ നൽകാമോ;

തണ്ടപ്പേരിൽ ഒന്നിൽ കൂടുതൽ പേർ ഉൾപ്പെടുകയും ഒരാളുടെ പേരിൽ മാത്രമായി ആധാറും തണ്ടപ്പേരും ബന്ധിപ്പിക്കുന്നതിന് അപേക്ഷ സമർപ്പിക്കുകയും ചെയ്താല്‍ പ്രസ്തുത അപേക്ഷ നിരസിക്കുന്നതിന് വ്യവസ്ഥ ചെയ്തിട്ടുണ്ടോ; വിശദ വിവരങ്ങൾ നൽകാമോ?

കുന്നത്തുനാട് മണ്ഡലത്തിലെ മഴുവന്നൂര്‍ വില്ലേജ് ഓഫീസിന് പുതിയ കെട്ടിടം നിര്‍മ്മിക്കുന്നതിന്റെ പ്രൊപ്പോസല്‍ ശ്രദ്ധയില്‍പ്പെട്ടിട്ടുണ്ടോ;

മഴുവന്നൂര്‍ വില്ലേജ് ഓഫീസ് കെട്ടിട നിർമ്മാണവുമായി ബന്ധപ്പെട്ട് പൊതുമരാമത്ത് വകുപ്പ് മുഖേന 44 ലക്ഷം രൂപയുടെ എസ്റ്റിമേറ്റ് ആള്‍ട്ടറേഷന്‍ പ്രൊപ്പോസല്‍ സമര്‍പ്പിച്ചിട്ടുള്ളത് ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

പറവൂര്‍ താലൂക്കിലെ കുന്നുകര വില്ലേജിന് പകരം കുന്നത്തുനാട് താലൂക്കിലെ മഴുവന്നൂര്‍ വില്ലേജ് ഓഫീസിന് കെട്ടിടത്തിനായി ഡിസിഇകെഎം/6381/2021-എ8 തീയതി 04.09.2022 പ്രകാരം എറണാകുളം ജില്ലാ കളക്ടര്‍ ലാന്റ് റവന്യൂ കമ്മീഷണര്‍ക്ക് സമര്‍പ്പിച്ച അപേക്ഷയില്‍ സ്വീകരിച്ച നടപടി വ്യക്തമാക്കാമോ;

പ്രസ്തുത ആള്‍ട്ടറേഷന്‍ പ്രൊപ്പോസലിന് അംഗീകാരം വേഗത്തില്‍ നല്‍കി മഴുവന്നൂര്‍ വില്ലേജ് ഓഫീസിന് പുതിയ കെട്ടിട നിര്‍മ്മാണത്തിന് അനുമതി ലഭ്യമാക്കുമോ; വിശദമാക്കാമോ?

തരൂര്‍ മണ്ഡലത്തിലെ കാവശ്ശേരി 1 സ്മാര്‍ട്ട് വില്ലേജ് ഓഫീസ് കെട്ടിട നിര്‍മ്മാണം നിലവില്‍ ഏത് ഘട്ടത്തിലാണെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ആലപ്പുഴ മണ്ഡലത്തിലെ സ്മാര്‍ട്ട് വില്ലേജ് ഓഫീസുകളുടെ നിര്‍മ്മാണത്തിനുള്ള ഭരണാനുമതി നല്‍കിയത് എന്നാണെന്നും അനുവദിച്ച തുക എത്രയാണെന്നും നിര്‍വ്വഹണ ഏജന്‍സി ഏതാണെന്നും നിലവിലെ സ്ഥിതി സംബന്ധിച്ചുമുള്ള വിശദവിവരം ലഭ്യമാക്കാമോ;

പ്രസ്തുത പദ്ധതി എന്നത്തേക്ക് പൂര്‍ത്തീകരിക്കാനാവുമെന്ന് വ്യക്തമാക്കാമോ?

പയ്യന്നൂർ താലൂക്ക് ഓഫീസിനായി നിർമ്മിച്ച പുതിയ കെട്ടിടത്തിലേക്ക് ഓഫീസ് മാറ്റുന്നതിനുള്ള നടപടികൾ ഏത് ഘട്ടത്തിലാണെന്ന് അറിയിക്കാമോ;

ഓഫീസ് ആവശ്യത്തിനുള്ള ഫർണീച്ചർ, ഇന്റീരിയർ വർക്ക് എന്നിവ ചെയ്യുന്നതിനുള്ള എസ്റ്റിമേറ്റ് തയ്യാറാക്കി ഭരണാനുമതിക്ക് സമർപ്പിച്ചിട്ടുണ്ടോയെന്ന് വ്യക്തമാക്കാമോ;

പ്രസ്തുത എസ്റ്റിമേറ്റിന് ഭരണാനുമതി നൽകുന്ന കാര്യം പരിഗണനയിലുണ്ടോയെന്ന് വിശദമാക്കാമോ?

സ്മാർട്ട് വില്ലേജ് ഓഫീസായി മാറ്റുന്നതിനായി ഭരണാനുമതി ലഭിച്ച പയ്യന്നൂർ താലൂക്കിലെ വെള്ളോറ വില്ലേജ് ഓഫീസിന്റെ നിർമ്മാണ പ്രവൃത്തികൾ ആരംഭിക്കാത്തതായി ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

നിർമ്മാണ പ്രവൃത്തി വേഗത്തിൽ നടത്തുന്നതിനാവശ്യമായ നടപടി സ്വീകരിക്കുമോ; വ്യക്തമാക്കാമോ?

തരൂർ മണ്ഡലത്തിലെ പുതുക്കാട് സ്മാർട്ട് വില്ലേജ് ഓഫീസ് കെട്ടിട നിർമ്മാണ പ്രവൃത്തി നിലവിൽ ഏത് ഘട്ടത്തിലാണെന്നും പ്രവൃത്തി എന്നത്തേക്ക് പൂർത്തീകരിക്കാൻ കഴിയുമെന്നും വ്യക്തമാക്കാമോ?

വാടക കെട്ടിടത്തിൽ പ്രവർത്തിച്ചുവരുന്ന മണലൂർ പാവറട്ടി വില്ലേജ് ഓഫീസിന് സ്വന്തമായി കെട്ടിടം നിർമ്മിക്കുന്നതിന് സ്വകാര്യ വ്യക്തി വിട്ടുനൽകിയ ഭൂമിയിൽ ഓഫീസ് കെട്ടിടം നിർമ്മിക്കുന്നതിനും സ്മാർട്ട് വില്ലേജ് ഓഫീസാക്കി ഉയർത്തുന്നതിനും ഇതുവരെ സ്വീകരിച്ച നടപടികൾ എന്തെല്ലാമെന്ന് വിശദമാക്കാമോ;

പ്രസ്തുത പ്രവൃത്തി സംബന്ധിച്ച പുതുക്കിയ ഭരണാനുമതി ലഭ്യമാക്കിയിട്ടുണ്ടോ; വിശദാംശങ്ങൾ നൽകാമോ;

പ്രസ്തുത പ്രവൃത്തി ആരംഭിക്കുന്നതിനുവേണ്ട അടിയന്തര നടപടി സ്വീകരിക്കുമോ; വ്യക്തമാക്കാമോ?

ആശ്രിത നിയമനം വഴി നിയമനം ലഭിച്ച്‌ നിലവിൽ കൊല്ലം ജില്ലയിൽ റവന്യൂ വകുപ്പിൽ സർവീസിൽ ഉള്ള ജീവനക്കാരുടെ പേരും തസ്തികകളും ലഭ്യമാക്കാമോ;

ആശ്രിത സർട്ടിഫിക്കറ്റ് നൽകിയത് സംബന്ധിച്ച് കൊല്ലം താലൂക്ക് ഓഫീസിലെ ഫയൽ നം.റ്റിഎല്‍കെകെഎല്‍എം/4434/2023-എ5 പ്രകാരം കൊല്ലം തഹസിൽദാർ നൽകിയ സർട്ടിഫിക്കറ്റിന്റെ പകർപ്പും പെരിനാട് വില്ലേജ് ഓഫീസറുടെ റിപ്പോർട്ടും അനുബന്ധ രേഖകളും ലഭ്യമാക്കാമോ?

കരുതലും കെെത്താങ്ങും അദാലത്തില്‍ തീര്‍പ്പാക്കിയ അപേക്ഷയിന്മേലുള്ള ഉത്തരവ് നടപ്പിലാക്കുന്നതിന് വീണ്ടും സര്‍ക്കാര്‍ അനുമതി ആവശ്യമുണ്ടാേയെന്ന് വ്യക്തമാക്കാമാേ;

28.02.2024- ലെ കാസര്‍ഗാേഡ് താലൂക്ക് അദാലത്തില്‍ യു.ബി. ആയിഷ, എയ്യള, തെക്കിന്‍ എന്നയാളുടെ ഭൂനികുതി സംബന്ധിച്ച പരാതി തീര്‍പ്പാക്കിയിട്ടുണ്ടാേയെന്ന് അറിയിക്കാമാേ;

പ്രസ്തുത പരാതിയിന്മേല്‍ സ്വീകരിച്ച നടപടി വിശദമാക്കുമാേ?

അരൂര്‍ പോലീസ് സ്റ്റേഷന്‍ നിര്‍മ്മാണവുമായി ബന്ധപ്പെട്ട് എൻ.എച്ച്-66 ന് സമീപം കണ്ടെത്തിയ പുറമ്പോക്ക് സ്ഥലം ആഭ്യന്തര വകുപ്പിന് കൈമാറണമെന്നുള്ള അപേക്ഷയില്‍ എന്തെല്ലാം നടപടികള്‍ സ്വീകരിച്ചെന്ന് വിശദമാക്കാമോ?

അഴീക്കാേട് മണ്ഡലത്തില്‍ റവന്യൂ വകുപ്പിന്റെ കീഴില്‍ നടക്കുന്ന പ്രവൃത്തികൾ ഏതൊക്കെയെന്ന് പഞ്ചായത്ത് തിരിച്ച് വിശദ വിവരം ലഭ്യമാക്കാമാേ?

ദേശീയപാത 66 വികസനത്തിന്റെ ഭാഗമായി മലപ്പുറം ജില്ലയിലെ ഇടിമുഴിക്കൽ മുതൽ പൊന്നാനി വരെയുള്ള പാത വികസനവുമായി ബന്ധപ്പെട്ട് പ്രദേശവാസികൾക്കുണ്ടാകുന്ന പ്രയാസങ്ങൾ സംബന്ധിച്ച് 2023 ജനുവരി 31 മുതൽ 2025 ജനുവരി 15 വരെ മലപ്പുറം ജില്ലാ കളക്ടർക്ക് എത്ര പരാതികൾ ലഭിച്ചിട്ടുണ്ടെന്നും അതിന്മേൽ സ്വീകരിച്ച നടപടികളെന്തെന്നും അവയിൽ എത്ര പരാതികൾ പരിഹരിച്ചിട്ടുണ്ടെന്നുമുള്ള വിശദവിവരങ്ങൾ ലഭ്യമാക്കാമോ;

വള്ളിക്കുന്ന് മണ്ഡലത്തിലെ ഇടിമുഴിക്കൽ മുതൽ തലപ്പാറ വരെ പ്രദേശങ്ങളിൽ കോഹിനൂർ, പാണമ്പ്ര, ഇടിമുഴിക്കൽ, കാക്കഞ്ചേരി വളവ്, കാക്കഞ്ചേരി പള്ളിയാളി-ചേലൂപാടം റോഡ് ആക്സസ് നഷ്ടപ്പെട്ടത് സംബന്ധിച്ചും പാണമ്പ്ര പള്ളിയിലേക്ക് മഴവെള്ളവും ചെളിയും ഒലിച്ചിറങ്ങുന്നത് സംബന്ധിച്ചും വെളിമുക്ക് ഫൂട്ട് ഓവർ ബ്രിഡ്ജ് സംബന്ധിച്ചും എത്ര പരാതികൾ ലഭിച്ചുവെന്നും പരാതികളിന്മേൽ സ്വീകരിച്ച നടപടികൾ എന്തൊക്കെയെന്നും പരിഹരിച്ച പരാതികൾ ഏതെല്ലാമെന്നും വ്യക്തമാക്കാമോ;

പ്രസ്തുത വിഷയം ജില്ലാ വികസന സമിതിയിൽ ഉന്നയിച്ചതു കൊണ്ട് പരിഹാരം ലഭിച്ച പരാതികൾ ഏതെല്ലാമെന്നും ഇനിയും പരിഹരിക്കാനുള്ളവ ഏതൊക്കെയെന്നും അറിയിക്കാമോ?

കൊല്ലം താലൂക്ക് വിഭജിച്ച് ചാത്തന്നൂർ ആസ്ഥാനമായി പുതിയ താലൂക്ക് രൂപീകരിക്കുന്നതിനുള്ള നടപടികളുടെ പുരോഗതി വ്യക്തമാക്കാമോ;

പ്രസ്തുത താലൂക്ക് രൂപീകരണം നടപ്പിലാക്കുന്നതിന് എന്തെല്ലാം തടസങ്ങളാണ്‌ അവശേഷിക്കുന്നതെന്ന് വിശദമാക്കുമോ?

നിലവിൽ അറ്റകുറ്റ പണികൾ നടത്തിയതോ കൂടുതൽ നിലകൾ കൂട്ടിച്ചേർത്തതോ ആയ ഒരു കെട്ടിടത്തിന്റെ നികുതി (കേരള ബിൽഡിംഗ് ടാക്സ്) കണക്കാകുമ്പോൾ ആകെ ഏരിയയുടെ നിലവിലുള്ള താരിഫ് പ്രകാരം തുക കണക്കാക്കുന്നതിലുള്ള അശാസ്ത്രീയത ശ്രദ്ധയിൽപ്പെട്ടിട്ടുണ്ടോ;

ഇത്തരം കേസുകളിൽ മുൻകാലങ്ങളിൽ ചെറിയ കൂട്ടിച്ചേർക്കലുകൾ നടത്തിയ കെട്ടിടങ്ങൾക്ക് പോലും വലിയ തുക കെട്ടിട നികുതിയായി ഈടാക്കേണ്ട സാഹചര്യമാണുള്ളതെന്ന കാര്യം പരിശോധിച്ചിട്ടുണ്ടോയെന്ന് അറിയിക്കാമോ;

കെട്ടിട നികുതി നിർണ്ണയത്തിലെ അശാസ്ത്രീയത പരിഹരിക്കുവാനും മുൻകാലങ്ങളിൽ അന്നത്തെ നിരക്കിൽ തുക ഈടാക്കിയിട്ടുണ്ടെങ്കിൽ തുക കുറവ് ചെയ്യുന്നതിന് പകരം അത്രയും ഏരിയ കുറവ് ചെയ്തിട്ട് ബാക്കി വരുന്ന ഏരിയയിക്ക് നിലവിലുള്ള നിരക്ക് നിശ്ചയിക്കുന്ന കാര്യവും പരിഗണിക്കുമോ; വ്യക്തമാക്കാമോ?

റവന്യൂ വകുപ്പിൽ നടപ്പിലാക്കിയ ഓൺലൈൻ ട്രാൻസ്ഫർ-എച്ച്.ആര്‍.എം.എസ്. 2025 നടപ്പിൽ വരുത്തുന്നതിനായി നാളിത് വരെ എന്തെല്ലാം നടപടിക്രമങ്ങൾ പാലിച്ചു; വിശദമാക്കാമോ;

എച്ച്.ആര്‍.എം.എസ്. പ്രകാരം തിരുവനന്തപുരം, തൃശ്ശൂർ ജില്ലകളില്‍ നിന്നും മറ്റു ജില്ലകളിൽ നിയമനം കിട്ടിയ എത്ര പേർ വർക്കിംഗ്‌ അറേഞ്ച്മെന്റിൽ തിരുവനന്തപുരം, തൃശ്ശൂർ ജില്ലകളിലെ വിവിധ റവന്യൂ ഓഫീസുകളിൽ ജോലി ചെയ്യുന്നുണ്ട്; ഇവരുടെ പേരും തസ്തികയും സഹിതം വ്യക്തമാക്കാമോ;

തെക്കൻ ജില്ലകളിൽ നിന്നും എച്ച്.ആര്‍.എം.എസ്. പ്രകാരം സ്ഥലം മാറ്റപ്പെടുന്നവർ തിരിച്ച് സ്വന്തം സ്റ്റേഷനിൽ എത്തുന്നതിനുള്ള മുൻഗണനാ മാനദണ്ഡമായി പരിഗണിക്കുന്നത് വിദൂര ജില്ലകളിലേക്ക് (കാസറഗോഡ്, കണ്ണൂർ, മലപ്പുറം, പാലക്കാട്‌) ലഭിച്ച സ്ഥലം മാറ്റം, സിനിയോറിറ്റി ഇവയിലേതാണെന്ന് വ്യക്തമാക്കാമോ;

എച്ച്.ആര്‍.എം.എസ്. പ്രകാരമുള്ള സ്ഥലം മാറ്റം എല്ലാ ജീവനക്കാർക്കും ബാധകമാണെന്ന് ഇത് സംബന്ധിച്ച ഉത്തരവിൽ പറയുമ്പോഴും വില്ലേജ് ഫീൽഡ് അസിസ്റ്റന്റ്, വില്ലേജ് അസിസ്റ്റന്റ് എന്നിവർക്ക് ജില്ലാതലത്തിലുള്ള ട്രാൻസ്ഫർ പോലും നടപ്പാക്കാത്തത് എന്തുകൊണ്ടാണെന്ന് വ്യക്തമാക്കാമോ;

മുന്‍ എച്ച്.ആര്‍.എം.എസ്, നടപടിക്രമ പ്രകാരം നിലവിൽ കാസര്‍ഗോഡ്, കണ്ണൂർ, മലപ്പുറം ജില്ലകളിൽ തിരുവനന്തപുരം, കൊല്ലം, ആലപ്പുഴ ജില്ലകളിലുള്ള സീനിയർ ക്ലാർക്ക്/സ്പെഷ്യൽ വില്ലേജ് ഓഫീസർ, വില്ലേജ് ഓഫീസർ /റവന്യൂ ഇൻസ്പെക്ടർ, ഡെപ്യൂട്ടി തഹസീൽദാർ/ജൂനിയർ സുപ്രണ്ട് എന്നീ തസ്തികയിൽ എത്ര പേർ ജോലി ചെയ്യുന്നുണ്ട്; വ്യക്തമാക്കാമോ;

വില്ലേജ് ഫീൽഡ് അസിസ്റ്റന്റുമാരുടെ എച്ച്.ആര്‍.എം.എസ്, വഴിയുള്ള ട്രാന്‍സ്ഫർ നടപടിക്രമങ്ങളുടെ പുരോഗതി വ്യക്തമാക്കാമോ?

കോഴിക്കോട് താലൂക്കിൽ മാവൂര്‍ വില്ലേജില്‍ തെങ്ങിലക്കടവ് കാന്‍സര്‍ സെന്ററിന്റെ സ്ഥലം ഏതാെക്കെ സര്‍വ്വേ നമ്പരുകളിലായി എത്ര ഏക്കറാണ് നിലവിലുളളതെന്ന് വ്യക്തമാക്കാമോ;

2010 ഡിസംബര്‍ മാസത്തില്‍ സര്‍ക്കാരിന് സൗജന്യമായി വിട്ടുകിട്ടിയ പ്രസ്തുത സ്ഥലവും കെട്ടിടങ്ങളും ഉപയോഗപ്പെടുത്തുന്നതിന് റവന്യു, കോഴിക്കോട് ജില്ലാ പഞ്ചായത്ത്, ആരോഗ്യ വകുപ്പ്, മെഡിക്കല്‍ വിദ്യാഭ്യാസം തുടങ്ങിയ വകുപ്പുകളുടെ സംയുക്തയോഗം വിളിച്ചുചേര്‍ക്കാന്‍ നടപടി സ്വീകരിക്കുമോ?

സംസ്ഥാനത്ത് ആരംഭിച്ച ഡിജിറ്റൽ സർവ്വേയുടെ നിലവിലെ പുരോഗതി അറിയിക്കാമോ;

ഡിജിറ്റൽ സർവ്വേയിൽ അടിസ്ഥാന നികുതി രജിസ്റ്ററിലെ ഭൂമിയുടെ അളവും ഡിജിറ്റൽ സർവ്വേയിൽ കണ്ടെത്തുന്ന അളവിലെയും വ്യത്യാസങ്ങൾ ഏതു രീതിയിൽ ക്രമവത്കരിക്കാനാണ് ഉദ്ദേശിക്കുന്നതെന്ന് വിശദമാക്കാമോ;

വാമനപുരം മണ്ഡലത്തിൽ വാമനപുരം, പാങ്ങോട്, പെരിങ്ങമ്മല എന്നീ വില്ലേജുകളിൽ ഡിജിറ്റൽ സർവ്വേ ആരംഭിച്ച് ആറുമാസത്തോളമായെങ്കിലും പഞ്ചായത്തിന്റെ പകുതി റോഡുകൾ പോലും ഇതുവരെ പൂർത്തീകരിക്കാൻ കഴായാത്തതിനാൽ ജനങ്ങൾ വളരേയധികം ബുദ്ധിമുട്ടുകൾ നേരിടുന്ന കാര്യം ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

പ്രസ്തുത സർവ്വേ പൂർത്തിയാക്കാൻ ആവശ്യത്തിന് സർവ്വേയർമാരെ നിയമിച്ച് അടിയന്തര പരിഹാരം ഉണ്ടാക്കാൻ വേണ്ട നടപടികൾ സ്വീകരിക്കുമോ; വിശദമാക്കാമോ?

കേരള തണ്ണീർത്തട സംരക്ഷണ നിയമപ്രകാരമുള്ള ഭൂമി തരംമാറ്റത്തിന് ആർ.ഡി.ഒ-മാർക്ക് നൽകിയിട്ടുള്ള ചുമതല ഡെപ്യൂട്ടി കളക്ടർമാർക്ക് കൂടി നൽകിയിട്ടും അപേക്ഷകൾ തീർപ്പാക്കുന്നതിനും പരാതികൾ കുറയ്ക്കുന്നതിനും ഇപ്പോഴും കാര്യമായ പുരോഗതി കൈവരിച്ചിട്ടില്ല എന്ന കാര്യം ശ്രദ്ധയിൽപ്പെട്ടിട്ടുണ്ടോ; എങ്കിൽ ഇതിന്റെ വിശദാംശം ലഭ്യമാക്കാമോ?

സര്‍വ്വെ വകുപ്പ് നടപ്പിലാക്കി വരുന്ന റീ-സര്‍വ്വെ പ്രവര്‍ത്തനങ്ങള്‍ ഏത് ഘട്ടത്തിലാണെന്ന് വിശദമാക്കാമോ;

2022 നവംബര്‍ 1-ന് ആരംഭിച്ച ഡിജിറ്റല്‍ സര്‍വ്വെയുടെ പ്രവര്‍ത്തനം എത്രത്തോളം നടത്താന്‍ കഴിഞ്ഞിട്ടുണ്ടെന്നും എന്ന് പൂര്‍ത്തീകരിക്കാന്‍ കഴിയും എന്നും വിശദമാക്കാമോ?

എം.എല്‍.എ. യുടെ ആസ്തിവികസന ഫണ്ട് മുഖേന നടപ്പാക്കുന്ന മങ്കട മൂര്‍ക്കനാട് ഗ്രാമ പഞ്ചായത്തിലെ കൊളത്തൂര്‍ കുറുപ്പത്താല്‍ ടൗണ്‍ നവീകരണം, പുഴക്കാട്ടിരി ടൗണ്‍ നവീകരണം എന്നീ പ്രവൃത്തികളുടെ സര്‍വ്വേ നടപടികളുടെ നിലവിലെ സ്ഥിതി അറിയിക്കുമോ;

സര്‍വ്വേ നടപടി പൂര്‍ത്തിയാക്കുന്നതിന് സമയ പരിധി നിശ്ചയിച്ച് നല്‍കിയിട്ടുണ്ടോ, സമയ ബന്ധിതമായി സര്‍വ്വേ നടപടി പൂര്‍ത്തിയാക്കുന്നതിനും അടിയന്തരമായി ഭരണാനുമതി നല്‍കുന്നതിനും ആവശ്യമായ നടപടി സ്വീകരിക്കുമോ?

എത്ര വില്ലേജുകളിൽ ഇനിയും റീസർവ്വേ റെക്കോർഡുകൾ നിലവിൽ വരാനുണ്ടെന്ന് അറിയിക്കാമോ;

വസ്തു ഉടമകളിൽ നിന്നും വസ്തു സംബന്ധമായ രേഖകൾ പരിശോധിക്കാതെയും അവരുമായി യാതൊരുവിധത്തിലുമുള്ള ചർച്ചകൾ നടത്താതെയും നടത്തിയ റീസർവ്വേ നടപടികളിലൂടെ ഒട്ടേറെ പരാതികൾ ഉണ്ടായിരിക്കുന്നു എന്ന കാര്യം ശ്രദ്ധയിൽപ്പെട്ടിട്ടുണ്ടോ; ഇതു പരിഹരിക്കാൻ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

റീസർവ്വേ നടപടികളിലെ അപാകത മൂലം കരം തീർക്കാൻ കഴിയാതെ വന്നിട്ടുള്ള ഭൂമി പണയപ്പെടുത്തിയോ, വിറ്റോ ചികിത്സ, മക്കളുടെ വിവാഹം തുടങ്ങി വസ്തു ഉടമകളുടെ അടിയന്തിരമായ ആവശ്യങ്ങൾ പരിഹരിക്കാൻ കഴിയാതെ വരുന്ന സംഭവങ്ങൾ ശ്രദ്ധയിൽപ്പെട്ടിട്ടുണ്ടോ;

ഇത്തരം അപാകതകൾ പരിഹരിക്കുന്നതിന് റീസർവ്വേ അദാലത്തുകളിൽ അപേക്ഷ സമർപ്പിച്ച വസ്തു ഉടമകളുടെ പക്കൽ നിന്നും പ്രശ്നങ്ങൾ പരിഹരിക്കുന്നതിന് ഇടനിലക്കാരും സർവ്വേയർമാരും റവന്യൂ ഉദ്യോഗസ്ഥരും ചേർന്ന് വൻതുക കൈപ്പറ്റുന്നതായ പരാതികൾ ശ്രദ്ധയിൽപ്പെട്ടിട്ടുണ്ടോ;

റീസർവ്വേ സംബന്ധമായി ലഭിക്കുന്ന അപേക്ഷകൾ സുതാര്യമായും കുറ്റമറ്റ രീതിയിലും സമയക്രമം പാലിച്ചും മുൻഗണനാക്രമം തെറ്റിക്കാതെയും പരിഹരിച്ചു നൽകുന്നതിന്  അടിയന്തിര നടപടി സ്വീകരിക്കുമോ?

സംസ്ഥാനത്ത് എത്ര വില്ലേജുകളില്‍ ഡിജിറ്റല്‍ റീസര്‍വേ പൂര്‍ത്തീകരിച്ചിട്ടുണ്ട് എന്ന് വ്യക്തമാക്കാമോ;

ശേഷിക്കുന്ന വില്ലേജുകളുടെ ഡിജിറ്റല്‍ റീസര്‍വേ എന്ന് പൂര്‍ത്തിയാക്കാനാണ് ഉദ്ദേശിക്കുന്നത് എന്ന് വ്യക്തമാക്കാമോ?

സംസ്ഥാനത്ത് ഡിജിറ്റല്‍ റീസര്‍വ്വെ നടപടികള്‍ ആരംഭിച്ചത് എന്നാണെന്നും എപ്പോള്‍ പൂര്‍ത്തീകരിക്കാനാണ് ലക്ഷ്യമിടുന്നതെന്നും വ്യക്തമാക്കുമോ;

ഡിജിറ്റല്‍ റീസര്‍വ്വെ കുറ്റമറ്റ രീതിയില്‍ പൂര്‍ത്തീകരിക്കുന്നതിന് എന്തെല്ലാം സാങ്കേതിക സംവിധാനങ്ങളാണ് ഉപയോഗപ്പെടുത്തിയിട്ടുള്ളതെന്ന് വ്യക്തമാക്കുമോ;

ഡിജിറ്റല്‍ റീസര്‍വ്വെയ്ക്ക് വേണ്ടി ആശ്രയിക്കുന്ന നാവിഗേഷന്‍ ഉപഗ്രഹങ്ങളില്‍ നിന്ന് ലഭിക്കുന്ന സിഗ്നലുകളിലെ വ്യതിയാനം മൂലമുണ്ടാകുന്ന പിശകുകള്‍ പരിഹരിക്കുന്നതിന് സ്ഥിരം സംവിധാനം ഏര്‍പ്പെടുത്തിയിട്ടുണ്ടോ; വ്യക്തമാക്കുമോ;

സര്‍വ്വെ സംബന്ധിച്ചുള്ള പരാതികള്‍ പൂര്‍ണ്ണമായും പരിഹരിക്കുന്നതിന് ഡിജിറ്റല്‍ റീസര്‍വ്വെ സഹായകമായിട്ടുണ്ടോ; വ്യക്തമാക്കുമോ?

ഡിജിറ്റൽ റീസർവേ പദ്ധതിയുടെ ഉദ്ഘാടനം നടത്തിയത് എന്നാണ്; ആദ്യഘട്ടത്തിൽ എത്ര വില്ലേജുകളെയാണ് പദ്ധതിയില്‍ ഉൾപ്പെടുത്തിയിരുന്നത്; ഇവയുടെ സർവേ പൂർത്തിയായോ; സർവേയുടെ വിവരങ്ങൾ അതത് ജില്ലാ കലക്ടർമാർക്ക് കൈമാറിയോ; വിശദമാക്കാമോ;

ഡിജിറ്റല്‍ സര്‍വേ പൂര്‍ത്തിയാകുമ്പോള്‍ അധിക വിസ്തീർണം കണ്ടെത്തുന്ന കേസുകളിൽ ടൈറ്റിൽ ഡീഡ് അനുവദിക്കാൻ സെറ്റിൽമെന്റ് ആക്ട് കൊണ്ടുവരുന്നതുമായി ബന്ധപ്പെട്ട നടപടികൾ ഏതുവരെയായി; മുൻപ് സംസ്ഥാനത്താകെ സെറ്റിൽമെന്റ് നടന്നത് എന്നാണ്; വ്യക്തമാക്കാമോ;

ഡിജിറ്റൽ റീസർവേ നടന്ന വില്ലേജുകളിലെ ഭൂഉടമകള്‍ 'എന്റെ ഭൂമി' പോർട്ടലിൽ രജിസ്റ്റർ ചെയ്യണമെന്ന് നിർദേശം നൽകിയിട്ടുണ്ടോ; 'എന്റെ ഭൂമി' പോർട്ടൽ വഴി നൽകുന്ന സേവനങ്ങള്‍ എന്തൊക്കെയാണ്; പോർട്ടലിന്റെ ചുമതല ആര്‍ക്കാണ്; വ്യക്തമാക്കാമോ;

റവന്യൂ ലാൻഡ് ഇൻഫർമേഷൻ സിസ്റ്റം (റെലിസ്) പോർട്ടലിൽ ഭൂനികുതി ഒടുക്കുന്നതിനായി രജിസ്ട്രേഷൻ നടത്തി വൺടൈം വെരിഫിക്കേഷൻ നടത്തിയ ഭൂവുടമകൾ 'എന്റെ ഭൂമി' പോർട്ടലിൽ രജിസ്റ്റർ ചെയ്യേണ്ട ആവശ്യമുണ്ടോ; റവന്യൂ ലാൻഡ് ഇൻഫർമേഷൻ സിസ്റ്റം പോർട്ടലിലെ വിവരങ്ങൾ എന്റെ ഭൂമി പോർട്ടലിലേക്ക് മാറ്റാൻ നടപടി സ്വീകരിച്ചിട്ടുണ്ടോ; വ്യക്തമാക്കാമോ;

ഡിജിറ്റൽ റീസർവേയുടെ ഭാഗമായി പുറമ്പോക്ക് ഭൂമി അളന്നി‌ട്ടുണ്ടോ; സാധാരണ റീസർവേ നടപടിക്രമങ്ങളിൽ നിന്നും ഇക്കാര്യത്തിൽ ഡിജിറ്റൽ റീസർവേയിൽ വ്യത്യാസം വന്നി‌ട്ടുണ്ടോ; ഡിജിറ്റൽ റീസർവേ കഴിഞ്ഞ ഭൂമിയുടെ മാപ്പുകൾ എന്റെ ഭൂമി പോർട്ടലിൽ നിറങ്ങളുടെ അടിസ്ഥാനത്തിൽ പരിശോധിക്കുന്നതിനുള്ള മാർഗനിർദേശം നൽകിയിരുന്നോ; വിശദമാക്കുമോ?

ഹരിപ്പാട് റവന്യൂ ടവറിന്റെ പ്രവര്‍ത്തനം കാര്യക്ഷമമാക്കുന്നതിനും പരിപാലനത്തിലടക്കം നിലനില്‍ക്കുന്ന പോരായ്മകള്‍ പരിഹരിക്കുന്നതിനും സ്ഥായിയായ വ്യവസ്ഥാക്രമീകരണം എര്‍പ്പെടുത്തുമോ; വിശദമാക്കാമോ;

ഹരിപ്പാട് റവന്യൂ ടവറിന്റെ നടത്തിപ്പ് ചുമതല ജില്ലാ കളക്ടര്‍ക്ക്/റവന്യൂ വകുപ്പിന് കൈമാറുന്നതുമായി ബന്ധപ്പെട്ട് സര്‍ക്കാരിന്റെ/ഹൗസിംഗ് വകുപ്പിന്റെ പരിഗണനയിലുള്ള ഫയലിന്മേലുള്ള തീരുമാനം വൈകുന്നതിന്റെ കാരണം അറിയിക്കാമോ; ഇക്കാര്യത്തില്‍ എന്ത് അടിയന്തര നടപടി സ്വീകരിക്കാനാണ് സര്‍ക്കാര്‍ ഉദ്ദേശിക്കുന്നതെന്ന് വ്യക്തമാക്കാമോ?

അരുവിക്കര നിയോജക മണ്ഡലത്തിലെ ശോചനീയാവസ്ഥയിലുള്ള എം.എന്‍. ലക്ഷം വീടുകള്‍ അടിയന്തരമായി പുനര്‍ നിര്‍മ്മിക്കുന്നതിന് നടപടി സ്വീകരിക്കുമോ;

എം.എന്‍. ലക്ഷം വീട് നവീകരണവുമായി ബന്ധപ്പെട്ട് വകുപ്പ് സ്വീകരിച്ചുവരുന്ന നടപടികള്‍ വ്യക്തമാക്കാമോ?

പുതുക്കാട് മണ്ഡലത്തിലെ മാട്ടുമല പ്രദേശത്ത് ഹൗസിംഗ് ബോര്‍ഡിന്റെ ഉടമസ്ഥതയിലുള്ള 50 സെന്റ് സ്ഥലത്ത് 48 ഫ്ലാറ്റുകള്‍ നിര്‍മ്മിക്കുന്നതിനായി ഫൗണ്ടേഷന്‍ നിര്‍മ്മാണം നടത്തിയെങ്കിലും പദ്ധതി ഉപേക്ഷിക്കപ്പെട്ട നിലയിലായത് സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ;

ത്രിതല പഞ്ചായത്തുകളുടെയും ഗുണഭോക്തൃ വിഹിതത്തോടെയും ഹൗസിംഗ് ബോര്‍ഡിന്റെ നേതൃത്വത്തിലും സഹായത്തിലും മണ്ഡലത്തിലെ 8 ഗ്രാമ പഞ്ചായത്തുകളിലെ ഭൂമിയും സ്ഥലവും ഇല്ലാത്ത ലെെഫ് ഗുണഭോക്താക്കള്‍ക്കായി ഒരു പാര്‍പ്പിട സമുച്ചയ പദ്ധതി യാഥാര്‍ത്ഥ്യമാക്കുന്നത് സംബന്ധിച്ച് സര്‍ക്കാര്‍ എന്തെങ്കിലും നടപടികള്‍ സ്വീകരിച്ചിട്ടുണ്ടോ;

പ്രസ്തുത പദ്ധതിക്കായി അടിയന്തര മേല്‍നടപടികള്‍ സ്വീകരിക്കുമോ?

നിലവിലെ സര്‍ക്കാരിന്റെ കാലത്ത് ആലത്തൂര്‍ മണ്ഡലത്തില്‍ അനുമതി ലഭിച്ച ഫ്ലഡ് പ്രവൃത്തികള്‍ ഏതെല്ലാമാണെന്നും അതില്‍ ഏതെല്ലാം പൂര്‍ത്തീകരിച്ചിട്ടുണ്ടെന്നും അവശേഷിക്കുന്ന പ്രവൃത്തികള്‍ ഏത് ഘട്ടത്തിലാണെന്നും വര്‍ഷം തിരിച്ച് വിശദമാക്കാമോ?

ഹരിപ്പാട് മണ്ഡലത്തില്‍ 2021 -2025 കാലഘട്ടത്തില്‍ ഫ്ലെഡ് റിലീഫ് സ്കീമില്‍ ഉള്‍പ്പെടുത്തി അനുവദിക്കപ്പെട്ടിട്ടുള്ള എല്ലാ റോഡ് വര്‍ക്കുകളുടേയും വിശദാംശങ്ങളും ഇവയുടെ നിര്‍വ്വഹണ പുരോഗതിയും വ്യക്തമാക്കാമോ;

ഏതെല്ലാം വര്‍ക്കുകളാണ് നിര്‍വ്വഹണം ആരംഭിക്കാത്തതെന്നും ഇതിന്റെ കാരണം എന്തെന്നും അറിയിക്കാമോ?

ജിയോളജിക്കൽ സർവ്വെ ഓഫ് ഇൻഡ്യ, സംസ്ഥാന ദുരന്ത നിവാരണ അതോറിറ്റി എന്നിവർ നടത്തിയ പഠനങ്ങളുടെ അടിസ്ഥാനത്തില്‍ ദുരന്ത നിവാരണ (എ) വകുപ്പിന്റെ 29.10.2021 ലെ സ.ഉ.(കൈ)നം. 5/2021/ഡി.എം.ഡി. പ്രകാരം കാഞ്ഞിരപ്പള്ളി താലൂക്കിലെ 110 കുടുംബങ്ങളേയും മീനച്ചിൽ താലൂക്കിലെ 138 കുടുംബങ്ങളേയും നിലവിലെ സ്ഥലത്ത് നിന്നും മാറ്റേണ്ടതും ഇവർക്ക് വസ്തു വാങ്ങി വീട് നിർമ്മിക്കുന്നതിന് ഒരു കുടുംബത്തിന് പത്ത് ലക്ഷം രൂപ വീതം നൽകേണ്ടതാണെന്നുമുള്ള റിപ്പോർട്ടിന്മേല്‍ സ്വീകരിച്ചുവരുന്ന നടപടികളുടെ വിശദാംശം ലഭ്യമാക്കാമോ?

വയനാട് ദുരന്തത്തിൽപ്പെട്ടവരെ പുനരധിവസിപ്പിക്കാനായി പ്രത്യേക ടൗൺഷിപ്പ് സ്ഥാപിക്കുന്നതിലേക്കായുള്ള സ്ഥലമേറ്റെടുക്കുൽ നടപടികളുടെ പുരോഗതി വിശദമാക്കുമോ;

പ്രസ്തുത സ്ഥലമേറ്റെടുക്കൽ നടപടിക്കെതിരെ ഭൂവുടമകൾ കോടതിയെ സമീപിച്ചിട്ടുണ്ടോ;

എങ്കിൽ അത് പുനരധിവാസ പ്രവർത്തനങ്ങളെ എപ്രകാരം ബാധിക്കുമെന്ന് വ്യക്തമാക്കുമോ; പ്രസ്തുത പ്രതിസന്ധി പരിഹരിക്കാൻ സ്വീകരിക്കാനുദ്ദേശിക്കുന്ന നടപടികൾ വിശദീകരിക്കാമോ?

വയനാട് ദുരന്തത്തിൽപ്പെട്ടവരുടെ പുനരധിവാസം സമയബന്ധിതമായി പൂർത്തിയാക്കാൻ സ്വീകരിച്ച നടപടികൾ വിശദമാക്കുമോ;

ദുരന്തബാധിതരെ പുനരധിവസിപ്പിക്കുന്നതിന് ടൗൺഷിപ്പ് നിർമ്മിക്കാന്‍ ഏതു സ്ഥാപനത്തെയാണ് ചുമതലപ്പെടുത്തിയതെന്ന് വ്യക്തമാക്കുമോ; ടെൻഡർ നടപടിയിലൂടെയാണോ പ്രസ്തുത സ്ഥാപനത്തെ തെരെഞ്ഞെടുത്തതെന്ന് അറിയിക്കുമോ;

ടൗൺഷിപ്പ് നിർമ്മാണത്തിനായി ചുമതലപ്പെടുത്തിയ സ്ഥാപനം വീട് നിർമ്മാണത്തിന് വകയിരുത്തിയ തുക മാർക്കറ്റ് നിരക്കിനേക്കാൾ അധികമാണെന്ന ആക്ഷേപം ശ്രദ്ധയില്‍പ്പെട്ടി‌‌ട്ടുണ്ടോ; വ്യക്തമാക്കുമോ;

സ്ഥലം ഏറ്റെടുക്കല്‍ നടപടിയിലെ പ്രതിസന്ധി പരിഹരിച്ച് പുനരധിവാസം സമയബന്ധിതമായി പൂർത്തിയാക്കാൻ കർമ്മപദ്ധതിക്ക് രൂപം നൽകിയിട്ടുണ്ടോ; വിശദമാക്കുമോ ?