ഈ വരുന്ന ഓണക്കാലത്ത് നിത്യോപയോഗ സാധനങ്ങളും പച്ചക്കറികളും മിതമായ നിരക്കില്‍ ലഭ്യമാക്കുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദമാക്കാമോ;

പ്രത്യേക ചന്തകള്‍ ആരംഭിക്കുന്നതിന് നടപടികൾ സ്വീകരിച്ചിട്ടുണ്ടോ; വ്യക്തമാക്കാമോ?

തലസ്ഥാന നഗരത്തില്‍ 2024 ജനുവരി മുതല്‍ സിറ്റി ഗ്യാസ് പെെപ്പ് ലെെന്‍ കണക്ഷന്‍ ലഭ്യമാക്കുന്നതിനായി നടത്തി വരുന്ന പ്രവര്‍ത്തനങ്ങളുടെ പുരോഗതി വ്യക്തമാക്കാമോ;

സിറ്റി ഗ്യാസ് പദ്ധതിയ്ക്കായി കൊച്ചുവേളിയില്‍ സ്ഥാപിച്ചിട്ടുളള പ്ലാന്റിന്റെ ശേഷി എത്രയാണെന്നും ഇവിടെ നിന്നും എത്ര മാത്രം ഗ്യാസ് കണക്ഷനുകള്‍ നല്‍കാന്‍ സാധിക്കുമെന്നും വിലയിരുത്തിയിട്ടുണ്ടോ; വിശദമാക്കുമോ;

നിലവില്‍ എത്ര സിറ്റി ഗ്യാസ് കണക്ഷന്‍ നല്‍കി കഴിഞ്ഞിട്ടുണ്ട്; തുടര്‍ നടപടികള്‍ ത്വരിതപ്പെടുത്തുന്നതിന് കഴിഞ്ഞിട്ടുണ്ടോ;

അപേക്ഷകള്‍ ലഭിക്കുന്നതിനനുസരിച്ച് സിറ്റി ഗ്യാസ് കണക്ഷന്‍ നല്‍കുന്നതിന് സാധിക്കുന്നുണ്ടോ; സമയബന്ധിതമായി പദ്ധതി നടപ്പാക്കുന്നതിനും തടസ്സങ്ങള്‍ നീക്കുന്നതിനും എന്തെല്ലാം ഇടപെടലുകളാണ് നടത്തുന്നതെന്ന് അറിയിക്കാമോ?

നിലവിലെ സര്‍ക്കാര്‍ അധികാരത്തില്‍ വന്നതിന് ശേഷം ചിറയിന്‍കീഴ് മണ്ഡലത്തില്‍ ഭക്ഷ്യ-പൊതുവിതരണ വകുപ്പ് നടപ്പിലാക്കിയ പദ്ധതികള്‍ എന്തെല്ലാമാണെന്ന് വിശദമാക്കാമോ?

വിശപ്പുരഹിത കേരളം പദ്ധതിയുടെ ഭാഗമായി സംസ്ഥാനത്ത് 2022-23 കാലയളവില്‍ എത്ര ഹോട്ടലുകള്‍ പ്രവർത്തിക്കുന്നുണ്ട്; ഇതില്‍ പാലക്കാട് ജില്ലയില്‍ എത്ര എണ്ണം എവിടെയൊക്കെ പ്രവര്‍ത്തിച്ച് വരുന്നു എന്ന് വിശദമാക്കാമോ; ഇതിലേക്കായി സർക്കാർ എത്ര രൂപ ചെലവഴിച്ചിട്ടുണ്ടെന്ന് വിശദമാക്കാമോ?

കേന്ദ്ര ഭക്ഷ്യ ഭദ്രത നിയമപ്രകാരം ഗുണമേന്മയുള്ള റേഷൻ സാധനങ്ങൾ യഥാസമയം ലഭിച്ചില്ലെങ്കിൽ കാർഡുടമകൾക്ക് നഷ്ടപരിഹാരം ലഭിക്കുവാൻ അവകാശമുണ്ടോ; വിശദാംശം ലഭ്യമാക്കുമോ;

സർവർ തകരാറിനെയും ഇ പോസ് മെഷീനിലെ സാങ്കേതിക തകരാറിനെയും തുടർന്ന് റേഷൻ ലഭിക്കാത്ത കാർഡ് ഉടമകൾക്ക് നഷ്ടപരിഹാരം നൽകണമെന്ന ഭക്ഷ്യ കമ്മീഷന്റെ ഉത്തരവിൽ വകുപ്പ് സ്വീകരിച്ച നടപടികൾ എന്തെല്ലാമാണെന്ന് വിശദമാക്കുമോ?

2022-23 വർഷത്തിൽ കേന്ദ്രം സംസ്ഥാനത്തിന് നൽകേണ്ട അരിവിഹിതം മുഴുവനായി നൽകിയിട്ടുണ്ടോ; വിശദാംശങ്ങൾ ലഭ്യമാക്കാമോ;

മുൻഗണനാ റേഷൻ കാർഡുകളും ബി.പി.എൽ. റേഷൻ കാർഡുകളും അനുവദിക്കുന്നതിന് പ്രത്യേക കർമ്മപദ്ധതി നടപ്പാക്കാൻ ഉദ്ദേശിക്കുന്നുണ്ടോ; ഉണ്ടെങ്കിൽ വിശദാംശങ്ങൾ ലഭ്യമാക്കാമോ?

റേഷന്‍ കാര്‍ഡുകള്‍ ചിപ്പ് ഘടിപ്പിച്ച പി.വി.സി കാര്‍ഡ് രൂപത്തിലാക്കുന്ന കാര്യം പരിഗണനയിലുണ്ടോ;ഉണ്ടെങ്കില്‍ ഇത് സംബന്ധിച്ച് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കുമോ;

ഇത് സംബന്ധിച്ച് ഏതെങ്കിലും ഏജന്‍സികളുമായി ആശയ വിനിമയം നടത്തുകയോ കരാറില്‍ ഏര്‍പ്പെടുകയോ ചെയ്തിട്ടുണ്ടോ;ഉണ്ടെങ്കില്‍ പ്രസ്തുത ഏജന്‍സികളുടെ പേര് വിവരങ്ങള്‍ ലഭ്യമാക്കുമോ?

വയനാട് ജില്ലയിലെ നിലവിലെ റേഷന്‍ കാര്‍ഡ് ഉടമകളുടെ എണ്ണം വ്യക്തമാക്കാമോ;

ഇതില്‍ ബി.പി.എല്‍ വിഭാഗത്തില്‍പ്പെട്ട റേഷന്‍ കാര്‍ഡ് ഉടമകൾ എത്രയാണ്;

വയനാട് ജില്ലയില്‍ പട്ടികവര്‍ഗ്ഗ വിഭാഗത്തില്‍പ്പെട്ട എത്ര റേഷന്‍ കാര്‍ഡ് ഉടമകളാണ് ഉള്ളതെന്ന് വ്യക്തമാക്കാമോ;

വയനാട് ജില്ലയില്‍ വെള്ള റേഷന്‍ കാര്‍ഡ് ഉടമകളായ എത്ര പട്ടികവര്‍ഗ്ഗ വിഭാഗക്കാരാണ് ഉള്ളതെന്ന് വിശദമാക്കാമോ?

സംസ്ഥാനത്ത് പുതിയതായി എത്രപേർക്ക് കഴിഞ്ഞ ഒരു വർഷത്തിനകം റേഷൻ കാർഡുകൾ നൽകിയിട്ടുണ്ടെന്നും ഇതിൽ എത്രപേർക്ക് ബി.പി.എൽ. കാർഡ് അനുവദിച്ചിട്ടുണ്ടെന്നും വ്യക്തമാക്കാമോ;

അനർഹർ കൈവശം വച്ചിരുന്ന എത്ര കാർഡുകളാണ് സറണ്ടർ ചെയ്തിട്ടുള്ളതെന്ന് വ്യക്തമാക്കാമോ?

റേഷന്‍ കാര്‍ഡുകള്‍ പുതുക്കുന്നതുമായി ബന്ധപ്പെട്ട് റേഷന്‍ കാര്‍ഡ് മാനേജ്മെന്റ് സിസ്റ്റം (ആർ സി എം എസ് )ല്‍ ഡാറ്റാ എന്‍ട്രി വരുത്തിയപ്പോള്‍ നിരവധി തെറ്റുകള്‍ കടന്നു കൂടിയിട്ടുള്ളത് ശ്രദ്ധയില്‍പ്പെട്ടിട്ടുണ്ടോ;

തെറ്റുകള്‍ തിരുത്തുന്നതിന് കാര്‍ഡ് ഉടമകള്‍ക്ക് എന്തെങ്കിലും അവസരം നല്‍കാന്‍ ഉദ്ദേശിക്കുന്നുണ്ടോ; വിശദമാക്കുമോ;

ഇന്ത്യയിലെ മറ്റ് സംസ്ഥാനങ്ങളിൽ അച്ചടിച്ച റേഷൻ കാര്‍ഡുകള്‍ക്ക് പകരം സ്മാര്‍ട്ട് കാര്‍ഡുകളാണ് ഉപയോഗിക്കുന്നത് എന്നത് ശ്രദ്ധയില്‍പ്പെട്ടിട്ടുണ്ടോ; ഇത്തരത്തിൽ സംസ്ഥാനത്ത് സ്മാര്‍ട്ട് റേഷൻ കാർഡുകള്‍ വിതരണം ചെയ്യുന്നതിന് എന്തെല്ലാം നടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ?

സംസ്ഥാനത്തെ വ്യത്യസ്ത കാറ്റഗറികളിലെ റേഷന്‍ കാര്‍ഡുകൾ ഏതൊക്കെയെന്നും അവയുടെ കളർ കോഡ് എന്തെന്നും വ്യക്തമാക്കാമോ; ഓരോ കാറ്റഗറിയിലും നിലവിലുളള റേഷന്‍ കാര്‍ഡുകളുടെ എണ്ണം വിശദമാക്കാമോ;

എ.എ.വെെ. കാര്‍ഡുകള്‍ ഉപയോഗിച്ച് വാങ്ങുന്ന ഭക്ഷ്യധാന്യങ്ങള്‍ കരിഞ്ചന്തയില്‍ വില്ക്കുന്നതായി ശ്രദ്ധയില്‍പെട്ടിട്ടുണ്ടോ; എങ്കിൽ വിശദാംശം ലഭ്യമാക്കാമോ;

എ.എ.വെെ. കാര്‍ഡുകളുടെ ദുരുപയോഗം തടയുന്നതിന് സ്വീകരിച്ച നടപടികള്‍ വിശദമാക്കാമോ;

എ.പി.എല്‍. കാര്‍ഡുടമകള്‍ക്ക് നല്കുന്ന റേഷന്‍ വിഹിതം വര്‍ദ്ധിപ്പിക്കുന്നതിനുളള നടപടികള്‍ പരിഗണനയിലുണ്ടോയെന്ന് വ്യക്തമാക്കാമോ?

സംസ്ഥാനത്തെ റേഷൻ കടകളെ നവീകരിക്കുന്നതിനും റേഷൻ കടകൾ വഴി നിത്യോപയോഗ സാധനങ്ങൾ വിൽപ്പന നടത്തുവാനും നടപടി സ്വീകരിച്ചിട്ടുണ്ടോ; വ്യക്തമാക്കാമോ;

പൊതു കമ്പോളത്തിലെ വിലനിലവാരം പിടിച്ചുനിർത്തുന്നതിന് എന്തൊക്കെ പദ്ധതികളാണ് ആസൂത്രണം ചെയ്തിട്ടുള്ളതെന്ന് വ്യക്തമാക്കാമോ?

സംസ്ഥാനത്തെ പൊതുവിതരണ ശൃംഖലയെ ആധുനിക സാങ്കേതികവിദ്യയുടെ സഹായത്തോടെ കൂടുതൽ ജനോപകാരപ്രദമാക്കി ശക്തിപ്പെടുത്തുവാന്‍ നടപടികൾ സ്വീകരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ഇടതുപക്ഷ സര്‍ക്കാരുകളുടെ ഇടപെടല്‍ സംസ്ഥാനത്തെ പൊതുവിതരണ കേന്ദ്രങ്ങളെ കാലോചിതവും പരിഷ്കൃതവും ഗുണഭോക്തൃ സൗഹാര്‍ദ്ദവുമാക്കി മാറ്റിയിട്ടുണ്ടോ; വിശദമാക്കാമോ;

സംസ്ഥാനത്തെ മുഴുവന്‍ റേഷന്‍കടകളും ഘട്ടം ഘട്ടമായി സ്മാര്‍ട്ട് റേഷന്‍ കടകളാക്കുവാന്‍ ഉദ്ദേശിക്കുന്നുണ്ടോ; വിശദമാക്കാമോ;

ഇതിന്റെ ഭാഗമായി റേഷൻകടകളുടെ പശ്ചാത്തലസൗകര്യം വിപുലപ്പെടുത്തി ഘട്ടം ഘട്ടമായി കെ-സ്റ്റോറുകളാക്കി ഉയർത്തുന്ന നടപടിയുടെ പുരോഗതി വിലയിരുത്തിയിട്ടുണ്ടോ; വിശദമാക്കാമോ;

കെ-സ്റ്റോറുകളാക്കി മാറ്റുന്ന റേഷന്‍കടകളുടെ ലൈസന്‍സികള്‍ക്ക് ബാങ്കുകളുടെ സഹായത്തോടെ ഇന്‍ഷുറന്‍സ് പദ്ധതി ഏര്‍പ്പെടുത്തുവാന്‍ ഉദ്ദേശിക്കുന്നുണ്ടോ; വിശദമാക്കാമോ?

സംസ്ഥാനത്തെ പൊതുവിതരണ രംഗം ശക്തിപ്പെടുത്തുന്നതിനായി ഈ സര്‍ക്കാര്‍ അധികാരത്തില്‍ വന്നതിന് ശേഷം എന്തെല്ലാം നടപടികളാണ് സ്വീകരിച്ചുവരുന്നതെന്ന് വിശദമാക്കാമോ ;

ദേശീയ ഭക്ഷ്യസുരക്ഷാ നിയമത്തിന് കീഴില്‍ വരാത്ത, തുറന്ന കമ്പോള വില്പന പദ്ധതിയിലൂടെ (ഒ.എം.എസ്.എസ്.) സംസ്ഥാനങ്ങള്‍ക്ക് നൽകുന്ന ഭക്ഷ്യധാന്യങ്ങളുടെ അളവ് കുറയ്ക്കാനുള്ള കേന്ദ്രസര്‍ക്കാരിന്റെ നടപടി സംസ്ഥാനത്തെ പൊതുവിതരണ സംവിധാനത്തെ ഏതെല്ലാം തരത്തില്‍ ബാധിക്കുമെന്നാണ് വിലയിരുത്തിയിട്ടുള്ളത്;

പ്രസ്തുത നടപടി മൂലം കേന്ദ്രസര്‍ക്കാര്‍ സംസ്ഥാനത്തിന്റെ ഭക്ഷ്യധാന്യ വിഹിതത്തിൽ എത്ര ടണ്‍ വെട്ടിക്കുറവ് വരുത്തിയിട്ടുണ്ടെന്ന് വിശദമാക്കാമോ;

വെട്ടിക്കുറച്ച ഭക്ഷ്യധാന്യങ്ങള്‍ പുനഃസ്ഥാപിക്കുന്നതിനായി എന്തെല്ലാം ഇടപെടലുകളാണ് നടത്തിവരുന്നതെന്ന് വിശദമാക്കാമോ?

സംസ്ഥാനത്തെ റേഷന്‍കടകളില്‍ ഇ-പോസ് സംവിധാനം ഏര്‍പ്പെടുത്തിയത് എന്നുമുതലാണെന്ന് അറിയിക്കുമോ;

സോഫ്‌റ്റ്‌വെയര്‍ സംവിധാനത്തിലെ തകരാർ മൂലം റേഷന്‍ വിതരണം തടസ്സപ്പെടുന്നത് ശ്രദ്ധയില്‍പ്പെട്ടിട്ടുണ്ടോ;

റേഷന്‍ വിതരണത്തില്‍ നിശ്ചയിക്കപ്പെട്ടിട്ടുള്ള അവസാന തീയതികളില്‍ ഇ-പോസ് മെഷീന്‍ പണിമുടക്കുന്നതുവഴി നിരവധി പേര്‍ക്ക് റേഷന്‍ സാധനങ്ങള്‍ ലഭ്യമാകാതെ പോകുന്നത് ശ്രദ്ധയില്‍പ്പെട്ടിട്ടുണ്ടോ; ഇത് പരിഹരിക്കുന്നതിന് എന്ത് നടപടിയാണ് സ്വീകരിച്ചിട്ടുള്ളത്; വ്യക്തമാക്കാമോ;

സോഫ്‌റ്റ്‌വെയര്‍ സംവിധാനത്തിലെ പിഴവ് പൂര്‍ണ്ണമായി പരിഹരിക്കുന്നതിന് എന്തൊക്കെ നടപടികളാണ് സ്വീകരിച്ചിട്ടുള്ളത്; വിശദമാക്കാമോ?

ചങ്ങനാശ്ശേരി നഗരസഭയില്‍ റവന്യൂ ടവറിന് സമീപം ഹൗസിംഗ് ബോര്‍ഡിന്റെ അധീനതയിലുള്ള സ്ഥലത്ത് സിവില്‍ സപ്ലൈസ് ഗോഡൗണ്‍ സ്ഥാപിക്കുന്നതിന് സ്വീകരിച്ചിട്ടുള്ള നടപടികൾ വ്യക്തമാക്കുമോ;

പ്രസ്തുത സ്ഥലം പരിശോധിച്ച് ഫീസിബിലിറ്റി റിപ്പോര്‍ട്ട് ലഭിച്ചിട്ടുണ്ടോ; എങ്കിൽ ആയതിന്റെ പകര്‍പ്പ് ലഭ്യമാക്കുമോ;

പ്രസ്തുത റിപ്പോര്‍ട്ടിന്റെ അടിസ്ഥാനത്തില്‍ സ്വീകരിച്ചിട്ടുള്ള തുടര്‍നടപടികൾ വിശദമാക്കാമോ?

റേഷൻ വിതരണവുമായി ബന്ധപ്പെട്ട ഇ-പോസ് സംവിധാനവും അതിനെ നിയന്ത്രിക്കുന്ന സെർവറും ഇടക്കിടെ തകരാറിലാകുന്നത് റേഷൻ വിതരണത്തെ പ്രതികൂലമായി ബാധിക്കുന്ന കാര്യം ഗൗരവമായി പരിശോധിച്ചിട്ടുണ്ടോ ;

സെർവർ തകരാർ മൂലം ഏപ്രിൽ മാസം 2.66 ലക്ഷത്തോളം പേർക്ക് ​റേഷൻ നിഷേധിക്കപ്പെട്ടതായി സംസ്ഥാന ഭക്ഷ്യകമ്മീഷന് പരാതി ലഭിച്ചിരുന്നോ: എങ്കിൽ സ്വീകരിച്ച നടപടി വിശദമാക്കുമോ;

സാങ്കേതിക പിഴവുമൂലം റേഷൻ മുടങ്ങാതിരിക്കാൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

ഇ-പോസ് മെഷീനുകളുടെ തകരാർ മൂലം റേഷന്‍ വിതരണം ഇടയ്ക്കിടെ തടസ്സപ്പെടുന്ന വിഷയം ശ്രദ്ധയില്‍പ്പെട്ടിട്ടുണ്ടോ; എങ്കിൽ ഇതിന്റെ കാരണം വ്യക്തമാക്കുമോ;

പ്രസ്തുത തകരാര്‍ പരിഹരിക്കുന്നതിന് നടപടികള്‍ സ്വീകരിച്ചിട്ടുണ്ടോ; വിശദമാക്കുമോ?

സംസ്ഥാനത്ത് അവശ്യവസ്തുക്കളുടെ വിലനിലവാരം നിയന്ത്രിക്കുന്നതിനും നിത്യോപയോഗസാധനങ്ങള്‍ സുലഭമായി ലഭ്യമാക്കുന്നതിനും പൊതുവിതരണകേന്ദ്രങ്ങള്‍ ശക്തിപ്പെടുത്തുന്നതിനും സ്വീകരിച്ച നടപടികള്‍ വിശദമാക്കാമോ;

കൂടുതല്‍ പൊതുവിതരണകേന്ദ്രങ്ങള്‍ ആരംഭിക്കുന്നതിന് നടപടികള്‍ സ്വീകരിക്കുമോ;

പൊതുവിതരണകേന്ദ്രങ്ങള്‍ വഴി അവശ്യവസ്തുക്കള്‍ വിതരണം ചെയ്യാന്‍ സ്വീകരിച്ച നടപടികള്‍ വിശദമാക്കാമോ?

സംസ്ഥാനത്ത് നിത്യോപയോഗ സാധനങ്ങളുടെ വിലക്കയറ്റം രൂക്ഷമായിരിക്കുന്ന സാഹചര്യം ഗൗരവമായി കാണുന്നുണ്ടോ; വ്യക്തമാക്കാമോ;

വിലക്കയറ്റം തടയാന്‍ ഭക്ഷ്യ-സിവില്‍ സപ്ലൈസ് വകുപ്പ് സ്വീകരിച്ച നടപടികള്‍ സംബന്ധിച്ച വിശദാംശം ലഭ്യമാക്കുമോ;

സംസ്ഥാന സര്‍ക്കാര്‍ സപ്ലൈകോയ്ക്ക് 3000 കോടി രൂപയോളം കുടിശ്ശിക നൽകാനുണ്ട് എന്നത് ശ്രദ്ധയില്‍പെട്ടിട്ടുണ്ടോ;

സര്‍ക്കാര്‍ കുടിശ്ശിക നൽകാത്തത് കാരണം സംഭരിച്ച നെല്ലിന്റെ തുക കര്‍ഷകര്‍ക്ക് നൽകാൻ സപ്ലൈകോയ്ക്ക് സാധിക്കുന്നില്ല എന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവത്തോടെ കാണുന്നുണ്ടോ;

സപ്ലൈകോയ്ക്ക് നൽകാനുള്ള കുടിശ്ശിക യുദ്ധകാലാടിസ്ഥാനത്തിൽ നൽകാൻ നടപടി സ്വീകരിക്കുമോ; വ്യക്തമാക്കാമോ?

സംസ്ഥാനത്ത് പലവ്യഞ്ജനങ്ങള്‍ ഉള്‍പ്പെടെയുള്ള ഭക്ഷ്യധാന്യങ്ങള്‍ക്ക് ക്ഷാമം നേരിടുന്നുവെന്ന മാധ്യമ വാര്‍ത്തകള്‍ ശ്രദ്ധയില്‍പ്പെട്ടിട്ടുണ്ടോ; വിശദമാക്കുമോ;

സപ്ലൈകോ ലാഭം മാര്‍ക്കറ്റുകള്‍, മാവേലി സ്റ്റോറുകള്‍ എന്നിവിടങ്ങളില്‍ സബ്സിഡി നിരക്കിലുള്ള സാധനങ്ങള്‍ യഥേഷ്ടം ലഭ്യമല്ലെന്ന പരാതി ശ്രദ്ധയില്‍പ്പെട്ടിട്ടുണ്ടോ; വിശദമാക്കുമോ;

വിലക്കയറ്റം പിടിച്ചു നിര്‍ത്തി ഭക്ഷ്യധാന്യങ്ങളുടെ ലഭ്യത ഉറപ്പ് വരുത്താന്‍ എന്തൊക്കെ നടപടികളാണ് സ്വീകരിച്ചിട്ടുള്ളത്; വിശദമാക്കുമോ?

നിത്യോപയോഗ സാധനങ്ങളുടെ വിലവര്‍ദ്ധനവ് ജനജീവിതം ദുസ്സഹമാക്കിയത് ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ ഇത്തരത്തിലുള്ള വില വര്‍ദ്ധനവ് തടയാന്‍ എന്തെല്ലാം നടപടികളാണ് സ്വീകരിച്ചിരിക്കുന്നത് എന്ന് വിശദമാക്കാമോ?

സംസ്ഥാനത്ത് വിലക്കയറ്റം രൂക്ഷമായിരിക്കുന്ന സാഹചര്യം ശ്രദ്ധയിൽപ്പെട്ടിട്ടുണ്ടോ;

വിപണിയിലെ വിലക്കയറ്റം നിയന്ത്രിക്കുന്നതിന് സപ്ലൈകോ നടത്തുന്ന ഇടപെടലുകൾ വിശദമാക്കാമോ;

സർക്കാർ നൽകാനുള്ള കുടിശ്ശിക ലഭിക്കാത്തതിനാൽ സപ്ലൈകോ കടുത്ത പ്രതിസന്ധി നേരിടുകയാണെന്നത് ശ്രദ്ധയില്‍പെട്ടിട്ടുണ്ടോ; വിശദമാക്കാമോ;

കുടിശ്ശിക നൽകാത്തത് കാരണം സപ്ലൈകോ സ്റ്റോറുകളിൽ ആവശ്യത്തിന് സാധനങ്ങൾ ഇല്ലാതെ പൊതുജനങ്ങൾ ബുദ്ധിമുട്ടുന്ന സാഹചര്യം ഗൗരവമായി കാണുന്നുണ്ടോ; വിശദമാക്കുമോ?

നിത്യോപയോഗ സാധനങ്ങളുടെ രൂക്ഷമായ വിലക്കയറ്റം മൂലം ജനജീവിതം ദു:സ്സഹമായിരിക്കുന്ന അവസ്ഥ പരിശോധിച്ചിട്ടുണ്ടോ; വ്യക്തമാക്കാമോ;

വിപണിയിൽ ഫലപ്രദമായി ഇടപെടുന്നതിന് സംസ്ഥാനത്തിന്റെ സാമ്പത്തിക പ്രതിസന്ധി തടസ്സം സൃഷ്ടിക്കുന്നുണ്ടോ;

വിലക്കയറ്റം നിയന്ത്രിക്കുന്നതിനും നിത്യോപയോഗ സാധനങ്ങൾ ന്യായവിലയ്ക്ക് ലഭ്യമാക്കുന്നതിനും എന്തെല്ലാം നടപടികളാണ് അടിയന്തരമായി സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

സംസ്ഥാനത്ത് നിത്യോപയോഗ സാധനങ്ങളുടെ വിലക്കയറ്റം കൊണ്ട് ജനജീവിതം ദുസ്സഹമാകുന്ന സാഹചര്യം നിലവിലുണ്ടോ ; എങ്കില്‍ ഇത് ഗൗരവത്തോടെ കണ്ടിട്ടുണ്ടോ;

അവശ്യവസ്തുക്കളുടെ വില കുതിച്ചുയര്‍ന്ന സാഹചര്യത്തില്‍ വിലക്കയറ്റം തടയുന്നതിനും വില നിയന്ത്രിക്കുന്നതിനും സ്വീകരിച്ചിട്ടുള്ള നടപടികൾ വിശദമാക്കുമോ;

വിലക്കയറ്റം തടയുന്നതിന് മാവേലി സ്റ്റോറുകള്‍, സിവിൽ സപ്ലൈസ് കോർപറേഷൻ എന്നിവ വഴി സ്വീകരിച്ചിട്ടുള്ള നടപടികള്‍ എന്തെല്ലാമാണെന്ന് വിശദമാക്കുമോ;

നിത്യോപയോഗ സാധനങ്ങളുടെ വിലക്കയറ്റം തടയുന്നതിന് എന്തെല്ലാം നടപടികള്‍ സ്വീകരിക്കാനാണ് ഉദ്ദേശിക്കുന്നത്; വ്യക്തമാക്കുമോ?

നീല റേഷന്‍ കാര്‍ഡ് ഉടമകള്‍ക്ക് 10.90 രൂപയ്ക്ക് റേഷന്‍ കടകള്‍ വഴി അധിക അരി നല്‍കുന്നത് പരിഗണനയില്‍ ഉണ്ടോ;

നിത്യോപയോഗ സാധനങ്ങൾക്ക് ചില വ്യാപാരികള്‍ അമിതമായി വില ഈടാക്കുന്നത് മൂലം അവശ്യ സാധനങ്ങള്‍ക്ക് ഉണ്ടാകുന്ന വിലയക്കയറ്റം നിയന്ത്രിക്കാന്‍ നടപടികള്‍ സ്വീകരിച്ചിട്ടുണ്ടോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം വിലക്കയറ്റം തടയുന്നതിന് മാതൃകാപരമായി സ്വീകരിച്ചുവരുന്ന നടപടികള്‍ എന്തെല്ലാമാണെന്ന് വിശദമാക്കാമോ?

സംസ്ഥാനത്ത് നിത്യോപയോഗ സാധനങ്ങളുടെ വിലക്കയറ്റം ശ്രദ്ധയിൽവന്നിട്ടുണ്ടോ;

എങ്കിൽ വിപണിയിൽ ഇടപെട്ട് വിലക്കയറ്റം നിയന്ത്രിക്കുന്നതിന് എന്തെല്ലാം നടപടികളാണ് സ്വീകരിച്ചതെന്ന് വ്യക്തമാക്കുമോ;

മാവേലി സ്റ്റോർ, സപ്ലൈക്കോ എന്നിവ മുഖേന കൂടുതൽ സബ്സിഡി സാധനങ്ങള്‍ വിതരണം ചെയ്യുന്നതിന് നടപടി സ്വീകരിക്കുമോ;

മാർക്കറ്റിൽ ഒരേ സാധനങ്ങൾക്ക് വിവിധയിടങ്ങളിൽ വ്യത്യസ്ത വില ഈടാക്കുന്നത് തടയാനും കൃത്രിമ വിലക്കയറ്റം ഉണ്ടാകുന്നത് തടയാനും എന്തെല്ലാം പരിശോധന മാർഗ്ഗങ്ങളാണ് സ്വീകരിക്കാൻ ഉദ്ദേശിക്കുന്നത്; വിശദമാക്കാമോ;

കെ - സ്റ്റോർ പദ്ധതി വേണ്ടത്ര വിജയം കാണുന്നില്ല എന്ന വിമർശനം പരിശോധിച്ച് കെ - സ്റ്റോറിലൂടെ കൂടുതൽ സബ്സിഡി ഭക്ഷ്യവസ്തുക്കൾ വിതരണം ചെയ്യുന്നതിന് നടപടി സ്വീകരിക്കുമോ?

സംസ്ഥാനത്ത് കഴിഞ്ഞ ഒരു വര്‍ഷത്തിനിടയില്‍ നിത്യോപയോഗ സാധനങ്ങളുടെ വില എത്ര ശതമാനം വർദ്ധിച്ചിട്ടുണ്ടെന്ന് വ്യക്തമാക്കുമോ;

നിത്യോപയോഗ സാധനങ്ങളുടെ വില ഉയരുന്ന സാഹചര്യത്തില്‍ ഫലപ്രദമായി വിപണിയില്‍ ഇടപെടുന്നതിന്എന്തൊക്കെ നടപടികളാണ് സ്വീകരിക്കുന്നത് എന്ന് വ്യക്തമാക്കുമോ;

സപ്ലൈകോ വില്‍പ്പനശാലയില്‍ സബ്സിഡിയില്‍ വില്‍ക്കുന്ന പല ഉല്‍പ്പന്നങ്ങളും ലഭ്യമല്ലാത്ത സാഹചര്യം ഉണ്ടാവുന്നതിന്റെ കാരണം വ്യക്തമാക്കുമോ;

വരാനിരിക്കുന്ന ഓണക്കാലത്ത് അവശ്യ സാധനങ്ങള്‍ പൊതുജനങ്ങള്‍ക്ക് ആവശ്യാനുസരണം ലഭ്യമാക്കുന്നതിന് എന്തൊക്കെ നടപടികളാണ് സ്വീകരിക്കുന്നതെന്ന് വ്യക്തമാക്കുമോ?

സംസ്ഥാനത്ത് നിത്യോപയോഗ സാധനങ്ങളുടെ വില അനുദിനം വർദ്ധിക്കുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ വിശദാംശം ലഭ്യമാക്കുമോ;

പൊതുജനങ്ങള്‍ക്ക് നിത്യോപയോഗ സാധനങ്ങള്‍ വിലക്കുറവില്‍ ലഭിക്കുന്നുവെന്ന് ഉറപ്പുവരുത്താനും വിലനിലവാരം നിയന്ത്രിക്കുന്നതിനുമായി എന്തെല്ലാം നടപടികളാണ് സ്വീകരിച്ചുവരുന്നതെന്ന് വിശദമാക്കുമോ;

കൃത്യമായ വിപണി ഇടപെടല്‍ നടത്തുന്നതിനും കരിഞ്ചന്ത, പൂഴ്ത്തിവെയ്പ്പ് എന്നിവ തടയുന്നതിനുമായി സ്വീകരിച്ച നടപടികള്‍ മൂലമുണ്ടായ പുരോഗതി അറിയിക്കുമോ; ഇതിനായി നിയോഗിക്കപ്പെട്ട ഉദ്യോഗസ്ഥര്‍ ആരെല്ലാമാണെന്നും അവര്‍ നടത്തിയ പരിശോധനകളുടെ വിശദാംശങ്ങൾ എന്തെല്ലാമെന്നും വ്യക്തമാക്കുമോ?

പയ്യന്നൂര്‍ മണ്ഡലത്തിലെ എരമം-പുല്ലുപാറയില്‍ സിവില്‍ സപ്ലെെസ് വകുപ്പിന്റെ കീഴില്‍ നിര്‍മ്മിക്കാന്‍ തീരുമാനിച്ച് പ്രവൃത്തി ഉദ്ഘാടനം നടത്തിയ ഗോഡൗണിന്റെ നിലവിലെ അവസ്ഥ എന്താണെന്ന് വിശദീകരിക്കാമോ;

പ്രസ്തുത പദ്ധതി സഹകരണ വകുപ്പ് മുഖേന നടപ്പിലാക്കാന്‍ തീരുമാനം എടുത്തിട്ടുണ്ടോ; എങ്കില്‍ അതിന്റെ വിശദാംശം വ്യക്തമാക്കാമോ;

പ്രസ്തുത നിര്‍മ്മാണ പ്രവൃത്തി എപ്പോള്‍ ആരംഭിക്കാന്‍ കഴിയുമെന്നാണ് പ്രതീക്ഷിക്കുന്നത്; വിശദമാക്കാമോ?

സപ്ലൈകോയുടെ വിപണി ഇടപെടലിനായി നടപ്പ് സാമ്പത്തിക വർഷത്തെ ബജറ്റിൽ എത്ര തുകയാണ് വകയിരുത്തിയിട്ടുള്ളതെന്നും നാളിതുവരെ ഇതിൽ എത്ര തുക അനുവദിച്ചു നൽകിയെന്നും എത്ര തുക ഏതൊക്കെ ഇനത്തിലാണ് ചെലവഴിച്ചതെന്നുമുള്ള വിശദാംശം വ്യക്തമാക്കുമോ?

സബ്സിഡി ഇനത്തില്‍ നിത്യോപയോഗ സാധനങ്ങള്‍ വിതരണം ചെയ്ത വകയിലും കിറ്റ് വിതരണം ചെയ്ത വകയിലും സപ്ലൈകോയ്ക്ക് എത്ര തുക നല്‍കുവാനുണ്ടെന്ന് അറിയിക്കാമോ; പ്രസ്തുത കുടിശ്ശിക എന്നത്തേയ്ക്ക് നല്‍കാന്‍ സാധിക്കുമെന്ന് വ്യക്തമാക്കാമോ;

നെല്ല് സംഭരണം നടത്തിയത് വഴി സപ്ലൈകോയ്ക്ക് എത്ര രൂപ കുടിശ്ശിക ഇനത്തില്‍ നല്‍കുവാനുണ്ട്; പ്രസ്തുത കുടിശ്ശിക എന്നത്തേയ്ക്ക് നല്‍കാന്‍ സാധിക്കുമെന്ന് വ്യക്തമാക്കാമോ;

സപ്ലൈക്കോ സ്റ്റോറുകളില്‍ നിത്യോപയോഗ സാധനങ്ങളുടെ ലഭ്യതക്കുറവ് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിഹരിക്കുവാന്‍ എന്തൊക്കെ നടപടികളാണ് സ്വീകരിക്കാന്‍ ഉദ്ദേശിക്കുന്നതെന്ന് വിശദമാക്കാമോ?

കുന്നത്തുനാട് മണ്ഡലത്തിലെ വടവുകോട്-പുത്തന്‍കുരിശ് പഞ്ചായത്തിലെ കാണിനാട്ടില്‍ സപ്ലൈകോ സൂപ്പര്‍ മാര്‍ക്കറ്റ് ആരംഭിക്കണമെന്ന നിവേദനത്തിന്മേല്‍ തുടര്‍നടപടി സ്വീകരിച്ചിട്ടുണ്ടോയെന്ന് വ്യക്തമാക്കുമോ;

സൂപ്പര്‍ മാര്‍ക്കറ്റിനായി പഞ്ചായത്ത് കെട്ടിട സൗകര്യം കണ്ടെത്തിയ സാഹചര്യത്തില്‍ ആയത് ആരംഭിക്കുന്നതിന് നടപടി കൈക്കൊള്ളുമോയെന്ന് അറിയിക്കാമോ?

പാറശ്ശാല നിയോജക മണ്ഡലത്തില്‍ നിലവില്‍ എത്ര മാവേലി സ്റ്റോറുകള്‍ പ്രവര്‍ത്തിച്ചു വരുന്നുണ്ട്; പഞ്ചായത്ത് തിരിച്ചുള്ള വിവരം ലഭ്യമാക്കുമോ;

പ്രസ്തുത മണ്ഡലത്തില്‍ ഏതെങ്കിലും സ്ഥലത്ത് പുതുതായി മാവേലി സ്റ്റോറുകളോ സപ്ലെെകോ ഔട്ട് ലെറ്റുകളോ സ്ഥാപിക്കാന്‍ ഉദ്ദേശിക്കുന്നുണ്ടോ; വിശദാംശം ലഭ്യമാക്കുമോ;

മണ്ഡലത്തിലെ ഏതെങ്കിലും മാവേലി സ്റ്റോര്‍ സൂപ്പര്‍ മാര്‍ക്കറ്റായി ഉയര്‍ത്തുന്നതിന് അനുയോജ്യമാണെന്ന് കണ്ടെത്തിയിട്ടുണ്ടോ; നിലവില്‍ മണ്ഡലത്തില്‍ എത്ര സൂപ്പര്‍ മാര്‍ക്കറ്റുകള്‍ പ്രവര്‍ത്തിച്ചു വരുന്നുണ്ട്; പഞ്ചായത്ത് തിരിച്ചുള്ള വിവരം ലഭ്യമാക്കുമോ;

കൂടുതല്‍ സൂപ്പര്‍ മാര്‍ക്കറ്റുകള്‍ സ്ഥാപിക്കുന്ന കാര്യം പരിഗണിക്കുമോ;

സപ്ലെെകോ മാവേലി സ്റ്റോറുകള്‍, സൂപ്പര്‍ മാര്‍ക്കറ്റുകള്‍ എന്നിവ വഴി വിവിധ വിഭാഗങ്ങളിലുള്ള റേഷന്‍ കാര്‍ഡ് ഉടമകള്‍ക്ക് നല്‍കുന്ന സേവനങ്ങള്‍ എന്തൊക്കെയാണെന്ന് ഇനം തിരിച്ച് ലഭ്യമാക്കാമോ?

ഭക്ഷ്യ പൊതുവിതരണ വകുപ്പിലെ ജീവനക്കാരുടെ സ്ഥലം മാറ്റങ്ങള്‍ ഓണ്‍ലെെന്‍ വഴിയാക്കുന്നതിനായി എച്ച്.ആര്‍.എം.എസ്. വികസിപ്പിക്കുന്നതിനായി 02.06.2022-ല്‍ സി-ഡിറ്റിന് നല്‍കിയ വര്‍ക്ക് ഓര്‍ഡര്‍ പ്രകാരം സോഫ്‌റ്റ്‌വെയര്‍ തയ്യാറായിട്ടുണ്ടോ; ഇല്ലെങ്കില്‍ കാലതാമസത്തിനുള്ള കാരണം വിശദമാക്കാമോ;

പ്രസ്തുത പ്രവൃത്തിയ്ക്കായി എത്ര രൂപയുടെ ഭരണാനുമതിയാണ് നല്‍കിയിട്ടുള്ളത് ; സോഫ്‌റ്റ്‌വെയര്‍ തയ്യാറാക്കി നല്‍കേണ്ട കാലാവധി എന്നുവരെയാണ്; വിശദമാക്കാമോ;

പ്രസ്തുത ഉത്തരവിന്റെ പകർപ്പ് ലഭ്യമാക്കാമോ;

പ്രസ്തുത പ്രവൃത്തി എന്നുമുതല്‍ നടപ്പിലാക്കാനാകും എന്ന് വിശദമാക്കാമോ?

സംസ്ഥാനത്തെ നെല്ല് സംഭരണ പദ്ധതി പ്രകാരം കര്‍ഷകര്‍ക്ക് നല്‍കാനുള്ള കുടിശ്ശിക തുക വിതരണം ചെയ്യാനും അടുത്ത സംഭരണ സീസണ്‍ മുതല്‍ സമയബന്ധിതമായി നെല്ലെടുക്കാനും വില യഥാസമയം കര്‍ഷകര്‍ക്കു ലഭ്യമാക്കാനും എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ?

സപ്ലൈകോ വഴി നെല്ല് സംഭരണം നടത്തിയ ഇനത്തില്‍ കര്‍ഷകര്‍ക്ക് എത്ര രൂപ വിതരണം ചെയ്യാനുണ്ടെന്ന് വിശദമാക്കുമോ; പ്രസ്തുത തുക എന്നത്തേക്ക് കൊടുത്ത് തീര്‍ക്കാന്‍ കഴിയുമെന്ന് വ്യക്തമാക്കുമോ;

2016 - ന് ശേഷം നെല്ലിന്റെ സംഭരണ വിലയില്‍ കേന്ദ്രസംസ്ഥാന വിഹിതം വര്‍ദ്ധിപ്പിച്ചിട്ടുണ്ടോ; ആയതിന്റെ വര്‍ഷം തിരിച്ചുള്ള വിശദാംശം ലഭ്യമാക്കുമോ;

നടപ്പ് സാമ്പത്തിക വര്‍ഷം നെല്ലിന്റെ സംഭരണ വിലയില്‍ സംസ്ഥാന വിഹിതം എത്രയാണെന്ന് വ്യക്തമാക്കുമോ;

സപ്ലൈകോ സംഭരിച്ച നെല്ലിന്റെ വിലയിനത്തിൽ കർഷകർക്ക് നൽകാനുള്ള തുക പൂർണ്ണമായും വിതരണം ചെയ്യുന്നതിന് അടിയന്തര നടപടികള്‍ സ്വീകരിക്കുമോ?

കഴിഞ്ഞ സീസണിൽ പാലക്കാട് ജില്ലയിൽ നിന്നും സംഭരിച്ച നെല്ലിന്റെ അളവ് എത്രയാണെന്ന് അറിയിക്കുമോ;

ആലത്തൂര്‍ മണ്ഡലത്തിലെ ഓരോ പാടശേഖരത്തില്‍ നിന്നും ശേഖരിച്ച നെല്ലിന്റെ കണക്ക് വിശദമാക്കുമോ ;

പ്രസ്തുത മണ്ഡലത്തില്‍ നിന്നും സംഭരിച്ച നെല്ലിന്റെ തുക കുടിശ്ശികയായി നല്‍കാനുണ്ടോ; എങ്കിൽ പ്രസ്തുത പാടശേഖരങ്ങളുടെ പേരുവിവരവും ഓരോ പാടശേഖരത്തിനും നല്‍കാനുള്ള കുടിശ്ശിക തുകയും എത്രയാണെന്ന് വ്യക്തമാക്കാമോ;

പ്രസ്തുത കുടിശ്ശിക പൂർണ്ണമായി നൽകുന്നതിന് അടിയന്തര നടപടി സ്വീകരിക്കുമോയെന്ന് വിശദമാക്കാമോ?

കഴിഞ്ഞ സീസണില്‍ കര്‍ഷകരില്‍ നിന്നും എത്ര ടണ്‍ നെല്ലാണ് സംഭരിച്ചിട്ടുളളതെന്ന് വിശദമാക്കുമോ;

സംഭരിച്ച നെല്ലിന്റെ വില കര്‍ഷകര്‍ക്ക് ലഭിക്കാത്ത വിഷയം ശ്രദ്ധയില്‍പെട്ടിട്ടുണ്ടോ;

കര്‍ഷകരില്‍ നിന്നും സംഭരിച്ച നെല്ലിന്റെ വില അടിയന്തരമായി നല്‍കുന്നതിന് എന്തെല്ലാം നടപടികളാണ് സ്വീകരിച്ചിട്ടുളളതെന്ന് വിശദമാക്കുമോ;

സംഭരിച്ച നെല്ലിന്റെ വില പൂര്‍ണ്ണമായും എന്ന് കൊടുത്തുതീര്‍ക്കാന്‍ കഴിയുമെന്ന് അറിയിക്കുമോ?

സംസ്ഥാനത്ത് സപ്ലൈകോ വഴി നെല്ല് സംഭരിച്ച വകയില്‍ കര്‍ഷകര്‍ക്ക് നല്‍കാനുള്ള കുടിശ്ശിക എത്രയാണെന്ന് അറിയിക്കാമോ;

പ്രസ്തുത കുടിശ്ശിക വിതരണം ചെയ്യുന്നതിന് സ്വീകരിച്ച നടപടികള്‍ വിശദമാക്കാമോ;

കുടിശ്ശിക എന്നു മുതല്‍ വിതരണം ചെയ്യാനാണ് ഉദ്ദേശിക്കുന്നതെന്ന് വ്യക്തമാക്കാമോ;

ഇടക്കാലാശ്വാസമായി കുടിശ്ശിക കര്‍ഷകര്‍ക്ക് അനുവദിച്ചു നല്‍കുന്നതിന് നടപടി സ്വീകരിക്കുമോ; എങ്കിൽ വിശദമാക്കുമോ?

സംസ്ഥാനത്ത് ഇ-പോസ് മെഷീൻ സ്ഥാപിച്ചത് ഏതു സ്ഥാപനമാണ് എന്ന് വ്യക്തമാക്കാമോ;

പ്രസ്തുത സ്ഥാപനത്തിന് ടെൻഡർ നടപടികളിലൂടെയാണോ കരാർ നൽകിയത്; വ്യക്തമാക്കാമോ;

സംസ്ഥാനത്ത് ഇ-പോസ് മെഷീൻ സ്ഥാപിച്ചതിന്റെ കരാർ രേഖകളുടെ പകർപ്പുകൾ ലഭ്യമാക്കാമോ;

ഇ-പോസ് മെഷീൻ സ്ഥാപിച്ചതുമായി ബന്ധപ്പെട്ട് എന്തൊക്കെ പ്രവൃത്തികളിലാണ് സംസ്ഥാന സർക്കാർ ടെൻഡർ വിളിച്ചിരുന്നത് എന്ന് വ്യക്തമാക്കാമോ;

ഈ ടെൻഡറുകളിൽ ഏതൊക്കെ സ്ഥാപനങ്ങൾ പങ്കെടുത്തു എന്നും ഓരോ സ്ഥാപനവും ക്വാട്ട് ചെയ്ത തുക എത്രയായിരുന്നു എന്നും വ്യക്തമാക്കാമോ;

ഇ-പോസ് മെഷീൻ സ്ഥാപിച്ചതുമായും അവയുടെ പ്രവർത്തനവുമായും ബന്ധപ്പെട്ട് കേന്ദ്ര സർക്കാർ സ്ഥാപനമായ എൻ.ഐ.സി. എന്തൊക്കെ ജോലികളാണ് ചെയ്യുന്നത് എന്നും സംസ്ഥാന സർക്കാർ എന്തൊക്കെ ജോലികളാണ് ചെയ്യുന്നത് എന്നും വിശദമാക്കാമോ?

കേന്ദ്രം സംസ്ഥാനത്തിന് അനുവദിക്കുന്ന ഭക്ഷ്യധാന്യ വിഹിതത്തില്‍ കുറവ് വരുത്തിയിട്ടുണ്ടോ; ഉണ്ടെങ്കില്‍ എത്രയെന്ന് വ്യക്തമാക്കാമോ;

ഓണം ഉള്‍പ്പെടെയുള്ള സംസ്ഥാനത്തെ ആഘോഷ സമയങ്ങളില്‍ കേന്ദ്രം പ്രത്യേക സൗജന്യ ഭക്ഷ്യ ധാന്യങ്ങള്‍ അനുവദിക്കുന്നുണ്ടോ; എങ്കില്‍ വിശദാംശം നൽകാമോ?

നിരന്തരമായി ഉണ്ടായിക്കൊണ്ടിരിക്കുന്ന പ്രകൃതിക്ഷോഭ കെടുതികളും കേന്ദ്രസർക്കാരിന്റെ പുത്തൻ സാമ്പത്തിക നയം മൂലമുണ്ടായ സാമ്പത്തിക പ്രതിസന്ധിയും സംസ്ഥാനത്ത് നിത്യോപയോഗ സാധനവിലയെയും ലഭ്യതയെയും എപ്രകാരം ബാധിച്ചുവെന്നും അതുമൂലമുണ്ടായ വിലവർദ്ധനയും ദൗര്‍ലഭ്യവും സംബന്ധിച്ച വിശദാംശവും ലഭ്യമാക്കുമോ;

പ്രസ്തുത പ്രതിസന്ധി തരണം ചെയ്യാനും ജനങ്ങൾക്ക് നിത്യോപയോഗ സാധനങ്ങളുടെ ലഭ്യത ഉറപ്പുവരുത്താനും വിലനിലവാരം പിടിച്ചുനിർത്താനുമായി നടപ്പാക്കിയ പ്രധാന പ്രവർത്തനങ്ങൾ വിശദമാക്കുമോ;

സംസ്ഥാനത്ത് ആവശ്യം വേണ്ടുന്ന നിത്യോപയോഗ സാധനങ്ങളുടെ ദൈനംദിന കണക്കും സംസ്ഥാന ലഭ്യതയും മറ്റ് സംസ്ഥാനങ്ങളെ ആശ്രയിക്കേണ്ട അളവും വ്യക്തമാക്കുമോ;

പ്രസ്തുത പ്രതിസന്ധി നേരിടാൻ എന്തെല്ലാം കേന്ദ്രസഹായം അഭ്യർത്ഥിച്ചുവെന്നും ലഭ്യമായത് എന്തെല്ലാമെന്നും വ്യക്തമാക്കുമോ?