പൗരന് അര്‍ഹമായ സര്‍ക്കാര്‍ സേവനങ്ങള്‍ സംബന്ധിച്ചും അവ ലഭ്യമാകുന്നതിനായി ചെയ്യേണ്ട കാര്യങ്ങള്‍ സംബന്ധിച്ചും പൊതുജനത്തിന് വിവരങ്ങള്‍ ലഭ്യമാക്കുന്നതിനായി എല്ലാ പഞ്ചായത്ത് ഓഫീസുകളിലും പൊതുജന സേവന കേന്ദ്രങ്ങള്‍ ആരംഭിക്കാന്‍ ഉദ്ദേശിക്കുന്നുണ്ടോ; വിശദാംശം ലഭ്യമാക്കാമോ;

പഞ്ചായത്തുകളില്‍ നിന്നും നഗരസഭകളില്‍ നിന്നും ലഭിക്കേണ്ട സേവനങ്ങള്‍ വേഗത്തില്‍ ലഭ്യമാക്കുന്നതിന് പൊതു സര്‍വ്വീസ് രൂപീകരണം ഏറെ പ്രയോജന പ്രദമായിരിക്കുമെന്ന് വിലയിരുത്തിയിട്ടുണ്ടോ;

സിറ്റിസണ്‍ സര്‍വ്വീസ് പോര്‍ട്ടലിലൂടെ സേവനങ്ങള്‍ ഓണ്‍ലെെനായി ലഭ്യമാക്കുന്നുണ്ടെങ്കിലും അത് വേണ്ടത്ര വ്യാപകമായി പ്രയോജനപ്പെടാത്തതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത്‍ പരിഹരിക്കാന്‍ പ്രചാരണം നടത്താന്‍ ഉദ്ദേശിക്കുന്നുണ്ടോ എന്ന് വ്യക്തമാക്കാമോ?

സംസ്ഥാനത്ത് ന്യൂനപക്ഷങ്ങളുടെ ക്ഷേമത്തിനായി നടപ്പാക്കുന്ന പ്രത്യേക പദ്ധതികളെക്കുറിച്ച് അറിയിക്കാമോ;

ന്യൂനപക്ഷ വിഭാഗങ്ങളില്‍പ്പെട്ടവരുടെ സാമ്പത്തിക ശാക്തീകരണത്തിനും അതുവഴി സാമൂഹിക ശാക്തീകരണത്തിനും കേരള സംസ്ഥാന ന്യൂനപക്ഷ വികസന ധനകാര്യ കോര്‍പ്പറേഷന്‍ നടത്തുന്ന പ്രവര്‍ത്തനങ്ങള്‍ വിശദമാക്കാമോ;

കേന്ദ്ര സര്‍ക്കാര്‍ ന്യൂനപക്ഷ വിദ്യാര്‍ത്ഥികള്‍ക്ക് നല്‍കിവന്നിരുന്ന പ്രീ മെട്രിക് സ്കോളര്‍ഷിപ്പ് നിര്‍ത്തലാക്കിയതിന് പിന്നാലെ ഈ വിഭാഗങ്ങളില്‍പ്പെട്ട വിദ്യാര്‍ത്ഥികള്‍ക്കുള്ള വിദേശ വായ്പയും നിര്‍ത്തലാക്കിയത് മൂലം ബുദ്ധിമുട്ട് ഉണ്ടാകാതിരിക്കുന്നതിനായി സംസ്ഥാന സർക്കാർ പ്രത്യേക പദ്ധതികള്‍ ആരംഭിക്കാന്‍ ഉദ്ദേശിക്കുന്നുണ്ടോ; വ്യക്തമാക്കുമോ?

പ്രധാൻമന്ത്രി ഗരീബ്‌ കല്യാൺ യോജന പ്രകാരമുള്ള സബ്‌സിഡി അരി നിർത്തലാക്കാനുള്ള കേന്ദ്ര സർക്കാർ തീരുമാനം ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

പ്രസ്തുത തീരുമാനം സംസ്ഥാനത്തെ 40 ലക്ഷം കാർഡുടമകൾക്ക്‌ തിരിച്ചടിയാകുന്നതിനും രാജ്യത്ത്‌ പൊതുവിപണിയിൽ അരി വില വീണ്ടും ഉയരുന്നതിനും കാരണമാകുമോയെന്ന് വിശദമാക്കാമോ;

ദരിദ്രര്‍ക്ക് സൗജന്യമായി അഞ്ച് കിലോ ഭക്ഷ്യധാന്യം ലഭ്യമാക്കണമെന്ന കേന്ദ്ര സര്‍ക്കാര്‍ പ്രഖ്യാപനം നിലവില്‍ ലഭിക്കുന്ന സൗജന്യ ഭക്ഷ്യധാന്യത്തിന്റെ അളവില്‍ കുറവ് വരുത്തുന്നതാണ് എന്നത് പരിശോധിച്ചിട്ടുണ്ടോ; വിശദമാക്കാമോ;

മുൻഗണനാ വിഭാഗത്തിന് നൽകിവരുന്ന സാധാരണ റേഷൻ വിഹിതത്തിൽ വർദ്ധനവ് വരുത്താതെ പ്രധാൻമന്ത്രി ഗരീബ്‌ കല്യാൺ യോജന നിർത്തലാക്കിയതോടെ കേന്ദ്ര സർക്കാർ സംസ്ഥാനങ്ങൾക്ക് നല്‍കിവന്നിരുന്ന ഭക്ഷ്യധാന്യ വിതരണം പകുതിയായി കുറഞ്ഞിട്ടുണ്ടോ; എങ്കില്‍ ഇത് ഭക്ഷ്യ ദൗര്‍ലഭ്യത്തിന് ഇടയാക്കുമോ; വിശദമാക്കാമോ?

സംസ്ഥാനത്ത് നാല് വര്‍ഷത്തിനുള്ളില്‍ നാല്പത് ലക്ഷം തൊഴിലവസരങ്ങള്‍ സൃഷ്ടിക്കുകയെന്ന ബൃഹദ് പരിപാടിയുടെ ലക്ഷ്യപ്രാപ്തിക്കായുള്ള ഭൗതിക പശ്ചാത്തലം സൃഷ്ടിക്കുന്നതിന് നടത്തുന്ന പ്രവര്‍ത്തനങ്ങള്‍ എന്തെല്ലാമെന്ന് അറിയിക്കാമോ;

നിർമ്മിത ബുദ്ധി, ഗ്രഫീന്‍ ഇന്നവേഷന്‍ തുടങ്ങിയ ഭാവി വികസന സാധ്യതകള്‍ പ്രയോജനപ്പെടുത്തുന്നതിനാവശ്യമായ സൗകര്യങ്ങള്‍ സൃഷ്ടിക്കാന്‍ നടപടി ആരംഭിച്ചിട്ടുണ്ടോ;

സംസ്ഥാനത്ത് ഇരുപത് ലക്ഷം കുടുംബങ്ങള്‍ക്ക് സൗജന്യമായി ഇന്റര്‍നെറ്റ് ലഭ്യമാക്കുന്ന കെ-ഫോണ്‍ പദ്ധതി പൂര്‍ത്തീകരിക്കാനായിട്ടുണ്ടോ; എങ്കിൽ ഇതുവഴി ലക്ഷ്യമിടുന്ന നേട്ടങ്ങള്‍ എന്തെല്ലാമെന്ന് വിശദമാക്കാമോ?

സംസ്ഥാനത്തെ ഗ്രാമപഞ്ചായത്തുകളില്‍ സിറ്റിസൺ ഫെസിലിറ്റേഷന്‍ സെന്റര്‍ (പൗര സഹായ കേന്ദ്രം) സ്ഥാപിക്കുന്നതിന് തീരുമാനിച്ചിട്ടുണ്ടോ; എന്തെല്ലാം സൗകര്യങ്ങളും സേവനങ്ങളുമാണ് പ്രസ്തുത കേന്ദ്രത്തില്‍ നിന്നും പൊതുജനങ്ങള്‍ക്ക് ലഭ്യമാകുന്നത്; വിശദാംശം ലഭ്യമാക്കാമോ;

പഞ്ചായത്തിന്റെ ചുമതലയില്‍ ഉള്‍പ്പെടാത്തതും ഇതര വകുപ്പുകളില്‍ നിന്നും ലഭിക്കേണ്ടതുമായ സേവനങ്ങള്‍ സംബന്ധിച്ച് വിവരങ്ങള്‍ നല്‍കുന്നതിന് പ്രസ്തുത സഹായ കേന്ദ്രം വഴി സൗകര്യം ലഭ്യമാണോ; വിശദമാക്കാമോ?

തൊഴിലുറപ്പ് പദ്ധതി ദുര്‍ബലപ്പെടുത്തുന്ന തരത്തിലുള്ള ഇടപെടലുകള്‍ കേന്ദ്ര സര്‍ക്കാരിന്റെ ഭാഗത്തുനിന്നുണ്ടാകുന്നുവെന്ന ആക്ഷേപം ഉയരുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ പ്രസ്തുത സാഹചര്യത്തിൽ സംസ്ഥാനത്ത് തൊഴിലുറപ്പ് പദ്ധതി കാര്യക്ഷമമായി നടക്കുന്നുണ്ടെന്ന് ഉറപ്പുവരുത്തുന്നതിന് നടത്തുന്ന പ്രവര്‍ത്തനങ്ങള്‍ അറിയിക്കാമോ;

തൊഴിലുറപ്പ് തൊഴിലാളികളുടെ ക്ഷേമം ഉറപ്പാക്കാൻ ക്ഷേമനിധി ബോര്‍ഡ് രൂപീകരിച്ചിട്ടുണ്ടോ; പദ്ധതിയിൽ പെൻഷൻ ഉള്‍പ്പെടെയുള്ള ആനുകൂല്യങ്ങള്‍ എത്ര പേര്‍ക്ക് ലഭ്യമാകുമെന്നാണ് പ്രതീക്ഷിക്കുന്നതെന്ന് അറിയിക്കുമോ;

ഈ പദ്ധതിയിൽ ഒരു പഞ്ചായത്തിൽ ഒരേ സമയം ഇരുപത് പദ്ധതികള്‍ മാത്രമേ പാടുള്ളൂവെന്ന കേന്ദ്ര സർക്കാരിന്റെ അശാസ്ത്രീയ നിബന്ധന തിരുത്തിക്കുന്നതിന് സംസ്ഥാന സര്‍ക്കാരിന്റെ ഇടപെടലിലൂടെ കഴിഞ്ഞിട്ടുണ്ടോ എന്ന് അറിയിക്കുമോ?

സംസ്ഥാനത്ത് ഭക്ഷ്യസുരക്ഷാ നടപടികൾ കാര്യക്ഷമമാക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ഹോട്ടലുകൾ, റെസ്റ്റോറന്റുകൾ എന്നിവ കേന്ദ്രീകരിച്ച് ഓപ്പറേഷൻ ഹോളിഡേ എന്ന പേരിൽ പരിശോധന നടത്തി വരുന്നുണ്ടോ; വിശദമാക്കാമോ;

ഭക്ഷണത്തിൽ മായം കലർത്തുന്നതും പഴകിയ ഭക്ഷണം നൽകുന്നതും സംബന്ധിച്ച പരാതികൾ അറിയിക്കുന്നതിന് ഭക്ഷ്യസുരക്ഷാ വകുപ്പിന്റെ പോർട്ടൽ തയ്യാറാക്കിയിട്ടുണ്ടോ; വിശദമാക്കാമോ;

നിയമപ്രകാരമുള്ള ലൈസൻസ്, രജിസ്ട്രേഷന്‍ എന്നിവ ഇല്ലാതെ പ്രവർത്തിക്കുന്ന ഭക്ഷണശാലകൾക്കെതിരെ കാര്യക്ഷമമായ നടപടികൾ സ്വീകരിച്ചിട്ടുണ്ടോ; എങ്കില്‍ വ്യക്തമാക്കാമോ?

സംസ്ഥാനത്ത് വിദ്യാലയ പരിസരങ്ങളിൽ ലഹരി വ്യാപനമുണ്ടെന്നതും ലഹരി ഉല്പന്നങ്ങളുടെ സ്ഥിരം ഉപയോക്താക്കളിൽ പ്രായപൂർത്തിയാകാത്ത കുട്ടികളും ഉൾപ്പെടുന്നുവെന്നതും ശ്രദ്ധയിൽപ്പെട്ടിട്ടുണ്ടോ; എങ്കില്‍ വിശദമാക്കാമോ;

ഇതുസംബന്ധിച്ച് വിദ്യാലയ പരിസരങ്ങളിൽ ജനകീയ പങ്കാളിത്തത്തോടെ നിരീക്ഷണം ശക്തമാക്കാൻ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ;

അതിർത്തി റോഡുകളിൽ വാഹന പരിശോധന ശക്തിപ്പെടുത്തുന്നതിന് കെമു (കേരള എക്സൈസ് മൊബൈൽ ഇന്റര്‍വെൻഷൻ യൂണിറ്റ്) ആരംഭിക്കുവാന്‍ നടപടികൾ സ്വീകരിച്ചിട്ടുണ്ടോ; വിശദമാക്കാമോ;

എക്‌സൈസ് എന്‍ഫോഴ്സ്മെന്റ് വിഭാഗത്തെ ശക്തമാക്കിയതോടൊപ്പം ലഹരി മാഫിയക്കെതിരെ ആരോഗ്യം, വിദ്യാഭ്യാസം, തദ്ദേശസ്വയംഭരണം എന്നീ വകുപ്പുകളുടെ ഏകോപനം ഉറപ്പുവരുത്തുവാന്‍ നടപടി സ്വീകരിച്ചിട്ടുണ്ടോ; വിശദമാക്കാമോ?

സംസ്ഥാനത്ത് കർഷകരിൽ നിന്നും നെല്ല് സംഭരിക്കുന്നതില്‍ എന്തെങ്കിലും നിയന്ത്രണം ഏർപ്പെടുത്തിയിട്ടുണ്ടോ;

നിശ്ചിത അളവിൽ നെല്ല് നൽകാൻ കഴിയാത്ത കർഷകരുടെ പേരിൽ ഇതര സംസ്ഥാനങ്ങളിൽ നിന്നും നെല്ല് കൊണ്ടുവന്ന് സംസ്ഥാനത്തിന്റെ സംഭരണത്തിൽ ഉൾപ്പെടുത്തുന്നതായി കണ്ടെത്തിയിട്ടുണ്ടോ;

എങ്കില്‍ ഇതുമൂലം സംസ്ഥാനത്തിനുണ്ടായ നഷ്ടം കണക്കാക്കിയിട്ടുണ്ടോ;

ഇത്തരം തട്ടിപ്പുകൾ തടയുന്നതിന് എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നത്; വിശദമാക്കുമോ?

സില്‍വര്‍ലൈന്‍ പദ്ധതി സംബന്ധിച്ച സര്‍ക്കാരിന്റെ അന്തിമ നിലപാട് വ്യക്തമാക്കാമോ;

പ്രസ്തുത പദ്ധതിക്ക് വേണ്ടി ഭൂമി വിട്ടുനല്‍കേണ്ട ജനങ്ങളുടെ ആശങ്കയും എതിർപ്പും സംസ്ഥാനം ഏറ്റെടുക്കേണ്ടിവരുന്ന സാമ്പത്തിക ബാധ്യതയും പരിഗണിച്ച് പ്രസ്തുത പദ്ധതി ഉപേക്ഷിക്കാന്‍ നടപടി സ്വീകരിക്കുമോ;

സര്‍ക്കാരും സര്‍ക്കാര്‍ ഏജന്‍സികളും ഏറ്റെടുക്കുന്ന എല്ലാ വായ്പകളും സംസ്ഥാനത്തിന്റെ ബാധ്യതയായി കണക്കാക്കുമെന്ന കേന്ദ്ര സര്‍ക്കാരിന്റെ നയം വ്യക്തമായ സാഹചര്യത്തില്‍, ധന ഉത്തരവാദിത്ത നിയമത്തിന്റെ ചട്ടങ്ങള്‍ പാലിച്ചുകൊണ്ട് പ്രസ്തുത പദ്ധതിക്കുവേണ്ട സാമ്പത്തിക വായ്പകള്‍ എങ്ങനെ ലഭ്യമാക്കാന്‍ കഴിയുമെന്ന് വ്യക്തമാക്കാമോ;

വരും സാമ്പത്തിക വര്‍ഷങ്ങളില്‍ സര്‍ക്കാര്‍ നടപ്പിലാക്കാന്‍ ഉദ്ദേശിക്കുന്ന മുന്‍ഗണന പദ്ധതികള്‍ ഏതെല്ലാമെന്നും അവയുടെ സാമ്പത്തിക ബാധ്യത, അത് കണ്ടെത്താനുള്ള മാര്‍ഗങ്ങള്‍ എന്നിവ സംബന്ധിച്ചുമുള്ള വിശദാംശം ലഭ്യമാക്കാമോ?

സംസ്ഥാനത്ത് വൃത്തിഹീനമായ സ്ഥിതിയിലുളളതും പഴകിയതും ഭക്ഷ്യയോഗ്യമല്ലാത്തതുമായ ആഹാര പദാര്‍ത്ഥങ്ങള്‍ വില്ക്കുന്ന സ്ഥാപനങ്ങളുടെ മേല്‍ കര്‍ശന നടപടി സ്വീകരിക്കാന്‍ നിര്‍ദേശം നല്‍കിയിട്ടുണ്ടോ; ഇതിനായി ഭക്ഷ്യസുരക്ഷാ വകുപ്പിനെ കൂടുതല്‍ ശാക്തീകരിക്കാന്‍ ഉദ്ദേശിക്കുന്നുണ്ടോ;

ആഹാര പദാര്‍ത്ഥങ്ങള്‍ വിപണനം നടത്തുന്ന സ്ഥാപനങ്ങളെല്ലാം ഭക്ഷ്യസുരക്ഷ ലെെസന്‍സോ പെര്‍മിറ്റോ എടുത്തിരിക്കണമെന്ന വ്യവസ്ഥ കര്‍ശനമായി പാലിക്കുന്നുണ്ടെന്ന് ഉറപ്പുവരുത്താന്‍ നടപടിയെടുത്തിട്ടുണ്ടോ; ക്യു.ആര്‍. കോഡ് പോലുളള സംവിധാനം ഏര്‍പ്പെടുത്തി ജനകീയ പരിശോധനയ്ക്കുളള സാധ്യത പരിഗണിക്കുമോ;

ഭക്ഷ്യസുരക്ഷാ വകുപ്പ് ഉദ്യോഗസ്ഥര്‍ പ്രവര്‍ത്തന വിലക്കേര്‍പ്പെടുത്തുന്ന സ്ഥാപനങ്ങള്‍ നിയമവിരുദ്ധമായി പ്രവര്‍ത്തിക്കുന്നതായും ഉദ്യോഗസ്ഥരെ ഭീഷണിപ്പെടുത്തുന്നതായും കായികമായി നേരിടുന്നതായും ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതുസംബന്ധിച്ച് നടപടി സ്വീകരിക്കുമോ?

പ്രവാസികൾക്കായി കേന്ദ്ര സര്‍ക്കാര്‍ എന്തെങ്കിലും ക്ഷേമ പദ്ധതികള്‍ നടപ്പിലാക്കുന്നുണ്ടോ; എങ്കില്‍ വിശദാംശം ലഭ്യമാക്കുമോ;

സംസ്ഥാനത്തെ പ്രവാസികളുടെ സംരക്ഷണത്തിനും ക്ഷേമത്തിനുമായി സർക്കാർ നടപ്പാക്കുന്ന പ്രവർത്തനങ്ങൾ വിശദമാക്കുമോ;

പ്രവാസികളുടെ ക്ഷേമ പദ്ധതികള്‍ക്കായി കേന്ദ്ര സര്‍ക്കാരിനോട് സഹായം ആവശ്യപ്പെട്ടിരുന്നോ; എങ്കിൽ ഏതെല്ലാം പദ്ധതികള്‍ക്കാണ് സഹായം ആവശ്യപ്പെട്ടിരുന്നതെന്നും കേന്ദ്ര സര്‍ക്കാരില്‍ നിന്ന് അനുകൂല നടപടി ഉണ്ടായിട്ടുണ്ടോയെന്നും വിശദമാക്കുമോ;

തിരക്കേറിയ സീസണുകളില്‍ വിമാനകമ്പനികള്‍ പ്രവാസികളിൽ നിന്ന് ഉയര്‍ന്ന നിരക്ക് ഈടാക്കുന്നതില്‍ ഇടപെടണമെന്ന് കേന്ദ്ര സര്‍ക്കാരിനോട് ആവശ്യപ്പെട്ടിട്ടുണ്ടോ; എങ്കില്‍ ഇതുസംബന്ധിച്ച് എന്തെങ്കിലും നടപടി ഉണ്ടായിട്ടുണ്ടോയെന്ന് അറിയിക്കുമോ?

ആരോഗ്യ രംഗത്തെ മികച്ച പ്രവര്‍ത്തനത്തിന് ഇന്ത്യ ടുഡെ ഏര്‍പ്പെടുത്തിയ ദേശീയ പുരസ്കാരം ഇത്തവണ സംസ്ഥാനത്തിന് ലഭിച്ചിട്ടുണ്ടോ; എങ്കില്‍ വിലയിരുത്തലിനായി അവലംബിച്ച മാനദണ്ഡങ്ങള്‍ എന്തെല്ലാമായിരുന്നുവെന്ന് വ്യക്തമാക്കാമോ;

ഈ സര്‍ക്കാര്‍ അധികാരത്തിലെത്തിയതിന് ശേഷം ആരോഗ്യ വകുപ്പിന് ലഭിച്ചിട്ടുളള പുരസ്കാരങ്ങള്‍ എന്തെല്ലാമാണെന്നും അവ ഏതെല്ലാം മേഖലയിലെ പ്രവര്‍ത്തനങ്ങള്‍ക്കായിരുന്നുവെന്നും അറിയിക്കാമോ;

നവകേരളം കര്‍മ്മപരിപാടിയില്‍ പൊതുജനാരോഗ്യ മേഖലയുടെ ശാക്തീകരണത്തിനായി നടത്തുന്ന പ്രവര്‍ത്തനങ്ങള്‍ എന്തെല്ലാമാണ്; വിശദമാക്കുമോ?

സംസ്ഥാനത്ത് ഭക്ഷ്യസുരക്ഷ എന്ന ലക്ഷ്യം മുന്‍നിര്‍ത്തി സര്‍ക്കാര്‍ നടപ്പാക്കിയിട്ടുള്ള പ്രവര്‍ത്തനങ്ങള്‍ അവലോകനം ചെയ്തിട്ടുണ്ടോ; വിശദാംശം നൽകാമോ;

ഇതുമായി ബന്ധപ്പെട്ട് സംസ്ഥാനത്ത് മുഴുവന്‍ പരിശോധന നടത്തുവാന്‍ അധികാരമുള്ള പ്രത്യേക ദൗത്യ സംഘത്തെ നിയോഗിച്ചിട്ടുണ്ടോ; വിശദമാക്കുമോ;

ഭക്ഷ്യസുരക്ഷയുമായി ബന്ധപ്പെട്ട് ഹോട്ടലുകള്‍ക്കും റെസ്റ്റോറന്റുകള്‍ക്കും ശുചിത്വം, വിവിധ പരിശോധനകള്‍ എന്നിവയുടെ അടിസ്ഥാനത്തില്‍ റേറ്റിംഗ് നല്‍കുന്നതിനും ഈ റേറ്റിംഗ് ഫുഡ് ഡെലിവറി ആപ്പുമായി പങ്കുവയ്ക്കുന്നതിനും തീരുമാനിച്ചിട്ടുണ്ടോ; വിശദമാക്കുമോ?

സംസ്ഥാനത്ത് മികച്ച പ്രവര്‍ത്തനം നടത്തുന്ന തദ്ദേശസ്വയംഭരണ സ്ഥാപനങ്ങള്‍ക്ക് പ്രോത്സാഹനം നല്‍കുന്നതിന്റെ ഭാഗമായി പ്രത്യേക പുരസ്കാരങ്ങളും സമ്മാനങ്ങളും നല്‍കുന്ന പദ്ധതി നിലവിലുണ്ടോ; വിശദാംശം ലഭ്യമാക്കാമോ;

പഞ്ചായത്തുകളുടെയും നഗരസഭകളുടെയും പ്രവര്‍ത്തന മികവ് പരിശോധിക്കുന്നതിന്റെ മാനദണ്ഡം പരിഷ്കരിക്കുന്നതിന് തീരുമാനിച്ചിട്ടുണ്ടോ; മികവിനെ അടയാളപ്പെടുത്തി റാങ്ക് നിശ്ചയിച്ച് പ്രത്യേക പദവികള്‍ നല്‍കുന്നതിന് തീരുമാനിച്ചിട്ടുണ്ടോ; ഇതുവഴി എന്തൊക്കെ നേട്ടങ്ങളാണ് പ്രതീക്ഷിക്കുന്നത്; വിശദാംശം നല്‍കുമോ?

ഭക്ഷ്യസുരക്ഷാ കമ്മീഷണറേറ്റിന്റെ 2016-2021 കാലയളവിലെ പ്രവര്‍ത്തനങ്ങളെ വിലയിരുത്തിയ സി.എ.ജി. യുടെ റിപ്പോർട്ടില്‍ ഭക്ഷ്യസുരക്ഷ നിയമം പാലിക്കുന്നതില്‍ സംസ്ഥാനം വീഴ്ച വരുത്തിയതായി പരാമര്‍‍ശിച്ചിട്ടുണ്ടോ; എങ്കില്‍ അതിന്റെ അടിസ്ഥാനത്തിൽ സ്വീകരിച്ച നടപടികൾ വിശദമാക്കാമോ;

ഭക്ഷ്യസുരക്ഷാ നിയമം നടപ്പാക്കല്‍, ലൈസന്‍സും രജിസ്ട്രേഷനും നല്‍കല്‍, പരിശോധന, സാംപിള്‍ ശേഖരണം, ഭക്ഷ്യവിശകലനം, നിരീക്ഷണം എന്നിവയില്‍ വിവിധ ഘട്ടങ്ങളില്‍ അപാകത നേരിട്ടതായി റിപ്പോർട്ടില്‍ പരാമർശിച്ചിട്ടുണ്ടോ; എങ്കില്‍ ഇത് ഗൗരവത്തോടെ കാണുന്നുണ്ടോ;

പ്രസ്തുത റിപ്പോർട്ടിലെ ശിപാര്‍ശകള്‍ നടപ്പിലാക്കാൻ സ്വീകരിച്ച നടപടികൾ വിശദമാക്കാമോ?

സംസ്ഥാനത്ത് പോലീസ് സേനയില്‍ ഗുണ്ടാ മാഫിയ ബന്ധമുളളവരും അവിഹിത സ്വത്ത് സമ്പാദിച്ചവരുമായ പോലീസ് ഉദ്യോഗസ്ഥര്‍ ഉള്ളതായി കണ്ടെത്തിയിട്ടുണ്ടോ; എങ്കില്‍ ഇതുസംബന്ധിച്ച് അന്വേഷണം നടത്തുന്നുണ്ടോ എന്ന് വ്യക്തമാക്കാമോ ;

ക്രിമിനല്‍ നടപടികളില്‍ ഏർപ്പെട്ടിട്ടുള്ളതായി കണ്ടെത്തുന്ന പോലീസുകാരെ ക്രമസമാധാന പരിപാലന ഡ്യൂട്ടിയിൽ നിന്നും ഒഴിവാക്കാൻ നടപടി സ്വീകരിക്കുമോ;

കുറ്റക്കാരെന്ന് കണ്ടെത്തുന്നവർക്കെതിരെ എന്തെല്ലാം നടപടികള്‍ സ്വീകരിക്കാനാണ് ഉദ്ദേശിക്കുന്നത്; വിശദമാക്കുമോ?

സംസ്ഥാനത്തെ റേഷൻകടകളിലൂടെ പോഷക സമ്പുഷ്ട അരി വിതരണം ചെയ്യണമെന്ന് കേന്ദ്ര സർക്കാർ നിർദേശിച്ചിട്ടുണ്ടോ;

ഈ നിർദേശത്തോട് സംസ്ഥാന സർക്കാർ വിയോജിപ്പ് രേഖപ്പെടുത്തിയിട്ടുണ്ടോ;

സംസ്ഥാനത്ത് എവിടെയെല്ലാം ഇപ്രകാരമുള്ള അരി വിതരണം ചെയ്തിട്ടുണ്ടെന്നും ​മതിയായ പഠനത്തിന് ശേഷമാണോ വിതരണം ചെയ്തതെന്നും വിശദമാക്കുമോ?

സംസ്ഥാനത്ത് ഒരു തദ്ദേശസ്വയംഭരണ സ്ഥാപനം - ഒരു ആശയം എന്ന പദ്ധതിയുടെ വിഭാവന ലക്ഷ്യങ്ങളും വിശദാംശവും അറിയിക്കാമോ;

ഈ പദ്ധതിയിലൂടെ ആശയങ്ങള്‍ സമാഹരിച്ചിട്ടുണ്ടോ; എങ്കില്‍ ലഭിച്ചവയില്‍ നിന്ന് ഏറ്റവും മികച്ചത് കണ്ടെത്തുന്നതിന് ഏര്‍പ്പെടുത്തിയിട്ടുള്ള ക്രമീകരണങ്ങള്‍ എന്തെല്ലാമെന്നും അതിനായി വിദഗ്ദ്ധ സമിതിയെ ചുമതലപ്പെടുത്തിയിട്ടുണ്ടോയെന്നും പ്രസ്തുത സമിതിയുടെ ഘടനയും അംഗങ്ങളെ സംബന്ധിച്ച വിശദാംശവും അറിയിക്കുമോ;

സംസ്ഥാനത്ത് പരീക്ഷിച്ചിട്ടില്ലാത്ത തരത്തിലുള്ള നൂതനാശയങ്ങള്‍ വരുമ്പോള്‍ അവയെ നിലവിലുള്ള സമ്പ്രദായങ്ങളും വ്യവസ്ഥിതിയുമായി എങ്ങനെ കൂട്ടിയിണക്കി പ്രാവര്‍ത്തികമാക്കാനാണ് ഉദ്ദേശിക്കുന്നതെന്ന് വ്യക്തമാക്കാമോ;

ഈ പദ്ധതിയിലൂടെ സംസ്ഥാനത്തിന്റെ നാനാതുറകളിലും നിന്നും ലഭിക്കുന്ന ആശയങ്ങള്‍ പൊതുജനസമക്ഷം അവതരിപ്പിക്കുന്നതിന് ഇന്നവേഷന്‍ എക്‌സ്‌പോകള്‍ സംഘടിപ്പിക്കാന്‍ നടപടി സ്വീകരിക്കുമോ എന്ന് അറിയിക്കുമോ?

ഭക്ഷ്യവിഷബാധ കണ്ടെത്താനുള്ള ഭക്ഷ്യസുരക്ഷ വകുപ്പിന്റെ പരിശോധനകൾക്ക് ആവശ്യമായ ലാബുകൾ സംസ്ഥാനത്ത്‌ നിലവിലുണ്ടോയെന്ന് വ്യക്തമാക്കാമോ;

ഇറച്ചിയിലെയും മറ്റ് ഭക്ഷണപദാർത്ഥങ്ങളിലെയും സൂക്ഷ്മാണുക്കളുടെ സാന്നിദ്ധ്യം തിരിച്ചറിയുന്നതിനായി മൈക്രോ ബയോളജി അടിസ്ഥാനമാക്കിയുള്ള ആധുനിക പരിശോധനാ സൗകര്യങ്ങൾ അത്യാവശ്യമാണെന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത പരിശോധനാ സൗകര്യങ്ങൾ ജില്ലാടിസ്ഥാനത്തിൽ നിലവിൽ ലഭ്യമാണോയെന്ന് വ്യക്തമാക്കാമോ; ഇല്ലെങ്കിൽ ആയത് ഏർപ്പെടുത്താൻ നടപടി സ്വീകരിക്കുമോ;

സംസ്ഥാനത്തെ ഫുഡ് സേഫ്റ്റി ആന്‍ഡ് സ്റ്റാന്‍ഡേർഡ്സ് അതോറിറ്റി വിജ്ഞാപനം ചെയ്ത ലബോറട്ടറികളിലെ എല്ലാ പരിശോധനകൾക്കും ഗുണനിലവാര മാനദണ്ഡമായ നാഷണൽ അക്രഡിറ്റേഷൻ ബോർഡ് ഫോർ ടെസ്റ്റിംഗ് ആൻഡ് കാലിബ്രേഷൻ ലബോറട്ടറീസ് അംഗീകാരം നേടാൻ സാധിക്കാത്തതിന്റെ കാരണം വിശദമാക്കാമോ?

ജനങ്ങള്‍ക്ക് സേവനങ്ങള്‍ സുതാര്യമായും കാര്യക്ഷമമായും വേഗത്തിലും ലഭ്യമാക്കാന്‍ കഴിയും വിധം ഭരണനിര്‍വഹണം പരിഷ്കരിക്കേണ്ടതിന്റെ ആവശ്യകത ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

സംസ്ഥാനത്തെ എല്ലാ സര്‍ക്കാര്‍ ഓഫീസുകളിലും സമ്പൂര്‍ണമായും സെക്രട്ടേറിയറ്റ് മാതൃകയില്‍ ഇ-ഫയലിംഗ് സംവിധാനം അടിയന്തര പ്രാധാന്യത്തോടെ നടപ്പിലാക്കാന്‍ തീരുമാനിച്ചിട്ടുണ്ടോ; വിശദമാക്കുമോ;

ഇ-ഫയലിംഗ് സംവിധാനം നടപ്പാക്കുന്നതിന്റെ ഭാഗമായി എല്ലാ സര്‍ക്കാര്‍ ഓഫീസുകള്‍ക്കും ഏകീകൃത സോഫ്റ്റ്‍വെയറും പഞ്ചിംഗും‍ ഏര്‍പ്പെടുത്തുവാന്‍ തീരുമാനിച്ചിട്ടുണ്ടോ; വിശദമാക്കാമോ;

ഫയല്‍ നീക്കമറിയാന്‍ പൊതുജനങ്ങള്‍ക്ക് കൂടുതല്‍ അവസരമൊരുക്കുവാനും പൊതുജനങ്ങളുടെ പ്രശ്നപരിഹാരം പൂര്‍ണ്ണമായി ഓണ്‍ലൈനാക്കാനും ഉദ്ദേശിക്കുന്നുണ്ടോ; വിശദമാക്കാമോ?

ഭരണനിര്‍വഹണം ജനകീയവും അഴിമതിരഹിതവും കാര്യക്ഷമവുമാക്കുന്നതിന് സംസ്ഥാനം നടത്തിയ പ്രവര്‍ത്തനത്തിന് കേന്ദ്ര സര്‍ക്കാരിന്റെ ഡിജിറ്റല്‍ ഇന്‍ഡ്യ അവാര്‍‍ഡ് ലഭിച്ചിട്ടുണ്ടോ; വ്യക്തമാക്കാമോ;

മികച്ച സേവനം സമയബന്ധിതമായി ലഭ്യമാക്കുന്നതിന് ചട്ടങ്ങളില്‍ ഉചിതമായ മാറ്റങ്ങള്‍ വരുത്തുന്നതിനും സേവനങ്ങള്‍ ഡിജിറ്റലായി നല്‍കുന്നതിനും ജീവനക്കാരുടെ വൈദഗ്ദ്ധ്യം മെച്ചപ്പെടുത്തുന്നതിനും പദ്ധതിയുണ്ടോ;

ഫയല്‍ നീക്കം അപേക്ഷകനോ ബന്ധപ്പെട്ടയാളുകള്‍ക്കോ നിരീക്ഷിക്കാന്‍ വേണ്ട സൗകര്യം ഏര്‍പ്പെടുത്തുന്നതിനും വകുപ്പുകള്‍ തമ്മിലുള്ള ആശയവിനിമയം ഇലക്ട്രോണിക് സംവിധാനത്തിലൂടെയാക്കുന്നതിനും ഉദ്ദേശ്യമുണ്ടോ; വ്യക്തമാക്കാമോ?

വെഞ്ഞാറമൂട് പൊലീസ് സ്റ്റേഷൻ പരിധിയിലെ മാണിക്കലിൽ ലഹരി മാഫിയയ്ക്ക് എതിരെ അധികൃതർക്ക് വിവരം നൽകിയ പെൺകുട്ടിയെയും മാതാവിനെയും സാമൂഹ്യ വിരുദ്ധർ വീട് കയറി മർദിച്ച സംഭവത്തിന്റെ അന്വേഷണ പുരോഗതി വിശദമാക്കാമോ;

ലഹരി മാഫിയയെ സംബന്ധിച്ച് വിവരം നൽകുന്ന ആളിന്റെ പേരുവിവരം രഹസ്യമായി സൂക്ഷിക്കുമെന്ന് അധികൃതർ നൽകിയ ഉറപ്പിന്റെ അടിസ്ഥാനത്തിൽ പോലീസിൽ പരാതി ഉന്നയിച്ച വിദ്യാർത്ഥിനിയുടെ വിവരങ്ങൾ ലഹരി മാഫിയക്ക് ചോർത്തി നൽകിയതായി പറയപ്പെടുന്ന ആരോപണം ശ്രദ്ധയിൽപ്പെട്ടിട്ടുണ്ടോ; എങ്കിൽ വിശദമാക്കാമോ;

പ്രസ്തുത സംഭവത്തിൽ കുറ്റക്കാരെ കണ്ടെത്തി നടപടി സ്വീകരിച്ചിട്ടുണ്ടോ; വ്യക്തമാക്കാമോ?

ഭക്ഷ്യസുരക്ഷാ കമ്മീഷണറേറ്റിന്റെ 2016-21 കാലയളവിലെ പ്രവര്‍ത്തനങ്ങളെ വിലയിരുത്തിയ സി.എ.ജി. യുടെ റിപ്പോർട്ടിലെ നിഗമനങ്ങൾ സംബന്ധിച്ച് സർക്കാർ തലത്തില്‍ വിലയിരുത്തല്‍ നടത്തിയിട്ടുണ്ടോ; വിശദമാക്കാമോ;

സ്ഥാപനങ്ങള്‍ക്ക് ലെെസന്‍സും രജിസ്ട്രേഷനും നല്‍കുന്ന കാര്യത്തില്‍ കമ്മീഷണറേറ്റിന്റെ പ്രവര്‍ത്തനം മെച്ചപ്പെടുത്താന്‍ എന്തെല്ലാം നടപടികളാണ് സ്വീകരിക്കാനുദ്ദേശിക്കുന്നത്; വിശദമാക്കാമോ;

നിയമ ലംഘനം നടത്തിയ സ്ഥാപനങ്ങള്‍ക്ക് പിഴ ചുമത്താത്തതും കോമ്പൗണ്ടിംഗ് കേസുകള്‍ തീര്‍പ്പാക്കാത്തതും മൂലമുണ്ടായ ഗുരുതര കുറ്റകൃത്യങ്ങള്‍ക്ക് ഉത്തരവാദികളായവര്‍ക്കെതിരെ നടപടി സ്വീകരിക്കുമോ; വിശദമാക്കുമോ?

സംസ്ഥാനത്താകെ അതിവേഗ ഇന്റര്‍നെറ്റ് ലഭ്യമാക്കുകയെന്ന ലക്ഷ്യത്തോടെ ആരംഭിച്ച കെ-ഫോൺ പദ്ധതി ഇപ്പോള്‍ ഏത് ഘട്ടത്തിലാണ്; വിശദാംശം നൽകാമോ;

പ്രസ്തുത പദ്ധതിയനുസരിച്ച് ദാരിദ്ര്യരേഖയ്ക്ക് താഴെയുള്ള കുടുംബങ്ങള്‍ക്ക് സൗജന്യ നിരക്കിൽ ഇന്റര്‍നെറ്റ് കണക്ഷൻ ലഭ്യമാക്കുമോ; ഇതിനായുള്ള പട്ടിക തയ്യാറാക്കിയിട്ടുണ്ടോ; വിശദാംശം നൽകുമോ;

പ്രസ്തുത പദ്ധതിയിലൂടെ സര്‍ക്കാര്‍ ഓഫീസുകള്‍ക്ക് കണക്ഷൻ ലഭ്യമാക്കുന്നതിനുള്ള നടപടികള്‍ സ്വീകരിച്ചിട്ടുണ്ടോ; പദ്ധതി എന്നത്തേക്ക് പൂര്‍ത്തിയാക്കാൻ കഴിയും; വിശദാംശം ലഭ്യമാക്കാമോ?

സംസ്ഥാനത്ത് വിനോദസഞ്ചാരമേഖല, സമ്പദ് വ്യവസ്ഥ എന്നിവ മെച്ചപ്പെടുത്തുന്നതിനായി യാത്രാ സൗകര്യങ്ങള്‍ വര്‍ദ്ധിപ്പിക്കുകയെന്ന ലക്ഷ്യത്തോടെ വിമാനത്താവളങ്ങളുടെ വികസനത്തിനും പുതിയ വിമാനത്താവളങ്ങള്‍ ആരംഭിക്കുന്നതിനുമായി ഈ സര്‍ക്കാര്‍ നടത്തുന്ന പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; എങ്കിൽ വിശദമാക്കുമോ;

ശബരിമല വിമാനത്താവള നിർമ്മാണവുമായി ബന്ധപ്പെട്ട നടപടികളിലെ പുരോഗതി വിശദമാക്കാമോ?

സംസ്ഥാനത്ത് സാര്‍വത്രിക ആരോഗ്യ പരിരക്ഷ ഉറപ്പുവരുത്തുന്നതിന് സര്‍ക്കാര്‍ നടത്തുന്ന പ്രധാന പ്രവര്‍ത്തനങ്ങള്‍ എന്തെല്ലാമാണെന്ന് വിശദമാക്കാമോ;

കാരുണ്യ ആരോഗ്യ സുരക്ഷ പദ്ധതിയില്‍ കേന്ദ്ര സര്‍ക്കാര്‍ അറുപത് ശതമാനം തുക നല്‍കുന്നുവെന്ന പ്രചാരണം ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കുമോ;

ഈ പദ്ധതിയില്‍ എത്ര കുടുംബങ്ങള്‍ ഗുണഭോക്താക്കളായി ഉണ്ട്; ഇതില്‍ എത്ര കുടുംബങ്ങളുടെ ആരോഗ്യ പരിരക്ഷക്കായി കേന്ദ്ര സര്‍ക്കാര്‍ വിഹിതം ലഭ്യമാക്കുന്നുണ്ടെന്ന് അറിയിക്കാമോ;

കഴിഞ്ഞ സാമ്പത്തിക വര്‍ഷം പ്രസ്തുത പദ്ധതിയില്‍ ആകെ എത്ര രൂപ ചെലവഴിച്ചെന്നും അതില്‍ കേന്ദ്ര, സംസ്ഥാന വിഹിതം എത്ര വീതമായിരുന്നു എന്നുമുള്ള കണക്ക് ലഭ്യമാണോ; എങ്കില്‍ അറിയിക്കാമോ; പ്രസ്തുത പദ്ധതിയില്‍ കൂടുതല്‍ കുടുംബങ്ങളെ ഉള്‍പ്പെടുത്തുന്നതിന് കേന്ദ്ര സര്‍ക്കാരിനോട് ആവശ്യപ്പെട്ടിരുന്നോ; വ്യക്തമാക്കുമോ?

കഴിഞ്ഞ നിയമസഭാ തെരഞ്ഞെടുപ്പിൽ പെരിന്തൽമണ്ണ നിയോജകമണ്ഡലത്തിലെ തപാൽ വോട്ടുകൾ സൂക്ഷിച്ച രണ്ടു പെട്ടികളിൽ ഒന്ന് പെരിന്തൽമണ്ണ ട്രഷറി സ്ട്രോങ്ങ് റൂമിൽ നിന്നും കാണാതായിട്ടുള്ളതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ വ്യക്തമാക്കാമോ;

പ്രസ്തുത പോസ്റ്റൽ ബാലറ്റുകൾ അടങ്ങിയ പെട്ടി എവിടെ നിന്നാണ് പിന്നീട് കണ്ടെത്തിയതെന്ന് വ്യക്തമാക്കാമോ;

പ്രസ്തുത സംഭവത്തിൽ ഉദ്യോഗസ്ഥ-മാഫിയ ഗൂഡാലോചന ഉണ്ടായിട്ടുണ്ടോ എന്ന് പരിശോധിക്കുമോ;

ഇക്കാര്യത്തിൽ വീഴ്ച വരുത്തിയവർക്കെതിരെ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വിശദമാക്കുമോ?

സംസ്ഥാന പോലീസ് സംവിധാനത്തിന് രാജ്യത്തെ ഏറ്റവും മികച്ച സേനകളില്‍ ഒന്നായി ദേശീയ പുരസ്കാരങ്ങള്‍ ലഭിച്ചിട്ടുണ്ടോ; എങ്കില്‍ വിശദമാക്കാമോ; ഇപ്രകാരം ഏറ്റവും മികച്ച രീതിയില്‍ സംസ്ഥാനത്ത് ക്രമസമാധാനം നിലനില്‍ക്കുമ്പോള്‍ ഒറ്റപ്പെട്ട സംഭവങ്ങള്‍ ചൂണ്ടിക്കാട്ടി പോലീസ് സേനയുടെ വീര്യം കെടുത്തുന്ന തരത്തില്‍ ചിലർ പ്രചാരണം നടത്തുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഈ പശ്ചാത്തലത്തില്‍ ക്രിമിനല്‍ കേസില്‍ ഉള്‍പ്പെട്ട പോലീസുകാര്‍ക്കെതിരെ കര്‍ശന നടപടിയെടുക്കാന്‍ നിര്‍ദേശം നല്‍കിയിട്ടുണ്ടോ;

നിര്‍മ്മിത ബുദ്ധി സാങ്കേതികവിദ്യ ഉള്‍പ്പെടെ പ്രയോഗത്തില്‍ വരുത്തി പോലീസ് സേനയുടെ നവീകരണത്തിന് സ്വീകരിച്ചുവരുന്ന നടപടികള്‍ വിശദമാക്കാമോ;

സമൂഹത്തിലെ സ്ത്രീകള്‍, വയോധികർ ഉള്‍പ്പെടെ പരിഗണന അര്‍ഹിക്കുന്ന വിഭാഗങ്ങള്‍ക്ക് പോലീസിന്റെ പ്രത്യേക കരുതല്‍ ഒരുക്കുന്നതിന് നടപടി സ്വീകരിച്ചിട്ടുണ്ടോ എന്ന് വ്യക്തമാക്കാമോ ?

സംസ്ഥാനത്ത് പൊതുജനാരോഗ്യ സംരക്ഷണ മേഖലയിൽ സാര്‍വത്രിക ആരോഗ്യ പരിരക്ഷ ലക്ഷ്യമാക്കി സർക്കാർ നടപ്പാക്കി വരുന്ന കാരുണ്യ ആരോഗ്യ സുരക്ഷാ പദ്ധതിയുടെ പ്രവര്‍ത്തനം വിലയിരുത്തിയിട്ടുണ്ടോയെന്ന് വ്യക്തമാക്കുമോ;

പ്രസ്തുത പദ്ധതിയുടെ നടത്തിപ്പിനായി നിയമപ്രകാരം അര്‍ഹമായ കേന്ദ്ര വിഹിതം ലഭ്യമാക്കിയിട്ടുണ്ടോ; വിശദമാക്കാമോ;

നാഷണൽ ഫുഡ് സെക്യൂരിറ്റി ആക്ട് പ്രകാരമുള്ള വിവരങ്ങള്‍ അടിസ്ഥാനമാക്കി വിഹിതം അനുവദിക്കണമെന്ന ആവശ്യത്തോട് കേന്ദ്ര സര്‍ക്കാരിന്റെ സമീപനം വ്യക്തമാക്കാമോ; പ്രസ്തുത വിഷയത്തില്‍ ആവശ്യമായ അനുകൂല നടപടി സ്വീകരിക്കുവാൻ കേന്ദ്ര സർക്കാരില്‍ സമ്മര്‍ദ്ദം ചെലുത്തുമോ; വിശദമാക്കുമോ?