ഒരു പഞ്ചായത്തില്‍ ഒരു കളിക്കളം പദ്ധതി എന്നത്തേക്ക് ആരംഭിക്കാനാകുമെന്നാണ് പ്രതീക്ഷിക്കുന്നതെന്ന് വ്യക്തമാക്കുമോ;

ആദ്യ ഘട്ടത്തില്‍ ഏതെല്ലാം പഞ്ചായത്തുകളിലാണ് പദ്ധതി നടപ്പിലാക്കുന്നതെന്ന് വ്യക്തമാക്കുമോ;

പദ്ധതിയുടെ ഭാഗമായി കളിക്കളങ്ങള്‍ നവീകരിക്കുന്നതിന് ഓരോന്നിനും എത്ര തുകയാണ് അനുവദിക്കുന്നതെന്നും തുക നിശ്ചയിക്കുന്നതിനുള്ള മാനദണ്ഡങ്ങള്‍ എന്തെല്ലാമെന്നും വ്യക്തമാക്കുമോ?

ഒരു പഞ്ചായത്തിൽ ഒരു കളിസ്ഥലം പദ്ധതിയിൽ ആദ്യഘട്ടത്തില്‍ ഏതെല്ലാം കളിസ്ഥലം തെരഞ്ഞെടുത്തിട്ടുണ്ടെന്ന് പഞ്ചായത്ത് തിരിച്ച് അറിയിക്കാമോ;

പ്രസ്തുത പദ്ധതിയിൽ കളിസ്ഥലം തെരഞ്ഞെടുക്കുന്നതിനുള്ള മാനദണ്ഡങ്ങൾ എന്തെല്ലാമെന്ന് വിശദമാക്കാമോ?

2016-2021 കാലയളവിൽ ആലത്തൂര്‍ മണ്ഡലത്തില്‍ ബജറ്റ് നിര്‍ദ്ദേശ പ്രകാരം കായിക വകുപ്പ് മുഖേന നടപ്പിലാക്കി വരുന്ന പദ്ധതികളെന്തെല്ലാമാണെന്നും അവയുടെ നിലവിലെ സ്ഥിതി എന്താണെന്നും വിശദീകരിക്കാമാേ?

കായിക മേഖലയുടെ വളര്‍ച്ചയ്ക്ക് കഴിഞ്ഞ സര്‍ക്കാര്‍ ആവിഷ്ക്കരിച്ച എല്ലാ പഞ്ചായത്തിലും ഒരു കളിക്കളം എന്ന പദ്ധതി ഏതെല്ലാം പഞ്ചായത്തിലാണ് ഇപ്പോള്‍ ആരംഭിച്ചിട്ടുളളത്; ഓരോ പദ്ധതിയുടെയും നിലവിലെ അവസ്ഥ വിശദമാക്കാമോ;

ബാക്കിയുളള പഞ്ചായത്തുകളില്‍ ഇവ ആരംഭിക്കാത്തതിന്റെ കാരണം വ്യക്തമാക്കാമോ;

ആലപ്പുഴ ജില്ലയില്‍ നടപ്പിലാക്കുന്ന വിവിധ സ്റ്റേഡിയങ്ങളുടെയും കളിക്കളങ്ങളുടെയും നിര്‍മ്മാണ പ്രവര്‍ത്തനങ്ങളുടെ പുരോഗതി വിശദീകരിക്കാമോ; ആലപ്പുഴ ഇ.എം.എസ്. സ്റ്റേഡിയം പുനര്‍നിര്‍മ്മാണം എപ്പോള്‍ പൂര്‍ത്തിയാക്കുവാനാണ് ലക്ഷ്യമാക്കുന്നതെന്ന് വിശദമാക്കാമോ;

കനോയിംഗ്, കയാക്കിംഗ് ഉള്‍പ്പെടെയുളള ജല കായിക ഇനങ്ങളുടെ പരിശീലനം മികവുറ്റതാക്കാന്‍ സര്‍ക്കാര്‍ സ്വീകരിക്കുന്ന നടപടികള്‍ എന്താെക്കെയെന്ന് വിശദമാക്കാമോ?

ഗുരുവായൂര്‍ മണ്ഡലത്തില്‍ കായിക വകുപ്പ് നടപ്പിലാക്കുന്ന പദ്ധതികളുടെ വിശദാംശം ലഭ്യമാക്കാമോ;

തദ്ദേശസ്വയംഭരണ സ്ഥാപന തലത്തില്‍ ടര്‍ഫ് കോര്‍ട്ടുകള്‍ നിര്‍മ്മിക്കുന്നതിന് കായിക വകുപ്പ് മുഖേന ധനസഹായം നല്‍കുന്നതിന് പദ്ധതികള്‍ ആവിഷ്കരിക്കുമോ?

നടുവണ്ണൂര്‍ വോളിബോള്‍ അക്കാദമിയുടെ പ്രവൃത്തി ഇപ്പോള്‍ ഏത് ഘട്ടത്തിലാണെന്നറിയിക്കാമോ; പ്രസ്തുത പ്രവൃത്തി എപ്പോള്‍ പൂര്‍ത്തീകരിക്കാനാണ് ഉദ്ദേശിക്കുന്നതെന്ന് വിശദമാക്കാമോ;

വോളിബോള്‍ അക്കാദമി പ്രവര്‍ത്തനം ആരംഭിക്കുന്നതിന് വേണ്ട അനുബന്ധമായ സൗകര്യങ്ങള്‍ ഒരുക്കുന്നതിന് ഫണ്ട് അനുവദിച്ചിട്ടുണ്ടോ;

അക്കാദമിയുടെ പ്രവര്‍ത്തനം ആരംഭിക്കുന്നതിന് വേണ്ട അനുബന്ധ സൗകര്യങ്ങള്‍ ഒരുക്കുന്നതിനുളള നിവേദനത്തില്‍ സ്വീകരിച്ച നടപടികള്‍ അറിയിക്കാമോ?

സംസ്ഥാനത്തെ സ്പോര്‍ട്സ് കൗണ്‍സില്‍ ഓഫീസുകളില്‍ സ്വന്തം കെട്ടിടത്തില്‍ പ്രവര്‍ത്തിക്കുന്നവ ഏതൊക്കെയാണെന്ന് വ്യക്തമാക്കാമോ;

വാടക കെട്ടിടങ്ങളില്‍ പ്രവര്‍ത്തിയ്ക്കുന്നവയ്ക്ക് സ്വന്തമായി സ്ഥലവും കെട്ടിടവും അനുവദിക്കാനുള്ള പദ്ധതി പരിഗണനയിലുണ്ടോ; എങ്കില്‍ വിശദാംശം വെളിപ്പെടുത്താമോ;

സംസ്ഥാന സ്പോര്‍ട്സ് കൗണ്‍സിലിന്റെ കീഴില്‍ വിവിധ ജില്ലകളില്‍ വിവിധ കായിക ഇനങ്ങളിലായി എത്ര പരിശീലകരുടെ തസ്തിക അനുവദിച്ചിട്ടുണ്ട്; പ്രസ്തുത തസ്തികകളില്‍ ജോലി ചെയ്യുന്ന പരിശീലകരുടെ വിശദാംശം ലഭ്യമാക്കാമോ; അതില്‍ എത്ര തസ്തികകളാണ് നിലവില്‍ ഒഴിഞ്ഞുകിടക്കുന്നത്;

സ്പോര്‍ട്സ് കൗണ്‍സില്‍ പുതുതായി പരിശീലകരെ നിയമിക്കാന്‍ ഉദ്ദേശിക്കുന്നുണ്ടോ; എങ്കില്‍ വിശദാംശം വെളിപ്പെടുത്താമോ?

കേരള സംസ്ഥാന സ്പോര്‍ട്സ് കൗണ്‍സിലിന്റെ അംഗീകാരമില്ലാത്ത കായിക സംഘടനകള്‍ സംസ്ഥാനത്ത് പ്രവര്‍ത്തിക്കുന്നുണ്ടോ; ഉണ്ടെങ്കില്‍ പ്രസ്തുത സംഘടനകള്‍ ഏതൊക്കെയെന്ന് അറിയിക്കാമോ;

കേരള സ്പോര്‍ട്സ് കൗണ്‍സിലിന്റെ അംഗീകാരമില്ലാതെ കായിക സംഘടനകള്‍ നടത്തുന്ന മത്സരങ്ങളില്‍ പങ്കെടുക്കുന്ന വിദ്യാര്‍ത്ഥികള്‍ക്ക് ഉന്നത പഠനത്തിന് സ്പോര്‍ട്സ് ക്വാട്ട വഴിയുള്ള അഡ്മിഷന് അപേക്ഷിക്കാന്‍ സാധിക്കുന്നില്ലെന്നതും അര്‍ഹതപ്പെട്ടവര്‍ക്ക് ഗ്രേസ് മാര്‍ക്കുകള്‍ നിഷേധിക്കപ്പെടുന്നതും കണക്കിലെടുത്ത് ഇക്കാര്യത്തില്‍ സ്വീകരിച്ചിട്ടുള്ള നടപടികൾ വ്യക്തമാക്കാമോ;

സംസ്ഥാന സ്പോര്‍ട്സ് കൗണ്‍സില്‍ ഭരണ സമിതി ചെസ്സ് അസോസിയേഷന്‍ കേരളയെ സസ്പെന്‍ഡ് ചെയ്തിട്ടുണ്ടോ; ഇത് സംബന്ധിച്ച് കേരള സംസ്ഥാന സ്പോര്‍ട്സ് കൗണ്‍സില്‍ നടത്തി വരുന്ന അന്വേഷണം പൂര്‍ത്തിയായിട്ടുണ്ടോ; വിശദമാക്കാമോ?

സംസ്ഥാനത്ത് ഓരോ ഗ്രാമപഞ്ചായത്തിലും സ്പോര്‍ട്സ് കൗണ്‍സിലുകള്‍ രൂപീകരിച്ച് കായിക സൗകര്യങ്ങള്‍ മെച്ചപ്പെടുത്തുന്നതിനും മികച്ച കായിക പ്രതിഭകളെ വാര്‍ത്തെടുക്കുന്നതിനും നടപടി സ്വീകരിച്ചിട്ടുണ്ടോ;

ഉണ്ടെങ്കില്‍ നടപടികള്‍ ഏത് ഘട്ടത്തിലാണെന്ന് അറിയിക്കാമോ;

പുതുക്കാട് മണ്ഡലത്തില്‍പ്പെട്ട പറപ്പൂക്കര ഗ്രാമപഞ്ചായത്തിലെ നന്തിക്കര ഗവണ്‍മെന്റ് ഹൈസ്ക്കൂളില്‍ ആധുനിക കളിസ്ഥലം ഉള്‍പ്പെടെയുള്ള സൗകര്യമൊരുക്കുന്നതിനുള്ള നടപടികള്‍ ഏത് ഘട്ടത്തിലാണെന്ന് അറിയിക്കാമോ?

കുന്നംകുളം മണ്ഡലത്തിലെ തൃശ്ശൂര്‍ സ്പോര്‍ട്സ് ഡിവിഷന് കീഴില്‍ വരുന്ന സര്‍ക്കാര്‍ ഹയര്‍ സെക്കന്‍ഡറി സ്കൂളില്‍ 9-ാം ക്ലാസും 10-ാം ക്ലാസും ആരംഭിക്കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ; ആയത് ഈ അദ്ധ്യയന വര്‍ഷത്തില്‍ ആരംഭിക്കുവാന്‍ സ്വീകരിച്ച നടപടികള്‍ വിശദമാക്കാമോ?

പൂഞ്ഞാർ മണ്ഡലത്തിൽ ഏതെങ്കിലും സർക്കാർ ഹൈസ്‌കൂളിനോടനുബന്ധിച്ച് ഒരു സ്പോർട്സ് സ്കൂൾ ആരംഭിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

സംസ്ഥാനത്ത് സ്പോർട്സ് ഡിവിഷനുകൾ അനുവദിക്കുന്നതിന് നടപടികൾ സ്വീകരിച്ചിട്ടുണ്ടോ; ഉണ്ടെങ്കിൽ വിശദാംശം ലഭ്യമാക്കാമോ;

കാഞ്ഞങ്ങാട് മണ്ഡലത്തിൽ ചായ്യോത്ത് ഗവണ്‍മെന്റ് ഹയർ സെക്കണ്ടറി സ്കൂളിൽ സ്പോർട്സ് ഡിവിഷൻ അനുവദിക്കുന്നതിനുള്ള നടപടികൾ സ്വീകരിച്ചിട്ടുണ്ടോ; ഉണ്ടെങ്കിൽ വിശദാംശം നല്‍കാമോ?

ആറ്റിങ്ങല്‍ മണ്ഡലത്തിലെ നഗരൂരില്‍ സ്പോര്‍ട്സ് ഹബ്ബ് അനുവദിക്കണമെന്ന അപേക്ഷ ലഭിച്ചിട്ടുണ്ടോ; ഉണ്ടെങ്കിൽ അപേക്ഷയിന്‍മേല്‍ സ്വീകരിച്ച നടപടി വിശദമാക്കുമോ?

ഒരു പഞ്ചായത്തില്‍ ഒരു കളിസ്ഥലം എന്ന പദ്ധതിയില്‍ സംസ്ഥാനത്തെ വിവിധ ജില്ലകളിലായി എത്ര കളിസ്ഥലങ്ങൾ അനുവദിച്ചിട്ടുണ്ട്; വിശദാംശം ജില്ല തിരിച്ച് നല്‍കാമോ;

ഉടുമ്പന്‍ചോല മണ്ഡലത്തില്‍ ഏതൊക്കെ പ‍ഞ്ചായത്തുകളിലാണ് പ്രസ്തുത പദ്ധതി പ്രകാരം കളിസ്ഥലങ്ങള്‍ അനുവദിച്ചിട്ടുള്ളത്/അനുവദിക്കാന്‍ തീരുമാനിച്ചിട്ടുള്ളത് എന്നറിയിക്കാമോ;

പ്രസ്തുത മണ്ഡലത്തില്‍ ഇതുമായി ബന്ധപ്പെട്ട് സ്വീകരിച്ച നടപടികള്‍ ഏത് ഘട്ടത്തിലാണ്; വിശദമാക്കാമോ?

കൊയിലാണ്ടി സ്പോര്‍ട്സ് കൗണ്‍സില്‍ സ്റ്റേഡിയം നവീകരണവുമായി ബന്ധപ്പെട്ട് സ്റ്റേറ്റ് സ്പോര്‍ട്സ് കൗണ്‍സില്‍ സ്വീകരിച്ചുവരുന്ന നടപടികള്‍ വ്യക്തമാക്കാമോ;

നവീകരണ പ്രവൃത്തികള്‍ ആരംഭിക്കുന്നതിന് ഏതെങ്കിലും തരത്തിലുള്ള തടസ്സങ്ങള്‍ നിലവിലുണ്ടോയെന്ന് അറിയിക്കാമോ;

സ്റ്റേഡിയം ഉദ്ഘാടനം നിര്‍വ്വഹിച്ചത് ഏത് വര്‍ഷമാണ്; ഉദ്ഘാടന ശേഷം ഇതുവരെ വിവിധ വികസന പ്രവൃത്തികള്‍ക്കായി സ്പോര്‍ട്സ് കൗണ്‍സില്‍ ചെലവഴിച്ച തുകയും പ്രവൃത്തികളുടെ വിശദാംശവും നല്‍കാമോ;

സ്റ്റേഡിയത്തിന്റെ നവീകരണവുമായി ബന്ധപ്പെട്ട് കായിക യുവജനകാര്യ വകുപ്പ് കത്ത് നം. കാ.യു.വ.-എ2/285/2021 തീയതി 07.12.2021 പ്രകാരം ആവശ്യപ്പെട്ട റിപ്പോര്‍ട്ടിന്റെ പകര്‍പ്പ് ലഭ്യമാക്കാമോ?

പയ്യന്നൂര്‍ മള്‍ട്ടി പര്‍പ്പസ് സ്റ്റേഡിയം നിർമ്മാണ പ്രവൃത്തിയുടെ പുരോഗതി അറിയിക്കാമോ;

പ്രസ്തുത സ്റ്റേഡിയത്തിന്റെ നിര്‍മ്മാണ കാലാവധി എത്രയാണെന്നും അനുവദിച്ച സമയപരിധിക്കുള്ളില്‍ നിര്‍മ്മാണം പൂര്‍ത്തീകരിക്കാന്‍ കഴിയുമോ എന്നും വ്യക്തമാക്കുമോ;

നിര്‍മ്മാണ പ്രവൃത്തിയില്‍ കാലതാമസം വരുന്നത് പരിഹരിക്കാന്‍ ആവശ്യമായ നടപടികള്‍ സ്വീകരിക്കുമോ; വ്യക്തമാക്കുമോ?

കാട്ടാക്കട മണ്ഡലത്തില്‍ എം.എല്‍.എ. ഫണ്ടില്‍ നിന്നും അനുമതി ലഭ്യമായ പള്ളിച്ചല്‍ പഞ്ചായത്ത് സ്റ്റേഡിയം, മലയിന്‍കീഴ് പഞ്ചായത്ത് സ്റ്റേഡിയം എന്നിവയുടെ നവീകരണ പ്രവര്‍ത്തനങ്ങളുടെ നിലവിലെ സ്ഥിതി വിശദമാക്കാമോ; പ്രസ്തുത പ്രവൃത്തികള്‍ എന്ന് പൂര്‍ത്തീകരിക്കാനാകുമെന്ന് വ്യക്തമാക്കാമോ;

പ്രസ്തുത മണ്ഡലത്തില്‍ നിന്ന് സ്റ്റേഡിയങ്ങളുടെ നവീകരണത്തിനായി ഏത് പഞ്ചായത്ത് സ്റ്റേഡിയത്തെയാണ് തെരഞ്ഞെടുത്തത്; ആയതിന്റെ അടിസ്ഥാനത്തില്‍ സ്വീകരിച്ച നടപടി എന്തെന്ന് വിശദമാക്കാമോ?

ഓരോ പഞ്ചായത്തിലും ഉന്നത നിലവാരമുള്ള ഓരോ കളിസ്ഥലം നിര്‍മ്മിക്കുന്ന പദ്ധതി പ്രകാരം തിരുവനന്തപുരം ജില്ലയില്‍ എത്ര കളിസ്ഥലങ്ങളാണ് കണ്ടെത്തിയിട്ടുള്ളതെന്ന് വ്യക്തമാക്കാമോ;

വര്‍ക്കല നിയോജകമണ്ഡലത്തില്‍ എത്രയെണ്ണം കണ്ടെത്തിയിട്ടുണ്ടെന്ന് വ്യക്തമാക്കാമോ?

കോതമംഗലം മണ്ഡലത്തില്‍ 15.83 കോടി രൂപയുടെ കിഫ്ബി പദ്ധതിയായ ചേലാട് അന്താരാഷ്ട്ര സ്റ്റേഡിയം നിര്‍മ്മാണത്തിന്റെ നിലവിലെ സ്ഥിതി വ്യക്തമാക്കാമോ;

പ്രസ്തുത പദ്ധതിയുടെ ഡി.എസ്.ആര്‍. റേറ്റ് പരിഷ്കരിച്ചിട്ടുണ്ടോ; ഉണ്ടെങ്കില്‍ പരിഷ്കരിച്ച നിരക്ക് അനുസരിച്ച് എത്ര തുകയുടെ പദ്ധതിയാണ് ആവിഷ്കരിച്ചിട്ടുള്ളത് എന്ന് വ്യക്തമാക്കാമോ;

പ്രസ്തുത പദ്ധതിയ്ക്കായി കിഫ്ബിയില്‍ നിന്നും പുതുക്കിയ അംഗീകാരം ലഭ്യമായിട്ടുണ്ടോ; ഇല്ലെങ്കില്‍ എന്തുകൊണ്ടാണ് കാലതാമസമെടുക്കുന്നത് എന്ന് വ്യക്തമാക്കാമോ;

പദ്ധതി ചെലവ് വര്‍ദ്ധിച്ച സാഹചര്യത്തില്‍ എന്തെല്ലാം പ്രവൃത്തികളാണ് ഇവിടെ നടപ്പിലാക്കുന്നത് എന്ന് വ്യക്തമാക്കാമോ;

കിഫ്ബിയില്‍ നിന്നും പുതുക്കിയ അംഗീകാരം വേഗത്തില്‍ ലഭ്യമാക്കി അടിയന്തരമായി റീ ടെണ്ടര്‍ നടപടികള്‍ നടത്തുന്നതിനുവേണ്ട നടപടി സ്വീകരിക്കുമോ; വിശദമാക്കാമോ?

വര്‍ക്കല മണ്ഡലത്തിലെ പള്ളിക്കല്‍ ഗവണ്‍മെന്റ് എച്ച്.എസ്.എസ്. മൈതാനം നവീകരിക്കുന്നതിന് സ്വീകരിച്ച നടപടികള്‍ വിശദമാക്കാമോ;

പ്രസ്തുത മൈതാനം നവീകരിക്കുന്നതിന് ഏത് ഏജന്‍സിയെയാണ് ചുമതലപ്പെടുത്തിയിട്ടുള്ളതെന്ന് വിശദമാക്കാമോ?

തിരുവമ്പാടി മണ്ഡലത്തിലെ മുക്കം മാമ്പറ്റയില്‍ നിര്‍മ്മിക്കാനുദ്ദേശിക്കുന്ന സ്റ്റേഡിയത്തിന്റെ ടെന്‍ഡര്‍ നടപടികള്‍ പൂര്‍ത്തീകരിക്കുന്നതിലെ കാലതാമസം ശ്രദ്ധയില്‍പ്പെട്ടിട്ടുണ്ടോ; ആയതിന്റെ കാരണം വിശദമാക്കുമോ;

ടെന്‍ഡര്‍ പ്രക്രിയ വേഗത്തിൽ പൂര്‍ത്തീകരിക്കുന്നതിനും നിര്‍മ്മാണം വേഗത്തിലാക്കുന്നതിനും നടപടി സ്വീകരിക്കുമോ?

ഒരു പഞ്ചായത്തില്‍ ഒരു കളിസ്ഥലം എന്ന പദ്ധതിയുടെ വിശദാംശം ലഭ്യമാക്കാമോ;

പ്രസ്തുത പദ്ധതിയിലൂടെ ഗ്രാമപഞ്ചായത്തുകളില്‍ നിലവിലുള്ള കളിസ്ഥലങ്ങള്‍ നവീകരിക്കുന്നതിന് സാധിക്കുമോ; എങ്കില്‍ ഏതെല്ലാം തരത്തിലുള്ള നവീകരണങ്ങളാണ് സാധ്യമാകുന്നതെന്ന് അറിയിക്കുമോ;

വള്ളിക്കുന്ന് നിയോജകമണ്ഡലത്തില്‍ പ്രസ്തുത പദ്ധതിയിലൂടെ എത്ര കളിസ്ഥലങ്ങള്‍ നവീകരിക്കുന്നതിനാണ് ഫണ്ട് വകയിരുത്തിയിട്ടുള്ളത്; വ്യക്തമാക്കാമോ?

ഒരു പഞ്ചായത്തില്‍ ഒരു കളിസ്ഥലം എന്ന പദ്ധതി പ്രകാരം വാമനപുരം നിയോജകമണ്ഡലത്തിലെ ഏതെല്ലാം പഞ്ചായത്തുകളില്‍ എവിടെയൊക്കെയാണ് സ്ഥലങ്ങള്‍ തെരഞ്ഞെടുത്തിട്ടുള്ളതെന്ന് അറിയിക്കാമോ;

പ്രസ്തുത പദ്ധതിയുടെ പുരോഗതി റിപ്പോര്‍ട്ട് നല്‍കാമോ?

മലപ്പുറം ജില്ലയില്‍ വണ്ടൂരില്‍ ആധുനിക രീതിയിലുള്ള സ്റ്റേഡിയം നിര്‍മ്മാണവുമായി ബന്ധപ്പെട്ട് കായിക വകുപ്പ് ഉദ്യോഗസ്ഥതലത്തില്‍ നാളിതുവരെ എന്തൊക്കെ നടപടികള്‍ സ്വീകരിച്ചുവെന്ന് വ്യക്തമാക്കാമോ;

വകുപ്പു മന്ത്രിയുടെ അദ്ധ്യക്ഷതയില്‍ ചേര്‍ന്ന യോഗത്തില്‍ ഇതുമായി ബന്ധപ്പെട്ട് എടുത്ത തീരുമാനങ്ങളുടെ പുരോഗതി വ്യക്തമാക്കാമോ;

സ്റ്റേഡിയത്തിന്റെ നിര്‍മ്മാണം എന്നത്തേയ്ക്ക് തുടങ്ങാന്‍ കഴിയുമെന്നും സയമബന്ധിതമായി പൂര്‍ത്തിയാക്കാന്‍ എന്തൊക്കെ നടപടികള്‍ സ്വീകരിക്കുമെന്നും അറിയിക്കാമോ?

ഒരു പഞ്ചായത്തില്‍ ഒരു കളിസ്ഥലം എന്ന പദ്ധതിയുടെ പുരോഗതി സംബന്ധിച്ച് വിശദമാക്കാമോ?

അഴീക്കോട് മണ്ഡലത്തിലെ പാപ്പിനിശ്ശേരിയില്‍ കഴിഞ്ഞ സര്‍ക്കാരിന്റെ കാലത്ത് പ്രഖ്യാപിച്ച ഇന്‍ഡോര്‍ സ്റ്റേഡിയത്തിന്റെ പ്രവൃത്തി ആരംഭിച്ചിട്ടുണ്ടോ; വിശദാംശം ലഭ്യമാക്കാമോ;

പ്രവൃത്തിയുടെ നിലവിലെ സ്ഥിതി വിശദമാക്കാമോ;

പ്രവൃത്തി ആരംഭിക്കുന്നതിന് തടസ്സങ്ങളുണ്ടോ; വിശദാംശം നല്‍കാമോ?

കോട്ടക്കല്‍ മണ്ഡലത്തിലെ ഇരിമ്പിളിയം ഗ്രാമപഞ്ചായത്ത് സ്റ്റേഡിയം, പൊന്മള ഗ്രാമപഞ്ചായത്ത് സ്റ്റേഡിയം എന്നിവയ്ക്ക് ഭരണാനുമതി ലഭ്യമാക്കുവാന്‍ നടപടി സ്വീകരിക്കുമോ;

കുറ്റിപ്പുറത്ത് സ്റ്റേഡിയം നിര്‍മ്മിക്കുന്നതിന് സ്ഥലം അനുവദിക്കണമെന്ന കുറ്റിപ്പുറം സ്പോര്‍ട്ട്സ് അക്കാഡമിയുടെ നിവേദനത്തിൻമേൽ വകുപ്പ് സ്വീകരിച്ച നടപടികള്‍ വിശദമാക്കുമോ;

പ്രസ്തുത വിഷയത്തിന്‍മേല്‍ മലപ്പുറം ജില്ലാ കളക്ടറുടെ റിപ്പോര്‍ട്ട് ലഭ്യമായിട്ടുണ്ടോ; വ്യക്തമാക്കുമോ?

കായിക താരങ്ങള്‍ക്ക് സര്‍ക്കാര്‍ ജോലി നല്കുന്ന പദ്ധതി പ്രകാരം കഴിഞ്ഞ അഞ്ച് വര്‍ഷം എത്ര പേര്‍ക്ക് തൊഴില്‍ നല്കിയെന്ന് വ്യക്തമാക്കാമോ; പ്രസ്തുത പദ്ധതി പ്രകാരം എത്ര പേര്‍ക്ക് കൂടി നിയമനം നല്കാനാണ് സര്‍ക്കാര്‍ ഉദ്ദേശിക്കുന്നത്; വിശദാംശം വെളിപ്പെടുത്താമോ;

കഴിഞ്ഞ അഞ്ച് വര്‍ഷ കാലയളവില്‍ ഓരോ വര്‍ഷവും ജോലി ലഭിച്ചവരുടെ പേരുവിവരങ്ങളും അവര്‍ക്ക് നിയമനം ലഭിച്ച വകുപ്പ്/സ്ഥാപനത്തിന്റെ വിശദാംശം, തൊഴില്‍ നല്‍കുന്നതിന് ആധാരമായി പരിഗണിച്ച അവരുടെ മികവിന്റെ വിവരങ്ങള്‍ എന്നിവ അറിയിക്കാമോ?

2011-16 സര്‍ക്കാരിന്റെ കാലത്ത് സ്പോര്‍ട്സ് ക്വാട്ടാ വഴി എത്ര കായിക താരങ്ങള്‍ക്ക് സര്‍ക്കാര്‍ സര്‍വ്വീസില്‍ നിയമനം നല്‍കിയിട്ടുണ്ടെന്ന് വ്യക്തമാക്കാമോ;

മുന്‍ സര്‍ക്കാരിന്റെ കാലത്ത് എത്ര കായിക താരങ്ങള്‍ക്ക് സ്പോര്‍ട്സ് ക്വാട്ടയില്‍ നിയമനം നല്‍കിയിട്ടുണ്ട്; വിശദമാക്കാമോ;

ഈ സര്‍ക്കാര്‍ അധികാരത്തില്‍ വന്നതിന് ശേഷം കായിക താരങ്ങള്‍ക്ക് നിയമനം നല്‍കിയിട്ടുണ്ടോ; ഉണ്ടെങ്കില്‍ എത്ര പേര്‍ക്ക്; നിയമന നടപടികള്‍ പുരോഗമിക്കുന്നുണ്ടെങ്കില്‍ ആയതിന്റെ വിശദാംശം ലഭ്യമാക്കാമോ?

സംസ്ഥാനത്ത് 2016 ജൂൺ മുതൽ നാളിതുവരെ എത്ര കായിക താരങ്ങൾക്ക് സർക്കാർ സർവീസിൽ ജോലി നൽകിയിട്ടുണ്ട് എന്ന് വ്യക്തമാക്കാമോ; അർഹതപ്പെട്ട എത്ര കായിക താരങ്ങളുടെ അപേക്ഷകളാണ് നിലവിൽ തീരുമാനം എടുക്കുവാൻ ഉള്ളത് എന്ന് വിവരം ലഭ്യമാക്കുമോ;

സംസ്ഥാനത്തിനുവേണ്ടി മികച്ച നേട്ടങ്ങൾ കൈവരിച്ച കായിക താരങ്ങൾ അർഹതപ്പെട്ട ജോലിക്ക് വേണ്ടി സമരം ചെയ്യേണ്ടി വരുന്ന ദുരവസ്ഥ പരിഹരിക്കുന്നതിന് സർക്കാർ അടിയന്തര നടപടി സ്വീകരിക്കുമോ; വിശദാംശം ലഭ്യമാക്കുമോ?

ആലപ്പുഴ നിയോജകമണ്ഡലത്തില്‍ ബജറ്റില്‍ പ്രഖ്യാപിച്ച ഉദയകുമാര്‍ സ്മാരക വോളിബോള്‍ അക്കാദമി മാരാരിക്കുളം, യുവഭാരത് സാംസ്കാരികനിലയം ഇന്‍ഡോര്‍ വോളിബോള്‍ കോര്‍ട്ട് എന്നിവയുടെ നിലവിലെ സ്ഥിതിയെക്കുറിച്ച് വിശദമാക്കാമോ?

അഴീക്കോട് മണ്ഡലത്തിലെ വന്‍കുളത്ത് വയലില്‍ പ്രഖ്യാപിച്ചിട്ടുള്ള ആധുനിക സൗകര്യങ്ങളോട് കൂടിയ ജിമ്മിന്റെ പ്രവൃത്തിയുടെ നിലവിലെ സ്ഥിതി വിശദമാക്കാമോ;

പ്രസ്തുത പ്രവൃത്തി പൂര്‍ത്തീകരിക്കുന്നതിന് എന്തെങ്കിലും തടസ്സങ്ങളുണ്ടോ; വിശദാംശം ലഭ്യമാക്കാമോ?

സംസ്ഥാനത്ത് ഓരോ പഞ്ചായത്തിലും ഒരു കളിക്കളം പദ്ധതിയുടെ നിലവിലെ സ്ഥിതി വ്യക്തമാക്കാമോ;

കോട്ടയം, പത്തനംതിട്ട ജില്ലകളിലെ ഏതൊക്കെ പഞ്ചായത്തുകളെയാണ് പദ്ധതിയില്‍ ഉള്‍പ്പെടുത്തി അനുമതി നല്‍കിയിരിക്കുന്നതെന്ന് വ്യക്തമാക്കാമോ;

പ്രസ്തുത പദ്ധതിയില്‍ ഒരു കളിക്കളത്തിന് എത്ര രൂപയാണ് ചെലവ് പ്രതീക്ഷിക്കുന്നത്; പൂര്‍ണമായും കായിക വകുപ്പിന്റെ ഫണ്ടാണോ ഇതിനായി ചെലവഴിക്കുന്നത്; എം.എല്‍.എ. ഫണ്ട് ഉപയോഗിക്കാന്‍ ഉദ്ദേശിക്കുന്നുണ്ടോ; വിശദാംശം ലഭ്യമാക്കാമോ;

പദ്ധതിയില്‍ എന്തൊക്കെ സൗകര്യങ്ങള്‍ ഉള്‍പ്പെടുത്താന്‍ ഉദ്ദേശിക്കുന്നുണ്ടെന്ന് വിശദമാക്കാമോ?

എല്ലാ പഞ്ചായത്തിലും ഓരോ ഗ്രൗണ്ട് നവീകരിക്കുന്നതിനായി കായിക വകുപ്പ് തയ്യാറാക്കിയ പദ്ധതിയില്‍ പെരിന്തല്‍മണ്ണ മണ്ഡലത്തില്‍ ഏത് ഗ്രൗണ്ടാണ് പരിഗണിക്കുന്നതെന്ന് വിശദമാക്കുമോ;

പ്രസ്തുത പദ്ധതിയുടെ നടത്തിപ്പുമായി ബന്ധപ്പെട്ട് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കുമോ?

നിലമ്പൂര്‍ മാനവേദന്‍ സ്കൂളില്‍ മിനി സ്റ്റേഡിയം കോംപ്ലക്സ് പദ്ധതിയുടെ ഭാഗമായുള്ള പരിശീലന നീന്തല്‍ക്കുളത്തിന്റെയും മള്‍ട്ടി പര്‍പ്പസ് ഇന്‍ഡോര്‍ കോര്‍ട്ടിന്റെയും നിര്‍മ്മാണം ആരംഭിക്കാത്തത് ശ്രദ്ധയില്‍പ്പെട്ടിട്ടുണ്ടോ; നിര്‍മ്മാണം ഇതുവരെ ആരംഭിക്കാത്തതിന്റെ കാരണം വിശദമാക്കാമോ;

നിലമ്പൂര്‍ മിനി സ്റ്റേഡിയം കോംപ്ലക്സ് പദ്ധതിയുടെ ഭാഗമായി ഏതെല്ലാം പ്രവൃത്തികളാണ് പൂര്‍ത്തീകരിച്ചിട്ടുള്ളതെന്നും നിര്‍മ്മാണം പുരോഗമിക്കുന്നവ ഏതെല്ലാമാണെന്നും മേല്‍ പ്രവൃത്തികള്‍ക്ക് ആകെ ചെലവഴിക്കേണ്ട തുക എത്രയെന്നും അറിയിക്കാമോ; പരിശീലന നീന്തല്‍ക്കുളവും ഇന്‍ഡോര്‍ കോര്‍ട്ടും നിര്‍മ്മിക്കുന്നതിന് എത്ര തുകയാണ് പദ്ധതിയില്‍ നീക്കിയിരിപ്പുള്ളതെന്ന് അറിയിക്കാമോ;

പരിശീലന നീന്തല്‍ക്കുളവും ഇന്‍ഡോര്‍ കോര്‍ട്ടും നിര്‍മ്മിക്കുന്നതിന് പുതിയ ടെന്‍ഡര്‍ വിളിക്കേണ്ടി വരുമോ; ഇതിനായി കായിക വകുപ്പോ കിഫ്ബിയോ തീരുമാനമെടുത്തിട്ടുണ്ടോ; വിശദമാക്കാമോ;

നിലമ്പൂര്‍ മിനി സ്റ്റേഡിയം കോംപ്ലക്സ് പദ്ധതി സമയബന്ധിതമായി പൂര്‍ത്തിയാക്കുന്നതിന് സര്‍ക്കാര്‍ അടിയന്തരമായി ഇടപെടുമോ; ഇതിനായുള്ള നിര്‍ദ്ദേശം നല്‍കാമോ?

സംസ്ഥാനത്ത് സ്കൂളുകളുടെ പ്രവര്‍ത്തനം പഴയതുപോലെ ആരംഭിച്ച സാഹചര്യത്തില്‍ കുട്ടികളുടെ ആരോഗ്യവും ശാരീരികക്ഷമതയും മെച്ചപ്പെടുത്തുന്നതിന് കായിക വകുപ്പ് എന്തെങ്കിലും നടപടി സ്വീകരിക്കുന്നതിന് ആലോചിച്ചിട്ടുണ്ടോ; വ്യക്തമാക്കാമോ;

കായിക വകുപ്പിന്റെയും സ്പോര്‍ട്സ് കൗണ്‍സിലിന്റെയും കീഴില്‍ സ്കൂളുകളില്‍ കായിക പരിശീലന ക്യാമ്പുകള്‍ സംഘടിപ്പിക്കുന്നതിന് പദ്ധതി ആവിഷ്കരിച്ച് നടപ്പിലാക്കുമോ?

കായിക വകുപ്പിന്‍ കീഴില്‍ സ്പാേര്‍ട്സ് മെഡിസിന്‍ തൃശൂരില്‍ ആരംഭിക്കുന്നത് സംബന്ധിച്ച പ്രവര്‍ത്തനങ്ങളുടെ നിലവിലെ സ്ഥിതി വ്യക്തമാക്കാമാേ?

കായിക താരങ്ങൾക്ക് സർക്കാർ ജോലിയിൽ നിയമനം നൽകുന്നത് സംബന്ധിച്ച് നിലവിലുള്ള മാനദണ്ഡങ്ങൾ എന്തൊക്കെയാണെന്ന് അറിയിക്കുമോ;

സംസ്ഥാന തലത്തിലും ദേശീയ തലത്തിലും രാജ്യാന്തര തലത്തിലും മത്സരിച്ചതും മെഡലുകൾ നേടിയതുമായ കായിക താരങ്ങളിൽ എത്ര പേർക്കാണ് 2000 മുതൽ നാളിതുവരെ സർക്കാർ സർവീസുകളിൽ ജോലി നൽകിയിട്ടുള്ളത്; വര്‍ഷം തിരിച്ചുള്ള കണക്ക് ലഭ്യമാക്കുമോ;

ഇപ്രകാരം വിവിധ കായിക ഇനങ്ങളിൽ മത്സരിക്കുകയോ സമ്മാനാർഹരാകുകയോ ചെയ്തതിന് പാരിതോഷികമായി നിയമനം വാഗ്ദാനം ചെയ്തതിനു ശേഷം നിയമനം ലഭിക്കാത്തവരുടെ വിശദാംശം ലഭ്യമാക്കുമോ;

ജീവിതത്തിലെ സുപ്രധാനമായ ഒരു കാലഘട്ടം പരിശീലനത്തിനും മറ്റുമായി നീക്കിവെച്ച് മുൻനിരയിൽ എത്തുന്ന ഇത്തരം കായികതാരങ്ങൾക്ക് പ്രോത്സാഹനം നൽകുന്നതിനും നിയമനം നൽകുന്നതിനും ഉണ്ടാകുന്ന അമാന്തം ഈ മേഖലയിലേക്ക് കൂടുതൽ ആളുകൾ കടന്നുവരുന്നതിന് വിഘാതമാകുകയില്ലേ;

കായികതാരങ്ങൾക്ക് വാഗ്ദാനം ചെയ്യപ്പെട്ട ജോലി നൽകുന്നതിൽ കാലതാമസം ഉണ്ടായിട്ടുണ്ടോ; എങ്കിൽ ആയതിനുള്ള കാരണം എന്തൊക്കെയാണെന്ന് വ്യക്തമാക്കുമോ?

കേരളത്തില്‍ വഖഫ് ബോര്‍ഡിന് എവിടെയെല്ലാമാണ് ഓഫീസുകള്‍ പ്രവര്‍ത്തിക്കുന്നതെന്നും ഇവ ഓരോന്നിനും മാസവാടക എത്രയാണെന്നും അറിയിക്കുമോ;

ആവശ്യമായ സ്ഥലങ്ങളില്‍ സ്വന്തം ഓഫീസ് കെട്ടിടങ്ങള്‍ നിര്‍മ്മിക്കുന്നതിന് നടപടികള്‍ സ്വീകരിച്ചിട്ടുണ്ടോ; വിശദമാക്കുമോ;

വഖഫ് ബോര്‍ഡില്‍ എത്ര സ്ഥിരം ജീവനക്കാരും എത്ര താല്‍ക്കാലിക ജീവനക്കാരുമുണ്ടെന്ന് അറിയിക്കുമോ;

ജീവനക്കാര്‍ മുസ്ലീങ്ങൾ മാത്രമായിരിക്കണമെന്ന് വ്യവസ്ഥ ചെയ്തിട്ടുണ്ടോ; ഉണ്ടെങ്കില്‍ മേല്‍ വ്യവസ്ഥക്ക് വിരുദ്ധമായി നിയമനം നടന്നിട്ടുണ്ടോ എന്ന് വ്യക്തമാക്കാമോ?

വഖഫ് സ്വത്ത് കൈമാറ്റം, വിൽപ്പന എന്നിവ അനുവദനീയമാണോ എന്ന് വ്യക്തമാക്കാമോ;

എങ്കിൽ ഏതൊക്കെ സാഹചര്യത്തിലും മാനദണ്ഡപ്രകാരവുമാണ് അനുവദനീയമെന്ന് വ്യക്തമാക്കാമോ;

കാസർഗോഡ് തെക്കിൽ വില്ലേജിൽ റീസർവ്വെ നമ്പർ 276/1 എ , 277/1 എ എന്നീ നമ്പറുകളിൽ വഖഫ് ഭൂമിയും സ്വത്തും ഉണ്ടോ എന്ന് വിശദമാക്കാമോ;

പ്രസ്തുത റീസർവ്വെ നമ്പറിൽപ്പെട്ട സ്ഥലമാണോ കേരള സർക്കാർ ടാറ്റാ കമ്പനിയുടെ സഹകരണത്തോടെ കാസർകോട് ജില്ലയ്ക്ക് അനുവദിച്ച കോവിഡ്-19 ആശുപത്രിയുടെ നിർമ്മാണത്തിന് വിട്ടുകൊടുത്തതെന്ന് വ്യക്തമാക്കാമോ; എത്ര ഏക്കര്‍/ ഹെക്ടർ ഭൂമിയാണ് വിട്ടുകൊടുത്തതെന്നും നിലവിലെ നിയമപ്രകാരം ഇതിന് സാധൂകരണം ഉണ്ടോ എന്നും വ്യക്തമാക്കാമോ;

പകരം ഭൂമി ലഭ്യമാക്കാമെന്ന വ്യവസ്ഥയിലാണോ ഭൂമി വിട്ടുനൽകിയത്; ഈ വ്യവസ്ഥ ഉണ്ടാക്കിയത് ആരാണെന്നും ഒപ്പുവെച്ച അധികാരികൾ ആരാണെന്നും വ്യക്തമാക്കാമോ; വ്യവസ്ഥയുടെ പകർപ്പ് ലഭ്യമാക്കാമോ;

പകരം ഭൂമി ലഭ്യമായിട്ടുണ്ടോ; എപ്പോഴാണ് ലഭ്യമായതെന്നും ഇല്ലെങ്കിൽ അതിനുള്ള കാരണമെന്താണെന്നും വ്യക്തമാക്കാമോ;

വഖഫ് ഭൂമി വിട്ടുകൊടുത്തതും പകരം ഭൂമി കിട്ടാത്തതും കുറ്റകരമാണോ; ഈ വിഷയത്തിൽ സർക്കാരിന്റെ നിലപാടെന്താണെന്ന് അറിയിക്കാമോ?

ഈ വർഷത്തെ ഹജ്ജ് തീർത്ഥാടനവുമായി ബന്ധപ്പെട്ട് കരിപ്പൂരിലെ സംസ്ഥാന ഹജ്ജ് ഹൗസിൽ നടന്നുവരുന്ന നടപടിക്രമങ്ങൾ എന്തെല്ലാമെന്ന് വ്യക്തമാക്കുമോ;

ഹാജിമാർക്കായി ഹജ്ജ് ഹൗസിൽ ഒരുക്കുന്ന പുതിയ സൗകര്യങ്ങൾ എന്തെല്ലാമെന്ന് അറിയിക്കാമോ;

ഈ വർഷത്തെ ഹജ്ജ് കർമ്മം അനുഷ്ഠിക്കുന്നതിന് ലഭിച്ച അപേക്ഷകളുടെ എണ്ണം ജില്ലതിരിച്ച് ലഭ്യമാക്കുമോ;

കരിപ്പൂരിൽ ഹജ്ജ് എംബാർക്കേഷൻ പോയിന്റ് നിലനിർത്താൻ സർക്കാർ തലത്തിൽ നടപടി സ്വീകരിച്ചിട്ടുണ്ടോ; എങ്കിൽ പകർപ്പ് സഹിതമുള്ള വിശദാംശങ്ങൾ ലഭ്യമാക്കുമോ?

തപാല്‍ വകുപ്പ് നടപ്പാക്കുന്ന ഇന്‍ഷുറന്‍സ് സേവനങ്ങള്‍ എന്തൊക്കെയാണെന്ന് വ്യക്തമാക്കാമോ;

ലൈഫ് ഇന്‍ഷുറന്‍സ് ഏജന്റുമാരായി കുടുംബശ്രീ പ്രവര്‍ത്തകരെ നിശ്ചയിക്കാന്‍ ഗവണ്‍മെന്റ് ഉദ്ദേശിക്കുന്നുണ്ടോ; ഉണ്ടെങ്കില്‍ എന്തൊക്കെ നടപടികളാണ് സ്വീകരിച്ചത് എന്ന് വ്യക്തമാക്കാമോ?

തപാല്‍ വകുപ്പിന് കീഴിലുള്ള ചരക്ക് പാഴ്സല്‍ നീക്കം ത്വരിതപ്പെടുത്തുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് അറിയിക്കാമോ;

കെ.എസ്.ആര്‍.ടി.സി. ദീര്‍ഘദൂര സര്‍വ്വീസുകളുടെ സേവനം പാഴ്സല്‍ നീക്കത്തിനായി ഉപയോഗപ്പെടുത്താന്‍ ഉദ്ദേശിക്കുന്നുണ്ടോ; വിശദാംശം ലഭ്യമാക്കാമോ;

കുടുംബശ്രീ അംഗങ്ങളുടെ സേവനം ഇക്കാര്യത്തില്‍ ഉപയോഗിക്കാന്‍ ആലോചിക്കുന്നുണ്ടോ; ഉണ്ടെങ്കില്‍ വിശദാംശം അറിയിക്കാമോ?

ശബരി റെയില്‍വേയുടെ പുതുക്കിയ എസ്റ്റിമേറ്റ് തയ്യാറാക്കാന്‍ റെയില്‍വേ ബോര്‍ഡ് കേരള റെയില്‍ ഡെവലപ്പ്മെന്റ് കോര്‍പ്പറേഷനെ ചുമതലപ്പെടുത്തിയിട്ടുണ്ടോ;

അങ്കമാലി മുതല്‍ എരുമേലി വരെയുള്ള ഭാഗത്തെ പുതുക്കിയ എസ്റ്റിമേറ്റ് സമര്‍പ്പിച്ചിട്ടുണ്ടോ; ഇല്ലെങ്കില്‍ പുതുക്കിയ എസ്റ്റിമേറ്റ് എന്നത്തേയ്ക്ക് സമര്‍പ്പിക്കാനാകുമെന്ന് വ്യക്തമാക്കാമോ;

ശബരി റെയിൽവേക്കായി ഇരുപത് വര്‍ഷം മുമ്പ് കല്ലിട്ട് തിരിച്ച സ്ഥലത്തിന്റെ ഉടമകള്‍ക്ക് സ്ഥലം ഈട് വെച്ച് വായ്പ എടുക്കാനോ വീട് നിര്‍മ്മിക്കാനോ സാധിക്കുന്നില്ല എന്നത് ശ്രദ്ധയില്‍പ്പെട്ടിട്ടുണ്ടോ;

2021-22ലെ സംസ്ഥാന ബജറ്റില്‍ കിഫ്ബിയില്‍ നിന്നും അനുവദിച്ച 2000 കോടി രൂപ ഉപയോഗിച്ച് സ്ഥലം ഏറ്റെടുക്കുന്ന കാര്യം പരിഗണനയിലുണ്ടോ; വ്യക്തമാക്കുമോ?

കേരള റെയില്‍ ഡെവലപ്പ്മെന്റ് കോര്‍പ്പറേഷന്റെ നിര്‍ദ്ദിഷ്ട നിലമ്പൂര്‍-നഞ്ചന്‍കോട്, തലശ്ശേരി-മൈസൂര്‍ പാതകള്‍ യാഥാര്‍ത്ഥ്യമാക്കുന്നതിന് സര്‍ക്കാര്‍ എന്ത് നടപടി സ്വീകരിച്ചിട്ടുണ്ടെന്ന് വ്യക്തമാക്കുമോ;

ഈ പദ്ധതിക്ക് കര്‍ണ്ണാടക സര്‍ക്കാരിന്റെ അംഗീകാരം ലഭിച്ചിട്ടുണ്ടോ; ഇത് സംബന്ധിച്ച അലൈന്‍മെന്റില്‍ മാറ്റം വരുത്തിയിട്ടുണ്ടോ;

നിലവിലുള്ള റെയില്‍പ്പാതയുടെ ഇരട്ടിപ്പിക്കലിനും മറ്റ് അടിസ്ഥാനസൗകര്യ വികസനത്തിനുമായി എന്തൊക്കെ പ്രവൃത്തികളാണ് ഉദ്ദേശിക്കുന്നതെന്ന് വ്യക്തമാക്കുമോ?

സംസ്ഥാനത്തെ റെയില്‍വേ വികസനവുമായി ബന്ധപ്പെട്ട് എന്തൊക്കെ ആവശ്യങ്ങളാണ് കേന്ദ്ര സര്‍ക്കാരിന് സമർപ്പിച്ചിരിക്കുന്നതെന്ന് വിശദമാക്കാമോ;

ഈ ആവശ്യങ്ങൾ നേടിയെടുക്കുന്നതിനുവേണ്ടി സംസ്ഥാനം എന്തൊക്കെ നടപടികളാണ് സ്വീകരിച്ചിരിക്കുന്നതെന്ന് വ്യക്തമാക്കാമോ;

ഇത് സംബന്ധിച്ച് റെയിൽവേ മന്ത്രാലയവും കേന്ദ്ര ധന മന്ത്രാലയവുമായി എന്തെങ്കിലും ചർച്ച നടത്തിയിരുന്നോ; എങ്കില്‍ പ്രസ്തുത ചർച്ചയില്‍ സംസ്ഥാനം ഉന്നയിച്ച മുഖ്യ ആവശ്യങ്ങള്‍ എന്തെല്ലാമാണെന്ന് വ്യക്തമാക്കാമോ;

ശബരി റെയില്‍പാത യാഥാര്‍ത്ഥ്യമാക്കുന്നതിനുള്ള കാലതാമസത്തിന്റെ കാരണം വിശദമാക്കാമോ; ശബരി പാത നിർമ്മാണത്തിൽ സംസ്ഥാനത്തിന്റെ ഭാഗത്തുനിന്നും എന്തൊക്കെ കാര്യങ്ങളാണ് ചെയ്യേണ്ടതെന്ന് അറിയിക്കാമോ; ഇവ പൂർത്തിയാക്കാൻ സാധിച്ചിട്ടുണ്ടോ; വ്യക്തമാക്കാമോ;

തലശ്ശേരി-മെെസൂര്‍ പാതയുടെ പുരോഗതി വിശദമാക്കാമോ; ഈ പദ്ധതിക്കായി സംസ്ഥാനത്തിന്റെ ഭാഗത്തുനിന്നും എന്തൊക്കെ കാര്യങ്ങളാണ് ചെയ്യേണ്ടതെന്ന് അറിയിക്കാമോ; ഇവ പൂർത്തിയാക്കാൻ സാധിച്ചിട്ടുണ്ടോയെന്ന് വ്യക്തമാക്കാമോ?

കേരളത്തിൽ റെയിൽവേക്ക് ആവശ്യമുള്ള സഹായങ്ങളും വികസനവും കേന്ദ്ര സര്‍ക്കാരില്‍ നിന്നും ലഭിക്കുന്നുണ്ടോ; വിശദാംശം ലഭ്യമാക്കുമോ;

കഴിഞ്ഞ സര്‍ക്കാരും ഈ സർക്കാരും പ്രസ്തുത മേഖലയുടെ വികസനത്തിനായി എന്തെല്ലാം സഹായങ്ങളും വികസനാവശ്യങ്ങളും അഭ്യര്‍ത്ഥിച്ചിട്ടുണ്ടെന്നും അതില്‍ ലഭ്യമായവ എന്തെല്ലാമെന്നും വ്യക്തമാക്കുമോ;

കേന്ദ്ര സര്‍ക്കാര്‍ അനുവദിച്ച ശബരി റെയില്‍പാത, കഞ്ചിക്കോട് കോച്ച് ഫാക്ടറി, ഏറ്റുമാനൂര്‍ ചിങ്ങവനം പാതയിരട്ടിപ്പ്, എറണാകുളം-കോട്ടയം-തിരുവനന്തപുരം പാതയിരട്ടിപ്പ് എന്നിവയുടെ നിലവിലെ സ്ഥിതി എന്താണെന്നും ഇതിനായി ലഭ്യമായ കേന്ദ്ര സഹായം എത്രയെന്നും വിശദമാക്കുമോ?

കാസര്‍ഗോഡ് ജില്ലയിലെ ചന്ദേര, കളനാട് ട്രെയിന്‍ ഹാള്‍ട്ടുകളില്‍ നേരത്തെ ലോക്കല്‍ ട്രെയിനുകള്‍ക്ക് (പാസഞ്ചര്‍ ട്രെയിനുകള്‍) ഉണ്ടായിരുന്ന സ്റ്റോപ്പ് മെമു ട്രെയിന്‍ ആരംഭിച്ചതുമുതല്‍ നിര്‍ത്തലാക്കിയത് മൂലം നിരവധി വിദ്യാര്‍ത്ഥികള്‍ക്കും തൊഴിലാളികള്‍ക്കും ജീവനക്കാര്‍ക്കുമുണ്ടായ പ്രയാസം പരിഹരിക്കാന്‍ അടിയന്തര നടപടികള്‍ സ്വീകരിക്കുമോ;

നിത്യേനയുള്ള യാത്രക്കാര്‍ വഴി നല്ല വരുമാനമുള്ള ഈ സ്റ്റോപ്പുകള്‍ നിലനിര്‍ത്തിക്കിട്ടാന്‍ സമയബന്ധിതമായ നടപടികള്‍ സ്വീകരിക്കുമോ; വിശദാംശം ലഭ്യമാക്കാമോ?

സംസ്ഥാനത്ത് നിലവിൽ റെയിൽവേയുടെ ഏതെല്ലാം പദ്ധതികളുടെ പ്രവൃത്തികളാണ് നടന്നുകൊണ്ടിരിക്കുന്നത് എന്നും എന്തെല്ലാം പദ്ധതികൾക്കാണ് അംഗീകാരം ലഭിച്ചിരിക്കുന്നത് എന്നും വ്യക്തമാക്കാമോ;

സംസ്ഥാനത്ത് നിലവിൽ നടന്നുകൊണ്ടിരിക്കുന്നതോ നടത്താൻ ഉദ്ദേശിക്കുന്നതോ ആയ നാല്പത്തിമൂവായിരത്തോളം കോടി രൂപയുടെ 20 റെയിൽവേ പദ്ധതികൾ നിർത്തിവച്ച് പകരം സിൽവർ ലൈൻ പദ്ധതിക്കായി പ്രസ്തുത തുക നൽകണമെന്ന് കേന്ദ്ര സർക്കാരിന്റെ ഡിപ്പാർട്ട്മെൻറ് ഓഫ് എക്കണോമിക് അഫയേഴ്സിനെ അറിയിച്ചിട്ടുണ്ടോ;

സർക്കാരിന്റെ പ്രസ്തുത നടപടി മൂലം നിലവിൽ നടന്നുകൊണ്ടിരിക്കുന്നതോ നടത്താൻ ഉദ്ദേശിക്കുന്നതോ ആയ നാല്പത്തിമൂവായിരത്തോളം കോടി രൂപയുടെ 20 റെയിൽവേ പദ്ധതികൾക്കായി ബാങ്ക്, എ.ഡി.ബി. ഏർപ്പാടാക്കിയ ലോൺ മറ്റ് സംസ്ഥാനങ്ങൾക്ക് നൽകാൻ തീരുമാനമായിട്ടുണ്ടോയെന്ന് വ്യക്തമാക്കാമോ ?

സംസ്ഥാനത്ത് പാത ഇരട്ടിപ്പിക്കല്‍ പൂര്‍ണ്ണമായും നടപ്പിലാക്കാൻ സാധിക്കാത്തതിന്റെ കാരണം വിശദമാക്കാമോ;

തിരുവനന്തപുരം-മംഗലാപുരം പാതയിലെ കോട്ടയം വഴിയുള്ള റൂട്ടില്‍ ഏറ്റുമാനൂര്‍ മുതല്‍ ചിങ്ങവനം വരെ 16.5 കിലോമീറ്റര്‍ ഇനിയും പാത ഇരട്ടിപ്പിക്കാനുണ്ട് എന്നത് വസ്തുതയാണോ; ആയത് എന്ന് പൂർത്തിയാകുമെന്ന് അറിയിക്കുമോ;

തിരുവനന്തപുരം-മംഗലാപുരം പാതയിലെ ആലപ്പുഴ വഴിയുള്ള റൂട്ടില്‍ എറണാകുളം മുതല്‍ അമ്പലപ്പുഴ വരെ അറുപത്തിയൊന്‍പത് കിലോമീറ്റര്‍ പാത ഇരട്ടിപ്പിക്കല്‍ ഇനിയും പൂര്‍ത്തിയായിട്ടില്ലെന്നത് വസ്തുതയാണോ; പാത ഇരട്ടിപ്പിക്കൽ എന്ന് പൂർത്തിയാകുമെന്ന് വ്യക്തമാക്കുമോ;

കേരളത്തിലെ റെയിൽവേ റൂട്ടുകളിൽ ഓട്ടോമാറ്റിക് സിഗ്നലിംഗ് സിസ്റ്റം സ്ഥാപിക്കാൻ പദ്ധതിയുണ്ടോ; വിശദാംശങ്ങൾ നൽകാമോ?