വനം വകുപ്പിന്റെ കീഴിലുള്ള വനം വിജിലന്‍സ് വിംഗിന്റെ പ്രവര്‍ത്തനോദ്ദേശ്യങ്ങള്‍, ഘടന എന്നിവ വ്യക്തമാക്കാമോ;

വ്യാജ രേഖ ചമച്ച് വനം വകുപ്പിന്റെ എസ്റ്റേറ്റുകള്‍ വില്‍പ്പന നടത്തുന്നതും മരം മുറിക്കുന്നതും തടയാന്‍ നടപടി സ്വീകരിക്കുന്നതിന് വനം വിജിലന്‍സ് വിംഗ് തയ്യാറാകുന്നില്ല എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യത്തില്‍ എന്തെല്ലാം നടപടികള്‍ സ്വീകരിക്കാന്‍ ഉദ്ദേശിക്കുന്നു എന്ന് വ്യക്തമാക്കാമോ;

നിലവിലുള്ള ഘടനയില്‍ മാറ്റം വരുത്തി വനം വിജിലന്‍സ് വിംഗ് ശക്തിപ്പെടുത്തുന്നതിന് അടിയന്തര നടപടി സ്വീകരിക്കുമോ; വ്യക്തമാക്കുമോ?

കോതമംഗലം മണ്ഡലത്തിലെ കുട്ടമ്പുഴ - ബ്ലാവന - കടവില്‍ പാലം നിര്‍മ്മാണവുമായി ബന്ധപ്പെട്ട് പൊതുമരാമത്ത് വകുപ്പിന്റെ അപേക്ഷയിന്മേല്‍ വനം വകുപ്പ് സ്വീകരിച്ച നടപടികള്‍ എന്തെല്ലാം; വ്യക്തമാക്കുമോ;

നിരവധി ആദിവാസി കുടികളിലേക്ക് യാത്രയ്ക്കായി ഉപയോഗിക്കുന്ന ഏക മാര്‍ഗ്ഗം എന്ന നിലയില്‍ ബ്ലാവന കടവില്‍ പാലത്തിന്റെ നിര്‍മ്മാണവുമായി ബന്ധപ്പെട്ട് വനം വകുപ്പിന്റെ അനുമതി വേഗത്തില്‍ ലഭ്യമാക്കുന്നതിന് നടപടി സ്വീകരിക്കുമോ; വ്യക്തമാക്കുമോ?

പരിസ്ഥിതി സൗഹൃദ ടൂറിസത്തിന് സംസ്ഥാന വനം വകുപ്പ് എന്തെല്ലാം സേവനങ്ങള്‍ നല്‍കിവരുന്നുണ്ട്;

ഇക്കോ ടൂറിസം വഴി സംസ്ഥാനത്ത് തൊഴിലവസരങ്ങള്‍ സൃഷ്ടിക്കപ്പെട്ടതിന്റെ വിശദാംശം അറിയിക്കാമോ;

2016 ജൂണ്‍ മാസത്തിന് ശേഷം സംസ്ഥാനത്തെ ഇക്കോ ടൂറിസം കേന്ദ്രങ്ങളിലെ അടിസ്ഥാന സൗകര്യ വികസനത്തിന്റെയും സന്ദര്‍ശകരുടെയും പുരോഗതി വിലയിരുത്തിയിട്ടുണ്ടോ; വിശദമാക്കാമോ?

പാലക്കാട് ജില്ലയില്‍ 01.01.1977-ന് മുന്‍പായി കുടിയേറിയ വനഭൂമിയില്‍ നാളിതുവരെ പട്ടയം ലഭിക്കാത്ത കൈവശക്കാരുടെ പേരിലുളള സ്ഥലങ്ങളിലെ റബ്ബര്‍ മരങ്ങള്‍ വനംവകുപ്പ് ഉദ്യോഗസ്ഥര്‍ മുറിച്ച് മാറ്റിയിട്ടുണ്ടോ; ഉണ്ടെങ്കില്‍ അത് ഏത് ഉദ്യോഗസ്ഥന്റെ ഉത്തരവ് പ്രകാരമാണെന്ന് വ്യക്തമാക്കാമോ; ഉത്തരവിന്റെ പകര്‍പ്പ് ലഭ്യമാക്കാമോ;

പ്രസ്തുത മരങ്ങള്‍ മുറിച്ച് മാറ്റുന്നതിനായി പത്രത്തില്‍ പരസ്യം നല്‍കല്‍, ടെന്‍ഡര്‍ നടപടികള്‍ മുതലായ നടപടി ക്രമങ്ങള്‍ പാലിച്ചിട്ടുണ്ടോ; വിശദമാക്കാമോ?

തിരുവനന്തപുരം വന ഡിവിഷനിലെ പരുത്തിപ്പള്ളി റെയിഞ്ചിൽ നിന്നും ഒ.ആർ.കേസുകളിൽ ഉൾപ്പെട്ട തൊണ്ടി മുതലുകൾ മോഷണം പോയത് അന്വേഷിക്കാൻ കൺസർവേറ്ററുടെ നേതൃത്വത്തിൽ രൂപീകരിച്ച സംഘത്തിന്റെ കണ്ടെത്തൽ പ്രകാരം ഏതൊക്ക ഒ.ആർ.കേസിലുള്‍പ്പെട്ട തൊണ്ടി മുതലുകളാണ് മോഷണം പോയിട്ടുള്ളതായി കണ്ടെത്തിയത് എന്ന് വെളിപ്പെടുത്താമോ;

പ്രസ്തുത അന്വേഷണ റിപ്പോർട്ട്‌ സർക്കാർ അംഗീകരിച്ചിട്ടുണ്ടോ; എങ്കിൽ ടി റിപ്പോർട്ട്‌ പ്രകാരം എത്ര ഉദ്യോഗസ്ഥര്‍ കുറ്റക്കാരാണെന്ന് കണ്ടെത്തി; അവർക്കെതിരെ നാളിതുവരെ സ്വീകരിച്ച വകുപ്പുതല നടപടികള്‍ വിശദീകരിക്കാമോ;

തൊണ്ടി മുതൽ പരുത്തിപ്പള്ളി റെയിഞ്ച് സ്റ്റോക്കിൽ എടുക്കാത്തതുമായി ബന്ധപ്പെട്ട് 14 വർഷം മുൻപ് അന്നത്തെ ഡി.എഫ്.ഒ. ഉത്തരവാദികളായ ഉദ്യോഗസ്ഥർക്കെതിരെ നടപടി സ്വീകരിക്കാൻ മേൽ ഓഫീസിലേക്ക് സമർപ്പിച്ച കത്ത് ഇ1 -3141/10 തിയതി 17/09/2010 പ്രകാരം നാളിതുവരെ വനം വകുപ്പ് സ്വീകരിച്ച നടപടികൾ വിശദീകരിക്കാമോ;

പരുത്തിപ്പള്ളി റെയിഞ്ചിലെ ഒ.ആർ. 11/2005 കേസിൽ ഉൾപ്പെട്ട തൊണ്ടി മുതൽ എവിടെ സൂക്ഷിക്കുന്നതായാണ് അന്വേഷണ സംഘം കണ്ടെത്തിയിട്ടുള്ളത്; റിപ്പോര്‍ട്ടിന്റെ പകര്‍പ്പ് ലഭ്യമാക്കാമോ?

തിരുവനന്തപുരം വന ഡിവിഷനിലെ പരുത്തിപ്പള്ളി റെയ്ഞ്ചിൽ നിന്നും ഒ.ആർ. 09/2016 , ഒ.ആർ. 14/2004 എന്നീ നമ്പര്‍ കേസുകളില്‍ ഉൾപ്പെട്ട തൊണ്ടി മുതൽ മോഷണം പോയതുമായി ബന്ധപ്പെട്ട് രണ്ടു റെയ്ഞ്ചു ഫോറസ്റ്റ് ഓഫീസർമാരെ സർവീസിൽ നിന്നും സസ്പെൻഡ് ചെയ്തെങ്കിലും 2 വർഷം കഴിഞ്ഞിട്ടും കുറ്റപത്രം പോലും നൽകിയിട്ടില്ല എന്നത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത വിഷയവുമായി ബന്ധപ്പെട്ട ഫയൽ നിലവിൽ ആരുടെ കസ്റ്റഡിയിൽ ആണ്; ഏത് ഉദ്യോഗസ്ഥന്റെ ശിപാർശയിന്മേലാണ് റെയ്ഞ്ച് ഫോറസ്റ്റ് ഓഫീസർമാർക്കെതിരെ അച്ചടക്ക നടപടി ആരംഭിച്ചതെന്ന് വെളിപ്പെടുത്താമോ;

പരുത്തിപ്പള്ളി റെയ്ഞ്ചിൽ നിന്നും മോഷണം പോയതിൽ ഏതൊക്കെ ഒ.ആർ. കേസിൽ ഉൾപ്പെട്ട തൊണ്ടി മുതൽ മോഷണം പോയതിനാണ് കാട്ടാക്കട പോലീസ് കേസ് രജിസ്റ്റർ ചെയ്തത് എന്നറിയിക്കാമോ; കേസ് നമ്പറും നിലവിലെ സ്ഥിതിയും വ്യക്തമാക്കാമോ;

ഏതെല്ലാം ഒ.ആർ. കേസിൽ ഉൾപ്പെട്ട തൊണ്ടി മുതൽ മോഷണം പോയതിനാണ് പോലീസിൽ പരാതി നൽകിയിട്ടും കേസ് രജിസ്റ്റർ ചെയ്തിട്ടില്ലാത്തതെന്ന് അറിയിക്കുമോ;

പരാതി നൽകുന്നതിൽ വീഴ്ച വരുത്തിയ വനം വകുപ്പ് ഉദ്യോഗസ്ഥർക്കെതിരെ സ്വീകരിച്ച നടപടി വിശദീകരിക്കാമോ?

ഈ സര്‍ക്കാരിന്റെ കാലത്ത് കിഫ്ബിയില്‍ ഉള്‍പ്പെടുത്തി വനം വകുപ്പ് മനുഷ്യ-വന്യജീവി സംഘര്‍ഷം കുറയ്ക്കുന്നതിന് എന്തെല്ലാം പദ്ധതികള്‍ നടപ്പിലാക്കിവരുന്നുവെന്ന് വിശദമാക്കാമോ;

പ്രസ്തുത പദ്ധതിയുടെ രണ്ടാംഘട്ടം പൂര്‍ത്തീകരിക്കുന്നതിന് കഴി‍ഞ്ഞിട്ടുണ്ടോ; വിശദമാക്കാമോ?

ഗുരുവായൂർ മണ്ഡലത്തിലെ ചാവക്കാട് നഗരസഭ, പുന്നയൂർ, പുന്നയൂർക്കുളം ഗ്രാമപഞ്ചായത്തുകൾ എന്നിയുടെ തീരപ്രദേശങ്ങളില്‍ എത്ര കാറ്റാടി മരങ്ങളുണ്ടെന്നും ആയതില്‍ വീടുകള്‍ക്കും വൈദ്യുതിലൈനിനും ഭീഷണിയായി എത്ര കാറ്റാടി മരങ്ങള്‍ നിലനില്‍ക്കുന്നുവെന്നും വിശദമാക്കാമോ;

അപകട ഭീഷണി ഉയർത്തുന്ന കാറ്റാടി മരങ്ങള്‍ മുറിച്ച് മാറ്റുന്നതിന് വനം വകുപ്പ് സ്വീകരിച്ച നടപടികള്‍ വിശദമാക്കാമോ?

വികസന പ്രവര്‍ത്തനങ്ങള്‍ക്ക് മരം മുറിക്കുന്നതിന് അനുമതി നല്‍കേണ്ട കമ്മിറ്റികള്‍ യോഗം ചേരുന്നതിനും തീരുമാനമെടുക്കുന്നതിനും കാലതാമസം നേരിടുന്നതു മൂലം വികസന പ്രവര്‍ത്തനങ്ങള്‍ തടസ്സപ്പെടുന്നത് ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ആയത് പരിഹരിക്കുന്നതിന് നടപടി സ്വീകരിക്കുമോ?

അരുവിക്കര മണ്ഡലത്തിൽ പ്രവർത്തിക്കുന്ന വന സംരക്ഷണ സമിതികളുടെ പേര് വിവരങ്ങൾ ലഭ്യമാക്കുമോ;

പ്രസ്തത സമിതികളുടെ പ്രവർത്തനങ്ങൾ വനങ്ങളുടെ അഭിവൃദ്ധിക്കും വനവിഭവങ്ങളുടെ ഫലപ്രദമായ വിനിയോഗത്തിനും വന സംരക്ഷണത്തിനും എത്രമാത്രം സഹായകരമായിരുന്നുവെന്ന് വിശദമാക്കുമോ?

മരം മുറിച്ച് മാറ്റുന്നതിന് പരിഹാരമായി 2016 മുതല്‍ വച്ചുപിടിപ്പിച്ച പരിഹാര വനത്തിന്റെ വിശദവിവരം ലഭ്യമാക്കാമോ; വനഭൂമി വിട്ടുനല്‍കിയതിന് പരിഹാരമായി വച്ചുപിടിപ്പിച്ച മരങ്ങളുടെ കണക്കും വ്യക്തമാക്കാമോ;

ഏതെല്ലാം മരങ്ങളാണ് പരിഹാരവനത്തിന്റെ ഭാഗമായി നട്ടുപിടിപ്പിച്ചിട്ടുള്ളത്; ഇവയുടെ പരിപാലനം ഉറപ്പാക്കുന്നതിന് എന്തെല്ലാം നടപടികളാണ് വനം വകുപ്പ് സ്വീകരിച്ച് വരുന്നത് എന്നറിയിക്കാമോ?

തൃശ്ശൂര്‍ ജില്ലയിലെ ഏതൊക്കെ പഞ്ചായത്തുകളാണ് ബഫര്‍ സോണ്‍ പരിധിയില്‍ വരുന്നതെന്ന് വിശദമാക്കാമോ;

ബഫര്‍ സോണുമായി ബന്ധപ്പെട്ട് വടക്കാഞ്ചേരി നിയോജക മണ്ഡലത്തില്‍ നിന്ന് എത്ര പരാതികളാണ് ലഭിച്ചിട്ടുളളത്; പ്രസ്തുത പരാതികള്‍ക്ക് പരിഹാരം കാണുന്നതിന് എന്തൊക്കെ നടപടികളാണ് സ്വീകരിച്ചിട്ടുളളതെന്ന് വ്യക്തമാക്കാമോ?

സംസ്ഥാനത്ത് പ്രവർത്തിക്കുന്ന കണ്ടല്‍ മ്യൂസിയങ്ങളുടെ വിവരങ്ങള്‍ ലഭ്യമാക്കാമോ;

കൊയിലാണ്ടി മണ്ഡലത്തില്‍ സ്ഥിതി ചെയ്യുന്ന കണ്ടല്‍ മ്യൂസിയത്തിന്റെ പ്രവർത്തനത്തിനായി നാളിതുവരെ സർക്കാർ ചെലവഴിച്ച ഫണ്ടിന്റെ വിശദാംശം ലഭ്യമാക്കാമോ?

വംശനാശ ഭീഷണി നേരിടുന്ന കണ്ടൽ കാടുകൾ സംരക്ഷിക്കുന്നതിന് എന്തെങ്കിലും പദ്ധതി ആവിഷ്ക്കരിച്ചിട്ടുണ്ടോ;

എങ്കിൽ പ്രസ്തുത പദ്ധതിയുടെ വിശദാംശം നൽകുമോ?

സംസ്ഥാനത്തെ കടലുകളോടും കായലുകളോടും ചേർന്നുകിടക്കുന്ന കണ്ടല്‍ക്കാടുകളുടെ വിസ്തൃതി എത്രയാണെന്ന് കണക്കാക്കിയിട്ടുണ്ടോ; വിശദാംശം നൽകുമോ;

പരിസ്ഥിതി സംരക്ഷണത്തിൽ ഏറെ പങ്കുവഹിക്കുന്ന കണ്ടൽക്കാടുകൾ വംശനാശ ഭീഷണി നേരിടുന്ന വിഷയം പരിശോധിച്ചിട്ടുണ്ടോ;

എങ്കിൽ ഇവയുടെ സംരക്ഷണം ഉറപ്പാക്കാൻ സ്വീകരിക്കാൻ ഉദ്ദേശിക്കുന്ന നടപടികൾ എന്തെല്ലാമാണെന്നു വിശദമാക്കുമോ?

അട്ടപ്പാടിയിൽ ആദിവാസികൾക്കായി ആകെ എത്ര ഏക്കർ വനഭൂമിയാണ് നൽകിയിട്ടുള്ളതെന്നറിയിക്കാമോ;

ഇപ്രകാരം അനുവദിച്ച ഭൂമിയുടെ അതിർത്തികൾ എവിടെയൊക്കെയാണ് നിശ്ചയിച്ചിരുന്നതെന്നറിയിക്കാമോ;

വനാവകാശ നിയമപ്രകാരം ഈ ഭൂമിയുടെ അധികാരം ആർക്കൊക്കെയാണെന്നും ഈ ഭൂമി കൈമാറുന്നത് സംബന്ധിച്ച് നിലവിലുള്ള വ്യവസ്ഥകൾ എന്തൊക്കെയാണെന്നും അറിയിക്കാമോ;

ഈ സർക്കാർ അധികാരമേറ്റതിനുശേഷം അട്ടപ്പാടി ട്രൈബൽ താലൂക്കിലെ വിവിധ വില്ലേജുകളിലായി ഭൂമിക്കായുള്ള നോ ഒബ്ജക്ഷൻ സർട്ടിഫിക്കറ്റിനുള്ള ആകെ എത്ര അപേക്ഷകളാണ് വനംവകുപ്പിൽ ലഭിച്ചിട്ടുള്ളതെന്നറിയിക്കാമോ;

ഇതിൽ ആകെ എത്ര പേരുടെ ഭൂമിക്കാണ് വനംവകുപ്പ് നോ ഒബ്ജക്ഷൻ സർട്ടിഫിക്കറ്റ് നൽകിയിട്ടുള്ളത്;

നോ ഒബ്ജക്ഷൻ സർട്ടിഫിക്കറ്റ് അനുവദിച്ച ഭൂമിയുടെ സർവ്വേ നമ്പർ, അപേക്ഷകന്റെ പേര്, അപേക്ഷ നൽകിയ തീയതി എന്നീ വിശദാംശങ്ങൾ ലഭ്യമാക്കാമോ?

വനാതിർത്തിയോട് ചേർന്ന് കിടക്കുന്നതും വന്യജീവി ശല്യം ഉള്ളതുമായ ഭൂമി ഏറ്റെടുത്ത് വനത്തിനോട് ചേർക്കുന്ന കിഫ്ബി പദ്ധതി മുഖേന സംസ്ഥാനത്ത് എത്ര ഹെക്ടർ ഭൂമി ഏറ്റെടുത്തിട്ടുണ്ടെന്ന് അറിയിക്കുമോ;

ഇതിനായി ചെലവഴിച്ച തുക എത്രയാണ്; വിശദാംശം നൽകുമോ?

1927-ലെ കേന്ദ്ര വന നിയമ പ്രകാരം പുനലൂർ നിയോജകമണ്ഡലത്തിലെ തെന്മല വില്ലേജിലെ 1/6, 1/7 എന്നീ സർവേ നമ്പരുകളില്‍പ്പെട്ട 24.16 ഏക്കർ ഭൂമി വനഭൂമിയായി നോട്ടിഫൈ ചെയ്തിട്ടുണ്ടോയെന്ന് വിശദമാക്കാമോ; പ്രസ്തുത നോട്ടിഫിക്കേഷന്റെ പകർപ്പ് ലഭ്യമാക്കാമോ;

1068-ലെ ഫോറസ്റ്റ് റെഗുലേഷൻ ആക്ട് പ്രകാരം 1901 ലെ രാജഭരണ കാലത്ത് തയ്യാറാക്കിയ നോട്ടിഫിക്കേഷൻ പ്രകാരമുള്ള പ്രസ്തുത ഭൂമി സർവേ നടത്തിയിട്ടുള്ള ഭൂമിയാണോയെന്ന് വിശദമാക്കാമോ;

1901-ലെ നോട്ടിഫിക്കേഷൻ പ്രകാരം കഡാസ്ട്രല്‍ സർവേ നടത്തിയ ഭൂമി റിസർവ് ഫോറസ്റ്റായി കണക്കാക്കാൻ കഴിയുമോയെന്ന് വിശദമാക്കാമോ?

സംസ്ഥാനത്തെ വന വിസ്തൃതി ഇപ്പോള്‍ എത്ര ശതമാനമാണെന്നം 2016 നു ശേഷം വന വിസ്തൃതിയില്‍ ഉണ്ടായ കുറവ് എത്ര ശതമാനമാണെന്നും വെളിപ്പെടുത്തുമോ;

വ്യാപകമായ രീതിയില്‍ വനം കെെയ്യേറ്റം കണ്ടെത്തിയിട്ടുള്ളത് എവിടെയെല്ലാമാണ്; സംസ്ഥാനത്ത് പ്രൊപ്പോസ്ഡ് റിസര്‍വ് ഫോറസ്റ്റ് (പി. ആര്‍.എഫ്) ആയി പ്രഖ്യാപിച്ച സ്ഥലങ്ങള്‍ എവിടെയെല്ലാമാണ്; വിശദാംശം നല്‍കുമോ;

വനഭൂമിയുടെ വിസ്തൃതി വര്‍ദ്ധിപ്പിക്കുന്നതിന് സ്വീകരിച്ച നടപടികള്‍ എന്തെല്ലാമാണ്; വ്യക്തമാക്കുമോ?

കോന്നിയിൽ വനഭൂമി കെെയ്യേറി കൊടിമരം സ്ഥാപിച്ച സംഭവം ശ്രദ്ധയിൽപ്പെട്ടിട്ടുണ്ടോ; വ്യക്തമാക്കുമോ;

പ്രസ്തുത സംഭവത്തിൽ വകുപ്പ് സ്വീകരിച്ച നടപടികൾ വിശദമാക്കാമോ;

അടവി കുട്ടവഞ്ചി സവാരി കേന്ദ്രത്തില്‍ വനഭൂമി കെെയ്യേറി കൊടിമരം സ്ഥാപിച്ചത് തടഞ്ഞ വനം വകുപ്പ് ഉദ്യോഗസ്ഥരെ രാഷ്ട്രീയ നേതാക്കള്‍ ഭീഷണിപ്പെടുത്തിയ സംഭവത്തിൽ പോലീസിൽ പരാതി നൽകിയിട്ടുണ്ടോ; വിശദമാക്കാമോ?

കൈപ്പമംഗലം മണ്ഡലത്തിലെ കടലേറ്റവും കടൽക്ഷോഭവും മൂലമുണ്ടാകുന്ന നാശനഷ്ടങ്ങൾ ഒരു പരിധിവരെ കുറയ്ക്കുന്നതിന് കടൽത്തീരങ്ങളിൽ പലവിധത്തിലുള്ള വൃക്ഷത്തൈകൾ നട്ടുപിടിപ്പിക്കുന്ന പദ്ധതിയുടെ നിർവഹണം ധ്രുതഗതിയിൽ നടത്തുന്നതിന് ശ്രമം ഉണ്ടാകുമോ; വിശദമാക്കുമോ;

കൈപ്പമംഗലം മണ്ഡലത്തിലെ അഴീക്കോട് മുനക്കൽ ഡോൾഫിൻ ബീച്ചിൽ മിയോ വാക്കി വനവൽക്കരണ പ്രവർത്തനവും സംരക്ഷണവും നടപ്പാക്കിയിട്ടുള്ളതുപോലെ ഏറെ പാരിസ്ഥിതിക പ്രാധാന്യമുള്ള ഇത്തരം പ്രവർത്തനം കൈപ്പമംഗലത്തിന്റെ മറ്റു തീരപ്രദേശങ്ങളിൽ കൂടി വ്യാപിപ്പിക്കാനുള്ള പദ്ധതിയുണ്ടോ വിശദമാക്കുമോ ?

മാനന്തവാടി നോർത്ത് വയനാട് ഫോറസ്റ്റ് ഡിവിഷന്റെ കീഴില്‍ ആരംഭിച്ച നഗരവനം പദ്ധതി നാളിതു വരെ എത്ര പേർ സന്ദർശിച്ചിട്ടുണ്ട് എന്ന് വ്യക്തമാക്കാമോ;

പ്രസ്തുത പദ്ധതി പ്രകാരം എത്ര രൂപയുടെ വരുമാനം സന്ദർശക ഫീസ് ഇനത്തില്‍ വനം വകുപ്പിന് ലഭിച്ചുവെന്ന് അറിയിക്കാമോ;

നഗരവനം പദ്ധതി നടപ്പാക്കാന്‍ വനം വകുപ്പ് ആകെ ചെലവഴിച്ച തുക എത്രയാണെന്ന് വ്യക്തമാക്കാമോ;

പ്രസ്തുത പദ്ധതി കൂടുതല്‍ ആകർഷകമാക്കുന്ന കാര്യം പരിഗണനയില്‍ ഉണ്ടോയെന്നറിയിക്കാമോ?

നഗരങ്ങളില്‍ ചെറുവനങ്ങള്‍ സൃഷ്ടിക്കുന്ന പദ്ധതി പ്രകാരം കോട്ടയം ജില്ലയില്‍ എവിടെയെല്ലാമാണ് നഗരവനങ്ങള്‍ സൃഷ്ടിച്ചിട്ടുള്ളതെന്ന് വ്യക്തമാക്കുമോ;

പ്രസ്തുത പദ്ധതിയുടെ ഭാഗമായി ഏതെല്ലാം വൃഷതൈകളാണ് നട്ടുപിടിക്കുന്നതെന്നും അവയുടെ പരിപാലന ചുമതല ആര്‍ക്കാണെന്നും വിശദവിവരം നല്‍കുമോ?

തിരുവനന്തപുരം വന ഡിവിഷന്റെ അംഗീകൃത വർക്കിംഗ് പ്ലാൻ പ്രകാരം 2023-24 സാമ്പത്തിക വർഷത്തിൽ ഇക്കോ റെസ്റ്റോറേഷൻ പദ്ധതിയിലൂടെ തൈ നടീൽ നടത്തേണ്ടത് എത്ര ഹെക്ടർ വനഭൂമിയിൽ ആയിരുന്നുവെന്നും അതിൽ എത്ര ഹെക്ടർ വനഭൂമിയിൽ പ്രസ്തുത വർഷം തൈനടീൽ നടത്തിയെന്നും വ്യക്തമാക്കുമോ;

2023-24 ൽ തിരുവനന്തപുരം ഡിവിഷനിൽ മരങ്ങൾ മുറിച്ചുമാറ്റിയിട്ടും ഇക്കോ റെസ്റ്റോറേഷൻ പദ്ധതിയിലൂടെ തൈനടീൽ നടത്താതിരുന്നത് എത്ര ഹെക്ടർ വനഭൂമിയിൽ ആണെന്ന് വെളിപ്പെടുത്തുമോ;

യഥാസമയം ഇക്കോ റെസ്റ്റോറേഷൻ പ്രവൃത്തി ചെയ്യാത്തതിന്റെ ഫലമായി, തൈനടീൽ പ്രവൃത്തിക്ക് അധികം ചെലവാകുന്ന തുക, പാരിസ്ഥിതിക നഷ്ടം അടക്കം എന്തെല്ലാം നഷ്ടങ്ങൾ ഉണ്ടായിട്ടുണ്ടെന്ന് വ്യക്തമാക്കുമോ;

പ്രസ്തുത ഇനത്തിലുള്ള നഷ്ടം വനം വകുപ്പ് പരിശോധിച്ച് തിട്ടപ്പെടുത്തിയിട്ടുണ്ടോ; എങ്കിൽ എത്രയാണെന്ന് വ്യക്തമാക്കുമോ;

കൊല്ലം ചീഫ് കൺസർവേറ്ററുടെ പ്രസ്തുത വിഷയത്തിന്മേലുള്ള 24.07.2023 ലെ ശിപാർശപ്രകാരം ഉത്തരവാദികളായ ഏതെല്ലാം ഉദ്യോഗസ്ഥർക്കെതിരെ എന്തെല്ലാം തുടർനടപടികൾ സ്വീകരിച്ചുവെന്ന് വിശദമാക്കാമോ?

ഈ സര്‍ക്കാര്‍ വന്നതിനുശേഷം വാമനപുരം മണ്ഡലത്തില്‍ വനം വകുപ്പ് മുഖേന നടപ്പിലാക്കിയിട്ടുളള പദ്ധതികള്‍, നടപ്പിലാക്കിവരുന്ന പദ്ധതികള്‍, എന്നിവ എതെല്ലാമാണെന്നും ഓരോന്നിനും ചെലവാക്കിയ തുക എത്രയാണെന്നും വിശദമാക്കാമോ;

വനം വകുപ്പ് മുഖേന പുതിയതായി നടപ്പാക്കാന്‍ ഉദ്ദേശിക്കുന്ന പദ്ധതികള്‍ ഏതെല്ലാമാണെന്ന് വിശദമാക്കാമോ?

കാസർഗോഡ് ജില്ലയിൽ വനം വകുപ്പ് നടപ്പിലാക്കുന്ന പദ്ധതികളുടെ വിശദവിവരങ്ങൾ ലഭ്യമാക്കുമോ;

പ്രസ്തുത പദ്ധതികൾക്കായി ചെലവഴിക്കുന്ന തുക സംബന്ധിച്ച വിവരങ്ങൾ ലഭ്യമാക്കുമോ?

പാലക്കാട് ജില്ലയില്‍ വനപ്രദേശങ്ങളില്‍ക്കൂടി കടന്നുപോകുന്ന എത്ര റോഡുകളുണ്ടെന്ന് പേരും നീളവും വീതിയും സഹിതം മണ്ഡലം തിരിച്ച് വ്യക്തമാക്കാമോ;

പ്രസ്തുത റോ‍ഡുകള്‍ വനം വകുപ്പിന്റേതാണോ പഞ്ചായത്തിന്റേതാണോ എന്ന് മണ്ഡലം തിരിച്ച് വ്യക്തമാക്കാമോ;

എപ്പോഴെങ്കിലും പ്രസ്തുത റോഡുകളില്‍ പുനരുദ്ധാരണ പ്രവർത്തനങ്ങള്‍/അറ്റകുറ്റപ്പണികള്‍ നടത്തിയിട്ടുണ്ടോ എന്ന് വ്യക്തമാക്കാമോ; എങ്കില്‍ റോഡുകളുടെ പേരും, വർഷവും, ചെലവഴിച്ച തുകയും, ആരാണ് തുക വകയിരുത്തിയതെന്നും മണ്ഡലം തിരിച്ച് വ്യക്തമാക്കാമോ;

പാലക്കാട് ജില്ലയില്‍ വനപ്രദേശങ്ങളിലൂടെ കടന്നുപോകുന്ന റോഡുകളില്‍ പുനരുദ്ധാരണ പ്രവർത്തനങ്ങളൊന്നും നടത്താത്തവയു‍ണ്ടോ എന്ന് മണ്ഡലം തിരിച്ച് വ്യക്തമാക്കാമോ; പ്രസ്തുത റോഡുകള്‍ വനം വകുപ്പിന്റേതാണോ പഞ്ചായത്തിന്റെതാണോ എന്ന് വ്യക്തമാക്കാമോ?

;പെരിന്തൽമണ്ണ മണ്ഡലത്തിലെ കൊടികുത്തിമല ഇക്കോ ടൂറിസം കേന്ദ്രത്തിൽ സഞ്ചാരികളെ ആകർഷിക്കുന്നതിന് പ്രത്യേക മൺസൂൺ വിനോദ സഞ്ചാര പദ്ധതി നടപ്പാക്കാൻ നടപടി സ്വീകരിക്കുമോ;വ്യക്തമാക്കാമോ ;

സഞ്ചാരികളെ ആകർഷിക്കുന്നതിന് മഴയാത്ര, റെയിൻ ക്യാമ്പ് പോലെയുളള പ്രത്യേക പരിപാടികൾ സംഘടിപ്പിക്കുന്ന കാര്യം പരിഗണനയിലുണ്ടോ;വ്യക്തമാക്കാമോ;

കൊടികുത്തിമല ഇക്കോ ടൂറിസം കേന്ദ്രത്തിൽ ട്രക്കിംഗ് വാഹനങ്ങളുടെ പ്രവർത്തനം ആരംഭിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കാമോ?

കക്കയം ഇക്കോ ടൂറിസം കേന്ദ്രത്തിലെ തൂക്കുപാലം കാലപ്പഴക്കം കാരണം തുരുമ്പെടുത്ത് ഉപയോഗശൂന്യമായതായി ശ്രദ്ധയില്‍പ്പെട്ടിട്ടുണ്ടോ;

പ്രസ്തുത തൂക്കുപാലം പുതുക്കിപ്പണിയുന്നതിന് നടപടി സ്വീകരിക്കുമോ; വ്യക്തമാക്കുമോ;

കക്കയം ഇക്കോ ടൂറിസം കേന്ദ്രത്തില്‍ കൂടുതല്‍ വിനോദസഞ്ചാരികളെ ആകര്‍ഷിക്കുന്ന തരത്തില്‍ പുതിയ പദ്ധതികള്‍ നടപ്പിലാക്കാന്‍ നടപടി സ്വീകരിക്കുമോ?

കോന്നി ഇക്കോ ടൂറിസം പദ്ധതിയുടെ ഭാഗമായ കോന്നി എഫ്.ഡി.ഐ യിലെ ആനക്കൂടില്‍ എത്ര താല്‍ക്കാലിക ജീവനക്കാര്‍ ജോലി ചെയ്യുന്നുണ്ട്; ഇവരുടെ വിശദവിവരം നല്‍കാമോ?

വനം വകുപ്പില്‍ ഡിവിഷണല്‍ ഫോറസ്റ്റ് ഓഫീസര്‍മാരുടേയും അസി.കണ്‍സര്‍വേറ്റര്‍മാരുടേയും സ്ഥലംമാറ്റത്തിനായി ലക്ഷങ്ങള്‍ കോഴ ഇടപാട് നടന്നുവെന്ന ഇന്‍റലിജന്‍സ് വിവരത്തെ തുടര്‍ന്ന് സ്ഥലം മാറ്റത്തിനായി തയ്യാറാക്കിയ പട്ടിക വെട്ടിച്ചുരുക്കിയെന്ന പത്രവാര്‍ത്ത വകുപ്പിന്റെ ശ്രദ്ധയില്‍പ്പെട്ടിരുന്നോ; ഈ വാര്‍ത്തയുടെ സത്യാവസ്ഥ പരിശോധിച്ചിരുന്നോ; വിശദാംശം ലഭ്യമാക്കുമോ;

നിലവില്‍ 6.6.2024 -ല്‍ 254/2024 നമ്പരായി ഇറക്കിയ സ്ഥലം മാറ്റ ഉത്തരവില്‍ ഒരു ഡിവിഷനില്‍ 3 വര്‍ഷമോ അതിലധികമോ തുടര്‍ച്ചയായി ജോലിനോക്കിയവര്‍ എത്രയെന്ന് വ്യക്തമാക്കുമോ; ഈ സ്ഥലംമാറ്റപട്ടികയില്‍ എത്ര പേരാണ് 3 വര്‍ഷത്തില്‍ താഴെ ഒരു ഓഫീസില്‍ ജോലി നോക്കിയവര്‍ ഉള്ളതെന്നും അവരെ സ്ഥലംമാറ്റാനുണ്ടായ കാരണം എന്താണെന്നും വ്യക്തമാക്കാമോ;

മൂന്ന് വര്‍ഷത്തിലധികമായി ഒരു സ്ഥലത്ത് ജോലി നോക്കുന്നവര്‍ അതത് സ്ഥലത്ത് തുടരുകയും ചിലരെ മാത്രം ആവശ്യപ്പെട്ട സ്ഥലങ്ങളിലേക്ക് സ്ഥലം മാറ്റകയും ചെയ്ത നടപടി കോഴ ആരോപണം എന്ന വാര്‍ത്തയെ ബലപ്പെടുത്തുന്നതാകയാൽ പ്രസ്തുത നടപടി പരിശോധിക്കുമോ; വിശദാംശം നൽകുമോ; നിലവില്‍ വനം വകുപ്പില്‍ ഒരു തസ്തികയില്‍ മൂന്ന് വര്‍ഷത്തില്‍ അധികമായി ഒരു സ്ഥലത്ത് ജോലി നോക്കുന്നവരുടെ പേര് വിവരം ലഭ്യമാക്കാമോ;

ഈ സര്‍ക്കാര്‍ അധികാരത്തില്‍ വന്നശേഷം പ്രധാന തസ്തികകളിലേക്ക് നടത്തുന്ന നിയമനങ്ങളെല്ലാം സാമ്പത്തിക തിരിമറിക്ക് വിജിലന്‍സ് അന്വേഷണം നേരിടുന്നവരും വകുപ്പ് തല അന്വേഷണം നേരിടുന്നവരും ആണെന്നത് ശ്രദ്ധയിൽപ്പെട്ടിട്ടുണ്ടോ;

ഇത്തരം നിയമനങ്ങള്‍ നടത്തി വകുപ്പിനെ വിവാദത്തിലേക്ക് തള്ളി വിടുന്നത് അവസാനിപ്പിക്കുവാന്‍ നടപടി സ്വീകരിക്കുമോ; വിശദാംശം ലഭ്യമാക്കുമോ?

2016 ജൂൺ-1 ന് ശേഷം വയനാട് ജില്ലയില്‍ വനം വകുപ്പിന് കീഴില്‍ നിയമിതരായ ഉദ്യോഗസ്ഥരുടെ എണ്ണം തസ്തിക തിരിച്ച് ലഭ്യമാക്കാമോ;

ഇതില്‍ പി. എസ്. സി മുഖേന നിയമനം ലഭിച്ച പട്ടികവർഗ വിഭാഗത്തില്‍പ്പെട്ട ഉദ്യോഗസ്ഥരുടെ എണ്ണം തസ്തിക തിരിച്ച് ലഭ്യമാക്കാമോ;

ഇങ്ങനെ നിയമിതരായവരില്‍ വനിതകളുടെ എണ്ണം തസ്തിക തിരിച്ച് ലഭ്യമാക്കാമോ?

കാവുകളും കുളങ്ങളും സംരക്ഷിക്കുന്നതിനായി ഏതെല്ലാം പദ്ധതികളാണ് നിലവിലുളളതെന്ന് അറിയിക്കുമോ;

2020-21 വര്‍ഷം മുതല്‍ പ്രസ്തുത പദ്ധതി പ്രകാരം സംരക്ഷിക്കുന്നതിനായി പരിഗണനയിലുളളതും ആലപ്പുഴ ജില്ലയില്‍ ഉള്‍പ്പെട്ടതുമായ കാവുകളുടെയും കുളങ്ങളുടെയും വിശദ വിവരം ലഭ്യമാക്കുമോ?

അടവി കുട്ടവഞ്ചി സവാരി കേന്ദ്രത്തില്‍ വനഭൂമി കയ്യേറി കൊടിമരം സ്ഥാപിച്ചത് തടഞ്ഞ വനം വകുപ്പ് ഉദ്യോഗസ്ഥരെ ചില രാഷ്ട്രീയ നേതാക്കള്‍ ഭീഷണിപ്പെടുത്തിയ സംഭവത്തെ ഗൗരവത്തോടെ കാണുന്നുണ്ടോ;

എങ്കിൽ പ്രസ്തുത സംഭവത്തിൽ സ്വീകരിച്ച നടപടികൾ എന്തെല്ലാമാണെന്ന് വ്യക്തമാക്കുമോ;

പ്രസ്തുത സംഭവത്തിൽ പോലീസിന് പരാതി നൽകിയിട്ടുണ്ടോ; എങ്കിൽ വിശദാംശം നൽകുമോ?

കാര്‍ഷിക വിളകള്‍ നശിപ്പിയ്ക്കുന്ന പന്നികളുടെ അനിയന്ത്രിതമായ വംശ വര്‍ദ്ധനവ് ഉയര്‍ത്തുന്ന ഭീഷണി സംബന്ധിച്ച് പരിശോധിച്ചിട്ടുണ്ടോ;

ഇവയെ വെടിവെച്ച് കൊല്ലുന്നതിന് അനുമതിയുണ്ടോ; എങ്കില്‍ ഇക്കാര്യത്തില്‍ നിഷ്കര്‍ഷിച്ചിട്ടുള്ള മാനദണ്ഡങ്ങള്‍ വിശദമാക്കാമോ;

കൃഷി സംരക്ഷണത്തിനൊരുക്കുന്ന കുരുക്കില്‍പ്പെട്ട് പന്നികള്‍ കൊല്ലപ്പെടുന്ന സാഹചര്യത്തില്‍ കൃഷി സ്ഥലത്തിന്റെ ഉടമക്കെതിരെ കേസെടുക്കുന്നത് ശ്രദ്ധയില്‍പ്പെട്ടിട്ടുണ്ടോ; ഇക്കാര്യത്തില്‍ കര്‍ഷകര്‍ക്ക് സഹായകരമായ നിലപാട് സ്വീകരിക്കാന്‍ വ്യവസ്ഥകളില്‍ ഇളവ് നല്‍കാമോ?

വനം വകുപ്പിന് കീഴിലുള്ള നാച്ചുറല്‍ ഹിസ്റ്ററി മ്യൂസിയത്തില്‍ കഴിഞ്ഞ 3 വര്‍ഷക്കാലം സന്ദര്‍ശനം നടത്തിയവരുടെ എണ്ണം കുട്ടികള്‍, മുതിര്‍ന്നവര്‍, വര്‍ഷം എന്നിവ തരംതിരിച്ച് ലഭ്യമാക്കാമോ;

പ്രസ്തുത മ്യൂസിയം നവീകരിച്ച് കൂടുതല്‍ സന്ദര്‍ശകരെ ആകര്‍ഷിക്കുന്നതിനുള്ള പദ്ധതി സര്‍ക്കാര്‍ പരിഗണനയിലുണ്ടെങ്കില്‍ വിശദാംശം ലഭ്യമാക്കാമോ?

വന്യജീവികൾ കൃഷിയിടങ്ങളിൽ കടന്നുകയറി കാർഷിക വിളകൾ നശിപ്പിച്ച സംഭവങ്ങൾ വനം വകുപ്പിന്റെ ശ്രദ്ധയിൽപ്പെട്ടിട്ടുണ്ടോ; എങ്കിൽ വിശദവിവരം ലഭ്യമാക്കാമോ;

വന്യജീവികൾ മൂലം കൃഷിയിടങ്ങളില്‍ നാശനഷ്ടം ഉണ്ടാകാതിരിക്കാനുള്ള മുൻകരുതലുകൾക്ക് വേണ്ടി കർഷകർക്ക് എന്തെങ്കിലും സാമ്പത്തിക പിന്തുണ നൽകുന്നുണ്ടോ; എങ്കിൽ അതു സംബന്ധിച്ച വിവരം ലഭ്യമാക്കുമോ?

കോതമംഗലം മണ്ഡലത്തിലെ കുട്ടമ്പുഴ പ‍‍ഞ്ചായത്തില്‍ മണികണ്ഠന്‍ ചാല്‍ ചപ്പാത്തില്‍ പുതിയ പാലം നിര്‍മ്മാണവുമായി ബന്ധപ്പെട്ട പൊതുമരാമത്ത് വകുപ്പിന്റെ അപേക്ഷയിന്മേല്‍ വനംവകുപ്പ് സ്വീകരിച്ച നടപടികള്‍ വ്യക്തമാക്കുമോ;

പ്രസ്തുത പാലം നിര്‍മ്മാണവുമായി ബന്ധപ്പെട്ട് വനം വകുപ്പിന്റെ അനുമതി വേഗത്തില്‍ നല്‍കുന്നതിനാവശ്യമായ നടപടി സ്വീകരിക്കുമോ; വ്യക്തമാക്കുമോ?

പൂഞ്ചോല-ഓടക്കുന്ന്-കരടിപ്പാറ-കുറുക്കന്‍കുണ്ട് വരെയുള്ള ഏകദേശം മൂന്ന് കിലോ മീറ്റര്‍ ഭാഗം വനം വകുപ്പ് വിട്ടു നല്‍കുകയാണെങ്കില്‍ അട്ടപ്പാടിയിലേയ്ക്ക് ബദല്‍ റോഡ് നിര്‍മ്മിക്കാന്‍ കഴിയും എന്നത് ശ്രദ്ധയില്‍പ്പെട്ടിട്ടുണ്ടോ; വിട്ടുകൊടുക്കേണ്ടി വരുന്ന വനഭൂമിക്ക് പകരം വനത്തിനോട് ചേര്‍ന്ന ഭൂമി വാങ്ങി നല്‍കുന്നതിനും വനവത്കരണം നടത്തുന്നതിനും അഗളി പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി ഫണ്ട് അനുവദിക്കാന്‍ തീരുമാനിച്ചിരുന്നത് ശ്രദ്ധയില്‍പ്പെട്ടിട്ടുണ്ടോ;

മണ്ണാര്‍ക്കാട്- ചിറക്കപ്പടിയില്‍ നിന്നും കാഞ്ഞിരം- പൂഞ്ചോല-ഓടക്കുന്ന്-കരടിപ്പാറ-കുറുക്കന്‍കുണ്ട്- പാറവളവ് -മുണ്ടന്‍പാറ-കാരറ-ഗുളിക്കടവ്-അഗളി വരെ ബദല്‍ റോഡ് നിര്‍മ്മിക്കുന്നതിനായി ജനപ്രതിനിധികളും വനം വകുപ്പിലെയും മറ്റ് വകുപ്പുകളിലേയും ഉദ്യോഗസ്ഥര്‍ ചേര്‍ന്ന് നടത്തിയ സ്ഥല പരിശോധനയുടെ അടിസ്ഥാനത്തില്‍ തുടര്‍നടപടി സ്വീകരിച്ചിട്ടുണ്ടോ; എങ്കില്‍ വിശദവിവരം ലഭ്യമാക്കാമോ;

പ്രസ്തുത ബദല്‍ റോഡ് നിര്‍മ്മിക്കുന്നതിന് ആഭ്യന്തരം, റവന്യു, ആരോഗ്യം, പട്ടികവര്‍ഗ്ഗ വികസനം, പൊതുമരാമത്ത് എന്നീ വകുപ്പുകളിലെ ഉദ്യോഗസ്ഥര്‍ നല്‍കിയ ശിപാര്‍ശകള്‍ ശ്രദ്ധയില്‍പ്പെട്ടിട്ടുണ്ടോ;

പ്രസ്തുത ബദല്‍ റോഡ് നിര്‍മ്മിക്കുകയാണെങ്കില്‍ യാത്രാദൂരം കുറച്ച് അട്ടപ്പാടിയില്‍ എത്തിച്ചേരാനും പ്രകൃതിക്ഷോഭങ്ങളിലും മറ്റും അട്ടപ്പാടി മേഖല ഒറ്റപ്പെടുന്നത് ഒഴിവാക്കാനും കഴിയും എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത നിര്‍മ്മാണത്തിന് ആവശ്യമായ വനഭൂമി വിട്ടുനല്‍ക്കുന്നതിനും അതിലേയ്ക്കായി പൊതുമരാമത്ത് വകുപ്പിന്റെയും വനം വകുപ്പിന്റെയും നേതൃത്വത്തില്‍ ജോയിന്റ് സര്‍വെ നടത്തുന്നതിനും ആവശ്യമായ നടപടികള്‍ സ്വീകരിക്കുമോ?

ആലപ്പുഴ ജില്ലയില്‍ 2020-21 മുതല്‍ സാമൂഹ്യ വനവത്കരണ വിഭാഗം നടപ്പിലാക്കുന്ന പദ്ധതികളും ചെലവഴിച്ച തുകയും വിശദമാക്കാമോ?

2019-20, 2020-21 സാമ്പത്തിക വർഷങ്ങളിൽ തിരുവനന്തപുരം ഡിവിഷനിലെ പാലോട് റെയ്ഞ്ചിൽ വനാതിർത്തി വേർതിരിക്കൽ പദ്ധതിയുടെ ഭാഗമായി ജണ്ടകൾ നിർമ്മിച്ചതിലെ ക്രമക്കേടുകളുടെ അന്വേഷണം വനം വിജിലൻസ് പൂർത്തീകരിച്ചിട്ടുണ്ടോ; എങ്കിൽ എന്ന് പൂർത്തീകരിച്ച് റിപ്പോർട്ട്‌ സമർപ്പിച്ചു എന്ന് വ്യക്തമാക്കാമോ;

വനം വിജിലൻസ് വിഭാഗത്തിന്റെ റിപ്പോർട്ട്‌ ലഭിച്ചുവെങ്കിൽ റിപ്പോർട്ടിലെ കണ്ടെത്തലിന്മേൽ നാളിതുവരെ സ്വീകരിച്ച നടപടി വിശദീകരിക്കാമോ;

പ്രസ്തുത വിഷയവുമായി ബന്ധപ്പെട്ട് തുടർ നടപടി സ്വീകരിക്കാൻ കൊല്ലം ചീഫ് കൺസർവേറ്റർ 24.07.2023 തീയതിയിൽ സമർപ്പിച്ച ക്യു.സി5 - 1624/2022 വനം നമ്പർ കത്ത് വകുപ്പ് ആസ്ഥാനത്തില്‍ ലഭിച്ചിരുന്നോ; ലഭിച്ചുവെങ്കിൽ എന്ന് ലഭിച്ചുവെന്നും ടി കത്തിന്മേൽ സ്വീകരിച്ച തുടർ നടപടികളും വെളിപ്പെടുത്താമോ?

കോതമംഗലം മണ്ഡലത്തില്‍ വനം വകുപ്പിന്റെ അനുമതി ലഭിക്കാത്തതിനാല്‍ ആവോലിച്ചാല്‍ ലിഫ്റ്റ് ഇറിഗേഷന്‍ പദ്ധതി അനന്തമായി നീണ്ടുപോകുന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത കാലതാമസം ഒഴിവാക്കാന്‍ അടിയന്തരമായി അനുമതി ലഭ്യമാക്കുന്നതിനുളള നടപടി വകുപ്പ് സ്വീകരിക്കുമോ; വിശദമാക്കുമോ?

വാമനപുരം മണ്ഡലത്തില്‍ വനം വകുപ്പ് മുഖാന്തിരം നടപ്പാക്കിയിട്ടുളള ഇക്കോ ടൂറിസം പദ്ധതികള്‍ എവിടെയെല്ലാമാണ്;

എന്തെല്ലാം സംവിധാനങ്ങളാണ് അവിടെയെല്ലാം ഒരുക്കിയിട്ടുളളതെന്ന് വിശ ദമാക്കാമോ?

വനസേനയെ കാലോചിതമായി നവീകരിക്കുന്നതിന് എന്തെല്ലാം പദ്ധതികളാണ് ആവിഷ്കരിച്ച് നടപ്പിലാക്കി വരുന്നതെന്ന് വിശദമാക്കാമോ;

സംസ്ഥാനത്ത് എത്ര വനപരിശീലന കേന്ദ്രങ്ങളാണ് നിലവില്‍ ഉള്ളതെന്നും വനപരിശീലന കേന്ദ്രങ്ങളിലെ സൗകര്യങ്ങള്‍ നവീകരിക്കുന്നതിന് സ്വീകരിച്ചിട്ടുള്ള നടപടികള്‍ എന്തെന്നും വ്യക്തമാക്കാമോ?

2016 ന് ശേഷം നാളിതുവരെ പാലക്കാട് ജില്ലയില്‍ വന്യമൃഗ ആക്രമണത്തില്‍ മരണമടഞ്ഞവരുടെ എണ്ണവും പേരും വ്യക്തമാക്കാമോ;

പ്രസ്തുത ജില്ലയില്‍ ഇത്തരത്തില്‍ മരണമടഞ്ഞവരുടെ ആശ്രിതർക്ക് നഷ്ടപരിഹാരം ഇനിയും വിതരണം ചെയ്യാനുണ്ടോ; വ്യക്തമാക്കാമോ;

2016-ന് ശേഷം ഇത്തരത്തില്‍ വിതരണം ചെയ്ത ആകെ നഷ്ടപരിഹാര തുക എത്രയാണെന്ന് വ്യക്തമാക്കാമോ?

വനാതിര്‍ത്തി പങ്കിടുന്ന കൂത്തുപറമ്പ് മണ്ഡലത്തിന്റെ പരിധിയില്‍ പുലിയുടെയും കാട്ടാനയുടെയും സാന്നിധ്യം കണ്ടെത്തിയിട്ടുണ്ടോ; വ്യക്തമാക്കുമോ?

ഇക്കോ സെന്‍സിറ്റീവ് സോണുകളായി പ്രഖ്യാപിച്ച സ്ഥലങ്ങളില്‍ നിന്നും വാസയോഗ്യമായ മേഖലയെ ഒഴിവാക്കുന്നതിനായി സര്‍ക്കാര്‍ നടത്തിയ പ്രവര്‍ത്തനങ്ങള്‍ വിശദമാക്കാമോ;

ക്വാറി ഖനനത്തിനും വന്‍കിട നിര്‍മ്മാണങ്ങള്‍ക്കും നിയന്ത്രണങ്ങള്‍ തുടരുമെന്ന് സുപ്രീം കോടതി വിധിയില്‍ വ്യക്തമാക്കിയിട്ടുണ്ടോയെന്നറിയിക്കാമോ?

നാട്ടാന പരിപാലന നിയമത്തിലെ പ്രായോഗിക തലത്തിലുള്ള പോരായ്മകളും അപാകതകളും പ്രതിസന്ധി സൃഷ്ടിക്കുന്നത് ശ്രദ്ധയിൽപ്പെട്ടിട്ടുണ്ടോ; പ്രസ്തുത നിയമം കാലോചിതമായി പരിഷ്കരിക്കുന്നതിന് നടപടി സ്വീകരിക്കുമോ; വിശദാംശം നൽകുമോ?

വന്യ മൃഗവേട്ട തടയുന്നതിന് എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കാമോ;

സംരക്ഷിത ജീവജാലങ്ങളുടെയും, സസ്യജാലങ്ങളുടെയും അനധികൃതമായ വില്‍ക്കലും, വാങ്ങലും രാജ്യാന്തര കടത്തും തടയുന്നതിന് സ്വീകരിച്ച നടപടികള്‍ വിശദമാക്കാമോ;

വന സംരക്ഷണ പ്രവര്‍ത്തനങ്ങള്‍ കാര്യക്ഷമമാക്കുന്നതിനും, വനവല്‍ക്കരണം വര്‍ദ്ധിപ്പിക്കുന്നതിനും, വന നശീകരണം തടയുന്നതിനും എന്തെല്ലാം നടപടികള്‍ സ്വീകരിച്ചിട്ടുണ്ടെന്നു വ്യക്തമാക്കുമോ?

കോട്ടൂർ ആന പുനരധിവാസ കേന്ദ്രത്തിന്റെ നവീകരണ പ്രവർത്തനങ്ങളുടെ തത്സ്ഥിതി വ്യക്തമാക്കുമോ;

പ്രസ്തുത പ്രവൃത്തിയുടെ ഓരോ ഘട്ടങ്ങൾക്കും കിഫ്ബി അനുവദിച്ച ധനകാര്യാനുമതി സംബന്ധിച്ച നിർവ്വഹണ പുരോഗതി അറിയിക്കുമോ?

വന്യജീവി ആക്രമണത്തില്‍ ജീവഹാനി സംഭവിക്കുന്നവര്‍ക്കും ഗുരുതര പരിക്ക് പറ്റി ചികിത്സയിലായവര്‍ക്കും എത്ര രൂപയാണ് ഇപ്പോള്‍ നഷ്ട പരിഹാരമായി അനുവദിക്കുന്നതെന്നും ഏതു കാലയളവു വരെയാണിതു നൽകിയിട്ടുള്ളതെന്നും വ്യക്തമാക്കുമോ?

മലപ്പുറം ജില്ലയിലെ നോര്‍ത്ത്, സൗത്ത് ഫോറസ്റ്റ് ഡിവിഷനുകളിലെ വനമേഖലകളില്‍ എത്ര ദ്രുതകര്‍മ്മസേനകള്‍ (ആര്‍.ആര്‍.ടി.) പ്രവര്‍ത്തിക്കുന്നുണ്ടെന്നും ഓരോ ടീമിലുമുള്ള ഉദ്യോഗസ്ഥരുടെ തസ്തികയും എണ്ണവും അറിയിക്കാമോ;

മലപ്പുറം ജില്ലയിലെ വനമേഖലകളില്‍ പ്രവര്‍ത്തിക്കുന്ന ദ്രുതകര്‍മ്മസേനയില്‍ സ്ഥിരം ജീവനക്കാര്‍ക്ക് പുറമേ താല്ക്കാലിക ജീവനക്കാരും ജോലി ചെയ്യുന്നുണ്ടോ; എങ്കില്‍ അവരുടെ പേരും വിലാസവും ഇവരെ നിയമിച്ച രീതിയും നല്‍കുന്ന വേതനവും അടക്കമുള്ള വിവരങ്ങള്‍ നൽകാമോ;

വന്യമൃഗ സംഘർഷങ്ങൾ നേരിടുന്നതിന് മലപ്പുറം ജില്ലയിലെ ദ്രുതകര്‍മ്മസേനകള്‍ക്ക് എത്ര വാഹനങ്ങളും എന്തെല്ലാം ഉപകരണങ്ങളും അനുവദിച്ചിട്ടുണ്ടെന്ന് ആര്‍.ആര്‍.ടി. തിരിച്ച് വിവരം ലഭ്യമാക്കാമോ;

ദ്രുതകര്‍മ്മസേന നിലവില്‍ വന്നതിനു ശേഷം മലപ്പുറം ജില്ലയില്‍ വന്യമൃഗ ആക്രമണങ്ങളില്‍ എത്ര പേര്‍ കൊല്ലപ്പെട്ടുവെന്നും വന്യമൃഗങ്ങൾ വരുത്തിയ കൃഷിനാശത്തിന് എത്ര പേര്‍ക്ക് സഹായധനം വിതരണം ചെയ്തുവെന്നും ഫോറസ്റ്റ് സ്റ്റേഷനുകള്‍ തിരിച്ച് വിവരം ലഭ്യമാക്കാമോ;

മലപ്പുറം ജില്ലയില്‍ പുതിയ ദ്രുതകര്‍മ്മസേന ടീം രൂപീകരിക്കുന്നതിന് ഉദ്ദേശിക്കുന്നുണ്ടോ; വിശദമാക്കാമോ?

കൊട്ടിയൂർ, ആറളം വന്യജീവി സങ്കേതങ്ങളുടെ അതിര്‍ത്തിയില്‍ താമസിക്കുന്ന ജനങ്ങൾക്ക് വന്യജീവികളിൽ നിന്നുണ്ടാകുന്ന തുടർച്ചയായ ആക്രമണങ്ങൾക്കും ഭീഷണികൾക്കും നാശനഷ്ടങ്ങൾക്കും പരിഹാരം കാണുവാന്‍ എന്ത് നടപടികളാണ് സ്വീകരിച്ചിട്ടുള്ളത്?

ആനയുടെ ആക്രമണത്തില്‍ കൊല്ലപ്പെട്ട പയ്യന്നൂര്‍ മണ്ഡലത്തിലെ ചെറുപുഴ ആറാട്ടുകടവില്‍ പത്മനാഭന്‍ പി. പി. യുടെ ആശ്രിതര്‍ക്ക് ധനസഹായം നല്‍കിയിട്ടുണ്ടോയെന്ന് അറിയിക്കാമോ;

ഇതുമായി ബന്ധപ്പെട്ട ഫയല്‍ നിലവില്‍ ഏത് ഓഫീസിലാണുള്ളതെന്നും ഇക്കാര്യത്തിൽ തീരുമാനമാകാന്‍ കാലതാമസം നേരിടുന്നത് എന്തുകൊണ്ടാണെന്നും വിശദമാക്കാമോ?

പൂഞ്ഞാർ മണ്ഡലത്തില്‍ വന്യമൃഗ ശല്യത്തിന് പരിഹാരം കാണുന്നതിനായി വനമേഖലയുമായി അതിർത്തി പങ്കിടുന്ന ജനവാസകേന്ദ്രങ്ങളിൽ സമ്പൂർണ്ണ വന്യമൃഗ പ്രതിരോധ സംവിധാനങ്ങൾ ഏർപ്പെടുത്തുന്നതിനായി വകുപ്പ് സ്വീകരിച്ചുവരുന്ന നടപടികളുടെ വിശദാംശം വ്യക്തമാക്കുമോ?

കാസർഗോഡ് ജില്ലയില്‍ വന്യജീവി ആക്രമണത്തില്‍ കൃഷിനാശം സംഭവിച്ചവര്‍ക്ക് ഈ സര്‍ക്കാര്‍ എത്ര രൂപ നഷ്ടപരിഹാരം നല്‍കിയിട്ടുണ്ടെന്നും ഇനി എത്ര രൂപ നല്‍കാന്‍ ബാക്കിയുണ്ടെന്നും വ്യക്തമാക്കുമോ?

തളിപ്പറമ്പ് മണ്ഡലത്തിലെ പരിയാരം ഗ്രാമപഞ്ചായത്തില്‍ കുരങ്ങ് ശല്യം രൂക്ഷമായത് ശ്രദ്ധയില്‍പ്പെട്ടിട്ടുണ്ടോ;

ഈ പ്രദേശത്ത് കുരങ്ങുകളെ പിടിക്കാനുള്ള കൂട് സ്ഥാപിക്കാനുള്ള നടപടി പൂര്‍ത്തിയാക്കാതിരുന്നത് ശ്രദ്ധയില്‍പ്പെട്ടിട്ടുണ്ടോ;എങ്കിൽ വനം വകുപ്പ് ഉദ്യോഗസ്ഥരുടെ ഭാഗത്തുനിന്നും ഉണ്ടായിട്ടുള്ള അനാസ്ഥ പരിഹരിക്കാന്‍ നടപടി സ്വീകരിക്കാമോ?

വന്യജീവി സംഘർഷം നേരിടുന്നതിനായി അയൽ സംസ്ഥാനങ്ങളുമായി കരാർ ഉണ്ടാക്കിയിട്ടുണ്ടോ;

എങ്കില്‍ പ്രസ്തുത കരാർ പ്രകാരം ഇതുവരെ സ്വീകരിച്ച നടപടികൾ എന്തെല്ലാമാണെന്ന് വിശദമാക്കുമോ;

കരാറിൽ ഏർപ്പെട്ടശേഷം വന്യജീവി സംഘർഷം എത്രത്തോളം കുറയ്ക്കാൻ കഴിഞ്ഞുവെന്ന് വിലയിരുത്തിയിട്ടുണ്ടോ; വിശദമാക്കുമോ?

വന്യമൃഗ ആക്രമണം മൂലം ആശുപത്രിയിൽ ചികിത്സ തേടുന്നവരുടെ ചികിത്സാ ചെലവ് പൂർണ്ണമായും സർക്കാർ വഹിക്കുവാൻ നടപടി സ്വീകരിച്ചിട്ടുണ്ടോ; വിശദമാക്കാമോ;

പീരുമേട് മണ്ഡലത്തിൽ കാട്ടുപോത്തിന്റെ ആക്രമണം മൂലം ആശുപത്രിയിലായ ശ്രീ. രാജീവിന്റെ ചികിത്സക്കായി ചെലവായ മുഴുവൻ തുകയും നൽകുവാൻ നടപടി സ്വീകരിച്ചിട്ടുണ്ടോ; വിശദമാക്കാമോ?

വന്യജീവികൾ ജനവാസ മേഖലയിൽ ഇറങ്ങുന്നത് കണ്ടെത്താൻ എ.ഐ. ക്യാമറ സ്ഥാപിക്കണമെന്ന നിർദ്ദേശം ലഭ്യമായിട്ടുണ്ടോ;

എങ്കിൽ എവിടെയെല്ലാം എ.ഐ. ക്യാമറകള്‍ സ്ഥാപിച്ചിട്ടുണ്ട്; വിശദമാക്കുമോ?

മലപ്പുറം ജില്ലയിൽ ചാലിയാർ പുഴയുടെ സമീപത്തുള്ള വാഴക്കാട് ഗ്രാമ പഞ്ചായത്തിന്റെ പ്രദേശങ്ങളിൽ നീർനായ്ക്കളുടെ കടിയേറ്റ് ഒട്ടേറെ പേർക്ക് പരിക്കേൽക്കുന്ന സംഭവം ശ്രദ്ധയിൽപ്പെട്ടിട്ടുണ്ടോ;

എങ്കിൽ ഇത് ഒഴിവാക്കുന്നതിന് എന്തെല്ലാം നടപടികൾ സ്വീകരിക്കാൻ കഴിയുമെന്ന് വ്യക്തമാക്കുമോ;

വനം വകുപ്പ് അധികൃതർ പ്രസ്തുത സ്ഥലങ്ങൾ സന്ദർശിച്ച് ഇവയെ തുരത്താൻ ശാസ്ത്രീയമായ പരിഹാരമാർഗ്ഗങ്ങൾ നിർദ്ദേശിക്കുന്നതിന് നടപടി സ്വീകരിക്കുമോ?

ഈ സര്‍ക്കാര്‍ വന്നതിനു ശേഷം തിരുവമ്പാടി മണ്ഡലത്തില്‍ വന്യമൃഗങ്ങളുടെ ആക്രമണങ്ങളില്‍ നിന്നും ജനങ്ങള്‍ക്കും സ്വത്തുവകകള്‍ക്കും സംരക്ഷണം നല്‍കുന്നതിന് എന്തൊക്കെ പദ്ധതികളാണ് നടപ്പിലാക്കിയതെന്ന് വിശദമാക്കുമോ;

വരും വര്‍ഷങ്ങളില്‍ ഈ മണ്ഡലത്തിലെ പ്രസ്തുത പ്രശ്നങ്ങള്‍ പരിഹരിക്കുന്നതിനായി ആവിഷ്കരിച്ച പദ്ധതികളുടെ വിശദാംശം നല്കാമോ?

കാട്ടുമൃഗങ്ങൾ കൃഷിയിടങ്ങൾ തകർക്കുന്നതും മനുഷ്യന്റെയും വളർത്തുമൃഗങ്ങളുടെയും ജീവന് ഭീഷണിയാകുന്നതും വർദ്ധിച്ചുവരുന്ന സാഹചര്യത്തിൽ വനമേഖലയോടു ചേർന്ന് താമസിക്കുന്ന ജനങ്ങൾക്ക് സന്നദ്ധ പുനരധിവാസ പദ്ധതി രൂപീകരിച്ചിട്ടുണ്ടോ; വിശദമാക്കാമോ;

എങ്കിൽ ഈ സർക്കാർ വന്നശേഷം ഈ പദ്ധതി പ്രകാരം ആനുകൂല്യം ലഭിച്ച് എത്രപേർ വനമേഖലയിൽ നിന്നും ഒഴിഞ്ഞു പോയിട്ടുണ്ട്; കണക്കുകൾ ലഭ്യമാക്കുമോ;

വന്യജീവി അക്രമങ്ങൾ തടയുന്നതിന് ജൈവവേലി ഒരു പരിഹാരമാണെന്ന് കണ്ടെത്തിയിട്ടുണ്ടോ; എങ്കിൽ സംസ്ഥാനത്ത് എവിടെയെല്ലാമാണ് ജൈവവേലി നിർമ്മിച്ചിട്ടുള്ളതെന്ന് അറിയിക്കുമോ?

ഈ സർക്കാർ അധികാരമേറ്റശേഷം കാസർഗോഡ് ജില്ലയിൽ വന്യജീവി ആക്രമണം മൂലം ഉണ്ടായ കൃഷി നാശത്തിന്റെയും ജീവൻ നഷ്ടപ്പെട്ടവരുടെയും വിശദാംശം നൽകാമോ;

പ്രസ്തുത ജില്ലയിൽ വന്യജീവി ആക്രമണം മൂലം ഉണ്ടായ കൃഷിനാശത്തിന് നഷ്ടപരിഹാരം നൽകാൻ സ്വീകരിച്ച നടപടികൾ വിശദമാക്കാമോ?

സംസ്ഥാനത്തെ വനയോര മേഖലകളില്‍ കാട്ടാന ആക്രമണം രൂക്ഷമാകുന്നത് ഗൗരവപൂർവ്വം കാണുന്നുണ്ടോ;

എങ്കിൽ കാട്ടാന ആക്രണങ്ങൾ തടയാൻ കർമ്മപദ്ധതി പ്രഖ്യാപിക്കുമോ;

ആധുനിക സാങ്കേതികവിദ്യയുടെ സാധ്യതകൾ ഉപയോഗപ്പെടുത്തി കാട്ടാന നാട്ടിലേക്ക് ഇറങ്ങുന്ന വിവരം ജനങ്ങളെ മുൻകൂട്ടി അറിയിക്കുവാൻ നടപടി സ്വീകരിക്കുമോ?

സംസ്ഥാനത്ത് വന്യമൃഗ ആക്രമണങ്ങൾ വർധിച്ചുവരുന്ന സാഹചര്യത്തിൽ വന്യമൃഗങ്ങളുടെ സഞ്ചാരം സംബന്ധിച്ച് ജനങ്ങൾക്ക് നേരത്തെ മുന്നറിയിപ്പ് നൽകുന്നതിന് സംവിധാനം ഏർപ്പെടുത്തുമോ; വിശദാംശം നൽകുമോ;

മൂന്നാർ മേഖലയിലെ വന്യമൃഗ ആക്രമണങ്ങളെ സംബന്ധിച്ച് പഠിക്കുവാൻ ഹൈക്കോടതി നിയോഗിച്ച സമിതിയുടെ കണ്ടെത്തലുകളുടെ അടിസ്ഥാനത്തിൽ തുടർനടപടികൾ സ്വീകരിക്കാൻ സർക്കാരിന് നിർദ്ദേശം ലഭിച്ചിട്ടുണ്ടോ; ഉണ്ടെങ്കിൽ സമിതിയുടെ പ്രധാന കണ്ടെത്തലുകൾ എന്തൊക്കെയായിരുന്നുവെന്നും എന്തൊക്കെ തുടർനടപടികൾ ഇതിൽ സ്വീകരിച്ചിട്ടുണ്ടെന്നും വ്യക്തമാക്കുമോ?