സംസ്ഥാനത്ത് മെഡിക്കൽ കോളേജ്, ജനറൽ ആശുപത്രി എന്നിവ ഉൾപ്പെടെയുള്ള ആശുപത്രികളിൽ രൂക്ഷമായ മരുന്നുക്ഷാമം അനുഭവപ്പെടുന്നതായ ആക്ഷേപം ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

എങ്കില്‍ പ്രസ്തുത പ്രതിസന്ധി പരിഹരിക്കുന്നതിന് സ്വീകരിച്ച നടപടികൾ എന്തെല്ലാമെന്ന് വ്യക്തമാക്കാമോ;

മരുന്നുക്ഷാമവുമായി ബന്ധപ്പെട്ട് സർക്കാർ ആശുപത്രികളിൽ കണക്കെടുപ്പ് നടത്തിയിട്ടുണ്ടോ; വിശദമാക്കാമോ;

കാരുണ്യ പദ്ധതി വഴി ആശുപത്രികളില്‍ രോഗികള്‍ക്ക് മരുന്ന് സൗജന്യമായി നല്‍കുന്നുണ്ടോയെന്ന് അറിയിക്കാമോ;

കിടപ്പുരോഗികൾ ഉൾപ്പെടെയുള്ളവർക്ക് സൗജന്യമായി മരുന്ന് ലഭ്യമാക്കുന്നതിന് നടപടികൾ സ്വീകരിക്കുമോ?

അഭിപ്രായ ഭിന്നതകളെ ജനാധിപത്യപരമായി ഉൾക്കൊണ്ട് പൊതുതാല്പര്യത്തിനായി ഒരേ മനസ്സോടെ മുന്നേറുന്നതിനും കേരള വികസന മാതൃകയുടെ നേട്ടങ്ങളില്‍ ഊന്നി നിന്നുകൊണ്ടും പുതിയ കാലത്തിന്റെ വെല്ലുവിളികളെ ഏറ്റെടുക്കുന്നതിനുള്ള വിളംബരമായി കേരളീയം 2023-നെ മാറ്റിത്തീര്‍ക്കുന്നതിന് കഴിഞ്ഞിട്ടുണ്ടോ; എങ്കില്‍ വിശദമാക്കാമോ;

കേരളത്തിന്റെ സാമൂഹ്യ, സാംസ്കാരിക, വികസന നേട്ടങ്ങളെ ഇകഴ്‍ത്തിക്കാണിക്കാനും സാമുദായിക സൗഹൃദം തകര്‍ക്കുന്നതിനുമുള്ളതായി പറയപ്പെടുന്ന ബോധപൂര്‍വ്വമായ ശ്രമങ്ങള്‍ക്ക് തടയിടാനും യഥാര്‍ത്ഥ കേരളത്തെ ലോകത്തിന് മുന്നില്‍ അവതരിപ്പിക്കാനും കേരളീയം 2023-ന് കഴിഞ്ഞിട്ടുണ്ടോ; എങ്കില്‍ കേരളീയത്തിന്റെ നേട്ടങ്ങൾ പ്രത്യേകമായി പരിശോധിച്ചിട്ടുണ്ടോയെന്ന് വിശദമാക്കാമോ;

ഒന്നാം ഘട്ടത്തിലെ അഭൂതപൂര്‍വ്വമായ ജനപങ്കാളിത്തവും അനുകൂലമായ പൊതുജനാഭിപ്രായവും പരിഗണിച്ച് കേരളീയം ഒരു തുടര്‍പ്രക്രിയയായി മാറ്റുന്നതിന് ഉദ്ദേശിക്കുന്നുണ്ടോ; എങ്കില്‍ വിശദമാക്കാമോ?

സംസ്ഥാനത്ത് തദ്ദേശസ്വയംഭരണ സ്ഥാപനങ്ങളിലെ സേവനങ്ങൾ ഓൺലൈനിൽ ലഭ്യമാകുന്ന കെ-സ്മാർട്ട് പദ്ധതിയുടെ വിശദാംശം ലഭ്യമാക്കാമോ;

പ്രസ്തുത പദ്ധതിയുടെ ആദ്യഘട്ടത്തിൽ ഏതെല്ലാം സേവനങ്ങളാണ് ലഭ്യമാക്കാൻ ലക്ഷ്യമിടുന്നതെന്ന് വ്യക്തമാക്കാമോ;

വിവിധ സർട്ടിഫിക്കറ്റുകള്‍ക്കായി ഓൺലൈനിൽ അപേക്ഷ സമർപ്പിക്കുന്നവർക്ക് ഓൺലൈനായി രസീത് ലഭിക്കുന്നതിനും അപേക്ഷയുടെ തൽസ്ഥിതി അറിയുന്നതിനും എന്തെല്ലാം സംവിധാനങ്ങളാണ് ഒരുക്കിയിരിക്കുന്നത്; വിശദമാക്കാമോ;

കെ-സ്മാർട്ട് പദ്ധതിയിലെ എന്റെ കെട്ടിടങ്ങൾ എന്ന മെനുവിൽ എന്തെല്ലാം സേവനങ്ങളാണ് ഉള്‍പ്പെടുത്തിയിട്ടുള്ളതെന്ന് അറിയിക്കാമോ;

പ്രസ്തുത പദ്ധതിയുടെ സ്വതന്ത്രമായ നടത്തിപ്പ് ജനങ്ങളെ പരിചയപ്പെടുത്തുന്നതിനും പരിശീലിപ്പിക്കുന്നതിനുമായി എന്തെങ്കിലും സംവിധാനം ഏർപ്പെടുത്തിയിട്ടുണ്ടോ; എങ്കില്‍ വിശദമാക്കാമോ?

സംസ്ഥാനത്ത് സാധാരണക്കാരെ കടക്കെണിയിലാക്കി ആത്മഹത്യയിലേക്ക് തള്ളിവിടുന്ന തരത്തിലുള്ള ഓൺലൈൻ ലോൺ ആപ്പുകളുടെ പ്രവർത്തനം നിയന്ത്രിക്കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

അനധികൃതമായി പ്രവര്‍ത്തിക്കുന്ന ഇത്തരം ഓണ്‍ലൈന്‍ ലോണ്‍ ആപ്പുകളെ നിയന്ത്രിക്കുന്നതിന് പര്യാപ്തമായ കേന്ദ്രനിയമം നിലവിലുണ്ടോ; വിശദമാക്കാമോ;

അംഗീകാരമില്ലാത്ത ലോൺ ആപ്പുകൾ ഉപയോഗിച്ച് വായ്‌പ എടുത്തതിലൂടെ തട്ടിപ്പിന് ഇരയായവർക്ക് പൊലീസിൽ പരാതി നൽകാൻ പ്രത്യേക സംവിധാനം നിലവിലുണ്ടോ; വിശദമാക്കാമോ;

സംസ്ഥാനത്ത് ഇപ്രകാരമുള്ള സൈബര്‍ സാമ്പത്തിക കുറ്റകൃത്യങ്ങള്‍ തടയുന്നതിനായി സ്വീകരിച്ചിട്ടുള്ള പ്രധാന നടപടികള്‍‍ എന്തെല്ലാമാണെന്ന് വ്യക്തമാക്കാമോ?

സംസ്ഥാനത്ത് എല്ലാ ഭവനരഹിതര്‍ക്കും അടച്ചുറപ്പുള്ള ഭവനം എന്ന ആശയം സാക്ഷാത്കരിക്കുന്നതിനായി ലൈഫ് മിഷന്‍ നടപ്പാക്കുന്ന പദ്ധതികളുടെ വിശദാംശം ലഭ്യമാക്കുമോ;

ലൈഫ് ഭവന പദ്ധതിയില്‍ ഇതുവരെ ചെലവഴിച്ചിട്ടുള്ള ആകെ തുകയും അതിലെ കേന്ദ്ര, സംസ്ഥാന വിഹിതവും എത്ര വീതമാണെന്ന് അറിയിക്കാമോ;

ലൈഫ് മിഷന്‍ വീടുകള്‍ക്ക് മുന്നില്‍ ലോഗോയും പ്രധാനമന്ത്രിയുടെ ഫോട്ടോയും പതിപ്പിക്കണമെന്നും ആയത് ചെയ്തില്ലെങ്കില്‍ പദ്ധതിയുമായി കേന്ദ്രസര്‍ക്കാര്‍ സഹകരിക്കില്ലെന്നും സംസ്ഥാന സര്‍ക്കാരിനെ അറിയിച്ചിട്ടുണ്ടോ; എങ്കില്‍ ഇത് സംബന്ധിച്ച് സംസ്ഥാന സര്‍ക്കാരിന്റെ നിലപാട് അറിയിക്കാമോ;

കേന്ദ്രസർക്കാർ സഹകരിക്കാതിരുന്നാലും ലൈഫ് ഭവന പദ്ധതിയുമായി മുന്നോട്ടു പോകുന്നതിന് സംസ്ഥാന സര്‍ക്കാര്‍ തീരുമാനിച്ചിട്ടുണ്ടോയെന്ന് വ്യക്തമാക്കാമോ?

കളമശ്ശേരി കണ്‍വണ്‍ഷന്‍ സെന്ററിലുണ്ടായ ബോംബ് സ്പോടനത്തെ തുടര്‍ന്ന് മതവിദ്വേഷം വളര്‍ത്തുന്ന രീതിയിലും സാമുദായിക സൗഹാര്‍ദ്ദം തകര്‍ക്കുന്ന തരത്തിലും സാമൂഹ്യ മാധ്യമങ്ങള്‍ വഴി ചിലര്‍ ബോധപൂര്‍വ്വം നടത്തിയതായി പറയപ്പെടുന്ന വ്യാജ പ്രചാരണങ്ങള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവമായി കാണുന്നുണ്ടോ; വ്യക്തമാക്കുമോ;

ഇത് സംബന്ധിച്ച് വ്യാജ സന്ദേശങ്ങള്‍ നിര്‍മ്മിച്ചവരെയും പ്രചരിപ്പിച്ചവരേയും കണ്ടെത്തുന്നതിന് കര്‍ശന നിര്‍ദേശം നല്‍കിയിട്ടുണ്ടോ; വിശദാംശം ലഭ്യമാക്കുമോ;

സാമൂഹ്യ മാധ്യമങ്ങള്‍ വഴി വ്യാജ പ്രോഫൈലുകള്‍ നിര്‍മ്മിച്ചവരെ കണ്ടെത്തുന്നതിന് സാമൂഹ്യ മാധ്യമ സ്ഥാപനങ്ങളെ സമീപിച്ചിട്ടുണ്ടോ; വിശദമാക്കുമോ;

ഇത്തരത്തില്‍ തെറ്റായതും അതീവഗുരുതരവുമായ പ്രചാരണം നടത്തുന്നവരെ നിരീക്ഷിക്കാനും തുടര്‍നടപടികള്‍ സ്വീകരിക്കാനും സൈബര്‍ സെല്‍ വിഭാഗത്തെ ചുമതലപ്പെടുത്തിയിട്ടുണ്ടോ; വിശദമാക്കുമോ;

കളമശ്ശേരി സ്ഫോടനകേസുമായി ബന്ധപ്പെട്ട് മാത്രം വ്യാജപ്രചാരണം നടത്തിയവർക്കെതിരെ എത്ര കേസുകൾ രജിസ്റ്റർ ചെയ്തിട്ടുണ്ടെന്നും അതിലെ പ്രതികൾ ആരെല്ലാമെന്നും വെളിപ്പെടുത്താമോ?

ആഗോളതലത്തിൽ ആരോഗ്യമേഖല ഇന്ന് നേരിടുന്ന പ്രധാന വെല്ലുവിളികളിൽ ഒന്നായി ലോകാരോഗ്യ സംഘടന ആന്റി മൈക്രോബിയല്‍ പ്രതിരോധത്തെ കണക്കാക്കുന്നു എന്നത് ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

2050 ആകുമ്പോഴേക്കും ലോകമെമ്പാടും ഒരു കോടി ആളുകൾ ആന്റിബയോട്ടിക്ക് പ്രതിരോധം മൂലം മരിക്കാൻ സാധ്യതയുണ്ടെന്ന പഠനങ്ങൾ പരിശോധിച്ചിട്ടുണ്ടോ; ഡോക്ടറുടെ കുറിപ്പടി ഇല്ലാതെ കേരളത്തിൽ ആന്റിബയോട്ടിക്കുകൾ വിതരണം ചെയ്യപ്പെടുന്നില്ല എന്ന് ഉറപ്പുവരുത്താനുള്ള നടപടികൾ സ്വീകരിച്ചിട്ടുണ്ടോ; വിശദമാക്കാമോ;

എല്ലാ ബ്ലോക്കുകളിലും ആന്റി മൈക്രോബിയല്‍ റസിസ്റ്റന്‍സ് കമ്മിറ്റി സ്ഥാപിക്കുന്ന ആദ്യ സംസ്ഥാനമായി കേരളം മാറിയിട്ടുണ്ടോ; വിശദമാക്കാമോ;

സംസ്ഥാനത്ത് ആന്റിബയോട്ടിക് സ്മാർട്ട് ആശുപത്രികൾ യാഥാർത്ഥ്യമാക്കുവാന്‍ നടപടി സ്വീകരിച്ചിട്ടുണ്ടോ; വിശദമാക്കാമോ?

സംസ്ഥാനത്ത് പോലീസിന് ലാത്തി ഉപയോഗിക്കുന്നതിനുള്ള ചട്ടങ്ങള്‍, മാന്വല്‍, മാനദണ്ഡങ്ങള്‍ എന്നിവ വിശദമാക്കാമോ;

സമരം ചെയ്യുന്നവരുടെ തലയില്‍ ലാത്തി ഉപയോഗിച്ച് അടിക്കാന്‍ നിയമപരമായി വ്യവസ്ഥ ചെയ്യുന്നുണ്ടോ;

ആലപ്പുഴയില്‍ നടന്ന ഒരു സമരത്തിനിടെ പോലീസ് പ്രമുഖ പ്രതിപക്ഷ യുവജന സംഘടനയുടെ ജില്ലാ പ്രസിഡണ്ടിന്റെയും വനിതാ പ്രവര്‍ത്തകരുടെയും തലയ്ക്കടിച്ച് ഗുരുതരമായി പരിക്കേല്‍പ്പിച്ചതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവത്തോടെ കാണുന്നുണ്ടോ; വിശദമാക്കാമോ?

സംസ്ഥാനത്ത് 2023-24-ലെ ഒന്നാംവിള സീസണിൽ ആകെ രജിസ്റ്റർ ചെയ്ത നെല്‍ കർഷകരുടെ എണ്ണം, കർഷകരിൽ നിന്ന് സംഭരിച്ച നെല്ലിന്റെ അളവ്, കർഷകർക്ക് വിതരണം ചെയ്ത തുക എന്നിവ വിശകലനത്തിന് വിധേയമാക്കിയിട്ടുണ്ടോ; എങ്കില്‍ വിശദമാക്കാമോ;

സംസ്ഥാനത്ത് നെല്‍ കര്‍ഷകരെ സഹായിക്കുന്നതിന് സർക്കാർ എന്തെല്ലാം നടപടികളാണ് സ്വീകരിച്ചിട്ടുള്ളത്; കേന്ദ്രം നൽകുന്ന താങ്ങുവിലയ്ക്ക് പുറമെ സംഭരണ വിലയായും മറ്റു വിധത്തിലും എന്തെല്ലാം സഹായങ്ങളാണ് സംസ്ഥാന സർക്കാർ നെല്‍ കര്‍ഷകര്‍ക്ക് നൽകിവരുന്നത്; വിശദമാക്കാമോ;

നെല്ല് സംഭരണ വില ഇനത്തിൽ കേന്ദ്രത്തിൽ നിന്ന് ലഭിക്കാനുള്ള തുകയുടെ ഏതെങ്കിലും ക്ലെയിം സംസ്ഥാന സർക്കാർ സമർപ്പിക്കാൻ ബാക്കിയുണ്ടോ; ഇപ്രകാരം സമർപ്പിച്ചിട്ടുള്ള ക്ലെയിമിൽ എന്തെങ്കിലും തുക കേന്ദ്രസർക്കാർ തടഞ്ഞുവച്ചിട്ടുണ്ടോ; എങ്കിൽ കാരണം വ്യക്തമാക്കാമോ;

ഇപ്രകാരം തുക തടഞ്ഞുവച്ചിട്ടുണ്ടെങ്കിൽ പ്രസ്തുത തുക ലഭ്യമാക്കാൻ എന്തെല്ലാം നടപടികളാണ് സംസ്ഥാന സർക്കാർ സ്വീകരിച്ചിട്ടുള്ളത്; വിശദമാക്കാമോ?

സംസ്ഥാനത്ത് മന്ത്രിസഭ ഒന്നാകെ ജനസമക്ഷം ഇറങ്ങിച്ചെന്ന് ജനങ്ങളുമായി സംവദിച്ച നവകേരള സദസ്സ് മുഖേന ജനാധിപത്യ പ്രക്രിയയ്ക്ക് തന്നെ പുതിയ ആഗോള മാതൃക സൃഷ്ടിക്കാന്‍ കഴി‍ഞ്ഞതായി വിലയിരുത്തിയിട്ടുണ്ടോ; വിശദമാക്കാമോ;

നവകേരള സദസ്സിന്റെ ഉദ്ദേശ്യ ലക്ഷ്യങ്ങള്‍ എന്തെല്ലാമായിരുന്നുവെന്നും അതില്‍ എത്ര മാത്രം വിജയിക്കാന്‍ കഴിഞ്ഞുവെന്നും വ്യക്തമാക്കാമോ;

നവകേരള സദസ്സുമായി ബന്ധപ്പെട്ട് നടന്ന പ്രഭാത യോഗങ്ങളില്‍ ലഭിച്ച അപേക്ഷകളും നിര്‍ദേശങ്ങളും പ്രത്യേകമായി പരിശോധിച്ചിട്ടുണ്ടോ; എങ്കില്‍ വിശദമാക്കുമോ;

നവകേരള സദസ്സില്‍ ലഭിച്ച അപേക്ഷകള്‍ ഏതെല്ലാം വിധത്തില്‍ തരംതിരിച്ച് മുന്‍ഗണനാ പരിഗണനകള്‍ തീരുമാനിച്ച് നടപടികള്‍ സ്വീകരിച്ചു വരുന്നതായി അറിയിക്കാമോ?

സംസ്ഥാനത്ത് എല്ലായിടത്തും കെ-ഫോണ്‍ സേവനങ്ങള്‍ ലഭ്യമാക്കാനുള്ള പ്രഖ്യാപിത ലക്ഷ്യം നടപ്പാക്കുന്നതിൽ ഇതുവരെ കൈവരിച്ച നേട്ടങ്ങള്‍ എന്തെല്ലാമാണെന്ന് വിശദമാക്കാമോ;

സംസ്ഥാനത്ത് കെ-ഫോണ്‍ പദ്ധതി മുഖേന ഒരുക്കുന്ന അടിസ്ഥാനസൗകര്യങ്ങള്‍ വിവര സാങ്കേതികവിദ്യയുടെയും ആശയവിനിമയ സാങ്കേതിക വിദ്യയുടെയും വ്യാപനത്തിന് ഏറെ സഹായകരമാകുമോയെന്ന് വിലയിരുത്തിയിട്ടുണ്ടോ; എങ്കില്‍ വിശദമാക്കാമോ;

കെ-ഫോണ്‍ പദ്ധതി നടത്തിപ്പുമായി ബന്ധപ്പെട്ട് ആരെങ്കിലും കോടതിയെ സമീപിച്ചിട്ടുണ്ടോ; പ്രസ്തുത കേസ് സംബന്ധിച്ച കോടതി പരാമർശം ലഭ്യമാണോ; എങ്കിൽ വിശദമാക്കാമോ?

സംസ്ഥാനത്ത് പോലീസ് സേനയുടെ ആധുനികീകരണത്തിന് എന്തെല്ലാം നടപടികളാണ് സ്വീകരിച്ചുവരുന്നതെന്ന് അറിയിക്കാമോ;

സംസ്ഥാനത്തെ മുഴുവന്‍ പോലീസ് സ്റ്റേഷനുകളിലും ഇന്റര്‍നെറ്റ്, ഫൈബര്‍ കണക്ടിവിറ്റി എന്നിവ സ്ഥാപിക്കുന്നതിന് നടപടി സ്വീകരിച്ചിട്ടുണ്ടോയെന്ന് വിശദമാക്കുമോ;

ഭീകരവാദികള്‍ ഉപയോഗിക്കുന്ന ഡ്രോണ്‍ അടക്കമുള്ളവയെ നിശ്ചലമാക്കുന്നതിനുള്ള സാങ്കേതികവിദ്യ സ്വായത്തമാക്കാന്‍ പോലീസ് സേനയ്ക്ക് കഴിഞ്ഞിട്ടുണ്ടോ;

വര്‍ദ്ധിച്ചുവരുന്ന സൈബര്‍ കുറ്റകൃത്യങ്ങള്‍ നൂതന സാങ്കേതികവിദ്യ പ്രയോജനപ്പെടുത്തി കണ്ടെത്തുന്നതിനും ഫലപ്രദമായി നിയന്ത്രിക്കുന്നതിനും പോലീസ് സേന നടത്തിവരുന്ന പ്രവര്‍ത്തനങ്ങള്‍ വിശദമാക്കാമോ?

സംസ്ഥാനത്ത് സപ്ലൈകോയിലെ സബ്‌സിഡി ഉല്പന്നങ്ങള്‍ക്ക് വില കൂട്ടാന്‍ സര്‍ക്കാര്‍ തീരുമാനമെടുത്തിട്ടുണ്ടോ; എങ്കിൽ എത്ര ശതമാനം വില വർദ്ധിപ്പിക്കാനാണ് തീരുമാനിച്ചിരിക്കുന്നതെന്ന് വിശദമാക്കാമോ;

സപ്ലൈകോയിലെ സബ്‌സിഡി ഉല്പന്നങ്ങള്‍ക്ക് വില വർദ്ധിപ്പിക്കുന്നത് വിലക്കയറ്റം രൂക്ഷമാക്കും എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ;

സംസ്ഥാനത്ത് സാധാരണ ജനങ്ങള്‍ വിലക്കയറ്റം മൂലം ബുദ്ധിമുട്ട് അനുഭവിക്കുന്നതായി പറയപ്പെടുന്ന സാഹചര്യത്തില്‍ സബ്‌സിഡി സാധനങ്ങള്‍ക്ക് വില വർദ്ധിപ്പിക്കുന്നതിന്റെ കാരണം വിശദമാക്കാമോ?

സംസ്ഥാനത്ത് യുവജന സംഘടനകള്‍ നടത്തുന്ന സമരങ്ങളില്‍ പങ്കെടുത്തവരെ മുഖ്യമന്ത്രിയുടെ സുരക്ഷാ ഉദ്യോഗസ്ഥര്‍ അടക്കം അതിക്രൂരമായി മർദിച്ച സംഭവങ്ങൾ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് ഗൗരവമായി കാണുന്നുണ്ടോ; വിശദമാക്കാമോ;

പ്രതിഷേധ സമരങ്ങളിൽ പങ്കെടുക്കുന്നവരെ ലാത്തികൊണ്ട് തലയ്ക്കടിക്കാന്‍ മുഖ്യമന്ത്രിയുടെ സുരക്ഷാ ഉദ്യോഗസ്ഥര്‍ക്ക് അധികാരമുണ്ടോയെന്ന് വ്യക്തമാക്കാമോ;

പ്രതിഷേധങ്ങളിൽ പങ്കെടുക്കുന്ന സ്ത്രീകളുടെ വസ്ത്രം പുരുഷ പോലീസ് വലിച്ചുകീറുന്നതും അവരുടെ മുടിയില്‍ ബൂട്ടിട് ചവിട്ടുന്നതുമായ സംഭവങ്ങൾ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് സർക്കാർ ഗൗരവമായി കാണുന്നുണ്ടോ; വിശദമാക്കാമോ;

ഇത്തരത്തിലുള്ള മനുഷ്യാവകാശ ലംഘനങ്ങള്‍ പോലീസിന്റെ ഭാഗത്ത് നിന്നും ഉണ്ടായിട്ടും നടപടികള്‍ സ്വീകരിക്കുന്നില്ലെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ അതിന്റെ കാരണം വിശദമാക്കാമോ?

നവകേരളത്തിന്റെ ഭാവി വികസന സാധ്യതകളും സംസ്ഥാനം ഇതുവരെ കെെവരിച്ച നേട്ടങ്ങളും പൊതുജന സമക്ഷം അവതരിപ്പിക്കുന്നതിനും ജനങ്ങളുമായി സംവദിക്കുന്നതിനുമായി നവകേരള സദസ്സിലൂടെ സാധിച്ചതായി വിലയിരുത്തിയിട്ടുണ്ടോ; എങ്കില്‍ വിശദമാക്കാമോ;

നവകേരള സദസ്സിലെത്തിച്ചേര്‍ന്നതും സദസ്സിനെ നിഷ്പക്ഷമായി വിലയിരുത്തുകയും ചെയ്ത വ്യത്യസ്ത മേഖലകളിലെ പ്രമുഖരുടെ പ്രതികരണങ്ങള്‍ പരിശോധിച്ചിട്ടുണ്ടോ; എങ്കില്‍ അവ വെളിപ്പെടുത്താമോ;

ജനാധിപത്യത്തിനും മതേതരത്വത്തിനും ഫെഡറല്‍ തത്വത്തിനും എതിരായ ആശയങ്ങള്‍ക്കെതിരെ പ്രതികരിക്കുന്നതിനുള്ള മാനവീയതയുടെ മുന്നേറ്റം കൂടിയായി നവകേരള സദസ്സ് മാറിയെന്ന അഭിപ്രായം സര്‍ക്കാരിനുണ്ടോ; വിശദമാക്കാമോ?

മെഡിക്കല്‍ അനുബന്ധ കോഴ്സുകള്‍ക്ക് വിദ്യാ‌‌‌‌‌‌‌‌ര്‍ത്ഥികള്‍ ഇതര സംസ്ഥാനങ്ങളിലേക്കും വിദേശത്തേക്കും പോകുന്ന സാഹചര്യത്തില്‍ സംസ്ഥാനത്ത് പ്രസ്തുത കോഴ്സുകൾ തുടങ്ങാന്‍ ആഗ്രഹിക്കുന്ന സ്ഥാപനങ്ങള്‍ക്ക് അനുമതി നല്‍കുന്നതിന് സ്വീകരിച്ചു വരുന്ന നടപടികള്‍ എന്തെല്ലാമെന്ന് വ്യക്തമാക്കാമോ;

ഈ സര്‍ക്കാര്‍ അധികാരത്തില്‍ വന്നശേഷം എത്ര മെഡിക്കല്‍, പാരാമെഡിക്കല്‍, നഴ്സിംഗ് കോഴ്സുകള്‍ക്ക് അനുമതി നല്‍കിയിട്ടുണ്ടെന്ന് വ്യക്തമാക്കാമോ; ഇനിയും അനുമതി നല്‍കാനുള്ള അപേക്ഷകരുടെ വിവരങ്ങള്‍ ലഭ്യമാണോ;

ഇത്തരം സ്ഥാപനങ്ങള്‍ക്ക് അനുമതി നല്‍കുന്നതിലെ കാലതാമസം ഒഴിവാക്കാന്‍ ഡി.എം.ഇ. , നഴ്സിംഗ് രജിസ്ട്രാര്‍, പാരാമെഡിക്കല്‍ കൗൺസിൽ, മറ്റുബന്ധപ്പെട്ട സ്ഥാപനങ്ങള്‍ എന്നിവയ്ക്ക് ആവശ്യമായ അടിയന്തര നിര്‍ദേശങ്ങള്‍ നൽകുമോ; എങ്കില്‍ വിശദാംശം ലഭ്യമാക്കാമോ;

മെഡിക്കല്‍ ടൂറിസത്തിന്റെ ഹബ്ബായി സംസ്ഥാനത്തെ മാറ്റുന്നതിന് ആരോഗ്യവകുപ്പ് സ്വീകരിച്ചുവരുന്ന നടപടികൾ എന്തെല്ലാമെന്ന് വ്യക്തമാക്കാമോ; അതിനായി പ്രത്യേക പ്രചാരണ പരിപാടികൾ നടപ്പാക്കുമോയെന്ന് അറിയിക്കാമോ ?

നീതി ആയോഗിന്റെ കണക്കനുസരിച്ച് ഇന്ത്യയിലെ അതിദാരിദ്ര്യം ഏറ്റവും കുറഞ്ഞ സംസ്ഥാനമായി കേരളത്തെ കണക്കാക്കിയിട്ടുണ്ടോ; എങ്കില്‍ വിശദാംശം ലഭ്യമാക്കുമോ;

സംസ്ഥാനത്ത് അതിദരിദ്ര നിര്‍മ്മാര്‍ജന പ്രവര്‍ത്തനങ്ങള്‍ ആരംഭിച്ചത് എന്നാണെന്നും അതിനായി എന്തെല്ലാം നടപടികളാണ് സ്വീകരിച്ചുവരുന്നതെന്നും അറിയിക്കാമോ;

സംസ്ഥാനത്തിന്റെ വികസന, ക്ഷേമ പ്രവര്‍ത്തനങ്ങളുടെ ഗുണഫലങ്ങള്‍ എല്ലാ വിഭാഗങ്ങളിലേയ്ക്കും എത്തിക്കുക എന്ന ലക്ഷ്യത്തിനായി ആരംഭിച്ച അതിദരിദ്ര നിര്‍മ്മാര്‍ജന പ്രവര്‍ത്തനങ്ങളുടെ പുരോഗതി വ്യക്തമാക്കാമോ;

ഇതിന്റെ ഭാഗമായി നടത്തിയ സര്‍വ്വേയുടെ വിശദാംശം ലഭ്യമാണോ; എങ്കില്‍ വെളിപ്പെടുത്താമോ; നിലവില്‍ എത്രപേരെ അതിദരിദ്രമുക്തരാക്കുന്നതിന് കഴിഞ്ഞിട്ടുണ്ടെന്ന് അറിയിക്കാമോ?

കേരളത്തെ ലോകത്തിന് മുന്നില്‍ സമഗ്രവും സത്യസന്ധവുമായി അവതരിപ്പിക്കുകയെന്ന മഹത്തായ ലക്ഷ്യം സാക്ഷാത്കരിക്കാന്‍ കേരളീയം 23-ന് കഴിഞ്ഞിട്ടുണ്ടോയെന്ന വിലയിരുത്തല്‍ നടത്തിയിട്ടുണ്ടോ; എങ്കില്‍ വിശദമാക്കാമോ;

സാമൂഹ്യവികാസവും വ്യാവസായിക മുന്നേറ്റവും ആധുനിക കലകളും നൂതന വിദ്യാരംഗവും നമ്മുടെ തനത് കലാരൂപങ്ങളും അടക്കം കേരള സമൂഹത്തിന്റെ സൂക്ഷ്മ ഘടകങ്ങളെപ്പോലും ലോകത്തിന്റെ മുന്നില്‍ അവതരിപ്പിച്ചിട്ടുണ്ടെന്ന ചാരിതാര്‍ത്ഥ്യം സര്‍ക്കാരിനുണ്ടോ; എങ്കില്‍ വ്യക്തമാക്കാമോ;

ലോകമെമ്പാടുമുള്ള മലയാളികൾക്ക് ഒരുമിച്ചാഘോഷിക്കാന്‍ ഇനിമുതൽ മലയാളത്തിന്റ മഹോത്സവമായി കേരളീയം തുടര്‍ന്നുള്ള വര്‍ഷങ്ങളിലും അതത് വര്‍ഷത്തെ അടയാളപ്പെടുത്തുന്നവിധം നടത്താന്‍ ഉദ്ദേശിക്കുന്നുണ്ടോ; എങ്കില്‍ വിശദമാക്കാമോ?

സര്‍ക്കാരിന്റെ നവകേരള സദസ്സിനെതിരെ പ്രതിഷേധിച്ച പ്രമുഖ പ്രതിപക്ഷ യുവജന സംഘടനാ പ്രവര്‍ത്തകര്‍ക്കെതിരെ ഭരണപക്ഷ യുവജന സംഘടനാ പ്രവര്‍ത്തകര്‍ നടത്തിയ ആക്രമണം പ്രോത്സാഹിപ്പിക്കുന്ന നടപടികള്‍ ഉണ്ടായിട്ടുള്ളതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ വിശദമാക്കാമോ;

ജനാധിപത്യപരമായി നടത്തുന്ന പ്രതിഷേധങ്ങളെ പോലീസ് നോക്കിനില്‍ക്കെ ഭരണപക്ഷ സംഘടനാ പ്രവര്‍ത്തകര്‍ അടിച്ചമർത്തുന്നതായുള്ള ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് നിയമപരമാണോയെന്ന് വിശദമാക്കാമോ;

ആലപ്പുഴയിൽ പ്രമുഖ പ്രതിപക്ഷ യുവജന സംഘടനയുടെ ഭിന്നശേഷിക്കാരനായ നേതാവിനെ ഭരണപക്ഷ യുവജന സംഘടനാ പ്രവർത്തകർ മർദിച്ച സംഭവത്തിൽ പോലീസ് കേസ് രജിസ്റ്റർ ചെയ്തിട്ടുണ്ടോ; വ്യക്തമാക്കാമോ;

സമാനമായ സംഭവങ്ങള്‍ തടയാന്‍ സര്‍ക്കാര്‍ സ്വീകരിച്ച നടപടികള്‍ വിശദമാക്കാമോ?

ഈ സർക്കാർ അധികാരത്തിൽ വന്നതിനുശേഷം സംസ്ഥാനത്ത് അർബുദ രോഗ നിർണ്ണയത്തിനും ചികിത്സയ്ക്കും കൂടുതൽ നൂതന സാങ്കേതികവിദ്യ ഉപയോഗപ്പെടുത്തുവാൻ എന്തെല്ലാം നടപടികളാണ് സ്വീകരിച്ചുവരുന്നതെന്ന് വ്യക്തമാക്കാമോ;

ഇന്ത്യയിലും വിദേശത്തുമുള്ള വൻകിട ആശുപത്രികളിൽ മാത്രം നിലവിലുള്ള റോബോട്ടിക് ശസ്ത്രക്രിയാ യൂണിറ്റ്, തിരുവനന്തപുരം ആര്‍.സി.സി.യില്‍ ആരംഭിക്കുന്നതിന് കഴിഞ്ഞിട്ടുണ്ടോ; ഇതിനായി ചെലവഴിച്ച തുക എത്രയാണെന്ന് അറിയിക്കാമോ;

പ്രസ്തുത മേഖലയിൽ ഇതുമൂലം എന്തെല്ലാം നേട്ടങ്ങൾ കൈവരിക്കാൻ കഴിയുമെന്നാണ് പ്രതീക്ഷിക്കുന്നത്;

റോബോട്ടിക് ശസ്ത്രക്രിയാ യൂണിറ്റ് ഒരുക്കുന്നതിന്റെ ഭാഗമായി മറ്റെന്തെല്ലാം അനുബന്ധ സംവിധാനങ്ങൾ ആരംഭിച്ചിട്ടുണ്ട്;

രണ്ടാം ഘട്ടമെന്ന നിലയിൽ റോബോട്ടിക് സര്‍ജറി യൂണിറ്റ് മലബാർ ക്യാൻസർ സെന്ററിൽ ആരംഭിക്കുന്നതിന് തീരുമാനിച്ചിട്ടുണ്ടോയെന്ന് വ്യക്തമാക്കാമോ?

സംസ്ഥാനത്ത് സപ്ലൈകോയുടെ ഔട്ട്‍ലെറ്റുകളില്‍ ആവശ്യമായ സാധനങ്ങൾ ഇല്ലാത്തതിനാൽ അവയുടെ പ്രവർത്തനം പ്രതിസന്ധിയിലാണെന്ന ആക്ഷേപം പരിശോധിച്ചിട്ടുണ്ടോ;

സപ്ലൈകോയുടെ പ്രവർത്തനം മെച്ചപ്പെടുത്തുന്നതിനായി എന്തെങ്കിലും പഠനം നടത്തിയിട്ടുണ്ടോ; എങ്കിൽ പഠന റിപ്പോര്‍ട്ടിലെ നിർദേശങ്ങൾ എന്തെല്ലാമാണെന്ന് വ്യക്തമാക്കാമോ;

സപ്ലൈകോയിലൂടെ വിതരണം ചെയ്യുന്ന സബ്സിഡി സാധനങ്ങളുടെ വില വർദ്ധിപ്പിക്കാൻ ഉദ്ദേശമുണ്ടോയെന്ന് വ്യക്തമാക്കാമോ;

സപ്ലൈകോയുടെ പ്രവർത്തനം മെച്ചപ്പെടുത്താൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വിശദമാക്കാമോ?

ഈ സർക്കാർ അധികാരത്തിൽ വന്നശേഷം സംസ്ഥാനത്തെ ആരോഗ്യമേഖലയുമായി ബന്ധപ്പെട്ട പ്രവർത്തനങ്ങൾക്ക് ലഭിച്ചിട്ടുള്ള അംഗീകാരങ്ങൾ എന്തെല്ലാമാണെന്ന് വ്യക്തമാക്കാമോ;

ആയുഷ് ചികിത്സാ കേന്ദ്രങ്ങളെ മികവിന്റെ കേന്ദ്രങ്ങളാക്കുന്നതിന് സംസ്ഥാന സർക്കാർ എന്തെല്ലാം കർമ്മപദ്ധതികളാണ് രൂപീകരിച്ചിട്ടുള്ളതെന്ന് വിശദമാക്കാമോ;

സംസ്ഥാനത്തെ എത്ര ആയുഷ് ആരോഗ്യ സ്വാസ്ഥ്യ കേന്ദ്രങ്ങൾക്ക് നാഷണൽ അക്രെഡിറ്റേഷൻ ബോർഡ് ഫോർ ഹോസ്പിറ്റല്‍സ് അംഗീകാരം നൽകിയിട്ടുണ്ട്; അവ ഏതെല്ലാമാണ്;

പ്രവർത്തന മികവിന്റെ അടിസ്ഥാനത്തിൽ കൂടുതൽ ആയുഷ് ആരോഗ്യ സ്വാസ്ഥ്യ കേന്ദ്രങ്ങള്‍ അനുവദിക്കണമെന്ന് സംസ്ഥാന സർക്കാർ ആവശ്യപ്പെട്ടിട്ടുണ്ടോ എന്ന് വ്യക്തമാക്കാമോ?

സംസ്ഥാനത്ത് പ്രാഥമിക ആരോഗ്യ കേന്ദ്രങ്ങൾ മുതൽ മെഡിക്കൽ കോളേജുകൾ വരെയുളള ആശുപത്രികളിൽ രൂക്ഷമായ മരുന്ന് ക്ഷാമം അനുഭവപ്പെടുന്നു എന്ന ആക്ഷേപം പരിശോധിച്ചിട്ടുണ്ടോയെന്ന് വിശദമാക്കുമോ;

എങ്കില്‍ മരുന്നു ക്ഷാമം ആശുപത്രികളിലെ ശസ്ത്രക്രിയകളെ ബാധിച്ചിട്ടുണ്ടോയെന്ന് വ്യക്തമാക്കുമോ;

കേരള മെഡിക്കൽ സർവ്വീസസ് കോർപ്പറേഷൻ വഴി മരുന്ന് വാങ്ങിയ ഇനത്തിൽ മരുന്ന് കമ്പനികള്‍ക്ക് നൽകാനുളള തുകയിൽ കുടിശിക വരുത്തിയിട്ടുണ്ടോ; വിശദമാക്കുമോ;

മരുന്നുക്ഷാമം പരിഹരിക്കുന്നതിന് അടിയന്തരമായി എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വ്യക്തമാക്കുമോ?

സംസ്ഥാനത്ത് തദ്ദേശസ്വയംഭരണ സ്ഥാപനങ്ങളിലെ സേവനങ്ങള്‍ ഓണ്‍ലൈനായി ലഭ്യമാകുന്ന കെ-സ്മാര്‍ട്ട് പദ്ധതിയുടെ വിശദവിവരങ്ങള്‍ ലഭ്യമാക്കുമോ;

സാങ്കേതികവിദ്യാരംഗത്തെ മുന്നേറ്റങ്ങളെ ജനോപകാരപ്രദമായി ഉപയോഗിക്കുന്ന പ്രവൃത്തികളില്‍ പ്രധാന്യമർഹിക്കുന്ന ഒന്നായി കെ-സ്മാര്‍ട്ട് പദ്ധതി വിലയിരുത്തപ്പെട്ടിട്ടുണ്ടോ;

തദ്ദേശസ്വയംഭരണ സ്ഥാപനങ്ങളുമായി ബന്ധപ്പെട്ട് പ്രവാസികള്‍ നേരിടുന്ന വിവിധ പ്രശ്നങ്ങള്‍ക്ക് പരിഹാരം കാണുവാന്‍ കെ-സ്മാര്‍ട്ട് ആപ്പിന്റെ സേവനങ്ങള്‍ വഴി സാധ്യമാകുമോ; വിശദമാക്കാമോ?

സംസ്ഥാനത്ത് ലീഗൽ മെട്രോളജി വകുപ്പിന്റെ എൻഫോഴ്സ്മെന്റ് പ്രവർത്തനങ്ങൾ വിശദമാക്കാമോ;

പ്രസ്തുത എൻഫോഴ്സ്മെന്റ് പ്രവർത്തനങ്ങൾ കൂടുതൽ ശക്തിപ്പെടുത്തുവാൻ നടപടികൾ സ്വീകരിച്ചിട്ടുണ്ടോ; വിശദമാക്കാമോ;

ഏതൊക്കെ നിയമപ്രകാരമാണ് ലീഗൽ മെട്രോളജി ഉദ്യോഗസ്ഥർക്ക് കേസെടുക്കുന്നതിന് അധികാരമുള്ളത്; വിശദമാക്കാമോ;

ലീഗൽ മെട്രോളജി വകുപ്പിന്റെ എൻഫോഴ്സ്മെന്റ് പ്രവർത്തനങ്ങളിലൂടെ ഒരു വര്‍ഷം സര്‍ക്കാരിലേക്ക് ലഭിക്കുന്ന ശരാശരി റവന്യൂ വരുമാനം സംബന്ധിച്ച വിശദാംശം ലഭ്യമാക്കാമോ?

സംസ്ഥാനത്ത് കർഷകരിൽ നിന്നും നെല്ല് സംഭരിക്കുന്ന നിലവിലെ രീതി കർഷക സൗഹൃദവും സുതാര്യവും കാര്യക്ഷമവുമല്ല എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് സംബന്ധിച്ച് പരിശോധിച്ചിട്ടുണ്ടോ;

നെല്ലുസംഭരണം മെച്ചപ്പെടുത്തുന്നത് സംബന്ധിച്ച് പഠനം നടത്തുന്നതിനായി പ്രത്യേക സമിതിയെ നിയോഗിച്ചിരുന്നോ; എങ്കിൽ സമിതിയുടെ റിപ്പോർട്ട് ലഭിച്ചിട്ടുണ്ടോ; വിശദാംശം നൽകുമോ;

നെല്ലുസംഭരണ രസീത് (പി.ആർ.എസ്.) നൽകുന്നതിന് പകരം നെല്ലിന്റെ വില കർഷകരുടെ അക്കൗണ്ടിലേക്ക് നൽകുവാൻ നടപടി സ്വീകരിക്കുമോ;

നെല്ലുസംഭരണത്തിലെ ക്രമക്കേടുകൾ തടയുന്നതിനും സംഭരണ രീതി മെച്ചപ്പെടുത്തുന്നതിനും എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വ്യക്തമാക്കാമോ?

തിരഞ്ഞെടുപ്പ് കമ്മീഷന്‍ നല്‍കുന്ന ഔദ്യോഗിക തിരിച്ചറിയല്‍ കാര്‍ഡ് നിര്‍മ്മിക്കുന്നതിനും വിതരണം ചെയ്യുന്നതിനും അധികാരപ്പെടുത്തിയ ഏജന്‍സി ഏതാണെന്ന് അറിയിക്കാമോ;

വ്യാജ തിരിച്ചറിയല്‍ കാര്‍ഡ് വ്യാപകമായി തയ്യാറാക്കിയിട്ടുണ്ടെന്നും ഇതിനെതിരെ ശക്തമായ നടപടിവേണമെന്നും ആവശ്യപ്പെട്ട് മുഖ്യ തിരഞ്ഞെുടുപ്പ് ഓഫീസര്‍ സംസ്ഥാന പോലീസ് മേധാവിക്ക് പരാതി നല്‍കിയിട്ടുണ്ടോയെന്ന് അറിയിക്കുമോ;

പ്രസ്തുത പരാതിയിന്മേല്‍ പോലീസ് എന്തെല്ലാം നടപടികള്‍ സ്വീകരിച്ചിട്ടുണ്ടെന്നും എത്ര പ്രതികളെ ഇതിനകം അറസ്റ്റ് ചെയ്തിട്ടുണ്ടെന്നും വ്യക്തമാക്കാമോ;

പ്രസ്തുത വ്യാജ തിരിച്ചറിയല്‍ കാര്‍ഡ് ആരുടെയൊക്കെ പേരിലാണ് നിര്‍മ്മിച്ചതെന്ന് അന്വേഷണത്തില്‍ കണ്ടെത്തിയിട്ടുണ്ടോ; വ്യക്തമാക്കാമോ;

ഇത് സംബന്ധിച്ച കേസിന്റെ ഇതുവരെയുള്ള പുരോഗതി വെളിപ്പെടുത്താമോ?

സർക്കാർ ആശുപത്രികൾക്കാവശ്യമായ മരുന്ന്‌ സംഭരിച്ച് വിതരണം ചെയ്യുന്ന കേരള മെഡിക്കൽ സർവ്വീസസ് കോർപ്പറേഷന്റെ അക്കൗണ്ടിൽ അറുനൂറ് കോടി രൂപ ഉണ്ടായിരുന്നിട്ടും മരുന്ന് വാങ്ങാൻ നടപടി സ്വീകരിക്കുന്നില്ല എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിശോധിച്ചിട്ടുണ്ടോ;

മരുന്നുകമ്പനികൾക്ക് നൽകാനുളള കുടിശിക എന്നത്തേക്ക് കൊടുത്തു തീർക്കാൻ കഴിയുമെന്ന് വ്യക്തമാക്കാമോ;

ആശുപത്രികളിലെ മരുന്നുക്ഷാമം പരിഹരിക്കുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നത്; വിശദമാക്കുമോ?

സംസ്ഥാനത്തിന്റെ അടിസ്ഥാനസൗകര്യ വികസനത്തിനായി 2011-16-ലെ സർക്കാർ ആരംഭം കുറിക്കുകയും എന്നാല്‍ വിവിധ കാരണങ്ങളാല്‍ പ്രവര്‍ത്തനം നിലയ്ക്കുകയും ചെയ്ത ഏതെല്ലാം വന്‍കിട പദ്ധതികളാണ് 2016-21 കാലയളവില്‍ പുനരാരംഭിച്ചതെന്ന് അറിയിക്കാമോ;

പ്രസ്തുത പദ്ധതികളുടെ പുരോഗതി വ്യക്തമാക്കാമോ;

വിഴിഞ്ഞം അന്താരാഷ്ട്ര തുറമുഖ പദ്ധതി പൂര്‍ത്തീകരിക്കുന്നതിതോടൊപ്പം ഏതെല്ലാം അനുബന്ധ പശ്ചാത്തല സൗകര്യ വികസന പദ്ധതികളാണ് സര്‍ക്കാര്‍ ആസൂത്രണം ചെയ്തുവരുന്നതെന്ന് അറിയിക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം സംസ്ഥാനത്തിന്റെ വികസന പ്രവര്‍ത്തനങ്ങള്‍ ത്വരിതപ്പെടുത്തുന്നതിനായി സംസ്ഥാനത്തെ എം.പി.മാരുടെ എത്ര യോഗങ്ങള്‍ വിളിച്ചുചേര്‍ത്തിട്ടുണ്ടെന്നും പ്രസ്തുത യോഗങ്ങളിലെ തീരുമാനങ്ങള്‍ നടപ്പിലാക്കുന്നതില്‍ എം.പി.മാരുടെ ഭാഗത്ത് നിന്നുണ്ടായിട്ടുള്ള സഹകരണം സംബന്ധിച്ചും വ്യക്തമാക്കാമോ;

കേന്ദ്രസര്‍ക്കാര്‍ കേരളത്തോട് ആവര്‍ത്തിച്ച് പിൻതുടരുന്നതായി പറയപ്പെടുന്ന ജനാധിപത്യ വിരുദ്ധവും ഫെ‍ഡറലിസത്തിനെതിരുമായ നടപടികള്‍ ഇന്ത്യന്‍ പാര്‍ലമെന്റില്‍ ഉന്നയിക്കുന്നതിലും സംസ്ഥാനത്തിന്റെ താല്പര്യങ്ങള്‍ സംരക്ഷിക്കുന്നതിലും സംസ്ഥാനത്തെ എം.പി.മാരുടെ ഇടപെടല്‍ എത്രമാത്രം ഗുണകരമായിട്ടുണ്ടെന്ന് വിലയിരുത്തിയിട്ടുണ്ടോ; എങ്കില്‍ വിശദമാക്കാമോ;

എം.പി.മാര്‍ പാര്‍ലമെന്റിലും മറ്റും നടത്തിയിട്ടുള്ള ഇടപെടലുകളുടെ ഫലമായി സംസ്ഥാനത്തിന് ഏതെല്ലാം വന്‍കിട പദ്ധതികള്‍ക്ക് അനുമതി നേടിയെടുക്കാന്‍ കഴിഞ്ഞിട്ടുണ്ടെന്നും അവ ഏതെല്ലാമാണെന്നും വ്യക്തമാക്കാമോ?