ഈ സർക്കാർ അധികാരമേറ്റതുമുതൽ നാളിതുവരെ ന്യൂനപക്ഷ ക്ഷേമ വകുപ്പ് വടകരമണ്ഡലത്തിൽ നടപ്പാക്കിയ പദ്ധതികളുടെയും പ്രവൃത്തികളുടെയും വിശദാംശം അറിയിക്കുമോ;

ഇക്കാലയളവിൽ വടകര മണ്ഡലത്തില്‍ ന്യൂനപക്ഷ ക്ഷേമ വകുപ്പ് മുഖേന നടപ്പാക്കുന്നതിന് അനുമതി ലഭിച്ചശേഷം നാളിതുവരെയായി നടപ്പാക്കാന്‍ കഴിയാതെ പോയതോ ആരംഭിച്ചശേഷം പൂര്‍ത്തീകരിച്ചിട്ടില്ലാത്തതോ ആയ പദ്ധതികളും പ്രവൃത്തികളും ഏതെല്ലാമാണെന്നുള്ള വിശദാംശം അറിയിക്കുമോ;

ഇവയ്ക്ക് ഓരോന്നിനും നീക്കിവച്ചിട്ടുള്ള തുക എത്രവീതമാണെന്നുള്ള വിശദാംശം ലഭ്യമാക്കുമോ;

ഇതില്‍ കേന്ദ്രസര്‍ക്കാരില്‍ നിന്ന് സാമ്പത്തിക സഹായം ലഭിച്ചിട്ടുള്ള പദ്ധതികളും പ്രവൃത്തികളും ഏതൊക്കെയാണെന്നും ഇവ ഓരോന്നിനും നീക്കിവച്ചിട്ടുള്ള കേന്ദ്ര സംസ്ഥാന തദ്ദേശ സ്ഥാപന വിഹിതങ്ങള്‍ എത്രവീതമാണെന്നും വ്യക്തമാക്കുമോ;

ഇക്കാലയളവിൽ വടകര മണ്ഡലത്തിനായി വകുപ്പു മുഖേന ചെലവാക്കിയ ആകെ തുക എത്ര രൂപയാണെന്ന വിവരം വര്‍ഷവും ഇനവും തിരിച്ച് ലഭ്യമാക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം ന്യൂനപക്ഷ ക്ഷേമ വകുപ്പ് ദേവികുളം മണ്ഡലത്തില്‍ നടപ്പാക്കിയ പദ്ധതികളുടെ വിശദാംശം ലഭ്യമാക്കാമോ?

രാജ്യത്തെ പല സംസ്ഥാനങ്ങളിലും ന്യൂനപക്ഷ വിഭാഗങ്ങൾക്ക് നേരെ ശത്രുതാപരമായ സമീപനം ഉണ്ടാകുന്ന സാഹചര്യത്തിൽ സംസ്ഥാനത്തെ ന്യൂനപക്ഷ വിഭാഗങ്ങളുടെ സംരക്ഷണത്തിനും ഉന്നമനത്തിനുമായി സർക്കാർ നടപ്പാക്കുന്ന പദ്ധതികൾ വിശകലന വിധേയമാക്കിയിട്ടുണ്ടോ; വിശദീകരിക്കുമോ;

ന്യൂനപക്ഷ വിഭാഗങ്ങളിലെ വിധവകൾ, വിവാഹമോചിതർ, ഉപേക്ഷിക്കപ്പെട്ടവർ തുടങ്ങി സാമ്പത്തികമായി ഏറെ ബുദ്ധിമുട്ട് അനുഭവിക്കുന്ന സ്ത്രീകളുടെ ഉന്നമനത്തിനായി നടപ്പാക്കുന്ന പദ്ധതികൾ വിശദമാക്കുമോ;

ന്യൂനപക്ഷ വിഭാഗത്തിൽപ്പെട്ട യുവജനങ്ങളെ മികച്ച തൊഴിലുകൾ നേടാൻ പ്രാപ്തരാക്കുന്നതിനുവേണ്ടി എന്തെല്ലാം പദ്ധതികളാണ് നടപ്പിലാക്കിയിട്ടുള്ളതെന്ന് വ്യക്തമാക്കുമോ;

സംസ്ഥാനത്ത് ന്യൂനപക്ഷ വിഭാഗങ്ങൾ ഭയരഹിതരും അഭിമാനബോധമുള്ളവരുമായി ജീവിക്കുന്നതിനുവേണ്ടി നടപ്പാക്കിവരുന്ന വിവിധ പദ്ധതികൾ ഏതൊക്കെയാണെന്ന് വിശദമാക്കുമോ?

ആലപ്പുഴ മണ്ഡലത്തില്‍ പ്രധാനമന്ത്രി ജനവികാസ് കാര്യക്രം (പി.എം.ജെ.വി.കെ.) പദ്ധതി പ്രകാരം എന്തൊക്കെ പ്രവൃത്തികളാണ് നടന്നുവരുന്നതെന്ന് വിശദമാക്കാമോ;

പ്രസ്തുത പദ്ധതി പ്രകാരം അനുവദിച്ച വുമൺ ഫെസിലിറ്റേഷന്‍ സെന്ററിന്റെ നിർമ്മാണ പുരോഗതി അറിയിക്കാമോ;

എത്ര രൂപ ചെലവഴിച്ചാണ് പ്രസ്തുത പദ്ധതി നടപ്പാക്കുന്നതെന്നും ഇവ എപ്പോള്‍ പുര്‍ത്തീകരിക്കാന്‍ കഴിയുമെന്നും അറിയിക്കാമോ?

ഈ സർക്കാർ അധികാരത്തിൽ വന്നശേഷം ന്യൂനപക്ഷ മത വിഭാഗത്തിലെ വിധവകൾക്കായി ഭവന പുനരുദ്ധാരണ പദ്ധതി നടപ്പാക്കിയിട്ടുണ്ടോ; എങ്കിൽ എത്ര പേർക്ക് ഇതിന്റെ പ്രയോജനം ലഭിച്ചിട്ടുണ്ടെന്ന് വിശദമാക്കാമോ;

ന്യൂനപക്ഷ മത വിഭാഗത്തിലെ വിധവകൾ, വിവാഹമോചിതരായ സ്ത്രീകൾ എന്നിവർക്കായി സ്വയം തൊഴിൽ സംരംഭങ്ങൾ ആരംഭിക്കുന്നതിന് സഹായം നൽകുന്ന പദ്ധതി നിലവിലുണ്ടോ; എങ്കിൽ എത്ര പേർക്ക് ഇതിന്റെ പ്രയോജനം ലഭിച്ചു; വിശദാംശം ലഭ്യമാക്കാമോ?

ന്യൂനപക്ഷ ക്ഷേമവകുപ്പ് ആലപ്പുഴ മണ്ഡലത്തില്‍ ഏതൊക്കെ പദ്ധതികളാണ് ആവിഷ്കരിച്ച് നടപ്പാക്കുന്നതെന്ന വിശദവിവരം ലഭ്യമാക്കാമോ;

പ്രസ്തുത വകുപ്പ് മുഖേന ഏതൊക്കെ പദ്ധതികള്‍ക്കാണ് തുക ചെലവഴിക്കുന്നതെന്നുള്ള വിവരം വ്യക്തമാക്കുമോ?

2020- 2021 മുതൽ ന്യൂനപക്ഷ ക്ഷേമ വകുപ്പിന് കീഴിൽ വിവിധ പദ്ധതികൾക്ക് ഓരോ വർഷവും ലഭിച്ചിട്ടുള്ള ബജറ്റ് വിഹിതം എത്രയാണെന്നും ഇതിൽ ഓരോ വർഷവും എത്ര തുക വിതരണം ചെയ്തുവെന്നും വിശദമാക്കുമോ;

ഏതെങ്കിലും ധനസഹായ പദ്ധതികളിൽ കുടിശ്ശിക വിതരണം ചെയ്യാനുണ്ടോയെന്നും ഓരോ പദ്ധതിയിലും എന്നുവരെയുള്ള അപേക്ഷകൾക്ക് ധനസഹായം നൽകിയിട്ടുണ്ടെന്നും വ്യക്തമാക്കുമോ;

ന്യൂനപക്ഷ വിദ്യാർത്ഥികൾക്കുള്ള മാർഗ്ഗദീപം പദ്ധതിയിൽ ഈ കാലയളവിൽ എത്ര തുക അനുവദിച്ചു എന്നും എത്ര തുക വിതരണം ചെയ്തു എന്നും വ്യക്തമാക്കുമോ?

ന്യൂനപക്ഷക്ഷേമ വകുപ്പ് നടപ്പാക്കുന്ന നൈപുണ്യ വികസന പദ്ധതികളും തൊഴിലധിഷ്ഠിത പദ്ധതികളും എന്തൊക്കെയെന്ന് വിശദമാക്കാമോ;

പ്രസ്തുത പദ്ധതികള്‍ക്കായി ഈ സാമ്പത്തിക വര്‍ഷം എത്ര തുക വകയിരുത്തിയിട്ടുണ്ട്;

2025 ജൂലായ് 1 മുതല്‍ ആഗസ്റ്റ് 31 വരെ നീണ്ടുനിന്ന ഫയല്‍ അദാലത്തില്‍ ന്യൂനപക്ഷക്ഷേമ വകുപ്പ് എത്ര ഫയലുകള്‍ തീര്‍പ്പാക്കി; ഇനിയും തീര്‍പ്പാക്കാനുള്ള ഫയലുകളില്‍ നടപടി ത്വരിതപ്പെടുത്താന്‍ നടപടി സ്വീകരിക്കുമോയെന്ന് വ്യക്തമാക്കാമോ?

കായിക വകുപ്പ് പ്രഖ്യാപിച്ച ഒരു പഞ്ചായത്തില്‍ ഒരു കളിക്കളം എന്ന പദ്ധതി പ്രകാരം സംസ്ഥാനത്ത് ആകെ എത്ര ഗ്രൗണ്ടുകള്‍ നവീകരിക്കുകയോ നിര്‍മ്മിക്കുകയോ ചെയ്തിട്ടുണ്ടെന്നുളളതിന്റെ ജില്ല തിരിച്ചുള്ള കണക്ക് വിശദമാക്കുമോ;

പ്രസ്തുത പദ്ധതി പ്രകാരം മലപ്പുറം ജില്ലയില്‍ നടത്തിയ പ്രവൃത്തികളുടെ വിശദാംശങ്ങള്‍ ലഭ്യമാക്കുമോ?

ഈ സര്‍ക്കാരിന്റെ കാലയളവില്‍ കായിക വകുപ്പ് വഴി അരൂർ മണ്ഡലത്തിൽ അനുവദിച്ച പദ്ധതികൾ ഏതെല്ലാമെന്ന് വിശദമാക്കാമോ;

പ്രസ്‌തുത പ്രവൃത്തികളുടെ നിലവിലെ സ്ഥിതി വിശദമാക്കാമോ;

പള്ളിപ്പുറത്ത് ഐ.എച്ച്.ആര്‍.ഡി. കോളേജിന് അനുവദിച്ച ജോമോൻ സ്മാരക സ്റ്റേഡിയത്തിന്റെ നിർമ്മാണം ഏത് ഘട്ടത്തിലാണെന്നും, പ്രസ്‌തുത പ്രവൃത്തിയുടെ ഭരണാനുമതി സംബന്ധിച്ച വിശദാംശവും അറിയിക്കുമോ?

കായിക വകുപ്പിന്റെ കീഴിൽ കാസർഗോഡ് ജില്ലയിൽ പ്രവർത്തനം പുരോഗമിക്കുന്ന പദ്ധതികള്‍ ഏതെല്ലാമെന്ന് വ്യക്തമാക്കുമോ;

പ്രസ്തുത പദ്ധതികൾക്ക് അനുവദിച്ച തുക എത്രയാണെന്നും പദ്ധതികളുടെ നിലവിലെ സ്ഥിതി എന്താണെന്നും വ്യക്തമാക്കാമോ;?

സംസ്ഥാന കായിക വകുപ്പ് വിദ്യാഭ്യാസ വകുപ്പുമായി സഹകരിച്ച് ലോവർ പ്രൈമറി തലത്തിൽ നടപ്പാക്കുന്ന കായിക വിനോദ പദ്ധതിയായ ഹെൽത്തി കിഡ്സ് പദ്ധതിയെക്കുറിച്ചുള്ള വിശദാംശം ലഭ്യമാക്കാമോ;

പ്രസ്തുത പദ്ധതി നടപ്പിലാക്കിയ വിദ്യാലയങ്ങളിൽ നിന്നുള്ള പ്രവർത്തനാനുഭവവും പദ്ധതി നടപ്പിലാക്കിയതിലൂടെ കൈവന്ന നേട്ടങ്ങളും വിലയിരുത്തിയിട്ടുണ്ടോ; വിശദമാക്കാമോ?

കൈപ്പമംഗലം മണ്ഡലത്തിൽ 2024-25 സാമ്പത്തിക വർഷത്തിൽ ആസ്തി വികസന ഫണ്ടിൽ നിന്ന് അമ്പത് ലക്ഷം രൂപയും കായിക വകുപ്പിന്റെ അമ്പത് ലക്ഷം രൂപയും കണക്കാക്കി അനുവദിച്ചിട്ടുള്ള ശ്രീനാരായണപുരം പഞ്ചായത്തിലെ കളിക്കളം നിർമ്മാണം അടിയന്തരമായി പൂർത്തീകരിക്കുന്നതിന് എന്തെല്ലാം നടപടികളാണ് കൈകൊണ്ടിട്ടുള്ളതെന്ന് വ്യക്തമാക്കാമോ;

കായിക വികസനത്തിനായി വിദ്യാലയങ്ങളിൽ എന്തെല്ലാം പദ്ധതികളാണ് നടപ്പിലാക്കി വരുന്നതെന്ന് വിശദമാക്കാമോ?

കഴിഞ്ഞ 14 വർഷം കാസർഗോഡ് മണ്ഡലത്തിൽ കായിക വകുപ്പിൽ നിന്ന് വിവിധ പദ്ധതികൾക്കായി ആകെ അനുവദിച്ച തുക എത്രയാണെന്ന് വ്യക്തമാക്കുമോ;

പ്രസ്തുത തുക ഏതെല്ലാം പ്രവൃത്തികൾക്കാണ് അനുവദിച്ചതെന്ന് പഞ്ചായത്ത്/മുനിസിപ്പാലിറ്റി തിരിച്ച് വ്യക്തമാക്കാമോ;

പൂർത്തീകരിച്ചതും പൂര്‍ത്തീകരിക്കാത്തതും ആരംഭിക്കാത്തതുമായ പ്രവൃത്തികൾ ഏതൊക്കെയാണെന്ന് വ്യക്തമാക്കാമോ;

എസ്റ്റിമേറ്റ് തയ്യാറായിട്ടും ഭരണാനുമതി നൽകാത്ത പ്രവൃത്തികൾ ഏതൊക്കെയാണെന്ന് പഞ്ചായത്ത്/മുനിസിപ്പാലിറ്റി തിരിച്ച് വ്യക്തമാക്കാമോ;

കാസർഗോഡ് മണ്ഡലത്തിൽ ഏതെങ്കിലും സ്റ്റേഡിയത്തിന് ഏതെങ്കിലും വർഷം ബജറ്റിൽ തുക വകയിരുത്തിയിട്ടുണ്ടോയെന്ന് പഞ്ചായത്ത്/മുനിസിപ്പാലിറ്റി തിരിച്ച് വ്യക്തമാക്കാമോ;

കാസർഗോഡ് മണ്ഡലത്തിൽ പിങ്ക് സ്റ്റേഡിയം നിർമ്മിക്കാൻ ആലോചനയുണ്ടായിരുന്നോ; എങ്കിൽ ഇതിനായി സ്ഥലം പരിശോധിച്ചിരുന്നോ; എവിടെ സ്റ്റേഡിയം നിർമ്മിക്കാനാണ് ആലോചിച്ചത്; വ്യക്തമാക്കാമോ?

ഒരു പഞ്ചായത്തില്‍ ഒരു കളിക്കളം എന്ന പദ്ധതി പ്രകാരം ഗുരുവായൂര്‍ മണ്ഡലത്തില്‍ അനുമതി ലഭിച്ച പദ്ധതികളുടെ വിശദവിവരങ്ങളും പുരോഗതിയും വിശദമാക്കാമോ?

ഈ സര്‍ക്കാരിന്റെ കാലയളവില്‍ കായിക വകുപ്പ് മുഖേന ചങ്ങനാശ്ശേരി നിയോജക മണ്ഡലത്തില്‍ നടപ്പിലാക്കിയ പദ്ധതികളുടെ വിശദവിവരം നല്‍കുമോ;

പ്രസ്തുത പദ്ധതികളില്‍ ഓരോ പ്രവൃത്തിക്കും അനുവദിച്ച തുക എത്രയെന്ന് വ്യക്തമാക്കുമോ; ഉത്തരവുകളുടെ പകര്‍പ്പ് ലഭ്യമാക്കുമോ?

എം.എൽ.എ. ആസ്തി വികസന ഫണ്ട് വിനിയോഗിച്ച് ഒരു പഞ്ചായത്ത് ഒരു കളിക്കളം പദ്ധതി പ്രകാരം സംസ്ഥാനത്ത് എത്ര കളിസ്ഥലങ്ങൾ നിർമ്മിക്കുന്നതിന് അനുമതി നൽകിയിട്ടുണ്ടെന്നും നിലവിൽ എത്ര കളിസ്ഥലങ്ങൾ ഇപ്രകാരം പൂർത്തീകരിച്ചിട്ടുണ്ടെന്നും അറിയിക്കാമോ;

പ്രസ്തുത പദ്ധതി വിഭാവനം ചെയ്തപ്പോൾ ഒരു എം.എൽ.എ. ക്ക് ഒരു സാമ്പത്തിക വർഷം എത്ര തുക ഉപയോഗിച്ചുള്ള പദ്ധതി നടപ്പിലാക്കുന്നതിനാണ് വകുപ്പ് ശിപാര്‍ശ നല്‍കിയിരിക്കുന്നത് ; എത്ര തുക നൽകുന്നതിനാണ് ഉത്തരവായിട്ടുള്ളതെന്നും വിശദമാക്കുമോ;

ഒരു സാമ്പത്തിക വർഷം ആ വർഷത്തെ ആസ്തി വികസന ഫണ്ടുപയോഗപ്പെടുത്തി ഒരു മണ്ഡലത്തിൽ ഒന്നിലധികം കളിസ്ഥലങ്ങൾ നിർമ്മിക്കുന്നതിന് അനുമതി നൽകുന്നുണ്ടോ; വ്യക്തമാക്കുമോ?

കഴിഞ്ഞ വർഷം നടന്ന കായിക ഉച്ചകോടിയിലെ തീരുമാനങ്ങൾ എത്രത്തോളം നടപ്പാക്കിയിട്ടുണ്ടെന്ന് പരിശോധിച്ചിട്ടുണ്ടോ; വിശദീകരിക്കാമോ;

കായിക മേഖലയിലെ അടിസ്ഥാന സൗകര്യങ്ങൾ മെച്ചപ്പെടുത്താനും പരിപാലിക്കാനും എന്തെല്ലാം പുതിയ പദ്ധതികൾ ആവിഷ്കരിക്കാനാണ് ഉദ്ദേശിക്കുന്നത്; വിശദ‌മാക്കാമോ;

കായികരംഗത്തെ നഷ്ടപ്രതാപം വീണ്ടെടുക്കാൻ അന്താരാഷ്ട്ര നിലവാരത്തിലുള്ള പരിശീലന സൗകര്യങ്ങൾ ഒരുക്കാൻ നടപടി സ്വീകരിക്കുമോ; വ്യക്തമാക്കാമോ?

തിരുവനന്തപുരത്ത് നടന്ന രാജ്യാന്തര കായിക ഉച്ചകോടിയില്‍ സംസ്ഥാനത്തിന്റെ കായിക സമ്പദ്‌വ്യവസ്ഥ ശക്തിപ്പെടുത്തുന്നതുമായി ബന്ധപ്പെട്ട് നടന്ന പ്രധാന പ്രഖ്യാപനങ്ങൾ എന്തൊക്കെയായിരുന്നുവെന്നു വ്യക്തമാക്കാമോ;

പ്രസ്തുത പ്രഖ്യാപനങ്ങളിൽ ഏതൊക്കെയാണ് നാളിതുവരെ നടപ്പാക്കിയിട്ടുള്ളത്; എത്ര കോടി രൂപയുടെ നിക്ഷേപം ലഭ്യമായിട്ടുണ്ട്; എത്ര നിക്ഷേപ പദ്ധതികൾക്ക് നാളിതുവരെ അനുമതി നൽകിയിട്ടുണ്ട്; ഈ പദ്ധതികൾ വഴി എത്ര തൊഴിലവസരങ്ങൾ സൃഷ്ടിച്ചിട്ടുണ്ട്; വിശദാംശം ലഭ്യമാക്കാമോ;

കായിക ഉച്ചകോടിയുടെ നടത്തിപ്പിന് എത്ര തുക ചെലവഴിച്ചു; വിശദാംശം ഇനം തിരിച്ച് വ്യക്തമാക്കാമോ?

സംസ്ഥാനത്ത് കായിക താരങ്ങൾക്ക് അന്താരാഷ്ട്ര നിലവാരത്തിലുള്ള താരങ്ങളുമായി മത്സരിക്കുന്നതിനുള്ള ശേഷി ഉറപ്പാക്കുന്നതിനായി കായികരംഗത്ത് കൂടുതൽ നിക്ഷേപം കൊണ്ടുവരേണ്ടതിന്റെ ആവശ്യകത വിശകലനവിധേയമാക്കിയിട്ടുണ്ടോ; വിശദീകരിക്കുമോ;

കായിക വിനോദരംഗത്ത് കൂടുതൽ നിക്ഷേപകരെ ആകർഷിക്കുന്നതിനുവേണ്ടി ആരംഭിച്ച ഇൻറർനാഷണൽ സ്പോർട്സ് സമ്മിറ്റിൽ ലഭിച്ച ഓഫറുകൾ പ്രകാരമുള്ള നിക്ഷേപങ്ങൾ ഈ മേഖലയിൽ ലഭ്യമായിട്ടുണ്ടോ; വിശദീകരിക്കുമോ;

സംസ്ഥാനത്തിന്റെ ആഭ്യന്തര ഉല്പാദനത്തിൽ കായിക വിനോദത്തിനും അതുമായി ബന്ധപ്പെട്ട സംരംഭങ്ങൾക്കും നിർണായക പങ്കാളിത്തം ഉറപ്പാക്കുന്നതിന് കഴിഞ്ഞിട്ടുണ്ടോ; വിശദമാക്കാമോ;

കായിക വിനോദത്തോടൊപ്പം വളരെയധികം പ്രാധാന്യമർഹിക്കുന്ന സ്പോർട്സ് മെഡിസിൻ മേഖലയിൽ സംസ്ഥാനത്ത് കൂടുതൽ നിക്ഷേപങ്ങൾ ഉറപ്പാക്കുന്നതിന് കഴിഞ്ഞിട്ടുണ്ടോ; വിശദീകരിക്കുമോ?

ഈ സര്‍ക്കാരിന്റെ കാലയളവില്‍ കായിക വകുപ്പ് മുഖേന ദേവികുളം മണ്ഡലത്തില്‍ നടപ്പിലാക്കിയ പദ്ധതികളുടെ വിശദാംശം ലഭ്യമാക്കാമോ?

സംസ്ഥാനത്തേക്ക് മെസ്സിയെയും അർജന്റീന ഫുട്ബോൾ ടീമിനെയും എത്തിച്ച് ഫുട്ബോൾ മത്സരം നടത്തുന്ന നടപടികളുടെ വിശദാംശം നൽകുമോ;

പ്രസ്തുത മത്സരവും ഇതിന്റെ ചെലവുകളും സ്പോൺസർ ചെയ്യുന്നത് ആരാണെന്ന് ഇനം തിരിച്ച് വിശദമാക്കാമോ;

പ്രസ്തുത മത്സരവും ഇതുമായി ബന്ധപ്പെട്ട ചെലവുകളും സർക്കാരിന് സാമ്പത്തിക ബാധ്യത ഉണ്ടാക്കുമോ; എങ്കിൽ എത്ര തുകയാണെന്ന് കണക്കാക്കിയിട്ടുണ്ടോ; ഇനം തിരിച്ച് വ്യക്തമാക്കാമോ;

ഈ മത്സരത്തിൽ നിന്ന് സർക്കാരിന് സാമ്പത്തിക വരുമാനം ലഭ്യമാകുമോ; വിശദമാക്കാമോ?

വടക്കാഞ്ചേരി മണ്ഡലത്തില്‍ 2021 മുതല്‍ 2025 വരെ ഒരു പഞ്ചായത്ത് ഒരു കളിക്കളം പദ്ധതിയില്‍ ഉള്‍പ്പെടുത്തി അനുവദിച്ച കളിക്കളങ്ങളുടെ നിര്‍മ്മാണ പുരോഗതി വിശദമാക്കാമോ;

പ്രസ്തുത മണ്ഡലത്തില്‍ 2021 മുതല്‍ 2025 വരെ ബജറ്റില്‍ ഉള്‍പ്പെടുത്തി വകുപ്പ് മുഖേന അനുവദിച്ച പ്രവൃത്തികളുടെ നിര്‍മ്മാണ പുരോഗതി വിശദമാക്കാമോ;

ഈ പ്രവൃത്തികളുടെ നിര്‍മ്മാണം സമയബന്ധിതമായി പൂര്‍ത്തിയാക്കുന്നതിന് ആവശ്യമായ നടപടി സ്വീകരിക്കാമോ?

കായിക മന്ത്രി നേതൃത്വം നൽകിയ ലഹരി വിരുദ്ധ യാത്രയുടെ ഭാഗമായി പതിനാല് ജില്ലകളിൽ സംഘടിപ്പിച്ച മിനി മാരത്തോൺ മത്സരത്തിൽ വിജയിച്ച താരങ്ങൾക്ക് മൂന്നു മാസങ്ങൾക്ക് ശേഷവും സമ്മാനത്തുക വിതരണം ചെയ്തിട്ടില്ലായെന്നത് ശ്രദ്ധയില്‍പ്പെട്ടിട്ടുണ്ടോ; സമ്മാനത്തുക വിതരണം ചെയ്യുന്നതിന് അടിയന്തര നടപടി സ്വീകരിക്കുമോ;

ഈ സർക്കാരിന്റെ കാലയളവിൽ കൊച്ചിയിൽ ആരംഭിച്ച പെൺകുട്ടികളുടെ ഫുട്ബോൾ അക്കാദമി കെട്ടിടത്തിന്റെ വാടക കുടിശ്ശിക നല്‍കാത്തതുമൂലം കെട്ടിടം ഒഴിയേണ്ടി വന്ന സാഹചര്യമുണ്ടായിട്ടുണ്ടോയെന്ന് വ്യക്തമാക്കുമോ; വാടക നൽകുവാൻ സാധിക്കാതെ വന്ന സാഹചര്യം എന്താണെന്ന് വ്യക്തമാക്കുമോ;

പ്രസ്തുത അക്കാദമിയിൽ മതിയായ പരിശീലകർ ഇല്ലാത്ത സാഹചര്യം ഗൗരവത്തോടെ കാണുന്നുണ്ടോ; ഇക്കാര്യത്തിൽ എന്തൊക്കെ തുടർനടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ;

കായിക മേഖലയ്ക്കുള്ള സർക്കാർ വിഹിതം ഗണ്യമായി വെട്ടിക്കുറച്ചത് സംസ്ഥാനത്തെ കായിക മേഖലയുടെ പ്രവർത്തനത്തെ സാരമായി ബാധിക്കുന്നതായി വിലയിരുത്തുന്നുണ്ടോ; വ്യക്തമാക്കുമോ?

മുൻ സർക്കാരിന്റെ കാലം മുതൽ നാളിതുവരെ പട്ടാമ്പി ​മണ്ഡലത്തില്‍ ആസ്തി വികസന ഫണ്ടിലോ പ്രാദേശിക ഫണ്ടിലോ ഉൾപ്പെടാത്ത ഏതെല്ലാം പദ്ധതികളാണ് വകുപ്പ് മുഖാന്തരം അനുവദിച്ചിട്ടുള്ളതെന്ന് വ്യക്തമാക്കാമോ;

പ്രസ്തുത പദ്ധതികളുടെ വിശദാംശം, ഓരോ പ്രവൃത്തിക്കും അനുവദിച്ച തുക, നിർവ്വഹണ ചുമതല നൽകിയിട്ടുള്ള വകുപ്പ്/ഏജൻസി, പദ്ധതികളുടെ നിലവിലെ സ്ഥിതി എന്നിവ വ്യക്തമാക്കാമോ; ഫണ്ട് അനുവദിച്ചതിന്റെ ഉത്തരവുകളുടെ പകര്‍പ്പുകൾ ലഭ്യമാക്കുമോ?

ഫുട്‌ബോള്‍ ഇതിഹാസം ലയണല്‍ മെസ്സി അടങ്ങുന്ന അര്‍ജന്റീന ഫുട്‌ബോള്‍ ടീം കേരളം സന്ദര്‍ശിക്കുന്നതിനും ഫുട്‌ബോള്‍ മത്സരത്തില്‍ പങ്കെടുക്കുന്നതിനും തീരുമാനമായിട്ടുണ്ടോയെന്ന് അറിയിക്കുമോ;

പ്രസ്തുത തീരുമാനം സംബന്ധിച്ച് സംസ്ഥാന സര്‍ക്കാരും എ.എഫ്.എ.- യും (അര്‍ജന്റീന ഫുട്‌ബോള്‍ അസോസിയേഷൻ) തമ്മില്‍ ധാരണാപത്രം ഒപ്പിട്ടുണ്ടോയെന്ന് വ്യക്തമാക്കുമോ;

അര്‍ജന്റീന ഫുട്‌ബോള്‍ ടീം കേരളത്തില്‍ വരുന്നുണ്ടെങ്കില്‍ ആയതുമായി ബന്ധപ്പെട്ട സംഘാടന ചുമതല ആര്‍ക്കാണെന്ന് വ്യക്തമാക്കുമോ;

പ്രസ്തുത സന്ദര്‍ശനവുമായി ബന്ധപ്പെട്ട് കായിക വകുപ്പ് ഏതെല്ലാം സ്‌പോണ്‍സര്‍മാരെ സമീപിച്ചിട്ടുണ്ട്; സ്‌പോണ്‍സര്‍ഷിപ്പുമായി ബന്ധപ്പെട്ട വിശദാംശം ലഭ്യമാക്കുമോ;

പ്രസ്തുത സന്ദര്‍ശനവുമായി ബന്ധപ്പെട്ട് സര്‍ക്കാരിന് ഇതിനോടകം സാമ്പത്തിക ബാധ്യത ഉണ്ടായിട്ടുണ്ടോ; വിശദാംശം നൽകുമോ;

പ്രസ്തുത സന്ദര്‍ശനവുമായി ബന്ധപ്പെട്ട് സര്‍ക്കാരിന് സാമ്പത്തിക ബാധ്യതയോ സാമ്പത്തിക-കായിക നേട്ടമോ ഉണ്ടാകുമോയെന്ന് വിശദമാക്കുമോ?

മുൻ സർക്കാരിന്റെ കാലം മുതൽ നാളിതുവരെ ഓരോ സാമ്പത്തിക വർഷവും കായിക മേഖലയുടെ പ്രവർത്തനങ്ങൾക്കായി ബജറ്റിൽ വകയിരുത്തിയ തുകയും അനുവദിച്ച തുകയും ചെലവഴിച്ച തുകയും സാമ്പത്തിക വർഷം അടിസ്ഥാനത്തിൽ വ്യക്തമാക്കുമോ?

ഈ സർക്കാർ അധികാരത്തിൽ വന്നശേഷം കാഞ്ഞങ്ങാട് മണ്ഡലത്തിൽ കായിക വകുപ്പിന്റെ കീഴിൽ നടപ്പിലാക്കിയ പദ്ധതികൾ ഏതെല്ലാമാണെന്നുള്ള വിശദാംശം നൽകാമോ?

സംസ്ഥാന സ്പോർട്സ് കൗൺസിൽ നിലവിലുള്ളപ്പോൾ ഈ സർക്കാരിന്റെ കാലത്ത് സ്പോർട്സ് കേരള ഫൗണ്ടേഷൻ സ്ഥാപിച്ചതിന്റെ സാഹചര്യം എന്താണെന്ന് വ്യക്തമാക്കുമോ;

എന്തൊക്കെ ചുമതലകളാണ് പ്രസ്തുത സ്ഥാപനം നിറവേറ്റുന്നതെന്നും ഇതിന്റെ പ്രവർത്തനങ്ങൾക്കായി നാളിതുവരെ വിവിധ ഇനങ്ങളിൽ എത്ര തുക ചെലവഴിച്ചു എന്നുമുള്ള വിവരങ്ങൾ ഇനം തിരിച്ചു ലഭ്യമാക്കാമോ;

സംസ്ഥാന സ്പോർട്സ് കൗൺസിൽ നിറവേറ്റുന്ന ഉത്തരവാദിത്തങ്ങൾ എന്തൊക്കെയാണെന്ന് വ്യക്തമാക്കുമോ?

നിലവിൽ തെരഞ്ഞെടുക്കപ്പെട്ട കേരള സ്റ്റേറ്റ് സ്പോർട്സ് കൗൺസിലിന്റെ കാലാവധി പൂർത്തിയായത് എപ്പോഴാണെന്നും അതിലെ അംഗങ്ങള്‍ ആരൊക്കെയാണെന്നും വ്യക്തമാക്കാമോ;

പ്രസ്തുത കൗൺസിലിന്റെ ഭരണ സമിതിക്ക് കാലാവധി നീട്ടുന്നതിനുള്ള ഉത്തരവ് നൽകിയിട്ടുണ്ടോ? എങ്കിൽ ഉത്തരവിന്റെ പകർപ്പ് ലഭ്യമാക്കാമോ;

കേരള സ്റ്റേറ്റ് സ്പോർട്സ് കൗൺസിലിന്റെയും ജില്ലാ സ്പോർട്സ് കൗൺസിലുകളുടെയും കാലാവധി വർഷങ്ങൾക്ക് മുമ്പ് പൂർത്തിയായിട്ടും തെരഞ്ഞെടുപ്പ് നടപടികൾ ആരംഭിക്കാത്തതിന്റെ കാരണം വ്യക്തമാക്കുമോ;

ജില്ലാ സ്പോർട്സ് കൗൺസിലുകളുടെ തെരഞ്ഞെടുപ്പുമായി ബന്ധപ്പെട്ട് സർക്കാർ വിജ്ഞാപനം പുറപ്പെടുവിച്ചിട്ടുണ്ടോയെന്ന് അറിയിക്കുമോ?

ഈ സര്‍ക്കാരിന്റെ കാലയളവില്‍ ജി.വി.രാജ സ്പോർട്സ് സ്ക്കൂളിൽ നടപ്പിലാക്കിയിട്ടുള്ള പദ്ധതികളും, അവയുടെ ഫണ്ട് വിവരങ്ങളും അറിയിക്കാമോ;

ഇവയിൽ പൂർത്തിയാക്കിക്കഴിഞ്ഞ പദ്ധതികളും, നിലവില്‍ നടന്നുകൊണ്ടിരിക്കുന്ന പദ്ധതികളും ഏതെല്ലാമാണ് ; വിശദാംശം നൽകാമോ?

സ്പോർട്സ് ഹോസ്റ്റലിലെ കുട്ടികൾക്ക് ഭക്ഷണ അലവൻസ് കുടിശ്ശിക ഉണ്ടോ; എങ്കിൽ എത്ര മാസത്തെ അലവൻസ് കുടിശ്ശികയുണ്ട്; ആകെ എത്ര തുക വിതരണം ചെയ്യാനുണ്ട്; വിശദാംശം വ്യക്തമാക്കുമോ;

കായിക സംഘടനകൾക്ക് നൽകുന്ന വാർഷിക സഹായം മുടങ്ങിയിട്ടുണ്ടോ; എങ്കിൽ എത്ര വർഷമായി സഹായം മുടങ്ങിയിട്ടുണ്ടെന്ന് വ്യക്തമാക്കുമോ; ഈ ഇനത്തിൽ എത്ര തുകയ്ക്കുള്ള കുടിശ്ശികയാണ് വിതരണം ചെയ്യാനുള്ളത്; പ്രസ്തുത സഹായം മുടങ്ങാനിടയായ സാഹചര്യം എന്താണെന്ന് വ്യക്തമാക്കുമോ?

ആറ്റിങ്ങൽ ശ്രീപാദം സ്റ്റേഡിയത്തിലെ സ്‍പോർട്സ് ഹോസ്റ്റലിൽ എത്ര കുട്ടികളാണ് നിലവിലുള്ളതെന്നും ഇവർ ഏതെല്ലാം കായിക ഇനങ്ങളിലാണ് പരിശീലനം നേടി കൊണ്ടിരിക്കുന്നതെന്നുമുള്ള വിവരം ഒരോ കുട്ടിയുടെയും കായിക ഇനം തിരിച്ച് ലഭ്യമാക്കുമോ;

പ്രസ്തുത സ്റ്റേഡിയത്തിലെ സ്‍പോർട്സ് ഹോസ്റ്റലിൽ നിലവിൽ എത്ര പരിശീലകരെയാണ് നിയമിച്ചിട്ടുള്ളതെന്ന വിവരം ഇവരുടെ പേരും കായിക ഇനവും തിരിച്ച് വ്യക്തമാക്കുമോ?

കേരള സ്റ്റേറ്റ് സ്പോർട്സ് കൗണ്‍സിലിന് കീഴിലുള്ള കോളേജ് സ്പോർട്സ് ഹോസ്റ്റലുകളിലെ കുട്ടികൾക്കുള്ള ഭക്ഷണ അലവന്‍സ് കുടിശികയാണോയെന്ന് വ്യക്ത‍മാക്കുമോ;

പ്രസ്തുത ഹോസ്റ്റലുകളിലെ കുട്ടികൾക്ക് നിലവിൽ നൽകുന്ന ഭക്ഷണ അലവന്‍സ് തുക എത്രയാണെന്ന് വ്യക്തമാക്കാമോ;

പ്രസ്തുത വിദ്യാർത്ഥികൾക്ക് ഭക്ഷണ അലവന്‍സ് കുടിശിക അടക്കം നൽകുന്നതിന് നടപടി സ്വീകരിക്കുമോയെന്ന് വ്യക്തമാക്കാമോ?

കുന്നുമ്മല്‍ വോളിബോള്‍ അക്കാദമിയുടെ നിർമ്മാണ പ്രവൃത്തികള്‍ ഏതു ഘട്ടത്തിലാണെന്ന് അറിയിക്കാമോ; പ്രസ്തുത പ്രവൃത്തി 2025 വര്‍ഷത്തില്‍ പൂര്‍ത്തീകരിക്കുന്നതിന് സ്വീകരിച്ചിട്ടുള്ള നടപടിക്രമങ്ങള്‍ എന്തൊക്കെയെന്ന് വിശദമാക്കാമോ;

കുന്നുമ്മല്‍ വോളിബോള്‍ അക്കാദമിയുടെ ഹോസ്റ്റല്‍ നിര്‍മ്മാണത്തിനായി ബജറ്റില്‍ വകയിരുത്തിയ രണ്ടുകോടി രൂപയുടെ പദ്ധതി ആരംഭിക്കുന്നതിന് സ്വീകരിച്ചിട്ടുള്ള നടപടിക്രമങ്ങള്‍ എന്തൊക്കെയെന്ന് അറിയിക്കാമോ?

തൃപ്രങ്ങോട്ടൂര്‍ ‍ഗ്രാമപഞ്ചായത്തിലെ നരിക്കോട്മലയില്‍ നേരത്തെ അനുവദിച്ച നീന്തല്‍ കുളത്തിന് പകരം കോട്ടയം ഗ്രാമപഞ്ചായത്തിലെ കിണവക്കല്‍ കപ്പാറയില്‍ സ്ഥലം കണ്ടെത്തുകയും പ്രൊപ്പോസല്‍ നല്‍കുകയും ചെയ്തിട്ടുള്ള പുതിയ നീന്തൽക്കുളവുമായി ബന്ധപ്പെട്ട് സ്വീകരിച്ചുവരുന്ന നടപടികളുടെ പുരോഗതി വിശദമാക്കുമോ;

പ്രസ്തുത നീന്തല്‍ക്കുളം നിര്‍മ്മാണത്തിന് തടസ്സങ്ങള്‍ എന്തെങ്കിലും നിലവിലുണ്ടോയെന്ന് വിശദമാക്കുമോ;

നീന്തൽക്കുള നിര്‍മ്മാണം വേഗത്തിൽ പൂര്‍ത്തീകരിക്കാന്‍ എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കുമോ?

കണ്ണൂർ ജില്ലയിലെ തില്ലങ്കേരി വില്ലേജിൽ അന്താരാഷ്ട്ര യോഗ റിസർച്ച് & സ്റ്റഡി സെന്റർ സ്ഥാപിക്കാൻ എന്തൊക്കെ നടപടികളാണ് സ്വീകരിച്ചിട്ടുള്ളത്; വിശദവിവരം ലഭ്യമാക്കാമോ?

മഞ്ചേരി പയ്യനാട് സ്റ്റേഡിയത്തിന്റെ വികസനത്തിനായി ആവിഷ്കരിച്ചിട്ടുള്ള പദ്ധതികൾ എന്തൊക്കെയാണെന്ന് വിശദമാക്കാമോ;

പ്രസ്തുത സ്റ്റേഡിയം നിർമ്മാണ പ്രവൃത്തികളുടെ നിലവിലെ സ്ഥിതി വ്യക്തമാക്കാമോ;

പ്രസ്തുത പദ്ധതിയുടെ പൂർത്തീകരണം എപ്പോഴാണെന്ന് അറിയിക്കാമോ; ആയതിന്റെ മാസ്റ്റർ പ്ലാൻ അടക്കമുള്ള വിശദാംശം ലഭ്യമാക്കാമോ?

വൈക്കം മണ്ഡലത്തിലെ ഇരുമ്പയം പെരുന്തട്ട് സ്റ്റേഡിയം നിർമ്മാണത്തിന് എന്തെങ്കിലും തടസ്സങ്ങൾ നിലവിലുണ്ടോയെന്ന് വ്യക്തമാക്കാമോ;

പ്രസ്തുത സ്റ്റേഡിയം നിർമ്മാണം എന്നത്തേക്ക് പൂർത്തീകരിച്ച് ജനങ്ങൾക്ക് തുറന്നു കൊടുക്കാൻ കഴിയുമെന്ന് വ്യക്തമാക്കാമോ?

ആലപ്പുഴ മണ്ഡലത്തില്‍ വകുപ്പ് മുഖേന എന്തൊക്കെ പ്രവൃത്തികളാണ് നടപ്പിലാക്കിയതെന്നും അവയുടെ പുരോഗതി സംബന്ധിച്ച വിവരവും ലഭ്യമാക്കാമോ;

പ്രസ്തുത മണ്ഡലത്തില്‍ നിർമ്മാണത്തിലിരിക്കുന്ന ഇന്‍ഡോര്‍ സ്റ്റേഡിയങ്ങളുടെ നിലവിലെ സ്ഥിതി എന്താണെന്നും പ്രസ്തുത നിർമ്മാണ പ്രവൃത്തികൾ എപ്പോൾ പൂര്‍ത്തീകരിക്കാന്‍ കഴിയുമെന്നും ഇവയ്ക്ക് ചെലവഴിക്കുന്ന തുക എത്രയെന്നുമുള്ള വിശദവിവരം ലഭ്യമാക്കാമോ?

പൂഞ്ഞാര്‍ മണ്ഡലത്തിലെ പൂഞ്ഞാര്‍ ഐ.എച്ച്.ആര്‍.ഡി. എഞ്ചിനീയറിംഗ് കോളേജില്‍ ഖേലോ ഇന്ത്യ പദ്ധതിയിൽ ഉൾപ്പെടുത്തി ഒരു സ്റ്റേഡിയം നിർമ്മിക്കുന്നതിനായി സമര്‍പ്പിച്ച അപേക്ഷയിന്മേൽ സ്വീകരിച്ചുവരുന്ന നടപടികളുടെ വിശദാംശം വ്യക്തമാക്കുമോ?

എം.എല്‍.എ. ആസ്തി വികസന പദ്ധതിയില്‍ നിന്നും തുക അനുവദിച്ചിട്ടുളളതും സ്പോര്‍ട്സ് കേരള ഫൗണ്ടേഷന്‍ നി‍ര്‍വ്വഹണ ചുമതല ഏറ്റെടുത്തിട്ടുളളതുമായ നെടുമ്പന സ്റ്റേഡിIHRDയത്തിന്റെ നിര്‍മ്മാണപ്രവര്‍ത്തന പുരോഗതി വിശദമാക്കാമോ?

പാലക്കാട് ഇന്ദിരാഗാന്ധി മുന്‍സിപ്പല്‍ സ്റ്റേഡിയം ഒരു കായിക മത്സരവും നടത്താന്‍ കഴിയാത്ത വിധം ഉപയോഗശൂന്യമായി കിടക്കുന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത സ്റ്റേഡിയത്തിന്റെ ശോചനീയാവസ്ഥ പരിഹരിക്കുന്നതിനായി സ്റ്റേഡിയത്തിന്റെ പുനരുദ്ധാരണ പ്രവര്‍ത്തനങ്ങള്‍ ആരംഭിക്കുന്നതിനുള്ള തുക അനുവദിക്കുന്നകാര്യം പരിഗണിക്കുമോയെന്നു വ്യക്തമാക്കുമോ?

ഓരോ മണ്ഡലത്തിനും ഓരോ സ്റ്റേഡിയം എന്ന 2022- ലെ ബജറ്റ് പ്രഖ്യാപന പ്രകാരം എത്ര മണ്ഡലങ്ങളിൽ സ്റ്റേഡിയം നിർമ്മാണം പൂർത്തിയാക്കിയിട്ടുണ്ടെന്നും അത് എവിടെയെല്ലാമാണെന്നും വ്യക്തമാക്കാമോ;

പ്രസ്തുത പ്രഖ്യാപന പ്രകാരം എത്ര മണ്ഡലങ്ങളിൽ സ്റ്റേഡിയം നിർമ്മാണം ആരംഭിച്ചിട്ടുണ്ടെന്നും അത് എവിടെയൊക്കെയാണെന്നും വ്യക്തമാക്കാമോ;

ഇപ്രകാരം എത്ര മണ്ഡലങ്ങളിൽ സ്റ്റേഡിയം നിർമ്മാണം ആരംഭിക്കാനുണ്ടെന്നും അത് എവിടെയെല്ലാമാണെന്നും വ്യക്തമാക്കാമോ;

ഓരോ മണ്ഡലങ്ങളിലും സ്റ്റേഡിയം നിർമ്മാണത്തിന് അനുവദിച്ചിട്ടുള്ള തുക, എം.എൽ.എ. ഫണ്ടിൽ നിന്ന് അനുവദിച്ചിട്ടുള്ള തുക,. മറ്റ് ഫണ്ടുകളിൽ നിന്ന് ലഭ്യമായിട്ടുള്ള തുക എന്നിവ ഇനം തിരിച്ച് അറിയിക്കാമോ;

സ്റ്റേഡിയം നിർമ്മാണം ആരംഭിക്കാത്ത മണ്ഡലങ്ങളിൽ അത് എന്നത്തേക്ക് ആരംഭിക്കുമെന്ന് വ്യക്തമാക്കാമോ?

ബാലുശ്ശേരി ഗ്രാമപഞ്ചായത്ത് സ്റ്റേഡിയം ആധുനിക രീതിയില്‍ നവീകരിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദമാക്കാമോ;

പ്രസ്തുത പ്രവൃത്തി എപ്പോള്‍ പൂര്‍ത്തീകരിക്കാനാണ് ഉദ്ദേശിക്കുന്നത്; വിശദമാക്കാമോ?

ഹരിപ്പാട് മണ്ഡലത്തില്‍ സ്പോര്‍ട്സ് വകുപ്പിന്റെ നേതൃത്വത്തില്‍ നടന്നുവരുന്ന വിവിധ പ്രവൃത്തികള്‍ ഏതെല്ലാമാണെന്ന് വ്യക്തമാക്കാമോ;

ഹരിപ്പാട് ബോയ്സ് ഹയര്‍സെക്കന്‍ഡറി സ്കൂളിലെ മിനി സ്റ്റേഡിയത്തിന്റെ നിര്‍മ്മാണ പ്രവര്‍ത്തനങ്ങള്‍ വൈകുന്നതിന്റെ കാരണം അറിയിക്കാമോ; പ്രസ്തുത നിര്‍മ്മാണ പ്രവര്‍ത്തനങ്ങള്‍ ഊര്‍ജ്ജിതപ്പെടുത്തുന്നതിന് നടപടി സ്വീകരിക്കുമോയെന്ന് വ്യക്തമാക്കാമോ?

ഒരു പഞ്ചായത്തില്‍ ഒരു കളിക്കളം പദ്ധതിയില്‍ ഉള്‍പ്പെടുത്തി നിലമ്പൂർ നിയോജക മണ്ഡലത്തിൽ ഉൾപ്പെടുന്ന വഴിക്കടവ് ഗ്രാമപഞ്ചായത്തിലെ പാലാട് ഗ്രൗണ്ടില്‍ സ്റ്റേഡിയം നിര്‍മ്മാണത്തിനായി തുക വകയിരുത്തിയിട്ടുണ്ടോ ; എങ്കില്‍ എത്രയാണെന്ന് അറിയിക്കുമോ;

പ്രസ്തുത സ്റ്റേഡിയത്തിന്റെ നിര്‍മ്മാണ പ്രവൃത്തി എപ്പോള്‍ ആരംഭിക്കുമെന്ന് വ്യക്തമാക്കാമോ?

'ഒരു പഞ്ചായത്ത് ഒരു കളിക്കളം പദ്ധതി'യില്‍ ഉള്‍പ്പെടുത്തിയിട്ടുള്ള കോട്ടക്കല്‍ മണ്ഡലത്തിലെ ഇരിമ്പിളിയം സ്റ്റേഡിയത്തിന്റെ നിര്‍മ്മാണ പ്രവൃത്തിയുടെ പുരോഗതി വിശദമാക്കാമോ;

പ്രസ്തുത നിര്‍മ്മാണവുമായി ബന്ധപ്പെട്ട് നാളിതുവരെ പൂര്‍ത്തീകരിച്ചിട്ടുള്ള പ്രവൃത്തികൾ എന്തൊക്കെയാണെന്ന് വിശദമാക്കുമോ; പ്രസ്തുത പദ്ധതി നിലവില്‍ ഏത് ഘട്ടത്തിലാണെന്നും എന്നത്തേക്ക് പൂര്‍ത്തീകരിക്കാനാകുമെന്നും അറിയിക്കുമോ?

കോതമംഗലം ചേലാട് സ്റ്റേഡിയത്തിന്റെ നിലവിലെ നിർമ്മാണ പുരോഗതി വ്യക്തമാക്കാമോ;

സ്റ്റേഡിയം നിര്‍മ്മാണവുമായി ബന്ധപ്പെട്ട സാങ്കേതിക തടസ്സങ്ങള്‍ വേഗത്തില്‍ പരിഹരിച്ച് നിര്‍മ്മാണം ആരംഭിക്കുന്നതിനാവശ്യമായ അടിയന്തര നടപടി സ്വീകരിക്കുമോയെന്ന് വ്യക്തമാക്കുമോ?

തിരുവനന്തപുരം ഗ്രീന്‍ ഫീല്‍ഡ് സ്റ്റേഡിയത്തില്‍ ഈ വര്‍ഷം നടത്തുന്നതിനായി നിശ്ചയിക്കപ്പെട്ടിട്ടുള്ള അന്താരാഷ്ട്ര മത്സരങ്ങളുടെ വിശദാംശം ലഭ്യമാക്കാമോ;

പ്രസ്തുത സ്റ്റേഡിയത്തിലേയ്ക്ക് കൂടുതല്‍ അന്താരാഷ്ട്ര മത്സരങ്ങള്‍ കൊണ്ടുവരുന്നതിനായി കായിക വകുപ്പ് സ്വീകരിച്ച നടപടികള്‍ വിശദമാക്കാമോ?

കായംകുളം മണ്ഡലത്തില്‍ വകുപ്പ് വഴി അനുവദിച്ച ഭരണിക്കാവ് ഗവണ്‍മെന്റ് യു. പി. എസ്., കണ്ടല്ലൂര്‍ എന്നിവിടങ്ങളിലെ സ്റ്റേഡിയങ്ങളുടെ നിര്‍മ്മാണത്തിന് ഭരണാനുമതി ലഭിച്ച് നാല് വര്‍ഷം കഴിഞ്ഞിട്ടും പൂര്‍ത്തീകരിക്കാന്‍ കഴിഞ്ഞിട്ടില്ല എന്ന വിവരം ശ്രദ്ധയില്‍പ്പെട്ടിട്ടുണ്ടോ; എങ്കില്‍ അതിന്റെ കാരണം വ്യക്തമാക്കാമോ; നിര്‍മ്മാണ പ്രവര്‍ത്തനങ്ങള്‍ എത്രയും വേഗം പൂര്‍ത്തീകരിക്കുന്നതിന് ആവശ്യമായ നടപടി സ്വീകരിക്കുമോ?

സംസ്ഥാനത്തെ സര്‍ക്കാര്‍ സ്കൂളുകളില്‍ എത്ര കായിക അധ്യാപകരുണ്ടെന്ന് ജില്ല തിരിച്ച് വ്യക്തമാക്കാമോ;

പ്രസ്തുത സ്കൂളുകളില്‍ നിലവില്‍ എത്ര കായിക അധ്യാപക തസ്തികകൾ ഒഴിവുണ്ടെന്ന് ജില്ല തിരിച്ച് അറിയിക്കാമോ;

ഇവരുടെ വേതന നിരക്ക് യു.പി., ഹൈസ്കൂള്‍ എന്നിങ്ങനെ തരംതിരിച്ച് പരിഷ്കരിക്കാന്‍ ആലോചിക്കുന്നുണ്ടോ;

ഹയര്‍ സെക്കന്‍ഡറി തലത്തില്‍ കായിക അധ്യാപക തസ്തിക സൃഷ്ടിക്കുവാന്‍ പദ്ധതിയുണ്ടോയെന്ന് വ്യക്തമാക്കാമോ?

2016 മുതൽ നാളിതുവരെ ഹജ്ജ് യാത്രയുമായി ബന്ധപ്പെട്ട് കേന്ദ്ര ഹജ്ജ് കമ്മിറ്റിയിൽ നിന്നും സംസ്ഥാന ഹജ്ജ് കമ്മിറ്റിക്ക് എത്ര തുകയാണ് ലഭിച്ചിട്ടുള്ളത് എന്നതിന്റെ വർഷം തിരിച്ചുള്ള കണക്ക് ലഭ്യമാക്കാമോ;

പ്രസ്തുത തുകയിൽ നിന്നും സംസ്ഥാന ഹജ്ജ് കമ്മിറ്റി എത്ര രൂപ ഏതെല്ലാം ഇനത്തിൽ ചെലവഴിച്ചു എന്നതിന്റെ വർഷം, ഇനം, തുക എന്നിവ തിരിച്ചുള്ള കണക്ക് ലഭ്യമാക്കാമോ;

കേന്ദ്ര ഹജ്ജ് കമ്മിറ്റിയിൽ നിന്നും ലഭിക്കുന്ന തുകക്ക് പുറമേ സംസ്ഥാന ഹജ്ജ് കമ്മിറ്റിയുടെ ധനാഗമ മാർഗങ്ങൾ എന്തെല്ലാമാണെന്നും 2016 മുതൽ നാളിതുവരെ എത്ര തുക ഈ ഇനത്തിൽ ലഭിച്ചുവെന്നും വ്യക്തമാക്കാമോ;

സംസ്ഥാന ഹജ്ജ് കമ്മിറ്റിക്ക് കണ്ണൂർ ഹജ്ജ് ഹൗസ് നിർമ്മിക്കുന്നതിനായി 2025-ലെ ഹജ്ജ് തീർത്ഥാടനവുമായി ബന്ധപ്പെട്ട് എത്ര രൂപ സംഭാവനയായി ലഭിച്ചുവെന്ന് വിശദമാക്കാമോ?

2016 മുതൽ ഹജ്ജ് കർമ്മം നിർവഹിക്കുന്നതിന് വേണ്ടി സംസ്ഥാന ഹജ്ജ് കമ്മിറ്റി മുഖേന ഓരോ വർഷവും എത്ര അപേക്ഷകൾ ലഭിച്ചുവെന്നും ഇതിൽ എത്രപേർക്ക് ഹജ്ജ് കർമ്മം നിർവഹിക്കാൻ ഓരോ വർഷവും അവസരം ലഭിച്ചുവെന്നും വിശദമാക്കാമോ;

സംസ്ഥാനത്ത് ഏതെല്ലാം സ്ഥലങ്ങളിലാണ് പ്രസ്തുത വർഷങ്ങളിൽ ഹജ്ജ് പുറപ്പെടൽ കേന്ദ്രം ഉണ്ടായിരുന്നതെന്ന് വ്യക്തമാക്കുമോ; ഓരോ ഹജ്ജ് പുറപ്പെടൽ കേന്ദ്രത്തിൽ നിന്നും എത്ര പേരാണ് പ്രസ്തുത വർഷങ്ങളിൽ ഹജ്ജ് കമ്മിറ്റി മുഖേന യാത്രയായതെന്ന് അറിയിക്കാമോ;

കോഴിക്കോട് വിമാനത്താവളത്തിന്റെ പുറപ്പെടൽ കേന്ദ്രം വഴി പോകുന്ന ഹജ്ജ് യാത്രക്കാരില്‍ നിന്നും, സംസ്ഥാനത്തെ മറ്റ് പുറപ്പെടല്‍ കേന്ദ്രങ്ങളില്‍ നല്കുന്നതിനെക്കാളും അമിതചാർജ് ഈടാക്കുന്നത് മൂലം യാത്രക്കാർ കുറയുന്നത് ശ്രദ്ധയിൽപ്പെട്ടിട്ടുണ്ടോ; ഈ അമിതചാർജ് കുറക്കുന്നതിന് സംസ്ഥാന ഹജ്ജ് കമ്മിറ്റി എന്ത് നടപടിയാണ് സ്വീകരിച്ചതെന്ന് വ്യക്തമാക്കുമോ;

കോഴിക്കോട് ഹജ്ജ് പുറപ്പെടൽ കേന്ദ്രത്തിൽ നിന്നുമുള്ള യാത്രക്കാരുടെ യാത്രാചാർജ് വർദ്ധനവിനെതിരെ സുപ്രീംകോടതിയിൽ നടന്ന കേസിൽ കേന്ദ്ര ഹജ്ജ് കമ്മിറ്റി നൽകിയ സത്യവാങ്മൂലം സംസ്ഥാന ഹജ്ജ് കമ്മിറ്റിയുടെ ശ്രദ്ധയിൽ വന്നിട്ടുണ്ടോ; പ്രസ്തുത വിഷയം സംബന്ധിച്ച് സംസ്ഥാന ഹജ്ജ് കമ്മിറ്റിയോട് കേന്ദ്ര ഹജ്ജ് കമ്മിറ്റി എന്തെങ്കിലും അഭിപ്രായം ആരാഞ്ഞിരുന്നോ; വിശദാംശം ലഭ്യമാക്കുമോ?

കരിപ്പൂർ വിമാനത്താവളത്തിൽ നിന്നും പുറപ്പെടുന്ന ഹജ്ജ് യാത്രികർക്ക് വിമാന യാത്രക്കൂലിയിൽ നാല്പതിനായിരം രൂപയുടെ വർദ്ധനവ് കഴിഞ്ഞവർഷം നടപ്പിലാക്കിയത് ഈ വർഷം കുറയ്ക്കുവാനോ പൂർണ്ണമായും ഒഴിവാക്കുവാനോ സർക്കാർ നടപടി സ്വീകരിക്കുമോ;

ഹജ്ജിനു പോകുന്ന യാത്രക്കാർക്കായി കേരളത്തിൽ നിന്നും പുറപ്പെടുന്ന വിമാന സര്‍വ്വീസുകളുടെ ഷെഡ്യൂൾ വിവരങ്ങൾ നൽകാമോ;

ഈ വർഷം കേരളത്തിൽ നിന്നുള്ള ഹജ്ജ് യാത്രക്കാര്‍ക്ക് സുഗമമായി ഹജ്ജ് നിർവഹിച്ച് മടങ്ങി വരുന്നതിന് സർക്കാർ തലത്തിൽ സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ; വിശദാംശം ലഭ്യമാക്കാമോ?

വടക്കാഞ്ചേരി റെയില്‍വേ സ്റ്റേഷനില്‍ പുരോഗമിക്കുന്ന നിര്‍മ്മാണ പ്രവര്‍ത്തനങ്ങളുടെ വിശദാംശം ലഭ്യമാക്കാമോ;

നേരത്തെ അംഗീകരിച്ച എസ്റ്റിമേറ്റ് തുക വർദ്ധിപ്പിച്ച് എസ്റ്റിമേറ്റ് റിവൈസ് ചെയ്ത് കൂടുതൽ തുക അനുവദിച്ചിട്ടുണ്ടോ; എങ്കിൽ അധികമായി അനുവദിച്ച തുക ഉപയോഗിച്ച് നിർവ്വഹിക്കുന്ന പ്രവൃത്തികളുടെ വിശദാംശം നൽകാമോ;

പ്രസ്തുത നിര്‍മ്മാണ പ്രവര്‍ത്തനങ്ങള്‍ എപ്പോൾ പൂര്‍ത്തിയാക്കാനാകുമെന്നാണ് കണക്കാക്കിയിട്ടുള്ളതെന്ന് അറിയിക്കാമോ;

വടക്കാഞ്ചേരി റെയില്‍വേ സ്റ്റേഷനിലേയ്ക്ക് സെക്കന്റ് എൻട്രിയും പടിഞ്ഞാറൻ കവാടത്തിലേക്ക് ഫൂട്ട് ഓവർ ബ്രിഡ്ജും ഉൾപ്പെടെ സ്ഥലം എം.എൽ.എ. ഉന്നയിച്ച ആവശ്യങ്ങൾ രണ്ടാംഘട്ട വികസന പ്രവർത്തനങ്ങളിൽ ഉൾപ്പെടുത്തുന്നത് റെയിൽവേയുടെ പരിഗണനയിലുണ്ടോയെന്ന് വ്യക്തമാക്കാമോ?

കേരളത്തിലെ വളരെ പ്രധാനപ്പെട്ട റെയിൽവേ സ്റ്റേഷനായ കോഴിക്കോട് റെയിൽവേ സ്റ്റേഷനിലെ റിസർവ്വേഷൻ കൗണ്ടർ ഒരെണ്ണമാക്കി മാറ്റിയത് ശ്രദ്ധയിൽപ്പെട്ടിട്ടുണ്ടോ;

പ്രസ്തുത റിസർവ്വേഷൻ കൗണ്ടറുകളുടെ എണ്ണം വര്‍ദ്ധിപ്പിക്കുന്നതിന് എന്തെങ്കിലും നടപടി സ്വീകരിച്ചിട്ടുണ്ടോയെന്ന് അറിയിക്കുമോ?