സംസ്ഥാന സഹകരണ തിരഞ്ഞെടുപ്പ് കമ്മീഷന്റെ 28.03.2025 - ലെ ഇ 885/2025/എസ്. സി. ഇ. സി. നമ്പർ ഉത്തരവ് പ്രകാരം നടത്തിയ മൂവാറ്റുപുഴ സർക്കിൾ സഹകരണ യൂണിയൻ ഭരണസമിതി തിരഞ്ഞെടുപ്പിൽ വിജയിച്ചവർക്ക് നാളിതുവരെ ഭരണസമിതി അംഗങ്ങളായി ചുമതല നൽകാത്തതും ചെയർമാനെ തിരഞ്ഞെടുക്കാത്തതും ശ്രദ്ധയിൽപ്പെട്ടിട്ടുണ്ടോ; എങ്കിൽ അതിന്റെ കാരണം വിശദമാക്കാമോ;

1969 -ലെ കേരള സഹകരണസംഘം നിയമം /ചട്ടം എന്നിവയിൽ നിഷ്കർഷിച്ചിട്ടുള്ള വ്യവസ്ഥകൾ പ്രകാരം തിരഞ്ഞെടുക്കപ്പെട്ട അംഗങ്ങളും ക്വാറവും ഉണ്ടെന്നിരിക്കെ അതിന് വിരുദ്ധമായി ചെയർമാൻ തിരഞ്ഞെടുപ്പ് നടത്താത്തത് ആരുടെ വീഴ്ചയാണെന്ന് പരിശോധിച്ച് അറിയിക്കാമോ;

മൂവാറ്റുപുഴ സർക്കിൾ സഹകരണ യൂണിയൻ ഭരണസമിതിയിലേക്ക് തിരഞ്ഞെടുക്കപ്പെട്ട അംഗങ്ങൾക്ക് ചുമതല നൽകുന്നതിനും ചെയർമാൻ തിരഞ്ഞെടുപ്പ് നടത്തുന്നതിനും അടിയന്തര നടപടികൾ സ്വീകരിക്കുമോ?

സംസ്ഥാനത്ത് സഹകരണ മേഖലയെ നവീകരിക്കാൻ സ്വീകരിച്ചു വരുന്ന നടപടികൾ എന്തെല്ലാമെന്ന് വ്യക്തമാക്കുമോ;

സഹകരണ മേഖലയിൽ കൂടുതൽ വ്യവസായ സംരംഭങ്ങൾ ആരംഭിക്കാൻ നടപടി സ്വീകരിക്കുമോ;

സഹകരണ മേഖലയിൽ നിലനിൽക്കുന്ന ആക്ഷേപങ്ങൾ പരിഹരിക്കാൻ സംസ്ഥാന തലത്തിൽ ഒരു മോണിറ്ററിംഗ് കമ്മിറ്റി രൂപീകരിക്കുമോ; എങ്കിൽ വിശദാംശം ലഭ്യമാക്കുമോ?

സംസ്ഥാനത്ത് സഹകരണ മേഖലയിലെ ഡയറക്ടര്‍മാര്‍ക്കും ജീവനക്കാര്‍ക്കും തുടര്‍ പരിശീലനം നല്‍കുന്ന ഐ. സി. എം. (ഇൻസ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്മെന്റ്) കേന്ദ്രങ്ങള്‍ നിലവില്‍ എവിടെയൊക്കെയാണ് പ്രവര്‍ത്തിക്കുന്നതെന്നുള്ള വിശദാംശം ലഭ്യമാക്കാമോ;

ഇത്തരത്തിലുള്ള ഒരു സ്ഥാപനം കാസര്‍ഗോഡ് ജില്ലയില്‍ തുടങ്ങണമെന്ന ആവശ്യം ഉന്നയിച്ച് നിവേദനം ലഭിച്ചിട്ടുണ്ടോയെന്നും എങ്കില്‍ ഇതിന്റെ തുടര്‍നടപടി ഏത് ഘട്ടത്തിലാണെന്നും വ്യക്തമാക്കാമോ;

സര്‍ക്കാരിന് സാമ്പത്തിക ബാധ്യത ഉണ്ടാകാതെ ഈ മേഖലയിലെ ഡയറക്ടര്‍മാര്‍ക്കും ജീവനക്കാര്‍ക്കും ഉന്നത തല പരിശീലനം നല്‍കുന്ന കേന്ദ്രം കാസര്‍ഗോഡ് ജില്ലയില്‍ അനുവദിക്കുന്നത് പരിഗണിക്കുമോയെന്ന് വ്യക്തമാക്കുമോ?

അരുവിക്കര മണ്ഡലത്തിലെ വിവിധ സഹകരണ സ്ഥാപനങ്ങളില്‍ ഈ സര്‍ക്കാര്‍ അധികാരത്തില്‍ വന്നതിന് ശേഷം വിവിധ പദ്ധതികള്‍ക്കായി അനുവദിച്ച തുകയും അവയുടെ വിശദാംശങ്ങളും സ്ഥാപനം തിരിച്ച് അറിയിക്കുമോ?

സഹകരണ ബാങ്കുകളിൽ ഭരണസമിതി അറിയാതെ ജീവനക്കാർ നടത്തുന്ന ക്രമക്കേടുകൾക്ക് ഭരണസമിതിക്കെതിരെ നടപടി വരുന്നത് തടയുന്നതിനും ക്രമക്കേടുകൾ കണ്ടെത്തുന്നതിനും ഭരണ സമിതികൾക്കാവശ്യമായ പരിശീലനം നൽകുന്നതിനായി എന്ത് നടപടിയാണ് സ്വീകരിക്കുകയെന്ന് വ്യക്തമാക്കുമോ;

ക്രമക്കേട് നടത്തി വിദേശത്തേക്ക് കടന്നുകളയുന്ന ജീവനക്കാരെ തിരികെ നാട്ടിലെത്തിച്ച് അവരുടെ പേരില്‍ ശിക്ഷാനടപടി സ്വീകരിക്കാൻ എന്ത് സംവിധാനമാണ് ഏർപ്പെടുത്തിയിട്ടുള്ളതെന്ന് വ്യക്തമാക്കുമോ;

വർഷാവർഷം നടത്തുന്ന ഓഡിറ്റിംഗ് സംവിധാനം കാര്യക്ഷമമാക്കി ക്രമക്കേടുകൾ ഉണ്ടെങ്കിൽ വേഗത്തിൽ അവ കണ്ടെത്തുന്നതിന് നടപടി സ്വീകരിക്കുമോ;

വർഷങ്ങളായി നടക്കുന്ന ക്രമക്കേടുകൾ ഓഡിറ്റിംഗിൽ കണ്ടുപിടിക്കാൻ കഴിയാത്ത സാഹചര്യമുണ്ടെങ്കിൽ ഓഡിറ്റിംഗ് സംവിധാനം കൂടുതൽ മെച്ചപ്പെടുത്തുന്നതിന് നടപടി സ്വീകരിക്കുമോ?

സംസ്ഥാനത്ത് ഗ്രാമീണ മേഖലയിലെ മാര്‍ക്കറ്റുകള്‍ കേന്ദ്രീകരിച്ച് നടക്കുന്ന വട്ടിപ്പലിശ സമ്പ്രദായത്തിന് തടയിടുവാന്‍ സഹകരണ വകുപ്പ് പദ്ധതി ആവിഷ്കരിച്ചിട്ടുണ്ടോയെന്ന് വ്യക്തമാക്കാമോ;

ഇതിനായി റീ-കൂപ്പര്‍മാരെ നിയോഗിക്കുന്നതിനുള്ള വ്യവസ്ഥകള്‍ എന്തെല്ലാമാണ്;

സുരക്ഷിതമായ തിരിച്ചടവ് ഉറപ്പാക്കുന്നതിന് സ്വീകരിക്കുവാന്‍ ഉദ്ദേശിക്കുന്ന നടപടികള്‍ വെളിപ്പെടുത്താമോ;

ഈ സംവിധാനത്തിന് പ്രത്യേക മൊബൈല്‍ ആപ്പ് തയ്യാറാക്കി തട്ടിപ്പുകളുടെ സാധ്യത കുറയ്ക്കുവാന്‍ ഉദ്ദേശിക്കുന്നുണ്ടോയെന്ന് വ്യക്തമാക്കാമോ?

ഭരണഘടന വിഭാവനം ചെയ്യുന്ന സഹകരണ ഫെഡറലിസത്തിന് വിരുദ്ധമായി രൂപീകരിച്ചിട്ടുള്ള പുതിയ ദേശീയ സഹകരണ നയം സംസ്ഥാനത്തെ സംബന്ധിച്ച് അപ്രസക്തമാണെന്ന് വിലയിരുത്തപ്പെട്ടിട്ടുണ്ടോ; എങ്കിൽ അതിന്റെ കാരണം പരിശോധിച്ചിട്ടുണ്ടോ; വിശദമാക്കുമോ;

2018-ല്‍ സംസ്ഥാന സർക്കാർ ആവിഷ്കരിച്ച് വിജയകരമായി നടപ്പാക്കി വരുന്ന വിഷയങ്ങള്‍ ദേശീയ സഹകരണ നയത്തിന്റെ ഭാഗമായിട്ടുണ്ടോ; വിശദമാക്കുമോ;

രാജ്യത്തെ സഹകരണ മേഖലയില്‍ ഏകീകൃത സോഫ്റ്റ്‍വെയർ സംവിധാനം നടപ്പാക്കുമെന്ന കേന്ദ്ര സർക്കാരിന്റെ പ്രഖ്യാപനം ഓരോ സംസ്ഥാനത്തും വ്യത്യസ്തമായ ഉല്‍പ്പന്നങ്ങളും സേവനങ്ങളും പ്രദാനം ചെയ്യുന്ന സംഘങ്ങളുടെ പ്രവർത്തനത്തെ ദോഷകരമായി ബാധിക്കുന്ന സാഹചര്യത്തില്‍ ഇതിനെതിരെ കേന്ദ്ര സർക്കാരില്‍ സമ്മർദം ചെലുത്തുവാൻ തയ്യാറാകുമോ; വിശദമാക്കുമോ?

സഹകരണ മേഖലയുടെ ശാക്തീകരണത്തിനായി ഈ സര്‍ക്കാര്‍ നടപ്പിലാക്കിയിട്ടുള്ള പ്രവര്‍ത്തനങ്ങള്‍ വിശദീകരിക്കാമോ?

നിലവിലെ സർക്കാരിന്റെ കാലയളവിൽ സഹകരണ വകുപ്പിന്റെ കീഴിലുള്ള വിവിധ സ്ഥാപനങ്ങളും ഏജൻസികളും നാളിതുവരെ നൽകിയിട്ടുള്ള പരസ്യങ്ങളുടെ വിശദ വിവരം, പരസ്യം നൽകിയ സ്ഥാപനം പരസ്യത്തിനായി ചെലവഴിച്ച തുക, ഏത് ഏജൻസി മുഖേനയാണ് പരസ്യം നൽകിയത്, പ്രസ്തുത ഏജൻസിയെ തെരഞ്ഞെടുത്ത നടപടിക്രമം, ഏത് പദ്ധതിയുടെ ഭാഗമായാണ് പരസ്യം നൽകിയത് എന്നിവ സംബന്ധിച്ച വിശദാംശം ലഭ്യമാക്കാമോ;

പ്രസ്തുത കാലയളവിൽ പരസ്യ ഇനത്തിൽ ആകെ ചെലവഴിച്ച തുക എത്ര; വ്യക്തമാക്കാമോ?

സഹകരണ വകുപ്പ് ജീവനക്കാരുടെ ആരോഗ്യ ഇന്‍ഷുറന്‍സ് പദ്ധതി സംബന്ധിച്ച് വകുപ്പ് തീരുമാനങ്ങള്‍ കൈക്കൊണ്ടിട്ടുണ്ടോ; എങ്കില്‍ വിശദാംശം ലഭ്യമാക്കാമോ?

സഹകരണ ബാങ്കുകളിലെയും മറ്റ് സഹകരണ സ്ഥാപനങ്ങളിലെയും ജീവനക്കാര്‍ക്കും പെന്‍ഷന്‍കാര്‍ക്കും മെ‍ഡിസെപ് മാതൃകയില്‍ മെഡിക്കല്‍ ഇന്‍ഷുറന്‍സ് നടപ്പാക്കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ;

സഹകരണ മേഖലയിലെ ജീവനക്കാര്‍ക്കും പെന്‍ഷന്‍കാര്‍ക്കും മെഡിക്കല്‍ ഇന്‍ഷുറന്‍സ് നടപ്പാക്കുന്നതിന് തീരുമാനിച്ചിട്ടുണ്ടോ; എങ്കില്‍ ഈ ആവശ്യത്തിന്‍മേല്‍ നാളിതുവരെ സ്വീകരിച്ച നടപടികള്‍ വിശദീകരിക്കാമോ?

സംസ്ഥാനത്ത് വിവിധ സഹകരണ സംഘങ്ങളുടെ കീഴില്‍ പ്രവർത്തിക്കുന്ന ചെറുകിട സംരംഭങ്ങള്‍ക്ക് സഹകരണ വകുപ്പ് ഏതെങ്കിലും ധനസഹായം നല്‍കാറുണ്ടോയെന്ന് വ്യക്തമാക്കാമോ;

സംഘങ്ങള്‍ക്ക് കീഴില്‍ വ്യവസായ സംരംഭങ്ങള്‍ ആരംഭിക്കുന്നതിന് വ്യവസായ വകുപ്പുമായി ചേര്‍ന്ന് പദ്ധതി വിഭാവനം ചെയ്തിട്ടുണ്ടോ; എങ്കിൽ വിശദമാക്കാമോ?

നേമം സർവീസ് സഹകരണ ബാങ്കിലെ നിക്ഷേപങ്ങൾ മടക്കി നൽകുന്നില്ലെന്ന കാര്യം ശ്രദ്ധയിൽപ്പെട്ടിട്ടുണ്ടോ;

സഹകരണ വകുപ്പിന്റെ പരിശോധനയിൽ നിക്ഷേപത്തിൽ എത്ര കോടി രൂപയുടെ കുറവുള്ളതായി കണ്ടെത്തിയിട്ടുണ്ടെന്ന് വ്യക്തമാക്കാമോ;

ഡയറക്ടർ ബോർഡിലെ എത്രപേർക്കെതിരെ, ആർക്കെല്ലാമെതിരെ സഹകരണ വകുപ്പ് വകുപ്പുതല നടപടി എടുത്തിട്ടുണ്ടെന്ന് വ്യക്തമാക്കാമോ;

ബാങ്കിന്റെ നിക്ഷേപ സർട്ടിഫിക്കറ്റ് കെ. എസ്. എഫ്. ഇ. - യിൽ വ്യാജമായി ഈട് നൽകി തിരിമറി നടത്തിയതായി ശ്രദ്ധയിൽപ്പെട്ടിട്ടുണ്ടോ; കെ. എസ്. എഫ്. ഇ. - യ്ക്ക് എത്ര തുകയാണ് തിരിമറിയിൽ നഷ്ടപ്പെട്ടിരിക്കുന്നതെന്നും ചിട്ടി തുക കൈപ്പറ്റിയ വ്യക്തിയിൽ നിന്നും പ്രസ്തുത തുക ഈടാക്കാൻ എന്ത് നടപടി സ്വീകരിച്ചുവെന്നും വ്യക്തമാക്കാമോ;

വർഷങ്ങളായി ഈ ബാങ്കിൽ നടന്നിട്ടുള്ള ക്രമക്കേടുകൾ യഥാസമയം കണ്ടെത്താത്തത് സഹകരണ വകുപ്പിന്റെ വീഴ്ചയാണെന്ന് വിലയിരുത്തിയിട്ടുണ്ടോയെന്ന് വ്യക്തമാക്കാമോ;

നിക്ഷേപകരെ സഹായിക്കുന്നതിന് സർക്കാരോ, സഹകരണ വകുപ്പോ എന്ത് നടപടികൾ സ്വീകരിച്ചുവെന്ന് വ്യക്തമാക്കാമോ?

സംസ്ഥാനം അടിസ്ഥാന വികസന മേഖലയിൽ കൈവരിച്ച നേട്ടങ്ങൾക്ക് പിന്നിൽ സഹകരണ പ്രസ്ഥാനങ്ങൾക്ക് നിർണ്ണായക പങ്കുണ്ട് എന്നത് ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

രോഗികൾക്ക് കുറഞ്ഞ ചെലവിൽ മരുന്നുകൾ ലഭ്യമാക്കുന്നതിനായി നടത്തിവരുന്ന നീതി മെഡിക്കൽ സ്റ്റോറുകളുടെ പ്രവർത്തന പുരോഗതി വിലയിരുത്തിയിട്ടുണ്ടോ; അർബുദബാധിതർക്കും ഡയാലിസിസ് ചെയ്യുന്നവർക്കുമുള്ള മരുന്നുകൾ കുറഞ്ഞ നിരക്കിൽ നൽകുന്നതിന് നീതി മെഡിക്കൽ സ്‌കീം എന്ന പദ്ധതി ആവിഷ്‌കരിച്ചിട്ടുണ്ടോ; വിശദമാക്കാമോ;

ഇന്ത്യയിൽ ഏറ്റവുമധികം സഹകരണ ആശുപത്രികൾ പ്രവർത്തിക്കുന്ന കേരളത്തില്‍ ആരോഗ്യ മേഖലയിൽ നൂതന ആശയങ്ങൾ കണ്ടെത്തുന്നതിനായി ഗവേഷണ കേന്ദ്രം സ്ഥാപിക്കുന്നതിനുള്ള പ്രവർത്തനങ്ങൾ ആരംഭിച്ചിട്ടുണ്ടോ; വിശദമാക്കാമോ;

ആശുപത്രി സഹകരണ സംഘങ്ങളുടെ പ്രവര്‍ത്തനം വിപുലപ്പെടുത്തുന്നതിനും സഹകരണ ആശുപത്രികളുടെ ആഭിമുഖ്യത്തില്‍ നേഴ്സിംഗ്, പാരാമെഡിക്കല്‍ കോഴ്സുകള്‍ തുടങ്ങിയവ ആരംഭിക്കുന്നതിനും പദ്ധതികള്‍ ആവിഷ്കരിച്ച് നടപ്പിലാക്കിയിട്ടുണ്ടോ; വിശദമാക്കാമോ?

സഹകരണ പെൻഷൻ ബോർഡ് മുഖേന സംസ്ഥാനത്ത് എത്ര പേര്‍ക്കാണ് നിലവില്‍ പെന്‍ഷന്‍ നല്‍കി വരുന്നത്; വിവരങ്ങൾ ലഭ്യമാക്കാമോ;

ഇതില്‍ പ്രാഥമിക സഹകരണ ബാങ്കുകളിൽ നിന്നും വിരമിച്ച എത്രപേർക്കാണ് നിലവില്‍ പെന്‍ഷന്‍ വിതരണം ചെയ്യുന്നത്; വ്യക്തമാക്കാമോ;

പെൻഷൻ ഫണ്ട് പൂര്‍ണ്ണമായും അടയ്ക്കാതെ ആനുപാതിക പെൻഷൻ വാങ്ങുന്ന ആളുകളുടെ എണ്ണം എത്രയാണ്; ജില്ല തിരിച്ചുള്ള കണക്ക് ലഭ്യമാക്കാമോ;

ഇത്തരക്കാരില്‍ നിന്നും പെൻഷൻ ഫണ്ടിലേക്കുള്ള കുടിശിക വസൂലാക്കുന്നതിന് പെൻഷൻ ബോർഡ് സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ;

കേരള ബാങ്ക് ജീവനക്കാരുടെ പെൻഷൻ സഹകരണ പെൻഷൻ ബോർഡിൽ നിന്ന് മാറ്റി കേരള ബാങ്ക് മുഖേന കൊടുക്കുന്നതിന് ആലോചിക്കുന്നുണ്ടോ; വിശദാംശം അറിയിക്കാമോ?

ഈ സര്‍ക്കാരിന്റെ കാലത്ത് വാമനപുരം മണ്ഡലത്തിലെ സഹകരണ സംഘങ്ങള്‍ മുഖേന റിസ്ക് ഫണ്ട് ആനുകൂല്യം ലഭിക്കുന്നതിനായി എത്ര അപേക്ഷകള്‍ ലഭിച്ചിരുന്നുവെന്നും അവയില്‍ നിന്നും റിസ്ക് ഫണ്ട് ആനുകൂല്യം ലഭിച്ചവരുടെ വിവരങ്ങളും അനുവദിച്ച തുകയും സഹകരണ സംഘം തിരിച്ച് നല്‍കാമോ?

ഈ സർക്കാർ അധികാരത്തില്‍ വന്നശേഷം കോതമംഗലം മണ്ഡലത്തില്‍ സഹകരണ റിസ്ക് ഫണ്ട് ആനുകൂല്യമായി എത്ര തുകയാണ് വിതരണം ചെയ്തിട്ടുള്ളതെന്ന് സഹകരണ സംഘം തിരിച്ചുള്ള കണക്ക് ലഭ്യമാക്കാമോ;

പ്രസ്തുത ആനുകൂല്യം സമയബന്ധിതമായി നല്‍കുന്നതിനാവശ്യമായ നടപടി സ്വീകരിക്കുമോ; വ്യക്തമാക്കാമോ?

നെല്‍കർഷകരുടെ ഉന്നമനത്തിനായി സഹകരണ വകുപ്പ് എന്തെല്ലാം പ്രവർത്തനങ്ങളാണ് നടത്തി വരുന്നതെന്ന് വിശദമാക്കാമോ?

റിസ്ക് ഫണ്ട് ലഭിക്കുന്നതിനായി ലഭിച്ച അപേക്ഷകളിന്മേല്‍ തീരുമാനമെടുക്കാന്‍ കാലതാമസം നേരിടുന്നുണ്ടെന്നത് ശ്രദ്ധയില്‍പ്പെട്ടിട്ടുണ്ടോ; ഏതു വര്‍ഷം ഏതു മാസം വരെ ലഭിച്ച അപേക്ഷകളാണ് ഇതുവരെ തീര്‍പ്പാക്കിയിട്ടുള്ളതെന്ന് വ്യക്തമാക്കാമോ;

നിലവില്‍ എത്ര അപേക്ഷകളില്‍ ഇനിയും തീര്‍പ്പുകല്പിക്കാനുണ്ട്; അപേക്ഷകളില്‍ സമയബന്ധിതമായി തീര്‍പ്പുകല്പിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദാംശം നൽകാമോ?

ആലപ്പുഴ മണ്ഡലത്തില്‍ സഹകരണ റിസ്ക് ഫണ്ട് എത്ര ആളുകള്‍ക്കാണ് ഈ സര്‍ക്കാര്‍ അധികാരത്തില്‍ വന്നതിനുശേഷം കൈമാറിയിട്ടുള്ളതെന്ന് സഹകരണ സംഘം തിരിച്ച് കണക്ക് നല്‍കാമോ;

നിലവില്‍ റിസ്ക് ഫണ്ട് ആനുകൂല്യത്തിന് അപേക്ഷിച്ചവരില്‍ ആലപ്പുഴ മണ്ഡലത്തിലെ സഹകരണ സംഘങ്ങളിൽ പെന്‍ഡിങ് ഉള്ള അപേക്ഷകരുടെ വിശദാംശം ലഭ്യമാക്കാമോ;

ആലപ്പുഴ നിയോജക മണ്ഡലത്തില്‍ കോവിഡാനന്തരം എത്ര വ്യക്തികള്‍ക്കും സ്ഥാപനങ്ങള്‍ക്കും സഹകരണ ബാങ്ക് ജപ്തി നടപടികള്‍ നിര്‍ത്തി വയ്ക്കുന്നതിനും തിരിച്ചടവിന് പരമാവധി സാവകാശം നല്‍കുന്നതിനും സഹായം നല്‍കിയിട്ടുണ്ട്; വിശദാംശം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം സഹകരണ മേഖലയില്‍ നടപ്പിലാക്കിയ വിവിധ പദ്ധതികള്‍ ഏതൊക്കെയെന്ന് വിശദമാക്കാമോ?

2016-17 മുതൽ മാവേലിക്കര മണ്ഡലത്തിൽ സഹകരണ റിസ്ക് ഫണ്ട് എത്ര ആളുകൾക്കാണ് കൈമാറിയിട്ടുള്ളത്; സഹകരണ സംഘം തിരിച്ച് കണക്ക് ലഭ്യമാക്കുമോ;

എത്ര അപേക്ഷകർക്ക് ഇനിയും റിസ്ക് ഫണ്ട് ആനുകൂല്യങ്ങൾ നല്കുവാനുണ്ടെന്ന് അറിയിക്കുമോ?

2016-2021 -ലെ സര്‍ക്കാരിന്റെ കാലയളവിലും ഈ സര്‍ക്കാരിന്റെ 2021-2025 കാലയളവിലും വെെപ്പിന്‍ മണ്ഡലത്തില്‍ സഹകരണ വകുപ്പ് അനുവദിച്ചിട്ടുള്ള പദ്ധതികള്‍ ഏതെല്ലാമെന്ന് വ്യക്തമാക്കാമോ;

പ്രസ്തുത പദ്ധതികളുടെ വിശദമായ വിവരങ്ങള്‍, ഓരോ പദ്ധതിക്കും അനുവദിച്ച തുക, നിര്‍വ്വഹണ ചുമതല നല്‍കിയിട്ടുള്ള വകുപ്പ്/ഏജന്‍സി, അവയുടെ നിലവിലെ സ്ഥിതി എന്നിവ വ്യക്തമാക്കാമോ; ഫണ്ട് അനുവദിച്ചതിന്റെ ഉത്തരവുകളുടെ പകര്‍പ്പ് ലഭ്യമാക്കാമോ?

2024-25, 2025-26 എന്നീ സാമ്പത്തിക വർഷങ്ങളിൽ കേരള ബാങ്ക് ഏതൊക്കെ സ്ഥാപനങ്ങൾക്ക് പരസ്യം നൽകിയിട്ടുണ്ടെന്ന് അറിയിക്കാമോ; പരസ്യം നൽകിയ സ്ഥാപനങ്ങളുടെ പേരും തുകയും ലഭ്യമാക്കാമോ;

നിർമ്മാണ പ്രവർത്തനങ്ങളും ഇലക്ട്രോണിക്ക് ഉപകരണങ്ങളുടെ പർച്ചേസ് & ഇൻസ്റ്റലേഷനും 2024-25, 2025-26 വർഷങ്ങളിൽ ഏതൊക്കെ ഏജൻസികൾക്ക് നൽകിയിട്ടുണ്ടെന്ന് അറിയിക്കാമോ; എസ്റ്റിമേറ്റ് തുക ഉൾപ്പെടെയുള്ള പ്രവൃത്തിയുടെ വിശദവിവരം നൽകാമോ?

കേരള ബാങ്ക് മുഖേന അതിഥി തൊഴിലാളികളുടെ ചെറിയ രീതിയിലുള്ള നിക്ഷേപം സ്വീകരിക്കാനുള്ള പദ്ധതി ആവിഷ്കരിക്കാമോ?

സംസ്ഥാന കാർഷിക ഗ്രാമവികസന ബാങ്കിനെ കേരള ബാങ്കിൽ ലയിപ്പിക്കുവാൻ തീരുമാനിച്ചിട്ടുണ്ടോയെന്ന് വ്യക്തമാക്കാമോ;

എങ്കിൽ ഇതു സംബന്ധിച്ച് എന്തെങ്കിലും പഠനം നടത്തിയിരുന്നോ; പ്രസ്തുത പഠന സമിതിയുടെ നിർദേശങ്ങൾ എന്തെല്ലാമാണെന്ന് വ്യക്തമാക്കാമോ;

സംസ്ഥാന കാർഷിക ഗ്രാമവികസന ബാങ്കിനെ കേരള ബാങ്കിൽ ലയിപ്പിക്കുന്നതിന് റിസർവ് ബാങ്കിന്റെയും നബാർഡിന്റെയും അനുമതി ആവശ്യമാണോ; എന്നുമുതൽ ലയനം നടത്താൻ കഴിയുമെന്നാണ് കരുതുന്നതെന്ന് വിശദമാക്കുമോ?

പുതുതലമുറ ബാങ്കുകള്‍ നല്‍കുന്ന ഏതൊക്കെ സേവനങ്ങളാണ് കേരള ബാങ്ക് ഉപഭോക്താക്കള്‍ക്ക് നല്‍കുന്നതെന്ന് വിശദമാക്കാമോ?

ജില്ലാ സഹകരണ ബാങ്കുകളെ സംസ്ഥാന സഹകരണ ബാങ്കിൽ ലയിപ്പിച്ചുകൊണ്ടുള്ള സംസ്ഥാന സഹകരണ സംഘം രജിസ്ട്രാറുടെ ഉത്തരവ് പ്രകാരം ഓരോ ജില്ലാ സഹകരണ ബാങ്കിന്റെയും അന്നുവരെയുളള ആസ്തി / ബാധ്യതകൾ  ഏറ്റെടുത്ത് സംസ്ഥാന സഹകരണ ബാങ്കിൽ ലയിപ്പിച്ചിട്ടുണ്ടോ; എങ്കിൽ ഓരോ ജില്ലാ സഹകരണ ബാങ്കിലെയും കളക്ഷൻ ജീവനക്കാരുടെ അവസ്ഥ പരിഗണിച്ചിട്ടുണ്ടോ; ഇല്ലെങ്കിൽ എന്തുകൊണ്ടാണെന്ന് വിശദമാക്കാമോ;

കേരള ബാങ്ക് മികച്ച വിവര സാങ്കേതിക മികവോടെ ഇടപാടുകാർക്ക് ഓൺലൈൻ ബാങ്കിങ്ങ് സൗകര്യം ലഭ്യമാക്കിയപ്പോൾ കേരള ബാങ്കിൽ നിലവിലുള്ള നിക്ഷേപ/വായ്പ കളക്ഷൻ ജീവനക്കാർക്ക് തൊഴിൽ നഷ്ടവും വരുമാന നഷ്ടവും ഉണ്ടായിരിക്കുന്നത് ബാങ്കിന്റെയോ സർക്കാരിന്റെയോ ശ്രദ്ധയിൽപ്പെട്ടിട്ടുണ്ടോ;

പത്ത് വർഷം മുതൽ നാല്പത് വർഷത്തിലധികം സേവന കാലാവധിയുള്ള  പ്രസ്തുത ജീവനക്കാർക്ക് ഉദ്യോഗ കയറ്റം/ ഗ്രേഡ് എന്നിവ അനുവദിച്ചു നൽകുന്നതിൽ എന്തെങ്കിലും നിയമ തടസ്സമുണ്ടോ; വിശദമാക്കുമോ;

പ്രസ്തുത വിഭാഗം ജീവനക്കാർക്കുവേണ്ടി കേരള ബാങ്ക് ഏതെങ്കിലും പാക്കേജ് തയ്യാറാക്കി സമർപ്പിച്ചിട്ടുണ്ടോ; എങ്കിൽ അതിന്മേൽ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ?

കേരള ബാങ്ക് ഉൾപ്പെടെയുള്ള സഹകരണ സ്ഥാപനങ്ങൾ കർഷകരുടെ വായ്പകൾക്ക് ജപ്തി നോട്ടീസുകൾ പ്രസിദ്ധീകരിച്ച് സമ്മർദത്തിലാക്കുന്ന രീതി തുടരുന്നത് ഗൗരവത്തോടെ കാണുന്നുണ്ടോയെന്ന് അറിയിക്കാമോ;

കർഷകരുടെ വായ്പകളിൻമേൽ കേരള ബാങ്ക് രൂപീകരണ ശേഷം നാളിതുവരെ സ്വീകരിച്ച ജപ്തി നടപടികളുടെ വിശദാംശം അറിയിക്കാമോ;

കർഷകരുടെ വായ്പകളിലുള്ള ജപ്തി നടപടികൾ പൂർണ്ണമായും അവസാനിപ്പിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

പാലക്കാട് ജില്ലയില്‍ കോവിഡാനന്തരം എത്രത്തോളം വ്യക്തികള്‍ക്കും സ്ഥാപനങ്ങള്‍ക്കും സഹകരണ ബാങ്ക് ജപ്തി നടപടികള്‍ നി‍ർത്തി വയ്ക്കുന്നതിനും തിരിച്ചടവിന് പരമാവധി സാവകാശം നല്‍കുന്നതിനും സഹായം നല്‍കിയിട്ടുണ്ടെന്നുള്ള വിശദാംശം നിയോജക മണ്ഡലാടിസ്ഥാനത്തില്‍ ലഭ്യമാക്കാമോ?

കേരള സ്റ്റേറ്റ് കോപ്പറേറ്റീവ് ബാങ്ക് ലിമിറ്റഡില്‍ ഐ. ടി. ഓഫീസര്‍ പാർട്ട്-1 തസ്തികയില്‍ നിലവില്‍ എത്ര ഒഴിവുകള്‍ ഉണ്ടെന്നുള്ള വിവരം ലഭ്യമാക്കാമോ;

പ്രസ്തുത തസ്തികയിലേയ്ക്ക് റാങ്ക് ലിസ്റ്റ് നിലവിലുണ്ടോയെന്നും ഉണ്ടെങ്കില്‍ ആയതില്‍ നിന്നും ഇതുവരെ എത്ര നിയമനങ്ങള്‍ നടത്തിയിട്ടുണ്ടെന്നും വിശദമാക്കുമോ;

ഒഴിവുകള്‍ കണ്ടെത്തി കൂടുതല്‍ പേരെ റാങ്ക് ലിസ്റ്റില്‍ നിന്നും നിയമിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

ഇടുക്കി ജില്ലാ സഹകരണ ബാങ്കിലെ ക്ലാർക്ക്/കാഷ്യർ തസ്തികയിൽ കാറ്റഗറി നമ്പർ 20/14 പ്രകാരം 2017 ജനുവരിയിൽ പ്രസിദ്ധീകരിച്ച റാങ്ക് ലിസ്റ്റിൽ നിന്നും എത്ര നിയമനങ്ങളാണ് നടത്തിയത്; പ്രസ്തുത റാങ്ക് ലിസ്റ്റ് നിലനിൽക്കുന്ന കാലയളവിൽ ബാങ്കിൽ ഈ തസ്തികയിൽ എത്ര താത്ക്കാലിക നിയമനങ്ങൾ നടത്തിയിട്ടുണ്ട്; വ്യക്തമാക്കുമോ;

റാങ്ക് ലിസ്റ്റ് നിലനിൽക്കുമ്പോൾ ഇതിൽ നിന്ന് നിയമനം നടത്താതെ താത്ക്കാലിക നിയമനം നൽകിയ മേല്പറഞ്ഞവർക്ക് നിലവിൽ ജോലി സ്ഥിരപ്പെടുത്തുന്നതിന് തീരുമാനമെടുത്തിട്ടുണ്ടോ; വിശദാംശം വ്യക്തമാക്കുമോ;

പ്രസ്തുത റാങ്ക് ലിസ്റ്റ് നിലനിൽക്കുന്ന കാലയളവിൽ കേരള ബാങ്ക് രൂപീകരിച്ചപ്പോൾ ഉണ്ടായ ഒഴിവുകളിലേക്ക് ഈ റാങ്ക് ലിസ്റ്റിൽ നിന്ന് നിയമനം നടത്താതിരുന്നതിന്റെ കാരണം വ്യക്തമാക്കുമോ?

നഷ്ടത്തിൽ പ്രവർത്തിക്കുന്ന സഹകരണ ബാങ്കുകളെ സംബന്ധിച്ച് എന്തെങ്കിലും പഠനം നടത്താൻ ഉദ്ദേശിക്കുന്നുണ്ടോ; വിശദമാക്കാമോ;

പ്രാഥമിക സഹകരണ ബാങ്കുകളുടെ പ്രവർത്തനം മെച്ചപ്പെടുത്തുന്നതിന് എന്തെങ്കിലും പദ്ധതി ആവിഷ്കരിക്കുന്നതിന് കേരള ബാങ്കിന് നിർദേശം നൽകിയിട്ടുണ്ടോ; വിശദാംശം നൽകുമോ;

സംസ്ഥാനത്തെ ​പ്രാഥമിക സഹകരണ ബാങ്കുകൾ പലതും നഷ്ടത്തിലാണ് പ്രവർത്തിക്കുന്നതെന്നത് വസ്തുതയാണോ; എങ്കിൽ ഇക്കാര്യം പരിശോധിച്ചിട്ടുണ്ടോ വിശദമാക്കാമോ?

കരുവന്നൂർ സഹകരണ ബാങ്കിലെ ക്രമക്കേടുകളുടെ ഭാഗമായി എത്ര നിക്ഷേപകർക്ക് നിക്ഷേപത്തുക നഷ്ടപ്പെട്ടിട്ടുണ്ടെന്ന് വ്യക്തമാക്കാമോ;

ഇതിൽ എത്രപേർക്ക് നിക്ഷേപത്തുക പൂർണ്ണമായും തിരികെ നൽകിയിട്ടുണ്ട്;

ഇനി നിക്ഷേപത്തുക തിരികെ ലഭിക്കാനുള്ള എത്രപേരുണ്ടെന്നും ഈ ഇനത്തിൽ എത്ര തുകയാണ് നൽകുവാൻ ഉള്ളതെന്നും വ്യക്തമാക്കാമോ;

മേൽപ്പറഞ്ഞവർക്ക് നിക്ഷേപത്തുക പൂർണ്ണമായി തിരികെ നൽകാൻ എന്ന് സാധിക്കുമെന്ന് വ്യക്തമാക്കാമോ?

സഹകരണ ബാങ്കുകളിൽ നിന്നും വായ്പയെടുത്ത് വായ്പാ കാലാവധിക്കുള്ളിൽ മരണപ്പെടുന്നവരുടെ അവകാശികൾക്കും, ഗുരുതര രോഗം ബാധിക്കുന്നവർക്കും നൽകിവരുന്ന റിസ്ക് ഫണ്ടിനായി അപേക്ഷിക്കുന്നതിനുള്ള മാനദണ്ഡങ്ങൾ എന്തെല്ലാമാണ്; വിശദമാക്കാമോ;

ഈ സർക്കാർ അധികാരത്തിൽ വന്നതിനു ശേഷം മണലൂർ മണ്ഡലത്തിൽ നിന്നും റിസ്ക് ഫണ്ടിനായി എത്ര അപേക്ഷകൾ ലഭിച്ചുവെന്നും അതിന്മേൽ എന്തെല്ലാം നടപടികൾ സ്വീകരിച്ചുവെന്നും വിശദമാക്കാമോ;

എളവള്ളി പ‍ഞ്ചായത്തിലെ എളവള്ളി സർവീസ് സഹകരണ ബാങ്കിൽ നിന്നും വായ്പയെടുത്ത് തിരിച്ചടവ് അവസാനിക്കുന്നതിനുള്ളിൽ, 27.08.2024-ന് മരണപ്പെട്ട പയ്യപ്പാട്ട് ഉണ്ണിരി മകൻ വിനയന്റെ അവകാശി റിസ്ക് ഫണ്ടിനായി അപേക്ഷ സമർപ്പിച്ചിട്ടുണ്ടോ എന്ന് അറിയിക്കാമോ;

ഉണ്ടെങ്കിൽ എന്നാണ് അപേക്ഷ ലഭിച്ചതെന്നും പ്രസ്തുത അപേക്ഷയിൽ എന്തെല്ലാം നടപടികൾ സ്വീകരിച്ചിട്ടുണ്ടെന്നും വിശദമാക്കാമോ;

എളവള്ളി സർവീസ് സഹകരണ ബാങ്കിൽ നിന്നും ഈ സർക്കാർ അധികാരത്തിൽ വന്നശേഷം റിസ്ക് ഫണ്ടിനായി ഇതുവരെ എത്ര അപേക്ഷകൾ ലഭിച്ചിട്ടുണ്ടെന്നും പ്രസ്തുത അപേക്ഷകളിൽ സ്വീകരിച്ച നടപടികൾ എന്തെല്ലാമെന്നും വിശദമാക്കാമോ?

മള്‍ട്ടിസ്റ്റേറ്റ് കോ-ഓപ്പറേറ്റീവ് ബാങ്കുകൾ സംസ്ഥാനത്തിന്റെ വിവിധ ഭാഗങ്ങളിൽ പ്രവർത്തിക്കുന്നത് ശ്രദ്ധയിൽപ്പെട്ടിട്ടുണ്ടോ;

അനിയന്ത്രിതമായി പ്രവർത്തിക്കുന്ന അത്തരം ബാങ്കുകളുടെ പ്രവർത്തനം നിയന്ത്രിക്കുന്നതിന് വ്യവസ്ഥയുണ്ടോ; വ്യക്തമാക്കാമോ?

കുന്നത്തുനാട് മണ്ഡലത്തിലെ മാറംപിള്ളി സർവീസ് സഹകരണ ബാങ്കിലെ വ്യാജലോൺ വിഷയവുമായി ബന്ധപ്പെട്ട് പരാതികൾ ലഭിച്ചിട്ടുണ്ടോയെന്ന് വിശദമാക്കാമോ; പ്രസ്തുത വിഷയവുമായി ബന്ധപ്പെട്ട നിലവിലെ സ്ഥിതി വ്യക്തമാക്കാമോ;

പ്രസ്തുത ബാങ്കിൽ നടത്തിയ നിയമനങ്ങളുമായി ബന്ധപ്പെട്ട് എന്തെങ്കിലും പരാതികൾ ശ്രദ്ധയിൽപ്പെട്ടിട്ടുണ്ടോ; വിശദാംശം ലഭ്യമാക്കാമോ; ഈ വിഷയത്തിലെ നിലവിലെ സ്ഥിതി വിശദമാക്കാമോ?

തിരുവനന്തപുരം ജില്ലയില്‍ എത്ര മള്‍ട്ടി പര്‍പ്പസ് കോ-ഓപ്പറേറ്റീവ് സൊസെെറ്റികളാണ് പ്രവര്‍ത്തിച്ചുവരുന്നത്; താലൂക്ക് തിരിച്ചുള്ള വിവരം ലഭ്യമാക്കാമോ?

റെയ്ഡ്കോയുടെ സര്‍ക്കാര്‍ ഓഹരി എത്രയാണെന്ന് വ്യക്തമാക്കാമോ;

റെയ്ഡ്കോയ്ക്ക് നിലവിൽ എത്ര കോടി രൂപ നഷ്ടമുണ്ട്; നഷ്ടം ഒഴിവാക്കാനോ പരിഹരിക്കാനോ പ്രത്യേക ഇടപെടലുകൾ നടത്തിയിട്ടുണ്ടോ; എങ്കില്‍ അതിനായി സ്വീകരിച്ച നടപടികൾ എന്തൊക്കെയാണ്; വിശദമാക്കാമോ;

റെയ്ഡ്കോയുടെ പ്രവർത്തന മൂലധനത്തിന്റെ അപര്യാപ്തതയും വൻതോതിലുള്ള പലിശ ബാധ്യതയും പരിഹരിക്കാൻ സാമ്പത്തിക സഹായം നൽകുമോ; വിശദമാക്കാമോ;

റെയ്ഡ്കോയെ തദ്ദേശ സ്വയംഭരണ സ്ഥാപനങ്ങളുടെയും കൃഷി വകുപ്പിന്റെയും പദ്ധതികളിൽ മുൻഗണനാ സ്ഥാപനമായി ഉൾപ്പെടുത്തുന്നതിനായി നടപടികൾ സ്വീകരിച്ചിട്ടുണ്ടോ; എങ്കില്‍ വിശദമാക്കാമോ?

ഈ സർക്കാർ അധികാരത്തിൽ വന്നശേഷം നാളിതുവരെ കയ്പമംഗലം മണ്ഡലത്തിലെ വിവിധ സര്‍വീസ് സഹകരണ സംഘങ്ങളില്‍ നിന്നും റിസ്ക് ഫണ്ട് ആനുകൂല്യത്തിനായി എത്ര അപേക്ഷകള്‍ ലഭ്യമായിട്ടുണ്ടെന്നും ആയതിൽ എത്ര പേര്‍ക്ക് ആനുകൂല്യങ്ങള്‍ ലഭ്യമായിട്ടുണ്ടെന്നും സര്‍വീസ് സഹകരണ സംഘങ്ങള്‍ തിരിച്ച് വ്യക്തമാക്കാമോ;

ആയതിൽ എത്ര തുകയാണ് റിസ്ക് ഫണ്ടായി അനുവദിച്ചതെന്നും എത്ര പേര്‍ക്കാണ് അനുവദിച്ചതെന്നും സഹകരണ സംഘങ്ങള്‍ തിരിച്ച് വ്യക്തമാക്കാമോ;

ഇനിയും എത്ര അപേക്ഷകര്‍ക്ക് പ്രസ്തുത ആനുകൂല്യം ലഭ്യമാക്കുവാന്‍ ബാക്കിയുണ്ടെന്ന് സഹകരണ സംഘങ്ങള്‍ തിരിച്ചുള്ള കണക്ക് ലഭ്യമാക്കാമോ;

മുഴുവന്‍ അപേക്ഷകര്‍ക്കും സമയബന്ധിതമായി റിസ്ക് ഫണ്ട് ലഭ്യമാക്കുന്നതിനുവേണ്ട നടപടി സ്വീകരിക്കാമോ; വിശദാംശം നൽകാമോ?

സാമൂഹ്യ സുരക്ഷാ പെൻഷൻ വിതരണം ചെയ്യുന്ന സഹകരണ സംഘങ്ങള്‍ക്ക് ഇൻസെന്റീവായി എത്ര രൂപ വീതമാണ് നല്‍കി വരുന്നതെന്ന് വ്യക്തമാക്കാമോ;

ഈ തുകയില്‍ നിന്ന് പെൻഷൻ എത്തിച്ചുകൊടുക്കുന്ന ഏജന്റിനും സംഘത്തിനും എത്ര രൂപ വീതമാണ് നല്‍കി വരുന്നത്; വ്യക്തമാക്കാമോ;

സംഘത്തിന് ലഭിക്കുന്ന തുകയില്‍ നിന്ന് പെൻഷൻ കൈകാര്യം ചെയ്യുന്ന ഉദ്യോഗസ്ഥര്‍ക്ക് വിഹിതം നല്‍കാൻ വ്യവസ്ഥയുണ്ടോ; എങ്കിൽ വിശദമാക്കാമോ?

തിരുവനന്തപുരം ജില്ല ഫാം ടൂർ സഹകരണ സംഘത്തിന്റെ പ്രവർത്തനവുമായി ബന്ധപ്പെട്ട് സഹകരണ വകുപ്പ് നടത്തിയ പരിശോധനയിൽ കണ്ടെത്തിയ ക്രമക്കേടുകൾ എന്തൊക്കെയാണ്; വിശദാംശം വ്യക്തമാക്കാമോ; ഇത് സംബന്ധിച്ച റിപ്പോർട്ടിന്റെ പകർപ്പ് ലഭ്യമാക്കാമോ;

ക്രമക്കേടുകൾ കണ്ടെത്തിയതിനെത്തുടർന്ന് സഹകരണ വകുപ്പ് എന്തൊക്കെ നടപടികൾ സ്വീകരിച്ചുവെന്ന് വ്യക്തമാക്കാമോ?

നെയ്യാറ്റിൻകര നിയോജക മണ്ഡലത്തിൽ ഉള്‍പ്പെടുന്നതും 2024-25 സാമ്പത്തിക വർഷത്തെ കണക്കനുസരിച്ച് ലാഭത്തിൽ പ്രവർത്തിക്കുന്നതുമായ സഹകരണ സംഘങ്ങൾ ഏതൊക്കെയാണെന്ന് വിശദമാക്കാമോ; പ്രസ്തുത സഹകരണ സംഘങ്ങളുടെ വിശദാംശം ലഭ്യമാക്കാമോ?

കോഴിക്കോട് ജില്ലയില്‍ സര്‍ക്കാര്‍ ജീവനക്കാരുടെ നിയന്ത്രണത്തിലുള്ള എത്ര സഹകരണ സ്ഥാപനങ്ങള്‍ പ്രവര്‍ത്തിക്കുന്നുണ്ട്;

പ്രസ്തുത സ്ഥാപനങ്ങളുടെ വിശദാംശം പേരു വിവരങ്ങള്‍ സഹിതം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം, വനിതാ സഹകരണ സംഘങ്ങളുടെ ശാക്തീകരണത്തിനായി എന്തൊക്കെ പദ്ധതികളാണ് നടപ്പിലാക്കിയിട്ടുള്ളതെന്ന് വിശദമാക്കാമോ?

സംസ്ഥാനത്തെ സഹകരണ സംഘങ്ങളിൽ ഉണ്ടായിക്കൊണ്ടിരിക്കുന്നു എന്ന് റിപ്പോർട്ട് ചെയ്യപ്പെടുന്ന സാമ്പത്തിക ക്രമക്കേടുകൾക്ക് ശാശ്വത പരിഹാരം കാണുന്നതിന് സ്വീകരിച്ചു വരുന്ന നടപടികൾ വിശദമാക്കാമോ;

സഹകരണ സംഘങ്ങളിൽ പണയം വയ്ക്കുന്ന സ്വർണ്ണ ഉരുപ്പടികളുടെ മാറ്റ് (പ്യൂരിറ്റി) പരിശോധിക്കുന്നതിന് എന്തെങ്കിലും നടപടികൾ സ്വീകരിച്ചു വരുന്നുണ്ടോ; വിശദമാക്കാമോ?

കോഴിക്കോട് നോര്‍ത്ത് മണ്ഡലത്തിന് കീഴില്‍ പ്രവര്‍ത്തിക്കുന്ന സഹകരണ സ്ഥാപനങ്ങളുടെ വിശദാംശം ലഭ്യമാക്കാമോ;

ഈ സര്‍ക്കാര്‍ അധികാരത്തില്‍ വന്നതിനുശേഷം പ്രസ്തുത സഹകരണ സ്ഥാപനങ്ങള്‍ വഴി നടപ്പിലാക്കിയ വികസന പ്രവര്‍ത്തനങ്ങള്‍ എന്തെല്ലാമാണ്; വിശദമാക്കുമോ?

പുതുക്കാട് മണ്ഡലത്തിലെ കരുവാപ്പടി-വരാക്കര പ്രദേശത്ത് പ്രവര്‍ത്തിച്ചു വരുന്ന ഭാരതീയ പട്ടികജാതി കലാക്ഷേത്രം സര്‍വീസ് സഹകരണ സംഘം സര്‍ക്കാര്‍ സഹായം ലഭിച്ചതിന്മേലുള്ള കുടിശിക ഒഴിവാക്കികിട്ടുന്നത് സംബന്ധിച്ച് സമര്‍പ്പിച്ച അപേക്ഷയില്‍ നടപടികള്‍ ഏത് ഘട്ടത്തിലാണ് എന്നറിയിക്കാമോ;

വര്‍ഷങ്ങള്‍ക്കു മുന്‍പ് പ്രവര്‍ത്തനം നിലച്ച പ്രസ്തുത സഹകരണ സംഘം പുനര്‍ജീവിപ്പിച്ച് പ്രവര്‍ത്തനസജ്ജമാക്കിയ സാഹചര്യത്തില്‍ മുന്‍കാലത്ത് ലഭിച്ച സര്‍ക്കാര്‍ സഹായം തിരിച്ചടക്കണമെന്ന നിർദ്ദേശം ലഭിച്ച സാഹചര്യത്തിൽ പലിശയും പിഴപ്പലിശയും ഒഴിവാക്കി പരമാവധി ഇളവുകളോടെ തിരിച്ചടവിന് സാവകാശം നല്‍കി പ്രസ്തുത സഹകരണ സംഘത്തിന്റെ പ്രവര്‍ത്തനം പുനഃരാരംഭിക്കുന്നതിന് സഹായകരമായ നടപടികള്‍ സ്വീകരിക്കുമോയെന്ന് വ്യക്തമാക്കുമോ?

സഹകരണമേഖല ഉൽപ്പാദിപ്പിക്കുന്ന മൂല്യവര്‍ധിത ഉൽപ്പന്നങ്ങള്‍ വിപണനം നടത്തുന്നതിന് സഹകരണ വകുപ്പ് എന്തെങ്കിലും പദ്ധതികള്‍ ആവിഷ്കരിച്ച് നടപ്പാക്കിയിട്ടുണ്ടോ; വിശദമാക്കാമോ?

തിരൂരങ്ങാടി ഗവൺമെന്റ് താലൂക്ക് ആശുപത്രിയോട് ചേർന്നുള്ള സഹകരണ നീതി മെഡിക്കൽ സ്റ്റോർ പ്രവർത്തിക്കുന്ന കെട്ടിടം പൊളിച്ചു മാറ്റുന്നതിനുള്ള അനുമതിക്കായി സമർപ്പിച്ച അപേക്ഷയിൽ തീരുമാനമായിട്ടുണ്ടോ; വിശദമാക്കാമോ;

പുതുതായി നിർമ്മിക്കുന്ന കെട്ടിട സമുച്ചയത്തിന്റെ നിർമ്മാണം ആരംഭിക്കുന്നതിന് പ്രസ്തുത മെഡിക്കൽ സ്റ്റോർ പ്രവർത്തിക്കുന്ന കെട്ടിടം പൊളിച്ചു മാറ്റേണ്ടത് അനിവാര്യമായിട്ടും ആയതിന് അനുമതി നൽകാത്തതിന്റെ കാരണം വിശദമാക്കാമോ?

ഈ സർക്കാരിന്റെ കാലയളവിൽ സംസ്ഥാനത്തെ തുറമുഖങ്ങളിൽ നിന്നോ കപ്പൽ ചാലുകളിൽ നിന്നോ അനുബന്ധ പ്രദേശങ്ങളിൽ നിന്നോ നീക്കം ചെയ്യുന്ന മണലിന്റെ വില്പനയിലൂടെ മാരി ടൈം ബോർഡിന് ലഭിച്ച ആകെ വരുമാനം എത്രയാണ്; ഇനവും വർഷും തിരിച്ചുള്ള കണക്ക് ലഭ്യമാക്കുമോ;

സംസ്ഥാനത്തെ ഹാർബറുകളിൽ നിന്നോ അനുബന്ധപ്രദേശങ്ങളിൽ നിന്നോ ഇപ്രകാരം മണൽവാരൽ തൊഴിലാളികൾ മുഖേന മണൽ നീക്കം നടത്തുന്ന ഹാർബറുകൾ ഏതെല്ലാമാണെന്ന് അറിയിക്കുമോ;

വടകര തുറമുഖ പരിധിയിൽ കുറ്റ്യാടി പുഴയുടെ അഴിമുഖത്ത് ജലയാനങ്ങളുടെ സഞ്ചാരത്തിന് തടസ്സം സൃഷ്ടിക്കുന്ന മണൽ നീക്കം ചെയ്യുന്നതിന് മുനിസിപ്പാലിറ്റി സെക്രട്ടറിമാർക്ക് ഡ്രെഡ്ജിങ് പെർമിറ്റ് അനുവദിക്കുന്ന ഇനത്തിൽ ഫീസ് ഈടാക്കുന്നുണ്ടോ; ഉണ്ടെങ്കിൽ ഈടാക്കുന്ന ഫീസ് തുകയുടെ വിശദാംശം ലഭ്യമാക്കാമോ;

വടകര തുറമുഖ പരിധിയിൽ ഇപ്രകാരം ഡ്രെഡ്ജ് ചെയ്യപ്പെടുന്ന മണലിന്റെ നിലവിലുള്ള വില്പന വില എത്രയാണ്; ഇപ്രകാരം മണൽ വിൽപ്പന നടത്തുന്നതുമായി ബന്ധപ്പെട്ട മാരി ടൈം ബോർഡിന് ഉണ്ടാവുന്ന വിവിധ ചെലവുകളും അവയുടെ നിരക്കുകളും അറിയിക്കുമോ;

വടകര തുറമുഖവുമായി ബന്ധപ്പെട്ട വിവിധയിനം ഫീസുകളിലൂടെയും ലൈസൻസുകൾ അനുവദിക്കുന്നതിലൂടെയും മാരി ടൈം ബോർഡിന് ലഭിക്കുന്ന ആകെ വരുമാനം എത്രയാണ്; ഇനം തിരിച്ചുള്ള കണക്ക് ലഭ്യമാക്കുമോ?

സംസ്ഥാനത്തെ പ്രധാന തുറമുഖങ്ങളില്‍ നിലവില്‍ നടക്കുന്ന വികസന പ്രവര്‍ത്തനങ്ങള്‍ ഏതൊക്കെയാണെന്ന് വിശദമാക്കുമോ;

പുതിയ ചെറുതുറമുഖങ്ങള്‍ ആരംഭിക്കാന്‍ സര്‍ക്കാര്‍ നടപടികൾ സ്വീകരിക്കുന്നുണ്ടോ; വിശദമാക്കുമോ?

സംസ്ഥാനത്ത് തുറമുഖ മേഖലയില്‍ ഈ സര്‍ക്കാര്‍ നടപ്പാക്കിയ വികസന പ്രവര്‍ത്തനങ്ങളുടെ ഫലമായി ഈ രംഗത്തുണ്ടായിട്ടുള്ള നേട്ടങ്ങള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

പ്രധാന തുറമുഖങ്ങളുടെ വികസനവുമായി ബന്ധപ്പെട്ട് നടത്തുന്ന അടിസ്ഥാന സൗകര്യ വിപുലീകരണ പ്രവര്‍ത്തനങ്ങളുടെ നിലവിലെ സ്ഥിതിയെന്താണെന്ന് വിശദീകരിക്കുമോ;

വിഴിഞ്ഞം തുരങ്ക റെയില്‍പ്പാതാ നിര്‍മ്മാണവുമായി ബന്ധപ്പെട്ട പ്രാഥമിക നടപടിക്രമങ്ങള്‍ പൂര്‍ത്തിയായിട്ടുണ്ടോ; വ്യക്തമാക്കുമോ;

വിഴിഞ്ഞം തുറമുഖത്തിന്റെ മികവ് സംബന്ധിച്ച് കോമണ്‍വെല്‍ത്ത് യൂണിയന്‍ റിപ്പോര്‍ട്ട് പ്രസിദ്ധീകരിച്ചിട്ടുള്ളത് ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കുമോ?

വിഴിഞ്ഞം അന്താരാഷ്ട്ര തുറമുഖത്തിന്റെയും ബാഹ്യ അടിസ്ഥാന സൗകര്യ വികസനത്തിന്റെയും പ്രവർത്തനങ്ങള്‍ക്ക് പുറമെ പദ്ധതി പ്രദേശത്ത് സാമൂഹ്യ ക്ഷേമത്തിലധിഷ്ഠിതമായി സർക്കാർ നടത്തുന്ന പ്രവർത്തനങ്ങള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

പദ്ധതി പ്രദേശത്തെ ജനങ്ങളുടെ ജീവനോപാധി നഷ്ടപരിഹാരം സംബന്ധിച്ച് സർക്കാർ നടത്തിയിട്ടുള്ള ഇടപെടലുകള്‍ വിശദമാക്കാമോ;

ലൈവ്‍ലി ഹുഡ് ഇംപാക്ട് അപ്രൈസല്‍ കമ്മിറ്റിയുടെ റിപ്പോർട്ടിന്മേല്‍ ഈ മേഖലയില്‍ വിതരണം ചെയ്തിട്ടുള്ള നഷ്ടപരിഹാരം സംബന്ധിച്ച വിവരം ലഭ്യമാക്കാമോ;

വിഴിഞ്ഞം മത്സ്യബന്ധന തുറമുഖ നവീകരണവുമായി ബന്ധപ്പെട്ട നടപടിക്രമങ്ങളിലെ പുരോഗതി വിലയിരുത്തിയിട്ടുണ്ടോ; വിശദമാക്കാമോ;

പദ്ധതി പ്രദേശത്തെ തീരദേശ മേഖലയുടെ സുരക്ഷയുമായി ബന്ധപ്പെട്ട് നടത്തിയിട്ടുള്ള പ്രവർത്തനങ്ങള്‍ വിശദമാക്കാമോ;

പദ്ധതി പ്രദേശത്തെ കോസ്റ്റല്‍ പോലീസിന്റെ പ്രവർത്തനവുമായി ബന്ധപ്പെട്ട അടിസ്ഥാന സൗകര്യങ്ങള്‍ നവീകരിക്കുന്നതിന് സ്വീകരിച്ച നടപടി വിശദമാക്കാമോ?

വിഴിഞ്ഞം തുറമുഖത്ത് നാളിതുവരെ നടന്ന നിർമ്മാണ പദ്ധതികളിൽ സംസ്ഥാന സർക്കാരിന്റെ സാമ്പത്തിക പങ്കാളിത്തം എത്രമാത്രമുണ്ടെന്ന് വ്യക്തമാക്കുമോ;

അദാനി കമ്പനിയുമായുള്ള കരാർ പ്രകാരം വരുമാനം വീതിക്കുന്നതിൽ നിഷ്‌കർഷിച്ചിട്ടുള്ള വ്യവസ്ഥകൾ എന്തെല്ലാമെന്ന് വ്യക്തമാക്കുമോ;

വിഴിഞ്ഞം തുറമുഖത്ത് ഇനിയും എന്തെല്ലാം വികസന പദ്ധതികളാണ് ഏറ്റെടുക്കാൻ പോകുന്നതെന്ന് വ്യക്തമാക്കുമോ?

അഴീക്കല്‍ പോര്‍ട്ടിലെ വെയര്‍ ഹൗസ് നിര്‍മ്മാണപ്രവൃത്തിയുടെ പുരോഗതി അറിയിക്കുമോ;

പ്രസ്തുത പ്രവൃത്തിക്ക് ആവശ്യമായ ഫണ്ട് കേരള മാരിടൈം ബോര്‍ഡില്‍ നിന്നും ലഭിച്ചിട്ടുണ്ടോ; എങ്കിൽ വിശദാംശം നല്‍കാമോ?

അഴീക്കൽ പോർട്ടിലെ ഗസ്റ്റ് ഹൗസ്, കൺട്രോൾ റൂം എന്നിവയുടെ നിർമ്മാണ പുരോഗതി അറിയിക്കുമോ;

പ്രസ്തുത പ്രവൃത്തിക്ക് ആവശ്യമായ ഫണ്ട് മാരിടൈം ബോർഡിൽ നിന്ന് ലഭ്യമായിട്ടുണ്ടോ; എങ്കിൽ വിശദമാക്കുമോ?

നിലവിലെ സർക്കാരിന്റെ കാലയളവിൽ തുറമുഖ വകുപ്പിന്റെ കീഴിലുള്ള വിവിധ സ്ഥാപനങ്ങളും ഏജൻസികളും നാളിതുവരെ നൽകിയിട്ടുള്ള പരസ്യങ്ങളുടെ വിശദാംശം, പരസ്യം നൽകിയ സ്ഥാപനം, പരസ്യത്തിനായി ചെലവഴിച്ച തുക, ഏത് ഏജൻസി മുഖേനയാണ് പരസ്യം നൽകിയത്, പ്രസ്തുത ഏജൻസിയെ തെരഞ്ഞെടുത്ത നടപടിക്രമം, ഏത് പദ്ധതിയുടെ ഭാഗമായാണ് പരസ്യം നൽകിയത് എന്നിവ സംബന്ധിച്ച വിശദാംശം എന്നിവ ലഭ്യമാക്കാമോ;

പ്രസ്‌തുത കാലയളവിൽ പരസ്യ ഇനത്തിൽ ആകെ ചെലവഴിച്ച തുക ഇനം തിരിച്ച് ലഭ്യമാക്കുമോ?

ദേവസ്വം വസ്തുവകകൾ സർക്കാർ ഏറ്റെടുത്തതിന്റെ നഷ്ടപരിഹാരമായി പ്രതിവർഷം സർക്കാർ തിരുവിതാംകൂർ ദേവസ്വം ബോർഡിന് അനുവദിച്ചിരുന്ന തുക പത്ത് കോടിയായി ഉയർത്തുമെന്ന് പ്രഖ്യാപിച്ചിട്ടുണ്ടോയെന്നും എങ്കിൽ ഇപ്രകാരം പ്രഖ്യാപിച്ചത് എന്നാണെന്നും അറിയിക്കാമോ;

പ്രസ്തുത പ്രഖ്യാപനത്തിന്റെ അടിസ്ഥാനത്തിൽ നാളിതുവരെ വിതരണം ചെയ്ത തുകയുടെ വിശദാംശം ലഭ്യമാക്കാമോ; തുക അനുവദിച്ച് നൽകിയിട്ടില്ലെങ്കിൽ ആയതിന്റെ കാരണം വ്യക്തമാക്കാമോ;

ദേവസ്വം വസ്തുവകകൾ സർക്കാർ ഏറ്റെടുത്തതിന്റെ നഷ്ടപരിഹാരമായി നിലവിൽ അനുവദിച്ചുകൊണ്ടിരുന്ന എൺപത് ലക്ഷം രൂപ സർക്കാർ തിരുവിതാംകൂർ ദേവസ്വം ബോർഡിന് നൽകുന്നുണ്ടോ; നിലവിൽ എത്ര വർഷത്തെ കുടിശികയുണ്ടെന്ന് വ്യക്തമാക്കുമോ?

ശബരിമല ശുചീകരണത്തിനായി രൂപീകരിച്ച ശബരിമല സാനിറ്റേഷൻ സൊസൈറ്റിയുടെ പ്രവർത്തനത്തിന് തിരുവിതാംകൂർ ദേവസ്വം ബോർഡും സംസ്ഥാന സർക്കാരും തുല്യ വിഹിതം ചെലവിടണമെന്ന വ്യവസ്ഥ ഈ സർക്കാർ അധികാരത്തിൽ വന്നശേഷം ഒഴിവാക്കിയിട്ടുണ്ടോ; എങ്കിൽ കാരണം വ്യക്തമാക്കുമോ;

നിലവിൽ പ്രസ്തുത സൊസൈറ്റിയുടെ പ്രവർത്തനത്തിന്റെ മുഴുവൻ ബാധ്യതയും തിരുവിതാംകൂർ ദേവസ്വം ബോർഡിൽ നിക്ഷിപ്തമാക്കിയിട്ടുണ്ടോ; എങ്കിൽ ഏത് സാഹചര്യത്തിലാണ് ഇപ്രകാരം തീരുമാനമെടുത്തതെന്ന് വ്യക്തമാക്കുമോ?

ശബരിമല വികസന അതോറിറ്റിയുടെ പ്രവർത്തനം ഏത് രീതിയിലാണ് നടപ്പാക്കാൻ ഉദ്ദേശിക്കുന്നത്; എന്തൊക്കെ ചുമതലകളാണ് പ്രസ്തുത അതോറിറ്റിയിൽ നിക്ഷിപ്തമാകുന്നത്; വ്യക്തമാക്കാമോ;

തിരുവിതാംകൂർ ദേവസ്വം ബോർഡിന് ശബരിമല വികസന അതോറിറ്റിയുടെ പ്രവർത്തനത്തിലുള്ള പങ്കാളിത്തം ഏത് രീതിയിലായിരിക്കുമെന്ന് വിശദമാക്കാമോ?

വെർച്വൽ ക്യൂ സംവിധാനം നിലവിൽ വരുന്നതിന് മുമ്പ് ശബരിമലയിൽ ശരാശരി ഒരു ദിവസം ദർശനം നടത്തിയിരുന്ന ഭക്തരുടെ എണ്ണവും ശരാശരി ഒരു ദിവസത്തെ നടവരവും എത്രയാണെന്നും വെർച്വൽ ക്യൂ സംവിധാനം ഏർപ്പെടുത്തിയതിന് ശേഷം ശരാശരി ഒരു ദിവസം ദർശനം നടത്തിയിരുന്ന ഭക്തരുടെ എണ്ണവും ശരാശരി ഒരു ദിവസത്തെ നടവരവും എത്രയാണെന്നും വ്യക്തമാക്കുമോ?

2016-ൽ ശബരിമലയിൽ സ്വദേശ് ദർശൻ പദ്ധതിയുടെ ഭാഗമായി കേന്ദ്ര സർക്കാർ അനുവദിച്ച നൂറ് കോടി രൂപ പദ്ധതി രേഖ സമർപ്പിക്കാത്തതിന്റെ പേരിൽ വെട്ടിക്കുറച്ചിട്ടുണ്ടോ; എങ്കിൽ എത്ര തുകയാണ് വെട്ടിക്കുറച്ചതെന്നും ഇതിൽ നിന്നും നാളിതുവരെ എത്ര തുക കിട്ടിയിട്ടുണ്ടെന്നും വ്യക്തമാക്കുമോ;

യഥാസമയം പദ്ധതി രേഖ സമർപ്പിക്കാത്തതിനാൽ 53.46 കോടി രൂപ ശബരിമല വികസനത്തിന് നഷ്ടപ്പെട്ട വിഷയത്തിൽ ഉത്തരവാദികളായവർക്കെതിരെ എന്തൊക്കെ നടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ?

ശബരിമലയിലെ സ്വർണ്ണപ്പാളി ഹൈക്കോടതി അനുമതി ഇല്ലാതെ അറ്റകുറ്റ പ്രവൃത്തികൾക്കായി കൊണ്ടുപോയ സംഭവം ശ്രദ്ധയിൽപ്പെട്ടിട്ടുണ്ടോ;

എങ്കിൽ പ്രസ്തുത സംഭവത്തിൽ അന്വേഷണം നടത്തിയിട്ടുണ്ടോ; വിശദമാക്കാമോ; ഇല്ലെങ്കിൽ അതിന്റെ കാരണം വിശദമാക്കാമോ?

ശബരിമല സ്ത്രീ പ്രവേശനം സംബന്ധിച്ച് സുപ്രീം കോടതിയിൽ സർക്കാർ സ്വീകരിച്ച നിലപാട് എന്താണെന്ന് വിശദമാക്കാമോ;

2016-ൽ സ്ത്രീ പ്രവേശനത്തെ എതിർത്തുകൊണ്ട് ആ കാലയളവിലെ സർക്കാർ സ്വീകരിച്ച നിലപാടിന് പകരം 2007-ൽ നൽകിയ സത്യവാങ്മൂലത്തിൽ പറഞ്ഞതാണ് സർക്കാർ നിലപാടെന്ന് മുൻ സർക്കാരിന് വേണ്ടി ഹാജരായ വക്കീൽ സുപ്രീം കോടതിയിൽ അഭിപ്രായപ്പെട്ടിട്ടുണ്ടോ; വിശദമാക്കാമോ;

ഈ നിലപാട് തിരുത്താൻ തയ്യാറാകുമോ; ഇല്ലെങ്കിൽ കാരണം വിശദമാക്കാമോ?

ആഗോള അയ്യപ്പ സംഗമത്തിന് വേണ്ടി എത്ര തുകയാണ് ചെലവഴിക്കുന്നതെന്ന് വ്യക്തമാക്കാമോ;

ശബരിമലയില്‍ നിന്നുള്ള വരുമാനത്തില്‍ നിന്ന് എന്തെങ്കിലും തുക സര്‍ക്കാര്‍ ഖജനാവിലേയ്ക്ക് നല്‍കുന്നുണ്ടോ; വ്യക്തമാക്കാമോ;

ഈ സര്‍ക്കാര്‍ അധികാരത്തില്‍വന്നശേഷം ശബരിമലയില്‍ തീര്‍ത്ഥാടകര്‍ക്ക് സൗകര്യങ്ങള്‍ വര്‍ദ്ധിപ്പിക്കുന്നതിന്റെ ഭാഗമായി എത്ര തുകയാണ് ചെലവഴിച്ചിട്ടുള്ളത്; വിശദാംശം ലഭ്യമാക്കാമോ?

കഴിഞ്ഞ സര്‍ക്കാറിന്റെ കാലം മുതല്‍ നാളിതുവരെ ദേവസ്വം ബോര്‍ഡുകള്‍ക്കും അനുബന്ധ സ്ഥാപനങ്ങള്‍ക്കുമായി സംസ്ഥാന സര്‍ക്കാര്‍ ചെലവാക്കിയ തുകയുടെ വിശദാംശം നല്‍കാമോ?

എരുമേലിയിൽ കിഫ്‌ബി ഫണ്ട്‌ ഉപയോഗിച്ചുള്ള അടിസ്ഥാന സൗകര്യ വികസനങ്ങൾക്കായി നിലവിലുണ്ടായിരുന്ന എത്ര നിർമ്മിതികളാണ് പൊളിച്ച് മാറ്റിയതെന്ന് വ്യക്തമാക്കുമോ;

പ്രസ്തുത നിർമ്മിതികൾക്ക് പകരം കിഫ്‌ബി ഫണ്ട് മുഖേന നാളിതുവരെ എന്തൊക്കെ അടിസ്ഥാന സൗകര്യങ്ങൾ ഏർപ്പെടുത്തിയിട്ടുണ്ട്; പ്രസ്തുത നിർമ്മാണ പ്രവൃത്തികൾക്കായി ചെലവഴിച്ച തുക, പ്രവൃത്തികൾ ആരംഭിച്ച തീയതി, പൂർത്തീകരിച്ച തീയതി എന്നിവ സഹിതം വ്യക്തമാക്കുമോ?

പള്ളിപ്പാട് നീണ്ടൂര്‍ കാട്ടുവള്ളി ശ്രീദുര്‍ഗ്ഗാദേവിക്ഷേത്രത്തെ നിത്യപൂജയുള്ള ക്ഷേത്രമാക്കി മാറ്റുന്നതിനും രണ്ടുനേരം പൂജ ചെയ്യുന്നതിനുമുള്ള നടപടി സ്വീകരിക്കാമോ;

ഇതിനാവശ്യമായ ശാന്തി, കഴകം എന്നീ തസ്തികകളില്‍ സ്ഥിരം നിയമനങ്ങള്‍ നടത്തുന്നതിനുള്ള നിര്‍ദേശം നല്‍കാമോ;

ഇതുമായി ബന്ധപ്പെട്ട് തിരുവിതാംകൂര്‍ ദേവസ്വം ബോര്‍ഡിന് എന്തെങ്കിലും നിവേദനം ലഭിച്ചിട്ടുണ്ടോ; എങ്കില്‍ ഇക്കാര്യത്തില്‍ എന്തുനടപടി സ്വീകരിച്ചിട്ടുണ്ടെന്ന് അറിയിക്കാമോ?

നെയ്യാറ്റിന്‍കര മണ്ഡലത്തില്‍ 2021-22 മുതൽ 2024-25 വരെയുള്ള സാമ്പത്തിക വര്‍ഷങ്ങളിൽ ഓരോ സാമ്പത്തിക വർഷവും ദേവസ്വത്തിന്റെ നിയന്ത്രണത്തിലുള്ള എത്ര ക്ഷേത്രങ്ങള്‍ക്ക് വികസന പ്രവര്‍ത്തനങ്ങള്‍ക്കായി ഫണ്ട് അനുവദിച്ചിട്ടുണ്ട്; പ്രസ്തുത ക്ഷേത്രങ്ങളുടെ പേരും എത്ര തുക വീതം ഫണ്ട് അനുവദിച്ചെന്നും വ്യക്തമാക്കാമോ?

പാറശാല മണ്ഡലത്തില്‍ ദേവസ്വം ബോര്‍ഡിന് കീഴിലുള്ള ക്ഷേത്രങ്ങളുടെയും സ്ഥാപനങ്ങളുടെയും പഞ്ചായത്ത് തിരിച്ചുള്ള വിവരങ്ങള്‍ ലഭ്യമാക്കാമോ;

പ്രസ്തുത സ്ഥാപനങ്ങളുടെയും ക്ഷേത്രങ്ങളുടെയും നവീകരണത്തിനായി 2016 മെയ് മുതല്‍ 2025 വരെ നടപ്പാക്കിയ പദ്ധതികളുടെ വിശദാംശം, അനുവദിച്ച തുക, പ്രവൃത്തിയുടെ നിലവിലെ സ്ഥിതി ഉള്‍പ്പെടെ ലഭ്യമാക്കാമോ;

പ്രസ്തുത ക്ഷേത്രങ്ങളുടെ കീഴിലുള്ള ഭൂമിയുടെ അളവ് സംബന്ധിച്ച് പഞ്ചായത്ത് തിരിച്ചുള്ള വിവരങ്ങള്‍ നല്‍കാമോ; ദേവസ്വം ബോര്‍ഡിന്റെ ഉടമസ്ഥതയിലുള്ള പ്രസ്തുത ഭൂമി സംരക്ഷിക്കുന്നതിനായി സ്വീകരിച്ചിട്ടുള്ള നടപടികൾ വിശദമാക്കാമോ?

ഈ സർക്കാർ അധികാരത്തില്‍ വന്നശേഷം ചങ്ങനാശ്ശേരി നിയോജകമണ്ഡലത്തിലെ ഏതെല്ലാം ക്ഷേത്രങ്ങള്‍ക്കാണ് ധനസഹായം നല്‍കിയിട്ടുള്ളത്; വിശദാംശം ലഭ്യമാക്കാമോ?

തിരുവിതാംകൂര്‍ ദേവസ്വം ബോര്‍ഡിന്റെ നിയന്ത്രണത്തിലുള്ള ക്ഷേത്രങ്ങളെ എത്ര വിഭാഗങ്ങളായാണ് തരംതിരിച്ചിട്ടുള്ളത്; ഇവ ഓരോന്നിലും വ്യവസ്ഥ ചെയ്യുന്ന പൂജാവിധികള്‍, സമയക്രമങ്ങള്‍ എന്നിവ വിശദമാക്കുമോ?

തിരുവിതാംകൂർ ദേവസ്വം ബോർഡിലെ ജീവനക്കാർക്ക് ക്ഷാമബത്ത ഉൾപ്പെടെയുള്ള ആനുകൂല്യ ഇനത്തിൽ എത്ര തുക കുടിശിക നൽകാനുണ്ടെന്നും പ്രസ്തുത ആനുകൂല്യങ്ങൾ യഥാസമയം വിതരണം ചെയ്യുന്നതിന് സാധിക്കാത്ത തരത്തിൽ തിരുവിതാംകൂർ ദേവസ്വം ബോർഡ് പ്രതിസന്ധി നേരിടുന്നുണ്ടോയെന്നും വ്യക്തമാക്കുമോ;

നിയമപ്രകാരം ദേവസ്വം ബോർഡിന് സർക്കാർ നൽകേണ്ട നഷ്ടപരിഹാരം ഉൾപ്പെടെയുള്ള തുകകളുടെ കുടിശിക അടിയന്തരമായി അനുവദിച്ചുകൊണ്ട് പ്രസ്തുത പ്രതിസന്ധി ഒഴിവാക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

തിരുവിതാംകൂർ ദേവസ്വം ബോർഡിന്റെ നിലവിലെ ഭരണ സമിതി നിലവിൽ വന്നതെന്നാണെന്നും പ്രസ്തുത ഭരണ സമിതിയുടെ കാലാവധി എന്നുവരെയാണെന്നും കാലാവധി ദീർഘിപ്പിക്കുവാൻ ഉദ്ദേശിക്കുന്നുണ്ടോയെന്നും വ്യക്തമാക്കുമോ;

ആഗോള അയ്യപ്പ സംഗമവുമായി ബന്ധപ്പെട്ട് തിരുവിതാംകൂർ ദേവസ്വം ബോർഡിന്റെ പ്രതിനിധികൾക്ക് ഉണ്ടായിരുന്ന ചുമതലകൾ എന്തൊക്കെയാണെന്ന് വിശദമാക്കുമോ;

ആഗോള അയ്യപ്പ സംഗമവുമായി ബന്ധപ്പെട്ട് സ്പോൺസർഷിപ്പ് ലഭിച്ച തുകയുടെയും ആകെ ചെലവഴിച്ച തുകയുടെയും വിശദാംശം ഇനം തിരിച്ച് വ്യക്തമാക്കുമോ?

2021-2025 കാലഘട്ടത്തിൽ വടക്കാഞ്ചേരി മണ്ഡലത്തില്‍ ദേവസ്വം വകുപ്പും ദേവസ്വം ബോർഡും ക്ഷേത്ര ഉപദേശ സമിതികളും മുഖേന ക്ഷേത്രങ്ങളിൽ നടത്തിയ വികസന പ്രവർത്തനങ്ങളുടെയും ക്ഷേത്രങ്ങൾക്ക് നൽകിയ സാമ്പത്തിക സഹായങ്ങളുടെയും വിവരങ്ങൾ ലഭ്യമാക്കാമോ?

കോതമംഗലം മണ്ഡലത്തിലെ തൃക്കാരിയൂർ മഹാദേവ ക്ഷേത്രത്തിൽ ദേവസ്വം ബോർഡ് നടപ്പിലാക്കിവരുന്ന വികസന പ്രവർത്തനങ്ങൾ വിശദമാക്കാമോ; പ്രസ്തുത പ്രവൃത്തികളുടെ നിലവിലെ സ്ഥിതി വ്യക്തമാക്കാമോ;

വികസന പ്രവർത്തനങ്ങൾ അടിയന്തരമായി പൂർത്തീകരിക്കുന്നതിനാവശ്യമായ നടപടി സ്വീകരിക്കുമോയെന്ന് വ്യക്തമാക്കാമോ;

ക്ഷേത്രവുമായി ബന്ധപ്പെട്ട് പുതിയതായി നടപ്പാക്കാൻ ഉദ്ദേശിക്കുന്ന വികസന പ്രവർത്തനങ്ങൾ ഏതെല്ലാമെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം അരുവിക്കര മണ്ഡലത്തിൽ ദേവസ്വം ബോർഡിന് കീഴിലുള്ള ക്ഷേത്രങ്ങളിൽ നടപ്പാക്കിയ വികസന പദ്ധതികളെ കുറിച്ച് വിശദമാക്കാമോ?

കല്ല്യേശ്ശേരി മണ്ഡലത്തിൽ ദേവസ്വം വകുപ്പ് മുഖേന ക്ഷേത്രങ്ങൾക്ക് സാമ്പത്തിക സഹായം നൽകിയിട്ടുണ്ടോ; എങ്കിൽ വിശദാംശം ലഭ്യമാക്കാമോ?

തിരുവല്ല ശ്രീവല്ലഭ ക്ഷേത്രത്തിന് ചുറ്റുമുള്ള റോഡിന്റെ അറ്റകുറ്റപ്പണികൾ തിരുവതാംകൂർ ദേവസ്വം ബോർഡ് ഏറ്റെടുത്ത് നടത്തുവാൻ നിർദേശിക്കണമെന്നാവശ്യപ്പെട്ട് എതെങ്കിലും നിവേദനം ലഭിച്ചിട്ടുണ്ടോ;

ഈ വിഷയത്തിന്മേല്‍ ആരുടെയൊക്കെ നിവേദനം കിട്ടിയിട്ടുണ്ടെന്ന് വ്യക്തമാക്കാമോ;

പ്രസ്തുത റോഡ് പുനരുദ്ധരിക്കുന്നതിന് എന്തെല്ലാം നടപടികൾ സ്വീകരിക്കുന്നുണ്ടെന്ന് വ്യക്തമാക്കാമോ?

കാസർഗോഡ് ജില്ലയിൽ എത്ര ക്ഷേത്രങ്ങളുണ്ടെന്ന് മണ്ഡലം തിരിച്ച് വ്യക്തമാക്കാമോ;

ഈ ക്ഷേത്രങ്ങളിൽ സേവനം ചെയ്യുന്ന സ്ഥാനികമാരടക്കമുള്ളവരുടെ എണ്ണം വ്യക്തമാക്കാമോ;

സ്ഥാനികമാരടക്കമുള്ളവരുടെ വേതനവും അവർക്ക് ലഭിക്കുന്ന ആനുകൂല്യങ്ങളും എത്രയാണെന്ന് വ്യക്തമാക്കാമോ;

തുച്ഛമായ വേതനവും ആനുകൂല്യങ്ങളും ലഭിക്കുന്നത് കാരണം ജീവിത പ്രാരാബ്‍ധങ്ങൾ സഹിക്കുന്നവരാണ് സ്ഥാനികമാരും ക്ഷേത്രജീവനക്കാരും എന്നത് ശ്രദ്ധയിൽപ്പെട്ടിട്ടുണ്ടോ; എങ്കിൽ ഈ അവസ്ഥ പരിഹരിക്കുന്നതിന് സ്വീകരിക്കാനാവുന്ന നടപടികൾ എന്തൊക്കെയാണെന്ന് വ്യക്തമാക്കാമോ;

കഴിഞ്ഞ ഒമ്പത് വർഷത്തിനിടയിൽ ക്ഷേത്രം സ്ഥാനികമാരുടെയും ജീവനക്കാരുടെയും വേതനത്തിലുണ്ടായ വർദ്ധനവ് എത്രയാണ്; വേതനയിനത്തിൽ കുടിശിക ഉണ്ടെങ്കിൽ വിശദാംശം നൽകാമോ?

ക്ഷേത്ര ആവശ്യത്തിനായി ഉപയോഗിച്ചുവന്ന ഭൂമി ഹൈവേ വികസനത്തിന്‌ ഏറ്റെടുത്തപ്പോൾ നഷ്ടപരിഹാരം അനുവദിച്ചത് സംബന്ധിച്ച് ദേവസ്വം, റവന്യൂ വകുപ്പുകൾ തമ്മിൽ എന്തെങ്കിലും തർക്കം നിലവിലുണ്ടോ;

സംസ്ഥാനത്ത് എവിടെയൊക്കെയാണ് ഇത്തരം ഭൂമി ഹൈവേ വികസനത്തിനായി ഏറ്റെടുത്തിട്ടുള്ളതെന്നും എത്ര ഭൂമിയാണ് ഏറ്റെടുത്തതെന്നും എത്ര തുകയാണ് ഈ ഇനത്തിൽ നഷ്ടപരിഹാരമായി ലഭിച്ചിട്ടുള്ളതെന്നും പ്രസ്തുത തുക നിലവിൽ ഏത് രീതിയിലാണ് വിനിയോഗിച്ചിട്ടുള്ളതെന്നും വ്യക്തമാക്കുമോ?

ഈ സർക്കാരിന്റെ കാലയളവിൽ ദേവസ്വം വകുപ്പിന്റെ കീഴിലുള്ള വിവിധ സ്ഥാപനങ്ങളും ഏജൻസികളും നാളിതുവരെ നൽകിയിട്ടുള്ള പരസ്യങ്ങളുടെ വിശദാംശം, പരസ്യം നൽകിയ സ്ഥാപനം, പരസ്യത്തിനായി ചെലവഴിച്ച തുക, ഏത് ഏജൻസി മുഖേനയാണ് പരസ്യം നൽകിയത്, പ്രസ്തുത ഏജൻസിയെ തിരഞ്ഞെടുത്ത നടപടിക്രമം, ഏത് പദ്ധതിയുടെ ഭാഗമായാണ് പരസ്യം നൽകിയത്, ഈ കാലയളവിൽ പരസ്യയിനത്തിൽ ആകെ ചെലവഴിച്ച തുക എന്നിവ സഹിതം വ്യക്തമാക്കാമോ?