സഹകരണ നിയമങ്ങളും ചട്ടങ്ങളും സംസ്ഥാനത്ത് പ്രവര്‍ത്തിക്കുന്ന മള്‍ട്ടി സ്റ്റേറ്റ് സഹകരണ സംഘങ്ങൾക്ക് കൂടി ബാധകമാക്കുന്നതിന് നടപടി സ്വീകരിക്കുമോ?

തിരൂരങ്ങാടി മണ്ഡലത്തിലെ പരപ്പനങ്ങാടി എ കെ ജി സ്മാരക സഹകരണ ആശുപത്രിയുടെ സ്ഥലം കോടതി അറ്റാച്ച് ചെയ്തിട്ടുണ്ടോ; വിശദവിവരങ്ങൾ ലഭ്യമാക്കാമോ;

പ്രസ്തുത ഭൂമി മണ്ണിട്ട് നികത്തുന്നതിന് അനുമതി നൽകിയിരുന്നോ; വിശദമാക്കാമോ;

പ്രസ്തുത ഭൂമിയിൽ തിരൂരങ്ങാടി സബ് ആർ. ടി. ഒ. ഓഫീസ് മോട്ടോർ ഡ്രൈവിംഗ് ടെസ്റ്റ് നടത്തുന്നത് സഹകരണ വകുപ്പിന്റെ അനുമതിയോടു കൂടിയാണോ; വിശദമാക്കാമോ?

സഹകരണ വകുപ്പിലെ ഏതൊക്കെ തസ്തികകളിലാണ് ആശ്രിത നിയമനം നടത്തുന്നത്; വിശദമാക്കാമോ;

സഹകരണ ഇൻസ്പെക്ടര്‍ തസ്തികയില്‍ നാളിതുവരെ എത്രപേര്‍ക്ക് ആശ്രിത നിയമനം നല്‍കിയിട്ടുണ്ട്; പ്രസ്തുത ഉത്തരവുകളുടെ പകര്‍പ്പ് ലഭ്യമാക്കാമോ;

പ്രസ്തുത തസ്തികയില്‍ ആശ്രിത നിയമനം നല്‍കാതിരിക്കാൻ എന്തെങ്കിലും കാരണമുണ്ടോ; എങ്കില്‍ വിശദമാക്കാമോ;

2005 മുതല്‍ 2022 വരെ സഹകരണ വകുപ്പില്‍ നല്‍കിയ ആശ്രിത നിയമനങ്ങളുടെ വിവരങ്ങൾ ലഭ്യമാക്കാമോ;

പ്രസ്തുത കാലയളവില്‍ സഹകരണ ഇൻസ്പെക്ടര്‍ തസ്തികയില്‍ ഉണ്ടായിട്ടുള്ള ഒഴിവുകള്‍ വര്‍ഷാടിസ്ഥാനത്തില്‍ ലഭ്യമാക്കാമോ?

സഹകരണ ജീവനക്കാരുടെ പെൻഷൻ അവസാനമായി പരിഷ്കരിച്ചത്‌ എപ്പോഴാണെന്നും വകുപ്പിനു കീഴില്‍ ഇപ്പോൾ പെൻഷൻ പരിഷ്കരണ കമ്മിഷൻ നിലവിലുണ്ടോയെന്നും വ്യക്തമാക്കാമോ;

കേരള ബാങ്കിൽ നിന്ന് പെൻഷൻ ബോർഡിലേക്ക്‌ അടയ്ക്കാനുള്ള കുടിശ്ശിക എത്ര രൂപയാണെന്ന് ജില്ല തിരിച്ച്‌ അറിയിക്കാമോ; കുടിശ്ശിക തുക മുഴുവൻ പിരിച്ചെടുക്കുന്നതിന് എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് അറിയിക്കാമോ;

നിലവിൽ പെൻഷൻ ഫണ്ടിൽ നിന്ന് പ്രതിമാസം പെൻഷൻ നൽകുന്നതിന് എത്ര രൂപയുടെ കുറവ്‌ ഉണ്ടെന്ന് ജില്ല തിരിച്ച്‌ കണക്ക്‌ അറിയിക്കുമോ?

പ്രാദേശിക സാമ്പത്തിക വികസനത്തിന് സഹായകരമായ ഒരു വായ്പാ നയം തദ്ദേശ സ്വയംഭരണ സ്ഥാപനതലത്തില്‍ ആവിഷ്കരിക്കാന്‍ പദ്ധതികള്‍ തയ്യാറാക്കിയിട്ടുണ്ടോ;

സഹകരണ സംഘങ്ങളുടെ വിഭവ ശേഷിയും അധിക വിഭവവും ഉപയോഗിച്ച് പ്രാദേശിക സാമ്പത്തിക വികസനം ത്വരിപ്പെടുത്തുന്ന ഒരു കണ്‍സോർഷ്യം രൂപീകരിക്കുന്നതിന് ഉദ്ദേശിക്കുന്നുണ്ടോ;

കൃഷി, ക്ഷീര വികസനം തുടങ്ങിയ മേഖലകളില്‍ പ്രാദേശിക സംരംഭങ്ങള്‍ വികസിപ്പിക്കുന്നതിന് പദ്ധതികള്‍ രൂപീകരിക്കുമോ;

ചെറുകിട വ്യവസായം, ടൂറിസം ഡെസ്റ്റിനേഷനുകളുടെ വികാസം എന്നിവയില്‍ പ്രാദേശികമായി സംരംഭങ്ങള്‍ വികസിപ്പിക്കാന്‍ സഹകരണ സ്ഥാപനങ്ങള്‍ക്കുള്ള സാധ്യത വിലയിരുത്തിയിട്ടുണ്ടോ?

സഹകരണ മേഖലയില്‍ നിക്ഷേപകരുടെ വിശ്വാസം സംരക്ഷിക്കാൻ എന്തെല്ലാം നടപടികള്‍ സ്വീകരിക്കുമെന്ന് വ്യക്തമാക്കുമോ;

ഭരണ സമിതികളും ജീവനക്കാരും സംഘത്തില്‍ സാമ്പത്തിക തിരിമറി നടത്താതിരിക്കുവാന്‍ സഹകരണ വിജിലന്‍സ് വിഭാഗത്തിന്റെയും ഓഡിറ്റ്‌ വിഭാഗത്തിന്റെയും നിരന്തര സമ്പര്‍ക്കം സഹകരണ സ്ഥാപനങ്ങളില്‍ ഉണ്ടാകുന്നതിനു നടപടികള്‍ സ്വീകരിക്കുമോ; എങ്കില്‍ വിശദാംശം ലഭ്യമാക്കുമോ?

പൂഞ്ഞാർ മണ്ഡലത്തിൽ പാറത്തോട് കേന്ദ്രമാക്കി കേപ്പിന്റെ (കോ - ഓപ്പറേറ്റീവ് അക്കാഡമി ഓഫ് പ്രൊഫഷണൽ എഡ്യൂക്കേഷൻ) ആഭിമുഖ്യത്തിൽ ഒരു നഴ്സിംഗ് കോളേജ് ആരംഭിക്കുന്നതിനായി സമര്‍പ്പിച്ച അപേക്ഷയിന്‍മേല്‍ സ്വീകരിച്ചു വരുന്ന നടപടികളുടെ വിശദാംശം വ്യക്തമാക്കുമോ;

പ്രസ്തുത സ്ഥലത്ത് നഴ്സിംഗ് കോളേജ് അനുവദിക്കുന്നതിന് നടപടികൾ സ്വീകരിക്കുമോയെന്ന് വ്യക്തമാക്കുമോ?

പാലക്കാട് ജില്ലയിലെ വിനോദ സഞ്ചാര മേഖലകളിലേക്ക് സഞ്ചാരികളെ എത്തിക്കുന്നതിന് സഹകരണ വകുപ്പിന് കീഴില്‍ ടൂര്‍ ഓപ്പറേറ്റിങ്ങ് സംഘങ്ങള്‍ നിലവിലുണ്ടോ; എങ്കിൽ അവയുടെ എണ്ണം എത്രയാണെന്നും അവ ഏതൊക്കെയാണെന്നും അറിയിക്കാമോ;

സംസ്ഥാനത്ത് വിനോദ സഞ്ചാരികളെ എത്തിക്കുന്നതിന് സഹകരണ വകുപ്പിന്റെ നേതൃത്വത്തില്‍ പുതിയ പദ്ധതികള്‍ ആവിഷ്കരിച്ചിട്ടുണ്ടോ; വിശദവിവരങ്ങള്‍ ലഭ്യമാക്കാമോ?

ഈ സര്‍ക്കാര്‍ അധികാരമേറ്റ ശേഷം സഹകരണ മേഖലയുടെ വളര്‍ച്ചക്കും പുരോഗതിക്കും എന്തൊക്കെ പദ്ധതികളാണ് ആവിഷ്കരിച്ചിട്ടുള്ളത്;

ഇതുസംബന്ധിച്ച് ഉത്തരവുകള്‍ പുറപ്പെടുവിച്ചിട്ടുണ്ടോ; ആയതിന്റെ വിശദാംശങ്ങള്‍ ലഭ്യമാക്കാമോ;

സംസ്ഥാനത്തെ വായ്പാ സഹകരണ സംഘങ്ങളുടെ പ്രവര്‍ത്തനങ്ങളെക്കുറിച്ച് പഠനം നടത്തിയിട്ടുണ്ടോ; വിശദമാക്കാമോ;

സംസ്ഥാനത്ത് സഹകരണ നിക്ഷേപ സുരക്ഷാപദ്ധതിക്ക് തുടക്കം കുറിച്ചിട്ടുണ്ടോ; വിശദമാക്കാമോ?

ഏതു വ്യക്തിക്കും ബിനാമിയായി മള്‍ട്ടിസ്റ്റേറ്റ് സഹകരണ സംഘങ്ങള്‍ തുടങ്ങാന്‍ കഴിയുമോ; ഇത് ബാങ്കിംഗ് മേഖലയെ സാരമായി ബാധിക്കുമെന്നതിനാൽ നിയമനിര്‍മ്മാണം വഴി ഇതു ചെറുക്കാന്‍ കഴിയുമോ; വ്യക്തമാക്കാമോ?

ഈ സർക്കാർ അധികാരമേറ്റശേഷം നാളിതുവരെ സഹകരണ വകുപ്പ് വഴി കാഞ്ഞങ്ങാട് മണ്ഡലത്തിൽ നടപ്പിലാക്കിയതും നടപ്പിലാക്കി കൊണ്ടിരിക്കുന്നതുമായ പദ്ധതികൾ ഏതെല്ലാമാണെന്നും ആയതിന്റെ ഓരോന്നിന്റെയും നിലവിലെ സ്ഥിതി സംബന്ധിച്ച വിശദാംശങ്ങളും നൽകാമോ?

കെ.എസ്.ആര്‍. നിയമമനുസരിച്ച് പത്ത് ശതമാനം അന്തർവകുപ്പ് സ്ഥലംമാറ്റം നല്‍കണമെന്ന ചട്ടം സഹകരണ വകുപ്പ് പാലിക്കുന്നുണ്ടോ;

നിലവില്‍ മറ്റ് വകുപ്പില്‍ നിന്നും സഹകരണ വകുപ്പിലെ എല്‍.ഡി. ക്ലാര്‍ക്ക് തസ്തികയിലേക്ക് അന്തർവകുപ്പ് സ്ഥലം മാറ്റത്തിന് ആരെങ്കിലും അപേക്ഷ സമര്‍പ്പിച്ചിട്ടുണ്ടോ; എങ്കില്‍ അതിന്റെ വിശദാംശം ലഭ്യമാക്കുമോ;

ഈ വർഷം സഹകരണ വകുപ്പിൽ എറണാകുളം, ത്യശ്ശൂര്‍ ജില്ലകളില്‍ ക്ലാർക്കിന്റെ ഒഴിവ് വന്നിരുന്നോ; എങ്കിൽ അതിലേക്ക് അന്തർ വകുപ്പ് സ്ഥലം മാറ്റത്തിനായി ആരെയെങ്കിലും പരിഗണിച്ചിരുന്നോ;

2023 ജനുവരി 31 ന് ശേഷം സഹകരണ വകുപ്പില്‍ ത്യശ്ശൂര്‍, എറണാകുളം ജില്ലകളിൽ നിന്നും എത്ര ക്ലാര്‍ക്ക് തസ്തികയുടെ ഒഴിവ് റിപ്പോര്‍ട്ട് ചെയ്തുവെന്നും അതിലേക്ക് ഫെബ്രുവരി 1 ന് ശേഷം ലഭിച്ച അന്തർ വകുപ്പ് സ്ഥലം മാറ്റ അപേക്ഷയില്‍ എത്രയെണ്ണം പരിഗണിച്ചുവെന്നും അറിയിക്കാമോ; പരിഗണിച്ചില്ലെങ്കിൽ അതിന്റെ കാരണം വ്യക്തമാക്കുമോ;

2024 മാര്‍ച്ച് 31 ന് മുമ്പായി എറണാകുളം, ത്യശ്ശൂര്‍ ജില്ലകളില്‍ ക്ലാര്‍ക്ക് തസ്തികയിൽ ഒഴിവുകള്‍ വരാന്‍ സാധ്യതയുണ്ടോ; വിശദാംശം ലഭ്യമാക്കുമോ;

2024-ൽ സഹകരണ വകുപ്പിൽ വരുന്ന ക്ലാര്‍ക്ക് ഒഴിവിലേക്ക് നിയമത്തില്‍ വ്യവസ്ഥ ചെയ്തിരിക്കുന്ന പ്രകാരം അന്തർ വകുപ്പ് സ്ഥലം മാറ്റ അപേക്ഷകള്‍ പരിഗണിക്കുമോ; ഇല്ലെങ്കില്‍ വിശദാംശം ലഭ്യമാക്കുമോ?

കുടുംബശ്രീയുമായി ചേര്‍ന്ന് ആരംഭിച്ച മുറ്റത്തെ മുല്ല വായ്പാ പദ്ധതിയിലൂടെ 2022-23 സാമ്പത്തിക വര്‍ഷത്തില്‍ എത്ര രൂപയാണ് വായ്പയായി അനുവദിച്ചിട്ടുള്ളത്; വ്യക്തമാക്കാമോ;

പദ്ധതി ആദ്യം ആരംഭിച്ച പാലക്കാട് ജില്ലയില്‍ ഇതുവരെ എത്ര തുക ഈ പദ്ധതിയിലൂടെ വായ്പയായി അനുവദിച്ചിട്ടുണ്ട്; വ്യക്തമാക്കാമോ?

സഹകരണ സ്ഥാപനങ്ങളിലെ ജീവനക്കാര്‍ക്ക് മെഡിസെപ്പ് മാതൃകയില്‍ ഇന്‍ഷുറന്‍സ് പദ്ധതി നടപ്പാക്കുന്നതിനുള്ള നടപടികള്‍ ഏത് വരെയായി എന്ന് അറിയിക്കാമോ;

പദ്ധതി നടപ്പിലാക്കാന്‍ കാലതാമസം നേരിടുന്നത് എന്തുകൊണ്ടാണെന്ന് വ്യക്തമാക്കാമോ;

ഈ സാമ്പത്തിക വര്‍ഷം തന്നെ പദ്ധതി നടപ്പിലാക്കാന്‍ ആവശ്യമായ നടപടികള്‍ സ്വീകരിക്കുമോ; വിശദമാക്കാമോ?

കൃഷിക്കാര്‍ക്കും വ്യവസായ സംരംഭകര്‍ക്കും ആവശ്യമായ പ്രവര്‍ത്തന മൂലധനം ലഭ്യമാക്കുന്നതിന് സഹകരണ മേഖലയില്‍ എന്തൊക്കെ പദ്ധതികളാണ് ആവിഷ‍്ക്കരിച്ചിട്ടുള്ളതെന്ന് വ്യക്തമാക്കുമോ;

അത്തരത്തിൽ വായ്പ ലഭിക്കുന്നവര്‍ക്ക് എന്തൊക്കെ ആനുകൂല്യങ്ങളാണ് നല്‍കുന്നതെന്ന് അറിയിക്കാമോ?

കാര്‍ഷിക രംഗത്ത് സഹകരണ മേഖലയുടെ സമഗ്ര ഇടപെടല്‍ സുശക്തമാക്കുന്നതിന് ആവിഷ്കരിച്ച പദ്ധതികള്‍ വിശദമാക്കാമോ;

കേരള ബാങ്ക് വഴി ഫാര്‍മേഴ്സ് പ്രൊഡ്യൂസേഴ്സ് ഓര്‍ഗനൈസേഷനുകള്‍ രൂപീകരിക്കാന്‍ നടപടി സ്വീകരിച്ചിട്ടുണ്ടോ; വിശദവിവരം ലഭ്യമാക്കാമോ;

സഹകരണ ആശുപത്രികള്‍ക്ക് സർക്കാർ ധനസഹായം നല്‍കിവരുന്നുണ്ടോ; ആശുപത്രി അപ്പെക്സ് ഫെഡറേഷന് നല്‍കുന്ന സഹായങ്ങള്‍ എന്തൊക്കെയാണെന്ന് അറിയിക്കുമോ?

ആലപ്പുഴ നിയോജകമണ്ഡലത്തില്‍ കേരള ‌ബാങ്കിന്റെ എത്ര ശാഖകളാണ് പ്രവര്‍ത്തിക്കുന്നതെന്ന് വ്യക്തമാക്കാമോ;

പ്രസ്തുത ശാഖകളില്‍ ആകെ എത്ര ജീവനക്കാരാണ് ജോലി ചെയ്യുന്നതെന്ന് തസ്തിക തിരിച്ച് ലഭ്യമാക്കാമോ;

ആലപ്പുഴ മണ്ഡലത്തില്‍ കേരള ബാങ്കിന്റെ പുതിയ സായാഹ്ന ശാഖകള്‍ ആരംഭിക്കുന്നതിന് നടപടി സ്വീകരിക്കുമോ; വ്യക്തമാക്കാമോ;

കേരള ബാങ്ക് മുഖേന വിദ്യാര്‍ത്ഥികളില്‍ സമ്പാദ്യശീലം നടപ്പിലാക്കാന്‍ നിലവില്‍ എന്തൊക്കെ നടപടികളാണ് സ്വീകരിക്കുന്നത് എന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം കേരള ബാങ്ക് വഴി നടപ്പിലാക്കിയ സ്വയംതൊഴില്‍ പദ്ധതികള്‍ക്കായുള്ള വായ്പാ പദ്ധതികള്‍ എന്തെല്ലാം; വിശദമാക്കാമോ;

കാര്‍ഷിക മേഖലയില്‍ സഹകരണ ബാങ്ക് വഴി ഏതെല്ലാം വായ്പാ പദ്ധതികളാണ് നടപ്പിലാക്കുന്നതെന്ന് അറിയിക്കാമോ?

കേരള ബാങ്കിന് 2022-23 സാമ്പത്തിക വര്‍ഷം മുൻവര്‍ഷത്തെക്കാള്‍ കൂടുതല്‍ ഇടപാടുകള്‍ നടത്തുവാൻ സാധിച്ചിട്ടുണ്ടോ;

പ്രസ്തുത ബാങ്കിന് നിക്ഷേപ സമാഹരണത്തിലും വായ്പാ വിതരണത്തിലും കൈവരിക്കാന്‍ കഴിഞ്ഞ പുരോഗതിയെക്കുറിച്ച് വിശദമാക്കാമോ;

സംസ്ഥാനത്തെ സഹകരണ ബാങ്കിംഗ് രംഗത്ത് സ്ത്രീപങ്കാളിത്തം ഉറപ്പുവരുത്താൻ കഴിഞ്ഞിട്ടുണ്ടോ; വ്യക്തമാക്കാമോ?

സംസ്ഥാന കാര്‍ഷിക ഗ്രാമവികസന ബാങ്കുകളുടെ പ്രവര്‍ത്തനങ്ങള്‍ ആധുനികവല്‍ക്കരിക്കുന്നതിനായി സ്വീകരിക്കാന്‍ ഉദ്ദേശിക്കുന്ന നടപടികള്‍ വ്യക്തമാക്കാമോ?

സഹകരണ ബാങ്കുകളിൽ വായ്പാ തിരിച്ചടവ് കുടിശ്ശികയായിട്ടുള്ള വായ്പ്പക്കാർക്കു ആയതു ഇളവുകളോടെ തിരിച്ചടക്കുന്നതിനുള്ള ഒറ്റ തവണ തീർപ്പാക്കൽ സംവിധാനം ഏർപ്പെടുത്തുന്ന കാര്യം പരിഗണനയിലുണ്ടോ;

എങ്കിൽ ആയതു എപ്പോൾ നടപ്പിലാക്കും എന്നും അതുവഴി എന്തൊക്കെ ഇളവുകളാണ് നൽകാൻ കഴിയുന്നതെന്നും അറിയിക്കാമോ?

സഹകരണ ബാങ്കുകളില്‍ നിന്നും ലോണ്‍ എടുത്തവര്‍ മരണപ്പെടുമ്പോള്‍ അവരുടെ കുടുംബത്തിന് ലഭിക്കേണ്ട റിസ്ക് ഫണ്ട് അനുവദിക്കുന്നതില്‍ കാലതാമസം നേരിടുന്ന സാഹചര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത ആനുകുല്യം അനുവദിക്കുന്നതിനുളള നടപടിക്രമങ്ങള്‍ ഓണ്‍ലെെന്‍ മുഖേന നടപ്പിലാക്കാന്‍ ആലോചിക്കുന്നുണ്ടോ; വ്യക്തമാക്കാമോ;

പ്രസ്തുത പദ്ധതിയിൽ ഉൾപ്പെടുത്തി കോഴിക്കോട് ജില്ലയില്‍ ലഭിച്ചിട്ടുള്ള അപേക്ഷകളിൽ ഇനിയും എത്ര പേര്‍ക്കാണ് റിസ്ക് ഫണ്ട് അനുവദിക്കാനുള്ളത്; വിശദമാക്കാമോ?

നിലമ്പൂര്‍ സഹകരണ അര്‍ബന്‍ ബാങ്കിലെ നിലവിലുളള ഭരണസമിതി അംഗങ്ങളുടെ പേരും വിലാസവും ചുമതലയേറ്റ വര്‍ഷവും തെരഞ്ഞെടുത്ത വിഭാഗവും അറിയിക്കാമോ; വോട്ടെടുപ്പ് നടത്തിയാണോ ഇവരെ തെരഞ്ഞെടുത്തത്; ഇപ്പോഴത്തെ ഭരണ സമിതിക്ക് മുമ്പ് ഉണ്ടായിരുന്ന ഭരണസമിതി അംഗങ്ങളുടെ പേരും വിലാസവും ചുമതലയേറ്റ വര്‍ഷവും തെരഞ്ഞെടുത്ത വിഭാഗവും അറിയിക്കാമോ; വിശദമാക്കാമോ;

നിലമ്പൂര്‍ സഹകരണ അര്‍ബന്‍ ബാങ്കിന്റെ നിലവിലെ ചെയര്‍മാനെ പ്രസ്തുത ബാങ്കിന്റെ ഭരണസമിതി അംഗമായി തെരഞ്ഞെടുത്തത് ഏത് വര്‍ഷമാണ്; അദ്ദേഹത്തെ ആദ്യമായി ചെയര്‍മാനായി തെരഞ്ഞെടുത്തത് ഏത് വര്‍ഷമാണെന്നും എത്ര തവണയും എത്ര വര്‍ഷവും തുടര്‍ച്ചയായി അദ്ദേഹം ചെയര്‍മാന്‍ ആയിട്ടുണ്ടെന്നും അറിയിക്കാമോ;

അദ്ദേഹത്തെ ബാങ്കിന്റെ ചെയര്‍മാനായി തെരഞ്ഞെടുത്തതിനുശേഷം പ്രസ്തുത ബാങ്കിന്റെ പൊതുനന്മ ഫണ്ട് ചെലവഴിച്ചതിന്റെ നാളിതുവരെയുളള വിവരങ്ങള്‍ ലഭ്യമാക്കാമോ; മേല്‍ കാലയളവില്‍ 50,000 രൂപയോ അതിനു മുകളിലോ പൊതുനന്മ ഫണ്ട് വിനിയോഗിച്ചിട്ടുണ്ടെങ്കില്‍ ആര്‍ക്കൊക്കെ എന്തിനൊക്കെ നല്‍കിയെന്നും നല്‍കിയ തുകയും തീയതിയും വൗച്ചറും ഭരണസമിതി തീരുമാനത്തിന്റെ പകര്‍പ്പും ലഭ്യമാക്കാമോ;

പ്രസ്തുത വ്യക്തി ചെയര്‍മാനായി തെരഞ്ഞെടുക്കപ്പെട്ടതിനു ശേഷം നാളിതുവരെ പ്രസ്തുത ബാങ്കില്‍ എത്ര നിയമനങ്ങള്‍ നടന്നുവെന്നും ഏതെല്ലാം തസ്തികകളിലേക്കാണ് നിയമനം നടന്നതെന്നും അറിയിക്കാമോ; നിയമനം ലഭിച്ച ആളുകളുടെ പേരും വിലാസവും ഏത് വര്‍ഷത്തിലാണ് ഇവര്‍ക്ക് നിയമനം ലഭിച്ചതെന്നും നിലവില്‍ ജോലി ചെയ്യുന്ന ബ്രാഞ്ചുകളുടെ വിവരവും ലഭ്യമാക്കാമോ?

സംസ്ഥാനത്ത് പ്രാഥമിക സഹകരണ ബാങ്കുകളില്‍ നിന്നും കേരള ബാങ്കില്‍ നിന്നും ലോണ്‍ എടുത്തവര്‍ക്ക് ഒറ്റത്തവണ തീര്‍പ്പാക്കല്‍ പദ്ധതി നിലവിലുണ്ടോ; ഇല്ലെങ്കില്‍ ആയത് നടപ്പിലാക്കുന്ന വിഷയം പരിഗണനയിലുണ്ടോ; വിശദമാക്കാമോ?

സഹകരണ ബാങ്കുകളിലെ പാർട്ട് ടൈം ജീവനക്കാർക്ക് ഏതെങ്കിലും തരത്തിലുള്ള പ്രമോഷൻ സാധ്യത നിലവിൽ ഉണ്ടോയെന്ന് വ്യക്തമാക്കാമോ;

ഡിഗ്രിയും എച്ച്.ഡി.സി. യോഗ്യതയും ഉള്ള പാർട്ട് ടൈം ജീവനക്കാർക്ക് പ്രമോഷൻ നൽകുന്നതിന് ആവശ്യമായ ഭേദഗതി വരുത്താൻ ഉദ്ദേശിക്കുന്നുണ്ടോ; വ്യക്തമാക്കാമോ?

2021-22, 2022-23, 2023-24 എന്നീ കാലയളവുകളില്‍ നിലമ്പൂര്‍ പട്ടികവര്‍ഗ്ഗ സര്‍വ്വീസ് സഹകരണ സൊസെെറ്റിയുടെ ഭരണസമിതി തെരഞ്ഞെടുപ്പ് നടന്നിട്ടുണ്ടോ; ഉണ്ടെങ്കില്‍ ഭരണസമിതി അംഗങ്ങളുടെ പേര്, മേല്‍വിലാസം ഉള്‍പ്പടെയുള്ള വിശദാംശം നല്‍കാമോ; ഇതിന് മുമ്പ് ഏത് വര്‍ഷമാണ് തെരഞ്ഞെടുപ്പ് നടന്നിട്ടുളളത്; ആ വര്‍ഷത്തെ ഭരണ സമിതി അംഗങ്ങളുടെ പേര്, വിലാസം ഉള്‍പ്പടെയുള്ള വിശദാംശം നല്‍കാമോ;

സൊസൈറ്റിയില്‍ നിലവിലുളള ജീവനക്കാരുടെയും അവരുടെ തസ്തികകളുടെയും വിവരങ്ങൾ ലഭ്യമാക്കുമോ; പ്രസ്തുത ജീവനക്കാര്‍ എന്നുമുതലാണ് ജോലിയില്‍ പ്രവേശിച്ചതെന്നും ശമ്പളസ്കെയിലും വിരമിക്കുന്ന വര്‍ഷവും ഉള്‍പ്പടെയുള്ള വിവരങ്ങള്‍ ലഭ്യമാക്കാമോ;

പ്രസ്തുത സൊസെെറ്റിയുടെ നിയമാവലിയുടെ പകര്‍പ്പ് ലഭ്യമാക്കാമോ; സൊസെെറ്റിയില്‍ നിലവില്‍ എത്ര അംഗങ്ങളുണ്ടെന്നും, സൊസെെറ്റിയുടെ ഉടമസ്ഥതയില്‍ മലപ്പുറം ജില്ലയിലെ ഏതെല്ലാം വില്ലേജുകളിലാണ് ഭൂമിയുളളതെന്നും ഭൂമിയുടെ വിസ്തീര്‍ണ്ണം എത്രയെന്നും വിശദമാക്കാമോ;

സൊസെെറ്റിയുടെ 2019 മുതല്‍ 2023 വരെയുള്ള വര്‍ഷങ്ങളിലെ ഓഡിറ്റ് റിപ്പോര്‍ട്ട്, ന്യൂനതാസംഗ്രഹം എന്നിവ ലഭ്യമാക്കാമോ?

സംഗീതം, നാടകം, പ്രകടന കലകള്‍, ചിത്ര രചന എന്നിവയുൾപ്പെടെയുള്ള കലാകാരന്മാരുടെ ഉന്നമനത്തിനായി സംസ്ഥാനമൊട്ടാകെ പ്രവർത്തനപരിധിയായി കലാകാരന്മാരുടെ സഹകരണം സംഘം രൂപീകരിച്ചിട്ടുണ്ടോ; പ്രസ്തുത പദ്ധതിയുടെ പുരോഗതി അറിയിക്കാമോ;

കലാകാരന്മാര്‍ക്ക് പരമാവധി വേദികള്‍ നല്‍കി അവരുടെ വരുമാന മാര്‍ഗ്ഗം സുരക്ഷിതമാക്കാനുള്ള പദ്ധതി പ്രസ്തുത സഹകരണ സംഘം വഴി ഉദ്ദേശിക്കുന്നുണ്ടോ;

ദേശീയ കലകളെ സംരക്ഷിക്കുക എന്ന ലക്ഷ്യം മുന്നില്‍ കണ്ടുകൊണ്ട് ടൂറിസം മേഖലയുടെ സഹകരണത്തോടെ എല്ലാ ജില്ലകളിലും പ്രസ്തുത സംഘത്തിന്റെ നേതൃത്വത്തില്‍ സ്റ്റേജ് ഷോകള്‍ നടത്തുന്നതിന് പദ്ധതി വിഭാവനം ചെയ്തിട്ടുണ്ടോ;

കലാകാരന്മാര്‍ക്ക് സ്ഥിരം വേദിയെന്ന ലക്ഷ്യം നേടുന്നതിന് പദ്ധതികള്‍ തയ്യാറാക്കിയിട്ടുണ്ടോ;

ജീവിത കാലം മുഴുവന്‍ സമൂഹത്തിന്റെ സാംസ്ക്കാരികമായ അഭിവൃദ്ധിക്ക് വേണ്ടി പ്രവര്‍ത്തിച്ച നിരാലംബരും അവശരും രോഗികളുമായ കലാകാരന്മാര്‍ക്ക് വേണ്ടി പ്രസ്തുത സഹകരണ സംഘം എന്തെങ്കിലും ആശ്വാസ നടപടികള്‍ സ്വീകരിക്കുമോ?

അമ്പലപ്പുഴയിൽ പ്രവർത്തിക്കുന്ന ചേതന പാലിയേറ്റീവ് & ചാരിറ്റബില്‍ സൊസൈറ്റി എന്നുമുതലാണ് പ്രവര്‍ത്തനം ആരംഭിച്ചതെന്നും സൊസൈറ്റിയുടെ പ്രസിഡന്റും സെക്രട്ടറിയും ആരാണെന്നും വ്യക്തമാക്കാമോ;

പ്രസ്തുത സൊസൈറ്റി പ്രവര്‍ത്തനം ആരംഭിച്ചതു മുതല്‍ നാളിതുവരെയായി എത്ര തവണ വാര്‍ഷിക റിട്ടേണ്‍ നല്‍കിയിട്ടുണ്ടെന്ന് വിശദമാക്കാമോ;

സംസ്ഥാനത്ത് ഇത്തരത്തില്‍ പ്രവര്‍ത്തിക്കുന്ന സംഘങ്ങള്‍ വാര്‍ഷിക റിട്ടേണും ഓഡിറ്റും അതത് സാമ്പത്തിക വര്‍ഷം തയ്യാറാക്കണമെന്ന് വ്യവസ്ഥയുണ്ടോ; ഇപ്രകാരം ഓഡിറ്റ് ബന്ധപ്പെട്ട സ്ഥാപനങ്ങളിൽ നടത്തിയില്ലെങ്കില്‍ എന്ത് നടപടികളാണ് സ്വീകരിക്കുകയെന്ന് വ്യക്തമാക്കാമോ; പ്രസ്തുത സംഘത്തിനെതിരെ സ്വീകരിച്ച നടപടികള്‍ വിശദമാക്കാമോ;

പ്രസ്തുത സൊസൈറ്റിയുടെ ധന കൈമാറ്റം, ഉപകരണങ്ങള്‍ വാങ്ങല്‍ തുടങ്ങിയ കാര്യങ്ങള്‍ക്ക് സംഘത്തിന് വേണ്ടി ചെക്കില്‍ ഒപ്പിടുന്നത് ആരെല്ലാമെന്നും അവരുടെ പേര്, സ്ഥാനപ്പേര് എന്നിവയും ലഭ്യമാക്കാമോ;

പ്രസ്തുത സ്ഥാപനത്തിന്റെ നാളിതുവരെയുള്ള എല്ലാ പര്‍ച്ചേയ്സുകളും ചട്ടങ്ങൾ പാലിച്ചാണോയെന്നത് പരിശോധിച്ചിട്ടുണ്ടോ; എങ്കിൽ ഇത് സംബന്ധിച്ച റിപ്പോര്‍ട്ട് ലഭ്യമാക്കാമോ?

സഹകരണ മേഖലയെ ശക്തിപ്പെടുത്തുന്നതിനുള്ള വിദ്യാഭ്യാസ, ഗവേഷണ, പരിശീലന പരിപാടികള്‍ വിശദമാക്കാമോ;

സഹകരണ വകുപ്പിന്റെ ആധുനികവല്കരണം ഏത് ഘട്ടത്തിലാണ്; വിശദമാക്കാമോ;

സഹകരണ ഓഡിറ്റ് വിഭാഗത്തിന്റെ പുനരാവിഷ്കരണവും നവീകരണവും ഗൗരവമായി നടപ്പില്‍ വരുത്തുന്നതിന് പ്രത്യേക പദ്ധതി രൂപപ്പെടുത്തിയിട്ടുണ്ടോ; വിശദമാക്കാമോ;

പ്രതിസന്ധിയിലായ സഹകരണ സ്ഥാപനങ്ങളെ സഹായിക്കുന്നതിന് സഹകരണ സംരക്ഷണ നിധി രൂപീകരിച്ചിട്ടുണ്ടോ; സഹകരണ സംരക്ഷണ നിധി രൂപീകരിച്ചതിന് ശേഷം ഈ രംഗത്ത് നടത്തിയ ഇടപെടലുകള്‍ വ്യക്തമാക്കാമോ?

മലപ്പുറം ജില്ലാ സഹകരണ ബാങ്ക് മുഖേന പ്രാഥമിക സഹകരണ സംഘങ്ങൾക്ക് നൽകിയിരുന്ന വായ്പകളുടെ പലിശ നിരക്ക് വർദ്ധിപ്പിക്കുവാൻ തീരുമാനിച്ചിട്ടുണ്ടോ;

ജില്ലാ സഹകരണ ബാങ്ക് പ്രാഥമിക സഹകരണ സംഘങ്ങൾക്ക് നൽകിയിരുന്ന ക്യാഷ് ഷെയർ ലിങ്ക് സ്പെഷ്യൽ ഗോൾഡ് വായ്പയുടെ പലിശ നിരക്ക് ഇതുവരെ എത്രയായിരുന്നു എന്നും ഇത് എത്രയായി വർദ്ധിപ്പിക്കാനാണ് നിർദ്ദേശം ഉള്ളതെന്നും വ്യക്തമാക്കുമോ;

ഇതുവഴി പ്രാഥമിക സഹകരണ സംഘങ്ങൾ നൽകുന്ന വായ്പകളുടെ പലിശ നിരക്ക് വർദ്ധിപ്പിക്കേണ്ടി വരുമെന്ന കാര്യം ശ്രദ്ധയിൽപ്പെട്ടിട്ടുണ്ടോ; എങ്കിൽ ഇവ വർദ്ധിപ്പിക്കാൻ ഇടയാക്കിയ സാഹചര്യം വ്യക്തമാക്കുമോ;

പലിശ നിരക്ക് വർദ്ധനവ് സഹകാരികൾക്ക് പ്രയാസകരമാകും എന്നതിനാൽ പലിശ പഴയ നിരക്കിൽ ആക്കുന്നതിന് നടപടി സ്വീകരിക്കുമോ?

പാലക്കാട് ജില്ലയിലെ സഹകരണ ബാങ്കുകള്‍ മുഖേന കഴിഞ്ഞ സാമ്പത്തിക വര്‍ഷം എത്ര പേര്‍ക്ക് കാര്‍ഷിക വായ്പ വിതരണം ചെയ്തിട്ടുണ്ടെന്ന് വ്യക്തമാക്കുമോ;

ഇപ്രകാരം വിതരണം ചെയ്ത തുക എത്രയെന്ന് വ്യക്തമാക്കുമോ;

ജില്ലയില്‍ ഏറ്റവും കൂടുതല്‍ കാര്‍ഷിക വായ്പ വിതരണം ചെയ്ത സഹകരണ ബാങ്ക് ഏതാണെന്ന് വ്യക്തമാക്കുമോ?

നെല്ല് സംഭരണത്തിനും വിപണനത്തിനുമായി സഹകരണ മേഖലയിൽ കോട്ടയം ആസ്ഥാനമായി കേരള പാഡി പ്രൊക്യൂർമെൻറ് പ്രൊസസിംഗ് ആന്റ് മാര്‍ക്കറ്റിംഗ് സഹകരണ സംഘം (കാപ്കോസ്) രൂപീകരിച്ചിട്ടുണ്ടോ;

പ്രസ്തുത സംഘത്തിന്റെ കീഴിൽ കുട്ടനാട്, അപ്പര്‍ കുട്ടനാട് മേഖലയില്‍ പാലക്കാട് റൈസ്‍മില്‍ മാതൃകയിലുള്ള ആധുനിക റൈസ് മില്ലുകള്‍ സ്ഥാപിക്കാന്‍ പദ്ധതികള്‍ ആവിഷ്കരിക്കുന്നുണ്ടോ;

പ്രസ്തുത സംഘത്തിന്റെ പ്രവര്‍ത്തന പരിധിയില്‍പ്പെട്ട നെല്‍കര്‍ഷകരെ സഹായിക്കാനും നെല്‍കൃഷി വ്യാപിപ്പിക്കുവാനും പദ്ധതികള്‍ തയ്യാറാക്കാന്‍ ഉദ്ദേശിക്കുന്നുണ്ടോ;

കര്‍ഷകരില്‍ നിന്ന് സംഭരിച്ച നെല്ല് സംസ്കരിച്ച് ബ്രാന്‍ഡഡ് അരിയാക്കി വിപണിയില്‍ എത്തിക്കുന്നതിന് നടപടി സ്വീകരിക്കുമോ; വിശദീകരിക്കാമോ?

കുറഞ്ഞ ഫെയര്‍ വാല്യു നിശ്ചയിച്ചിട്ടുള്ള പ്രദേശങ്ങളില്‍ സഹകരണ സംഘങ്ങളുടെയും സര്‍വ്വീസ് ബാങ്കുകളുടെയും വികസനത്തിനായി വസ്തു വാങ്ങാന്‍ കഴിയാതെ വരുന്നത് ശ്രദ്ധയില്‍പ്പെട്ടിട്ടുണ്ടോ;

ഇതുമൂലം ഉണ്ടാകുന്ന വികസന പ്രവൃത്തികളുടെ തടസ്സങ്ങള്‍ ഒഴിവാക്കുന്നതിനായി ആവശ്യമായ നടപടികള്‍ സ്വീകരിക്കുമോ?

സഹകരണ സംഘം പ്രസിഡന്റുമാരുടെയും മെമ്പർമാരുടെയും പ്രതിമാസ ഓണറേറിയം, സിറ്റിങ്ങ് ബത്ത എന്നിവ അവസാനമായി വർദ്ധിപ്പിച്ചത് എന്നാണ് എന്ന് വ്യക്തമാക്കാമോ;

പ്രസിഡന്റുമാർക്ക് നിലവില്‍ ഓണറേറിയം നൽകുന്നത് ഏത് നിരക്കിലാണ് എന്ന് വ്യക്തമാക്കാമോ;

സഹകരണ സംഘം പ്രസിഡന്റുമാരുടെ ഓണറേറിയം, മെമ്പർമാരുടെ സിറ്റിംങ്ങ് ബത്ത എന്നിവ കാലോചിതമായി പരിഷ്കരിക്കുന്നതിന് നടപടി സ്വീകരിക്കുമോ?

സഹകരണ സ്ഥാപനങ്ങളിലെ ഓഡിറ്റ് സംവിധാനം കാര്യക്ഷമമല്ലാത്തതുമൂലം സ്ഥാപനങ്ങളുടെ നടത്തിപ്പിൽ വീഴ്ചകളും അപാകതകളുമുള്ളതായുള്ള റിപ്പോര്‍ട്ടുകള്‍ ശ്രദ്ധയില്‍പ്പെട്ടിട്ടുണ്ടോ; വിശദാംശം നൽകുമോ;

സഹകരണ സ്ഥാപനങ്ങളിലെ ഓഡിറ്റ് സംവിധാനം കാര്യക്ഷമമാക്കുന്നതിന് ടീം ഓഡിറ്റ് സംവിധാനം സംസ്ഥാനം മുഴുവനായി നടപ്പിലാക്കുവാൻ സ്വീകരിച്ച നടപടികൾ എന്തൊക്കെയാണ്; വിശദാംശം നല്‍കുമോ;

ഓഡിറ്റിംഗിനുണ്ടാകുന്ന കാലതാമസം ഒഴിവാക്കുന്നതിനും നിലവില്‍ പെന്റിംഗ് ആയിട്ടുള്ള പരിശോധനകള്‍ സമയബന്ധിതമായി പൂർത്തിയാക്കുന്നതിനും നടപടികള്‍ സ്വീകരിച്ചിട്ടുണ്ടോ; സഹകരണ വകുപ്പിലെ നിലവിലുള്ള സ്റ്റാഫ് പാറ്റേൺ സംസ്ഥാനം മുഴുവനായി ടീം ഓഡിറ്റ് നടപ്പിലാക്കുന്നതിന് പര്യാപ്തമാണോ; വിശദാംശം നല്‍കുമോ;

ടീം ഓഡിറ്റ് സംവിധാനം നടപ്പിലാക്കിയ ജില്ലകളിൽ എത്ര ഓഡിറ്റർമാരുടെ അധിക തസ്തിക സൃഷ്ടിച്ചിട്ടുണ്ടെന്നും സംസ്ഥാനം മുഴുവനായി ടീം ഓഡിറ്റ് നടപ്പിലാക്കുന്നതിന് നിലവിലുള്ളതിനേക്കാൾ എത്ര ഓഡിറ്റർമാരാണ് അധികമായി വേണ്ടി വരുന്നതെന്നും വിശദമാക്കാമോ;

യോഗ്യരായ യു.ഡി.ക്ലാർക്/യു.ഡി.ടൈപ്പിസ്റ്റ്മാരുടെ അഭാവത്തിൽ പ്രമോഷൻ തസ്തികയായ ജൂനിയർ ഇൻസ്പെക്ടർ/ഓഡിറ്റർ തസ്തികയിൽ മാറ്റിവെച്ചിരിക്കുന്ന ഒഴിവുകൾ നേരിട്ടുള്ള നിയമനത്തിനായി പി.എസ്.സി. യിലേക്ക് റിപ്പോർട്ട് ചെയ്യണമെന്ന കേരള അഡ്മിനിസ്ട്രേറ്റിവ് ട്രിബൂണലിന്റെ 1953/2022 കേസ് പ്രകാരമുള്ള 27.01.23-ലെ വിധിയുടെ അടിസ്ഥാനത്തിൽ അന്നേ ദിവസം നിലവിലുണ്ടായിരുന്ന 32 ഒഴിവുകളിൽ 13 ഒഴിവുകൾ നേരിട്ടുള്ള നിയമനത്തിനും 8 ഒഴിവുകൾ പ്രമോഷൻ നല്കുന്ന ഇനത്തിലും നികത്തിയ ശേഷം അവശേഷിക്കുന്ന 11 ഒഴിവുകൾ നേരിട്ടുള്ള നിയമനത്തിനായി പി.എസ്.സി.യിലേക്ക് റിപ്പോർട്ട് ചെയ്തിട്ടുണ്ടോ; ഇല്ലെങ്കിൽ അതിന്റെ കാരണം വ്യക്തമാക്കാമോ?

സഹകരണമേഖലയില്‍ പബ്ലിക് റിസ്ക് ഫണ്ട് നടപ്പിലാക്കിയിട്ടുണ്ടോയെന്ന് വ്യക്തമാക്കുമോ; 

ഈ സര്‍ക്കാര്‍ അധികാരത്തില്‍ വന്നതിനുശേഷം കടുത്തുരുത്തി നിയോജകമണ്ഡലത്തില്‍ നിന്നും എത്ര റിസ്ക്ക് ഫണ്ട് അപേക്ഷകള്‍ ലഭിച്ചിട്ടുണ്ടെന്നും അവ ഏതെല്ലാമെന്നും ഇവയില്‍ എത്രപേര്‍ക്ക് ധനസഹായം ലഭിച്ചിട്ടുണ്ടെന്നും വ്യക്തമാക്കാമോ;

ഇനി ധനസഹായം കിട്ടാനുള്ളവര്‍ ആരെല്ലാമെന്നും ഇവരുടെ അപേക്ഷയിന്മേൽ എന്ത് നടപടി സ്വീകരിച്ച് വരുന്നുവെന്നും വ്യക്തമാക്കാമോ;

റിസ്ക് ഫണ്ട് പദ്ധതിയനുസരിച്ച് എന്തെല്ലാം ആനുകൂല്യങ്ങളും സഹായങ്ങളുമാണ് നല്‍കിവരുന്നത് എന്ന് വ്യക്തമാക്കാമോ;

ഏതെല്ലാം തലത്തിലുള്ള സഹകരണസംഘങ്ങളും ബാങ്കുകളുമാണ് പ്രസ്തുത പദ്ധതി നടപ്പാക്കിയത്; വിശദാംശം നല്‍കുമോ?

ഈ വര്‍ഷം ഏതെല്ലാം പട്ടികജാതി/പട്ടികവര്‍ഗ്ഗ സഹകരണ സംഘങ്ങളില്‍ പുതുതായി സര്‍ക്കാര്‍ അംഗീകൃത കോഴ്സുകള്‍ ആരംഭിച്ചിട്ടുണ്ടെന്ന് വ്യക്തമാക്കാമോ;

എത്ര പട്ടികജാതി/പട്ടികവര്‍ഗ്ഗ സഹകരണ സംഘങ്ങള്‍ പുതിയ ഉല്പാദന യൂണിറ്റുകള്‍ ഏറ്റെടുത്തിട്ടുണ്ടെന്ന് വ്യക്തമാക്കാമോ?

കേന്ദ്ര നിയമ പ്രകാരം രൂപീകൃതമാവുന്ന മള്‍ട്ടി സ്റ്റേറ്റ് സഹകരണ സംഘങ്ങള്‍ക്ക് മേല്‍ സംസ്ഥാനത്തിന് നിയന്ത്രണമുണ്ടോ;

സംസ്ഥാനത്തെ പ്രാഥമിക കാര്‍ഷിക വായ്പാ സംഘങ്ങള്‍, മത്സ്യ സംഘങ്ങള്‍, ഡയറി സംഘങ്ങള്‍ എന്നിവയുടെ അടിസ്ഥാന വിവരങ്ങള്‍ കേന്ദ്രം തയ്യാറാക്കുന്ന ഡാറ്റാ ബേസിലേക്ക് നല്‍കണമെന്ന നിര്‍ദ്ദേശം കേന്ദ്ര സര്‍ക്കാര്‍ നല്‍കിയിട്ടുണ്ടോ;

ഡാറ്റാ ബേസിലേക്ക് നല്‍കുന്ന വിവരങ്ങള്‍ പരിശോധനയ്ക്ക് വിധേയമാക്കി ആനുകൂല്യങ്ങളും സേവനങ്ങളും നല്‍കുമെന്ന് കേന്ദ്ര സര്‍ക്കാര്‍ വാഗ്ദാനം നല്‍കിയിരുന്നോ; പ്രസ്തുത വാഗ്ദാനങ്ങള്‍ അനുസരിച്ച് ആനുകൂല്യങ്ങളോ സേവനങ്ങളോ ലഭ്യമായിട്ടുണ്ടോ;

മള്‍ട്ടി സ്റ്റേറ്റ് സഹകരണ സംഘങ്ങളിലെ നിക്ഷേപങ്ങള്‍ക്ക് സുരക്ഷ നല്‍കാന്‍ സംസ്ഥാനങ്ങള്‍ക്ക് നിയമം മൂലം സാധിക്കുമോ;

കേന്ദ്ര സര്‍ക്കാരിന് പ്രസ്തുത നിക്ഷേപങ്ങള്‍ക്ക് ഉത്തരവാദിത്തമുള്ളതായി വിലയിരുത്തിയിട്ടുണ്ടോ;

സംസ്ഥാന നിയമ പ്രകാരം നിക്ഷേപകനും ഇടപാടുകാരനും വായ്പാക്കാര്‍ക്കും നിലവിൽ ലഭിക്കുന്ന സംരക്ഷണവും ആനുകൂല്യങ്ങളും കേന്ദ്രം രൂപീകരിക്കുന്ന മള്‍ട്ടി സ്റ്റേറ്റ് സഹകരണ സംഘങ്ങളില്‍ നിന്നും സംസ്ഥാനത്തെ ഇടപാടുകാര്‍ക്ക് ലഭ്യമാവുമോ?

പ്രാഥമിക കാര്‍ഷിക വായ്പ സംഘങ്ങള്‍ വഴി നല്‍കിയിട്ടുള്ള ഹ്രസ്വകാല കാര്‍ഷിക വായ്പകളില്‍ സംഘങ്ങള്‍ക്ക് നല്‍കാനുള്ള സബ്സിഡി സംബന്ധിച്ച വിവരം ലഭ്യമാക്കുമോ;

പ്രസ്തുത സംഘങ്ങള്‍ക്ക് ഉത്തേജന പലിശയിളവ് പദ്ധതി പ്രകാരമുള്ള ധനസഹായം അനുവദിക്കുന്നതിനായി നടപ്പു സാമ്പത്തിക വര്‍ഷം എത്ര തുക വകയിരുത്തിയിട്ടുണ്ടെന്ന് വ്യക്തമാക്കുമോ?

കൺസ്യൂമർഫെഡുമായി ബന്ധപ്പെട്ട ജീവനക്കാരുടെ പേരിൽ നിലവില്‍ രജിസ്റ്റര്‍ ചെയ്തിട്ടുള്ള വിജിലൻസ് കേസുകളുടെ എണ്ണം ലഭ്യമാക്കുമോ;

നിലവില്‍ എത്ര പേരെ പ്രസ്തുത കേസുകളില്‍ പ്രതിയായി രജിസ്റ്റർ ചെയ്തിട്ടുണ്ട്;

നിലവില്‍ എത്ര പേർ പ്രസ്തുത കേസുകളില്‍ നടപടിയ്ക്ക് വിധേയരായിട്ടുണ്ട്;

നിലവിൽ അന്വേഷണം നടന്നുകൊണ്ടിരിക്കുന്ന കേസുകളില്‍ ഉള്‍പ്പെട്ട എത്രപേർ സ്ഥാപനം വിട്ടു പോയിട്ടുണ്ട്;

ഇത്തരം വിജിലൻസ് കേസുകളുമായി ബന്ധപ്പെട്ട് എത്ര രൂപയാണ് കൺസ്യൂമർഫെഡിന് നഷ്ടമായത്?

രജിസ്റ്റര്‍ ചെയ്ത ആധാരങ്ങളുടെ സംരക്ഷണത്തിന് ആധാരങ്ങള്‍ ഡിജിറ്റലൈസേഷൻ ചെയ്യുന്നതിന് നടപടികൾ ആരംഭിച്ചിട്ടുണ്ടോ; ഉണ്ടെങ്കില്‍ നടപടികള്‍ എത്രത്തോളമായിയെന്ന് അറിയിക്കുമോ?

2022-23 സാമ്പത്തിക വര്‍ഷം വയനാട് ജില്ലയില്‍ നടന്ന ആകെ സ്ഥലം രജിസ്ട്രേഷന്‍ എത്രയാണെന്ന് വ്യക്തമാക്കാമോ;

ഇതിലൂടെ സര്‍ക്കാരിന് ലഭിച്ച വരുമാനം എത്രയാണെന്ന് വ്യക്തമാക്കാമോ;

ഈ സാമ്പത്തിക വര്‍ഷം ആരംഭിച്ച് നാളിതുവരെ എത്ര സ്ഥലം രജിസ്ട്രേഷന്‍ നടന്നു എന്നും എത്ര വരുമാനം ലഭിച്ചു എന്നും വ്യക്തമാക്കാമോ?

ആധാരം രജിസ്റ്റര്‍ ചെയ്യുന്നതിലും പകര്‍പ്പുകള്‍ പൊതു ജനങ്ങള്‍ക്ക് ലഭ്യമാക്കുന്നതിലും ഈ രംഗത്ത് നിലവിലുള്ള അവ്യക്തതകള്‍ പരിഹരിക്കുന്നതിനുമായി സര്‍ക്കാര്‍ നടപ്പാക്കി വരുന്ന മുന്‍ ആധാര വിവരങ്ങളുടെ ഡിജിറ്റലെെസേഷന്‍ ഏത് ഘട്ടത്തിലാണെന്ന് അറിയിക്കാമോ;

എല്ലാ ആവശ്യങ്ങള്‍ക്കുമുള്ള മുദ്രപത്രങ്ങള്‍ക്ക് ഇ-സ്റ്റാമ്പിംഗ് സൗകര്യം ഏര്‍പ്പെടുത്തുന്ന കാര്യം പരിഗണനയിലുണ്ടോ;

രജിസ്ട്രേഷന്‍ നടപടികളുടെ ലഘൂകരണം ലക്ഷ്യമിട്ട് നടപ്പാക്കാനുദ്ദേശിക്കുന്ന നടപടികളുടെ വിശദാംശം വ്യക്തമാക്കാമോ?

രജിസ്‌ട്രേഷൻ വകുപ്പിന്റെ ഓണ്‍ലൈന്‍ സേവനങ്ങള്‍ ഒന്നിലധികം പേര്‍ ഒരേസമയം ഉപയോഗിക്കുമ്പോള്‍ തകരാറിലാകുന്നതായി ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ ഇത് പരിഹരിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

പ്രസ്തുത വകുപ്പില്‍ ഓണ്‍ലൈന്‍ സ്ഥലമാറ്റം നടപ്പിലാക്കിയിട്ടുണ്ടോ; എത് ഏജന്‍സി മുഖാന്തിരമാണ് നടപ്പിലാക്കുന്നത്; എൻ.ഐ.സി.യുമായി ധാരണപത്രം നിലവിലുണ്ടോ; എങ്കില്‍ പകര്‍പ്പ് ലഭ്യമാക്കാമോ?

കാസർഗോഡ് ജില്ലയിലെ സബ് രജിസ്ട്രാർ ഓഫീസുകളുടെ വിശദാംശം ലഭ്യമാക്കുമോ;

പ്രസ്തുത ഓഫീസുകളുടെ പരിധിയിൽ വരുന്ന വില്ലേജുകളുടെ വിശദാംശം ലഭ്യമാക്കുമോ;

2022-23 വർഷം പ്രസ്തുത സബ് രജിസ്ട്രാർ ഓഫീസുകളിൽ എത്ര ഭൂമി രജിസ്ട്രേഷൻ നടന്നിട്ടുണ്ട് എന്ന് ഓഫീസ് തിരിച്ച് കണക്ക് ലഭ്യമാക്കുമോ; ഇതിലൂടെ എത്ര വരുമാനം ലഭിച്ചു എന്ന് ഓഫീസ് തിരിച്ച് കണക്ക് ലഭ്യമാക്കുമോ?

ചാത്തമംഗലം സബ് രജിസ്ട്രാർ ഓഫീസിന്റെ പുതിയ കെട്ടിട നിർമ്മാണം പൂർത്തിയായിട്ടുണ്ടോ എന്ന് വ്യക്തമാക്കുമോ;

സബ് രജിസ്ട്രാർ ഓഫീസ് ഇപ്പോൾ പ്രവർത്തിക്കുന്ന കെട്ടിടത്തിന്റെ വാടക എത്രയാണെന്ന് വ്യക്തമാക്കുമോ;

പുതിയ കെട്ടിടത്തിന്റെ ഉദ്ഘാടനം നിർവഹിച്ചിട്ട് എത്ര നാളായി എന്ന് വിശദമാക്കുമോ;

വാടക കെട്ടിടത്തിൽ നിന്ന് പ്രസ്തുത ഓഫീസ് സർക്കാർ കെട്ടിടത്തിലേക്ക് മാറ്റി സ്ഥാപിക്കുന്നതിന് നടപടി സ്വീകരിക്കുമോ?

കുന്നത്തുനാട് മണ്ഡലത്തിലെ സബ് രജിസ്ട്രാര്‍ ഓഫീസുകളുടെ വിശദാംശം ലഭ്യമാക്കാമോ;

ഇതില്‍ എത്ര ഓഫീസുകള്‍ വാടക കെട്ടിടത്തില്‍ പ്രവര്‍ത്തിക്കുന്നുവെന്ന് അറിയിക്കാമോ;

പ്രസ്തുത ഓഫീസുകള്‍ക്ക് സ്വന്തമായി കെട്ടിടം നിര്‍മ്മിക്കുന്നതിനുള്ള നടപടികള്‍ സ്വീകരിച്ചിട്ടുണ്ടോ; വിശദവിവരം ലഭ്യമാക്കാമോ?

കണ്ണൂര്‍ ജില്ലയിലെ കല്ല്യാശ്ശേരി സബ് രജിസ്ട്രാര്‍ ഓഫീസിന് ലഭ്യമായ സ്ഥലത്ത് പുതിയ കെട്ടിടം നിര്‍മ്മിക്കുന്നതിന് നടപടി സ്വീകരിച്ചിട്ടുണ്ടോ; വിശദാംശം നൽകാമോ?

ഈ സര്‍ക്കാര്‍ അധികാരത്തില്‍ വന്ന ശേഷം കോട്ടയം ജില്ലയിലെ രജിസ്ട്രേഷന്‍ ഓഫീസുകളുടെ നവീകരണത്തിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ; വിശദവിവരം നല്‍കുമോ;

ഏതെല്ലാം ഓഫീസുകള്‍ക്കാണ് പുതിയ കെട്ടിടം നിര്‍മ്മിക്കാന്‍ ഫണ്ട് അനുവദിച്ചിട്ടുള്ളതെന്ന് വ്യക്തമാക്കുമോ; ഉത്തരവുകളുടെ പകര്‍പ്പ് ലഭ്യമാക്കുമോ?

കോതമംഗലം സബ് രജിസ്ട്രാര്‍ ഓഫീസ് ഉദ്ഘാടനം കഴിഞ്ഞ് നാളുകള്‍ കഴിഞ്ഞിട്ടും പുതിയ കെട്ടിടത്തില്‍ പ്രവര്‍ത്തനം ആരംഭിക്കാന്‍ കഴിയാത്തത് ശ്രദ്ധയില്‍പ്പെട്ടിട്ടുണ്ടോ;

പുതിയ കെട്ടിടത്തില്‍ പ്രവര്‍ത്തനം ആരംഭിക്കുന്നതിലുള്ള തടസ്സങ്ങള്‍ വ്യക്തമാക്കാമോ;

പ്രസ്തുത ഓഫീസ് പുതിയ കെട്ടിടത്തില്‍ പ്രവര്‍ത്തനം ആരംഭിക്കുന്നതിനാവശ്യമായ അടിയന്തര നടപടി സ്വീകരിക്കുമോ എന്ന് വ്യക്തമാക്കുമോ?

10.09.2018 മുതല്‍ 20.02.2020 വരെ താനൂര്‍ സബ് രജിസ്ട്രാര്‍ ഓഫീസ് പ്രവർത്തിച്ചിരുന്ന മുഹമ്മദ് ഹനീഫ എന്നയാളുടെ ഉടമസ്ഥതയിലുള്ള കെട്ടിടത്തിന്റെ വാടക കുടിശ്ശിക അനുവദിക്കുന്നത് സംബന്ധിച്ച നടപടി ഏത് ഘട്ടത്തിലാണെന്ന് വിശദമാക്കുമോ;

പ്രസ്തുത കെട്ടിടത്തിന്റെ റെന്റ് സര്‍ട്ടിഫിക്കറ്റ് പൊതുമരാമത്ത് വകുപ്പില്‍ നിന്നും ലഭ്യമായിട്ടുണ്ടോ; ആയത് ലഭിക്കുന്നതിന് കാലതാമസം ഉണ്ടാകുന്നതിന്റെ കാരണം അറിയിക്കുമോ; പ്രസ്തുത സര്‍ട്ടിഫിക്കറ്റ് ലഭിക്കുന്നതിനായി മലപ്പുറം ജില്ലാ രജിസ്ട്രാര്‍ ഓഫീസ് സ്വീകരിച്ച നടപടി വിശദമാക്കുമോ;

പ്രസ്തുത വാടക കുടിശിക അടിയന്തരമായി അനുവദിക്കുന്നതിന് നടപടി സ്വീകരിക്കുമോ?