സുഭിക്ഷ കേരളം പദ്ധതിയില്‍ ഉള്‍പ്പെടുത്തി പൂഞ്ഞാര്‍ മണ്ഡലത്തില്‍ മത്സ്യബന്ധന വകുപ്പ് നടപ്പാക്കി വരുന്ന പദ്ധതികളുടെ വിശദാംശം ലഭ്യമാക്കുമോ;

പ്രസ്തുത പദ്ധതി പ്രകാരം മത്സ്യകൃഷി ചെയ്യുന്ന കര്‍ഷകര്‍ക്ക് എന്തെല്ലാം സഹായങ്ങളാണ് നല്‍കുന്നതെന്ന് വ്യക്തമാക്കുമോ;

പദ്ധതി പ്രകാരമുള്ള മത്സ്യകൃഷിക്ക് ഇന്‍ഷ്വറന്‍സ് പരിരക്ഷ ഏര്‍പ്പെടുത്തിയിട്ടുണ്ടോ; ഇല്ലെങ്കില്‍ അതിനാവശ്യമായ നടപടി സ്വീകരിക്കുമോയെന്ന് വ്യക്തമാക്കുമോ?

ഫിഷറീസ് വകുപ്പിൽ ധനകാര്യ ഇൻസ്പെക്ഷൻ വിഭാഗം അവസാനമായി പരിശോധന നടത്തിയത് എന്നാണ്; പ്രസ്തുത പരിശോധനയിൽ ഏതെങ്കിലും തരത്തിലുള്ള ക്രമക്കേടുകള്‍ കണ്ടെത്തിയിട്ടുണ്ടോ; പരിശോധന റിപ്പോർട്ടിന്റെ പകർപ്പ് ലഭ്യമാക്കുമോ?

കുറ്റ്യാടി നിയോജക മണ്ഡലത്തില്‍ ഉള്‍നാടന്‍ മത്സ്യകൃഷി പ്രോത്സാഹിപ്പിക്കുന്നതിനായി 2022-23 സാമ്പത്തിക വര്‍ഷം സ്വീകരിച്ച നടപടികള്‍ എന്തൊക്കെയെന്ന് അറിയിക്കാമോ;

ഇത്തരത്തില്‍ നടത്തിയ പ്രവര്‍ത്തനങ്ങളുടെ ഭാഗമായി മത്സ്യ ഉല്‍പാദനത്തില്‍ വര്‍ദ്ധനവ് ഉണ്ടായിട്ടുണ്ടോ; എങ്കില്‍ വിശദവിവരം അറിയിക്കാമോ;

ഉള്‍നാടന്‍ മത്സ്യകര്‍ഷകര്‍ക്ക് മെച്ചപ്പെട്ട വില ലഭ്യമാകുന്നുണ്ടോ; ഇല്ലെങ്കില്‍ മെച്ചപ്പെട്ട വില ലഭ്യമാക്കുന്നതിന് എന്തൊക്കെ നടപടികളാണ് സ്വീകരിക്കുന്നത് എന്ന് വിശദമാക്കാമോ?

തീരദേശ കോര്‍പ്പറേഷന്‍ മുഖേന പയ്യന്നൂര്‍ മണ്ഡലത്തിൽ പുതിയ പദ്ധതികള്‍ക്ക് എസ്റ്റിമേറ്റ് തയ്യാറാക്കി സമര്‍പ്പിച്ചിട്ടുണ്ടോ; എങ്കില്‍ ഏതെല്ലാം പദ്ധതികള്‍ക്കാണ് എസ്റ്റിമേറ്റ് തയ്യാറാക്കി സമര്‍പ്പിച്ചിട്ടുള്ളതെന്ന് വിശദമാക്കാമോ;

പ്രസ്തുത പദ്ധതികളുടെ നിലവിലെ അവസ്ഥ എന്താണെന്ന് അറിയിക്കാമോ;

ഈ പദ്ധതികള്‍ക്ക് ഭരണാനുമതി നല്‍കാന്‍ ആവശ്യമായ നടപടി സ്വീകരിക്കുമോ; വ്യക്തമാക്കാമോ?

ഫിഷറീസ് വകുപ്പ് കാസർഗോഡ് ജില്ലയിൽ 2022-23 വർഷം നടപ്പിലാക്കുന്ന വിവിധ പദ്ധതികളുടെ വിശദവിവരം ലഭ്യമാക്കുമോ;

പ്രസ്തുത പദ്ധതികള്‍ക്കായി വകയിരുത്തിയ തുക, ചെലവഴിച്ച തുക, അവയുടെ നിലവിലെ പ്രവർത്തന പുരോഗതി എന്നിവ സംബന്ധിച്ച വിശദവിവരം ലഭ്യമാക്കാമോ?

മത്സ്യകൃഷി പ്രോത്സാഹിപ്പിക്കുന്നതിന് ഫിഷറീസ് വകുപ്പിന്റെ നേതൃത്വത്തില്‍ ആവിഷ്ക്കരിച്ച് നടപ്പിലാക്കി വരുന്ന പദ്ധതികള്‍ വിശദമാക്കാമോ;

കൃഷി ചെയ്ത മത്സ്യം വില്‍ക്കുന്നതിന് മതിയായ സൗകര്യം ലഭിക്കാത്തതുമൂലം ചെറുകിട മത്സ്യകര്‍ഷകര്‍ നേരിടുന്ന പ്രയാസങ്ങള്‍ ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ ആയത് പരിഹരിക്കുന്നതിനായി കര്‍ഷകരില്‍ നിന്നും മത്സ്യം ശേഖരിക്കുന്നതിനും വിപണനം നടത്തുന്നതിനും ആവശ്യമായ നടപടി സ്വീകരിക്കുമോ?

തിരൂരങ്ങാടി നിയോജക മണ്ഡലത്തിലെ പരപ്പനങ്ങാടി നഗരസഭയിൽ ഫിഷറീസ് വകുപ്പിന് കീഴിൽ കൺവെൻഷൻ സെന്റർ നിർമ്മിക്കുന്നതിനുള്ള നടപടി സ്വീകരിക്കുമോ; വിശദമാക്കാമോ;

പ്രസ്തുത പ്രവൃത്തിയുമായി ബന്ധപ്പെട്ട പ്രൊപ്പോസൽ സർക്കാരിന്റെ പരിഗണനയിലുണ്ടോ; വിശദമാക്കാമോ?

സംസ്ഥാനത്തെ മത്സ്യത്തൊഴിലാളികളുടെ പുനരധിവാസവും സാമൂഹ്യസുരക്ഷയും മുന്‍നിര്‍ത്തി ഈ സര്‍ക്കാര്‍ നടത്തുന്ന പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

വൈജ്ഞാനിക തൊഴില്‍ എന്ന ലക്ഷ്യം മുന്‍നിര്‍ത്തി മത്സ്യത്തൊഴിലാളികള്‍ക്ക് തൊഴില്‍ നൈപുണ്യ പരിശീലനത്തിനായി ഫിഷറീസ് വകുപ്പ് പദ്ധതി തയ്യാറാക്കുവാന്‍ തീരുമാനിച്ചിട്ടുണ്ടോ; വിശദമാക്കുമോ;

പുനരധിവാസ പ്രവര്‍ത്തനങ്ങളുടെ ഭാഗമായി മത്സ്യത്തൊഴിലാളികള്‍ക്ക് കിടപ്പാടമൊരുക്കുന്നതിനായി സര്‍ക്കാര്‍ നടപ്പാക്കുന്ന ഭവനപദ്ധതിയുടെ പ്രവര്‍ത്തന പുരോഗതി വിലയിരുത്തിയിട്ടുണ്ടോ; വിശദാംശം നല്‍കുമോ?

ഈ സർക്കാർ അധികാരത്തിൽ വന്നതിന് ശേഷം ഫിഷറീസ് വകുപ്പ് കാഞ്ഞങ്ങാട് മണ്ഡലത്തിൽ നടപ്പിലാക്കിയതും നടപ്പിലാക്കാൻ ഉദ്ദേശിക്കുന്നതുമായ പദ്ധതികൾ സംബന്ധിച്ച വിശദാംശം നൽകാമോ;

മണ്ഡലത്തിൽ നടപ്പിലാക്കിക്കൊണ്ടിരിക്കുന്ന പ്രവൃത്തികൾ ഏത് ഘട്ടത്തിലാണെന്ന് അറിയിക്കുമോ?

സമുദ്ര വിഭവങ്ങളില്‍ നിന്നുള്ള മൂല്യവര്‍ദ്ധിത ഉല്പന്നങ്ങള്‍ നിര്‍മ്മിക്കുന്നതിന് സംസ്ഥാനത്ത് എന്തെങ്കിലും പദ്ധതികള്‍ നിലവിലുണ്ടോ; ഉണ്ടെങ്കില്‍ അവയുടെ വിശദാംശം ലഭ്യമാക്കാമോ?

ചങ്ങനാശ്ശേരി നിയോജക മണ്ഡലത്തില്‍ ഉള്‍നാടന്‍ മത്സ്യകൃഷി പ്രോത്സാഹിപ്പിക്കുന്നതിനായി മത്സ്യകര്‍ഷകര്‍ക്ക് ഏതെല്ലാം തരത്തിലുള്ള സേവനങ്ങളാണ് നല്‍കുന്നതെന്ന് വ്യക്തമാക്കുമോ;

മണ്ഡലത്തിലെ ഏതെല്ലാം പഞ്ചായത്തുകളിലാണ് സേവനം ലഭ്യമാക്കിയിട്ടുള്ളതെന്ന് വ്യക്തമാക്കുമോ; വിശദവിവരം നല്‍കുമോ?

സംസ്ഥാനത്ത് തീരദേശ ജനങ്ങള്‍ക്ക് തൊഴിലും ജീവനോപാധിയും നല്‍കുന്ന മത്സ്യമേഖലയുടെ പ്രാധാന്യം സര്‍ക്കാര്‍ കണക്കിലെടുത്തിട്ടുണ്ടോ;

ഇതിന്റെ അടിസ്ഥാനത്തില്‍ പ്രസ്തുത മേഖലയില്‍ നിലവിൽ സര്‍ക്കാര്‍ നടപ്പിലാക്കുന്ന പദ്ധതികള്‍ എന്തൊക്കെയാണെന്ന് അറിയിക്കുമോ;

എല്ലാ മത്സ്യബന്ധന ഗ്രാമങ്ങളിലും ശുദ്ധജലം, ശൗചാലയം, മാലിന്യസംസ്കരണ സംവിധാനം എന്നീ പ്രാഥമിക സംവിധാനങ്ങള്‍ ഒരുക്കുന്നതിന് സാധിച്ചിട്ടുണ്ടോ; ഇല്ലെങ്കില്‍ അതിനുളള നടപടി സ്വീകരിക്കുമോ; വിശദമാക്കുമോ?

തീരദേശ മേഖലകളുടെ സമഗ്രവികസനത്തിനായി 2016 മുതല്‍ നാളിതുവരെ എത്ര കോടി രൂപ അനുവദിച്ചിട്ടുണ്ടെന്ന വിവരം ജില്ല തിരിച്ച് വ്യക്തമാക്കാമോ;

ഇപ്രകാരം അനുവദിച്ച തുക വിനിയോഗിച്ച് പൂര്‍ത്തീകരിച്ച പ്രവൃത്തികളുടെയും പൂര്‍ത്തിയാക്കാനുള്ള പ്രവൃത്തികളുടെയും വിശദാശം അറിയിക്കാമോ;

നാളിതുവരെ ആരംഭിക്കാത്ത എത്ര പ്രവൃത്തികള്‍ ഉണ്ടെന്ന് അറിയിക്കാമോ?

സംസ്ഥാനത്തുനിന്നും കയറ്റുമതി ചെയ്യുന്ന സമുദ്രോല്പന്നങ്ങളുടെ അളവിലും കയറ്റുമതി മൂല്യത്തിലും മുന്‍ വര്‍ഷങ്ങളെ അപേക്ഷിച്ച് വര്‍ദ്ധനവുണ്ടായിട്ടുണ്ടോ; വിശദമാക്കുമോ;

സമുദ്രോല്പന്നങ്ങളുടെ കയറ്റുമതി വര്‍ദ്ധിക്കുന്ന നിലയിലേക്ക് മത്സ്യമേഖലയെ പ്രാപ്തമാക്കുന്നതിനായി സര്‍ക്കാര്‍ നടത്തുന്ന പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; വിശദാംശം നല്‍കാമോ;

പ്രസ്തുത പ്രവര്‍ത്തനങ്ങളുടെ ഭാഗമായി ഫിഷറീസ് ഇന്നവേഷന്‍ കൗണ്‍സില്‍ രൂപീകരിക്കുവാന്‍ തീരുമാനിച്ചിട്ടുണ്ടോ; വിശദാംശം നല്‍കുമോ?

സംസ്ഥാനത്തിന്റെ സവിശേഷ സാഹചര്യം പരിഗണിച്ച് ശുദ്ധജല മത്സ്യകൃഷി വ്യാപിപ്പിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

ശുദ്ധജല മത്സ്യോല്പാദനം വര്‍ദ്ധിപ്പിക്കുന്നതിനായി സ്വീകരിച്ചിട്ടുള്ള നടപടികൾ എന്തെല്ലാമെന്ന് വ്യക്തമാക്കുമോ; പ്രസ്തുത നടപടികളുടെ ഫലമായി മത്സ്യോല്പാദനത്തില്‍ വര്‍ദ്ധനവ് ഉണ്ടായിട്ടുണ്ടോ; വിശദമാക്കുമോ;

ശുദ്ധജല മത്സ്യോല്പാദനം വര്‍ദ്ധിപ്പിക്കുന്നതിനായി നൂതന കൃഷിരീതികള്‍ അവലംബിക്കുന്നതിനും ഗുണമേന്മയുള്ള മത്സ്യവിത്തുകളുടെ ഉല്പാദനത്തിനും അവയുടെ കാര്യക്ഷമമായ വിതരണത്തിനും എന്തെല്ലാം നടപടികൾ സ്വീകരിച്ചുവരുന്നുവെന്ന് വിശദമാക്കുമോ;

ഉല്പാദിപ്പിക്കുന്ന മത്സ്യത്തിന്റെ സംസ്കരണത്തിനും മെച്ചപ്പെട്ട വിതരണശൃംഖല സൃഷ്ടിക്കുന്നതിനും എന്തെല്ലാം സംവിധാനങ്ങളാണ് പരിഗണനയിലുള്ളത്; വിശദമാക്കുമോ?

ഫിഷറീസ് വകുപ്പിന് കീഴിലുള്ള സ്ഥാപനങ്ങളിൽ കഴിഞ്ഞ മൂന്ന് വർഷ കാലയളവിൽ സി.ആന്റ്.എ.ജി നടത്തിയ ഓഡിറ്റിൽ എന്തൊക്കെ ക്രമക്കേടുകൾ കണ്ടെത്തിയിട്ടുണ്ട് എന്ന് വ്യക്തമാക്കുമോ;

പ്രസ്തുത ഓഡിറ്റ് സംബന്ധിച്ച അന്തിമ റിപ്പോർട്ട് സർക്കാരിന് ലഭിച്ചിട്ടുണ്ടോ; എങ്കിൽ ആയതിന്റെ പകർപ്പ് ലഭ്യമാക്കുമോ?

സംസ്ഥാനത്ത് മത്സ്യത്തൊഴിലാളി സമ്പാദ്യ സമാശ്വാസ പദ്ധതിയുടെ മൂന്നാം ഗഡു നാളിതുവരെ നൽകിയിട്ടില്ല എന്ന വിവരം ശ്രദ്ധയില്‍പ്പെട്ടിട്ടുണ്ടോ;

മുന്‍ വര്‍ഷങ്ങളില്‍ ഇത്തരം സാഹചര്യം പരിഹരിക്കുന്നതിന് എന്തെല്ലാം നടപടികള്‍ സ്വീകരിച്ചിട്ടുണ്ടെന്നും നിലവില്‍ മൂന്നാം ഗഡു നല്‍കുന്നതിന് എന്തെല്ലാം നടപടി സ്വീകരിച്ചുവെന്നും വിശദമാക്കാമോ?

പ്രകൃതിക്ഷോഭം മൂലം കേടുപാടുകൾ സംഭവിച്ച മത്സ്യബന്ധന ബോട്ടുകൾ, ഉപകരണങ്ങൾ എന്നിവ നന്നാക്കുന്നതിനായി പ്രകൃതിക്ഷോഭം മൂലമുള്ള ദുരിതാശ്വാസത്തിന് എന്ന ബജറ്റ് ശീർഷകത്തിൽ നിന്നും കഴിഞ്ഞ അഞ്ച് സാമ്പത്തിക വർഷങ്ങളിൽ അനുവദിച്ച തുകയും ചെലവഴിച്ച തുകയും സാമ്പത്തിക വർഷം തിരിച്ച് വ്യക്തമാക്കുമോ;

പ്രസ്തുത തുക നാളിതുവരെ ചെലവഴിക്കാത്തതിന്റെ കാരണം വ്യക്തമാക്കുമോ?

മത്സ്യമാർക്കറ്റുകളുടെ നവീകരണത്തിന് വേണ്ടി സംസ്ഥാനത്ത് പ്രത്യേക പദ്ധതികൾ നടപ്പിലാക്കിയിട്ടുണ്ടോ; എങ്കിൽ ഇതിനായി ഏതെല്ലാം മത്സ്യമാർക്കറ്റുകൾ തെരഞ്ഞെടുത്തു എന്നും അവയിൽ ഏതെല്ലാം ഇതിനകം നവീകരിച്ചു എന്നും വിശദമാക്കുമോ;

കൊണ്ടോട്ടി മുനിസിപ്പാലിറ്റിയുടെ സ്ഥലത്ത് പ്രവർത്തിക്കുന്ന മത്സ്യമാർക്കറ്റിന്റെ നവീകരണം ഈ പദ്ധതിയിൽ ഉൾപ്പെടുത്തിയിട്ടുണ്ടോ; ഇല്ലെങ്കിൽ ആയത് ഉൾപ്പെടുത്തുന്നതിന് നടപടി സ്വീകരിക്കുമോ?

സംസ്ഥാനത്ത് ഓരോ വര്‍ഷം കഴിയുതോറും മത്സ്യലഭ്യതയില്‍ ഇടിവുണ്ടാകുന്നത് ശ്രദ്ധയില്‍പ്പെട്ടിട്ടുണ്ടോ;

കഴിഞ്ഞ അഞ്ച് വര്‍ഷക്കാലയളവില്‍ സംസ്ഥാനത്ത് നിന്നും ഓരോ വര്‍ഷവും എത്ര ടണ്‍ മത്സ്യം വീതമാണ് ലഭിച്ചത്; ഇതുസംബന്ധിച്ച നിലവിലെ സ്ഥിതി എന്താണ്; വ്യക്തമാക്കുമോ;

ഇതര സംസ്ഥാനങ്ങളില്‍ നിന്നുള്ള മത്സ്യബന്ധന ബോട്ടുകള്‍ സംസ്ഥാന തീരത്തെ ചെറുമീനുകളെയടക്കം പിടിച്ച് മത്സ്യസമ്പത്തിന് ശോഷണം വരുത്തുന്നത് തടയാന്‍ എന്തൊക്കെ നടപടികള്‍ സ്വീകരിച്ചുവരുന്നുവെന്ന് വ്യക്തമാക്കുമോ?

കുണ്ടറ നിയോജക മണ്ഡലത്തില്‍ തീരദേശ വികസന കോര്‍പ്പറേഷന്റെ കീഴില്‍ നടന്നുവരുന്ന പ്രവൃത്തികള്‍ എതൊക്കെയെന്നും അവയുടെ പ്രവര്‍ത്തന പുരോഗതിയും വിശദമാക്കാമോ?

ഫിഷറീസ് വകുപ്പിന് 2016-17 സാമ്പത്തിക വർഷം മുതൽ നാളിതുവരെ പദ്ധതിയിനത്തിൽ അനുവദിച്ച തുകയും ചെലവഴിച്ച തുകയും സാമ്പത്തിക വർഷ അടിസ്ഥാനത്തിൽ വ്യക്തമാക്കുമോ?

നിര്‍ധനരായ മത്സ്യത്തൊഴിലാളികളുടെ പഠനത്തില്‍ മികവ് പുലര്‍ത്തുന്ന കുട്ടികള്‍ക്ക് വിദ്യാഭ്യാസ ആനുകൂല്യങ്ങള്‍ നല്‍കുന്നതിന് എന്തൊക്കെ പദ്ധതികളാണ് ആവിഷ്ക്കരിച്ച് നടപ്പിലാക്കിയിട്ടുള്ളത്; വിശദാംശം ലഭ്യമാക്കാമോ?

സംസ്ഥാനത്തെ മത്സ്യത്തൊഴിലാളി വികസന ക്ഷേമ സഹകരണ സംഘങ്ങളില്‍ സേവന-വേതന വ്യവസ്ഥകള്‍ എന്നാണ് നിലവില്‍ വന്നതെന്നും പ്രസ്തുത സംഘങ്ങളില്‍ ശമ്പള പരിഷ്കരണം എന്നാണ് നടപ്പിലാക്കിയതെന്നും വ്യക്തമാക്കാമോ;

പ്രസ്തുത സംഘങ്ങളില്‍ ശമ്പള പരിഷ്കരണം നടപ്പിലാക്കാന്‍ നിലവില്‍ നടപടി സ്വീകരിച്ചിട്ടുണ്ടോ; ഉണ്ടെങ്കില്‍ സ്വീകരിച്ചിട്ടുള്ള നടപടി വിശദമാക്കാമോ;

ഇതുസംബന്ധിച്ച് മത്സ്യബന്ധന-തുറമുഖ വകുപ്പിലെ ബി1/160/2018 നമ്പര്‍ ഫയലില്‍ സ്വീകരിച്ചിട്ടുള്ള നടപടി വിശദമാക്കാമോ?

2022-2023 വർഷത്തെ സംസ്ഥാന ബഡ്ജറ്റിൽ മത്സ്യബന്ധന മേഖലയില്‍ വിവിധ പദ്ധതികൾ നടപ്പിലാക്കുന്നതിന് എത്ര രൂപ വകയിരുത്തിയിരുന്നുവെന്ന് വ്യക്തമാക്കാമോ;

വകയിരുത്തിയ തുക മുഴുവൻ ധനകാര്യ വകുപ്പിൽ നിന്ന് അനുവദിച്ച് കിട്ടിയിട്ടുണ്ടോയെന്ന് വ്യക്തമാക്കാമോ;

വിവിധ പദ്ധതികളുടെ ഭാഗമായി ഏതെല്ലാം മത്സ്യബന്ധന മേഖലകള്‍ക്കാണ് ബഡ്ജറ്റിൽ തുക വകയിരുത്തിയിരുന്നതെന്ന് ജില്ലയും മേഖലയും തിരിച്ചുള്ള വിവരം ലഭ്യമാക്കാമോ;

വകയിരുത്തിയ തുക ചെലവഴിച്ച് കഴിഞ്ഞിട്ടുണ്ടോ; ഇല്ലെങ്കിൽ അതിനുള്ള കാരണം എന്താണെന്ന് വ്യക്തമാക്കാമോ?

സംസ്ഥാനത്ത് ഫിഷറീസ് ഇന്നവേഷൻ കൗൺസിൽ രൂപീകരിക്കുന്നതിന് നടപടി സ്വീകരിച്ചിട്ടുണ്ടോ; അറിയിക്കാമോ;

ഇന്നവേഷൻ കൗൺസിൽ മത്സ്യമേഖലയ്ക്ക് ഉണ്ടാക്കുന്ന പ്രയോജനങ്ങൾ വിശദമാക്കാമോ?

2016 മുതല്‍ സംസ്ഥാനത്തെ എത്ര ഹാര്‍ബറുകളുടെ വികസന പ്രവര്‍ത്തനങ്ങള്‍ക്കായി ഫണ്ട് അനുവദിച്ചിട്ടുണ്ടെന്നും എത്ര കോടി രൂപയാണ് അനുവദിച്ചിട്ടുള്ളതെന്നും ജില്ല തിരിച്ചുള്ള വിവരം വ്യക്തമാക്കാമോ?

പയ്യന്നൂര്‍ മണ്ഡലത്തിലെ പാലക്കോട് ഫിഷ് ലാന്റിംഗ് സെന്ററില്‍ ടോയ്‌ലറ്റ് സംവിധാനം നിലവിലില്ലാത്തത് ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ;

പ്രസ്തുത സ്ഥലത്ത് ടോയ്‌ലറ്റ് സംവിധാനം ഒരുക്കാന്‍ ആവശ്യമായ നടപടി സ്വീകരിക്കുമോ; അറിയിക്കാമോ?

മാവേലിക്കര മണ്ഡലത്തിലെ മാങ്കാംകുഴി, താമരക്കുളം മത്സ്യമാര്‍ക്കറ്റുകളുടെ നവീകരണത്തിനായി സ്വീകരിച്ച നടപടികള്‍ വിശദമാക്കുമോ?

സംസ്ഥാനത്തെ തീരദേശ വികസനത്തിനായി എന്തെങ്കിലും പാക്കേജുകള്‍ നടപ്പിലാക്കാന്‍ സര്‍ക്കാര്‍ തീരുമാനിച്ചിട്ടുണ്ടോ;

എങ്കില്‍ എത്ര കോടി രൂപയുടെ പാക്കേജുകളാണ് നടപ്പിലാക്കാന്‍ ഉദ്ദേശിക്കുന്നത് എന്ന് വ്യക്തമാക്കാമോ;

ഏതെല്ലാം കാര്യങ്ങളാണ് ഇതുവഴി നടപ്പിലാക്കാന്‍ ഉദ്ദേശിക്കുന്നത് എന്ന് അറിയിക്കുമോ?

പിറവം മണ്ഡലത്തിൽ ഫിഷറീസ് വകുപ്പിന്റെ ഫണ്ട് വിനിയോഗിച്ച് ഏതെല്ലാം റോഡുകളാണ് നവീകരിക്കുന്നതെന്ന് അറിയിക്കാമോ;

പ്രസ്തുത പ്രവൃത്തികൾക്ക് അനുവദിച്ച തുക, പ്രവൃത്തികളുടെ നിലവിലെ സ്ഥിതി എന്നിവ അറിയിക്കാമോ;

ഭരണാനുമതി ലഭിച്ച പ്രവൃത്തികൾ പൂർത്തീകരിക്കുന്നതിനായി നടപടി സ്വീകരിച്ചിട്ടുണ്ടോ; വിശദമാക്കാമോ?

കുന്നത്തുനാട് നിയോജക മണ്ഡലത്തിലെ വാഴക്കുളം ഗ്രാമപ‍ഞ്ചായത്തിലെ പാറപ്പുറം ചെറുവേലിക്കുന്ന് റോഡ് തീരദേശ റോഡുകളുടെ ഗണത്തില്‍ ഉള്‍പ്പെടുത്തി പുനര്‍നിര്‍മ്മിക്കുന്നതിനായി സമര്‍പ്പിച്ച നിവേദനം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത റോഡ് പുനര്‍നിര്‍മ്മിക്കുന്നതിന് ഫിഷറീസ് വകുപ്പില്‍ നിന്ന് തുക അനുവദിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കാമോ?

2022-23 സാമ്പത്തിക വര്‍ഷത്തില്‍ ഉദുമ മണ്ഡലത്തില്‍ നിന്ന് തീരദേശ വികസന പദ്ധതിയില്‍ ഉള്‍പ്പെടുത്തി റോഡ് അഭിവൃദ്ധിപ്പെടുത്താനായി എത്ര പ്രൊപ്പോസലുകളാണ് നിര്‍ദേശിച്ചിട്ടുള്ളത്; അറിയിക്കുമോ;

ഇതില്‍ എത്ര എണ്ണത്തിന് ഭരണാനുമതി നല്‍കിയിട്ടുണ്ട്; വിശദാംശം നല്‍കാമോ;

ഭരണാനുമതി നല്‍കിയ പ്രവൃത്തികള്‍ക്ക് സാങ്കേതികാനുമതി നല്‍കി ടെന്‍ണ്ടര്‍ നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

ഫിഷറീസ് വകുപ്പിന്റെ ഫണ്ട് വിനിയോഗിച്ച് കുണ്ടറ നിയോജക മണ്ഡലത്തില്‍ നിര്‍മ്മിക്കുന്ന റോഡുകളുടെ പ്രവര്‍ത്തന പുരോഗതി വിലയിരുത്തിയിട്ടുണ്ടോ; വിശദാംശം ലഭ്യമാക്കുമോ;

പ്രസ്തുത പ്രവൃത്തികളില്‍ പൂര്‍ത്തീകരിക്കാന്‍ കാലതാമസം നേരിടുന്നവ ഏതൊക്കെയെന്നും ആയതിനുളള കാരണം എന്തെന്നും വിശദമാക്കാമോ;

പ്രസ്തുത പ്രവൃത്തികളുടെ പൂര്‍ത്തീകരണ കാലാവധി അവസാനിക്കുന്നതെന്നാണെന്ന് തരം തിരിച്ച് വിശദമാക്കാമോ?

കോട്ടയം ജില്ലയില്‍ മത്സ്യഫെഡിന് കീഴിൽ എത്ര ഫിഷ് മാര്‍ട്ടുകള്‍ പ്രവര്‍ത്തിക്കുന്നുണ്ടെന്നും അതില്‍ എത്ര ജീവനക്കാര്‍ ജോലി ചെയ്യുന്നുണ്ടെന്നും അറിയിക്കാമോ;

പ്രസ്തുത ഫിഷ് മാര്‍ട്ടുകളിലെ ജീവനക്കാരുടെ വേതനം നിലവില്‍ എപ്രകാരമാണ് നിശ്ചയിച്ചിട്ടുള്ളതെന്നും ഇതിന്റെ അടിസ്ഥാനത്തില്‍ എത്ര രൂപയാണ് അവര്‍ക്ക് വേതനമായി ലഭിക്കുന്നതെന്നും ഇത് എന്നാണ് അവസാനമായി പരിഷ്‌ക്കരിച്ചിട്ടുള്ളതെന്നും അറിയിക്കാമോ;

വേതന വര്‍ദ്ധനവ് ആവശ്യപ്പെട്ട് ഫിഷ് മാര്‍ട്ടിലെ ജീവനക്കാര്‍ നടത്തിവരുന്ന സമര പരിപാടികള്‍ സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ;

ഇവര്‍ മുന്നോട്ട് വച്ചിട്ടുള്ള ആവശ്യങ്ങള്‍ മത്സ്യഫെഡ് അംഗീകരിച്ചിട്ടുണ്ടോ എന്നും ഇതുമായി ബന്ധപ്പെട്ട് 23.12.2022 ന് മത്സ്യഫെഡ് ഹെഡ് ഓഫീസില്‍ വച്ച് യൂണിയന്‍ പ്രതിനിധികളുമായി നടത്തിയ ചര്‍ച്ചയുടെ തീരുമാനങ്ങള്‍ എന്തെല്ലാമാണെന്നും അറിയിക്കാമോ; പ്രസ്തുത യോഗതീരുമാനത്തിന്റെ പകര്‍പ്പ് ലഭ്യമാക്കാമോ;

സംസ്ഥാനത്ത് മായം കലര്‍ന്നതും ഗുണനിലവാരം കുറഞ്ഞതുമായ മത്സ്യങ്ങളുടെ വിപണനം വര്‍ദ്ധിച്ചുവരുന്ന സാഹചര്യം കണക്കിലെടുത്ത് ഫിഷ് മാര്‍ട്ടുകളിലെ തൊഴിലാളികളുടെ വേതന വര്‍ദ്ധനവ് അടക്കമുള്ള പ്രശ്‌നങ്ങള്‍ രമ്യമായി പരിഹരിച്ച് ഫിഷ് മാര്‍ട്ടുകളുടെ പ്രവര്‍ത്തനം ശക്തിപ്പെടുത്തുന്നതിനുള്ള നടപടി സ്വീകരിക്കുമോ; വിശദമാക്കുമോ?

മലപ്പുറം ജില്ലയില്‍ മത്സ്യഫെഡിന്റെ പുതിയ ഔട്ട്‍ലെറ്റുകള്‍ സ്ഥാപിക്കുന്നതിന് ഉദ്ദേശിക്കുന്നുണ്ടോ; എങ്കില്‍ വിശദാംശം ലഭ്യമാക്കാമോ;

നിലമ്പൂര്‍ മണ്ഡലത്തിലെ ഏതെങ്കിലും സ്ഥലത്ത് മത്സ്യഫെഡിന്റെ ഫിഷ്‍മാര്‍ട്ട് ഔട്ട്‍ലെറ്റ് സ്ഥാപിക്കുന്നതിന് നടപടി സ്വീകരിച്ചിട്ടുണ്ടോ; എങ്കിൽ ഏതെല്ലാം സ്ഥലത്താണ് ഔട്ട്‍ലെറ്റുകള്‍ സ്ഥാപിക്കാന്‍ ഉദ്ദേശിക്കുന്നതെന്നും അതാത് തദ്ദേശ സ്വയംഭരണ സ്ഥാപനങ്ങളുടെ അനുമതി ഇതിന് ലഭിച്ചിട്ടുണ്ടോയെന്നും ഇതിനായി ഇതുവരെ നടത്തിയ നടപടികള്‍ എന്തെല്ലാമെന്നും വിശദമാക്കാമോ;

നിലമ്പൂര്‍ നഗരസഭയിലെ മത്സ്യമാര്‍ക്കറ്റിലുള്ള പുതിയ കെട്ടിടം മത്സ്യഫെഡിന്റെയോ ഫിഷറീസ് വകുപ്പിന്റെയോ ഫണ്ടുപയോഗിച്ച് നിര്‍മ്മിച്ചതാണോ എന്ന് അറിയിക്കാമോ; ഇത് സംബന്ധിച്ച രേഖകളുടെ പകര്‍പ്പുകള്‍ ലഭ്യമാക്കാമോ;

പ്രസ്തുത കെട്ടിടം ഏതുവര്‍ഷമാണ് നിര്‍മ്മിച്ചതെന്നും ഏത് പദ്ധതിയില്‍ ഉള്‍പ്പെടുത്തിയാണ് നിര്‍മ്മിച്ചതെന്നും അറിയിക്കാമോ;

മേല്‍ കെട്ടിടത്തിൽ ഫണ്ട് ചെലവഴിച്ച ഏജന്‍സികള്‍ക്കോ വകുപ്പിനോ എന്തെങ്കിലും അവകാശമുണ്ടോയെന്നും ഇല്ലെങ്കില്‍ നടത്തിപ്പ് ചുമതല ഏതുവകുപ്പിനാണെന്നും അറിയിക്കാമോ?

സംസ്ഥാനത്ത് മത്സ്യസമ്പത്ത് വർദ്ധിപ്പിക്കുന്നതിന്റെ ഭാഗമായി ഉൾനാടൻ മത്സ്യകൃഷി ​പ്രോത്സാഹിപ്പിക്കുന്നതിനായി എന്തെല്ലാം നടപടികളാണ് സ്വീകരിച്ചുവരുന്നതെന്ന് അറിയിക്കുമോ;

ഗുണമേന്മയുളള മത്സ്യക്കുഞ്ഞുങ്ങളും മത്സ്യതീറ്റയും ലഭ്യമാക്കാൻ എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വ്യക്തമാക്കുമോ;

മത്സ്യങ്ങളെ ബാധിക്കുന്ന രോഗങ്ങൾ കണ്ടെത്തുന്നതിനും അവയുടെ വ്യാപനം തടയുന്നതിനും പദ്ധതികൾ ആവിഷ്കരിച്ചിട്ടുണ്ടോ; വിശദമാക്കുമോ?

സംസ്ഥാനത്ത് ആരോഗ്യത്തിന് ഹാനികരമായ പദാര്‍ത്ഥങ്ങള്‍ ചേര്‍ത്ത മത്സ്യം ധാരാളമായി ഇതര സംസ്ഥാനങ്ങളിൽ നിന്നടക്കം വില്പനയ്ക്ക് എത്തുന്നുണ്ടെന്ന റിപ്പോര്‍ട്ടുകള്‍ ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ഇപ്രകാരം രാസവസ്തുക്കള്‍ ചേര്‍ത്തുളള മത്സ്യവില്പന തടയുന്നതിന് ഭക്ഷ്യ വകുപ്പുമായി ചേര്‍ന്ന് എന്തെല്ലാം ശക്തമായ നടപടികളാണ് സ്വീകരിച്ചിട്ടുളളതെന്ന് അറിയിക്കുമോ;

വൃത്തിയുള്ളതും മായം ചേര്‍ക്കാത്തതുമായ മത്സ്യം വില്‍പ്പന നടത്തുന്നതിന് വകുപ്പ് നടത്തുന്ന ഇടപെടലുകൾ വിശദമാക്കാമോ?

മത്സ്യസംഭരണവും കാര്യക്ഷമമായ വിപണനവും ലേലവും പ്രോത്സാഹിപ്പിക്കുന്നതിനായി നടപടികള്‍ സ്വീകരിച്ചിട്ടുണ്ടോ; ഉണ്ടെങ്കില്‍ എന്തെല്ലാമാണെന്ന് വിശദമാക്കാമോ?

കിഫ്ബി അംഗീകാരം ലഭ്യമായിട്ടുള്ള വൈപ്പിന്‍ നിയോജക മണ്ഡലത്തിലെ നായരമ്പലം ഫിഷ് മാര്‍ക്കറ്റിന്റെ ടെണ്ടര്‍ നടപടികള്‍ പൂര്‍ത്തീകരിച്ചിട്ടുണ്ടോ; ഇല്ലെങ്കില്‍ കാലതാമസത്തിനുള്ള കാരണം വ്യക്തമാക്കാമോ;

പ്രസ്തുത പ്രവൃത്തി എന്നത്തേക്ക് ആരംഭിക്കാന്‍ സാധിക്കുമെന്ന് അറിയിക്കാമോ?

കായംകുളം മണ്ഡലത്തില്‍ ചെട്ടികുളങ്ങര ഗ്രാമപഞ്ചായത്തിലെ കരിപ്പുഴ ഫിഷ്‍മാര്‍ക്കറ്റിന്റെ നിര്‍മ്മാണവുമായി ബന്ധപ്പെട്ട നടപടികളുടെ പുരോഗതി വിശദമാക്കാമോ?

സംസ്ഥാനത്ത് മത്സ്യത്തൊഴിലാളികളെ ഇടനിലക്കാരുടെ ചൂഷണത്തില്‍ നിന്ന് രക്ഷിക്കാനും മത്സ്യത്തിന് ന്യായവില ഉറപ്പുവരുത്താനും സര്‍ക്കാര്‍ എന്തെല്ലാം നടപടികളാണ് സ്വീകരിച്ചുവരുന്നത്; വിശദാംശം ലഭ്യമാക്കാമോ;

ഹാര്‍ബര്‍ മാനേജ്മെന്റ് സൊസൈറ്റികള്‍ ആരംഭിക്കുന്നതിന് പദ്ധതിയുണ്ടോ; എങ്കിൽ ഇവയില്‍ മത്സ്യത്തൊഴിലാളികളുടെ പങ്കാളിത്തം ഉറപ്പുവരുത്തുന്ന കാര്യം പരിഗണനയിലുണ്ടോയെന്നും ഇതിലൂടെ എന്തൊക്കെ കാര്യങ്ങളാണ് ലക്ഷ്യമിടുന്നതെന്നും വിശദമാക്കാമോ?

സംസ്ഥാനത്ത് പുനര്‍ഗേഹം പദ്ധതി പ്രകാരം എത്ര പേര്‍ ഭൂമി രജിസ്റ്റര്‍ ചെയ്ത് ഭവന നിര്‍മാണം പൂര്‍ത്തിയാക്കിയിട്ടുണ്ടെന്ന് വ്യക്തമാക്കാമോ;

പ്രസ്തുത പദ്ധതി പ്രകാരം തവനൂര്‍ മണ്ഡലത്തിലെ പുറത്തൂര്‍, മംഗലം എന്നീ പഞ്ചായത്തുകളില്‍ എത്രപേര്‍ക്ക് ഭവന നിര്‍മാണം പൂര്‍ത്തിയാക്കാന്‍ സാധിച്ചിട്ടുണ്ടെന്നും ഇനി എത്രപേര്‍ പൂര്‍ത്തീകരിക്കാനുണ്ടെന്നും വ്യക്തമാക്കാമോ?

റീബിൽഡ് കേരള ഇനിഷ്യേറ്റീവിൽ ഉൾപ്പെടുത്തി ഹാർബർ എഞ്ചിനീയറിംഗ് വിഭാഗം നിർവ്വഹണം നടത്തുന്ന മഞ്ചേശ്വരം മണ്ഡലത്തിലെ ഷിറിയ റിവർ ട്രൈനിംഗ് പ്രവൃത്തിയുടെ വിശദവിവരം ലഭ്യമാക്കുമോ;

പ്രസ്തുത പദ്ധതി നിലവിൽ ഏത് ഘട്ടത്തിലാണെന്ന് വിശദമാക്കുമോ;

പദ്ധതിയിൽ എന്തൊക്കെ പ്രവൃത്തികളാണ് വിഭാവനം ചെയ്തിട്ടുള്ളതെന്നും പ്രവൃത്തി പൂർത്തീകരിക്കുമ്പോൾ ഉണ്ടാകുന്ന ഭൗതിക നേട്ടങ്ങൾ എന്തൊക്കെയാണെന്നും വിശദമാക്കുമോ;

പ്രസ്തുത പ്രവൃത്തി എപ്പോൾ തുടങ്ങുമെന്നും എപ്പോൾ പൂർത്തീകരിക്കാൻ കഴിയുമെന്നും വിശദമാക്കുമോ?

കഴിഞ്ഞ രണ്ട് വര്‍ഷങ്ങളിലെ ബജറ്റുകളിൽ പ്രഖ്യാപിച്ച തൃക്കരിപ്പൂര്‍ മണ്ഡലത്തിലെ കൊടക്കാട് നാടന്‍ കലാഗ്രാമം, കല്ലളന്‍ വെെദ്യര്‍ സ്മാരക സാംസ്ക്കാരിക സമുച്ചയം എന്നീ പദ്ധതികൾക്ക് 20% തുക വകകൊള്ളിച്ചിട്ടും ഭൂമി ഏറ്റെടുക്കല്‍ നടപടി വെെകുന്നതെന്തുകൊണ്ടാണെന്ന് വ്യക്തമാക്കാമോ;

ഈ പദ്ധതികൾ എന്നാരംഭിക്കാന്‍ കഴിയുമെന്ന് വ്യക്തമാക്കാമോ?

ഒറ്റപ്പാലം മണ്ഡലത്തില്‍ സാംസ്കാരിക വകുപ്പിന് കീഴില്‍ പ്രവര്‍ത്തിക്കുന്ന സ്ഥാപനങ്ങളുടെ വിശദാംശം ലഭ്യമാക്കാമോ;

ഈ സര്‍ക്കാര്‍ അധികാരത്തില്‍ വന്ന ശേഷം പ്രസ്തുത മണ്ഡലത്തിലെ ഏതെല്ലാം സാംസ്കാരിക കേന്ദ്രങ്ങള്‍ക്ക് വകുപ്പ് ധനസഹായം നല്‍കിയിട്ടുണ്ടെന്ന് വ്യക്തമാക്കാമോ?

സംസ്ഥാനത്ത് മതസ്പര്‍ധയും ജാതി വിവേചനവും ഉയര്‍ന്ന് വരുന്നതായി ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ ആയത് അവസാനിപ്പിക്കുന്നതിനായി സാംസ്കാരിക വകുപ്പ് നടപ്പിലാക്കി വരുന്ന പദ്ധതികള്‍ വിശദമാക്കാമോ;

മതസ്പര്‍ധയ്ക്കും ജാതിവിവേചനത്തിനുമെതിരെ വിദ്യാര്‍ത്ഥികള്‍ക്കിടയില്‍ അവബോധം സൃഷ്ടിക്കുന്നതിനായി സാംസ്കാരിക വകുപ്പ് വിദ്യാഭ്യാസ വകുപ്പുമായി ചേര്‍ന്ന് പദ്ധതി നടപ്പിലാക്കാന്‍ ഉദ്ദേശിക്കുന്നുണ്ടോ; ഉണ്ടെങ്കില്‍ വിശദമാക്കാമോ?

കേരള പൂരക്കളി അക്കാദമിയുടെ ദെെനംദിന പ്രവര്‍ത്തനങ്ങള്‍ക്കായി 2023-24 വര്‍ഷത്തെ സംസ്ഥാന ബജറ്റില്‍ ഫണ്ട് വകയിരുത്തിയിട്ടുണ്ടോ; വ്യക്തമാക്കാമോ;

ഫണ്ട് വകയിരുത്തുന്നതിന് അക്കാദമിയില്‍ നിന്ന് പ്രൊപ്പോസല്‍ ലഭിച്ചിട്ടുണ്ടോ; അറിയിക്കാമോ;

ഫണ്ട് വകയിരുത്തിയിട്ടില്ലെങ്കില്‍ അക്കാദമിയുടെ ദെെനംദിന പ്രവര്‍ത്തനങ്ങള്‍ക്കായി ഫണ്ട് വകയിരുത്താന്‍ ആവശ്യമായ നടപടികള്‍ സ്വീകരിക്കാമോ; വിശദമാക്കാമോ?

2022-23 വര്‍ഷത്തെ ബജറ്റില്‍ 20 ശതമാനം തുക വകയിരുത്തിയ ചേറ്റുവയിലെ രാമു കാര്യാട്ട് സിനിമ തീയേറ്റര്‍ നിര്‍മ്മാണവുമായി ബന്ധപ്പെട്ട് സാംസ്കാരിക വകുപ്പ് സ്വീകരിച്ച നടപടികള്‍ വിശദമാക്കാമോ;

പ്രസ്തുത തീയേറ്റര്‍ നിര്‍മ്മാണത്തിനായി ചേറ്റുവയിലെ റവന്യൂഭൂമി ലഭിക്കുന്നതിന് സാംസ്കാരിക വകുപ്പ് നടപടികള്‍ സ്വീകരിച്ചിട്ടുണ്ടോ; വിശദമാക്കാമോ?

തരൂര്‍ മണ്ഡലത്തിലെ കാവശ്ശേരിയില്‍ നിര്‍മ്മിക്കാന്‍ ഉദ്ദേശിക്കുന്ന ഇന്ദുചൂഡന്‍ സ്മാരക സാംസകാരിക നിലയത്തിന്റെ നിര്‍മ്മാണം ഏത് ഘട്ടത്തിലാണെന്ന് വ്യക്തമാക്കാമോ;

പ്രസ്തുത സാംസകാരിക നിലയത്തിന്റെ നിര്‍മ്മാണം എന്ന് പൂര്‍ത്തീകരിക്കാന്‍ സാധിക്കുമെന്ന് വ്യക്തമാക്കാമോ?

അഖില കേരള പുരാണ പാരായണ കല സംഘടന പ്രതിനിധികൾക്ക് കേരള സാംസ്‌കാരിക പ്രവർത്തക ക്ഷേമനിധി ബോർഡിലും കേരള സംഗീത നാടക അക്കാദമിയിലും സാംസ്‌കാരിക വകുപ്പിന്റെ കീഴിലുള്ള സ്ഥാപനങ്ങളിലും പ്രാതിനിധ്യം നൽകുന്നതിനുള്ള നടപടി സ്വീകരിക്കുമോ;

കേരള സംഗീത നാടക അക്കാദമി നൽകിവരുന്ന പുരസ്കാരങ്ങളിൽ പുരാണ പാരായണക്കാരെ കൂടി ഉൾപ്പെടുത്തുന്നതിനുള്ള നടപടി സ്വീകരിക്കുമോ;

പ്രസ്തുത സംഘടന 1994 മുതൽ നടത്തിവരുന്ന ശ്രീവാസുദേവ വിദ്യാപീഠത്തിന് സാംസ്‌കാരിക വകുപ്പിന്റെ അംഗീകാരമുണ്ടോ; ഇല്ലെങ്കിൽ ആയത് ലഭ്യമാക്കുന്നതിനുള്ള നടപടി സ്വീകരിക്കുമോ?

2010-ൽ നിലവിൽ വന്ന കേരള സാംസ്‌കാരിക പ്രവർത്തക ക്ഷേമ നിധി ബോർഡ് 2011 മുതൽ 450-ൽ പരം പുരാണ പാരായണക്കാർക്ക് പെൻഷൻ നൽകി വന്നിരുന്നത് 2016 മുതൽ ലഭിക്കുന്നില്ല എന്നത് ശ്രദ്ധയിൽപ്പെട്ടിട്ടുണ്ടോ; എങ്കിൽ പെൻഷൻ ലഭിക്കാത്തത് എന്തുകൊണ്ടാണെന്ന് വിശദമാക്കാമോ;

ഇവർക്ക് പ്രീമിയം തുക അടയ്ക്കാനോ പുതിയതായി അംഗത്വമെടുക്കാനോ കഴിയാത്ത വിവരം ശ്രദ്ധയിൽപ്പെട്ടിട്ടുണ്ടോ; എങ്കിൽ എന്തുകൊണ്ടെന്ന് വ്യക്തമാക്കാമോ?

ചട്ടമ്പി സ്വാമികളുടെ മാതൃഭവനവും സ്ഥലവും സ്മാരകമാക്കി സംരക്ഷിക്കുന്നതിനുള്ള നടപടികള്‍ ഏത് ഘട്ടത്തിലാണെന്നും അധികമായി ഏറ്റെടുക്കേണ്ട ഭൂമിയ്ക്കായുള്ള തുക അനുവദിച്ചിട്ടുണ്ടോയെന്നും സ്മാരക നിര്‍മ്മാണം എന്ന് യാഥാര്‍ത്ഥ്യമാക്കാനാകുമെന്നും വിശദമാക്കാമോ?

സാംസ്കാരിക വകുപ്പിന് കീഴിലുള്ള വൈപ്പിന്‍ മണ്ഡലത്തിലെ ചെറായില്‍ പ്രവര്‍ത്തിക്കുന്ന സഹോദരന്‍ അയ്യപ്പന്‍ സ്മാരകത്തിന് മിശ്രഭോജന സ്മാരക മന്ദിരം നിര്‍മ്മിക്കുന്നതിനും നടത്തിപ്പിനുമുള്ള ചുമതല മുസിരിസ് പ്രോജക്റ്റ് ലിമിറ്റഡിനെ ഏല്‍പ്പിച്ച് ഉത്തരവിറക്കിയിട്ടും 2022-23 ബഡ്ജറ്റില്‍ അടങ്കല്‍ തുകയുടെ ഇരുപത് ശതമാനം വകയിരുത്തിയിട്ടും മിശ്രഭോജന സ്മാരക മന്ദിരത്തിനുള്ള പ്രൊപ്പോസല്‍ തയ്യാറാക്കി ഭരണാനുമതിക്കായി സമര്‍പ്പിക്കാത്തതിന് കാരണം വ്യക്തമാക്കാമോ;

ടൂറിസം വകുപ്പിന്റെ പേരിലുള്ള മൂന്ന് സെന്റ് സ്ഥലം കൈമാറാതെ തന്നെ പ്രസ്തുത സ്ഥലത്ത് നിര്‍മ്മാണം നടത്തുന്നതിനും നടത്തിപ്പ് ചുമതലകള്‍ നിര്‍വ്വഹിക്കുന്നതിനും മുസിരീസ് പ്രോജക്റ്റ് ലിമിറ്റഡ് ഉത്തരവിറക്കിയതിന്റെ അടിസ്ഥാനത്തില്‍ സാംസ്കാരിക വകുപ്പിന് കീഴില്‍ മിശ്രഭോജന സ്മാരക മന്ദിരത്തിന് ഭരണാനുമതി ലഭ്യമാക്കുവാന്‍ തടസ്സമുണ്ടോ; എങ്കില്‍ വിശദമാക്കാമോ?

കേരള കലാമണ്ഡലം കല്‍പിത സര്‍വകലാശാല മുഖേന ഫോക് പഠനത്തിന് കോഴ്‌സുകള്‍ നടത്തുന്നുണ്ടോ അറിയിക്കാമോ; ഇപ്പോള്‍ ഏതൊക്കെ വിഷയങ്ങളിലാണ് കോഴ്‌സുകള്‍ നടത്തുന്നതെന്ന് അറിയിക്കാമോ;

ക്ലാസിക്കല്‍ വിഷയങ്ങളിൽ മാത്രമാണ് കലാമണ്ഡലത്തില്‍ കോഴ്‌സുകള്‍ നടത്തിവരുന്നതെന്നത് ശ്രദ്ധയില്‍പ്പെട്ടിട്ടുണ്ടോ; വിശദമാക്കുമോ;

നാടന്‍കലകള്‍ കോഴ്‌സായി പഠിപ്പിക്കുന്ന ഏതൊക്കെ സ്ഥാപനങ്ങളാണ് നിലവിലുള്ളതെന്ന് അറിയിക്കാമോ;

നാടന്‍കലകളുടെ പ്രോത്സാഹനത്തിനായി രൂപീകരിച്ച് പ്രവര്‍ത്തിക്കുന്ന കേരളാ ഫോക് ലോര്‍ അക്കാദമിയെ നാടന്‍ കലയില്‍ സര്‍ട്ടിഫിക്കറ്റ് കോഴ്‌സുകള്‍ നടത്താന്‍ സാധിക്കുന്ന വിധത്തില്‍ കേരളാ സാംസ്‌കാരിക യൂണിവേഴ്‌സിറ്റിയായി മാറ്റുന്നതിന് നടപടി സ്വീകരിക്കുമോ?

ചലച്ചിത്രഗാന രചയിതാവും തിരക്കഥാകൃത്തുമായിരുന്ന ഗിരീഷ് പുത്തഞ്ചേരിയുടെ സ്മരണകള്‍ നിലനിര്‍ത്തുന്നതിനും കലാപ്രവര്‍ത്തനം പ്രോത്സാഹിപ്പിക്കുന്നതിനുമായി സ്മാരക മന്ദിരം നിലവിലില്ല എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

ഗിരീഷ് പുത്തഞ്ചേരിയ്ക്ക് സ്മാരക മന്ദിരം പണിയുന്നതിനായി നിവേദനം ലഭിച്ചിട്ടുണ്ടോ; എങ്കില്‍ പ്രസ്തുത നിവേദനത്തിന്മേൽ സ്വീകരിച്ച നടപടികള്‍ എന്തെല്ലാമാണെന്ന് അറിയിക്കാമോ;

ഗിരീഷ് പുത്തഞ്ചേരിയുടെ സ്മരണകള്‍ നിലനിര്‍ത്തുന്നതോടൊപ്പം സിനിമ ഗാനങ്ങളെക്കുറിച്ച് പഠനം നടത്തുന്നതിനായി കലാകേന്ദ്രം സ്ഥാപിക്കാന്‍ നടപടി സ്വീകരിക്കുമോ?

ജില്ലകള്‍ തോറും സാംസ്കാരിക നായകന്മാരുടെ നാമധേയത്തില്‍ സാംസ്കാരിക കേന്ദ്രങ്ങള്‍ നിര്‍മ്മിക്കുന്നതിന് സ്വീകരിച്ച നടപടികള്‍ വിശദമാക്കുമോ;

ആലപ്പുഴ ജില്ലയില്‍ നൂറനാട് ലെപ്രസി സാനിറ്റോറിയത്തില്‍ ആരോഗ്യവകുപ്പ് വിട്ടുനല്കിയ സ്ഥലത്ത് പി. കൃഷ്ണപിള്ള സാംസ്കാരിക സമുച്ചയം നിര്‍മ്മിക്കുവാന്‍ സ്വീകരിച്ച നടപടികള്‍ വിശദമാക്കുമോ?

സുകുമാർ അഴീക്കോടിന്റെ വീട് കേരള സാഹിത്യ അക്കാദമി ഏറ്റെടുത്ത് നവീകരിക്കുന്നതിനായി 2013 മുതൽ 2016 മെയ് വരെയുള്ള കാലയളവിൽ സ്വീകരിച്ച നടപടികൾ എന്തൊക്കെയാണെന്ന് വ്യക്തമാക്കുമോ;

മുന്‍ സർക്കാരിന്റെ കാലം മുതൽ നാളിതുവരെ പ്രസ്തുത സ്മാരക നവീകരണത്തിനായി എത്ര തുക അനുവദിച്ച് നൽകിയിട്ടുണ്ടെന്നും ഇതിൽ എത്ര തുക ചെലവഴിച്ചിട്ടുണ്ടെന്നും എന്തൊക്കെ പ്രവർത്തനങ്ങളാണ് നടപ്പാക്കിയതെന്നും വിശദമാക്കാമോ;

പ്രസ്തുത സ്മാരകം നവീകരിക്കുന്നതിന് അടിയന്തര നടപടി സ്വീകരിക്കുമോ; വിശദാംശം നൽകുമോ?

2022 മെയ് 18ന് പ്രകാശനം ചെയ്ത മലയാള സാഹിത്യ വിജ്ഞാന കോശം (ലഘു പതിപ്പ്) അച്ചടി പൂർത്തീകരിച്ചത് എന്നാണ്; എത്ര കോപ്പികളാണ് അച്ചടിച്ചത്; എവിടെയാണ് അച്ചടിച്ചത്; പ്രസ്തുത പുസ്തകം അച്ചടിച്ച ഇനത്തിൽ എത്ര രൂപ ചെലവഴിച്ചു; ഒരു പുസ്തകത്തിന്റെ വില എത്രയാണ്; വിശദാംശം ലഭ്യമാക്കുമോ;

പ്രസ്തുത പുസ്തകം അച്ചടിക്കുന്നതിന് മുമ്പ് കവർ പേജ് മാത്രം ഉൾപ്പെടുത്തി പ്രകാശന കർമ്മം നിർവഹിച്ചു എന്നതിന്റെ നിജസ്ഥിതി വ്യക്തമാക്കുമോ; പുസ്തകം സർവ്വവിജ്ഞാന കോശം ഇൻസ്റ്റിറ്റ്യൂട്ടിൽ നിലവിൽ ലഭ്യമാണോ എന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം യുവജനക്ഷേമ വകുപ്പില്‍ നടപ്പിലാക്കിയ പ്രധാനപ്പെട്ട പദ്ധതികളുടെ വിശദാംശം ലഭ്യമാക്കാമോ?

കേരള സംസ്ഥാന യുവജന കമ്മീഷന്റെ കഴിഞ്ഞ ഏഴ് വര്‍ഷത്തെ പ്രവര്‍ത്തന പുരോഗതിയും കമ്മീഷന്റെ പ്രവർത്തനങ്ങൾ കൊണ്ട് യുവജനങ്ങള്‍ക്ക്‌ ലഭിച്ച സേവനങ്ങൾ എന്തൊക്കെയാണെന്നും വ്യക്തമാക്കാമോ;

പ്രസ്തുത കമ്മീഷന്‍ ചെയര്‍പേഴ്സന്റെ നിലവിലെ ശമ്പളവും അലവന്‍സുകളും മറ്റ് ഔദ്യോഗിക സൗകര്യങ്ങളും എന്തെല്ലാമാണെന്ന് വ്യക്തമാക്കാമോ; സംസ്ഥാന യുവജന കമ്മീഷന്‍ ചെയര്‍പേഴ്സന്റെ ശമ്പളവും മറ്റ് അലവന്‍സുകളും വര്‍ദ്ധിപ്പിക്കുന്നതുമായി ബന്ധപ്പെട്ട ശിപാര്‍ശയിന്മേല്‍ അക്കൗണ്ടന്റ് ജനറലിന്റെ എതിര്‍പ്പ് എന്തായിരുന്നുവെന്ന് വ്യക്തമാക്കാമോ; എതിര്‍പ്പ് അറിയിച്ച രേഖയുടെ പകര്‍പ്പ് ലഭ്യമാക്കാമോ;

പ്രസ്തുത കമ്മീഷന്‍ ചെയര്‍പേഴ്സന്റെ ശമ്പളവും മറ്റ് അലവന്‍സുകളും വര്‍ദ്ധിപ്പിച്ചിട്ടുണ്ടോ; ഇതുസംബന്ധിച്ച് യുവജന കമ്മീഷന്‍ ഓഫീസില്‍ സ്വീകരിച്ച നടപടികള്‍ എന്തെല്ലാമാണ്; ഫയലിന്റെ പകര്‍പ്പുകള്‍ ലഭ്യമാക്കാമോ;

സംസ്ഥാന യുവജന കമ്മീഷന്‍ ചെയര്‍പേഴ്സന്റെ ശമ്പളവും മറ്റ് അലവന്‍സുകളും വര്‍ദ്ധിപ്പിക്കുന്നതുമായി ബന്ധപ്പെട്ട് സെക്രട്ടേറിയറ്റ് തലത്തില്‍ യുവജനകാര്യ വകുപ്പിന്റെയും ധനകാര്യ വകുപ്പിന്റെയും റിമാര്‍ക്സ് അടങ്ങുന്ന ഫയലിന്റെ പകര്‍പ്പ് ലഭ്യമാക്കാമോ;

സംസ്ഥാന യുവജന കമ്മീഷന്‍ ചെയര്‍പേഴ്സന്റെ ശമ്പളവും മറ്റ് അലവന്‍സുകളും വര്‍ദ്ധിപ്പിക്കുന്നതുമായി ബന്ധപ്പെട്ട ശിപാര്‍ശയിന്മേല്‍ അക്കൗണ്ടന്റ് ജനറലിന്റെ എതിര്‍പ്പ് എന്തായിരുന്നുവെന്ന് വ്യക്തമാക്കാമോ; എതിര്‍പ്പ് അറിയിച്ച രേഖയുടെ പകര്‍പ്പ് ലഭ്യമാക്കാമോ?

കേരള സംസ്ഥാന യുവജന കമ്മീഷന് 2016-17 സാമ്പത്തിക വർഷം മുതൽ നാളിതുവരെ പദ്ധതിയിനത്തിൽ അനുവദിച്ച തുകയും ചെലവഴിച്ച തുകയും സാമ്പത്തിക വർഷാടിസ്ഥാനത്തിൽ വ്യക്തമാക്കുമോ?

കേരള സംസ്ഥാന യുവജന കമ്മീഷൻ അധ്യക്ഷൻ/അധ്യക്ഷയുടെ ഔദ്യോഗിക കാലാവധി എത്രയാണ്; പ്രസ്തുത തസ്തികയിൽ പുനർനിയമനത്തിന് അർഹതയുണ്ടോ;

നിലവിലെ അധ്യക്ഷയെ നിയമിച്ചത് എന്നാണ്; നിയമന ഉത്തരവിന്റെ പകർപ്പ് ലഭ്യമാക്കുമോ;

നിലവിലെ അധ്യക്ഷയ്ക്ക് പുനർനിയമനം നൽകിയിട്ടുണ്ടോ; എങ്കിൽ പ്രസ്തുത ഉത്തരവിന്റെ പകർപ്പ് ലഭ്യമാക്കുമോ?

ഈ സർക്കാർ അധികാരത്തിൽ വന്നതിനുശേഷം സംസ്ഥാന യുവജന കമ്മീഷന്‍ ഓഫീസ് സംവിധാനത്തിനായി പ്രതിവര്‍ഷം എത്ര രൂപ ചെലവഴിക്കുന്നുണ്ട്; ഇനം തിരിച്ചുള്ള കണക്ക് ലഭ്യമാക്കാമോ;

കമ്മീഷന്‍ ഓഫീസിലും ചെയര്‍പേഴ്സനുമായി നിലവിൽ എത്ര വാഹനങ്ങള്‍ ഉപയോഗിക്കുന്നുണ്ട്; ഈ വാഹനങ്ങൾ കരാര്‍ അടിസ്ഥാനത്തില്‍ ആണോ ഉപയോഗിക്കുന്നത്; ഈ സർക്കാർ അധികാരത്തിൽ വന്നതിനുശേഷം എത്ര രൂപയാണ് ഈ ഇനത്തില്‍ പ്രതിവര്‍ഷം ചെലവഴിക്കുന്നത്; വിശദാംശം നല്‍കാമോ?

കേരള സംസ്ഥാന യുവജന കമ്മീഷന്റെ നിലവിലെ അധ്യക്ഷ ശമ്പളയിനത്തിൽ നാളിതുവരെ കൈപ്പറ്റിയ ആകെ തുക എത്രയാണെന്നും സിറ്റിംഗ് ഫീസ്, ടി.എ., മറ്റ് ആനുകൂല്യങ്ങൾ എന്നിങ്ങനെ ആകെ കൈപ്പറ്റിയ തുക എത്രയാണെന്നും ഇനം തിരിച്ച് വ്യക്തമാക്കുമോ;

നിലവിലെ യുവജന കമ്മീഷൻ അധ്യക്ഷയ്ക്ക് ഔദ്യോഗിക വാഹനം അനുവദിച്ചിട്ടുണ്ടോയെന്നും ഉണ്ടെങ്കിൽ ഏത് വാഹനമാണ് അനുവദിച്ചിട്ടുള്ളതെന്നും അറിയിക്കുമോ;

പ്രസ്തുത വാഹനത്തിന് നാളിതുവരെ ഇന്ധനച്ചെലവ് ഇനത്തിൽ അനുവദിച്ച തുക എത്രയാണെന്ന് സാമ്പത്തിക വർഷം തിരിച്ച് വ്യക്തമാക്കുമോ?

സംസ്ഥാന യുവജന കമ്മീഷൻ അധ്യക്ഷയ്ക്ക് സ.ഉ. (സാധാ)37/2023/എസ്.വൈ.എ. തീയതി 23.01.2023 പ്രകാരം അനുവദിച്ച ശമ്പള കുടിശിക അവർ കൈപ്പറ്റിയിട്ടുണ്ടോ; എങ്കിൽ എന്നാണ് കൈപ്പറ്റിയതെന്നും കൈപ്പറ്റിയ തുക എത്രയാണെന്നും വ്യക്തമാക്കുമോ;

നിലവിലെ യുവജന കമ്മീഷൻ അധ്യക്ഷ സ്ഥാനമേറ്റത് മുതൽ സിറ്റിംഗ് ഫീസ്, യാത്ര അലവൻസ്, മറ്റ് അലവൻസുകൾ എന്നീ ഇനത്തിൽ നാളിതുവരെ എത്ര രൂപ അനുവദിച്ച് നൽകിയിട്ടുണ്ട് എന്നതിന്റെ വിശദാംശം നൽകുമോ?

സംസ്ഥാനത്തെ വിനോദസഞ്ചാര മേഖലകളിലെ പദ്ധതികൾ കൂടുതൽ ഫലപ്രാപ്തി കൈവരിക്കുന്നതിന് വനിതകൾ ഉൾപ്പെടെയുള്ള യുവജനങ്ങളെ ആകർഷിക്കുന്ന തരത്തിൽ ടൂറിസം വകുപ്പുമായി സഹകരിച്ച് പദ്ധതികൾ ആവിഷ്കരിക്കാൻ യുവജനകാര്യ വകുപ്പ് ഉദ്ദേശിക്കുന്നുണ്ടോ; വിശദമാക്കുമോ;

മികച്ച കാഴ്ചപ്പാടുകളുള്ള യുവജനങ്ങളെ വിനോദസഞ്ചാര മേഖലയിൽ സംരംഭകരാക്കുന്നതിന് ആവശ്യമായ പരിശീലനവും സാമ്പത്തിക സഹായവും നൽകുന്നതിന് വകുപ്പിന് പദ്ധതിയുണ്ടോ; വിശദമാക്കുമോ;

യുവജനങ്ങളിൽ നിന്ന് മികച്ച വിനോദസഞ്ചാര പദ്ധതികൾ സംബന്ധിച്ച ആശയങ്ങൾ യുവജനകാര്യ വകുപ്പിന്റെ നേതൃത്വത്തിൽ ശേഖരിച്ച് ആവശ്യമായ പിന്തുണ നൽകി പ്രാവർത്തികമാക്കുന്നതിന് പദ്ധതിയുണ്ടോ; വിശദമാക്കുമോ;

കോളേജുകളിൽ ആരംഭിച്ചിട്ടുള്ള ടൂറിസം ക്ലബ്ബുകളുടെ പ്രവർത്തനങ്ങളിൽ യുവജനകാര്യ വകുപ്പിന്റെ സഹകരണം ഉറപ്പാക്കിയിട്ടുണ്ടോ; വിശദമാക്കുമോ?

സംസ്ഥാനത്ത് യുവജനങ്ങളിൽ വര്‍ദ്ധിച്ചുവരുന്ന ലഹരി ഉപയോഗം ഒഴിവാക്കാൻ വകുപ്പ് നടപ്പാക്കുന്ന പ്രവർത്തനങ്ങൾ വിശദമാക്കാമോ?