സംസ്ഥാനത്ത് വനാതിർത്തി സർവേ നടത്തി ജണ്ട കെട്ടി തിരിച്ച് രേഖകൾ ഡിജിറ്റൈസ് ചെയ്യാൻ നടപടി സ്വീകരിച്ചിട്ടുണ്ടോ; എങ്കില്‍ ആയതിന്റെ പുരോഗതി അറിയിക്കാമോ;

വനസംരക്ഷണം കാര്യക്ഷമമാക്കുന്നതിനായി വിപുലമായ തോതിൽ ആധുനിക ആശയവിനിമയ ഉപകരണങ്ങള്‍, ക്യാമറ, ഡ്രോൺ ക്യാമറ തുടങ്ങിയവ ഉപയോഗിക്കുന്നുണ്ടോയെന്ന് അറിയിക്കാമോ;

വനത്തിനുള്ളിൽ താമസിക്കുന്ന പട്ടിക ഗോത്രവർഗങ്ങളിൽപ്പെട്ടവരെ നിർബന്ധിതമായല്ലാതെ വനത്തിന് പുറത്ത് പുനരധിവസിപ്പിക്കുന്നതിന് പദ്ധതി തയ്യാറാക്കിയിട്ടുണ്ടോയെന്ന് വ്യക്തമാക്കുമോ?

സംസ്ഥാനത്ത് ജലസംരക്ഷണത്തിനായി ജലസമൃദ്ധി പദ്ധതിക്ക് കീഴില്‍ നദീതട, നീര്‍ത്തട അടിസ്ഥാനത്തില്‍ ജലവിഭവ വകുപ്പ് ആസൂത്രണം ചെയ്ത് നടപ്പിലാക്കുന്ന പ്രവൃത്തികളെക്കുറിച്ച് വിശദമാക്കാമോ;

ജലവിഭവാസൂത്രണവും നിരീക്ഷണവും കാര്യക്ഷമമാക്കുന്നതിന് ശാസ്ത്ര, സാങ്കേതികശാസ്ത്ര വിദ്യകളുടെ പ്രയോഗം യാഥാര്‍ത്ഥ്യമാക്കുന്നതിന് പദ്ധതിയുണ്ടോ; ഇതിനായി പ്രാദേശികാടിസ്ഥാനത്തില്‍ ജല ബജറ്റ് തയ്യാറാക്കുന്നുണ്ടോയെന്ന് അറിയിക്കാമോ;

നീര്‍ച്ചാല്‍ ശൃംഖലകള്‍ പുനരുജ്ജീവിപ്പിച്ച് വേനല്‍ക്കാലത്ത് കൂടി നീരൊഴുക്ക് ഉറപ്പാക്കാന്‍ കഴിയുന്ന രീതിയിലാണോ പ്രവര്‍ത്തനങ്ങള്‍ ആസൂത്രണം ചെയ്തിരിക്കുന്നതെന്ന് വ്യക്തമാക്കാമോ?

സംസ്ഥാനത്ത് മത്സ്യത്തൊഴിലാളികളുടെ ക്ഷേമം ഉറപ്പ് വരുത്തുന്നതിനായി ഈ സര്‍ക്കാര്‍ നടപ്പിലാക്കി വരുന്ന പദ്ധതികള്‍ എന്തെല്ലാമാണെന്ന് അറിയിക്കുമോ;

രണ്ടര ലക്ഷത്തോളം മത്സ്യബന്ധന തൊഴിലാളികളെയും ഒരു ലക്ഷത്തോളം അനുബന്ധ മത്സ്യത്തൊഴിലാളികളെയും പ്രതിവര്‍ഷം പത്ത് ലക്ഷം രൂപയുടെ ഇന്‍ഷുറന്‍സ് കവറേജില്‍ ഉള്‍പ്പെടുത്താനായിട്ടുണ്ടോ; വ്യക്തമാക്കുമോ;

മണ്ണെണ്ണ സബ്സിഡിയ്ക്കായി പ്രതിവര്‍ഷം എത്ര തുകയാണ് നല്‍കി വരുന്നത്; പരമ്പരാഗത യാനങ്ങളില്‍ മോട്ടോര്‍ ഘടിപ്പിക്കാന്‍ സബ്സിഡി നല്‍കി വരുന്നുണ്ടോ; വ്യക്തമാക്കാമോ;

സംസ്ഥാനത്തിന് ലഭിക്കാനുള്ള കേന്ദ്ര വിഹിതം കുടിശികയായിട്ടും സമ്പാദ്യ സമാശ്വാസ സഹായ പദ്ധതി പ്രകാരം തുക മുടക്കം കൂടാതെ നല്‍കാനായിട്ടുണ്ടോയെന്ന് വ്യക്തമാക്കാമോ?

സംസ്ഥാനത്ത് മത്സ്യവിപണനത്തിന് ആധുനിക സൗകര്യങ്ങളോടുകൂടിയ മത്സ്യ മാർക്കറ്റുകൾ ആരംഭിക്കാൻ ഉദ്ദേശിക്കുന്നുണ്ടോയെന്ന് അറിയിക്കുമോ;

നല്ല മത്സ്യങ്ങൾ കുറഞ്ഞ വിലയ്ക്ക് പ്രസ്തുത മാർക്കറ്റുകളിലൂടെ ലഭ്യമാക്കുവാൻ നടപടി സ്വീകരിക്കുമോ; വ്യക്തമാക്കുമോ;

മത്സ്യ മാർക്കറ്റുകൾ വൃത്തിയായി സൂക്ഷിക്കുന്നതിന് എന്തെല്ലാം ക്രമീകരണങ്ങൾ ഏർപ്പെടുത്താനാണ് ഉദ്ദേശിക്കുന്നതെന്ന് വ്യക്തമാക്കാമോ?

സംസ്ഥാനത്ത് വിവിധ സാമൂഹ്യ വിഭാഗങ്ങളുടെ സാംസ്കാരികത്തനിമയും സാംസ്കാരിക വൈവിധ്യവും പ്രോത്സാഹിപ്പിക്കുന്നതിന് സാംസ്കാരിക മേഖലകളിലെ പ്രവര്‍ത്തനം ശാക്തീകരിക്കാന്‍ ഉദ്ദേശ്യമുണ്ടോ;

സാംസ്കാരിക വിനിമയത്തില്‍ സാംസ്കാരിക കേന്ദ്രങ്ങളുടെ പ്രാധാന്യം കണക്കിലെടുത്ത് എല്ലാ ജില്ലകളിലും സാംസ്കാരിക സമുച്ചയം നിര്‍മ്മിക്കുന്ന പദ്ധതിയുടെ പുരോഗതി അറിയിക്കാമോ;

ഗ്രാമ, നഗര ഭേദമെന്യേ സാംസ്കാരിക തെരുവുകളും കലാ സാംസ്കാരിക പ്രവര്‍ത്തനം സാധ്യമാകുന്ന പൊതു ഇടങ്ങളും സൃഷ്ടിക്കുന്നതിന് പരിപാടിയുണ്ടോ എന്ന് വ്യക്തമാക്കാമോ?

സംസ്ഥാനത്ത് വന്യജീവി ആക്രമണം നേരിടുന്ന ജനവാസ മേഖലകള്‍ക്ക് ചുറ്റും ഫെൻസിങ് സ്ഥാപിക്കുന്ന പദ്ധതിയുടെ പുരോഗതി വിശദമാക്കാമോ;

ആന അടക്കമുള്ള വന്യമൃഗങ്ങളെ പ്രതിരോധിക്കാൻ ഏത് തരം ഫെൻസിംഗാണ്‌ മികച്ചതെന്ന് പരിശോധിച്ചിട്ടുണ്ടോ; ആനകളുടെ ആക്രമണം കൂടുതലുള്ള സ്ഥലങ്ങളിൽ ആനമതിൽ നിർമ്മിക്കാൻ തയ്യാറാകുമോ;

വന്യജീവി ആക്രമണം നേരിടുന്ന ജനവാസ മേഖലകള്‍ക്ക് ചുറ്റും സോളാർ ഫെൻസിംഗ് സ്ഥാപിക്കാനുള്ള നടപടിയുടെ പുരോഗതി വിശദമാക്കാമോ;

വന്യജീവി ആക്രമണങ്ങളില്‍ നിന്നും സംരക്ഷണം നല്‍കാന്‍ തദ്ദേശ സ്വയംഭരണ സ്ഥാപനങ്ങളുമായി ചേര്‍ന്ന് വനം വകുപ്പ് നടപ്പിലാക്കുന്ന പദ്ധതികൾ വിശദമാക്കാമോ?

സംസ്ഥാനത്ത് പട്ടികജാതി, പട്ടികവർഗ്ഗ ഉപ പദ്ധതികളിലുണ്ടാകുന്ന വിടവുകൾ നികത്തുന്നതിനുവേണ്ടി ക്രിട്ടിക്കൽ ഗ്യാപ്പ് ഫില്ലിംഗ് സ്കീം നടപ്പിലാക്കിയിട്ടുണ്ടോ; വിശദമാക്കുമോ;

പ്രസ്തുത പദ്ധതിയിൽ ഉൾപ്പെടുത്തി പട്ടികജാതി, പട്ടികവർഗ്ഗ കോളനികളുടെ അടിസ്ഥാന സൗകര്യ വികസനത്തിന് മതിയായ തുക അനുവദിക്കുന്നതിന് കഴിയുമോ; വിശദമാക്കുമോ;

പട്ടികജാതി, പട്ടികവർഗ്ഗ വിഭാഗങ്ങളിലെ യുവജനങ്ങളുടെ നൈപുണ്യ പരിശീലനം, വിദ്യാഭ്യാസ പുരോഗതി എന്നിവ ഉറപ്പാക്കുന്നതിന് പ്രസ്തുത ഫണ്ട് ഉപയോഗിക്കാൻ കഴിയുമോയെന്ന് വ്യക്തമാക്കാമോ;

പ്രസ്തുത പദ്ധതി പ്രകാരമുള്ള പ്രോജക്ടുകൾക്ക് അംഗീകാരവും അനുമതിയും നൽകുന്നതിന് പ്രത്യേക സംവിധാനം ഏർപ്പെടുത്തിയിട്ടുണ്ടോ; വിശദമാക്കുമോ?

വൈജ്ഞാനിക ലോകത്ത് സംസ്ഥാനം വളരെയേറെ മുന്നോട്ട് പോകുമ്പോഴും തീരദേശ ജനതയുടെ വൈജ്ഞാനിക പിന്നാക്കാവസ്ഥ പരിഹരിക്കുന്നതിനുള്ള പദ്ധതികൾ ആരംഭിക്കേണ്ടതിന്റെ ആവശ്യകത പരിശോധനാ വിധേയമാക്കിയിട്ടുണ്ടോ; വിശദമാക്കുമോ;

മത്സ്യത്തൊഴിലാളി സമൂഹത്തിലെ യുവജനങ്ങൾക്ക് നൈപുണ്യ പരിശീലനവും തൊഴിലും ഉറപ്പാക്കുന്നതിനുവേണ്ടി തൊഴിൽ തീരം പദ്ധതി ആരംഭിക്കാന്‍ ഉദ്ദേശിക്കുന്നുണ്ടോ; വിശദമാക്കുമോ;

കേരള നോളജ് ഇക്കോണമി മിഷനുമായി സഹകരിച്ച് മത്സ്യബന്ധന വകുപ്പ് നടപ്പിലാക്കുന്ന തൊഴിൽ തീരം പദ്ധതിയുടെ സമീപന രേഖ തയ്യാറാക്കിയിട്ടുണ്ടോ; വിശദവിവരം ലഭ്യമാക്കുമോ;

പ്രസ്തുത പദ്ധതിയോടൊപ്പം തീരദേശ ജനതയുടെ സാമൂഹിക, വിദ്യാഭ്യാസ, തൊഴിൽ അവസ്ഥകളെ സംബന്ധിച്ച് സമഗ്ര സർവേ നടത്തുന്നതിന് ഉദ്ദേശിക്കുന്നുണ്ടോ; വിശദമാക്കുമോ?

സംസ്ഥാനത്ത് പട്ടികജാതി, പട്ടികവർഗ്ഗ വിഭാഗത്തില്‍പ്പെട്ട വിദ്യാർത്ഥികൾക്കിടയില്‍ തോൽവിയുടെയും കൊഴിഞ്ഞു പോക്കിന്റെയും നിരക്ക് കൂടുതലാണെന്ന് കണ്ടെത്തിയിട്ടുണ്ടോ;

എങ്കില്‍ ഇത് പരിഹരിക്കുന്നതിന് പഠനത്തിൽ പിന്നാക്കം നിൽക്കുന്ന കുട്ടികളെ സഹായിക്കുന്നതിനായി പദ്ധതി ആവിഷ്കരിച്ചിട്ടുണ്ടോ; വിശദാംശം നൽകുമോ;

പട്ടികജാതി, പട്ടികവർഗ്ഗ വിദ്യാർത്ഥികൾക്ക് നിലവിൽ നൽകി വരുന്ന ധനസഹായങ്ങൾ ജീവിതച്ചെലവിനനുസൃതമായി വർദ്ധിപ്പിക്കുന്നതിന് നടപടി സ്വീകരിച്ചിട്ടുണ്ടോ; എങ്കില്‍ വ്യക്തമാക്കുമോ?

വേനല്‍ക്കാലത്ത് കുടിവെള്ള ക്ഷാമം രൂക്ഷമാകുന്ന പ്രദേശങ്ങളില്‍ കുടിവെള്ളം ലഭ്യമാക്കുന്നതിന് മുൻകരുതൽ നടപടികൾ സ്വീകരിച്ചിട്ടുണ്ടോയെന്ന് അറിയിക്കുമോ; വിശദമാക്കുമോ;

കുടിവെള്ള ക്ഷാമം രൂക്ഷമായ തീരദേശ മേഖലയില്‍ തടസ്സരഹിതമായി കുടിവെള്ളം ലഭ്യമാക്കുന്നതിന് എന്തെല്ലാം പദ്ധതികളാണ് നിലവിലുള്ളതെന്നും അവ കാര്യക്ഷമമാണോയെന്നും വിശദമാക്കുമോ?

സംസ്ഥാനത്ത് ജനവാസ കേന്ദ്രങ്ങളിൽ കാട്ടാനകളുടെ ആക്രമണം വർദ്ധിച്ച് വരുന്ന സാഹചര്യത്തിൽ ആനത്താരകളുടെ പുനർ നിർമ്മാണ പദ്ധതി വനം വകുപ്പിന്റെ പരിഗണയിലുണ്ടോ;

വൈൽഡ് ലൈഫ് ട്രസ്റ്റ് ഓഫ് ഇന്ത്യയിലെ വിദഗ്ദ്ധരായ ശാസ്ത്രജ്ഞർ സംസ്ഥാനത്തിന്റെ വിവിധ ഭാഗങ്ങളിൽ പഠനം നടത്തി ആനത്താരകൾ നിർമ്മിച്ചാൽ കാട്ടാനകളുടെ ആക്രമണം തടയാമെന്ന റിപ്പോർട്ട് സമർപ്പിച്ചിട്ടും പദ്ധതി നടപ്പാക്കുന്നതിനുള്ള കാലതാമസത്തിന്റെ കാരണം വ്യക്തമാക്കാമോ; ഇക്കാര്യത്തിൽ നാളിതുവരെ സ്വീകരിച്ച നടപടികൾ വിശദമാക്കാമോ;

പ്രസ്തുത പദ്ധതിയ്ക്ക് കേന്ദ്ര വനം പരിസ്ഥിതി വകുപ്പിന്റെ അനുമതി ലഭ്യമായിട്ടുണ്ടോ; ഇതിനായി സംസ്ഥാന സർക്കാർ നടത്തിയ ഇടപെടലുകൾ വിശദമാക്കാമോ?

കേരള വാട്ടര്‍ അതോറിറ്റിയുടെ പ്രവര്‍ത്തന പരിധി പുനഃക്രമീകരിക്കുന്നതിന് സ്വീകരിച്ച് വരുന്ന നടപടികളും അവയുടെ നിലവിലെ പുരോഗതിയും അറിയിക്കാമോ;

സംസ്ഥാനത്ത് മുഴുവന്‍ വീടുകളിലേക്കും വാട്ടര്‍ അതോറിറ്റി മുഖേന കുടിവെള്ളമെത്തിക്കുന്ന നിലവിലെ സാഹചര്യം കണക്കിലെടുത്ത് റവന്യൂ ജില്ല, നിയമസഭാ മണ്ഡലം എന്നിവയുടെ അടിസ്ഥാനത്തില്‍ വാട്ടര്‍ അതോറിറ്റി ഓഫീസുകളുടെ പ്രവര്‍ത്തന പരിധി പുനഃക്രമീകരിക്കുന്ന പ്രവര്‍ത്തനങ്ങള്‍ ത്വരിതപ്പെടുത്തുമോ; എങ്കിൽ വിശദമാക്കുമോ?

സംസ്ഥാനത്ത് ഭൂരിഭാഗം പൊതുജലാശയങ്ങളിലെ ജലത്തിലും കോളിഫോം ബാക്ടീരിയയുടെ സാന്നിദ്ധ്യമുണ്ടെന്ന് കണ്ടെത്തിയത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ജലസ്രോതസ്സുകള്‍ മലിനീകരിക്കപ്പെടുന്നില്ല എന്ന് ഉറപ്പ് വരുത്താന്‍ നടത്തുന്ന പ്രവര്‍ത്തനങ്ങള്‍ എന്തെല്ലാമാണ്;

ജല ഗുണനിലവാരം പരിശാേധിക്കുന്നത്തില്‍ സംസ്ഥാന വ്യാപകമായി എന്‍.എ.ബി.എല്‍. അംഗീകാരമുള്ള ലബോറട്ടറികള്‍ സ്ഥാപിച്ചിട്ടുണ്ടോ;

സംസ്ഥാനത്ത് ഹയര്‍ സെക്കന്‍ഡറി സ്കൂള്‍ അദ്ധ്യാപകര്‍ക്കും വിദ്യാര്‍ത്ഥികള്‍ക്കും പരിശീലനം നല്‍കി അവരുടെ പങ്കാളിത്തത്തോടെ എല്ലാ തദ്ദേശ സ്വയംഭരണ സ്ഥാപനങ്ങളിലും ജലഗുണനിലവാരം പരിശോധിയ്ക്കാനുള്ള സംവിധാനം ഏര്‍പ്പെടുത്താന്‍ ഉദ്ദേശ്യമുണ്ടോ;

സംസ്ഥാനത്ത് സ്വീവറേജ് സംവിധാനം വിപുലീകരിക്കാന്‍ പദ്ധതിയുണ്ടോ; വിശദമാക്കുമോ?

സംസ്ഥാനത്ത് നബാര്‍ഡിന്റെ സഹായത്തോടെ ജലവിഭവ വകുപ്പ് നടത്തിവരുന്ന പ്രവര്‍ത്തനങ്ങളുടെ പുരോഗതി വിലയിരുത്തിയിട്ടുണ്ടോയെന്ന് വ്യക്തമാക്കുമോ;

പ്രസ്തുത പ്രവര്‍ത്തനങ്ങളില്‍ വാട്ടര്‍ അതോറിറ്റി മുഖേന നടപ്പാക്കുന്നവയുടെ നിലവിലെ സ്ഥിതി സംബന്ധിച്ച വിശദാംശം നല്‍കുമോ;

നബാര്‍ഡ് ധനസഹായത്തോടെ അതിതീവ്ര പ്രളയ ബാധിത പ്രദേശങ്ങളില്‍ വകുപ്പ് നടപ്പാക്കുന്ന പദ്ധതികള്‍ വിശദമാക്കുമോ?

സംസ്ഥാനത്തെ പ്രധാന വന്യമൃഗ സങ്കേതങ്ങളോട് ചേര്‍ന്നുള്ള തോട്ടം ഭൂമികളില്‍ അനധികൃത റിസോര്‍ട്ടുകളുടെ നിര്‍മ്മാണം വര്‍ദ്ധിക്കുന്നതായ റിപ്പോര്‍ട്ടുകള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ അതിനെതിരെ എന്തൊക്കെ നടപടി സ്വീകരിച്ചിട്ടുണ്ടെന്ന് വ്യക്തമാക്കുമോ;

വന്യമൃഗ സങ്കേതങ്ങളോട് ചേര്‍ന്ന് സ്വകാര്യ തോട്ടങ്ങള്‍ക്കുവേണ്ടി പാട്ടത്തിന് നല്കിയിട്ടുള്ള ഭൂമിയെക്കുറിച്ചുള്ള വിവരങ്ങള്‍ ലഭ്യമാണോയെന്ന് അറിയിക്കുമോ;

പ്രസ്തുത മേഖലകളിലെ വന ഭൂമിയും റവന്യൂ പുറമ്പോക്ക് ഭൂമിയും പ്രത്യേകം അളന്ന് തിരിച്ചിട്ടുണ്ടോ; ഈ പ്രദേശങ്ങളിലെ പാട്ടത്തിനെടുത്ത ഭൂമിയിലോ അതിനടുത്ത കയ്യേറ്റ ഭൂമിയിലോ റിസോര്‍ട്ട് നിർമ്മിച്ച് കൊമേഴ്‍സ്യല്‍ ബിസിനസ് നടത്താന്‍ അനുമതി നല്കിയിട്ടുണ്ടോ; വ്യക്തമാക്കുമോ;

ഇല്ലെങ്കില്‍ അനധികൃതമായി കയ്യേറിയ വനഭൂമിയും നിയമ ലംഘനം നടത്തി അവിടെ നിര്‍മ്മിച്ച റിസോര്‍ട്ടുകളും ഏറ്റെടുക്കാന്‍ നടപടി സ്വീകരിക്കുമോയെന്ന് വ്യക്തമാക്കുമോ?

സംസ്ഥാനത്ത് കടല്‍ മത്സ്യലഭ്യതയില്‍ മുന്‍ വര്‍ഷത്തെ അപേക്ഷിച്ച് കഴിഞ്ഞ വര്‍ഷം ഗണ്യമായ വര്‍ദ്ധന ഉണ്ടായിട്ടുണ്ടോ; അശാസ്ത്രീയ മത്സ്യബന്ധന രീതികള്‍ ഒഴിവാക്കാന്‍ വേണ്ട ഇടപെടല്‍ നടത്തിയതും സാങ്കേതികവിദ്യാധിഷ്ഠിതമായ ശാസ്ത്രീയ മത്സ്യബന്ധന മുറകളുടെ വ്യാപനവും കടല്‍ മത്സ്യലഭ്യത വര്‍ദ്ധിപ്പിക്കുന്നതിന് കാരണമായതായി വിലയിരുത്തിയിട്ടുണ്ടോയെന്ന് അറിയിക്കുമോ;

സംസ്ഥാന, ജില്ല, ഗ്രാമതല ഫിഷറീസ് മാനേജ്മെന്റ് കൗണ്‍സിലുകള്‍ മത്സ്യസമ്പത്ത് സംരക്ഷിക്കേണ്ടതിന്റെ പ്രാധാന്യം സംബന്ധിച്ച് മത്സ്യത്തൊഴിലാളികള്‍ക്കിടയില്‍ അവബോധം സൃഷ്ടിക്കുന്നതിന് കാര്യക്ഷമമായ പ്രവര്‍ത്തനം നടത്തുന്നുണ്ടോ; വ്യക്തമാക്കുമോ;

സമുദ്ര മത്സ്യബന്ധനത്തിന്റെ നടത്തിപ്പിനും നിരീക്ഷണത്തിനും പുറമെ സമുദ്ര മത്സ്യകൃഷിയുടെ വ്യാപനത്തിനും ഫിഷറീസ് മാനേജ്മെന്റ് കൗണ്‍സിലുകളുടെ പ്രവര്‍ത്തനം പ്രയോജനപ്രദമായിട്ടുണ്ടോ; വിശദമാക്കാമോ?

സംസ്ഥാനത്ത് പട്ടിക ഗോത്രവര്‍ഗ്ഗ ഊരുകളിലെ അടിസ്ഥാന സൗകര്യം മെച്ചപ്പെടുത്തുന്നതിന് അംബേദ്കര്‍ സെറ്റില്‍മെന്റ് വികസന പദ്ധതിയുടെ ഭാഗമായി നടത്തുന്ന പ്രവര്‍ത്തനങ്ങള്‍ എന്തെല്ലാമെന്ന് വ്യക്തമാക്കുമോ; ദുഷ്കരമായ സാഹചര്യത്തില്‍ താമസിക്കുന്നവരുടെ പുനരധിവാസം പ്രസ്തുത പദ്ധതി പ്രകാരം നടപ്പിലാക്കുന്നുണ്ടോയെന്ന് അറിയിക്കുമോ;

അടിസ്ഥാന സൗകര്യ വികസനത്തോടൊപ്പം പ്രസ്തുത ഊരുകൾ കേന്ദ്രീകരിച്ച് സാമ്പത്തിക വികസന പദ്ധതികള്‍ ആവിഷ്കരിച്ച് നടപ്പിലാക്കുന്നുണ്ടോ; വ്യക്തമാക്കുമോ;

ഊരുകളിലല്ലാതെ താമസിക്കുന്ന പട്ടിക ഗോത്രവര്‍ഗ്ഗ കുടുംബങ്ങള്‍ക്കായുള്ള പി.കെ. കാളന്‍ പദ്ധതിയിന്‍ കീഴില്‍ നടത്തുന്ന പ്രവര്‍ത്തനങ്ങളെ സംബന്ധിച്ച വിശദാംശം നൽകുമോ?

നടപ്പ് സാമ്പത്തിക വര്‍ഷത്തെ കേന്ദ്ര ബജറ്റില്‍ സ്കോളര്‍ഷിപ്പുകള്‍ക്കും ഫെലോഷിപ്പുകള്‍ക്കും ഉള്ള വകയിരുത്തലില്‍ രണ്ടായിരം കോടിയോളം രൂപയുടെ കുറവുവരുത്തിയത് സാമ്പത്തികമായി ദുര്‍ബലരായ പട്ടികജാതി, പട്ടികവര്‍ഗ്ഗ, പിന്നാക്ക വിഭാഗങ്ങളിലെ വിദ്യാര്‍ത്ഥികളെ പ്രതികൂലമായി ബാധിക്കാനിടയുള്ളതിനാല്‍ ഇക്കാര്യത്തില്‍ സംസ്ഥാന സര്‍ക്കാര്‍ സ്വീകരിച്ചുവരുന്ന സമീപനം വിശദമാക്കാമോ;

സംസ്ഥാനത്തിനകത്തും പുറത്തും വിദേശത്തെ മികച്ച സ്ഥാപനങ്ങളിലും ഉന്നത പഠനം നടത്തുന്ന എല്ലാ പട്ടികജാതി, പട്ടികഗോത്രവര്‍ഗ്ഗ വിദ്യാര്‍ത്ഥികള്‍ക്കും സംസ്ഥാന സര്‍ക്കാര്‍ സ്കോളര്‍ഷിപ്പ് നല്‍കുന്നുണ്ടോ;

ഐ.ഐ.ടി. പോലുള്ള ദേശീയ പ്രാധാന്യമുള്ള വിദ്യാഭ്യാസ സ്ഥാപനങ്ങളില്‍ പ്രവേശനം ലഭിക്കുന്ന എസ്.സി., എസ്.ടി. വിദ്യാര്‍ത്ഥികള്‍ക്ക് ഫ്രീഷിപ്പ് കാര്‍ഡുകള്‍ ഏര്‍പ്പെടുത്തിയിട്ടുണ്ടോയെന്ന് വിശദമാക്കുമോ?

സംസ്ഥാനത്ത് ഉള്‍നാടന്‍ മത്സ്യോല്പന്നങ്ങള്‍ വിപണനം ചെയ്യുന്നതിന് സര്‍ക്കാര്‍ നല്‍കിവരുന്ന സഹായങ്ങള്‍ എന്തെല്ലാമെന്ന് അറിയിക്കാമോ;

പ്രസ്തുത മത്സ്യോല്പന്നങ്ങളുടെ രുചിയും ഗുണനിലവാര പരിശോധനയും നടത്തി കേരള ബ്രാന്റ് നെയിം ഏര്‍പ്പെടുത്തി കൂടുതല്‍ ജനകീയമായ വിപണനം സാധ്യമാക്കുന്നതിന് നടപടി സ്വീകരിക്കുമോ;

ആഴക്കടല്‍ മത്സ്യങ്ങളുടെ ലഭ്യത കുറഞ്ഞുവരുന്നതും പ്രസ്തുത മത്സ്യോല്പന്നങ്ങളിലെ രാസവസ്തുക്കളുടെ വ്യാപക ദോഷഫലങ്ങളും കണക്കിലെടുത്ത് കേരള ബ്രാന്റ് മത്സ്യോല്പന്നങ്ങള്‍ വ്യാപകമാക്കാന്‍ നടപടി സ്വീകരിക്കുമോയെന്ന് വ്യക്തമാക്കുമോ?

സംസ്ഥാനത്ത് വനമേഖലയ്ക് പുറത്ത് ജൈവ വൈവിധ്യ സംരക്ഷണത്തിന് വനം വകുപ്പ് നടത്തുന്ന പ്രവർത്തനങ്ങൾ എന്തെല്ലാമാണെന്ന് വിശദമാക്കുമോ;

നല്ല ഇനം തൈകൾ ഉല്പാദിപ്പിച്ച് വിതരണം ചെയ്ത് കാർഷിക വനവൽക്കരണം സാധ്യമാക്കാൻ പദ്ധതിയുണ്ടോ; വിശദാംശം നൽകാമോ;

നഗര വനവൽക്കരണത്തിനും പൊതുസ്ഥലങ്ങളിൽ വിവിധയിനം വൃക്ഷങ്ങൾ വച്ചുപിടിപ്പിക്കുന്നതിനും വിദ്യാലയങ്ങളും ഫോറസ്ട്രി ക്ലബുകളും മുഖേന വൃക്ഷവൽക്കരണത്തിന്റെ പ്രാധാന്യം പ്രചരിപ്പിക്കുന്നതിനും വകുപ്പ് നടത്തുന്ന പ്രവർത്തനങ്ങൾ അറിയിക്കാമോ?

കടുത്ത വേനലിനെയും അതിജീവിക്കാന്‍ കഴിയത്തക്ക നിലയില്‍ സംസ്ഥാനത്ത് ശാസ്ത്രീയമായ ജല മാനേജ്മെന്റ് നടപ്പാക്കുന്നതിന് എന്തൊക്കെ നടപടികള്‍ സ്വീകരിക്കുമെന്ന് വ്യക്തമാക്കുമോ; വിശദാംശം ലഭ്യമാക്കുമോ?

സംസ്ഥാനത്ത് ആധുനിക താെഴില്‍മേഖലയുടെ ആവശ്യത്തിനനുസൃതമായി പട്ടികജാതി, പട്ടികവര്‍ഗ്ഗ വിഭാഗങ്ങളില്‍പ്പെട്ടവരുടെ മാനവ വിഭവശേഷി വികസനത്തിനായി നടത്തുന്ന പ്രവര്‍ത്തനങ്ങള്‍ അറിയിക്കാമോ;

ഇവര്‍ക്കായി വൈമാനിക പഠനത്തിന് പ്രത്യേക സഹായ പദ്ധതി ആവിഷ്കരിച്ചിട്ടുണ്ടോ; പ്രസ്തുത പഠനത്തിനായി ഒ.ബി.സി., ഒ.ഇ.സി. വിഭാഗങ്ങള്‍ക്ക് സഹായ പദ്ധതിയുടെ ആനുകൂല്യം നല്‍കുന്നുണ്ടോ; വിശദാംശം നല്‍കാമോ;

വെെമാനിക പഠനത്തിന് പ്രവേശനം ലഭിക്കുന്ന വിദ്യാര്‍ത്ഥികള്‍ക്ക് എന്തെല്ലാം സൗകര്യങ്ങളും സഹായങ്ങളുമാണ് ലഭ്യമാക്കുന്നത്; കോഴ്സിന്റെ മുഴുവന്‍ തുകയും വകുപ്പ് ഏറ്റെടുക്കുന്നുണ്ടോ; പ്രസ്തുത പദ്ധതിയിന്‍കീഴില്‍ വെെമാനിക പഠനം പൂര്‍ത്തീകരിച്ചവരുണ്ടോ; വിശദാംശം ലഭ്യമാക്കാമോ?

സംസ്ഥാനത്ത് വന്യജീവി ആക്രമണം രൂക്ഷമായ സ്ഥലങ്ങളില്‍ സ്ഥാപിച്ചിട്ടുള്ള സോളാര്‍ ഫെൻസിംഗിന്റെ അറ്റകുറ്റപ്പണിയ്ക്ക് സ്വീകരിച്ചിട്ടുള്ള നടപടികള്‍ എന്തെല്ലാമാണെന്ന് അറിയിക്കാമോ;

നിലവില്‍ സ്ഥാപിച്ചിട്ടുള്ള ഫെൻസിംഗുകൾ പലയിടത്തും വള്ളിപടര്‍പ്പ് കയറി ഉപയോഗശൂന്യമായിരിക്കുന്നത് പരിഹരിക്കാന്‍ നടപടി സ്വീകരിക്കാമോ;

തദ്ദേശ സ്വയംഭരണ സ്ഥാപനങ്ങളുടെ സഹായത്തോടെ സോളാര്‍ ഫെൻസിംഗുകൾ യഥാസമയം അറ്റകുറ്റപ്പണി നടത്തി സൂക്ഷിക്കാന്‍ നടപടി സ്വീകരിക്കുമോയെന്ന് വ്യക്തമാക്കുമോ?

സംസ്ഥാനത്ത് പുഴകളെ ജലസംഭരണികളാക്കി മാറ്റുന്നതിന് ശാസ്ത്രീയ പഠനം നടത്തിയിട്ടുണ്ടോ;

എങ്കിൽ പ്രസ്തുത പഠനത്തിന്റെ അടിസ്ഥാനത്തിൽ ചെക്ക് ഡാമുകളും റെഗുലേറ്ററുകളും നിർമ്മിക്കുന്നതിനുളള പദ്ധതി തയ്യാറാക്കിയിട്ടുണ്ടോ; വിശദാംശം നൽകുമോ;

ഇത്തരത്തിലുളള നിർമ്മാണങ്ങൾ പ്രളയത്തെ തടയുന്നതിന് പര്യാപ്തമാണോ എന്ന് വ്യക്തമാക്കുമോ?

സംസ്ഥാനത്ത് ഉത്സവ സീസണുകൾ ആരംഭിച്ച സാഹചര്യത്തിൽ നാട്ടാനകളുടെ പരിപാലനത്തിനും എഴുന്നള്ളത്തിനും പുതുക്കിയ മാർഗനിർദേശങ്ങൾ പുറപ്പെടുവിച്ചിട്ടുണ്ടോ; വിശദമാക്കുമോ;

ഉത്സവങ്ങളോടനുബന്ധിച്ച് എഴുന്നള്ളിക്കുന്ന ആനകൾ അക്രമാസക്തമാകുകയും ആൾനാശം ഉൾപ്പെടെയുള്ള നാശനഷ്ടങ്ങൾ വരുത്തുകയും ചെയ്യുന്നത് ഒഴിവാക്കുന്നതിനായി സ്വീകരിച്ചിട്ടുള്ള നടപടികള്‍ എന്തെല്ലാമാണന്ന് വിശദമാക്കുമോ;

ഉത്സവ സീസണുകൾക്ക് മുൻപ് നാട്ടാനകളെ സൊസൈറ്റി ഫോര്‍ ദി പ്രിവന്‍ഷൻ ഓഫ് ക്രൂവൽറ്റി റ്റു അനിമൽസ് പാനലിൽ ഉൾപ്പെട്ട ഡോക്ടർമാർ പരിശോധിച്ച് ആരോഗ്യപരമായ കാര്യങ്ങൾ ഉറപ്പാക്കുന്നതിന് നിർദേശം നല്‍കിയിട്ടുണ്ടോയെന്ന് വ്യക്തമാക്കുമോ?

ഇടുക്കി, വയനാട്, ആറളം അടക്കമുള്ള മേഖലകളിൽ കാട്ടാന ശല്യം രൂക്ഷമാണെന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത മേഖലകളിൽ നിരന്തരം നാശനഷ്ടങ്ങളുണ്ടാക്കുന്ന കാട്ടാനകളെ കണ്ടെത്തിയിട്ടുണ്ടോ;

പ്രസ്തുത മേഖലകളിൽ നിരന്തരം നാശനഷ്ടങ്ങളുണ്ടാക്കുന്ന ആക്രമണകാരികളായ ആനകളെ നിരീക്ഷിക്കുന്നതിനും ആവശ്യമായ തുടര്‍ നടപടികള്‍ സ്വീകരിക്കുന്നതിനും നടത്തിയ ഇടപെടല്‍ വിശദമാക്കാമോ;

കാട്ടാന ആക്രമണത്തില്‍ കൊല്ലപ്പെട്ട താല്കാലിക വാച്ചര്‍ ശാന്തന്‍പാറ അയ്യപ്പന്‍കുടി സ്വദേശി ശക്തിവേലിന്റെ കുടുംബത്തിന് അർഹമായ നഷ്ടപരിഹാരം ലഭ്യമാക്കാൻ നടപടികൾ സ്വീകരിച്ചിട്ടുണ്ടോയെന്ന് വ്യക്തമാക്കാമോ?

ഇതര സംസ്ഥാനങ്ങളില്‍ നിന്നും വന്‍തോതില്‍ ഭക്ഷ്യയോഗ്യമല്ലാത്ത മത്സ്യം സംസ്ഥാനത്തേക്ക് എത്തുന്നത് മത്സ്യത്തൊഴിലാളികളുടെയും ഉപഭോക്താക്കളുടെയും താല്പര്യത്തിന് ഹാനികരമായതിനാല്‍ ഗുണനിലവാരമില്ലാത്ത മത്സ്യവിപണനം സംസ്ഥാനത്ത് കുറ്റകരമാക്കിയിട്ടുണ്ടോ; വ്യക്തമാക്കാമോ;

സംസ്ഥാനത്ത് മത്സ്യം പിടിക്കുന്നത് മുതല്‍ ഉപഭോക്താവിലെത്തുന്നതുവരെ ഗുണനിലവാരം നിലനിര്‍ത്താന്‍ നടപടി സ്വീകരിച്ചിട്ടുണ്ടോ; മത്സ്യം കേടുകൂടാതെ കരയ്ക്കെത്തിക്കുന്നതിന് ഇന്‍സുലേറ്റഡ് ഐസ് ബോക്സ് നല്‍കി വരുന്നുണ്ടോ; വ്യക്തമാക്കുമോ;

ഉപഭോക്താക്കള്‍ക്ക് കേടുവരാത്ത മത്സ്യവും മത്സ്യോല്പന്നങ്ങളും ലഭ്യമാക്കുന്നതിന് ആരംഭിച്ചിട്ടുള്ള ഓണ്‍ലൈന്‍ മത്സ്യവിപണനം വിപുലീകരിക്കുന്നതിനും അന്തിപ്പച്ച ഫിഷ് മാര്‍ട്ടുകളും മൊബൈല്‍ ഫിഷ് മാര്‍ട്ടുകളും കൂടുതലായി ഏര്‍പ്പെടുത്തുന്നതിനും നടപടി സ്വീകരിക്കുമോ?

നവകേരള നിര്‍മ്മിതിയില്‍ അര്‍ഹമായ പരിഗണന ലഭിക്കും വിധം പട്ടികജാതി, പട്ടികവര്‍ഗ്ഗ വിഭാഗങ്ങളുടെ സമഗ്രമായ സാമൂഹിക, സാമ്പത്തിക വിവരം ശേഖരിച്ച് അപ്ഡേറ്റ് ചെയ്യാന്‍ കഴിയുന്ന തരത്തില്‍ ഒരു ഡാറ്റാ ബേസ് സൃഷ്ടിക്കുന്നതിന് നടപടി സ്വീകരിച്ചിട്ടുണ്ടോ; ഇല്ലെങ്കില്‍ ആവശ്യമായ നടപടി സ്വീകരിക്കുമോ;

പ്രവര്‍ത്തനക്ഷമമല്ലാത്തതും കയ്യൊഴിയാന്‍ ഉദ്ദേശിക്കുന്നതുമായ എസ്റ്റേറ്റുകള്‍, മറ്റ് ഭൂമികള്‍ എന്നിവ ഏറ്റെടുത്ത് കൂട്ടുടമസ്ഥതയില്‍ സൊസൈറ്റികള്‍ രൂപീകരിച്ച് അവയ്ക്ക് ആവശ്യമായ പ്രവര്‍ത്തന മൂലധനം നല്‍കി പ്രസ്തുത വിഭാഗങ്ങളുടെ ഭൂമിയുടെയും ജീവനോപാധികളുടെയും പ്രശ്നങ്ങള്‍ പരിഹരിക്കാന്‍ കഴിയുന്ന തരത്തില്‍ പദ്ധതികള്‍ ആവിഷ്കരിക്കാന്‍ ഉദ്ദേശിക്കുന്നുണ്ടോ;

കോളനികളും ഊരുകളും മൈക്രോ ബിസിനസ് ഹബ്ബുകളാക്കി വികസിപ്പിക്കാന്‍ പദ്ധതികള്‍ തയ്യാറാക്കുമോ;

പട്ടികവര്‍ഗ്ഗ വിഭാഗങ്ങളുടെ തനതായ അറിവുകളെയും കഴിവുകളെയും അനുയോജ്യമായ ഉല്പന്നങ്ങളും സേവനങ്ങളുമാക്കി മാര്‍ക്കറ്റ് ചെയ്യാന്‍ പദ്ധതികള്‍ തയ്യാറാക്കുമോ?

സംസ്ഥാനത്ത് പെട്രോൾ, ഡീസൽ, മണ്ണെണ്ണ എന്നിവയുടെ വിലവർദ്ധനവ് കാരണം മത്സ്യത്തൊഴിലാളികൾ കടുത്ത പ്രതിസന്ധി നേരിടുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യം ഗൗരവത്തോടെ കാണുന്നുണ്ടോയെന്നും ഇത് പരിഹരിക്കാനായി സത്വര നടപടികൾ കൈക്കൊള്ളുമോയെന്നും വ്യക്തമാക്കാമോ;

സംസ്ഥാന സർക്കാർ ബജറ്റിൽ ഏർപ്പെടുത്തിയ പെട്രോൾ, ഡീസൽ രണ്ട് രൂപ സെസ്സ് പ്രതിസന്ധി നേരിടുന്ന മത്സ്യത്തൊഴിലാളികളുടെ ജീവിതം കൂടുതൽ ദുസ്സഹമാക്കുമെന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യം ഗൗരവത്തോടെ കാണുന്നുണ്ടോ; വിശദമാക്കുമോ?

എസ്.സി., എസ്.ടി. വിഭാഗങ്ങള്‍ക്കായി കിഫ്ബിയില്‍ പ്രത്യേക ഫണ്ട് ഏര്‍പ്പെടുത്തിയിട്ടുണ്ടോ;

പദ്ധതിയിൽ വകയിരുത്തുന്ന തുക പോലും എസ്.സി., എസ്.ടി. വിഭാഗങ്ങളുടെ ഉന്നമനത്തിന് പര്യാപ്തമല്ലാത്ത സാഹചര്യത്തില്‍ കിഫ്ബിയില്‍ പ്രസ്തുത വിഭാഗങ്ങള്‍ക്ക് പ്രത്യേക ഫണ്ട് വകയിരുത്താത്തത് അനീതിയാണെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ;

എങ്കിൽ സ്പെഷ്യല്‍ കമ്പോണന്റ് പ്ലാന്‍, ട്രൈബല്‍ സബ് പ്ലാന്‍ എന്നീ മാതൃകയില്‍ പ്രസ്തുത വിഭാഗങ്ങള്‍ക്കായി കിഫ്ബിയില്‍ പ്രത്യേക ഫണ്ട് വകയിരുത്താന്‍ മുന്‍കൈയെടുക്കുമോ; വ്യക്തമാക്കാമോ;

ആദിവാസി മേഖലകളിലെ അടിസ്ഥാന സൗകര്യ വികസനത്തിന് കിഫ്‌ബി വഴി പദ്ധതികൾ നടപ്പിലാക്കിയിട്ടുണ്ടോ; വിശദാംശം നല്‍കാമോ?