സംസ്ഥാനത്തെ തെക്കന്‍ ജില്ലകളില്‍ സി.എന്‍.ജി ഇന്ധനം നിറയ്ക്കുന്നതിനുള്ള പമ്പുകള്‍ നിലവിലില്ലായെന്ന വിവരം ശ്രദ്ധയില്‍പ്പെട്ടിട്ടുണ്ടോ;

സി.എന്‍.ജി പമ്പുകള്‍ ഇല്ലാത്ത ജില്ലകളില്‍ പ്രസ്തുത പമ്പുകള്‍ സ്ഥാപിക്കുന്നതിനുള്ള നടപടി സ്വീകരിക്കുമോ;

സംസ്ഥാനത്ത് സി.എന്‍.ജി പമ്പുകള്‍ എത്രയുണ്ടെന്നും അവ എവിടെയെല്ലാമാണെന്നും വിശദമാക്കാമോ?

ഭക്ഷ്യസുരക്ഷയുടെ ഭാഗമായി പൊതുജനങ്ങൾക്ക് സമീകൃതാഹാരം ലഭ്യമാക്കുന്നതിന് വകുപ്പ് എന്തൊക്കെ നടപടികളാണ് സ്വീകരിക്കുന്നത്; വിശദമാക്കാമോ;

അരിയും ഗോതമ്പും പോലെയുള്ള ധാന്യങ്ങൾ റേഷൻകട മുഖേന നൽകുന്നതുപോലെ പ്രാധാന്യമർഹിക്കുന്ന പച്ചക്കറികളും പഴങ്ങളും മത്സ്യമാംസാദികളും കുറഞ്ഞവിലയ്ക്ക് പൊതുജനങ്ങൾക്ക് ലഭ്യമാക്കുവാൻ നടപടി സ്വീകരിക്കുമോ; വിശദമാക്കാമോ?

സംസ്ഥാനത്ത് ഒരു നേരത്തെ ആഹാരമെങ്കിലും കഴിക്കാനില്ലാത്തവര്‍ക്കായി വിശപ്പുരഹിത കേരളം പദ്ധതിയുടെ ഭാഗമായി ആരംഭിച്ച സുഭിക്ഷ ഹോട്ടൽ മാതൃകയിൽ കൂടുതല്‍ സ്ഥാപനങ്ങള്‍ സമൂഹത്തിലെ നിരാലംബര്‍ക്കായും അഗതികള്‍ക്കായും ആരംഭിക്കുവാന്‍ നടപടി സ്വീകരിക്കുമോ; വ്യക്തമാക്കാമോ?

മാവേലിസ്റ്റോർ, റേഷൻകടകള്‍ എന്നിവ മുഖേന വിതരണം ചെയ്യുന്ന ഭക്ഷ്യവസ്തുക്കളുടെ പാക്കിംഗിൽ അളവ്, ഉല്പാദകന്റെ പേര് തുടങ്ങിയ വിവരങ്ങൾ രേഖപ്പെടുത്താറുണ്ടോ എന്ന് പരിശോധിക്കാറുണ്ടോ; വ്യക്തമാക്കാമോ;

കിറ്റുകളിലടക്കം വിതരണം ചെയ്യുന്ന പാക്കറ്റുകൾ അളവ് തൂക്ക നിയമപ്രകാരം ഇത്തരം നിബന്ധനകൾ പാലിക്കുന്നുവെന്ന് ഉറപ്പുവരുത്തുമോ; വ്യക്തമാക്കാമോ?

കൊല്ലം താലൂക്ക് സപ്ലൈ ഓഫീസ് വിഭജിച്ച് കൊല്ലം ആസ്ഥാനമായി സിറ്റി റേഷനിംഗ് ഓഫീസും ചാത്തന്നൂർ ആസ്ഥാനമായി താലൂക്ക് സപ്ലൈ ഓഫീസും ആരംഭിക്കണമെന്ന ദീർഘകാലമായുള്ള ആവശ്യം സംബന്ധിച്ച് നാളിതുവരെ സ്വീകരിച്ച നടപടികൾ വിശദമാക്കാമോ;

പ്രസ്തുത സിറ്റി റേഷനിംഗ് ഓഫീസും താലൂക്ക് സപ്ലൈ ഓഫീസും ആരംഭിക്കുന്നതിന് നിലവിൽ എന്തെങ്കിലും തടസ്സങ്ങളുണ്ടോ എന്നും ഉണ്ടെങ്കിൽ അവ എന്തെല്ലാമെന്നും വ്യക്തമാക്കാമോ?

ഗാര്‍ഹിക പാചക വാതകത്തിനും വാണിജ്യാവശ്യത്തിനുള്ള പാചക വാതകത്തിനും ഈ വര്‍ഷം ജനുവരി ഒന്ന് മുതല്‍ ഉണ്ടായ ആകെ വിലവര്‍ദ്ധനവ് എത്രയാണെന്ന് പരിശോധിച്ചിട്ടുണ്ടോ;

ഗാര്‍ഹിക പാചകവാതകത്തിന് ലഭിച്ചിരുന്ന സബ്സിഡി 2021 ജനുവരി മുതല്‍ ലഭിക്കാത്തത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതു പരിഹരിക്കാന്‍ കേന്ദ്രസര്‍ക്കാരിനോട് ആവശ്യപ്പെടുമോ;

വാണിജ്യാവശ്യത്തിനുള്ള പാചക വാതക വിലവര്‍ദ്ധനയെ തുടര്‍ന്ന് ഹോട്ടലുകള്‍ ഭക്ഷണത്തിന് ഗണ്യമായ തോതില്‍ വില വര്‍ദ്ധിപ്പിച്ചത് ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനു ശേഷം ഭക്ഷ്യവസ്തുക്കളുടെ സംഭരണത്തിനും സംരക്ഷണത്തിനും എന്തെല്ലാം നടപടികള്‍ സ്വീകരിച്ചു വരുന്നു എന്ന് വിശദമാക്കാമോ;

ഇതിനായി കൂടുതല്‍ പദ്ധതികള്‍ നടപ്പിലാക്കുന്ന കാര്യം പരിഗണനയിലുണ്ടോ; എങ്കില്‍ വിശദാംശം ലഭ്യമാക്കാമോ?

സംസ്ഥാനത്ത് എത്ര റേഷന്‍ കാര്‍ഡുടമകളാണുളളത് എന്ന് ഇനം തിരിച്ച് വ്യക്തമാക്കാമോ;

മുന്‍ഗണനാ റേഷന്‍ കാര്‍ഡുകള്‍ നല്‍കുന്നതിനുളള മാനദണ്ഡമെന്താണ്; നിലവില്‍ മുന്‍ഗണനാ റേഷന്‍ കാര്‍ഡുകള്‍ ലഭിച്ച അനര്‍ഹരെ ഒഴിവാക്കുന്നതിന് സ്വീകരിച്ച നടപടികള്‍ എന്തൊക്കെയാണ്; ആയതിന്‍പ്രകാരം എത്ര അനര്‍ഹരെയാണ് മുന്‍ഗണനാ വിഭാഗത്തില്‍ നിന്നും കഴിഞ്ഞ മൂന്ന് വഷത്തിനിടയില്‍ ഒഴിവാക്കാന്‍ കഴിഞ്ഞിട്ടുള്ളത്; വിശദമാക്കാമോ;

മുന്‍ഗണനാ റേഷന്‍ കാര്‍ഡ് മാറ്റി നല്‍കുന്നതിന് ലഭിച്ചിട്ടുളള അപേക്ഷകരുടെ ജില്ലതിരിച്ചുളള കണക്ക് ലഭ്യമാക്കാമോ;

ഇനി എത്ര പേര്‍ക്കുകൂടി ഇപ്രകാരം റേഷന്‍കാര്‍ഡ് മാറ്റി നല്‍കുവാന്‍ കഴിയും എന്ന് വ്യക്തമാക്കാമോ; ആയതിനുള്ള അടിയന്തിര നടപടികള്‍ സ്വീകരിക്കാമോ?

മുന്‍സര്‍ക്കാരിന്റെ കാലത്തും ഈ സര്‍ക്കാരിന്റെ കാലത്തുമായി റേഷന്‍ മുന്‍ഗണനാ കാര്‍ഡ് അനര്‍ഹമായി കെെവശം വെച്ച എത്ര പേര്‍ സര്‍ക്കാര്‍ നിര്‍ദ്ദേശപ്രകാരം തിരിച്ചേല്‍പ്പിച്ചിട്ടുണ്ട്;

ജില്ലാ അടിസ്ഥാനത്തിലുളള കണക്ക് വിശദമാക്കാമോ;

പ്രസ്തുത നടപടിയിലൂടെ അര്‍ഹരായ എത്ര കുടുംബങ്ങളെ റേഷന്‍ മുന്‍ഗണനാ കാര്‍ഡില്‍ ഉള്‍പ്പെടുത്താന്‍ സാധിച്ചിട്ടുണ്ട്; ജില്ലാ അടിസ്ഥാനത്തിലുളള കണക്ക് വിശദമാക്കാമോ?

ഹോസ്ദുര്‍ഗ്ഗ് താലൂക്ക് സപ്ലെെ ഓഫീസിൽ റേഷന്‍ കാര്‍ഡ് എ.പി.എല്‍-ല്‍ നിന്നും ബി.പി.എല്‍-ലേയ്ക്ക് മാറ്റി ലഭിക്കുന്നതിനായി അപേക്ഷ നല്‍കി 6 മാസം കഴിഞ്ഞിട്ടും അര്‍ഹതപ്പെട്ടവര്‍ക്ക് കാര്‍ഡ് മാറ്റി നല്‍കാന്‍ കഴിയാതെവന്ന എത്ര അപേക്ഷകള്‍ ഉണ്ടെന്നും ഈ അപേക്ഷകള്‍ എന്ന് തീര്‍പ്പാക്കാന്‍ കഴിയുമെന്നും വ്യക്തമാക്കാമോ;

ചികിത്സ ഉള്‍പ്പെടെയുള്ള ആനുകൂല്യങ്ങള്‍ക്കായി കാന്‍സര്‍ തുടങ്ങിയ മാരക രോഗങ്ങള്‍ ബാധിച്ചവര്‍ക്ക് റേഷന്‍കാര്‍ഡ് ബി.പി.എല്‍ ആക്കി ലഭിക്കുന്നതിന് നിലവില്‍ ഉത്തരവുണ്ടോ; എങ്കില്‍ പകർപ്പ് ലഭ്യമാക്കാമോ?

റേഷന്‍കാര്‍ഡ് മുന്‍ഗണന വിഭാഗത്തില്‍ ഉള്‍പ്പെടുത്തുന്നതിന് ക്ലേശഘടകങ്ങള്‍ക്ക് നല്‍കുന്ന 20 മാര്‍ക്കിന് 2009-ലെ തദ്ദേശസ്ഥാപനങ്ങളിലെ ബി.പി.എല്‍. പട്ടികയാണോ അടിസ്ഥാനം എന്നറിയിക്കാമോ; തദ്ദേശസ്ഥാപനങ്ങള്‍ സാക്ഷ്യപത്രം അനുവദിച്ചാല്‍ 2009-ന് ശേഷം ബി.പി.എല്‍. പട്ടികയില്‍ ഉള്‍പ്പെട്ടവരെയും മേല്‍ മാനദണ്ഡത്തില്‍ പരിഗണിക്കാനാകുമോ; വിശദമാക്കാമോ;

മുന്‍ഗണന പട്ടികയില്‍ ഉള്‍പ്പെടുത്തുന്നതിന് ബി.പി.എല്‍. കുടുംബങ്ങള്‍ സമര്‍പ്പിക്കേണ്ട അടിസ്ഥാനരേഖകള്‍ എന്തെല്ലാമാണെന്നും ആയത് അനുവദിക്കേണ്ടത് ഏത് ഉദ്യോഗസ്ഥരാണെന്നും ഓരോ രേഖകള്‍ക്കും നല്‍കുന്ന വെയിറ്റേജ് മാര്‍ക്കുകളും അറിയിക്കാമോ;

റേഷന്‍ മുന്‍ഗണന പട്ടികയില്‍ ഉള്‍പ്പെടുന്നതിന് ചുരുങ്ങിയത് എത്ര മാര്‍ക്കാണ് ആവശ്യമായിട്ടുളളതെന്ന് അറിയിക്കാമോ; നിലമ്പൂര്‍ താലൂക്കില്‍ ഇത്തരത്തില്‍ തയ്യാറാക്കിയ പട്ടികയില്‍ ഉള്‍പ്പെട്ട എത്ര കുടുംബങ്ങള്‍ ഉണ്ടെന്നും ഇതില്‍ എത്ര കുടുംബങ്ങള്‍ക്ക് ഇതുവരെ മുന്‍ഗണന കാര്‍ഡുകള്‍ നല്‍കിയെന്നുമുളള വിവരങ്ങള്‍ പഞ്ചായത്ത് തിരിച്ച് ലഭ്യമാക്കാമോ?

വികലാംഗര്‍ ദൈനംദിന സഞ്ചാര ആവശ്യങ്ങള്‍ക്കായി നാലുചക്രവാഹനം സ്വന്തമാക്കുന്ന സാഹചര്യത്തില്‍ നാലുചക്ര വാഹനമുള്ളതിനാല്‍ അവര്‍ക്ക് ലഭിച്ചുകൊണ്ടിരിക്കുന്ന ബി.പി.എല്‍. ആനുകൂല്യം നിര്‍ത്തലാക്കുന്ന സാഹചര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത വിഷയം നിലനില്ക്കുന്നുണ്ടെങ്കില്‍ അത് പരിഹരിച്ച് അവര്‍ക്ക് ബി.പി.എല്‍. ആനുകൂല്യം ലഭിക്കുന്നതിനുള്ള നടപടികള്‍ സ്വീകരിക്കാമോ?

ഈ സര്‍ക്കാര്‍ വന്നതിനുശേഷം തൃശ്ശൂര്‍ ജില്ലയില്‍ എത്ര മുന്‍ഗണന കാര്‍ഡുകള്‍ നല്‍കിയിട്ടുണ്ടെന്ന് വ്യക്തമാക്കാമോ;

അര്‍ഹതയില്ലാത്ത എത്രപേര്‍ റേഷന്‍കാര്‍ഡുകള്‍ സറണ്ടര്‍ ചെയ്തിട്ടുണ്ട്; വ്യക്തമാക്കാമോ;

അനര്‍ഹര്‍ ഇനിയും മുന്‍ഗണന കാര്‍ഡുകള്‍ കെെവശം വച്ചിട്ടുണ്ടെങ്കില്‍ എന്തുനടപടിയാണ് സ്വീകരിക്കാന്‍ ഉദ്ദേശിക്കുന്നത്; വ്യക്തമാക്കാമോ;

കുന്നംകുളം താലൂക്കില്‍ എത്ര പുതിയ മുന്‍ഗണന കാര്‍ഡുകള്‍ നല്‍കാന്‍ തയ്യാറായിട്ടുണ്ട്;

റേഷന്‍കട അടിസ്ഥാനത്തിലോ പഞ്ചായത്തടിസ്ഥാനത്തിലോ എത്ര മുന്‍ഗണന കാര്‍ഡ് നല്‍കുന്നു എന്ന വിവരം ലഭ്യമാക്കുമോ?

ഈ സർക്കാർ അധികാരത്തിൽ വന്നതിനുശേഷം കാഞ്ഞങ്ങാട് മണ്ഡലത്തിൽ എത്രപേരെ ബി.പി.എല്‍. പട്ടികയിൽ ഉൾപ്പെടുത്തിയെന്ന് അറിയിക്കാമോ;

എത്ര റേഷൻകാർഡുകളാണ് ബി.പി.എല്‍. പട്ടികയിൽ നിന്നും ഒഴിവാക്കപ്പെട്ടതെന്ന് അറിയിക്കാമോ;

ബി.പി.എല്‍. പട്ടികയിൽ ഉൾപ്പെട്ടിരുന്ന അനർഹരെ കണ്ടെത്തി ഒഴിവാക്കുമ്പോൾ അവർക്കെതിരെ നിയമനടപടികൾ സ്വീകരിച്ചിട്ടുണ്ടോ; വിശദാംശങ്ങൾ ലഭ്യമാക്കാമോ?

സംസ്ഥാനത്ത് ഇതുവരെ അനര്‍ഹര്‍ കെെവശം വച്ചിരുന്ന എത്ര അന്ത്യോദയ അന്നയാേജന (മഞ്ഞ), മുന്‍ഗണന (പിങ്ക്) റേഷന്‍കാര്‍ഡുകള്‍ പൊതുവിഭാഗം കാര്‍ഡുകളായി മാറ്റിയിട്ടുണ്ട്; വ്യക്തമാക്കാമോ;

പൊതുവിഭാഗം സബ്‍സിഡി (നീല കാര്‍ഡ്) റേഷന്‍കാര്‍ഡുകള്‍ കെെവശം വച്ചിരിക്കുന്ന അനര്‍ഹരില്‍നിന്നും തിരിച്ചെടുത്ത് അര്‍ഹരായവര്‍ക്ക് നല്‍കുന്നതിനുള്ള നടപടികളുടെ പുരോഗതി അറിയിക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം പാറശ്ശാല നിയോജകമണ്ഡലത്തിലെ വിവിധ ഗ്രാമപഞ്ചായത്തുകളിലായി അനര്‍ഹരായ എത്രപേര്‍ മുന്‍ഗണന റേഷന്‍കാര്‍ഡില്‍നിന്നും സ്വമേധയാ ഒഴിഞ്ഞുപോയിട്ടുണ്ടെന്ന് അറിയിക്കാമോ;

ഇനിയും ഇത്തരത്തില്‍ മുന്‍ഗണന റേഷന്‍കാര്‍ഡില്‍നിന്നും ഒഴിവാക്കപ്പെടേണ്ട എത്രപേര്‍ ഉണ്ടെന്നുള്ള കൃത്യമായ വിവരം ശേഖരിച്ചിട്ടുണ്ടോ; പഞ്ചായത്തടിസ്ഥാനത്തിലുള്ള വിശദാംശങ്ങള്‍ ലഭ്യമാക്കാമോ;

പാറശ്ശാല മണ്ഡലത്തില്‍ വിവിധ പ‍ഞ്ചായത്തുകളിലായി എ.പി.എല്‍. കാര്‍ഡ് ബി.പി.എല്‍. കാര്‍ഡാക്കി മാറ്റണമെന്നാവശ്യപ്പെട്ട് ലഭിച്ച അപേക്ഷകള്‍ എത്രയാണ്; അപേക്ഷകരുടെ വിശദാംശങ്ങള്‍ പഞ്ചായത്ത് തിരിച്ച് ലഭ്യമാക്കാമോ;

പ്രസ്തുത അപേക്ഷകളുടെ നിലവിലെ സ്ഥിതി എന്താണെന്ന് വ്യക്തമാക്കാമോ?

സംസ്ഥാനത്ത് പുതുതായി റേഷന്‍ കടകള്‍ ആരംഭിക്കുന്നതിന് ഉദ്ദേശമുണ്ടോ എന്ന് അറിയിക്കാമോ;

മലബാര്‍ മേഖലയില്‍ ജനസംഖ്യാനുപാതികമായി റേഷന്‍ കടകള്‍ ആരംഭിക്കുന്നതിന് ഉദ്ദേശിക്കുന്നുണ്ടോ എന്ന് വ്യക്തമാക്കാമോ?

കുട്ടനാട്ടില്‍ റദ്ദായ മുഴുവന്‍ റേഷന്‍കടകളും പുന:സ്ഥാപിക്കുന്നതിന് എന്തൊക്കെ നടപടികള്‍ സ്വീകരിക്കുമെന്ന് വ്യക്തമാക്കുമോ;

കുട്ടനാട്ടിലെ റേഷന്‍കടകള്‍ വഴി കൂടുതല്‍ ഭക്ഷ്യധാന്യങ്ങള്‍ ലഭ്യമാക്കാന്‍ നടപടികള്‍ സ്വീകരിക്കുമോ; വിശദാംശം ലഭ്യമാക്കുമോ?

ഭക്ഷ്യ സിവില്‍ സപ്ലൈസ്‌ വകുപ്പിനുകീഴില്‍ പുതിയ റേഷന്‍കടകള്‍ അനുവദിക്കുന്നതിനുള്ള മാനദണ്ഡങ്ങള്‍ എന്തൊക്കെയാണെന്ന് വിശദീകരിക്കാമോ;

പുതിയ റേഷന്‍കടകള്‍ അനുവദിക്കുമ്പോള്‍ സ്ത്രീകള്‍ക്ക് പ്രത്യേക പരിഗണനയുണ്ടോ; വിശദമാക്കുമോ?

മാനന്തവാടി നിയോജകമണ്ഡലത്തില്‍ ആകെ എത്ര മാവേലിസ്റ്റോറുകളാണ് പ്രവര്‍ത്തിച്ചുവരുന്നത്; വ്യക്തമാക്കാമോ;

പ്രസ്തുത മാവേലിസ്റ്റോറുകളില്‍ എത്ര സ്ഥിരം ജീവനക്കാര്‍ ഉണ്ടെന്നും എത്ര താല്‍ക്കാലിക ജീവനക്കാര്‍ ഉണ്ടെന്നും വ്യക്തമാക്കാമോ;

ഓരോ മാവേലിസ്റ്റോറിലും ജോലിചെയ്യുന്ന ജീവനക്കാരുടെ എണ്ണം തരംതിരിച്ച് ലഭ്യമാക്കാമോ?

സംസ്ഥാനത്ത് സിവില്‍ സപ്ലൈസ് വകുപ്പിന്റെ കീഴില്‍ നിലവില്‍ എത്ര സഞ്ചരിക്കുന്ന നിത്യോപയോഗസാധന വില്‍പ്പനശാലകള്‍ പ്രവര്‍ത്തിക്കുന്നുണ്ട്; വ്യക്തമാക്കുമോ;

സഞ്ചരിക്കുന്ന നിത്യോപയോഗസാധന വില്‍പ്പനകേന്ദ്രങ്ങള്‍ അനുവദിക്കുന്നതിന്റെ മാനദണ്ഡങ്ങള്‍ എന്തെല്ലാമാണ്;

മണലൂര്‍ മണ്ഡലത്തില്‍ എത്ര സഞ്ചരിക്കുന്ന വില്‍പ്പനശാലകള്‍ പ്രവര്‍ത്തിക്കുന്നുണ്ട്; വിശദാംശങ്ങള്‍ ലഭ്യമാക്കുമോ?

മാവേലി സ്റ്റോറുകള്‍ കൂടുതല്‍ ജനപ്രിയമാക്കി കൂടുതല്‍ വരുമാനം ഉണ്ടാക്കുവാന്‍ എന്തെല്ലാം നടപടികളാണ് സ്വീകരിച്ചിരിക്കുന്നത്; വ്യക്തമാക്കാമോ;

മാവേലി സ്റ്റോറുകള്‍ വഴി വിതരണം ചെയ്യുന്ന ഉത്പന്നങ്ങളുടെ ഗുണനിലവാരം ഉറപ്പുവരുത്താന്‍ എന്തെല്ലാം നടപടികളാണ് സ്വീകരിച്ചിരിക്കുന്നത്; വ്യക്തമാക്കാമോ;

മാവേലി സ്റ്റോറുകളില്‍ കാലാവധി കഴിഞ്ഞ ഉത്പന്നങ്ങള്‍ വിതരണം ചെയ്യാതിരിക്കാന്‍ എന്തെല്ലാം നടപടികളാണ് സ്വീകരിച്ചിരിക്കുന്നത്; വ്യക്തമാക്കാമോ?

നാദാപുരം മണ്ഡലത്തിലെ കായക്കൊടി, ചെക്ക്യാട് എന്നീ ഗ്രാമപഞ്ചായത്തുകളില്‍ പുതുതായി മാവേലിസ്റ്റോറുകള്‍ അനുവദിക്കാന്‍ സ്ഥലം എം.എല്‍.എ. നല്‍കിയ കത്തിന്മേല്‍ എന്തൊക്കെ നടപടികള്‍ സ്വീകരിച്ചിട്ടുണ്ട്; വ്യക്തമാക്കാമോ;

മേല്‍ പഞ്ചായത്തുകളില്‍ മാവേലിസ്റ്റോര്‍ അനുവദിക്കുന്നതിനുള്ള നടപടിക്രമങ്ങള്‍ ത്വരിതപ്പെടുത്താമോ?

പൊതുവിതരണവകുപ്പില്‍ നിന്ന് സപ്ലൈകോയിലേക്കുളള അന്യത്രസേവനത്തിനായി 1290 തസ്തികകള്‍ സൃഷ്ടിച്ചിരുന്നതില്‍ നിലവില്‍ എത്ര തസ്തികകളിലേക്കാണ് ഡെപ്യൂട്ടേഷന്‍ നല്‍കിവരുന്നതെന്ന് വിശദമാക്കാമോ; തസ്തിക തിരിച്ച് എണ്ണം വ്യക്തമാക്കാമോ;

എല്‍.ഡി.സി., യു.ഡി.സി., എച്ച്.സി. എന്നീ തസ്തികകളില്‍നിന്ന് സപ്ലൈകോയിലേക്കുള്ള അന്യത്രസേവനം 10% വീതം ഒരോവര്‍ഷവും കുറച്ചതുവഴി ഓരോ വിഭാഗത്തിലും എത്ര ജീവനക്കാരുടെ കുറവാണ് ഉണ്ടായിട്ടുളളത്; നിലവിലുണ്ടായിരുന്ന തസ്തികകളുടെ എണ്ണവും കുറവു വന്ന തസ്തികകളുടെ എണ്ണവും തരംതിരിച്ച് വ്യക്തമാക്കാമോ;

ഒരോവര്‍ഷവും അന്യത്രസേവനം 10% കുറക്കുമ്പോള്‍ ഈ തസ്തികകളില്‍ വകുപ്പുകളില്‍ അധികംവരുന്ന ജീവനക്കാരെ (ഡെപ്യൂട്ടേഷന്‍ കഴിഞ്ഞ് തിരികെ വരുന്നവരുള്‍പ്പെടെ) എങ്ങനെ നിലനിര്‍ത്താന്‍ സാധിക്കുമെന്ന് പരിശോധിച്ചിട്ടുണ്ടോ; പരിഹാരമാര്‍ഗ്ഗം ആലോചിച്ചിട്ടുണ്ടോ; വിശദമാക്കാമോ;

സപ്ലൈകോയിലേക്കുളള അന്യത്രസേവനം 10% വെട്ടിക്കുറച്ചനാള്‍മുതല്‍ വകുപ്പില്‍ പി.എസ്.സി. മുഖേനയുള്ള എല്‍.ഡി. ക്ലാര്‍ക്കുമാരുടെ നിയമനങ്ങളിലെ കുറവ് ശ്രദ്ധയില്‍പ്പെട്ടിട്ടുണ്ടോ; പുതുതായി എത്ര നിയമനങ്ങളാണ് പ്രസ്തുത കാലയളവില്‍ വകുപ്പില്‍ നടന്നിട്ടുളളത്; വ്യക്തമാക്കാമോ;

സപ്ലൈകോയിലെ കൂടുതല്‍ ഉന്നത തസ്തികകളിലേക്കുളള അന്യത്രസേവനം വെട്ടിക്കുറയ്ക്കാന്‍ തീരുമാനിച്ചിട്ടുണ്ടോയെന്ന് വ്യക്തമാക്കാമോ?

സിവില്‍ സപ്ലൈസ് വകുപ്പു മുഖേനയുളള നെല്ല് സംഭരണവുമായി ബന്ധപ്പെട്ട് പുതിയ നിബന്ധനകള്‍ എന്തെങ്കിലും ഏര്‍പ്പെടുത്തിയിട്ടുണ്ടോ; വ്യക്തമാക്കാമോ;

ഭൂമി പാട്ടത്തിനെടുത്ത് നെല്‍കൃഷി ചെയ്യുന്ന കര്‍ഷകര്‍ ഭൂവുടമയുടെ സമ്മതപത്രത്തിനുപകരം കരമടച്ച രസീത് ഹാജരാക്കണമെന്ന നിബന്ധനയുണ്ടോ; വ്യക്തമാക്കാമോ;

പാട്ടകൃഷി നടത്തുന്നവര്‍ക്ക് ഭൂവുടമയില്‍നിന്നും കരമടച്ച രസീത് ഹാജരാക്കേണ്ടിവരുന്നത് പ്രയാസം സൃഷ്ടിക്കാനിടയുളളതിനാല്‍ ഇപ്രകാരം നിബന്ധനയുളളപക്ഷം ആയത് ഒഴിവാക്കി മുമ്പ് അനുവര്‍ത്തിച്ചിരുന്ന രീതിയില്‍ ഭൂവുടമയുടെ സമ്മതപത്രത്തിന്റെ അടിസ്ഥാനത്തില്‍ നെല്ല് സംഭരിക്കാന്‍ തയ്യാറാവുമോ എന്ന് വ്യക്തമാക്കാമോ?

കാസര്‍ഗോഡ് ജില്ലയില്‍ നെല്ല് സംഭരിച്ച വകയില്‍ കര്‍ഷകര്‍ക്ക് ഇനിയും എത്ര രൂപ നല്‍കാനുണ്ടെന്നും ഈ തുക എപ്പോള്‍ ലഭ്യമാക്കാന്‍ കഴിയുമെന്നും വ്യക്തമാക്കാമോ?

പാലക്കാട്‌ ജില്ലയില്‍ നെല്ല് സംഭരണം കുറ്റമറ്റതാക്കാന്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ; പാടശേഖരങ്ങളില്‍ വിളവുകൂടുകയാണെങ്കില്‍ കൂടിയ നെല്ല് സംഭരിക്കുന്നതിനുള്ള മാനദണ്ഡങ്ങള്‍ എന്തൊക്കെയാണെന്ന് വിശദമാക്കാമോ?

ഡ്രൈവർമാർക്ക് അനുവദിച്ചിട്ടുള്ള സ്പെഷ്യൽ അലവന്‍സ് സിവിൽ സപ്ലൈസ് വകുപ്പിൽ നിർത്തലാക്കിയിട്ടുള്ള വിവരം ശ്രദ്ധയില്‍പ്പെട്ടിട്ടുണ്ടോ;

ശമ്പള പരിഷ്കരണ കമ്മീഷൻ ശുപാര്‍ശ പ്രകാരം മറ്റെല്ലാവകുപ്പുകളിലും ഇരുന്നൂറ്റി ഇരുപത് രൂപ ഓരോ മാസവും ഡ്രൈവർമാർക്ക് സ്പെഷ്യൽ അലവന്‍സ് ലഭിക്കുമ്പോള്‍ സിവിൽ സപ്ലൈസ് വകുപ്പിൽ മാത്രം 2021 ജൂലൈ മാസം മുതൽ ആയത് നിർത്തലാക്കുവാനുള്ള സാഹചര്യം എന്താണ്; വിശദീകരിക്കാമോ;

ഡ്രൈവർമാരുടെ സ്പെഷ്യൽ അലവന്‍സ് പുന:സ്ഥാപിക്കുവാന്‍ നടപടി സ്വീകരിക്കുമോ?