സ്വയം സാക്ഷ്യപ്പെടുത്തലിലൂടെ നൽകുന്ന കെട്ടിട നിർമ്മാണ പെർമിറ്റുകൾ ഉപയോഗിച്ച് വീടുവയ്ക്കുമ്പോൾ ക്രമവത്കരണം ആവശ്യമായി വന്നാൽ സ്വീകരിക്കേണ്ട നടപടിക്രമം എന്താണെന്ന് വ്യക്തമാക്കുമോ?

സേവനം വീട്ടുപടിക്കല്‍ എത്തിക്കുന്ന വാതില്‍പ്പടി സേവനപദ്ധതി സംസ്ഥാന വ്യാപകമാക്കുന്നതിന് സര്‍ക്കാര്‍ ഉദ്ദേശിക്കുന്നുണ്ടോ; ഏതൊക്കെ സേവനങ്ങളാണ് ഇതുവഴി ഇപ്പോള്‍ ലഭ്യമാക്കുന്നത്; വിശദമാക്കാമോ?

സംസ്ഥാനത്ത് കോവിഡ് മഹാമാരി കാരണം മസ്റ്ററിംഗ് നടക്കാത്തതിനാല്‍ അര്‍ഹരായവര്‍ക്ക് സാമൂഹ്യ സുരക്ഷാ പെന്‍ഷന്‍ ലഭിക്കാത്തത് ശ്രദ്ധയില്‍പ്പെട്ടിട്ടുണ്ടോ; ആയത് പരിഹരിക്കുന്നതിന് എന്തൊക്കെ നടപടികളാണ് സ്വീകരിച്ചുവരുന്നതെന്ന് വിശദമാക്കാമോ;

മസ്റ്ററിംഗ് നടക്കാത്തതിനാല്‍ അര്‍ഹതപ്പെട്ടവര്‍ക്ക് മാസങ്ങളായി പെന്‍ഷന്‍ ലഭിക്കാത്ത സാഹചര്യത്തില്‍ അര്‍ഹതയുളളവര്‍ക്ക് മസ്റ്ററിംഗ് നടത്താനുള്ള അവസരമോ, അല്ലെങ്കില്‍ മറ്റ് സാവകാശങ്ങളോ നല്കി പെന്‍ഷന്‍ ലഭ്യമാക്കാന്‍ നടപടി സ്വീകരിക്കുമോ; എങ്കില്‍ എന്തൊക്കെ നടപടികളാണ് സ്വീകരിക്കുന്നതെന്ന് വിശദമാക്കാമോ;

കോവിഡ് മഹാമാരി മൂലം മസ്റ്ററിംഗ് നടക്കാത്തതിനാല്‍ കൂത്തുപറമ്പ് നിയോജകമണ്ഡലത്തില്‍ (പഞ്ചായത്ത് / നഗരസഭ തരംതിരിച്ച്) അര്‍ഹരായ എത്ര ആളുകള്‍ക്ക് സാമൂഹ്യ സുരക്ഷാ പെന്‍ഷന്‍ മുടങ്ങിക്കിടക്കുന്നുണ്ടെന്ന് വിശദമാക്കാമോ?

മുഖ്യമന്ത്രിയുടെ തദ്ദേശറോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തി കായംകുളം മണ്ഡലത്തില്‍ ഭരണാനുമതി ലഭിച്ച പ്രവൃത്തികള്‍ ഏതൊക്കെയെന്നും അതിന്റെ നിലവിലുള്ള പുരോഗതി എന്താണെന്നും വിശദമാക്കാമോ?

മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും വെെപ്പിന്‍ മണ്ഡലത്തിലെ പ്രളയത്തില്‍ തകര്‍ന്ന ഏതെല്ലാം റോഡുകള്‍ക്കാണ് തുക അനുവദിച്ചതെന്ന് വ്യക്തമാക്കാമോ;

പ്രസ്തുത റോഡുകള്‍ക്കായി അനുവദിച്ച തുക എത്രയെന്നും നിര്‍മ്മാണ പ്രവൃത്തിയുടെ നിജസ്ഥിതി എന്തെന്നും എന്നാണ് ഭരണാനുമതി നല്‍കിയതെന്നും സംബന്ധിച്ച വിശദാംശങ്ങള്‍ വെളിപ്പെടുത്താമോ;

ഭരണാനുമതിയുടെ പകര്‍പ്പുകള്‍ ലഭ്യമാക്കാമോ?

പൊന്നാനി താലൂക്കിലെ ഈഴവതിരുത്തി ശ്മശാന നിര്‍മ്മാണത്തിന് 2020-21, 2021-22 ബജറ്റുകളില്‍ തുക അനുവദിച്ചുവെങ്കിലും ആയതിന്റെ പ്രവര്‍ത്തനം നാളിതുവരെ ആരംഭിച്ചിട്ടില്ലാത്തതിനാല്‍ നിര്‍മ്മാണ പ്രവര്‍ത്തനം ആരംഭിക്കുന്നതിന് ആവശ്യമായ നടപടികള്‍ സ്വീകരിക്കുമോ?

പയ്യന്നൂര്‍ നഗരസഭയിലെ കോറോത്ത് നിര്‍മ്മിക്കുന്ന ഫ്ലാറ്റ് സമുച്ചയത്തിന് ആവശ്യമായ ഭൂമി കെെമാറുന്നതിനുളള നടപടികള്‍ ഏതുവരെയായെന്ന് വിശദമാക്കാമോ;

പൊതു ആവശ്യത്തിലേയ്ക്ക് നീക്കിവെച്ച ഭൂമി വിട്ടുകിട്ടുന്നതിനായി ലെെഫ് മിഷന്‍ അപേക്ഷ സമര്‍പ്പിച്ചിട്ടുണ്ടോ; ഉണ്ടെങ്കില്‍ അതുമായി ബന്ധപ്പെട്ട ഫയല്‍ ഇപ്പോള്‍ എവിടെയാണ് ഉളളതെന്നും ആയതിന്റെ ഫയല്‍ നമ്പര്‍ ഏതാണെന്നും വ്യക്തമാക്കാമോ;

ഭൂമി കെെമാറ്റനടപടികള്‍ വെെകുന്നത് ശ്രദ്ധയില്‍പ്പെട്ടിട്ടുണ്ടോ; ഇത് പരിഹരിക്കാന്‍ ആവശ്യമായ നടപടികള്‍ സ്വീകരിക്കുമോ?

മുഖ്യമന്ത്രിയുടെ തദ്ദേശറോഡ് വികസന പദ്ധതി പ്രകാരം വടക്കാഞ്ചേരി നിയോജകമണ്ഡലത്തില്‍ 2016-21 കാലയളവില്‍ അനുവദിച്ച റോഡുകളുടെ വിശദാംശങ്ങള്‍ ലഭ്യമാക്കാമോ;

അവയുടെ നിലവിലെ സ്ഥിതി പട്ടികതിരിച്ച് ലഭ്യമാക്കാമോ?

മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിലൂടെ കോങ്ങാട് നിയോജക മണ്ഡലത്തില്‍ ഭരണാനുമതി നല്‍കിയ റോഡുകള്‍ ഏതൊക്കെയാണെന്നും അനുവദിച്ച തുക എത്രയെന്നും വ്യക്തമാക്കാമോ;

പ്രസ്തുത പ്രവൃത്തികളുടെ നിലവിലെ സ്ഥിതി എന്താണെന്ന് അറിയിക്കാമോ?

ജിഡ കൗണ്‍സില്‍ അംഗീകാരം നല്‍കിയതും തദ്ദേശ സ്വയം ഭരണ വകുപ്പ് 4.8 കോടി രൂപയ്ക്ക് ഭരണാനുമതി നല്‍കിയതുമായ മൂലമ്പിളളി - പിഴല പാലത്തിന്റെ അപ്രോച്ച് റോഡായ പിഴല 350 മീറ്റര്‍ റോഡിന്റെ നിര്‍മ്മാണ പ്രവര്‍ത്തനങ്ങളുടെ നിജസ്ഥിതി വ്യക്തമാക്കാമോ;

പ്രസ്തുത പ്രവൃത്തിയുടെ എസ്റ്റിമേറ്റ് ആരാണ് തയ്യാറാക്കിയിട്ടുളളതെന്ന് വെളിപ്പെടുത്താമോ;

ഈ പ്രവൃത്തിക്ക് സാങ്കേതികാനുമതി ലഭ്യമാക്കുന്നതില്‍ നേരിടുന്ന കാലതാമസത്തിന് കാരണം വ്യക്തമാക്കാമോ;

പ്രസ്തുത സാങ്കേതിക തടസ്സങ്ങള്‍ പരിഹരിച്ച് എന്നത്തേക്ക് റോഡിന്റെയും മൂലമ്പിളളി പാലത്തിന്റെയും പ്രയോജനം ജനങ്ങള്‍ക്ക് ലഭ്യമാക്കുമെന്ന് വ്യക്തമാക്കാമോ?

ഇരിക്കൂര്‍ നിയോജകമണ്ഡലത്തില്‍ പ്രവര്‍ത്തിക്കുന്ന പഞ്ചായത്ത് , നഗരസഭ ഓഫീസുകളില്‍ ഏതെല്ലാം വിഭാഗങ്ങള്‍ ഉണ്ടെന്ന് വ്യക്തമാക്കാമോ;

പ്രസ്തുത വിഭാഗങ്ങളില്‍ ഓരോന്നിലും പ്രവര്‍ത്തിക്കുന്ന ജീവനക്കാരുടെ എണ്ണം പഞ്ചായത്ത്, നഗരസഭ തിരിച്ചു വ്യക്തമാക്കാമോ;

നിലവിലുളള ജീവനക്കാരുടെ എണ്ണം പര്യാപ്തമാണോയെന്നും അല്ലാത്തപക്ഷം ഇനി എത്ര ജീവനക്കാര്‍ ആവശ്യമുണ്ടെന്നും വ്യക്തമാക്കാമോ;

ഓരോ വിഭാഗത്തിലും അനുവദിച്ച തസ്തികകള്‍ എത്രയാണെന്നും ഒഴിഞ്ഞു കിടക്കുന്നത് ഏതൊക്കെയാണെന്നും എത്രകാലമായി ഒഴിഞ്ഞു കിടക്കുന്നുവെന്നും പഞ്ചായത്ത് തിരിച്ചു വ്യക്തമാക്കാമോ?

മാവേലിക്കര മണ്ഡലത്തില്‍ റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി അനുവദിച്ച പ്രവൃത്തികളുടെ നിലവിലെ സ്ഥിതിവിവരം ലഭ്യമാക്കുമോ;

റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി അനുവദിച്ച ചുനക്കര കരിമുളക്കല്‍ ജംഗ്ഷന്‍ വികസനം - എഴുപത് ലക്ഷം രൂപ - എന്ന പ്രവൃത്തിക്കുപകരമായി കരിമുളക്കല്‍ ജംഗ്ഷനില്‍ നിന്നും വടക്കോട്ട് ചിറവരമ്പ് കോളനിയിലേക്കുള്ള റോഡ് നിര്‍മ്മിക്കുവാന്‍ ഭരണാനുമതി നല്കണമെന്നാവശ്യപ്പെട്ട് എം.എല്‍.എ. നല്‍കിയ കത്തിന്മേല്‍ സ്വീകരിച്ച നടപടി വ്യക്തമാക്കാമോ;

പ്രസ്തുത റോഡ് നിര്‍മ്മാണത്തിന് ഭരണാനുമതി നല്‍കുമോ?

റീബില്‍ഡ് കേരള പദ്ധതിയുടെ ഭാഗമായി കുന്നത്തുനാട് നിയോജകമണ്ഡലത്തിലെ വാഴക്കുളം പഞ്ചായത്തില്‍ ഭരണാനുമതി ലഭിച്ചിരുന്ന നടയ്ക്കാവ്-എത്തേരിക്കാവ് റോഡിന്റെ നിര്‍മ്മാണപ്രവര്‍ത്തനങ്ങള്‍ അടിയന്തരമായി ആരംഭിക്കുന്നതിനുളള നടപടി സ്വീകരിക്കുമോ;

റീബില്‍ഡ് കേരള പദ്ധതിയില്‍ ഉള്‍പ്പെടുത്തിയ നോര്‍ത്ത് എഴിപ്പുറം-മാടവന റോഡിന്റെ നിര്‍മ്മാണത്തിന് ഭരണാനുമതി നല്‍കുന്നതിന് അടിയന്തരനടപടി സ്വീകരിക്കുമോ?

കൽപ്പറ്റ ടൗൺ നവീകരണ പദ്ധതി സംബന്ധിച്ച് അവലോകനം നടത്തിയിട്ടുണ്ടോ; വിവരങ്ങൾ ലഭ്യമാക്കാമോ;

കൽപ്പറ്റ ടൗൺ നവീകരണ പദ്ധതിക്കായി എത്ര തുകയാണ് അനുവദിച്ചിട്ടുള്ളത്; വിശദാംശങ്ങൾ ലഭ്യമാക്കാമോ;

പ്രസ്തുത പ്രദ്ധതിയിൽ ഉൾപ്പെടുത്തി നിലവിൽ പൂർത്തീകരിച്ച പ്രവൃത്തികൾ ഏതെല്ലാമാണെന്ന് വ്യക്തമാക്കാമോ;

പ്രസ്തുത പദ്ധതിയിൽ ഉൾപ്പെട്ട ഇനിയും പൂർത്തീകരിക്കാനുള്ള പ്രവൃത്തികൾ ഏതെല്ലാമാണെന്ന് വ്യക്തമാക്കാമോ;

കൽപ്പറ്റ ടൗൺ നവീകരണ പ്രവർത്തനങ്ങൾക്ക് അനുവദിച്ച തുക വിവിധ പദ്ധതികൾ പൂർത്തീകരിക്കാൻ പര്യാപ്തമല്ല എന്ന വസ്തുത ശ്രദ്ധയിൽപ്പെട്ടിട്ടുണ്ടോ; ഉണ്ടെങ്കിൽ പ്രസ്തുത ആവശ്യത്തിനായി അധിക തുക അനുവദിക്കുന്ന കാര്യം പരിഗണിക്കുമോ?

മുഖ്യമന്ത്രിയുടെ തദ്ദേശ റോഡ്‌ പുനരുദ്ധാരണ പദ്ധതി പ്രകാരം പട്ടാമ്പി മണ്ഡലത്തില്‍ അനുവദിച്ചിട്ടുള്ള പ്രവൃത്തികള്‍ എന്തെല്ലാമാണെന്നും അവയുടെ നിലവിലെ അവസ്ഥ എന്താണെന്നും വിശദമാക്കാമോ;

പ്രസ്തുത പദ്ധതി പ്രകാരം പട്ടാമ്പി മണ്ഡലത്തില്‍ പ്രവൃത്തി ആരംഭിക്കാത്ത പദ്ധതികള്‍ ഉണ്ടെങ്കില്‍ അതിന്റെ കാരണം എന്താണെന്ന് വിശദമാക്കാമോ?

പാറശാല നിയോജക മണ്ഡലത്തിലെ വിവിധ പഞ്ചായത്തുകളില്‍ ലൈഫ് പദ്ധതിയുടെ മൂന്നാം ഘട്ടത്തിലേക്കായി എത്ര അപേക്ഷകളാണ് ലഭിച്ചിട്ടുള്ളതെന്ന വിവരം പഞ്ചായത്ത് അടിസ്ഥാനത്തില്‍ ലഭ്യമാക്കാമോ;

ടി അപേക്ഷകള്‍ സൂക്ഷ്മ പരിശോധനയ്ക്ക് വിധേയമാക്കി അന്തിമ ഗുണഭോക്തൃ പട്ടിക തയ്യാറാക്കിയിട്ടുണ്ടോ; ആയതിന്റെ വിശദാംശം അറിയിക്കാമോ?

നികുതി ഇനത്തിൽ ലഭിച്ച തുക ബാങ്കിൽ അടയ്ക്കാതെ തിരുവനന്തപുരം കോർപ്പറേഷനിലെ ഉദ്യോഗസ്ഥർ ക്രമക്കേട് കാട്ടിയത് ശ്രദ്ധയിൽപ്പെട്ടിട്ടുണ്ടോ; ഇക്കാര്യത്തിൽ എന്തൊക്കെ നടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ?

റീബില്‍ഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തി അനുവദിച്ചിരുന്ന മാവേലിക്കര മണ്ഡലത്തിലെ പ്രവൃത്തിയായ തഴക്കര വാര്‍ഡ് ഇരുപത് കല്ലുമല ഐ.ടി.ഐ. ജംഗ്‍ഷന്‍ -പുറ്റംപാട്ട് മുക്ക് റോഡ് പഞ്ചായത്ത് പദ്ധതിയില്‍ ഉള്‍പ്പെടുത്തി നിര്‍മ്മിച്ചത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത റോഡ് പ്രവൃത്തിക്കുപകരമായി തഴക്കര പഞ്ചായത്തിലെ വാര്‍ഡ് ഏഴ് ഗുരുമന്ദിരം ജംഗ്‍ഷന്‍ - പഴഞ്ചിറകുളം റോഡ് റീബില്‍ഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നതിന് ഭരണാനുമതി ലഭ്യമാക്കുമോ; ഈ ആവശ്യത്തിലേക്ക് എം.എല്‍.എ. നല്‍കിയ കത്തിന്മേല്‍ സ്വീകരിച്ച നടപടി വിശദമാക്കാമോ?

കോടഞ്ചേരി പഞ്ചായത്തില്‍ പ്രളയത്തില്‍ തകര്‍ന്ന പറപ്പറ്റ പാലം പുനര്‍ നിര്‍മ്മിക്കുന്നതിന് അനുവദിക്കപ്പെട്ട തുക തികയാത്തതിനാല്‍ കൂടുതല്‍ ഫണ്ട് അനുവദിച്ച് പുതുക്കിയ ഭരണാനുമതി ലഭ്യമാക്കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ഇതില്‍ സ്വീകരിച്ച നടപടികള്‍ വ്യക്തമാക്കുമോ;

പുതുക്കിയ ഭരണാനുമതി ലഭിക്കുന്നതിന് നടപടികള്‍ സ്വീകരിക്കുമോ?

തിരുവമ്പാടി മണ്ഡലത്തില്‍ അനുവദിച്ച സി.എം.എല്‍.ആര്‍.ആര്‍.പി. പദ്ധതികളുടെ പുരോഗതി റിപ്പോര്‍ട്ട് ലഭ്യമാക്കാമോ;

ഫൈനല്‍ ബില്ല് സമര്‍പ്പിച്ച പ്രവൃത്തികളുടെ ബില്‍ തുക മാറുന്നതിന് കാലതാമസം നേരിടുന്നതായി ശ്രദ്ധയില്‍പെട്ടിട്ടുണ്ടോ;

പ്രസ്തുത ബില്‍ തുക അനുവദിക്കുന്നതിന് അടിയന്തര നടപടികള്‍ സ്വീകരിക്കുമോ?

തൃക്കാക്കര മണ്ഡലത്തിലെ എം. എല്‍. എ. ആസ്തി വികസന പദ്ധതിയിലുള്‍പ്പെടുത്തി നടപ്പിലാക്കിയ വെണ്ണല ഗവണ്മെന്റ് എല്‍. പി. സ്കൂളില്‍ പുതിയ ക്ലാസ്സ്‌ മുറിയുടെ നിര്‍മ്മാണ പ്രവൃത്തിയുടെ ഫൈനല്‍ ബില്‍ അലോട്ട്മെന്റ് കരാറുകാരന് നല്‍കിയിട്ടുണ്ടോ; ഇല്ലെങ്കില്‍ കാലതാമസത്തിന്റെ കാരണം വിശദമാക്കുമോ;

നല്കിയിട്ടുണ്ടെങ്കില്‍ എന്നാണ് നല്‍കിയതെന്നും പ്രസ്തുത തുക നല്കുവാനുണ്ടായ കാലതാമസത്തിന്റെ കാരണവും വിശദമാക്കുമോ;

ഈ വിഷയം സംബന്ധിച്ച് തദ്ദേശ സ്വയംഭരണ വകുപ്പ് ചീഫ് എഞ്ചിനീയരുടെ കാര്യാലയത്തില്‍ കൈകാര്യം ചെയ്യുന്ന എല്ലാ ഫയലുകളുടെയും പൂര്‍ണ്ണമായ പകര്‍പ്പ് ലഭ്യമാക്കുമോ?

വെെപ്പിന്‍ നിയോജകമണ്ഡലത്തില്‍ ലെെഫ് പദ്ധതിയുടെ വിവിധ ഘട്ടങ്ങളിലായി എത്രപേര്‍ക്ക് ഭവനം അനുവദിച്ചുവെന്ന് വ്യക്തമാക്കാമോ;

ഗുണഭോക്താക്കളുടെ പഞ്ചായത്ത് തിരിച്ചുളള കണക്ക് ലഭ്യമാക്കാമോ;

ലെെഫ് പദ്ധതിയില്‍ ഉള്‍പ്പെട്ടിട്ടില്ലാത്ത അര്‍ഹരായവരെ ഉള്‍പ്പെടുത്താന്‍ നടപടികള്‍ സ്വീകരിച്ചിട്ടുണ്ടോ;

ഉണ്ടെങ്കില്‍ സ്വീകരിച്ചിട്ടുളള നടപടി വ്യക്തമാക്കാമോ?

കൈവശാവകാശ സര്‍ട്ടിഫിക്കറ്റില്‍ ഏതാവശ്യത്തിനായി നല്‍കിയതാണ് ഭൂമിയെന്ന് രേഖപ്പെടുത്താത്തത് സംബന്ധിച്ച് കോടതി വിധി ശ്രദ്ധയില്‍പ്പെട്ടിട്ടുണ്ടോ;

ഈ വിധിമൂലം പതിച്ചുകിട്ടിയ ഭൂമിയില്‍ വീടടക്കം നിര്‍മ്മിക്കുന്നതിന് ബന്ധപ്പെട്ട വകുപ്പില്‍ നിന്ന് നിര്‍മ്മാണാനുമതി ലഭിക്കാത്ത വിഷയം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത സര്‍ട്ടിഫിക്കറ്റ് പ്രകാരം ഏത് ആവശ്യത്തിനാണ് ഭൂമി പതിച്ച് നല്‍കിയിട്ടുള്ളതെന്ന വിവരം പരിശോധിച്ചതിനുശേഷം മാത്രമേ കെട്ടിട നിര്‍മ്മണാനുമതി നല്‍കാവു എന്ന തദ്ദേശസ്വയംഭരണ വകുപ്പിന്റെ ഉത്തരവ് മൂലം പലര്‍ക്കും പതിച്ച് കിട്ടിയ ഭൂമിയില്‍ വീട് നിര്‍മ്മിക്കാന്‍ പറ്റാത്ത സാഹചര്യം നിലനില്‍ക്കുന്ന വിഷയം ശ്രദ്ധയില്‍പ്പെട്ടിട്ടുണ്ടോ;

മുന്‍കാലങ്ങളില്‍ മലയോര മേഖലകളില്‍ രണ്ട് ഏക്കറിന് മുകളില്‍ റവന്യൂ ഭൂമി പതിച്ചു നല്‍കിയിരുന്നുവെങ്കിലും പുതിയ കോടതി വിധി മൂലം പ‍ഞ്ചായത്തുകള്‍ക്ക് ഇവിടങ്ങളില്‍ വീട് വെയ്ക്കാനുള്ള അനുമതി നല്‍കാന്‍ സാധിക്കാത്ത വിഷയം പരിഹരിക്കുന്നതിനുള്ള നടപടി സ്വീകരിക്കുമോ?

സംസ്ഥാനത്തെ കോർപ്പറേഷനുകൾ അജൈവ മാലിന്യം നീക്കം ചെയ്യുന്നതിന് സ്വകാര്യ ഏജൻസികളുമായി കരാറിൽ ഏർപ്പെട്ടിട്ടുണ്ടോ; വിശദമാക്കുമോ?

നഗരസഭകളില്‍ സ്റ്റാഫ് പാറ്റേണ്‍ നിശ്ചയിക്കുന്നതിന് മാനദണ്ഡങ്ങളുണ്ടോ; വിശദമാക്കുമോ;

മാനദണ്ഡങ്ങളുണ്ടെങ്കില്‍ അത് കൃത്യമായി നടപ്പാക്കാറുണ്ടോ;

കൂടുതല്‍ വരുമാനവും ജനസംഖ്യയുമുള്ള മുനിസിപ്പാലിറ്റികളേക്കാള്‍ കുറഞ്ഞ വരുമാനവും ജനസംഖ്യയുമുള്ള നഗരസഭകളില്‍ അധിക സ്റ്റാഫുകളെ നിശ്ചയിച്ചിരിക്കുന്നത് ശ്രദ്ധയില്‍ പെട്ടിട്ടുണ്ടോ;

ഉണ്ടെങ്കില്‍ സ്റ്റാഫിനെ ആവശ്യമായ നഗരസഭകളില്‍ തസ്തിക പുനര്‍നിര്‍ണ്ണയം നടത്തുന്നതിന് നടപടി സ്വീകരിക്കുമോ?

തദ്ദേശസ്വയംഭരണ പൊതുസര്‍വ്വീസ് എന്ന് മുതല്‍ ആണ് പ്രാവര്‍ത്തികമാക്കാന്‍ ഉദ്ദേശിക്കുന്നതെന്ന് വ്യക്തമാക്കാമോ;

ഇത് പ്രാവര്‍ത്തികമാക്കുമ്പോള്‍ ഉദ്യോഗസ്ഥരുടെ സ്ഥാനപ്പേരില്‍ എന്തെങ്കിലും മാറ്റങ്ങള്‍ സംഭവിക്കുമോ; എങ്കില്‍ ആയതിന്റെ വിശദാംശങ്ങള്‍ വ്യക്തമാക്കാമോ?

ടേക്ക് എ ബ്രേക്ക് പദ്ധതിയുടെ ഭാഗമായി കുടുംബശ്രീ യൂണിറ്റുകള്‍ വഴി സ്നാക്സ് ബാര്‍ ആരംഭിക്കുന്നതിന് പദ്ധതിയുണ്ടോ;

പ്രസ്തുത പദ്ധതി നടപ്പിലാക്കുന്നയിടങ്ങളില്‍ വഴിയിടവും പരിസരവും വൃത്തിയായി സൂക്ഷിക്കുന്നു എന്ന് ഉറപ്പുവരുത്താന്‍ തദ്ദേശ സ്വയം ഭരണ സ്ഥാപനതലത്തില്‍ ഏതെങ്കിലും സമിതികള്‍ രൂപീകരിച്ചിട്ടുണ്ടോയെന്നറിയ്ക്കുമോ?

വർക്കല നിയോജക മണ്ഡലത്തില്‍ മുനിസിപ്പാലിറ്റി/ഗ്രാമ പഞ്ചായത്ത് അടിസ്ഥാനത്തിൽ എത്ര വീടുകൾ ലൈഫ് പദ്ധതിയിൽ ഉൾപ്പെടുത്തി അനുവദിച്ചിട്ടുണ്ടെന്ന് വ്യക്തമാക്കാമോ;

നിലവിൽ എത്ര അപേക്ഷകർക്ക് വീടുകൾ അനുവദിക്കുവാനുണ്ടെന്ന് വ്യക്തമാക്കാമോ?

ഫസ്ററ് ഗ്രേഡായി ഉയര്‍ത്തിയ മുന്‍സിപ്പാലിറ്റികളില്‍ ജീവനക്കാരുടെ എണ്ണം വര്‍ദ്ധിപ്പിക്കുന്നകാര്യം പരിശോധിക്കുമോ;

എത്ര മുന്‍സിപ്പാലിറ്റികളാണ് ഫസ്ററ് ഗ്രേഡായി ഉയര്‍ത്തിയിരിക്കുന്നതെന്നും അവ ഏതെല്ലാമെന്നും വ്യക്തമാക്കാമോ;

പോസ്റ്റ് ക്രിയേഷന്‍ സംബന്ധിച്ച് നഗരസഭകളുടെ പ്രൊപ്പോസല്‍ സര്‍ക്കാരിന് ലഭിച്ചിട്ടുണ്ടോ; ഇക്കാര്യത്തില്‍ സ്വീകരിച്ച നടപടിയെന്തെന്ന് വ്യക്തമാക്കാമോ?

എൈ. കെ. എം. മുഖേന തദ്ദേശ സ്വയം ഭരണ വകുപ്പുകളില്‍ നടപ്പാക്കുന്ന പൊതുജന സേവനങ്ങള്‍ക്കുള്ള വിവിധ സോഫ്റ്റ്‌വെയറുകളുടെ പ്രവര്‍ത്തനക്ഷമത വിലയിരുത്തിയിട്ടുണ്ടോ;

ഇത് കൂടുതല്‍ ജനസൗഹൃദമാക്കാന്‍ നടപടി സ്വീകരിക്കുമോ?

സംസ്ഥാനത്തെ എല്ലാ തദ്ദേശസ്വയംഭരണ സ്ഥാപനങ്ങള്‍ക്കും പ്രാദേശിക വികസന രൂപരേഖയും ഓരോ ജില്ലയ്ക്കും സംയോജിത ജില്ലാ വികസന രൂപരേഖയും തയ്യാറാക്കുവാന്‍ നടപടി സ്വീകരിച്ചിട്ടുണ്ടോ; വ്യക്തമാക്കാമോ?

തദ്ദേശ സ്വയംഭരണ സ്ഥാപനങ്ങളില്‍ ഉറവിട മാലിന്യ സംസ്കരണം നടപ്പിലാക്കുന്നതിന് എന്തെല്ലാം പദ്ധതികളാണ് ആവിഷ്കരിച്ചിട്ടുള്ളത്;

ഉറവിട മാലിന്യ സംസ്കരണം എന്ന ആശയം ജനങ്ങളിലേക്ക് എത്തിക്കുന്നതിനും ജനപങ്കാളിത്തത്തോടെ ഇത് വ്യാപകമാക്കുന്നതിനും ഊര്‍ജ്ജിത നടപടികള്‍ സ്വീകരിക്കുമോ?

സി. എം. എല്‍. ആര്‍. ആര്‍. പി. പദ്ധതി പ്രകാരം ദേവികുളം മണ്ഡലത്തില്‍ അനുവദിച്ച പദ്ധതികള്‍ ഏതൊക്കെയെന്ന് വിശദമാക്കാമോ;

അനുവദിക്കപ്പെട്ട പദ്ധതികളില്‍ പൂര്‍ത്തീകരിക്കാത്ത പദ്ധതികളുടെ പേരും അനുവദിച്ച തുകയും നിലവിലെ സ്ഥിതിയും പഞ്ചായത്ത് തിരിച്ച് ലഭ്യമാക്കാമോ?

നീര്‍ത്തടാധിഷ്ഠിത ആസൂത്രണം തദ്ദേശസ്വയംഭരണ സ്ഥാപനങ്ങളുടെ നേതൃത്വത്തില്‍ നടപ്പിലാക്കുന്നതിന് നടപടി സ്വീകരിച്ചിട്ടുണ്ടോ; വിശദാംശങ്ങള്‍ ലഭ്യമാക്കാമോ?

തിരുവനന്തപുരം നഗരസഭ പരിധിയില്‍പ്പെട്ട പ്രധാന റോഡുകള്‍ പൊതുമരാമത്ത് റോഡുകളുടെ മാതൃകയില്‍ ബി. എം. ആന്റ് ബി. സി. ടാറിംഗ് നടത്തി ഗതാഗതം സുഗമമാക്കുന്നതിനും റോഡിന്റെ ഗുണനിലവാരം മെച്ചപ്പെടുത്തുന്നതിനുമുളള നടപടികള്‍ ആലോചനയിലുണ്ടോ;

തദ്ദേശസ്വയംഭരണ സ്ഥാപനങ്ങള്‍ പ്രവൃത്തി നിര്‍വ്വഹിക്കുന്ന റോഡുകളുടെ ഗുണനിലവാരം നിലവില്‍ പരിശോധിക്കുന്നുണ്ടോ; ഗുണനിലവാരം കുറഞ്ഞ നിര്‍മ്മാണ പ്രവൃത്തികള്‍ക്ക് ഉത്തരവാദികളായ എത്ര ഉദ്യോഗസ്ഥര്‍ക്കെതിരെ നടപടി സ്വീകരിച്ചു എന്ന് വിശദമാക്കാമോ;

തിരുവനന്തപുരം നഗരസഭ പരിധിയിലുളള പ്രധാന റോഡുകള്‍ പി.ഡബ്ല്യു.ഡി./കെ. ആര്‍. എഫ്. ബിക്ക് സറണ്ടര്‍ ചെയ്ത് മാതൃകാറോഡുകള്‍ ആക്കുന്നതിനുളള നടപടികള്‍ ആലോചനയിലുണ്ടോ;

പ്രസ്തുത നഗരസഭയിലെ പതിനൊന്ന് വാര്‍ഡുകളില്‍ സേവനം നല്‍കി വരുന്ന പാങ്ങപ്പാറ ഇന്റഗ്രേറ്റഡ് ഫാമിലി ഹെല്‍ത്ത് സെന്ററിന്റെ പ്രവര്‍ത്തനങ്ങള്‍ക്ക് നഗരസഭ നല്‍കിവരുന്ന സഹായങ്ങള്‍ വിശദമാക്കാമോ;

തിരുവനന്തപുരം നഗരസഭ സോണല്‍ ഓഫീസുകളുടെ പ്രവര്‍ത്തനം മെച്ചപ്പെടുത്തുന്നതിന് സ്വീകരിച്ചിട്ടുളള നടപടികള്‍ വിശദമാക്കാമോ;

നഗരസഭയുടെ സേവനങ്ങള്‍ ഓണ്‍ലൈന്‍ ആക്കുന്നതിനും നഗരസഭ സേവനങ്ങള്‍ വീട്ടുപടിക്കല്‍ എന്ന ആശയം നടപ്പിലാക്കുന്നതിനും നടപടികള്‍ സ്വീകരിക്കുമോ; വിശദമാക്കാമോ?

കെട്ടിടത്തിന്റെ അടിത്തറ നിർമ്മിക്കാനുള്ള ജോലികൾക്ക് മണ്ണു മാറ്റുന്നതിനും പുരത്തറയിൽ മണ്ണ് നിക്ഷേപിക്കുന്നതിനും കെട്ടിട നിർമ്മാണ പെർമിറ്റ് മതിയാകുമെന്ന് വ്യവസ്ഥ ചെയ്തു ഉത്തരവിറക്കിയിട്ടുണ്ടോ; കേരള പഞ്ചായത്ത് കെട്ടിട നിർമാണ ചട്ടങ്ങളിൽ ഇത് സംബന്ധിച്ച വ്യവസ്ഥ ഏതാണെന്ന് വ്യക്തമാക്കുമോ; പ്രസ്തുത ഉത്തരവിന്റെ പകർപ്പ് ലഭ്യമാക്കുമോ?

തദ്ദേശസ്വയംഭരണ സ്ഥാപനങ്ങൾക്ക് 2021-22 സാമ്പത്തിക വര്‍ഷം ബജറ്റിൽ എത്ര തുക വകയിരുത്തിയിട്ടുണ്ട്; കോർപ്പറേഷൻ, മുനിസിപ്പാലിറ്റി, ജില്ലാ പഞ്ചായത്ത്, ബ്ലോക്ക് പഞ്ചായത്ത്, ഗ്രാമ പഞ്ചായത്ത് എന്നിവയ്ക്കുള്ള വിഹിതം എത്ര വീതമെന്ന് ഇനം തിരിച്ച് ലഭ്യമാകുമോ ;

2021-22 സാമ്പത്തിക വർഷം നാളിതുവരെ തദ്ദേശസ്വയംഭരണ സ്ഥാപനങ്ങൾക്ക് എത്ര തുക വീതം അനുവദിച്ചിട്ടുണ്ട് എന്നും വകയിരുത്തിയതിന്റെ എത്ര ശതമാനമാണ് നൽകിയിട്ടുള്ളതെന്നും തദ്ദേശസ്വയംഭരണ സ്ഥാപനം തിരിച്ച് കണക്കുകൾ ലഭ്യമാക്കുമോ;

പദ്ധതി വിഹിതം യഥാസമയം അനുവദിക്കാത്തത് കാരണം കോവിഡ് സാഹചര്യത്തിൽ ആരോഗ്യമേഖലയിൽ ഉൾപ്പെടെ തദ്ദേശസ്ഥാപനങ്ങൾ വഴിയുള്ള പദ്ധതികൾ ഫലപ്രദമായി നടപ്പിലാക്കുന്നതിന് പ്രതിസന്ധി സൃഷ്ടിച്ചിട്ടുണ്ട് എന്നകാര്യം സർക്കാരിന്റെ ശ്രദ്ധയിൽപ്പെട്ടിട്ടുണ്ടോ; എങ്കിൽ പദ്ധതിവിഹിതം തദ്ദേശസ്ഥാപനങ്ങൾക്ക് അടിയന്തരമായി നൽകുന്നതിന് ആവശ്യമായ നടപടി സ്വീകരിക്കുമോ?

കെട്ടിട നിര്‍മ്മാണവുമായി ബന്ധപ്പെട്ട് മണ്ണ് മാറ്റുന്നതിനായി അനുമതി ലഭിക്കുന്നതിന് നേരിടുന്ന കാലതാമസം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത അനുമതിയ്ക്കായി ജിയോളജി വകുപ്പിലേക്ക് അപേക്ഷ നല്‍കേണ്ടതുണ്ടോ; വിശദ വിവരങ്ങള്‍ ലഭ്യമാക്കാമോ;

മണ്ണെടുത്ത് മാറ്റുന്നതിനുള്ള അനുമതി വേഗത്തില്‍ ലഭ്യമാക്കുന്നതിന് എന്തൊക്കെ നടപടികള്‍ ആണ് സ്വീകരിക്കുന്നത് എന്ന് വ്യക്തമാക്കാമോ?

2019-20, 2020-21 സാമ്പത്തിക വര്‍ഷങ്ങളിലെ ബഡ്ജറ്റില്‍ പ്രഖ്യാപിച്ച കിടങ്ങൂര്‍ പഞ്ചായത്തിലെ കാവാലിപ്പുഴ തൂക്കുപാലത്തിന്റെ പ്രെപ്പോസല്‍ തയ്യാറായിട്ടുണ്ടോ; അറിയിക്കാമോ;

കേരളാ ഇലക്ട്രിക്കള്‍ എഞ്ചിനീയറിംഗ് ലിമിറ്റഡ് തയ്യാറാക്കി തദ്ദേശസ്വയംഭരണ വകുപ്പിന് നല്‍കിയിട്ടുള്ള പ്രെപ്പോസല്‍, ഡി. പി. ആര്‍. എന്നിവയുടെ ഇപ്പോഴത്തെ അവസ്ഥ വ്യക്തമാക്കാമോ; ഇതുസംബന്ധിച്ച് തദ്ദേശസ്വയംഭരണ വകുപ്പിന്റെ ഫയല്‍ നമ്പറും കമ്പ്യൂട്ടര്‍ നമ്പരും ലഭ്യമാക്കാമോ;

പ്രസ്തുത പദ്ധതിക്ക് കേരളാ ഇലക്ട്രിക്കള്‍ എഞ്ചിനീയറിംഗ് ലിമിറ്റഡ് തയ്യാറാക്കിയ എസ്റ്റിമേറ്റിന് ആനുപാതികമായി തദ്ദേശസ്വയംഭരണ വകുപ്പ് എഞ്ചിനീയറിംഗ് വിഭാഗം ഡി. പി. ആര്‍. തയ്യാറാക്കിയിട്ടുണ്ടോ എന്ന് വ്യക്തമാക്കാമോ; ഇല്ലെങ്കില്‍ കാരണം അറിയിക്കാമോ;

ഈ പദ്ധതിയുടെ റഫ് കോസ്റ്റ് എസ്റ്റിമേറ്റിന് ഇതുവരെ സ്വീകരിച്ച നടപടികള്‍ വിശദീകരിക്കാമോ?

തൃശ്ശൂർ ശക്തൻ മാർക്കറ്റ് സമഗ്ര വികസനവുമായി ബന്ധപ്പെട്ട് ആധുനിക രീതിയിലുള്ള സൗകര്യങ്ങൾ ഒരുക്കുന്നതിന് നടപടി സ്വീകരിക്കുമോയെന്ന് വ്യക്തമാക്കാമോ?

മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തി ചങ്ങനാശ്ശേരി മണ്ഡലത്തില്‍ അനുമതി ലഭിച്ചിട്ടുള്ള പ്രവൃത്തികള്‍ ഏതെല്ലാം എന്ന് വ്യക്തമാക്കുമോ;

ഓരോ പ്രവൃത്തിക്കും അനുവദിച്ച തുക എത്രയെന്നും അവയുടെ നിലവിലെ അവസ്ഥ എന്താണെന്നും വിശദമാക്കാമോ; ഉത്തരവുകളുടെ പകര്‍പ്പ് ലഭ്യമാക്കുമോ?

ഇടുക്കി ജില്ലയില്‍ സ്വന്തമായി പൊതുശ്മശാനം ഇല്ലാത്ത എത്ര പ‍ഞ്ചായത്തുകള്‍ ഉണ്ട്; ഈ പഞ്ചായത്തുകളുടെ പേരുകള്‍ ബ്ലോക്ക് പഞ്ചായത്ത് അടിസ്ഥാനത്തില്‍ നല്‍കാമോ;

സ്വന്തമായി സ്ഥലം ഇല്ലാത്തവരും അഗതി മന്ദരിങ്ങളിലെ അന്തേവാസികളും കൊവിഡ് മൂലം മരണപ്പെട്ടാല്‍ മൃതശരീരം സംസ്കരിക്കുന്നതുമായി ബന്ധപ്പെട്ട് ഏറെ ബുദ്ധിമുട്ടുകള്‍ ഉണ്ടാവുന്നത് ശ്രദ്ധയില്‍പ്പെട്ടിട്ടുണ്ടോ;

ഈ ബുദ്ധിമുട്ടുകള്‍ ശാശ്വതമായി പരിഹരിക്കുന്നതിന് എല്ലാ പ‍ഞ്ചായത്തുകളിലും പൊതുശ്മശാനം ഉറപ്പ് വരുത്തുന്നതിനാവശ്യമായ നടപടി സ്വീകരിക്കുമോ?

എം.എല്‍.എ. (എസ്.ഡി.എഫ്.) പ്രവൃത്തികളുടെ നിര്‍വ്വഹണത്തില്‍ നേരിടുന്ന കാലതാമസം ശ്രദ്ധയില്‍പ്പെട്ടിട്ടുണ്ടോ;

മരാമത്ത് പ്രവൃത്തികള്‍ നിര്‍വ്വഹണം നടത്തുന്നതിന് നിലവിലെ സര്‍ക്കാര്‍ ഉത്തരവ് പ്രകാരം ഉള്ള നടപടിക്രമങ്ങള്‍ എം.എല്‍.എ. (എസ്.ഡി.എഫ്.) പ്രവൃത്തികളുടെ നിര്‍വഹണത്തില്‍ പാലിക്കുന്നുണ്ടോ എന്ന് വ്യക്തമാക്കാമോ;

എം.എല്‍.എ. (എസ്.ഡി.എഫ്.) മരാമത്ത് പ്രവൃത്തികളുടെ ഫയല്‍ കൈമാറ്റം വേഗത്തില്‍ ആക്കുന്നതിന് എന്തെങ്കിലും നടപടികള്‍ സ്വീകരിക്കാന്‍ ഉദ്ദേശിക്കുന്നുണ്ടോ എന്ന് വ്യക്തമാക്കാമോ;

ഭരണാനുമതിക്കായി സമര്‍പ്പിച്ച എസ്റ്റിമേറ്റുകള്‍, റേറ്റ് പുതുക്കല്‍ നിലവില്‍ വരുമ്പോള്‍ വീണ്ടും ഭരണാനുമതിക്കായി വിവിധ തലങ്ങളിലൂടെ കൈമാറ്റം ചെയ്യുന്നത് വഴിയുള്ള കാലതാമസം ഒഴിവാക്കുന്നതിനു സ്വീകരിക്കുന്ന നടപടിക്രമങ്ങള്‍ അറിയിക്കാമോ?

ലെെഫ് ഭവന പദ്ധതിക്ക് കീഴില്‍ നിലമ്പൂര്‍ നിയോജകമണ്ഡലത്തിലെ വിവിധ തദ്ദേശ സ്ഥാപനങ്ങളില്‍ എത്ര പട്ടിക വര്‍ഗ്ഗ കുടുംബങ്ങള്‍ക്കാണ് വീടുകള്‍ അനുവദിച്ചതെന്ന് പഞ്ചായത്ത് തിരിച്ച് വിവരം ലഭ്യമാക്കാമോ;

നിലമ്പൂര്‍ നിയോജകമണ്ഡലത്തിലെ ഉള്‍വനങ്ങളിലെ ആദിവാസി കോളനികളില്‍ എണ്‍പത് ശതമാനം പേര്‍ക്കും വാസയോഗ്യമായ വീട് ഇല്ല എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

ആദിവാസി വിഭാഗത്തിന് ലെെഫ് ഭവന പദ്ധതിയില്‍ പ്രത്യേക പരിഗണനയും കൂടുതല്‍ വീടുകളും അനുവദിക്കുന്നതിന് നടപടി സ്വീകരിക്കുമോ;

ഇതിനായി പ്രത്യേക ഉത്തരവ് പുറപ്പെടുവിക്കുമോ എന്നറിയിക്കാമോ?

ഡി.എസ്.ആര്‍. 2018 നിരക്ക് വര്‍ദ്ധന നിലവില്‍ വന്ന സാഹചര്യത്തില്‍ തദ്ദേശ സ്വയം ഭരണ വകുപ്പിലെ എന്‍ഞ്ചിനീയറിംഗ് വിഭാഗം ഉപയോഗിക്കുന്ന പ്രൈസ് സോഫ്റ്റ്വെയറില്‍ മാറ്റം വരുത്തുന്നതിനുള്ള നടപടിക്രമങ്ങള്‍ ഏതുഘട്ടത്തിലാണെന്ന് അറിയിക്കാമോ; പ്രസ്തുത നിരക്ക് എപ്പോള്‍ പ്രാബല്യത്തില്‍ വരും എന്നറിയിക്കാമോ;

ടെണ്ടര്‍ ഇല്ലാതെ നേരിട്ട് അക്രെഡിറ്റെഡ് ഏജന്‍സികളെ ഏല്‍പ്പിക്കുന്ന പ്രവൃത്തികളില്‍ ഡി.എസ്.ആര്‍. 2016 നിരക്കിനേക്കാള്‍ പത്ത് ശതമാനം വരെ കുറച്ചുള്ള നിരക്കാണ് നിലവിലുള്ളതെന്നത് ശ്രദ്ധയില്‍പ്പെട്ടിട്ടുണ്ടോ;

മികച്ച അക്രെഡിറ്റെഡ് ഏജന്‍സികള്‍ക്ക് ഈ നിരക്കില്‍ പ്രവൃത്തി ഏറ്റെടുക്കാന്‍ പറ്റാത്ത സാഹചര്യം ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ എന്തൊക്കെ നടപടികളാണ് സ്വീകരിക്കാന്‍ ഉദ്ദേശിക്കുന്നത് എന്ന് വ്യക്തമാക്കാമോ?

07.05.2013-ലെ 11013/2013/R4 കേന്ദ്ര സര്‍ക്കാര്‍ കത്ത് പ്രകാരം ഇന്ദിര ആവാസ് യോജന വീടുകളുടെ കാര്യത്തില്‍ ന്യൂനപക്ഷങ്ങളുടെ വിഹിതം എത്രയായിരുന്നുവെന്ന് വ്യക്തമാക്കാമോ;

ഈ മാനദണ്ഡം മാറ്റണമെന്ന് ആവശ്യപ്പെട്ട് കേരള സര്‍ക്കാര്‍ കേന്ദ്രത്തിന് കത്തെഴുതിയിരുന്നുവോ;

പദ്ധതി നടത്തിപ്പ് നിര്‍ത്തിവെക്കാന്‍ നിര്‍ദ്ദേശിച്ചിരുന്നുവോ; എങ്കില്‍ കാരണം വിശദമാക്കാമോ?

2021 -22 ബജറ്റിൽ 20 ശതമാനം തുക വകയിരുത്തിയിട്ടുള്ള മങ്കട സി എച്ച് സി തയ്യാറാക്കിയ മാസ്റ്റർ പ്ലാൻ പ്രകാരമുള്ള പദ്ധതി നടപ്പാക്കൽ എന്ന പ്രവൃത്തിയുടെ എസ്റ്റിമേറ്റ് തദ്ദേശസ്വയംഭരണ എൻജിനീയറിങ് വിംഗ് തയ്യാറാക്കിയിട്ടുണ്ടോ; ഉണ്ടെങ്കിൽ വിശദാംശം ലഭ്യമാക്കുമോ; ഇല്ലെങ്കിൽ പ്രസ്തുത പദ്ധതിയുടെ ഭരണാനുമതി ലഭ്യമാക്കുന്നതിന് വിശദമായ എസ്റ്റിമേറ്റ് തയ്യാറാക്കി അടിയന്തരമായി സമർപ്പിക്കുന്നതിന് നടപടി സ്വീകരിക്കുമോ;

പ്രസ്തുത പ്രവൃത്തി സമയബന്ധിതമായി പൂർത്തീകരിക്കുന്നതിന് ആവശ്യമായ നിർദ്ദേശം നൽകുമോ?

ലെെഫ് ഭവന പദ്ധതിയുടെ രണ്ടാം ഘട്ട പ്രവര്‍ത്തനം ഇപ്പോള്‍ ഏത് ഘട്ടത്തിലാണെന്ന് വ്യക്തമാക്കാമോ; ഗുണഭോക്തൃ മാനദണ്ഡങ്ങള്‍ക്ക് രൂപം നല്‍കിയിട്ടുണ്ടോ; അപേക്ഷകളുടെ സൂക്ഷ്മ പരിശോധന, അന്തിമപട്ടിക എന്നിവയുടെ വിശദാംശങ്ങള്‍ വ്യക്തമാക്കാമോ;

ലെെഫ് ഭവന പദ്ധതിയുടെ രണ്ടാം ഘട്ടം പൂര്‍ത്തിയാവുന്നതിലൂടെ സംസ്ഥാനത്തെ എല്ലാ ഭൂരഹിതര്‍ക്കും ഭവന രഹിതര്‍ക്കും മാന്യമായ പാര്‍പ്പിടം എന്ന ലക്ഷ്യം എത്രത്തോളം പ്രാവര്‍ത്തികമാക്കാന്‍ കഴിയുമെന്ന് വ്യക്തമാക്കാമോ?

എം.എല്‍.എ. ഫണ്ട് അനുവദിച്ച പ്രവ‍ൃത്തികള്‍ ആരംഭിച്ച ശേഷം നിര്‍മ്മാണ വേളയില്‍ ഉണ്ടാകുന്ന എസ്റ്റിമേറ്റ് ഭേദഗതികള്‍ക്ക് എം.എല്‍.എ. മാരുടെ അനുമതി കത്ത് ആവശ്യമാണോയെന്ന് വിശദമാക്കാമോ; ഇത് സംബന്ധിച്ച ഉത്തരവുകള്‍/സര്‍ക്കുലറുകള്‍ നിലവിലുണ്ടെങ്കില്‍ വ്യക്തമാക്കാമോ;

തികച്ചും സാങ്കേതികപരമായ കാര്യങ്ങള്‍ക്ക് എഞ്ചിനീയര്‍മാരുടെ അനുമതി മാത്രം മതിയെന്നിരിക്കെ പ്രവൃത്തികളിലെ ചെറുതും വലുതുമായ ഭേദഗതികള്‍ക്ക് എല്‍.എസ്.ജി.ഡി. എഞ്ചിനീയറിംഗ് വിഭാഗം എം.എല്‍.എ.മാരുടെ കത്ത് ആവശ്യപ്പെട്ട് പ്രവൃത്തികള്‍ പൂര്‍ത്തീകരിക്കുന്നതിന് കാലതാമസം വരുത്തുന്നതും പൂര്‍ത്തീകരിച്ച പ്രവൃത്തികളില്‍ കരാറുകാര്‍ക്ക് ബില്‍ മാറി നല്‍കുന്നത് താമസിപ്പിക്കുന്നതും വകുപ്പിന്റെ ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

പ്രവൃത്തികളുടെ സ്വഭാവത്തില്‍ തന്നെ വലിയ വ്യത്യാസങ്ങള്‍ വരുത്തുകയാണെങ്കില്‍ മാത്രം കത്ത് മുഖേന എം.എല്‍.എ.യെ അറിയിക്കുവാനുള്ള നടപടി സ്വീകരിക്കുമോ; നടപടിക്രമം സംബന്ധിച്ച് വകുപ്പ് വ്യക്തത വരുത്തുമോ; വിശദമാക്കാമോ?

തദ്ദേശ സ്വയം ഭരണ സ്ഥാപനങ്ങളില്‍ സര്‍ക്കാര്‍ നിശ്ചയിച്ച സ്റ്റാഫ് പാറ്റേണ്‍ അനുസരിച്ചുള്ള ജീവനക്കാരെ നിയമിച്ചിട്ടില്ലെന്നുള്ള വിവരം ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

ഇവരുടെ എണ്ണത്തിലുള്ള കുറവ് മൂലം പദ്ധതി നിര്‍വ്വഹണത്തില്‍ കാലതാമസം വരുന്നതായി ശ്രദ്ധയില്‍പ്പെട്ടിട്ടുണ്ടോ; ഇത് പരിഹരിക്കുന്നതിനുള്ള നടപടികള്‍ എന്തൊക്കെയാണെന്ന് വിശദമാക്കാമോ?

ജനകീയ ആസൂത്രണത്തിലൂടെ രാജ്യത്തിനാകെ മാതൃകയായ കേരള മോഡല്‍ ത്രിതല പഞ്ചായത്ത് സംവിധാനം കൂടുതല്‍ കാര്യക്ഷമതയോടെ നടപ്പാക്കുന്നതിന് ഇനിയും എന്തൊക്കെ നടപടികളാണ് സ്വീകരിക്കാനുദ്ദേശിക്കുന്നതെന്ന് വ്യക്തമാക്കുമോ;

ഗ്രാമ പഞ്ചായത്തുകള്‍ക്ക് കൂടുതല്‍ ഭൗതിക സാഹചര്യങ്ങള്‍ നല്‍കുന്നതിനുള്ള നടപടികള്‍ ഉണ്ടാകുമോ; എങ്കില്‍ വിശദാംശം ലഭ്യമാക്കുമോ?

മുനിസിപ്പല്‍ കോമണ്‍ സര്‍വ്വീസ്, പ‍ഞ്ചായത്ത് എന്നീ വകുപ്പുകള്‍ക്കായി യഥാക്രമം 1972, 1994 വര്‍ഷങ്ങളില്‍ പുറപ്പെടുവിച്ച സ്പെഷ്യല്‍ റൂളുകള്‍ ഇനിയും പരിഷ്ക്കരിച്ചിട്ടില്ല എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത വകുപ്പുകളിലെ ജെ. എച്ച്. എൈ. തസ്തികയുടെ യോഗ്യതയായിപ്പറയുന്ന കോഴ്സുകള്‍ ഒന്നും നിലവില്‍ സംസ്ഥാന സര്‍ക്കാര്‍ നടത്തുന്നില്ലെന്നതും ആരോഗ്യ വകുപ്പ് പതിനാറ് വര്‍ഷമായി നടത്തുന്ന ‘ഡിപ്ലോമ ഇന്‍ ഹെല്‍ത്ത് ഇന്‍സ്പെക്ടര്‍’ കോഴ്സ് ഇതിനായുളള യോഗ്യതയായി ഉള്‍പ്പെട്ടിട്ടില്ലെന്നതും ശ്രദ്ധയില്‍പ്പെട്ടിട്ടുണ്ടോ;

മികച്ച യോഗ്യതയുളളവര്‍ ഇത്തരം പ്രധാന തസ്തികകളില്‍ നിന്നും ഒഴിവാക്കപ്പെടുന്നത് തടയുന്നതിനായി തദ്ദേശ സ്വയംഭരണ സ്ഥാപനങ്ങള്‍ക്കായുളള ഏകീകൃത സ്പെഷ്യല്‍ റൂള്‍ അടിയന്തരമായി വിജ്ഞാപനം ചെയ്യുന്നതിനുളള നടപടി സ്വീകരിക്കുമോ;

മുനിസിപ്പല്‍ കോമണ്‍ സര്‍വീസ്, പഞ്ചായത്ത് എന്നീ വകുപ്പുകളിലെ ജെ. എച്ച്. എൈ. തസ്തികയുടെ നിയമനത്തിനുളള യോഗ്യതയായി ആരോഗ്യ വകുപ്പിന്റെ ‘ഡിപ്ലോമ ഇന്‍ ഹെല്‍ത്ത് ഇന്‍സ്പെക്ടര്‍’ കോഴ്സും പരിഗണിക്കുന്നതിനായുളള തീരുമാനം സര്‍ക്കാര്‍ തലത്തില്‍ ഉണ്ടായിട്ടുണ്ടോ; അറിയിക്കുമോ?

പുതിയ അക്ഷയ കേന്ദ്രങ്ങള്‍ അനുവദിക്കുന്നതിനുള്ള മാനദണ്ഡങ്ങള്‍ എന്തെല്ലാമാണ്;

ഒറ്റപ്പാലം അസംബ്ലി മണ്ഡലത്തില്‍ ഒരു പുതിയ അക്ഷയ കേന്ദ്രം അനുവദിക്കണം എന്ന് ആവശ്യപ്പെട്ടുകൊണ്ടുള്ള പ‍ഞ്ചായത്ത് ഭരണസമിതിയുടെ നിവേദനം (എം.എല്‍.എ.യുടെ കത്ത് ഉള്‍പ്പെടെ നല്‍കിയത്) ശ്രദ്ധയില്‍പ്പെട്ടിട്ടുണ്ടോ;

ഉണ്ടെങ്കില്‍ അതിന്മേല്‍ ഇതുവരെ സ്വീകരിച്ച നടപടികള്‍ വ്യക്തമാക്കുമോ?

പേരാമ്പ്ര, മേലടി, പന്തലാനി ബ്ലോക്കുകളിലെ പഞ്ചായത്തുകളില്‍ ഗ്രേഡ് I , ഗ്രേഡ് II, ഗ്രേഡ് III ഓവര്‍സിയറുമാരുടെയും എ. ഇ., എ. എക്സ്. ഇ. മാരുടെയും ഒഴിവുകള്‍ എത്രയുണ്ടെന്ന് പഞ്ചായത്ത് തിരിച്ച് വ്യക്തമാക്കാമോ;

പ്രസ്തുത ഒഴിവുകള്‍ നികത്താത്തത് കാരണം പദ്ധതി പ്രവര്‍ത്തനങ്ങള്‍ തടസ്സപ്പെടുന്നത് ശ്രദ്ധയില്‍പ്പെട്ടിട്ടുണ്ടോ;

ഈ ഒഴിവുകള്‍ നികത്തുന്നതിന് അടിയന്തരമാ‍യി നടപടി സ്വീകരിക്കുമോ എന്ന് അറിയിക്കുമോ?

നഗരസഭകള്‍ക്ക് സ്വന്തമായുളള മാതൃശിശു സംരക്ഷണ കേന്ദ്രങ്ങളുടെ നവീകരണത്തിനായി കഴിഞ്ഞ 5 വര്‍ഷത്തിനിടയില്‍ നടപ്പാക്കിയ പദ്ധതികളുടെ വിശദാംശങ്ങള്‍ അറിയിക്കുമോ;

നഗരസഭകളിലെ മാതൃശിശു സംരക്ഷണ കേന്ദ്രങ്ങളില്‍ ഏതൊക്കെ കേന്ദ്രങ്ങളെയാണ് അര്‍ബന്‍ ഹെല്‍ത്ത് സെന്ററായി ഉയര്‍ത്തിയിട്ടുളളത് എന്ന് അറിയിക്കുമോ;

നഗരസഭകളിലെ മാതൃശിശു സംരക്ഷണ കേന്ദ്രങ്ങളില്‍ ജോലി നിര്‍വഹിയ്ക്കേണ്ട ജൂനിയര്‍ പബ്ലിക് ഹെല്‍ത്ത് നഴ്സുമാരെ നഗരസഭകളുടെ മറ്റ് ജോലികള്‍ക്ക് നിയോഗിക്കുന്നത് ശ്രദ്ധയില്‍പ്പെട്ടിട്ടുണ്ടോ;

പകര്‍ച്ചവ്യാധികള്‍ പടര്‍ന്നുപിടിക്കുന്ന സാഹചര്യത്തില്‍ ജൂനിയര്‍ പബ്ലിക് ഹെല്‍ത്ത് നഴ്സുമാരെ മാതൃശിശു സംരക്ഷണ കേന്ദ്രത്തില്‍ തന്നെ ജോലി ചെയ്യുന്നതിന് നടപടി സ്വീകരിക്കുമോ?

വയനാട് ജില്ലയിലെ തദ്ദേശസ്വയംഭരണ സ്ഥാപനങ്ങളില്‍ 2011-16 കാലഘട്ടത്തില്‍ നിയമിച്ച ഉദ്യോഗസ്ഥരുടെ എണ്ണം വ്യക്തമാക്കാമോ;

2016 ജൂണ്‍ 1 മുതല്‍2021 ആഗസ്റ്റ് 31 വരെ വയനാട് ജില്ലയിലെ തദ്ദേശസ്വയംഭരണ സ്ഥാപനങ്ങളില്‍ വിവിധ തസ്തികകളില്‍ നിയമിച്ച ഉദ്യോഗസ്ഥരുടെ എണ്ണം വ്യക്തമാക്കാമോ?

പാലക്കാട് ജില്ലയില്‍ റീബില്‍ഡ് കേരള പദ്ധതിയില്‍ ഉള്‍പ്പെടുത്തി ഏതെല്ലാം തദ്ദേശ റോഡുകള്‍ ആണ് നവീകരിക്കുന്നതെന്ന് അറിയിക്കാമോ; ഓരോ റോഡിനും എത്ര തുക വീതമാണ് അനുവദിച്ചിട്ടുളളത് എന്ന് അറിയിക്കാമോ?

CAPART, PAD(Kerala) എന്നീ ഓഫീസുകള്‍ നിര്‍ത്തലാക്കിക്കൊണ്ടുളള സംസ്ഥാന സര്‍ക്കാരിന്റെ ഉത്തരവിന്റെ പകര്‍പ്പുകള്‍ ലഭ്യമാക്കാമോ;

PAD(Kerala) കേരള വഴി കൊല്ലം ജില്ലയില്‍ കരുനാഗപ്പളളി താലൂക്കില്‍ പാവുമ്പ പി.ഒ.യില്‍ ഗ്രാമവികസന പൗരസമിതി രജിസ്റ്റര്‍ നമ്പര്‍ ക്യൂ 171/191 എന്ന സര്‍ക്കാര്‍ സംഘടനയ്ക്ക് 1996-2020 വരെ എത്ര പ്രോജക്ടുകള്‍ക്കാണ് ധനസഹായം ചെയ്തിട്ടുളളതെന്ന് വ്യക്തമാക്കാമോ; അത്തരത്തില്‍ ധനസഹായം അനുവദിച്ചിട്ടുണ്ടെങ്കില്‍ ആയത് അനുവദിച്ചു കൊണ്ടുളള ഉത്തരവിന്റെ പകര്‍പ്പും പ്രോജക്ടുകളുടെ വിശദ വിവരങ്ങളുടെ പകര്‍പ്പും ലഭ്യമാക്കാമോ;

PAD(Kerala) വഴി എത്ര പ്രോജക്ടുകളാണ് നടപ്പിലാക്കിയിട്ടുളളതെന്ന് വ്യക്തമാക്കാമോ; നടപ്പിലാക്കിയ പ്രോജക്ടുകള്‍ ഉണ്ടെങ്കില്‍ ആയത് നടപ്പിലാക്കിയ വര്‍ഷം, മാസം, തീയതി എന്നിവ വ്യക്തമാക്കാമോ;

മേല്‍പ്പറഞ്ഞ സര്‍ക്കാരിതര സംഘടനയ്ക്ക് പ്രോജക്ട് നം.0414/0015/97-98 RSP/SSZ/dtd 15/05/1998 എന്ന സ്കീമിന് എത്ര തുക അനുവദിച്ചിട്ടുണ്ടെന്ന് വ്യക്തമാക്കാമോ; ടി സ്കീമിന്റെ ഗുണഭോക്താക്കളുടെ എണ്ണം വ്യക്തമാക്കാമോ; മേല്‍പ്പറഞ്ഞ സംഘടനയുടെ പേരില്‍ തുകകള്‍ കൈപ്പറ്റിയ ആളുകളുടെ വിവരങ്ങള്‍ വിശദമാക്കാമോ?

സി.എം.എല്‍.ആർ.ആർ.പി.യില്‍ ഉള്‍പ്പെടുത്തി ഗുരുവായൂര്‍ നിയോജക മണ്ഡലത്തില്‍ ഭരണാനുമതി ലഭിച്ച റോഡുകളുടെ വിശദാംശങ്ങള്‍ വ്യക്തമാക്കാമോ;

പ്രസ്തുത പദ്ധതിയില്‍ ഉള്‍പ്പെടുത്തി ഗുരുവായൂര്‍ മണ്ഡലത്തില്‍ എത്ര റോഡുകളുടെ നിര്‍മ്മാണം പൂര്‍ത്തീകരിച്ചിട്ടുണ്ടെന്ന് വ്യക്തമാക്കാമോ;

ഇനിയും നിര്‍മ്മാണം പൂര്‍ത്തീകരിയ്ക്കാത്ത പ്രവൃത്തികളും നിര്‍മ്മാണം പൂര്‍ത്തീകരിയ്ക്കുന്നതിന് ഓരോ പ്രവൃത്തിയിലും സ്വീകരിച്ച നടപടികളും വ്യക്തമാക്കാമോ?

കേരളത്തില്‍ വ്യവസായ വികസന കാഴ്ചപ്പാടോടുകൂടി നിരവധി സ്റ്റാര്‍ട്ട് അപ്പുകള്‍ വിവിധങ്ങളായ ഏജന്‍സികള്‍ മുഖേന തുടങ്ങുന്നതിന് പദ്ധതികള്‍ ആവിഷ്കരിച്ചത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ടൗണ്‍ പ്ലാന്‍ പദ്ധതിക്കുവേണ്ടി അനുവദിക്കപ്പെട്ട സ്ഥലത്ത് പ്രൊജക്റ്റുകള്‍ ആരംഭിക്കാന്‍ സംരംഭകര്‍ തയ്യാറാകുമ്പോള്‍ നിശ്ചിത ദിവസങ്ങള്‍ക്കകം നിയമാനുസൃതമായ അനുമതി ലഭിക്കുന്നതിന് നടപടികള്‍ സ്വീകരിക്കുമോ;

നിയമാനുസൃതമായ അനുമതി ലഭിക്കുന്നതിന് തടസ്സം നില്‍ക്കുന്ന ഉദ്യാേഗസ്ഥര്‍ക്കെതിരെ നടപടി സ്വീകരിക്കുമോ?

നഗരാസൂത്രണത്തിന്റെ ഭാഗമായി പട്ടണങ്ങളുടെ മാസ്റ്റര്‍ പ്ലാന്‍ തയ്യാറാക്കിവരുന്നുണ്ടോ;

നീലേശ്വരം നഗരസഭയുടെ ബഹുമുഖമായ വികസനം മുന്‍നിര്‍ത്തി നഗരാസൂത്രണം നടത്തിയിട്ടുണ്ടോ;

ഇവിടെ എന്തൊക്കെ പദ്ധതികളാണ് ആവിഷ്ക്കരിക്കുന്നതെന്നും വ്യക്തമാക്കാമോ?

കോഴിക്കോട് വികസന അതോറിറ്റി കോഴിക്കോട് കോര്‍പ്പറേഷനില്‍ ലയിപ്പിച്ചതിന്റെ ഭാഗമായി വികസന അതോറിറ്റിയില്‍ നിലവിലുള്ള തസ്തികകള്‍ കോര്‍പ്പറേഷനു കൈമാറുന്നതിനു നടപടി സ്വീകരിക്കുമോ;

കോഴിക്കോട് കോര്‍പ്പറേഷനില്‍ ആരോഗ്യ വിഭാഗത്തില്‍ ജീവനക്കാരുടെ മുകള്‍ തട്ടിലുള്ള തസ്തികകളുടെ കുറവ് ശ്രദ്ധയില്‍പ്പെട്ടിട്ടുണ്ടോ;

ഉണ്ടെങ്കില്‍ ആയത് പരിഹരിക്കുന്നതിന് നടപടി സ്വീകരിക്കുമോ?

മാവേലിക്കര തഴക്കരയില്‍ എക്സൈസ് കോംപ്ലക്സ് നിര്‍മ്മിക്കുന്നതിന് സ്വീകരിച്ച നടപടികള്‍ വിശദമാക്കുമോ; നിര്‍മ്മാണം അടിയന്തരമായി ആരംഭിക്കുന്നതിനുള്ള നടപടികള്‍ സ്വീകരിക്കുമോ; വ്യക്തമാക്കാമോ?

കോഴിക്കോട് നഗരത്തില്‍ എക്സൈസ് ടവര്‍ നിര്‍മ്മിക്കന്നതിന് പദ്ധതിയുണ്ടോ;

എക്സൈസ് ടവര്‍ നിര്‍മ്മാണത്തിന് റവന്യൂവകുപ്പിന്റെ ഭൂമി കണ്ടെത്തിയിട്ടുണ്ടോ;

ഉണ്ടെങ്കില്‍ നിലവിലെ സ്ഥിതി വിശദമാക്കാമോ?

പുതുക്കാട് താലൂക്ക് ആശുപത്രിയില്‍ വിമുക്തി പദ്ധതിയുടെ ഭാഗമായി ഒരു "ഡീ അഡിക്ഷന്‍ സെന്റര്‍" അനുവദിക്കുന്നതിന് നടപടി സ്വീകരിക്കുമോ;

പുതുക്കാട് മണ്ഡലത്തിലെ പറപ്പൂക്കര പഞ്ചായത്തിലെ നന്തിക്കര ഗവണ്മെന്റ് വൊക്കേഷണല്‍ ഹയര്‍ സെക്കന്ററി സ്കൂളില്‍ (ജി.വി.എച്.എസ്.എസ്.ല്‍) എക്സൈസ് വകുപ്പിന്റെ "ഉണര്‍വ്വ്" പദ്ധതി നടപ്പാക്കുന്നതിനായി സമര്‍പ്പിച്ചിട്ടുള്ള അപേക്ഷയിന്മേല്‍ നടപടി സ്വീകരിച്ചിട്ടുണ്ടോ; ഉണ്ടെങ്കില്‍ പ്രസ്തുത പദ്ധതിയുടെ ഭാഗമായി എന്തെല്ലാം വികസന പ്രവര്‍ത്തനങ്ങളാണ് നടപ്പാക്കുക എന്ന് അറിയിക്കാമോ?

ലഹരി വിമുക്ത കേരളം എന്ന ലക്ഷ്യം സാക്ഷാത്കരിക്കുന്നതിനായി എക്സൈസ് വകുപ്പിനു കീഴില്‍ വിമുക്തി മിഷന്റെ ഭാഗമായി ചാലക്കുടി താലൂക്ക് ഹെഡ്ക്വാര്‍ട്ടേഴ്സ് ആശുപത്രിയിലെ ഡി-അഡിക്ഷന്‍ സെന്ററിന് പുതിയ കെട്ടിടം നിര്‍മ്മിക്കുന്നത് പരിഗണനയിലുണ്ടോ;

ഇതിനായി എസ്റ്റിമേറ്റ് തയ്യാറാക്കിയിട്ടുണ്ടോ ;ഉണ്ടെങ്കില്‍ നടപടികള്‍ ഏതു ഘട്ടത്തിലാണെന്ന് വിശദീകരിക്കുമോ?

കെ.എസ്‌.ആർ.ടി.സി.യുടെ ഡിപ്പോകളിലെ കെട്ടിടങ്ങളിൽ ബിവറേജസ് കോർപ്പറേഷന്റെ മദ്യശാലകൾ തുടങ്ങാൻ തീരുമാനിച്ചിട്ടുണ്ടോ;

സംസ്ഥാനത്തെ മദ്യ ഷോപ്പുകളിലെ അസൗകര്യങ്ങളെ ഹൈക്കോടതി വിമർശിച്ചതിനെ തുടർന്നാണോ ഔട്ട്‌ലെറ്റുകൾ കെ.എസ്‌.ആർ.ടി.സി.യുടെ ഡിപ്പോകളിൽ മാറ്റി സ്ഥാപിക്കാൻ സർക്കാർ തീരുമാനമെടുത്തതെന്ന് അറിയിക്കുമോ;

കെ.എസ്‌.ആർ.ടി.സി. യുടെ ഡിപ്പോകളിൽ ബിവറേജസ് കോർപ്പറേഷന്റെ മദ്യശാലകൾ ആരംഭിച്ചാൽ കെ.എസ്‌.ആർ.ടി.സി. ബസുകളിൽ യാത്ര ചെയ്യുന്ന സ്ത്രീകളുടെയും കുട്ടികളുടെയും സുരക്ഷയെ ബാധിക്കുമോ എന്ന് വ്യക്തമാക്കാമോ;

സ്ത്രീകളുടെയും കുട്ടികളുടെയും സുരക്ഷ മുൻനിർത്തി ഈ കാര്യത്തിൽ എന്തെങ്കിലും പഠനം സർക്കാർ നടത്തിയിട്ടുണ്ടോ എന്ന് വ്യക്തമാക്കാമോ?

കഴിഞ്ഞ സര്‍ക്കാര്‍ അധികാരത്തില്‍ വരുമ്പോള്‍ സംസ്ഥാനത്ത് എത്ര ബാറുകളാണ് ഉണ്ടായിരുന്നത് എന്നതിന്റെ കണക്ക് ലഭ്യമാക്കുമോ;

സര്‍ക്കാര്‍ അധികാരത്തില്‍ വന്ന ശേഷം അഞ്ച് വര്‍ഷത്തിനകം എത്ര ബാറുകള്‍ക്കാണ് അനുമതി നല്‍കിയത്; വിശദ വിവരം നല്‍കുമോ;

നിലവില്‍ സംസ്ഥാനത്ത് എത്ര ബാറുകള്‍ പ്രവര്‍ത്തിക്കുന്നുണ്ട് എന്നതിന്റെ ജില്ല തിരിച്ചുള്ള കണക്ക് ലഭ്യമാക്കുമോ?

കഴിഞ്ഞ യു.ഡി.എഫ്. സര്‍ക്കാരിന്റെയും എല്‍.ഡി.എഫ്. സര്‍ക്കാരിന്റെയും കാലത്തെ മദ്യ ഉപയോഗം സംബന്ധിച്ച് കണക്കുകള്‍ പരിശോധിച്ചിട്ടുണ്ടോ;

ഏതു കാലഘട്ടത്തിലാണ് മദ്യ ഉപയോഗം കൂടുതല്‍ ഉളളത് എന്ന് വ്യക്തമാക്കാമോ;

ബാറുകള്‍ പൂട്ടിയതുകൊണ്ട് മദ്യ ഉപയോഗം കുറഞ്ഞിട്ടുളളതായി ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ?

എറണാകുളം കാക്കനാട്ടെ അപ്പാർട്ട്മെന്റിൽ നിന്നും ഗുരുതര ആരോഗ്യ പ്രശ്നങ്ങൾ ഉണ്ടാക്കുന്ന രാസ ലഹരിപദാർത്ഥങ്ങൾ പിടിച്ചെടുത്ത സംഭവത്തിൽ ചില പ്രതികളെ ഒഴിവാക്കിയിരുന്നോ; എങ്കില്‍ കാരണം വ്യക്തമാക്കുമോ;

പ്രസ്തുത ഫ്ലാറ്റിൽ നിന്നും രണ്ടുതവണയായി ലഹരിപദാർത്ഥങ്ങൾ പിടിച്ചെടുത്ത സംഭവം ഒറ്റ കേസ് ആക്കണമെന്ന നിർദേശം അവഗണിച്ചതായി കണ്ടെത്തിയിട്ടുണ്ടോ;

എങ്കിൽ കുറ്റക്കാരായവർക്കെതിരെ എന്തു നടപടി സ്വീകരിച്ചു; വ്യക്തമാക്കാമോ?

കേരളത്തില്‍ കഞ്ചാവ്-മയക്കുമരുന്ന് കച്ചവടം വര്‍ദ്ധിച്ചു വരികയാണെന്ന കാര്യം ശ്രദ്ധയില്‍പെട്ടിട്ടുണ്ടോ;വ്യക്തമാക്കാമോ;

വിദ്യാഭ്യാസ സ്ഥാപനങ്ങള്‍ തുറക്കാന്‍ പോകുന്ന പശ്ചാത്തലത്തില്‍ വിദ്യാഭ്യാസ സ്ഥാപനങ്ങളുടെ സമീപ പ്രദേശങ്ങളില്‍ നടക്കു കഞ്ചാവ്-മയക്കുമരുന്ന് വില്പനകളുടെ പരിശോധന കാര്യക്ഷമമാക്കാന്‍ നടപടി സ്വീകരിക്കുമോ?

കാലപ്പഴക്കത്താലും അസൗകര്യങ്ങളാലും വീര്‍പ്പുമുട്ടുന്ന കുട്ടനാട് റേഞ്ച് എക്സൈസ് ഓഫീസ് നവീകരണം സംബന്ധിച്ച വിശദാംശം ലഭ്യമാക്കുമോ;

ഈ ഓഫീസിന്റെ പുനരുദ്ധാരണം അടിയന്തരമായി പൂർത്തീകരിക്കുന്നതിന് എന്തെല്ലാം നടപടികള്‍ സ്വീകരിക്കുമെന്ന് വ്യക്തമാക്കുമോ;

പുതുതായി നിര്‍മ്മിക്കുന്ന ഓഫീസില്‍ എന്തെല്ലാം സൗകര്യങ്ങള്‍ ആണ് നല്‍കുന്നത് എന്ന് വ്യക്തമാക്കുമോ?

കോവിഡ് സാഹചര്യത്തില്‍ സംസ്ഥാനത്തേക്ക് കഞ്ചാവ് ഉള്‍പ്പെടെയുള്ള ലഹരി വസ്തുക്കള്‍ മറ്റു സംസ്ഥാനങ്ങളിൽ നിന്നും കടത്തിക്കൊണ്ടുവരുന്നത് തടയുന്നതിന് എന്തെല്ലാം നടപടികളാണ് എക്സൈസ് വകുപ്പ് സ്വീകരിച്ചു വരുന്നതെന്ന് അറിയിക്കാമോ;

സംസ്ഥാനത്ത് വിദ്യാര്‍ത്ഥികളുടെ ഇടയിലെ ലഹരി ഉപയോഗം തടയുന്നതിനായി എന്തൊക്കെ നടപടികളാണ് സ്വീകരിച്ചിരിക്കുന്നത്; ഈ നടപടികൾ കാര്യക്ഷമമാണോ എന്ന് പരിശോധിച്ചിട്ടുണ്ടോ;

കോവിഡ് ലോക്ക്ഡൗൺ കാലത്ത് കഞ്ചാവ് ഉള്‍പ്പെടെയുള്ള ലഹരി വസ്തുക്കളുടെ ഉപയോഗം കൂടിവരുന്ന സാഹചര്യത്തില്‍ ഇത്തരം ലഹരി വസ്തുക്കളുടെ വ്യാപനവും ഉപയോഗവും തടയാന്‍ വകുപ്പ് സ്വീകരിച്ച നടപടികള്‍ എന്തെല്ലാമെന്ന് വിശദമാക്കാമോ?

കോന്നി മണ്ഡലത്തിലെ കോന്നി മെഡിക്കല്‍ കോളേജില്‍ അനുവദിച്ച ലഹരി വിമുക്തി കേന്ദ്രം ആരംഭിക്കുന്നതിനുള്ള നടപടി തുടങ്ങിയിട്ടുണ്ടോ; ഉണ്ടെങ്കില്‍ നിലവിലെ സ്ഥിതി വിശദമാക്കാമോ?