സംസ്ഥാനത്തെ ഭൂരഹിതരായ പട്ടികജാതിക്കാരെ സഹായിക്കുന്നതിനായി എന്തെങ്കിലും പദ്ധതി സര്‍ക്കാര്‍ ആവിഷ്കരിച്ചിട്ടുണ്ടോ; വിശദമാക്കുമോ;

പട്ടികജാതിയിൽപ്പെട്ട കര്‍ഷകത്തൊഴിലാളികൾക്ക് കൃഷിഭൂമി ലഭ്യമാക്കുന്നതിന് പട്ടികജാതി വികസന വകുപ്പ് നടപ്പിലാക്കാൻ ഉദ്ദേശിക്കുന്ന പദ്ധതികളെ കുറിച്ച് വിശദമാക്കാമോ?

കൽപ്പറ്റ നിയോജക മണ്ഡലത്തിൽ ഭവന രഹിതരായ എത്ര ആദിവാസി കുടുംബങ്ങൾ ഉണ്ട് എന്നത് സംബന്ധിച്ച കണക്ക് ലഭ്യമാക്കാമോ;

കഴിഞ്ഞ സർക്കാർ കൽപ്പറ്റ നിയോജക മണ്ഡലത്തിൽ ആദിവാസി കുടുംബങ്ങൾക്കായി എത്ര വീടുകൾ നിർമ്മിച്ചു നൽകിയെന്ന് വ്യക്തമാക്കാമോ;

ഭവനം നിർമ്മിക്കാൻ സ്വന്തമായി ഭൂമിയില്ലാത്ത എത്ര ആദിവാസി കുടുംബങ്ങൾ പ്രസ്തുത നിയോജക മണ്ഡലത്തിൽ ഉണ്ട്; വിശദാംശങ്ങൾ ലഭ്യമാക്കാമോ?

സംസ്ഥാനത്ത് പട്ടികവര്‍ഗ്ഗ വിഭാഗങ്ങള്‍ക്ക് ഭവന നിര്‍മാണത്തിനായി എന്തെല്ലാം പദ്ധതികള്‍ ആണ് നിലവിലുള്ളത് എന്ന് അറിയിക്കുമോ;

പ്രസ്തുത പദ്ധതികളുടെ മാനദണ്ഡങ്ങളും മറ്റ് നടപടി ക്രമങ്ങളും വിശദമായി അറിയിക്കാമോ?

ആലത്തൂര്‍ നിയോജകമണ്ഡലത്തില്‍ നിലവില്‍ ഭവനരഹിതരായ എത്ര പട്ടിക ജാതി/വര്‍ഗ്ഗ കുടുംബങ്ങളാണുള്ളത്; ഇതില്‍ ഭൂരഹിതരായ ഭവനരഹിതര്‍ എത്ര; വിവരം പഞ്ചായത്ത് അടിസ്ഥാത്തില്‍ ലഭ്യമാക്കി നല്‍കാമോ;

ഇവരില്‍ എത്ര പേര്‍ ലൈഫ് മിഷന്‍ പദ്ധതി മുന്‍ഗണന പട്ടികയില്‍ ഉള്‍പ്പെട്ടിട്ടുണ്ടെന്ന് വെളിപ്പെടുത്താമോ;

പ്രസ്തുത മണ്ഡലത്തില്‍ കഴിഞ്ഞ സര്‍ക്കാര്‍ കാലയളവില്‍ ലൈഫ് മിഷന്‍ പദ്ധതിയില്‍ ഉള്‍പ്പെടുത്തി എത്ര എസ്.സി./ എസ്.റ്റി. കുടുംബങ്ങളുടെ ഭവന നിര്‍മ്മാണം പൂര്‍ത്തീകരിച്ചുവെന്നുള്ള വിവരം പഞ്ചായത്ത് അടിസ്ഥാനത്തില്‍ അറിയിക്കുമോ?

കഴിഞ്ഞ അഞ്ച് വര്‍ഷക്കാലയളവിനുള്ളില്‍ പട്ടികവര്‍ഗ്ഗ വികസന വകുപ്പിന് കീഴില്‍ അനുവദിച്ച വീടുകള്‍ എത്ര; അതില്‍ പിറവം നിയോജക മണ്ഡലത്തില്‍ മാത്രം എത്ര വീടുകള്‍ അനുവദിച്ചിട്ടുണ്ട്; പണി പൂര്‍ത്തീകരിച്ചതെത്രയെന്ന് അറിയിക്കാമോ;

ഈ സര്‍ക്കാരിന്റെ കാലത്ത് പ്രസ്തുത വിഭാഗങ്ങള്‍ക്കായി ലൈഫ് പദ്ധതിയില്‍ ഉള്‍പ്പെടുത്താതെ അനുവദിച്ച വീടുകള്‍ എത്ര; വിശദമാക്കാമോ;

നിലവില്‍ പിറവം നിയോജക മണ്ഡലത്തില്‍ നിന്നും ഭവന നിര്‍മ്മാണത്തിന് എത്ര അപേക്ഷകള്‍ ലഭിച്ചിട്ടുണ്ട്; നിലവിലെ സ്ഥിതി അറിയിക്കാമോ?

ലൈഫ് മിഷന്‍ പദ്ധതി പ്രകാരം എസ്.ടി. വിഭാഗക്കാര്‍ക്ക് 6 ലക്ഷം രൂപ ഭവന നിര്‍മ്മാണത്തിന് നല്‍കിവരുന്നത് പോലെ പ്രളയാനന്തര കേരളത്തിന്റെ പുനര്‍നിര്‍മ്മാണ പദ്ധതിയില്‍ ഉള്‍പ്പെടുത്തി എസ്.ടി. വിഭാഗത്തില്‍പ്പെടുന്നവര്‍ക്ക് വീട് വയ്ക്കുന്നതിന് അനുവദിക്കുന്ന തുക 6 ലക്ഷമായി ഉയര്‍ത്തുന്നതിന് നടപടി സ്വീകരിക്കുമോ;

പ്രസ്തുത പാക്കേജ് പ്രകാരം പാലക്കാട് ജില്ലയില്‍ ലഭിച്ച അപേക്ഷകളുടെ കണക്ക് വ്യക്തമാക്കാമോ?

പിറവം നിയോജക മണ്ഡലത്തില്‍ ഭൂരഹിതരും ഭവനരഹിതരുമായ എത്ര പട്ടികജാതി കുടുംബങ്ങളാണ് നിലവിലുള്ളത്; വ്യക്തമാക്കാമോ;

ഈ സര്‍ക്കാരിന്റെ കാലത്ത് പിറവം മണ്ഡലത്തില്‍ എത്ര കുടുംബങ്ങള്‍ക്ക് ഭൂമിയും വീടും നല്‍കിയിട്ടുണ്ട്; വിശദാംശം ലഭ്യമാക്കാമോ;

ഈ സര്‍ക്കാരിന്റെ കാലത്ത് പ്രസ്തുത മണ്ഡലത്തിൽ സ്വന്തമായി ഭൂമിയും വീടും ഇല്ലാത്ത എത്ര കുടുംബങ്ങള്‍ക്ക് ഭൂമിയും വീടും നൽകാൻ കഴിയുമെന്നാണ് പ്രതീക്ഷിക്കുന്നത്; വിശദമാക്കാമോ?

2017-2018 മുതൽ 2020-2021 വരെ ലൈഫ് മിഷൻ പദ്ധതി പ്രകാരം സംസ്ഥാനത്ത് എത്ര പട്ടികജാതി കുടുംബങ്ങളുടെ ഭവന നിർമ്മാണം പൂർത്തീകരിച്ചിട്ടുണ്ടെന്ന് അറിയിക്കാമോ;

തൃശ്ശൂർ നിയോജക മണ്ഡലത്തിൽ 2017-2018 മുതൽ 2020-2021 വരെ ലൈഫ് മിഷൻ പദ്ധതി പ്രകാരം എത്ര പട്ടികജാതി കുടുംബങ്ങളുടെ ഭവന നിർമ്മാണം പൂർത്തീകരിച്ചിട്ടുണ്ടെന്ന് അറിയിക്കാമോ ?

കഴിഞ്ഞ സർക്കാർ അധികാരത്തിൽ വന്ന സമയത്ത് ഭവനരഹിതരായി കണ്ടെത്തിയ പട്ടികവർഗ്ഗ കുടുംബങ്ങളുടെ എണ്ണം ജില്ല തിരിച്ച് വ്യക്തമാക്കാമോ;

കഴിഞ്ഞ 5 വർഷക്കാലത്ത് ലൈഫ് പദ്ധതി മുഖേന അനുവദിച്ച പുതിയ വീടുകളുടെ എണ്ണം ജില്ല, വർഷം എന്നിവ തിരിച്ച് വ്യക്തമാക്കാമോ;

ഓരോ വർഷവും അനുവദിച്ച പുതിയ വീടുകളിൽ നിർമ്മാണം പൂർത്തിയാക്കിയവയുടെ എണ്ണം ജില്ല തിരിച്ച് വ്യക്തമാക്കാമോ?

മാവേലിക്കര മണ്ഡലത്തില്‍ ലെെഫ് പദ്ധതിയില്‍ ഉള്‍പ്പെടുത്തി പട്ടികജാതി പട്ടികവര്‍ഗ്ഗ വികസന വകുപ്പ് മുഖാന്തിരം അനുവദിച്ച വീടുകളുടെയും ഭൂരഹിതർക്ക് സ്വന്തമായി സ്ഥലം വാങ്ങുന്നതിനുളള ലിസ്റ്റില്‍ ഉള്‍പ്പെട്ടവരുടെയും വിശദവിവരം ലഭ്യമാക്കുമോ;

അനുവദിക്കപ്പെട്ടതില്‍ എത്ര വീടുകള്‍ പൂര്‍ത്തീകരിച്ചുവെന്നും പൂര്‍ത്തീകരിക്കാനുളളവയും ആരംഭിക്കാനുളളവയും എത്ര വീതമെന്നും വിശദമാക്കുമോ?

തൃശൂർ നിയോജക മണ്ഡലത്തിൽ ഭവനരഹിതരായ എത്ര പട്ടികജാതി പട്ടികവർഗ്ഗ കുടുംബങ്ങൾ ഉണ്ടെന്ന് അറിയിക്കാമോ;

പ്രസ്തുത മണ്ഡലത്തിൽ 2016 മുതൽ എത്ര പട്ടികജാതി/ പട്ടികവർഗ്ഗ കുടുംബങ്ങൾക്ക് ഭൂമി വാങ്ങി നൽകിയിട്ടുണ്ടെന്ന് അറിയിക്കാമോ?

സംസ്ഥാനത്ത് സ്വന്തമായി ഭൂമിയും വീടും ഇല്ലാത്ത എത്ര പട്ടികജാതി/വര്‍ഗ്ഗ കുടുംബങ്ങളുണ്ട്; ജില്ല തിരിച്ചുള്ള കണക്ക് വ്യക്തമാക്കുമോ?

സംസ്ഥാനത്ത് ഭൂരഹിതരായ പട്ടികവര്‍ഗ്ഗ കുടുംബങ്ങളുടെ എണ്ണം ജില്ലാടിസ്ഥാനത്തിൽ വ്യക്തമാക്കുമോ;

പട്ടികവര്‍ഗ്ഗ വിഭാഗങ്ങളുടെ കൈവശഭൂമി വര്‍ദ്ധിപ്പിക്കുന്നതിനും മുഴുവന്‍ കുടുംബങ്ങള്‍ക്കും ഭൂമി ലഭ്യമാക്കുന്നതിനും അടിയന്തര നടപടികള്‍ സ്വീകരിക്കുമോ; വ്യക്തമാക്കുമോ?

ചങ്ങനാശ്ശേരി നിയോജക മണ്ഡലത്തില്‍ ഭവനരഹിതരായ എത്ര പട്ടികജാതി കുടുംബങ്ങള്‍ ഉണ്ടെന്ന് വ്യക്തമാക്കുമോ;

ഇവരില്‍ എത്ര കുടുംബങ്ങള്‍ ലൈഫ് മിഷന്‍ മുന്‍ഗണന പട്ടികയില്‍ ഉള്‍പ്പെട്ടിട്ടുണ്ടെന്ന് വ്യക്തമാക്കുമോ;

മുന്‍ സര്‍ക്കാരിന്റെ കാലഘട്ടത്തില്‍ പ്രസ്തുത നിയോജക മണ്ഡലത്തിലെ എത്ര പട്ടികജാതി കുടുംബങ്ങള്‍ക്കാണ് ലൈഫ് മിഷന്‍ പദ്ധതിയിലൂടെ വീട് ലഭ്യമായതെന്ന് വ്യക്തമാക്കുമോ; വിശദവിവരം നല്‍കാമോ?

പേരാമ്പ്ര മണ്ഡലത്തില്‍ 2016 മുതല്‍ 2021 വരെ പട്ടികജാതി‌-പട്ടികവര്‍ഗ്ഗ കോളനികളുടെ വികസനത്തിനായി ഏതൊക്കെ കോളനികള്‍ക്ക് എത്ര തുക വീതം അനുവദിച്ചു എന്ന വിശദാംശം ലഭ്യമാക്കുമോ;

ഓരോ പ്രവൃത്തിയുടെയും പുരോഗതി വ്യക്തമാക്കാമോ;

ഏതെങ്കിലും സര്‍ക്കാര്‍ ഏജന്‍സികളാണോ ഈ പ്രവൃത്തികൾ ഏറ്റെടുത്തിരിക്കുന്നതെന്നും പ്രസ്തുത ഏജന്‍സികള്‍ തന്നെയാണോ പ്രവൃത്തി ചെയ്യിക്കുന്നതെന്നും വ്യക്തമാക്കാമോ;

പ്രസ്തുത ഏജന്‍സികള്‍ തൃപ്തികരമായ രീതിയില്‍ പ്രവൃത്തികള്‍ ചെയ്യിക്കുന്നുണ്ടോ; ഇല്ലെങ്കില്‍ ഇടനിലക്കാരായ ഇത്തരം ഏജന്‍സികളെ ഒഴിവാക്കി പ്രവൃത്തികള്‍ നേരിട്ട് ടെണ്ടര്‍ ചെയ്യുന്ന സംവിധാനത്തിലേക്ക് മാറുമോ?

കുന്നത്തുനാട് മണ്ഡലത്തിലെ ഏതെല്ലാം പട്ടികജാതി/പട്ടികവര്‍ഗ്ഗ കോളനികളുടെ നവീകരണത്തിനും അടിസ്ഥാനസൗകര്യ വികസനത്തിനുമാണ് സര്‍ക്കാര്‍ നടപടികള്‍ സ്വീകരിച്ചിട്ടുള്ളതെന്ന് വ്യക്തമാക്കാമോ;

പ്രസ്തുത നടപടികള്‍ ഏത് ഘട്ടത്തിലാണെന്നും എന്തെല്ലാം വികസന പ്രവര്‍ത്തനങ്ങളാണ് ഇതിന്റെ ഭാഗമായി നടപ്പിലാക്കുന്നത് എന്നും വ്യക്തമാക്കാമോ?

ഭൂരഹിതരായ പട്ടിക ജാതി തൊഴിലാളി കുടുംബങ്ങള്‍ക്ക് ഒന്നു മുതല്‍ അഞ്ച് ഏക്കര്‍ വരെ ഭൂമി നല്‍കാന്‍ സംസ്ഥാന ആസൂത്രണ ബോര്‍ഡ് രൂപീകരിച്ച വര്‍ക്കിംഗ് ഗ്രൂപ്പ് ശിപാര്‍ശ ചെയ്തിട്ടുണ്ടോ;

ഉണ്ടെങ്കില്‍ ആയത് നടപ്പിലാക്കുന്നതിന് പട്ടികജാതി വികസന വകുപ്പ് സ്വീകരിച്ച നടപടികള്‍ വ്യക്തമാക്കുമോ;

പട്ടിക വിഭാഗക്കാരുടെ ആരോഗ്യ പരിരക്ഷ ഉറപ്പുവരുത്തുന്നതിനായി സമഗ്ര ആരോഗ്യ ഇന്‍ഷ്യുറന്‍സ് സ്കീം നടപ്പിലാക്കാന്‍ പ്രസ്തുത വര്‍ക്കിംഗ് ഗ്രൂപ്പ് ശിപാര്‍ശ ചെയ്തിട്ടുണ്ടോ;

ഉണ്ടെങ്കില്‍ ആയത് നടപ്പിലാക്കുന്നതിന് പട്ടികജാതി വികസന വകുപ്പ് നടപടി സ്വീകരിക്കുമോ?

കുറ്റ്യാടി മണ്ഡലത്തില്‍ പട്ടികജാതി വകുപ്പിന്റെ നേതൃത്വത്തില്‍ നിലവില്‍ ഭരണാനുമതി ലഭിച്ച് നടപ്പിലാക്കുന്ന പട്ടികജാതി കോളനി നവീകരണ പദ്ധതികള്‍ ഏതൊക്കെ എന്ന് അനുവദിച്ച തുക സഹിതം അറിയിക്കാമോ;

എത്ര ഗുണഭോക്താക്കള്‍ക്കാണ് ഈ പദ്ധതി പ്രകാരം പ്രയോജനം ലഭിക്കുന്നത് എന്ന് വ്യക്തമാക്കാമോ;

പ്രസ്തുത പദ്ധതികള്‍ ഏതൊക്കെ ഏജന്‍സികള്‍ മുഖാന്തിരമാണ് നിര്‍വ്വഹണം നടത്തുന്നത് എന്ന് അറിയിക്കാമോ;

കേരള സ്റ്റേറ്റ് നിര്‍മ്മിതി കേന്ദ്രം എന്ന ഏജന്‍സിയെ പി.എം.സി. എന്ന നിലയില്‍ പ്രവൃത്തി നടപ്പിലാക്കുന്നതിന് ചുമതലപ്പെടുത്തിയിട്ടുണ്ടോ; ഉണ്ടെങ്കില്‍ ഏതൊക്കെ പ്രവൃത്തികളാണെന്ന് വ്യക്തമാക്കാമോ;

പ്രസ്തുത പ്രവൃത്തികള്‍ നിശ്ചിത സമയത്തിനുള്ളില്‍ തന്നെ നടപ്പിലാക്കുന്നുണ്ടോ എന്നത് അറിയിക്കാമോ;

പ്രസ്തുത പ്രവൃത്തികള്‍ യഥാസമയം പൂര്‍ത്തീകരിക്കുന്നുണ്ടോ എന്നത് പരിശോധിക്കാന്‍ നിലവിലുള്ള സംവിധാനങ്ങള്‍ എന്തൊക്കെയെന്ന് വ്യക്തമാക്കാമോ?

വൈപ്പിന്‍ നിയോജകമണ്ഡലത്തിലെ പട്ടികജാതി കോളനികള്‍ ഏതെല്ലാമെന്ന് വ്യക്തമാക്കാമോ;

പ്രസ്തുത കോളനികളുടെ പിന്നോക്കാവസ്ഥ പരിഹരിക്കുന്നതിനായി ആവിഷ്ക്കരിച്ച് നടപ്പിലാക്കുന്നതും നടപ്പിലാക്കേണ്ടതുമായ പദ്ധതികള്‍ ഏതെല്ലാമെന്ന് വിശദമാക്കാമോ?

അംബേദ്കര്‍ ഗ്രാമവികസന പദ്ധതിയില്‍ ഉള്‍പ്പെടുത്തിയിട്ടുള്ള ചാലക്കുടി മണ്ഡലത്തിലെ പട്ടികജാതി കോളനികള്‍ ഏതൊക്കെയെന്ന് വെളിപ്പെടുത്തുമോ;

പ്രസ്തുത കോളനികളില്‍ നടന്നു വരുന്ന നിര്‍മ്മാണ പ്രവര്‍ത്തനങ്ങള്‍ ഏതുഘട്ടത്തിലാണെന്നും എന്തൊക്കെ പ്രവൃത്തികളാണ് ഈ കോളനികളില്‍ നടപ്പിലാക്കുന്നതെന്നും വിശദീകരിക്കുമോ?

ബാലുശ്ശേരി മണ്ഡലത്തിലെ പട്ടികജാതി പട്ടികവർഗ കോളനികളുടെയും ഊരുകളുടെയും എണ്ണവും ഓരോ കോളനികളിലും താമസിക്കുന്ന കുടുംബങ്ങളുടെ എണ്ണവും പഞ്ചായത്തുകള്‍ തിരിച്ച് ലഭ്യമാക്കാമോ;

പ്രസ്തുത കോളനികളില്‍ നടത്തിവരുന്ന വികസന പ്രവൃത്തികള്‍ ഏതൊക്കെയാണെന്നും ഈ പ്രവൃത്തികള്‍ ഇപ്പോള്‍ ഏത് ഘട്ടത്തിലാണെന്നും എപ്പോള്‍ പൂര്‍ത്തീകരിക്കാന്‍ കഴിയുമെന്നും അറിയിക്കാമോ?

പട്ടികജാതി കോളനിയിലേക്കുള്ള വഴി നിര്‍മ്മാണത്തിനായി ഏതൊക്കെ ഫണ്ടുകള്‍ ഉപയോഗിക്കാം എന്ന് വ്യക്തമാക്കാമോ; ഏതൊക്കെ വകുപ്പുകള്‍/ഏജന്‍സികള്‍ മുഖാന്തിരമാണ് ഇവിടങ്ങളില്‍ വഴികള്‍ നിര്‍മ്മിക്കുന്നത് എന്ന് വ്യക്തമാക്കാമോ;

കോളനിക്കുള്ളിലെ വഴി പോലെ തന്നെ പ്രാധാന്യമുള്ള കോളനിയിലേക്ക് എത്തിച്ചേരുന്ന വഴിക്കും എസ്.സി. ഫണ്ട് വകയിരുത്തുന്നതിന് മാനദണ്ഡങ്ങള്‍ നിലവിലുണ്ടോ;

പട്ടികജാതി കോളനിയിലേക്കുള്ള പ്രധാന വഴികള്‍ മറ്റു സ്ഥലങ്ങളിലേക്ക് കൂടി പോകുന്നത് കാരണം ടി വഴി നിര്‍മ്മാണത്തിന് എസ്.സി. ഫണ്ട് ഉപയോഗിക്കുന്നതിനുള്ള ഫീസിബിലിറ്റി സര്‍ട്ടിഫിക്കറ്റ് ലഭിക്കാതിരിക്കുന്നത് ശ്രദ്ധയില്‍പ്പെട്ടിട്ടുണ്ടോ;

പട്ടികജാതി കോളനിയിലേക്കുള്ള പ്രധാന വഴികളുടെ മാപ്പ് തയ്യാറാക്കി എസ്.സി. ഫണ്ട് വകയിരുത്തുന്നതിന് പദ്ധതിയുണ്ടോ എന്ന് വ്യക്തമാക്കാമോ?

അംബേദ്കര്‍ ഗ്രാമം പദ്ധതിയില്‍ ബേഡഡുക്ക പഞ്ചായത്തിലെ ചെമ്പക്കാട് എസ്.ടി. കോളനിക്ക് എത്ര തുകയാണ് അനുവദിച്ചിട്ടുള്ളത്;

ഈ കോളനിയില്‍ വീടില്ലാത്ത എത്ര കുടുംബങ്ങള്‍ ഉണ്ടെന്നും ഇവര്‍ക്കെല്ലാം ലൈഫ് മിഷന്‍ പദ്ധതിയില്‍ വീടിന് അനുമതി ലഭിച്ചിട്ടുണ്ടോയെന്നം വിശദമാക്കാമോ;

ഈ കോളനിയില്‍ ഇനി എത്ര കുടുംബങ്ങള്‍ക്ക് വീട് വേണം എന്നുള്ളതിന്റെ വിശദാംശങ്ങള്‍ അറിയിക്കാമോ;

അംബേദ്കര്‍ ഗ്രാമം പദ്ധതിയില്‍ അനുവദിച്ച തുകയില്‍ നിന്ന് ഈ കോളനിയില്‍ വീടില്ലാത്തവര്‍ക്ക് വീട് നല്‍കുന്നതിന് തടസ്സമുണ്ടോ;

പദ്ധതിയുടെ മാസ്റ്റര്‍ പ്ലാന്‍ തയ്യാറാക്കുന്നതിനായി കോളനിയില്‍ വിളിച്ചു ചേര്‍ത്ത യോഗത്തില്‍ ഭൂരിഭാഗം നിവാസികളും താമസസൗകര്യമുള്ള വീടാണ് വേണ്ടതെന്ന ആവശ്യം ഉന്നയിച്ചതിന്റെ അടിസ്ഥാനത്തില്‍ മേല്‍ തുക പൂര്‍ണ്ണമായും വീട് നല്‍കുന്നതിനുവേണ്ടി ഉപയോഗിക്കാന്‍ അനുമതി നല്‍കുന്ന വിഷയം പരിഗണിക്കുമോ; വിശദാംശങ്ങള്‍ അറിയിക്കാമോ?

കായംകുളം മണ്ഡലത്തില്‍ നിന്നും പട്ടികജാതി കോളനികളുടെ നവീകരണത്തിനായി അംബേദ്കര്‍ ഗ്രാമം പദ്ധതിയില്‍ ഉള്‍പ്പെടുത്തി തെരഞ്ഞെടുത്ത കോളനികള്‍ ഏതൊക്കെയെന്നും പ്രസ്തുത കോളനികളില്‍ നടപ്പാക്കുന്ന പദ്ധതികള്‍ ഏതൊക്കെയെന്നും അറിയിക്കുമോ;

ഇപ്രകാരം ഓരോ പദ്ധതിയ്ക്കുമായി നീക്കിവച്ചിട്ടുള്ള തുക എത്രയെന്നും പദ്ധതികളുടെ നിലവിലുള്ള പുരോഗതി എന്താണ് എന്നും വിശദമാക്കാമോ?

ദേവികുളം മണ്ഡലത്തില്‍ 2016-17 വര്‍ഷത്തില്‍ അംബേദ്കര്‍ ഗ്രാമം പദ്ധതി പ്രകാരം ഏറ്റെടുത്ത കോളനികളുടെ പേരും പദ്ധതികളുടെ വിവരവും നിര്‍വ്വഹണ ഏജന്‍സിയുടെ പേരും പദ്ധതികളുടെ നിലവിലെ സ്ഥിതിയും വിശദമാക്കാമോ;

പ്രസ്തുത മണ്ഡലത്തില്‍ 2019-20 വര്‍ഷത്തില്‍ അംബേദ്കര്‍ ഗ്രാമം പദ്ധതി പ്രകാരം തെരഞ്ഞെടുക്കപ്പെട്ട കോളനികളുടെ പേരും പദ്ധതികളുടെ വിവരവും പദ്ധതികളുടെ നിലവിലെ സ്ഥിതിയും വിശദമാക്കാമോ?

ചാലക്കുടി മണ്ഡലത്തിലെ ഏതൊക്കെ പട്ടികവര്‍ഗ്ഗ കോളനികളെയാണ് അംബേദ്കര്‍ സെറ്റില്‍മെന്റ് വികസന പദ്ധതിയില്‍ ഉള്‍പ്പെടുത്തിയിട്ടുള്ളതെന്ന് അറിയിക്കുമോ;

പ്രസ്തുത കോളനികളില്‍ നടന്നുവരുന്ന നിര്‍മ്മാണ പ്രവര്‍ത്തനങ്ങള്‍ ഏതു ഘട്ടത്തിലാണെന്നും എന്തൊക്കെ പ്രവൃത്തികളാണ് നടപ്പിലാക്കുന്നതെന്നും വിശദീകരിക്കുമോ;

2020-21 വര്‍ഷം തെരഞ്ഞെടുത്ത കോളനികളില്‍ പദ്ധതി നടപ്പിലാക്കുന്നതിലേയ്ക്കായി ഏജന്‍സിയെ കണ്ടെത്തിയിട്ടുണ്ടോ; എങ്കിൽ ഏജന്‍സിയുടെ പേര് വിവരം വെളിപ്പെടുത്തുമോ?

മങ്കട നിയോജക മണ്ഡലത്തിലെ പട്ടികജാതി കോളനികളിൽ കോവിഡ് രോഗപ്രതിരോധത്തിനും വ്യാപനം തടയുന്നതിനും വകുപ്പ് എന്തെല്ലാം നടപടികൾ സ്വീകരിച്ചിട്ടുണ്ട്; വിശദാംശം ലഭ്യമാക്കുമോ ;

പ്രസ്തുത കോളനി നിവാസികൾക്ക് ലോക്ഡൗൺ കാരണം തൊഴിൽ നഷ്ടപ്പെട്ട സാഹചര്യത്തിൽ അതിജീവനത്തിന് എന്തെല്ലാം സഹായം നൽകിയിട്ടുണ്ട്; വിശദാംശം ലഭ്യമാക്കുമോ ;

പ്രസ്തുത പട്ടികജാതി കോളനികളിൽ കോവിഡ് മഹാമാരി കാരണം എന്തെല്ലാം പ്രയാസങ്ങളാണ് ഇനി പരിഹരിക്കാൻ ബാക്കിയുള്ളത്; അതിനായി എന്തെല്ലാം പരിഹാര നടപടികൾ ആരംഭിച്ചിട്ടുണ്ട്; വ്യക്തമാക്കുമോ?

വളളിക്കുന്ന് നിയോജക മണ്ഡലത്തില്‍ അംബേദ്കര്‍ ഗ്രാമം പദ്ധതിയുടെ ഭാഗമായി നിലവില്‍ നടന്നു വരുന്ന പ്രവര്‍ത്തനങ്ങളുടെ വിശദാംശങ്ങള്‍ ലഭ്യമാക്കാമോ;

പ്രസ്തുത പദ്ധതിയില്‍ ഉള്‍പ്പെടുത്തി ഈ മണ്ഡലത്തിലെ കൂടുതല്‍ കോളനികള്‍ നവീകരിക്കുന്നതിനുള്ള നടപടികള്‍ സ്വീകരിക്കുമോ;

ഇത് സംബന്ധിച്ച് പ്രൊപ്പോസല്‍ നിലവിലുണ്ടോ; വ്യക്തമാക്കാമോ?

അംബേദ്കര്‍ ഗ്രാമം പദ്ധതിയില്‍ ഉള്‍പ്പെടുത്തിയ നെയ്യാറ്റിന്‍കര നിയോജകമണ്ഡലത്തിലെ താഴെപറയുന്ന കോളനികളുടെ നവീകരണ പ്രവൃത്തികളുടെ നിലവിലെ സ്ഥിതി വിശദമാക്കാമോ;

അതിയന്നൂര്‍ പഞ്ചായത്തിലെ ഭാസ്കര്‍ നഗര്‍ കോളനിയില്‍ ഏതൊക്കെ പ്രവൃത്തികള്‍ ആണ് പൂര്‍ത്തീകരിച്ചത്; അതിനു ചെലവായ തുക എത്ര; ഇനി പൂര്‍ത്തീകരിക്കേണ്ടത് ഏതൊക്കെയാണ്; അതിനു വരുന്ന തുക എത്ര; വിശദമാക്കാമോ;

കുളത്തൂര്‍ പഞ്ചായത്തിലെ പൂഴിക്കുന്ന് കോളനിയില്‍ ഏതൊക്കെ പ്രവൃത്തികള്‍ ആണ് പൂര്‍ത്തിയാക്കിയത്; ഓരോ പ്രവൃത്തികള്‍ക്കും ചെലവായ തുക എത്ര; ഇനി പൂര്‍ത്തീകരിക്കേണ്ട പദ്ധതികള്‍ ഏതൊക്കെ; അതിനു ചെലവാക്കുന്ന തുക എത്ര; വ്യക്തമാക്കാമോ;

2020-21 വര്‍ഷത്തില്‍ നെയ്യാറ്റിന്‍കര നിയോജകമണ്ഡലത്തില്‍ അംബേദ്കര്‍ ഗ്രാമം പദ്ധതിയില്‍ ഉള്‍പ്പെടുത്തിയ കോളനികള്‍ ഏതൊക്കെയാണെന്നും എത്ര തുകയാണ് ഓരോ കോളനിയ്ക്കും അനുവദിച്ചതെന്നും വിശദമാക്കാമോ?

നെന്മാറ നിയോജകമണ്ഡലത്തിലെ ഏതെല്ലാം കോളനികളെയാണ് അംബേദ്ക്കര്‍ സ്വയംപര്യാപ്ത ഗ്രാമം പദ്ധതിയില്‍ ഉള്‍പ്പെടുത്തിയിട്ടുളളതെന്ന് വിശദമാക്കുമോ;

പ്രസ്തുത കോളനികളുടെ നവീകരണ പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; ഏതെല്ലാം കോളനികളുടെ പ്രവൃത്തികളാണ് പൂര്‍ത്തീകരിച്ചതെന്ന് വിശദമാക്കുമോ;

പൂര്‍ത്തീകരിക്കാത്തവ എന്ന് പൂര്‍ത്തീകരിക്കുമെന്ന് വിശദമാക്കുമോ?

ഉടുമ്പന്‍ചോല മണ്ഡലത്തിലെ ശാന്തന്‍പാറ പഞ്ചായത്തിലെ പന്തടിക്കളം, ഉടുമ്പന്‍ചോല പ‍ഞ്ചായത്തിലെ തിങ്കള്‍ക്കാട് കുടി എന്നീ പട്ടികവര്‍ഗ്ഗ കോളനികളുടെ പുനരുദ്ധാരണാര്‍ത്ഥം ഫണ്ട് അനുവദിച്ചിട്ടുണ്ടോ;

പ്രസ്തുത പ്രവൃത്തികള്‍ ആരംഭിക്കുന്നതുമായി ബന്ധപ്പെട്ട് നാളിതുവരെ സ്വീകരിച്ചിട്ടുള്ള നടപടിക്രമങ്ങള്‍ വിശദീകരിക്കാമോ;

പ്രസ്തുത പ്രവൃത്തികള്‍ അടിയന്തരമായി ആരംഭിക്കുന്നതിനാവശ്യമായ നടപടി സ്വീകരിക്കുമോ?

കാസര്‍ഗോഡ് ജില്ലയില്‍ മൂളിയാര്‍ പഞ്ചായത്തിലെ പൂവാള എസ്.സി. കോളനിയില്‍ എത്ര കുടുംബങ്ങള്‍ താമസിക്കുന്നുണ്ട്; വിശദാംശങ്ങള്‍ അറിയിക്കാമോ;

പ്രസ്തുത കോളനിയിലേക്കുള്ള റോഡ് എസ്.സി. കോര്‍പ്പസ് ഫണ്ടില്‍ ഉൾപ്പെടുത്തി ഗതാഗത യോഗ്യമാക്കണമെന്ന ആവശ്യം വകുപ്പ് പരിഗണിച്ചിട്ടുണ്ടോ; വിശദാംശങ്ങള്‍ അറിയിക്കാമോ;

റിസര്‍വ്വ് വനത്തിന്റെ നടുവിലുള്ള ഈ കോളനിയിലേക്കുള്ള റോഡ് ഊരുകൂട്ട തീരുമാന പ്രകാരം വനംവകുപ്പിന്റെ അനുമതി ലഭ്യമാക്കി കോണ്‍ക്രീറ്റ് റോഡാക്കുന്നതിന് വകുപ്പ് തുടര്‍ നടപടി സ്വീകരിക്കുമോ; വിശദാംശങ്ങള്‍ അറിയിക്കാമോ?

പട്ടികജാതി/പട്ടികവര്‍ഗ്ഗ വിഭാഗത്തിൽപ്പെട്ട വിദ്യാര്‍ത്ഥികള്‍ക്ക് ഓണ്‍ലൈന്‍ പഠനം ഉറപ്പാക്കുന്നതിനായി ബഡ്ജറ്റില്‍ പ്രത്യേകം തുക വരുത്തിയിട്ടുണ്ടോ; എങ്കില്‍ വിശദാംശം നല്‍കുമോ?

പട്ടികജാതി/ പട്ടികവര്‍ഗ്ഗ ക്ഷേമ വകുപ്പിന് കീഴില്‍ പ്രവര്‍ത്തിക്കുന്ന പോസ്റ്റ് മെട്രിക് , പ്രീമെട്രിക് ഹോസ്റ്റലുകളില്‍ താമസിച്ചു പഠിക്കുന്ന വിദ്യാര്‍ത്ഥികള്‍ക്ക് നിലവില്‍ എന്തൊക്കെ ആനുകൂല്യങ്ങളാണ് നല്‍കിക്കൊണ്ടിരിക്കുന്നത്;

ഇവിടങ്ങളിലെ വിദ്യാർത്ഥികൾക്ക് ഓണ്‍ലൈന്‍ പഠന സംവിധാനം ഒരുക്കിയിട്ടുണ്ടോ; വിശദീകരിക്കാമോ;

പ്രസ്തുത വിദ്യാര്‍ത്ഥികള്‍ക്ക് ടാബ് നല്‍കുന്നത് സര്‍ക്കാരിന്റെ പരിഗണനയില്‍ ഉണ്ടോ; ഇതിനായി പദ്ധതി ആവിഷ്ക്കരിച്ചിട്ടുണ്ടോ; വിശദാംശങ്ങള്‍ ലഭ്യമാക്കാമോ;

പോസ്റ്റ് മെട്രിക്, പ്രീ മെട്രിക് ഹോസ്റ്റലുകളിലും മോഡല്‍ റസിഡന്‍ഷ്യല്‍ സ്കൂളുകളിലും വിദ്യാര്‍ത്ഥികള്‍ക്ക് ടാബ് നല്‍കുന്നതിന് നടപടി സ്വീകരിക്കുമോ; വ്യക്തമാക്കാമോ?

പട്ടികജാതി/വര്‍ഗ്ഗ വിദ്യാര്‍ത്ഥികളുടെ വിദ്യാഭ്യാസത്തിനായി സര്‍ക്കാര്‍ നല്‍കുന്ന സഹായങ്ങളുടെ വിശദാംശം വ്യക്തമാക്കുമോ;

പ്രസ്തുത സഹായങ്ങളുടെ ഫലപ്രാപ്തിയെക്കുറിച്ച് വിശകലനം നടത്തിയിട്ടുണ്ടോ; വിശദമാക്കുമോ?

ഓണ്‍ലൈന്‍ വിദ്യാഭ്യാസം നടപ്പാക്കിയ സാഹചര്യത്തില്‍ പട്ടികജാതി പട്ടികവര്‍ഗ്ഗ മേഖലകളിലെ കുട്ടികള്‍ നേരിടുന്ന പഠന പ്രതിസന്ധി ശ്രദ്ധയില്‍പെട്ടിട്ടുണ്ടോ;

ഇത് മറികടക്കുന്നതിനായി എന്തൊക്കെ പദ്ധതികളാണ് സര്‍ക്കാര്‍ നടപ്പാക്കാനുദ്ദേശിക്കുന്നത്?

പട്ടിക ജാതി പട്ടിക വര്‍ഗ്ഗത്തില്‍ പെടുന്ന വിദ്യാര്‍ഥികള്‍ക്ക് ഓണ്‍ലൈന്‍ പഠനത്തിന് സഹായിക്കുന്ന എന്തെല്ലാം പദ്ധതികള്‍ ആണ് നിലവിലുള്ളത്;

അത്തരം സഹായങ്ങള്‍ ലഭിക്കുന്നതിന് എങ്ങനെയാണ് അപേക്ഷിക്കേണ്ടത് എന്ന് വിശദമാക്കാമോ; ഇത്തരം സഹായങ്ങള്‍ ലഭിക്കുന്നതിനുള്ള മാനദണ്ഡങ്ങള്‍ എന്തൊക്കെയാണെന്നു വിശദമാക്കാമോ?

കേന്ദ്ര സര്‍ക്കാര്‍ സര്‍വ്വീസില്‍ നിയമനങ്ങള്‍ പരിമിതപ്പെടുത്തിയതിനാലും കേന്ദ്ര പൊതുമേഖലാ സ്ഥാപനങ്ങള്‍ സ്വകാര്യവത്ക്കരിക്കാന്‍ തീരുമാനിച്ചതിനാലും ദേശസാത്കൃത ബാങ്കുകളില്‍ സ്ഥിരം ജീവനക്കാര്‍ക്ക് പകരം കരാര്‍ തൊഴില്‍ ഏര്‍പ്പെടുത്തിയതിനാലും ഭരണഘടന പ്രകാരം പട്ടികജാതികളില്‍പ്പെട്ടവര്‍ക്കും പട്ടിക ഗോത്രങ്ങളില്‍പ്പെട്ടവര്‍ക്കും നല്‍കിയിട്ടുള്ള സംവരണം ഇല്ലാതാകുന്നത് അവരുടെ സാമൂഹ്യോന്നമനത്തിന് വിഘാതമാകുമെന്നതിനാല്‍ സ്ഥാപനത്തിന്റെ സ്ഥിതിയോ നിയമന രീതിയോ മാറിയാലും സംവരണ നീതി ഉറപ്പാക്കണമെന്ന് കേന്ദ്ര സര്‍ക്കാരിനോട് ആവശ്യപ്പെടുന്ന കാര്യം പരിശോധിക്കുമോ;

എയ്ഡഡ് മേഖലയിലും സ്വകാര്യ മേഖലയിലും സംവരണം വ്യാപിപ്പിക്കേണ്ടതിന്റെ ആവശ്യകത കേന്ദ്ര സര്‍ക്കാരിനെ ബോദ്ധ്യപ്പെടുത്താന്‍ ശ്രമമുണ്ടാകുമോ;

ഇവര്‍ക്ക് സംസ്ഥാനത്തും വിദേശത്തും ആധുനിക വ്യവസായ സേവന മേഖലകളില്‍ തൊഴില്‍ സാധ്യത വര്‍ദ്ധിപ്പിക്കുന്നതിനും നെെപുണ്യ ശേഷി ഉയര്‍ത്തുന്നതിനും സംസ്ഥാന സര്‍ക്കാര്‍ പദ്ധതി ആവിഷ്കരിച്ചിട്ടുണ്ടോ; വിശദമാക്കുമോ?

പട്ടികജാതി - പട്ടികവര്‍ഗ്ഗ പിന്നോക്ക ക്ഷേമ വകുപ്പ് സംസ്ഥാനത്തെ സ്കൂള്‍, കോളേജ് വിദ്യാര്‍ത്ഥികളുടെ പഠന സൗകര്യം മെച്ചപ്പെടുത്തുന്നതിന് ആവിഷ്കരിച്ച പദ്ധതികള്‍ ഏതൊക്കെയാണെന്ന് വ്യക്തമാക്കാമോ;

പിന്നോക്ക വിഭാഗത്തിലെ കുട്ടികളുടെ ഓണ്‍ലൈന്‍ പഠനം മെച്ചപ്പെടുത്തുന്നതിനായി നടപ്പിലാക്കി വരുന്ന പ്രവര്‍ത്തനങ്ങള്‍ ഏതൊക്കെയാണെന്ന് വ്യക്തമാക്കാമോ;

ഓണ്‍ലൈന്‍ പഠനവുമായി ബന്ധപ്പെട്ട് വകുപ്പ് ധനസഹായം ലഭ്യമാക്കുന്നുണ്ടോ; ഉണ്ടെങ്കില്‍ പദ്ധതിയുടെ വിശദാംശങ്ങള്‍ വ്യക്തമാക്കാമോ?

നിലമ്പൂര്‍ നിയോജകമണ്ഡലത്തിലെ പട്ടികവര്‍ഗ്ഗ വിഭാഗത്തില്‍പ്പെട്ട എത്ര വിദ്യാര്‍ത്ഥികള്‍ക്കാണ് ഓണ്‍ലെെന്‍ പഠന സൗകര്യങ്ങളില്ലാത്തതെന്ന് അറിയിക്കാമോ; ഇവ ഏതെല്ലാം ആദിവാസി കോളനികളിലാണെന്ന് വിശദീകരിക്കാമോ; ഓണ്‍ലെെന്‍ ഉപകരണങ്ങളുടെ അഭാവമാണോ, ഇന്റര്‍നെറ്റ്- കേബിള്‍ കണക്ടിവിറ്റി ഇല്ലാത്തതാണോ, വെെദ്യുതീകരണം നടക്കാത്തതാണോ ഇതിന് കാരണമെന്ന് തരം തിരിച്ച് വിശദീകരിക്കാമോ;

കൈറ്റ് വഴി പൊതുവിദ്യാലയങ്ങളില്‍ വിതരണം ചെയ്ത കമ്പ്യൂട്ടറുകള്‍ തിരിച്ചെടുത്ത് ആദിവാസി മേഖലകളിലെ കുട്ടികള്‍ക്ക് വിതരണം ചെയ്യാമെന്ന പൊതുവിദ്യാഭ്യാസ വകുപ്പിന്റെ 25.06.2021-ലെ ഉത്തരവ് പ്രകാരം മണ്ഡലത്തിലെ ഏതെല്ലാം ആദിവാസി കോളനികളിലാണ് ഇപ്രകാരം കമ്പ്യൂട്ടറുകള്‍ വിതരണം ചെയ്തതെന്ന് അറിയിക്കാമോ;

മണ്ഡലത്തിലെ ആദിവാസി കോളനികളിലെ അംഗന്‍വാടികള്‍, വായനശാലകള്‍, ക്ലബ്ബുകള്‍ തുടങ്ങിയ പൊതുസ്ഥലങ്ങളില്‍ സ്മാര്‍ട്ട് ടി.വി. യും കേബിള്‍ കണക്ഷനും സ്ഥാപിക്കുന്നതിന് പട്ടികവര്‍ഗ്ഗ വികസന വകുപ്പിന് ഫണ്ട് അനുവദിക്കാനാകുമോ; ഇതിനായി പ്രത്യേക പദ്ധതി ആവിഷ്കരിക്കുമോ?

2020-21 ബഡ്ജറ്റ് പ്രഖ്യാപനത്തില്‍ ഉള്‍പ്പെടുത്തിയ ശ്രീനാരായണ ഗുരു നവോത്ഥാന സ്കോളര്‍ഷിപ്പ് പ്രാവര്‍ത്തികമാക്കിയിട്ടുണ്ടോ;

പ്രസ്തുത സ്കോളര്‍ഷിപ്പ് നാളിതുവരെ എത്ര വിദ്യാര്‍ത്ഥികള്‍ക്ക് ലഭ്യമാക്കിയിട്ടുണ്ട്; സ്കോളര്‍ഷിപ്പ് ലഭിക്കുന്നതിനുളള മാനദണ്ഡങ്ങള്‍ വിശദമാക്കാമോ?

സംസ്ഥാനത്ത് ബി.എസ്.സി. എം.എല്‍.ടി. കോഴ്സില്‍ പട്ടികജാതി വിഭാഗത്തിനുള്ള സീറ്റുകള്‍ ഒഴിഞ്ഞു കിടക്കുന്നതായി ശ്രദ്ധയില്‍പ്പെട്ടിട്ടുണ്ടോ;

പ്രസ്തുത സീറ്റുകളിലേക്ക് സ്പോട്ട് അഡ്മിഷന്‍ നടത്തുന്നത് ബന്ധപ്പെട്ട വകുപ്പുമായി ചേര്‍ന്ന് ആലോചിച്ചിട്ടുണ്ടോ; ആയത് സംബന്ധിച്ച അപേക്ഷകള്‍ വകുപ്പിന് ലഭിച്ചിട്ടുണ്ടോയെന്നറിയിക്കാമോ?

2011 -2016 സര്‍ക്കാര്‍ കാലയളവിൽ അപ്രന്റിസ്ഷിപ്പ് നിയമം അനുസരിച്ച് പട്ടികവര്‍ഗ്ഗ യുവാക്കള്‍ക്ക് നല്‍കിയ പരിശീലനത്തിന്റെ വിശദവിവരങ്ങള്‍ നല്‍കാമോ;

തിരുവനന്തപുരം ജില്ലയില്‍ ഇപ്രകാരം പരിശീലനം ലഭിച്ചവരുടെ വിവരങ്ങള്‍ പഞ്ചായത്ത് അടിസ്ഥാനമാക്കി നല്‍കാമോ?

മാതാപിതാക്കള്‍ മരണപ്പെട്ടതിനെ തുടർന്ന് അനാഥരായ പട്ടികവര്‍ഗ്ഗ വിദ്യാര്‍ത്ഥികളെ സംരക്ഷിക്കുന്ന കാര്യം പരിഗണനയിലുണ്ടോ;

എങ്കില്‍ ഇവരെ സംരക്ഷിക്കുന്നതിന് എന്ത് നടപടികളാണ് സ്വീകരിക്കുവാൻ ഉദ്ദേശിക്കുന്നതെന്നു വ്യക്തമാക്കുമോ;

ഇവരെ സംരക്ഷിക്കുന്നതിന് അടിയന്തര നടപടികള്‍ സ്വീകരിക്കുമോ ; വിശദമാക്കാമോ?

സംസ്ഥാനത്തെ പട്ടികജാതി-പട്ടികവര്‍ഗ്ഗ ജനവിഭാഗങ്ങളെ സമൂഹത്തിന്റെ മുഖ്യധാരയിലേക്ക്ചേര്‍ത്തു നിര്‍ത്തുന്നതിനും ആധുനിക ജീവിത സാഹചര്യങ്ങളുമായി അടുപ്പിക്കുന്നതിനും വിദ്യാര്‍ത്ഥികള്‍ക്ക് ഡിജിറ്റല്‍ പഠന സൗകര്യങ്ങള്‍ ഒരുക്കുന്ന പദ്ധതിയുടെ പുരോഗതി വ്യക്തമാക്കുമോ;

മുന്‍ സര്‍ക്കാര്‍ പ്രാവര്‍ത്തികമാക്കിയ പഠനമുറികളും സാമൂഹ്യ പഠനമുറികളും ഡിജിറ്റല്‍ പഠനമുറികളാക്കി മാറ്റുന്നതിനു നടപടി സ്വീകരിച്ചിട്ടുണ്ടോ;

ഡിജിറ്റല്‍ വിദ്യാഭ്യാസത്തോടൊപ്പം പ്രസ്തുത വിദ്യാര്‍ത്ഥികള്‍ക്ക് ക്ലാസ്‍മുറി പഠനവും ലഭ്യമാക്കുന്നതിനുള്ള സാധ്യത പരിശോധിക്കുമോ?

ഈ സര്‍ക്കാര്‍ അധികാരത്തില്‍ വന്നതിനു ശേഷം പട്ടികജാതി വിഭാഗങ്ങളുടെ ക്ഷേമത്തിനായി നടപ്പാക്കിവരുന്ന പ്രവര്‍ത്തനങ്ങള്‍ എന്തെല്ലാമാണെന്ന് വ്യക്തമാക്കാമോ;

കോവിഡിന്റെ ഭീഷണിയെ മറികടന്നുകൊണ്ട്പട്ടികജാതി വികസന വകുപ്പ് മുഖാന്തിരം ധനസഹായ വിതരണം പൂര്‍ത്തിയാക്കുന്നതിന് നടത്തിയ പ്രവര്‍ത്തനങ്ങള്‍ വിവരിക്കാമോ ;

ധനസഹായ വിതരണത്തിനായി ഇതുവരെ ചെലവഴിച്ച തുകയുടെ വിശദാംശം ലഭ്യമാണോ; എങ്കില്‍ നല്‍കുമോ;

പട്ടികജാതി വിഭാഗത്തിലെ വിദ്യാര്‍ത്ഥികള്‍ക്കുള്ള വിദ്യാഭ്യാസ ആനുകൂല്യങ്ങള്‍ സമയബന്ധിതമായി വിതരണം നടത്തിയിട്ടുണ്ടോ;

ഓണ്‍ലൈന്‍ പഠന സൗകര്യമൊരുക്കുന്നതിനും വിദ്യാഭ്യാസ ആനുകൂല്യം നല്‍കുന്നതിനുമായി ഈ സര്‍ക്കാരിന്റെ കാലത്ത് ഇതുവരെ ചെലവഴിച്ച തുകയുടെ വിവരം ലഭ്യമാക്കുമോ?

കേരളത്തിൽ എത്ര പ്രീമെട്രിക്ക്/ പോസ്റ്റ് മെട്രിക്ക് ഹോസ്റ്റലുകൾ മോഡൽ റസിഡൻസി സ്കൂളുകൾ എന്നിവ ഉണ്ടെന്ന് ജില്ല തിരിച്ച് വ്യക്തമാക്കാമോ;

പ്രസ്തുത ഹോസ്റ്റലുകളിൽ എത്ര കുട്ടികൾ താമസിച്ചു പഠിക്കുന്നുണ്ടെന്നും കോവിഡിന്റെ സാഹചര്യത്തിൽ കുട്ടികൾ ഹോസ്റ്റലുകളിൽ താമസം തുടരുന്നുണ്ടോ എന്നും വ്യക്തമാക്കാമോ;

ഓൺലൈൻ വിദ്യാഭ്യാസത്തിന് ഇവർക്ക് സൗകര്യമുണ്ടോ എന്നും എന്തെല്ലാം സംവിധാനങ്ങളാണ് സർക്കാർ ഏർപ്പെടുത്തിയതെന്നും വ്യക്തമാക്കാമോ;

ഓൺലൈൻ വിദ്യാഭ്യാസത്തിനായി എസ്.സി./ എസ്.ടി. വിഭാഗത്തിലെ എത്ര കുട്ടികൾക്ക് സർക്കാർ ഫോണുകൾ / ടാബുകൾ നൽകിയിട്ടുണ്ടെന്ന് വ്യക്തമാക്കാമോ?

പട്ടികജാതി/ പട്ടികവർഗ്ഗ വിദ്യാർത്ഥികൾക്കായി എത്ര കോച്ചിംഗ് സെന്ററുകൾ പ്രവർത്തിക്കുന്നുണ്ടെന്നും അവ ഏതൊക്കെയാണെന്നും ജില്ല തിരിച്ചു വ്യക്തമാക്കാമോ;

ഓരോ കോച്ചിംഗ് സെന്ററിലും ഏതെല്ലാം വിഷയങ്ങളിലാണ് കോച്ചിംഗ് നൽകുന്നതെന്നും ഇപ്പോൾ എത്ര കുട്ടികൾ വീതം പരിശീലനം നേടി വരുന്നുണ്ടെന്നും വ്യക്തമാക്കാമോ;

എന്തെല്ലാം സംവിധാനങ്ങൾ ഇത്തരത്തിൽ കോച്ചിംഗ് സെന്ററുകളിലുണ്ടെന്നും ഒരു കോച്ചിംഗ് സെന്ററിന്റെ നടത്തിപ്പിന് ഒരു മാസത്തെ ചെലവ് എത്രയാണെന്നും വ്യക്തമാക്കാമോ;

കോച്ചിംഗ് സെന്ററുകൾ ഇല്ലാത്ത ജില്ലകളിൽ പുതുതായി ഇവ സ്ഥാപിക്കാൻ നടപടികൾ സ്വീകരിക്കുമോ എന്ന് അറിയിക്കാമോ?

സംസ്ഥാനത്ത്പട്ടിക ജാതി- പട്ടിക വര്‍ഗ്ഗ വിഭാഗത്തില്‍പ്പെട്ട വിദ്യാര്‍ത്ഥികള്‍ക്ക് എന്തെല്ലാം ആനുകൂല്യങ്ങളാണ് ഇപ്പോള്‍ ലഭ്യമാക്കി വരുന്നതെന്ന് വ്യക്തമാക്കുമോ;

പട്ടിക ജാതി- പട്ടിക വര്‍ഗ്ഗ വിഭാഗത്തിലുള്ള കുട്ടികളുടെ പഠന സൗകര്യങ്ങള്‍ വര്‍ദ്ധിപ്പിക്കുന്നതിനായി പഠന മുറി എന്ന പേരില്‍ ആരംഭിച്ച പദ്ധതിയിലൂടെ എത്ര വിദ്യാര്‍ത്ഥികള്‍ക്കാണ് സഹായം ലഭ്യമാക്കിയിട്ടുള്ളതെന്ന കണക്ക് ലഭ്യമാണെങ്കില്‍ നല്‍കുമോ;

പ്രസ്തുത പദ്ധതിയില്‍ ഉള്‍പ്പെട്ടിട്ടില്ലാത്ത വിദ്യാര്‍ത്ഥികള്‍ക്ക് എന്തെല്ലാം സഹായങ്ങളാണ് ലഭ്യമാക്കുന്നതെന്ന് വ്യക്തമാക്കുമോ; വിശദാംശം നല്‍കുമോ;

പട്ടിക ജാതി- പട്ടിക വര്‍ഗ്ഗ വിദ്യാര്‍ത്ഥികള്‍ക്ക് ഓണ്‍ലൈന്‍ പഠന സൗകര്യത്തിന് എന്തൊക്കെ പദ്ധതികളാണ് നടപ്പിലാക്കി കൊണ്ടിരിക്കുന്നതെന്ന് വ്യക്തമാക്കുമോ?

സ്വാശ്രയ പ്രൊഫഷണല്‍ കോളേജുകളില്‍ അഡ്മിഷന്‍ ലഭിച്ചിട്ടുള്ള പട്ടിക ജാതി/വര്‍ഗ്ഗ വിഭാഗങ്ങളില്‍പ്പെട്ട വിദ്യാര്‍ത്ഥികള്‍ക്ക് ഫീസ് ആനുകൂല്യം നല്‍കുന്നതിന് എന്തെങ്കിലും തടസ്സങ്ങളുണ്ടോ ;

ഉണ്ടെങ്കില്‍ അവ പരിഹരിക്കുന്നതിന് നടപടി സ്വീകരിക്കാമോ ?

മങ്കട മണ്ഡലത്തിൽ ഓൺലൈൻ പഠന സൗകര്യമില്ലാത്ത പട്ടികജാതി വിഭാഗത്തിൽപെട്ട എത്ര വിദ്യാർത്ഥികൾ ഉള്ളതായിട്ടാണ് കണ്ടെത്തിയിട്ടുള്ളത്; ഇവർക്ക് പഠനസൗകര്യം ഒരുക്കുന്നതിന് എന്തെല്ലാം സഹായം വകുപ്പ് നൽകിയിട്ടുണ്ട്; വിശദാംശം ലഭ്യമാക്കുമോ;

പ്രസ്തുത മണ്ഡലത്തിലെ പട്ടികജാതി വിദ്യാർഥികളിൽ എത്രപേർക്ക് വകുപ്പിന്റെ ഏതെങ്കിലും തരത്തിലുള്ള ആനുകൂല്യങ്ങൾ ലഭിക്കുന്നുണ്ട്; ആനുകൂല്യം ലഭിക്കാത്ത അർഹരായ എത്ര വിദ്യാർത്ഥികളുണ്ട്; വിശദമാക്കുമോ ;

മങ്കട മണ്ഡലത്തിലെ അർഹരായ എല്ലാ പട്ടികജാതി വിദ്യാർത്ഥികൾക്കും സർക്കാർ നൽകുന്ന സഹായങ്ങളും ആനുകൂല്യങ്ങളും ഉറപ്പുവരുത്തുന്നതിന് ആവശ്യമായ നടപടി സ്വീകരിക്കുമോ?

പട്ടികജാതി വകുപ്പിന്റെ കീഴിൽ പ്രവർത്തിക്കുന്ന 44 ഐ.ടി.ഐ. കളുടെ പ്രവർത്തനം മെച്ചപ്പെടുത്തുന്നതിനായി വകുപ്പ് ഡയറക്ടർക്ക് സമർപ്പിച്ചിട്ടുളള ഗുലാത്തി കമ്മീഷൻ റിപ്പോർട്ട് പരിഗണനയിലുണ്ടോ; ഇല്ലെങ്കിൽ ബന്ധപ്പെട്ട ഫയലിന്റെ ഇപ്പോഴത്തെ അവസ്ഥ എന്തെന്ന് വ്യക്തമാക്കാമോ;

പട്ടികജാതി വികസന വകുപ്പിന്റെ കീഴിൽ പി.പി.പി. പദ്ധതി പ്രകാരം ആരംഭിച്ച ഐ.ടി.ഐ. കളിൽ പത്ത് വര്‍ഷം കഴിഞ്ഞിട്ടും തസ്തിക സൃഷ്ടിക്കാൻ കഴിയാത്ത സാഹചര്യമുണ്ടോ; എങ്കില്‍ കാരണം വ്യക്തമാക്കാമോ;

വ്യവസായിക പരിശീലന വകുപ്പിൽ എംപ്ളോയബിലിറ്റി സ്കില്‍ പഠിപ്പിക്കാന്‍ മുഴുവൻ സമയ ഇൻസ്ട്രക്ടറെ നിയമിക്കുമ്പോൾ അതേ സിലബസ് പഠിപ്പിക്കുന്ന പട്ടികജാതി ഐ.ടി.ഐ. കളിൽ ഒരു മാസത്തേയ്ക്ക് മാത്രം ഗസ്റ്റ് ഇന്‍സ്ട്രക്ടറെ നിയമിക്കുന്നത് സർക്കാരിന്റെ ശ്രദ്ധയിൽപ്പെട്ടിട്ടുണ്ടോ; ഉണ്ടെങ്കിൽ ഇതിന്മേൽ എന്ത് നടപടിയാണ് സ്വീകരിച്ചിട്ടുളളതെന്ന് വ്യക്തമാക്കാമോ?

പട്ടികജാതി ക്ഷേമ വകുപ്പിന്റെ കീഴിലുള്ള മാവേലിക്കര ഉമ്പര്‍നാട് ഐ.ടി.ഐ-യ്ക്ക് പുതിയ കെട്ടിടം നിര്‍മ്മിക്കുന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത കെട്ടിടം പൂര്‍ത്തീകരിക്കുവാന്‍ നിലവില്‍ അനുവദിക്കപ്പെട്ട തുക പര്യാപ്തമല്ല എന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത കെട്ടിടനിർമ്മാണം പൂർത്തിയാക്കുവാൻ ആവശ്യമായ തുക അനുവദിക്കുമോ; വിശദവിവരം ലഭ്യമാക്കുമോ?

കോവിഡ് പ്രതിസന്ധിമൂലം ട്രൈബല്‍ ഹോസ്റ്റലുകള്‍ അടച്ചതിനാല്‍ പട്ടികവര്‍ഗ്ഗ വിദ്യാര്‍ത്ഥികള്‍ അനുഭവിക്കുന്ന പ്രയാസം ശ്രദ്ധയില്‍പ്പെട്ടിട്ടുണ്ടോ;

വാക്സിനേഷനില്‍ മുന്‍ഗണന നല്‍കി ട്രൈബല്‍ ഹോസ്റ്റലുകള്‍ തുറക്കുന്നതിന് അടിയന്തര നടപടികള്‍ സ്വീകരിക്കുമോ; വ്യക്തമാക്കാമോ?

അട്ടപ്പാടിയില്‍ പട്ടികവര്‍ഗ്ഗ വിദ്യാര്‍ത്ഥികള്‍ക്കായുള്ള പ്രീ-മെട്രിക് ഹോസ്റ്റലുകള്‍ സംബന്ധിച്ച വിശദവിവരം ലഭ്യമാക്കുമോ;

പ്രസ്തുത പ്രീമെട്രിക് ഹോസ്റ്റലുകളില്‍ ആവശ്യമായ സൗകര്യങ്ങള്‍ ഇല്ലാത്തതുമൂലമുള്ള ബുദ്ധിമുട്ടുകള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ വിശദവിവരം നല്‍കുമോ;

പ്രസ്തുത പ്രീമെട്രിക് ഹോസ്റ്റലുകളില്‍ കൂടുതല്‍ അടിസ്ഥാന സൗകര്യം ഏര്‍പ്പെടുത്തുവാന്‍ ഉദ്ദേശിക്കുന്നുണ്ടോ; എങ്കില്‍ ഇത് സംബന്ധിച്ചുള്ള വിശദാംശം ലഭ്യമാക്കുമോ?

പട്ടികജാതിയിൽപ്പെട്ട വിദ്യാര്‍ത്ഥികളുടെയും യുവാക്കളുടെയും ഉന്നമനത്തിനായി വിവിധ മത്സര പരീക്ഷകള്‍ക്ക് അവരെ തയ്യാറാക്കുന്നതിനായുള്ള എന്തെങ്കിലും പദ്ധതി നിലവിലുണ്ടോ; എങ്കില്‍ വിശദാംശം വ്യക്തമാക്കുമോ?

പട്ടികജാതി വിഭാഗത്തിലെ യുവതീ-യുവാക്കള്‍ക്ക് സംരംഭങ്ങള്‍ ആരംഭിക്കാന്‍ വകുപ്പ് തയ്യാറാക്കിയ പദ്ധതികള്‍ എന്തെല്ലാമാണെന്ന് വിശദമാക്കുമോ;

വ്യവസായ സംരംഭങ്ങള്‍ ആരംഭിക്കുന്നതിനും ലാഭകരമായി മുന്നോട്ട് കൊണ്ടു പോകുന്നതിനും വകുപ്പ് ഏതെങ്കിലും തരത്തിലുള്ള പിന്തുണ ലഭ്യമാക്കുന്നുണ്ടോ?

ദേശീയ തൊഴിലുറപ്പ് ട്രൈബല്‍ പ്ലസ് സംസ്ഥാനത്ത് നടപ്പിലാക്കി വരുന്നുണ്ടോ; വിശദാംശങ്ങള്‍ അറിയിക്കാമോ;

ട്രൈബല്‍ പ്ലസ് പദ്ധതിയില്‍ സംസ്ഥാനത്ത് തൊഴിലവസരങ്ങള്‍ ഒരുക്കിയിട്ടുണ്ടോ; അവ എവിടെയൊക്കെയാണ് നടപ്പില്‍ വരുത്തിയിരിക്കുന്നതെന്ന് വ്യക്തമാക്കാമോ;

ട്രൈബല്‍ പ്ലസ് പദ്ധതിയുടെ മേല്‍നോട്ടവും ചുമതലയും ആയതിന്റെ ശക്തമായ മോണിട്ടറിംഗ് സംവിധാനവും സംസ്ഥാനത്ത് ഏതുരീതിയില്‍ നടപ്പില്‍ വരുത്തുന്നുവെന്ന് വിശദമാക്കാമോ?

തൊഴില്‍രഹിതരായ പട്ടികജാതി/പട്ടികവര്‍ഗ്ഗ വിഭാഗത്തില്‍ ഉള്‍പ്പെട്ടവര്‍ക്ക് തൊഴില്‍ നേടുന്നതിനായി എന്തെങ്കിലും പദ്ധതി ആവിഷ്ക്കരിച്ചിട്ടുണ്ടോ; വിശദാംശം വ്യക്തമാക്കുമോ?

പൊതുമേഖലാ സ്ഥാപനങ്ങളിൽ പട്ടികജാതി/പട്ടികവർഗ്ഗ പ്രാതിനിധ്യം ഏറ്റവും ഒടുവിൽ അവലോകനം ചെയ്തത് എന്നാണ്; ഇതുസംബന്ധിച്ച് പൊതുമേഖല സ്ഥാപനങ്ങൾ തിരിച്ചുള്ള കണക്ക് നല്‍കാമോ;

എസ്.സി./എസ്.റ്റി. സ്പെഷ്യൽ റിക്രൂട്ട്മെൻ്റ് നടത്തുന്നതിന് സ്വീകരിച്ചു വരുന്ന നടപടിക്രമങ്ങൾ വിശദമാക്കാമോ; നിയമനനടപടികൾ പൂർത്തിയാക്കുന്നതിൽ കാലതാമസം ഉണ്ടാകുന്നുണ്ടോ; ഉണ്ടെങ്കിൽ അതിനു കാരണമെന്താണ്; പരിഹരിക്കാൻ സ്വീകരിച്ച നടപടികൾ വിശദീകരിക്കാമോ;

പട്ടികജാതി/പട്ടികവർഗ്ഗ വിദ്യാർഥികളുടെ വിദ്യാഭ്യാസത്തിനായി കേന്ദ്രസർക്കാർ നൽകിവരുന്ന ആനുകൂല്യങ്ങൾ എന്തെക്കെയാണ്; ഈയിനത്തില്‍ കഴിഞ്ഞ അഞ്ചു വർഷം ലഭിച്ച തുകയുടെ വിശദാംശങ്ങൾ ലഭ്യമാക്കാമോ; ഇത് ലഭിക്കുന്നതിനുള്ള മാനദണ്ഡങ്ങളെന്തൊക്കെയാണെന്ന് വിശദീകരിക്കാമോ;

കോവിഡ് കാലത്ത് വിദ്യാർഥികൾക്ക് എന്തെല്ലാം പഠന സഹായങ്ങളാണ് പട്ടികജാതി, പട്ടികവർഗ്ഗ വികസന വകുപ്പുകള്‍ ചെയ്തതെന്ന് വ്യക്തമാക്കാമോ; ഈ ഇനത്തിലുണ്ടായ സാമ്പത്തിക ബാദ്ധ്യത എത്രയായിരുന്നുവെന്ന് ഇനം തിരിച്ച് വ്യക്തമാക്കാമോ;

പട്ടികജാതി വികസന വകുപ്പിൽ ഭവനനിര്‍മ്മാണത്തിനായി കഴിഞ്ഞ 5 വർഷം വക കൊളളിച്ചിരുന്ന തുകയും ലൈഫ് പദ്ധതിക്ക് കൈമാറിയ തുകയും വർഷം തിരിച്ച് വ്യക്തമാക്കാമോ; എത്ര വീടുകൾ നിമ്മാണത്തിനായി ഏറ്റെടുത്തുവെന്നും അതിൽ എത്ര വീടുകളുടെ നിർമ്മാണം പൂർത്തിയാക്കിയെന്നും വർഷം തിരിച്ച് വ്യക്തമാക്കാമോ;

പട്ടികജാതി/പട്ടികവർഗ്ഗ വികസന വകുപ്പ് ഭവന നിർമ്മാണ പദ്ധതിയിലെ വ്യവസ്ഥകളിൽ എന്തെല്ലാം മാറ്റം വരുത്തിയാണ് ലൈഫ് പദ്ധതി നടപ്പാക്കിയത്; ഇതുമൂലം പട്ടിക വിഭാഗക്കാരുടെ റേഷൻ കാർഡിലെ എല്ലാ കുടുംബങ്ങൾക്കും ഭവനം ലഭിക്കാതെ വന്നിട്ടുണ്ടോ; ഉണ്ടങ്കിൽ അതിന് പരിഹാരം കാണാൻ സ്വീകരിച്ച നടപടി വ്യക്തമാക്കാമോ?

നായാടി സമുദായത്തെ പട്ടികവർഗ്ഗ വിഭാഗ പട്ടികയിൽ ഉൾപ്പെടുത്തുന്നതിനായി 2010 ജൂലൈ 14 ന് 6903/G1/10SCSTDD നമ്പറായി കേന്ദ്ര സർക്കാരിന് നൽകിയ ശിപാർശയ്ക്ക് ശേഷം അതിന്മേൽ സ്വീകരിച്ച തുടർ നടപടികൾ സംബന്ധിച്ച വിശദാംശങ്ങൾ ലഭ്യമാക്കാമോ;

പ്രസ്തുത വിഷയത്തിൽ കിർത്തഡ്‌സ് പഠനം നടത്തിയിട്ടുണ്ടോ; എങ്കിൽ റിപ്പോർട്ടിന്റെ പകർപ്പും വിശദാംശങ്ങളും ലഭ്യമാക്കാമോ?

പട്ടികജാതി വികസന വകുപ്പിന് കീഴില്‍ തിരൂരങ്ങാടി, പരപ്പനങ്ങാടി നഗരസഭകളില്‍ നിലവില്‍ പട്ടികജാതി വികസന ഓഫീസര്‍ തസ്തിക ഇല്ലാത്തതിനാല്‍ പട്ടികജാതി വികസന പദ്ധതികള്‍ സമയബന്ധിതമായി നിര്‍വ്വഹണം നടത്തുന്നതിന് സാധിക്കാത്തത് ശ്രദ്ധയില്‍പ്പെട്ടിട്ടുണ്ടോ;

മേല്‍ സാഹചര്യത്തില്‍ തിരൂരങ്ങാടി, പരപ്പനങ്ങാടി നഗരസഭകളില്‍ പട്ടികജാതി വികസന ഓഫീസര്‍ തസ്തിക സൃഷ്ടിക്കുന്നതിന് നടപടികള്‍ ആരംഭിച്ചിട്ടുണ്ടോയെന്നറിയിക്കാമോ?

സംസ്ഥാന പട്ടികജാതി വികസന കോര്‍പ്പറേഷനില്‍ വിവിധ ഓഫീസുകളിലായി ഓഫീസ് അറ്റന്‍ഡന്റ് തസ്തികയില്‍ എത്ര ഒഴിവുകള്‍ നിലവിലുണ്ട്; ഇതില്‍ എത്ര ഒഴിവുകള്‍ പി.എസ്.സി.ക്ക് റിപ്പോര്‍ട്ട് ചെയ്തിട്ടുണ്ട്; പി.എസ്.സി.ക്ക് റിപ്പോര്‍ട്ട് ചെയ്യാത്ത എത്ര ഒഴിവുകളുണ്ട്; റിപ്പോര്‍ട്ട് ചെയ്യാത്ത ഒഴിവുകള്‍ ഏതെല്ലാം ഓഫീസുകളിലാണ് നിലവിലുള്ളതെന്ന് ഓഫീസ് തിരിച്ച്‌ വ്യക്തമാക്കുമോ;

പ്രസ്തുത തസ്തികയില്‍ 31.12.2021 വരെ പ്രതീക്ഷിത ഒഴിവുകള്‍ എത്രയാണ്; ഏതെല്ലാം തീയതികളില്‍ എത്ര ഒഴിവുകള്‍ ഏതെല്ലാം ഓഫീസുകളില്‍ നിലവില്‍ വരുമെന്ന് അറിയിക്കുമോ; ഒഴിവുകള്‍ പി.എസ്.സി.ക്ക് റിപ്പോര്‍ട്ട് ചെയ്തിട്ടുണ്ടോ; വിശദാംശം ലഭ്യമാക്കുമോ;

പ്രസ്തുത സ്ഥാപനത്തിലെ ഓഫീസ് അറ്റന്‍ഡന്റ് തസ്തികയില്‍ നിലവിലുള്ള എല്ലാ ഒഴിവുകളും അടിയന്തരമായി പി.എസ്.സി.ക്ക് റിപ്പോര്‍ട്ട് ചെയ്യുന്നതിന് കര്‍ശന നിര്‍ദ്ദേശം നല്‍കുമോ?

വേടര്‍ സമുദായാംഗങ്ങള്‍ തിങ്ങിപ്പാര്‍ക്കുന്ന ഇലകമണ്‍ ഗ്രാമപഞ്ചായത്തിലെ തുമ്പയില്‍ക്കോണം വേടര്‍കുന്ന് കോളനിയില്‍ കോര്‍പ്പസ് ഫണ്ട് പദ്ധതിയില്‍ ഉള്‍പ്പെടുത്തി കോളനി സങ്കേതത്തിന് സംരക്ഷണഭിത്തി നിര്‍മ്മിക്കുന്നതിനായി സ്വീകരിച്ചിട്ടുള്ള നടപടികള്‍ വിശദമാക്കാമോ?

എസ്.സി. കോര്‍പ്പസ് ഫണ്ട് കാര്യക്ഷമമായി വിനിയോഗിക്കുന്നതിന് സ്വീകരിച്ച നടപടികള്‍ വിശദീകരിക്കാമോ;

ഇതിനായി എത്ര കോടി രൂപ അനുവദിച്ചു; എത്ര രൂപ ചെലവഴിച്ചു; എത്ര കോടി രൂപയുടെ നിര്‍മ്മാണ പ്രവര്‍ത്തനങ്ങള്‍ നടക്കുന്നുണ്ട്; ഒരു രൂപ പോലും വിനിയോഗിക്കാത്ത എത്ര പദ്ധതികളുണ്ട്; വ്യക്തമാക്കാമോ;

എസ്.സി. വിദ്യാര്‍ത്ഥികളുടെ വിദ്യാഭ്യാസത്തിന് സഹായമായി 2019-20, 2020-21 കാലയളവില്‍ എത്ര രൂപ അനുവദിച്ചു; എത്ര രൂപ ചെലവഴിച്ചു?

കാട്ടാക്കട നിയോജക മണ്ഡലത്തിലെ പട്ടികജാതി കോളനികള്‍ ഏതൊക്കെയാണെന്നും ഓരോ കോളനിയിലെയും കുടുംബങ്ങളുടെ എണ്ണം എത്രയെന്നും പഞ്ചായത്ത് തിരിച്ച് വ്യക്തമാക്കാമോ;

പ്രസ്തുത മണ്ഡലത്തില്‍ കഴിഞ്ഞ അഞ്ച് വര്‍ഷത്തിനിടയില്‍ അനുവദിച്ച, കോര്‍പ്പസ് ഫണ്ട് ഉപയോഗിച്ചുള്ള പ്രവൃത്തികളെ കുറിച്ചും അവയുടെ നിലവിലെ സ്ഥിതി സംബന്ധിച്ചും വിശദമാക്കാമോ?

2016 ജൂൺ മുതൽ നാളിതുവരെ തൃശൂർ നിയോജക മണ്ഡലത്തിൽ എത്ര പട്ടികജാതി/പട്ടികവർഗ്ഗ കുടുംബങ്ങൾക്ക് ചികിത്സാ ധനസഹായം, വിദ്യാഭ്യാസ ധനസഹായം എന്നിവ നൽകിയിട്ടുണ്ട് എന്ന് അറിയിക്കാമോ?

പട്ടികജാതി വകുപ്പ് മുഖാന്തിരം ഈ വിഭാഗത്തില്‍ ഉള്‍പ്പെടുന്ന രോഗികള്‍ക്ക് തുടര്‍ചികിത്സാര്‍ത്ഥം അനുവദിക്കുന്ന ചികിത്സാ ധനസഹായ പദ്ധതി സംബന്ധിച്ച വിശദാംശം നല്‍കാമോ;

പ്രസ്തുത ധനസഹായത്തിനായി അപേക്ഷിക്കുമ്പോള്‍ എന്തൊക്കെ രേഖകള്‍ ഹാജരാക്കണമെന്നറിയിക്കുമോ;

പ്രസ്തുത അപേക്ഷ ആര്‍ക്കാണ് നല്‍കേണ്ടതെന്നും എപ്രകാരമാണ് നല്‍കേണ്ടതെന്നും വിശദീകരിക്കാമോ;

എം.എല്‍.എ.മാര്‍ മുഖേന വകുപ്പ് മന്ത്രിക്ക് നേരിട്ട് അപേക്ഷ നല്‍കാമോ;

ഒരാള്‍ക്ക് തുടര്‍ചികിത്സാര്‍ത്ഥം പരമാവധി എത്ര രൂപ വരെ അനുവദിക്കുമെന്ന് വിശദമാക്കാമോ?

2016 മുതല്‍ നാളിതുവരെ പേരാമ്പ്ര നിയോജക മണ്ഡലത്തിലെ പട്ടികജാതി/ പട്ടികവര്‍ഗ്ഗ വിഭാഗത്തിൽപ്പെട്ട എത്ര പേർക്ക് വിദ്യാഭ്യാസ ധനസഹായം, ചികിത്സാധന സഹായം എന്നിവ അനുവദിച്ചിട്ടുണ്ടെന്ന് വർഷാടിസ്ഥാനത്തിൽ വിശദമാക്കാമോ?

അംബേദ്കര്‍ ഗ്രാമം പദ്ധതി പ്രകാരം ഭരണാനുമതി നൽകിയ പ്രവൃത്തികള്‍ സമയബന്ധിതമായി പൂര്‍ത്തീകരിക്കാതെ ഇഴഞ്ഞുനീങ്ങുകയാണെന്ന പരാതി ശ്രദ്ധയില്‍പ്പെട്ടിട്ടുണ്ടോ;

പ്രസ്തുത പ്രവൃത്തികള്‍ ഏജന്‍സികള്‍ക്ക് നേരിട്ട് നല്‍കുന്നതിന് പകരം ഇ-ടെണ്ടര്‍ മുഖേന കരാര്‍ നല്‍കുന്നത് പരിഗണിക്കുന്നുണ്ടോ; ഇക്കാര്യത്തില്‍ എന്തെല്ലാം നടപടികളാണ് സ്വീകരിക്കുകയെന്ന് വിശദമാക്കാമോ?

ഏറനാട് മണ്ഡലത്തില്‍ ഗോത്ര ജീവിക പദ്ധതി നടപ്പിലാക്കിയിട്ടുണ്ടോ; വ്യക്തമാക്കുമോ;

പ്രസ്തുത പദ്ധതി പ്രകാരം എത്രയാളുകള്‍ക്ക് പരിശീലനം നല്‍കിയിട്ടുണ്ടെന്ന് വിശദമാക്കുമോ;

ഗോത്ര ജീവിക പദ്ധതി മുഖേനയുള്ള സംഘങ്ങള്‍ക്ക് എന്തെല്ലാം ധനസഹായങ്ങളാണ് നല്‍കുന്നതെന്ന് വ്യക്തമാക്കുമോ;

പ്രസ്തുത പദ്ധതിയുടെ ഉദ്ദേശ്യ ലക്ഷ്യങ്ങള്‍ വെളിപ്പെടുത്തുമോ?

സംസ്ഥാനത്തെ പട്ടികവര്‍ഗ്ഗ വിഭാഗക്കാരുടെ ചികിത്സാസൗകര്യങ്ങളും ഇപ്രകാരമുള്ള ചികിത്സാസഹായം അനുവദിക്കുന്നതിനുളള മാനദണ്ഡങ്ങളും എന്തെല്ലാമെന്ന് വിശദമാക്കുമോ?

കഴിഞ്ഞ സര്‍ക്കാര്‍ വര്‍ക്കല മണ്ഡലത്തില്‍ അംബേദ്കര്‍ സ്വയം പര്യാപ്ത ഗ്രാമം പദ്ധതിയില്‍ ഉള്‍പ്പെടുത്തി അനുവദിച്ച പ്രവൃത്തികള്‍ ഏതെല്ലാമെന്ന് വ്യക്തമാക്കാമോ;

അവയുടെ നിര്‍മ്മാണ പുരോഗതിയും സ്വീകരിച്ചിട്ടുള്ള നടപടികളെയും സംബന്ധിച്ച വിശദ വിവരം നല്‍കാമോ;

പൂര്‍ത്തീകരിക്കാത്ത പ്രവൃത്തികള്‍ അടിയന്തരമായി പൂര്‍ത്തീകരിക്കുന്നതിന് നടപടി സ്വീകരിക്കുമോ?

മുന്‍ സര്‍ക്കാരിന്റെ കാലത്ത് ആലത്തൂര്‍ നിയോജക മണ്ഡലത്തില്‍ അംബേദ്കര്‍ ഗ്രാമം പദ്ധതി പ്രകാരം അനുവദിച്ച പദ്ധതികള്‍ ഏതെല്ലാം;

ഇവയിൽ ഏതൊക്കെ പദ്ധതികള്‍ പൂര്‍ത്തിയായെന്നും ബാക്കിയുള്ളവയുടെ പ്രവര്‍ത്തന പുരോഗതിയും അറിയിക്കാമോ?

കഴിഞ്ഞ സര്‍ക്കാരിന്റെ കാലത്ത് വാമനപുരം നിയോജക മണ്ഡലത്തില്‍ പട്ടികജാതി, പട്ടികവര്‍ഗ്ഗ വികസന വകുപ്പുകള്‍ നടത്തിയ പദ്ധതികളും പരിഷ്ക്കാരങ്ങളും എന്തൊക്കെയെന്ന് വിശദമാക്കാമോ;

ഈ സര്‍ക്കാര്‍ പുതുതായി ആവിഷ്ക്കരിക്കാന്‍ ഉദ്ദേശിക്കുന്ന പദ്ധതികള്‍ എന്തൊക്കെയെന്ന് വിശദമാക്കാമോ?

ഷൊര്‍ണ്ണൂര്‍ മണ്ഡലത്തില്‍ പട്ടികജാതി പട്ടികവർഗ വികസന വകുപ്പ് മുഖേന നടപ്പിലാക്കിവരുന്ന പദ്ധതികള്‍ ഏതെല്ലാമെന്ന് വ്യക്തമാക്കാമോ;

ഓരോ പദ്ധതിയുടെയും നിലവിലെ സ്ഥിതി വിശദമാക്കാമോ;

ഇതില്‍ ഏതെല്ലാം പ്രവൃത്തികള്‍ പൂര്‍ത്തീകരിച്ചെന്നും പൂര്‍ത്തീകരിയ്ക്കാത്തവ എന്നത്തേയ്ക്ക് പൂര്‍ത്തീകരിക്കുവാന്‍ കഴിയുമെന്നും വ്യക്തമാക്കാമോ?

നെന്മാറ മണ്ഡലത്തില്‍ ഭൂരഹിതരായ എത്ര ആദിവാസി വിഭാഗക്കാര്‍ക്കാണ് വനാവകാശ നിയമപ്രകാരം ഭൂമി അനുവദിച്ചിട്ടുളളതെന്ന് വിശദമാക്കുമോ;

പ്രസ്തുത മണ്ഡലത്തില്‍ നിലവില്‍ എത്രപേര്‍ക്കാണ് സ്വന്തമായി ഭൂമി ഇല്ലാത്തതെന്ന് വിശദമാക്കുമോ;

അപ്രകാരം ഭൂമിയില്ലാത്ത മുഴുവന്‍പേര്‍ക്കും ഭൂമി അനുവദിക്കാന്‍ ആവശ്യമായ നടപടി സ്വീകരിക്കുമോ; ആയത് സംബന്ധിച്ച വിശദാംശം നല്‍കുമോ?

പട്ടികവര്‍ഗ്ഗ ഉപപദ്ധതികളുടെ ആസൂത്രണത്തിനും നിര്‍വ്വഹണത്തിനുമായി ജില്ലാ ആസൂത്രണ സമിതിയില്‍ സ്ഥിരംസെല്‍ രൂപീകരിക്കുന്നതിനുള്ള നടപടികള്‍ സ്വീകരിക്കുമോ; വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം പിന്നോക്ക വിഭാഗ വികസന കോര്‍പ്പറേഷന്‍ മുഖാന്തരം നടപ്പാക്കുന്ന പദ്ധതികള്‍ എന്തെല്ലാമാണെന്ന് അറിയിക്കുമോ;

കഴിഞ്ഞ സര്‍ക്കാരിന്റെ കാലത്ത് നടപ്പാക്കിയ വിവിധ വായ്പ പദ്ധതികളെക്കുറിച്ച് വിലയിരുത്തല്‍ നടത്തിയിട്ടുണ്ടോ; വിശദമാക്കുമോ;

കോവിഡ് പ്രതിസന്ധി മൂലം വായ്പാ തിരിച്ചടവില്‍ കുറവു വന്നിട്ടുണ്ടോ;

വായ്പാ കുടിശ്ശിക തീര്‍ക്കുന്നതിനായി എന്തെങ്കിലും ഇളവുകള്‍ നല്‍കുന്നതിനെക്കുറിച്ച് ആലോചിക്കുന്നുണ്ടോ;

പ്രസ്തുത കോര്‍പ്പറേഷന്‍ നടത്തുന്ന വായ്പ പദ്ധതികള്‍ കാലാനുസൃതമായി പരിഷ്ക്കരിക്കുന്നതിനും വ്യവസ്ഥകള്‍ ലളിതമാക്കി പദ്ധതികള്‍ കൂടുതല്‍ ഫലപ്രദമാക്കുന്നതിനും നടപടി സ്വീകരിക്കുമോ?

സംസ്ഥാനത്ത് എത്ര വിജ്ഞാൻവാടികൾ ഉണ്ടെന്ന് ജില്ല തിരിച്ച് വ്യക്തമാക്കാമോ;

വിജ്ഞാൻവാടികളുടെ പ്രവർത്തന ഉദ്ദേശ്യം എന്താണെന്നും ഇവിടങ്ങളിൽ നിലവിലുള്ള സൗകര്യങ്ങളും സംവിധാനങ്ങളും ഏതൊക്കെയാണെന്നും വ്യക്തമാക്കാമോ;

ഒരു വിജ്ഞാൻവാടിയിൽ എത്ര ജീവനക്കാരാണ് ഉള്ളതെന്നും ഇവരുടെ നിയമനം എങ്ങനെയാണെന്നും വ്യക്തമാക്കാമോ;

എല്ലാ വിജ്ഞാൻവാടികളിലും ആവശ്യത്തിന് ജീവനക്കാരുണ്ടോ; ഇല്ലെങ്കിൽ ജീവനക്കാരുടെ കുറവുള്ള വിജ്ഞാൻവാടികൾ ഏതൊക്കെയാണെന്ന് ജില്ല തിരിച്ച് വ്യക്തമാക്കാമോ;

ഒരു വിജ്ഞാനവാടിയുടെ നടത്തിപ്പിന് ഒരു മാസം എത്ര ചെലവ് വരുമെന്ന് വ്യക്തമാക്കാമോ?

ലോക്ക്ഡൗൺ മൂലം സ്ഥാപനങ്ങൾ തുറന്ന് പ്രവർത്തിക്കാൻ കഴിയാത്തതിനാൽ പട്ടികജാതി പട്ടികവർഗ്ഗ വികസനവകുപ്പ് മുഖേന അനുവദിച്ചിരുന്ന സ്വയംതൊഴിൽ വായ്പകളുടെ തിരിച്ചടവ് പലർക്കും മുടങ്ങിയിരിക്കുന്നത് ശ്രദ്ധയിൽപ്പെട്ടിട്ടുണ്ടോ;

തിരിച്ചടവിൽ കുടിശ്ശിക വന്നാൽ വായ്പകളിന്മേൽ ലഭിക്കേണ്ട സബ്‌സിഡി നഷ്ടപ്പെടുമെന്നതിനാൽ പ്രസ്തുത സബ്‌സിഡി പുനഃസ്ഥാപിക്കാൻ നടപടി സ്വീകരിക്കുമോ; വിശദാംശം വ്യക്തമാക്കുമോ?

കഴിഞ്ഞ സർക്കാരിന്റെ കാലത്ത് സ്പെഷ്യൽ റിക്രൂട്ട്മെന്റ് മുഖേന ഏതെല്ലാം വകുപ്പുകളിൽ പട്ടികവർഗ്ഗക്കാർക്ക് നിയമനം നൽകിയിട്ടുണ്ടെന്ന് വ്യക്തമാക്കാമോ;

ഇത്തരത്തിൽ വിവിധ വകുപ്പുകളിൽ നിയമനം നൽകിയവരുടെ എണ്ണം വകുപ്പ് തിരിച്ച് വ്യക്തമാക്കാമോ;

ഇത്തരത്തിൽ നിയമനം നേടിയവരിൽ സർവ്വീസിൽ തുടരാത്ത സാഹചര്യം നിലവിലുണ്ടോ;

എങ്കിൽ ഇങ്ങനെ സർവ്വീസിൽ നിന്നും പുറത്തു പോയവരുടെ എണ്ണം വകുപ്പ് തിരിച്ച് വ്യക്തമാക്കാമോ; സർവ്വീസിൽ നിന്നും പുറത്തു പോകാനുണ്ടായ കാരണം എന്താണെന്ന് വ്യക്തമാക്കാമോ;

ഇത് പരിഹരിക്കുന്നതിന് സർക്കാർ സ്വീകരിച്ചു വരുന്ന നടപടികൾ എന്തെല്ലാമെന്ന് വ്യക്തമാക്കാമോ?

കേരളത്തില്‍ സാമൂഹികമായും സാമ്പത്തികമായും പിന്നോക്കം നില്‍ക്കുന്ന കുടുംബി സമുദായത്തെ പട്ടികജാതി ലിസ്റ്റില്‍ ഉള്‍പ്പെടുത്താന്‍ വേണ്ടി സംസ്ഥാന സർക്കാർ കേന്ദ്ര സര്‍ക്കാരിന് ശുപാര്‍ശ നല്‍കിയിട്ടുണ്ടോ;

പ്രസ്തുത ശുപാര്‍ശയിന്മേല്‍ സ്വീകരിക്കപെട്ടിട്ടുള്ള നടപടികള്‍ എന്തെന്ന് വിശദമാക്കാമോ;

ഇതു സംബന്ധിച്ച് റിപ്പോര്‍ട്ട് സമര്‍പ്പിക്കാന്‍ കിര്‍ത്താഡ്സിനെ ചുമതലപ്പെടുത്തിയിട്ടുണ്ടോ;

ആയത് സംബന്ധിച്ച് കിര്‍ത്താഡ്സ് റിപ്പോര്‍ട്ട് സമര്‍പ്പിച്ചിട്ടുണ്ടോ; ഉണ്ടെങ്കില്‍ ആയതിന്റെ പകര്‍പ്പ് ലഭ്യമാക്കാമോ; പ്രസ്തുത റിപ്പോര്‍ട്ടില്‍ സ്വീകരിച്ചിട്ടുള്ള നടപടി വിശദമാക്കാമോ;

ഇല്ലെങ്കില്‍ പ്രസ്തുത റിപ്പോര്‍ട്ട് അടിയന്തിരമായി സമര്‍പ്പിക്കുവാന്‍ നടപടി സ്വീകരിക്കുമോ?

സംസ്ഥാനത്ത് കിര്‍ത്താഡ്സിന്റെ പ്രവര്‍ത്തന ലക്ഷ്യങ്ങളെന്തെല്ലാമാണ്;

സി.എ. ജി. റിപ്പോര്‍ട്ട്, കേരള അഡ്മിനിസ്ട്രേറ്റീവ് ട്രൈബ്യൂണല്‍ വിധി, പട്ടികജാതി, ഗോത്രവര്‍ഗ്ഗ കമ്മിഷന്റെ ഉത്തരവ് തുടങ്ങിയവയില്‍ കിര്‍ത്താഡ്സിന്റെ വീഴ്ചകള്‍ ചൂണ്ടിക്കാണിക്കുകയുണ്ടായോ;

കിര്‍ത്താഡ്സിന്റെ സ്ഥാപിത ലക്ഷ്യങ്ങള്‍ പൂര്‍ത്തീകരിച്ചിട്ടില്ലെന്നും വിവിധ പദ്ധതികളുടെ നടത്തിപ്പില്‍ ക്രമക്കേടും വീഴ്ച്ചയുമുണ്ടെന്നും സി.എ.ജി. റിപ്പോര്‍ട്ടില്‍ പരാമര്‍ശിക്കുകയുണ്ടായോ;

പ്രസ്തുത റിപ്പോര്‍ട്ടിന്റെ അടിസ്ഥാനത്തില്‍ കിര്‍ത്താഡ്സിന്റെ പ്രവര്‍ത്തനം മെച്ചപ്പെടുത്തുന്നതിനായി സര്‍ക്കാര്‍ സ്വീകരിച്ചിട്ടുള്ള നടപടികളെന്തെല്ലാമെന്നു വ്യക്തമാക്കുമോ?

സംസ്ഥാനത്ത് വനാന്തരങ്ങളില്‍ അധിവസിക്കുന്ന പ്രാക്തന ഗോത്രവര്‍ഗ്ഗത്തിലും മറ്റു പട്ടിക ഗോത്രങ്ങളിലുംപെട്ടവരെ കോവിഡിന്റെയും പ്രകൃതിദുരന്തങ്ങളുടെയും സാഹചര്യത്തില്‍ വനത്തിലെ ഊരുകളില്‍ ഒറ്റപ്പെട്ടുപോകാതെ സംരക്ഷിക്കുന്നതിന് നടത്തിവരുന്ന പ്രവ‍ര്‍ത്തനങ്ങള്‍ എന്തെല്ലാമാണെന്നറിയിക്കാമ‍ോ;

ഇവരുടെ ഭക്ഷ്യ സുരക്ഷ ഉറപ്പാക്കുന്നതിന് സ്വീകരിച്ച നടപടികള്‍ എന്തെല്ലാമാണെന്നറിയിക്കാമോ;

ഇവരുടെ തനത് ഭക്ഷണരീതികള്‍ സംരക്ഷിക്കുന്നതിനും പ്രോത്സാഹിപ്പിക്കുന്നതിനും ഉതകുന്ന പ്രവര്‍ത്തനങ്ങള്‍ നടപ്പാക്കുന്നുണ്ടോ;

ഇവര്‍ക്ക് തനത് ഭക്ഷണത്തിനാവശ്യമായ ധാന്യങ്ങളും മറ്റും ഊരുകളോട് ചേര്‍ന്ന് കൃഷിചെയ്യുന്നതിനുള്ള സാഹചര്യം ഒരുക്കുന്നതിന് ഉദ്ദേശിക്കുന്നുണ്ടോയെന്ന് വ്യക്തമാക്കാമോ?

നാദാപുരം മണ്ഡലത്തിലെ പട്ടിക വർഗ്ഗ കോളനിയിലേക്കുള്ള ചിറ്റാരി - കണ്ടിവാതുക്കല്‍ റോഡ്‌ പ്രവൃത്തിയുടെ നിലവിലെ അവസ്ഥ വിശദമാക്കാമോ ;

പ്രസ്തുത റോഡ്‌ പ്രവൃത്തി എന്ന് പൂര്‍ത്തീകരിക്കാന്‍ കഴിയും എന്ന് അറിയിക്കാമോ?

സംസ്ഥാനത്ത് പട്ടികജാതി- പട്ടികവര്‍ഗ്ഗ വിഭാഗങ്ങളില്‍പ്പെട്ട രോഗികള്‍ക്ക് ചികിത്സാ ധനസഹായം നല്‍കുന്നതിന് നടപ്പിലാക്കുന്ന പദ്ധതികള്‍ എന്തൊക്കെയെന്ന് വിശദീകരിക്കുമോ;

വൃക്ക-കരള്‍ മാറ്റിവയ്ക്കല്‍ ശസ്ത്രക്രിയകള്‍, ക്യാന്‍സര്‍ ചികിത്സ, ഹൃദയ സംബന്ധമായ രോഗങ്ങള്‍ തുടങ്ങി പണച്ചെലവ് ഏറെ വഹിക്കേണ്ടി വരുന്ന രോഗികള്‍ക്ക് പ്രസ്തുത ചികിത്സയ്ക്ക് ആവശ്യമായ മുഴുവന്‍ തുകയും നല്‍കുന്നതിന് പദ്ധതികളുണ്ടോ; ഉണ്ടെങ്കില്‍ വിശദമാക്കാമോ;

പതിനെട്ട് വയസ്സിന് താഴെയുള്ള ഈ വിഭാഗങ്ങളില്‍പ്പെട്ട കുട്ടികള്‍ക്ക് ചികിത്സാ സഹായത്തിനായുള്ള പ്രത്യേക പദ്ധതികള്‍ ഏതൊക്കെയെന്ന് വിശദമാക്കുമോ?

പട്ടികവർഗ്ഗ ക്ഷേമ വകുപ്പ് ആദിവാസികൾക്കായി നടപ്പാക്കി വരുന്ന ട്രൈബൽ പ്ലസ് പദ്ധതിയിൽ വിതരണം ചെയ്യുവാനുള്ള വേതന കുടിശ്ശികയുടെ വിശദാംശം നൽകുമോ;

വേതനം സമയബന്ധിതമായി വിതരണം ചെയ്യാത്തതുമൂലം തൊഴിലുറപ്പു പദ്ധതിയിൽ നിന്നും ആദിവാസികൾ പിന്മാറുന്ന സാഹചര്യം ശ്രദ്ധയിൽപ്പെട്ടിട്ടുണ്ടോ;

എങ്കിൽ എത്രയും വേഗം കുടിശ്ശിക വിതരണം ചെയ്യുവാൻ നടപടി സ്വീകരിക്കുമോ; വ്യക്തമാക്കാമോ?

പട്ടികജാതി വിഭാഗങ്ങളിലെ സംരംഭകരുടെ ഉല്പന്നങ്ങള്‍ ഓണ്‍ലൈന്‍ പോര്‍ട്ടല്‍ മുഖേന വിറ്റഴിക്കുന്ന ഗദ്ദിക പദ്ധതിയുടെ പുരോഗതി വിലയിരുത്തിയിട്ടുണ്ടോ; വ്യക്തമാക്കുമോ?

റാന്നി നിയോജക മണ്ഡലത്തിൽ 2016 ജൂൺ 30 മുതൽ 2021 ജൂൺ 30 വരെ പട്ടികജാതി വികസന വകുപ്പ് നടപ്പിലാക്കിയ സാമൂഹിക ക്ഷേമപദ്ധതികളുടെ വിശദവിവരം പദ്ധതി തുകയും ചെലവാക്കിയ തുകയും ഉൾപ്പെടെ പദ്ധതി തിരിച്ച് പട്ടികയായി ലഭ്യമാക്കാമോ;

പ്രസ്തുത കാലയളവിൽ പട്ടികജാതി വിദ്യാർത്ഥികൾക്ക് അനുവദിച്ച വിദ്യാഭ്യാസ പദ്ധതികളും ആനുകൂല്യങ്ങളും പട്ടികയായി നൽകാമോ?

കഴിഞ്ഞ സര്‍ക്കാരിന്റെ കാലത്ത് ഇരിക്കൂര്‍ മണ്ഡലത്തില്‍ പട്ടികജാതി പട്ടികവര്‍ഗ്ഗ വകുപ്പിന് കീഴില്‍ എത്ര വീടുകള്‍ ഭവനരഹിതര്‍ക്ക് നിര്‍മ്മിച്ചു നല്‍കിയെന്ന് വെളിപ്പെടുത്തുമോ;

ലൈഫ് മിഷന്റെ ഭാഗമായിട്ടാണോ ഇവയുടെ നിര്‍മ്മാണം നടത്തിയതെന്ന് വ്യക്തമാക്കുമോ;

പ്രസ്തുത കാലയളവില്‍ വകുപ്പില്‍ നിന്നും ഭവന നിര്‍മ്മാണത്തിനായി എത്ര രൂപ ആകെ അനുവദിച്ചുവെന്ന് വെളിപ്പെടുത്തുമോ?

മുന്‍ സര്‍ക്കാരിന്റെ കാലഘട്ടത്തില്‍ പട്ടികജാതി /പട്ടികവർഗ്ഗ ക്ഷേമവകുപ്പ് മുഖാന്തിരം എത്ര പേര്‍ക്കാണ് വിവാഹ ധനസഹായം നല്‍കിയിട്ടുള്ളതെന്ന് ജില്ല തിരിച്ച് വ്യക്തമാക്കുമോ; അനുവദിച്ച തുക എത്രയെന്ന് വ്യക്തമാക്കുമോ;

പട്ടികജാതി കുടുംബങ്ങള്‍ക്ക് വിവാഹ ധനസഹായം അനുവദിക്കുന്നതിനുള്ള മാനദണ്ഡങ്ങള്‍ എന്തെല്ലാമെന്ന് വ്യക്തമാക്കുമോ?

പട്ടികവര്‍ഗ്ഗ വിഭാഗങ്ങള്‍ക്കായുള്ള പദ്ധതികളുടെ കാര്യക്ഷമത വര്‍ദ്ധിപ്പിക്കുന്നതിനായി വിവിധ വകുപ്പുകളുടെ പ്രാതിനിധ്യത്തോടെ സ്ഥിരം മോണിറ്ററിംഗ് സംവിധാനം ഏര്‍പ്പെടുത്തിയിട്ടുണ്ടോ?

പട്ടികവര്‍ഗ്ഗ കോളനികളില്‍ കോവിഡ് ഒഴിവാക്കാന്‍ എന്തൊക്കെ നടപടികള്‍ സ്വീകരിച്ചിട്ടുണ്ട്; വിശദമാക്കുമോ;

ട്രൈബല്‍ പാരാമെഡിക്ക് പദ്ധതിയിലൂടെ നിയോഗിക്കപ്പെട്ട ആരോഗ്യ പ്രവര്‍ത്തകരുടെ സേവനം ഇക്കാര്യത്തിൽ പ്രയോജനപ്പെടുത്തിയിട്ടുണ്ടോ; വ്യക്തമാക്കുമോ?

പട്ടികജാതി/വര്‍ഗ്ഗ വിഭാഗങ്ങളുടെ ക്ഷേമത്തിനും വികസനത്തിനുമായി എന്തെല്ലാം പദ്ധതികളാണ് നടപ്പാക്കി വരുന്നത് എന്ന് വ്യക്തമാക്കാമോ;

2020-21 സാമ്പത്തിക വര്‍ഷത്തില്‍ ഇതിനായി എത്ര തുകയാണ് വകയിരുത്തിയതെന്നും ഇതില്‍ എത്ര തുക ചെലവഴിച്ചുവെന്നും വിശദമാക്കുമോ?

പട്ടികവര്‍ഗ്ഗ വിഭാഗങ്ങളുടെ ക്ഷേമ പദ്ധതികള്‍ ഫലപ്രാപ്തിയില്‍ എത്തിക്കുന്നതിനായി ഇത്തരം പദ്ധതികള്‍ പൂര്‍ണ്ണമായും തദ്ദേശഭരണ സ്ഥാപനങ്ങളുടെ നേതൃത്വത്തില്‍ പട്ടികവര്‍ഗ്ഗ വികസന വകുപ്പിന്റെ സഹകരണത്തോടെ നടപ്പാക്കുന്നതിന് മുന്‍കൈയെടുക്കുമോ; വ്യക്തമാക്കുമോ?

പട്ടാമ്പി മണ്ഡലത്തില്‍ ഭവനരഹിതരായ പട്ടിക ജാതി/പട്ടിക വര്‍ഗ്ഗത്തില്‍ പെട്ട എത്ര കുടുംബങ്ങള്‍ ഉണ്ടെന്ന് പഞ്ചായത്ത് അടിസ്ഥാനത്തില്‍ അറിയിക്കുമോ; ഇതില്‍ എത്ര പേര്‍ക്ക് സ്വന്തമായി ഭൂമിയുണ്ട്;

ഇവരില്‍ എത്രപേര്‍ ലൈഫ് മിഷന്‍ പദ്ധതി മുന്‍ഗണന പട്ടികയില്‍ ഉള്‍പ്പെട്ടിട്ടുണ്ട്; വിശദാംശങ്ങള്‍ അറിയിക്കാമോ?

പട്ടികജാതി വികസന വകുപ്പും എല്‍.ഐ.സി. ഓഫ് ഇന്ത്യയും ചേര്‍ന്ന് നടപ്പിലാക്കുന്ന വാത്സല്യനിധി പദ്ധതിയെ സംബന്ധിച്ച വിവരങ്ങള്‍ വിശദമാക്കാമോ;

പ്രസ്തുത പദ്ധതി എന്ന് മുതലാണ് നടപ്പിലാക്കിയിട്ടുള്ളതെന്ന് വ്യക്തമാക്കാമോ;

പ്രസ്തുത പദ്ധതിയെ സംബന്ധിച്ച വിവരങ്ങള്‍ ജനങ്ങളില്‍ എത്തിയിട്ടുണ്ടോയെന്ന വിവരം പരിശോധിച്ചിട്ടുണ്ടോ; വ്യക്തമാക്കാമോ?

പട്ടികജാതി പട്ടികവര്‍ഗ്ഗ വിഭാഗങ്ങളുടെ ഉന്നമനത്തിനായി ഹാന്‍ഡ് ഹോള്‍ഡിങ് സെല്‍ പ്രവര്‍ത്തിക്കുന്നുണ്ടോ; വിശദാംശം ലഭ്യമാക്കുമോ;

പ്രസ്തുത സെല്ലിനു കീഴില്‍ എന്തെല്ലാം പ്രവര്‍ത്തനങ്ങളാണ് ചെയ്തു വരുന്നത് എന്ന് വ്യക്തമാക്കുമോ;

പ്രസ്തുത സംവിധാനം വഴി എത്രയാളുകള്‍ക്ക് പ്രയോജനം ലഭിച്ചിട്ടുണ്ടെന്ന് വിശദമാക്കുമോ?

സംസ്ഥാനത്ത് പട്ടികജാതി വിഭാഗത്തിലെ വിദ്യാര്‍ത്ഥികള്‍ക്ക് നല്‍കുന്ന ഗ്രാന്റുകള്‍ ഏതെല്ലാമാണെന്നും എത്ര രൂപ വീതമാണെന്നും പ്രൈമറി, അപ്പര്‍പ്രൈമറി, ഹൈസ്കൂള്‍, ഹയര്‍ സെക്കന്ററി, ബിരുദം, ബിരുദാനന്തരം, പ്രൊഫഷണല്‍ വിദ്യാഭ്യാസം, ഉന്നത വിദ്യാഭ്യാസം എന്നിവയുടെ അടിസ്ഥാനത്തില്‍ വിശദമാക്കുമോ;

പ്രസ്തുത ഗ്രാന്റുകള്‍ വര്‍ദ്ധിപ്പിക്കുന്നത് വകുപ്പിന്റെ പരിഗണനയിലുണ്ടോ;

എതു അക്കാദമിക വര്‍ഷം വരെയുള്ള ഗ്രാന്റുകള്‍ വിദ്യാര്‍ത്ഥികള്‍ക്ക് ലഭ്യമാക്കിയിട്ടുണ്ട്; വിശദമാക്കുമോ ?

സംസ്ഥാനത്ത് പിന്നോക്ക സമുദായത്തില്‍പെട്ടവരുടെ ഉന്നമനത്തിനായി രൂപീകരിച്ച് പ്രവര്‍ത്തിക്കുന്ന പിന്നോക്ക വിഭാഗ വികസന വകുപ്പിന്റെ പ്രധാന പ്രവര്‍ത്തനങ്ങള്‍ എന്തെല്ലാമാണെന്ന് വ്യക്തമാക്കുമോ;

പ്രസ്തുത വകുപ്പിന് കീഴിലുള്ള സ്ഥാപനങ്ങള്‍ ഏതെല്ലാമാണെന്നും അവയുടെ ഓരോന്നിന്റെയും പ്രവര്‍ത്തനങ്ങളും ഉത്തരവാദിത്തങ്ങളും എന്തെല്ലാമാണെന്നും വിവരിക്കാമോ;

സംസ്ഥാനത്ത് പിന്നോക്ക സമുദായങ്ങളില്‍പ്പെടുന്നവരുടെ നിലവിലെ അവസ്ഥ സംബന്ധിച്ച് ഏതെങ്കിലും പഠന റിപ്പോര്‍ട്ട് ലഭ്യമാണോ; ഉണ്ടെങ്കില്‍ അതിന്റെ വിശദാംശം ലഭ്യമാക്കുമോ;

പ്രവാസികളുടെ മടങ്ങിവരവും കോവിഡും പ്രകൃതിദുരന്തവും പിന്നോക്ക വിഭാഗങ്ങളില്‍ സൃഷ്ടിച്ച സാമ്പത്തികാഘാതം വിലയിരുത്തുന്നതിന് വേണ്ട പഠനം നടത്തുമോ?

കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ നിലവിൽ വന്നത് എന്നാണെന്നും ന്യൂനപക്ഷ വിഭാഗങ്ങൾക്ക് ഈ സ്ഥാപനം മുഖേന നൽകി വരുന്ന സേവനങ്ങൾ എന്തൊക്കെയാണെന്നും വ്യക്തമാക്കുമോ;

ഏതൊക്കെ മേഖലകളിലാണ് കെ.എസ്.ബി.സി.ഡി.സി. മുഖേന വായ്പ അനുവദിക്കുന്നതെന്നറിയിക്കുമോ;

കെ.എസ്.ബി.സി.ഡി.സി. നല്‍കുന്ന വ്യക്തിഗത വായ്പകള്‍ ഏതെല്ലാമെന്നും ഈ വായ്പകള്‍ അനുവദിക്കുന്നതിനുള്ള മാനദണ്ഡങ്ങള്‍ എന്തൊക്കെയെന്നുമുളള വിശദാംശങ്ങള്‍ നല്‍കുമോ?

പട്ടിക വിഭാഗത്തില്‍പ്പെട്ടവരുടെ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനായി നിലവില്‍ വന്ന അംബേദ്ക്കര്‍ ഗ്രാമം പദ്ധതി 2016-17 മുതല്‍ 2020-21 വരെ എത്ര പട്ടികജാതി സങ്കേതങ്ങളില്‍ പൂര്‍ണ്ണമായും നടപ്പിലാക്കിയിട്ടുണ്ട്; മേല്‍ സങ്കേതങ്ങളുടെ വിവരം ജില്ല തിരിച്ച് ലഭ്യമാക്കുമോ;

പ്രസ്തുത കാലയളവില്‍ അംബേദ്ക്കര്‍ ഗ്രാമം പദ്ധതിയ്ക്കായി എത്ര തുക ബഡ്ജറ്റില്‍ വകയിരുത്തിയിട്ടുണ്ട്;

പ്രസ്തുത കാലയളവില്‍ അംബേദ്ക്കര്‍ ഗ്രാമം പദ്ധതിയ്ക്കായി എത്ര തുക ചെലവഴിച്ചിട്ടുണ്ടെന്നും വ്യക്തമാക്കുമോ?

സമൂഹത്തിൽ വളരെ പിന്നോക്കാവസ്ഥയിലുള്ള കടച്ചിക്കല്ലൻ സമുദായത്തെ ഒ.ഇ.സി. പട്ടികയിൽ ഉൾപ്പെടുത്തുന്ന കാര്യം പരിഗണിക്കാമോ;

പ്രസ്തുത വിഷയത്തിൽ കിർത്താഡ്‌സ് പഠനം നടത്തിയിട്ടുണ്ടോ; ഉണ്ടെങ്കിൽ റിപ്പോർട്ടിലെ വിശദാംശങ്ങൾ ലഭ്യമാക്കാമോ?

സംസ്ഥാന പിന്നോക്ക വികസന കോർപ്പറേഷന്റെ ഓഫീസ് പ്രവർത്തിക്കുന്ന കെട്ടിടങ്ങളുടെ വിസ്തീർണ്ണവും വാടകയും എത്രയാണെന്ന് വ്യക്തമാക്കുമോ;

കോർപ്പറേഷന് ഗസ്റ്റ് ഹൗസ് നിലവിലുണ്ടോ;

ഉണ്ടെങ്കിൽ ഗസ്റ്റ് ഹൗസ് നവീകരണത്തിന് കഴിഞ്ഞ സർക്കാരിന്റെ കാലത്ത് എത്ര രൂപ ചെലവഴിച്ചുവെന്ന് വ്യക്തമാക്കുമോ?

സംസ്ഥാന സർക്കാരിന് കീഴിലുള്ള ദേവസ്വം ബോർഡുകളുടെ കീഴിൽ എത്ര ക്ഷേത്രങ്ങളുണ്ടെന്ന് ദേവസ്വം തിരിച്ച് വ്യക്തമാക്കുമോ;

സംസ്ഥാന സര്‍ക്കാരിന് കീഴിലുള്ള ദേവസ്വം ബോര്‍ഡുകളുടെ കീഴില്‍ എത്ര ഹെക്ടര്‍ ഭൂമി ഉപയോഗിക്കാതെയുണ്ടെന്ന് ദേവസ്വം തിരിച്ച് വ്യക്തമാക്കുമോ;

പ്രസ്തുത ഭൂമിയില്‍ ക്ഷേത്രങ്ങള്‍ക്ക് ദൈനംദിന ആവശ്യങ്ങള്‍ക്കുള്ള പൂക്കളും ധാന്യങ്ങളും കൃഷി ചെയ്യുവാനുളള നടപടി സ്വീകരിക്കുമോ; ആയതിന്റെ വിശദാംശം നല്‍കാമോ?

ഭക്തജനങ്ങളെ ക്ഷേത്രങ്ങളുമായി ബന്ധിപ്പിക്കുന്നതിന് ഡിജിറ്റല്‍ സങ്കേതങ്ങള്‍ അവതരിപ്പിക്കുന്ന കാര്യം സര്‍ക്കാര്‍ പരിഗണിക്കുമോ;

ക്ഷേത്രങ്ങളിലെ തിരക്ക് നിയന്ത്രിക്കുന്നതിനായി പൂജകള്‍ ബുക്ക് ചെയ്യുന്നതിനും ദര്‍ശനസമയം, പ്രസാദം, താമസസൗകര്യം എന്നിവ ക്രമീകരിക്കുന്നതിനും ഡിജിറ്റല്‍ സങ്കേതങ്ങള്‍ ഉപയോഗിക്കുന്ന കാര്യം സര്‍ക്കാരിന്റെ പരിഗണനയിലുണ്ടോ; തിരുപ്പതി മാതൃകയിലുള്ള ബുക്കിംഗ് സമ്പ്രദായം സംസ്ഥാനത്ത് നടപ്പിലാക്കുന്ന കാര്യത്തെക്കുറിച്ച് സര്‍ക്കാരിന്റെ അഭിപ്രായം വ്യക്തമാക്കാമോ?

ചാലക്കുടി മണ്ഡലത്തിലെ ചിറങ്ങരയില്‍ ശബരിമല ഇടത്താവളം നിര്‍മ്മിക്കുന്നതിനുള്ള നടപടികള്‍ ഏതു ഘട്ടത്തിലാണ്;

ഇതിനായുള്ള വിശദമായ പ്രോജക്ട് റിപ്പോര്‍ട്ടിന് കിഫ്ബിയുടെ അംഗീകാരം ലഭിച്ചിട്ടുണ്ടോ എന്ന് വെളിപ്പെടുത്തുമോ?

ശബരിമല തീര്‍ത്ഥാടനം സുഗമമാക്കാന്‍ സര്‍ക്കാര്‍ സ്വീകരിച്ചു വരുന്ന നടപടികള്‍ വ്യക്തമാക്കുമോ;

തീര്‍ത്ഥാടകര്‍ക്ക് ആവശ്യമായ എല്ലാ സൗകര്യങ്ങളും ഒരുക്കുന്നതോടൊപ്പം ശബരിമല ഇടത്താവളങ്ങളിലും ആവശ്യമായ സൗകര്യങ്ങള്‍ ഏര്‍പ്പെടുത്തുന്നതിന് നടപടി സ്വീകരിക്കുമോ; എങ്കില്‍ വിശദാംശം നല്‍കുമോ?

ശബരിമല വികസനവുമായി ബന്ധപ്പെട്ട് ഇപ്പോള്‍ നടന്നുവരുന്ന പ്രവൃത്തികള്‍ എന്തെല്ലാമെന്ന് വ്യക്തമാക്കാമോ;

2021-ലെ മണ്ഡലകാല-മകരവിളക്ക് മഹോത്സവം കൊവിഡിന്റെ സാഹചര്യത്തിലും മുടക്കം വരാതെ നടത്തുന്നതിനാവശ്യമായ എന്തെല്ലാം മുന്നൊരുക്കങ്ങളാണ് ആരംഭിച്ചിട്ടുളളതെന്ന് അറിയിക്കാമോ;

ശബരിമല മാസ്റ്റര്‍പ്ലാനില്‍ ഉള്‍പ്പെട്ടതും എന്നാല്‍ വനം വകുപ്പിന്റെ അനുമതി ലഭിക്കാത്തതുമായ പദ്ധതികള്‍ ഏതെല്ലാമാണെന്ന് അറിയിക്കാമോ;

പ്രസ്തുത പദ്ധതികള്‍ ആരംഭിക്കുന്നതിനായി വനം വകുപ്പുമായി ചര്‍ച്ച നടത്തി അടിയന്തരമായി പ്രവൃത്തികള്‍ ആരംഭിക്കുന്നതിന് നടപടി സ്വീകരിക്കുമോ?

ശബരിമല തീര്‍ത്ഥാടന കേന്ദ്രത്തിന്റെ പ്രാധാന്യം കണക്കിലെടുത്ത് ശബരിമലയില്‍ തീര്‍ത്ഥാടകര്‍ക്കുവേണ്ടി സൗകര്യങ്ങള്‍ വര്‍ദ്ധിപ്പിക്കുന്നതിന് നടത്തിവരുന്ന പ്രവര്‍ത്തനങ്ങള്‍ എന്തെല്ലാമാണെന്ന് അറിയിക്കാമോ;

ശബരിമല മാസ്റ്റര്‍ പ്ലാനില്‍ വിഭാവനം ചെയ്തിരുന്ന പദ്ധതികളും അവയുടെ പുരോഗതിയും അറിയിക്കാമോ;

ശബരിമല ഇടത്താവളങ്ങളുടെ വികസനത്തിനായി കിഫ്ബി ഫണ്ടുപയോഗിച്ച് പദ്ധതികള്‍ ആവിഷ്കരിച്ചിട്ടുണ്ടോ?

ഹരിപ്പാട് മണ്ഡലത്തില്‍ ഹരിപ്പാട് സുബ്രഹ്മണ്യക്ഷേത്രത്തിന് ചുറ്റുമുള്ളതും ദേവസ്വം ബോര്‍ഡിന്റെ അധീനതയിലുള്ളതുമായ റോഡുകള്‍ തകര്‍ന്നു കിടക്കുന്ന കാര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത റോഡുകള്‍ പുനരുദ്ധരിക്കുന്നതിന് തിരുവിതാംകൂര്‍ ദേവസ്വം ബോര്‍ഡ് എന്ത് നടപടിയാണ് സ്വീകരിക്കുന്നതെന്ന് വ്യക്തമാക്കാമോ?

മലബാര്‍ ദേവസ്വം ബോര്‍ഡ് ജീവനക്കാരുടെ പരിഷ്കരിച്ച വേതനം നല്‍കുന്നതിനു നിലവില്‍ തടസ്സങ്ങള്‍ ഉണ്ടോ;

ശമ്പള പരിഷ്കരണത്തിന് ആധാരമാക്കേണ്ട ക്ഷാമബത്ത, ഫിക്സേഷൻ ചട്ടങ്ങള്‍ എന്നിവയിൽ കൂടുതല്‍ വ്യക്തത വരുത്തുന്നതിന് ധനകാര്യ വകുപ്പിലേക്ക് അയച്ച പ്രപ്പോസലിന്മേൽ മറുപടി ലഭിച്ചിട്ടുണ്ടോ; എങ്കിൽ വിശദാംശങ്ങള്‍ നല്‍കുമോ;

നിലവിലെ സാഹചര്യം കണക്കിലെടുത്ത് വരുമാനം കുറഞ്ഞ ക്ഷേത്രങ്ങളിലെ ജീവനക്കാര്‍ക്ക് അലവൻസുകള്‍ നൽകുന്നതിനു വേണ്ടി സര്‍ക്കാരില്‍ നിന്നും അനുവദിക്കുന്ന ഗ്രാന്റ്-ഇൻ-എയ്ഡ് വര്‍ദ്ധിപ്പിക്കുന്ന കാര്യം പരിശോധിക്കുമോ?

സംസ്ഥാനത്തെ ദേവസ്വം ബോര്‍ഡുകളിലെ ജീവനക്കാരുടെ ശമ്പള പരിഷ്കരണം സംബന്ധിച്ച് സര്‍ക്കാര്‍ സ്വീകരിച്ച നടപടികള്‍ അറിയിക്കുമോ;

അടഞ്ഞുകിടക്കുന്ന ക്ഷേത്രങ്ങളിലെ ജീവനക്കാര്‍ക്ക് സഹായം ലഭ്യമാക്കുമോ;

മലബാര്‍ ദേവസ്വം ബോര്‍ഡിലെ ജീവനക്കാരുടെ ശമ്പള പരിഷ്കരണവുമായി ബന്ധപ്പെട്ട് മലബാര്‍ ദേവസ്വം എംപ്ലോയീസ് കോണ്‍ഗ്രസ്സ് നല്‍കിയ നിവേദനം സര്‍ക്കാര്‍ പരിശോധിച്ചിട്ടുണ്ടോ;

മലബാറിലെ ദേവസ്വത്തിന് കീഴിലുള്ള അയ്യായിരത്തോളം ജീവനക്കാര്‍ക്ക് ശമ്പളവും മറ്റ് ആനുകൂല്യങ്ങളും ലഭിക്കാത്ത അവസരത്തില്‍ ദുരിതാശ്വാസമായി സഹായധനം അനുവദിക്കുവാന്‍ നടപടി സ്വീകരിക്കുമോ?

മലബാര്‍ ദേവസ്വം ബോര്‍ഡിന് കീഴിലെ താഴ്ന്ന ഗ്രേഡുകളിലുള്ള വരുമാനം കുറഞ്ഞ ക്ഷേത്രങ്ങളിലെ ജീവനക്കാര്‍ക്ക് പരിമിതമായിട്ടെങ്കിലും ശമ്പളം നൽകുന്നതിനായി സര്‍ക്കാരില്‍ നിന്നും സഹായം ലഭ്യമാക്കാന്‍ ബോര്‍ഡ് അഭ്യര്‍ത്ഥിച്ചിട്ടുണ്ടോ; വിശദമാക്കാമോ;

കൊവിഡ് ആരംഭിച്ചതിന് ശേഷം ഇത്തരം ജീവനക്കാര്‍ക്ക് സര്‍ക്കാര്‍, ബോര്‍ഡ് നല്‍കിയ സഹായങ്ങള്‍ വിശദമാക്കാമോ?

മലബാര്‍ ദേവസ്വം ബോര്‍ഡിലെ ക്ഷേത്രങ്ങളിലെ ജീവനക്കാരുടെ സേവന-വേതന വ്യവസ്ഥകള്‍ പരിഷ്കരിക്കണമെന്ന ആവശ്യം പരിഗണനയിലുണ്ടോ;

തിരുവിതാംകൂര്‍ കൊച്ചി ദേവസ്വങ്ങളിലേതിന് തത്തുല്യമായ വേതനം മലബാര്‍ ദേവസ്വം ബോര്‍ഡിലെ ജീവനക്കാര്‍ക്കും ലഭ്യമാക്കുന്നതിന് നടപടി സ്വീകരിക്കുമോ;

മലബാര്‍ ദേവസ്വം ബോര്‍ഡ് ശമ്പളപരിഷ്കരണം സംബന്ധിച്ചുള്ള പ്രൊപ്പോസല്‍ സര്‍ക്കാരിന് നല്‍കിയിട്ടുണ്ടോയെന്നറിയിക്കാമോ;

ശമ്പളം പരിഷ്കരിക്കുന്നത് സംബന്ധിച്ച് എന്തൊക്കെ നടപടികളാണ് സ്വീകരിക്കുക എന്ന് വ്യക്തമാക്കുമോ;

കോവിഡ് മഹാമാരി മൂലം സാമ്പത്തിക പ്രയാസം കാരണം നിരവധി ക്ഷേത്രങ്ങളില്‍ നിത്യനിദാന ചെലവുകള്‍ നടത്താന്‍ സാധിക്കാത്ത സാഹചര്യം സര്‍ക്കാരിന്റെ ശ്രദ്ധയില്‍പെട്ടിട്ടുണ്ടോ;

സാമ്പത്തിക പ്രയാസം അനുഭവിക്കുന്ന ക്ഷേത്രങ്ങള്‍ക്ക് ഗുരുവായൂര്‍ ദേവസ്വം ബോര്‍ഡ് നല്‍കുന്നതു പോലെ പതിനായിരം രൂപ ധനസഹായം പ്രയാസമനുഭവിക്കുന്ന മറ്റു ക്ഷേത്രങ്ങള്‍ക്കും നല്‍കുന്നതിന് നടപടി സ്വീകരിക്കുമോ?

കല്ല്യാശ്ശേരി മണ്ഡലത്തില്‍ ഫയര്‍ സ്റ്റേഷന്‍ സ്ഥാപിക്കുന്നതിനായി മാടായിപ്പാറയില്‍ സ്ഥലം അനുവദിക്കുന്നതുമായി ബന്ധപ്പെട്ട് മലബാര്‍ ദേവസ്വം ബോര്‍ഡില്‍ സമര്‍പ്പിച്ച അപേക്ഷയിന്മേല്‍ സ്ഥലം ലഭ്യമാക്കാന്‍ നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

ക്ഷേത്രങ്ങളോട് ചേര്‍ന്നുള്ള കാവുകളുടെയും കുളങ്ങളുടെയും ആല്‍ത്തറകളുടെയും പുനരുദ്ധാരണത്തിന് എന്തെങ്കിലും പദ്ധതികള്‍ നിലവിലുണ്ടോയെന്ന് വ്യക്തമാക്കാമോ;

ഇല്ലെങ്കില്‍ സാമ്പത്തികമായി പിന്നോക്കം നില്‍ക്കുന്ന മലബാര്‍ ദേവസ്വം ബോര്‍ഡിന്റെ അധികാര പരിധിയില്‍പ്പെടുന്ന ഇത്തരം കാവുകളുടെയും കുളങ്ങളുടെയും ആല്‍ത്തറകളുടെയും പുനരുദ്ധാരണത്തിന് പദ്ധതി ആവിഷ്കരിക്കുമോ?