പ്രോസിക്യൂഷന്‍, നീതിന്യായം എന്നീ വ്യവസ്ഥാപിത സംവിധാനങ്ങളിലെ പഴുതുകള്‍ ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ വിശദമാക്കാമോ;

ഇതുമൂലം സംസ്ഥാനത്ത് രജിസ്റ്റര്‍ ചെയ്യപ്പെടുന്ന ക്രിമിനല്‍ കേസുകളില്‍ ചിലതിലെങ്കിലും ബോധപൂര്‍വ്വമോ അല്ലാതെയോ നിരപരാധികള്‍ പ്രതിചേര്‍ക്കപ്പെടുകയും ശിക്ഷിക്കപ്പെടുകയും അതേസമയം യഥാര്‍ത്ഥ പ്രതികള്‍ സ്വതന്ത്രരായി നടക്കുകയും ചെയ്യുന്ന അവസ്ഥ ഉണ്ടായിട്ടുള്ള കാര്യം ശ്രദ്ധയില്‍പ്പെട്ടിട്ടുണ്ടോ;

മേല്‍ സാഹചര്യത്തില്‍ ഈ വിഷയത്തില്‍ സമഗ്രമായ ഒരു പരിശോധനയും പരിഷ്കരണ നടപടികളും നടത്താനാവശ്യമായ നടപടികള്‍ സ്വീകരിക്കുമോ?

കേരള ഹൈക്കോടതിയിൽ സർക്കാറിന് വേണ്ടി കേസുകൾ വാദിക്കാൻ 2016 മുതൽ നാളിതുവരെ നിയോഗിക്കപ്പെട്ടിട്ടുള്ള പ്ലീഡർമാരുടെ വിവരവും അവർക്ക് ശമ്പളയിനത്തിലും മറ്റുതരത്തിലും നൽകിയിട്ടുള്ള തുക എത്രയെന്നും പ്രത്യേകം ലഭ്യമാക്കാമോ;

സുപ്രീം കോടതിയിൽ സർക്കാറിന് വേണ്ടി കേസുകൾ വാദിക്കാൻ 2016 മുതൽ നാളിതുവരെ നിയമിക്കപ്പെട്ടിട്ടുള്ള സർക്കാർ അഭിഭാഷകരുടെയും കൗൺസിൽമാരുടെയും വിവരവും അവർക്ക് ശമ്പളയിനത്തിലും മറ്റുതരത്തിലും നൽകിയിട്ടുള്ള തുക എത്രയെന്നും പ്രത്യേകം വ്യക്തമാക്കാമോ;

സുപ്രീംകോടതിയിലും ഹൈക്കോടതിയിലും മറ്റു കോടതികളിലും വിവിധ കേസുകൾ വാദിക്കുന്നതിന് 2016 മുതൽ നാളിതുവരെ സർക്കാർ നിയമിച്ചിട്ടുള്ള പബ്ലിക് പ്രോസിക്യൂട്ടർമാർ, സ്പെഷ്യൽ പ്രോസിക്യൂട്ടർമാർ, മറ്റ് അഭിഭാഷകർ എന്നിവരുടെ വിവരവും അവർക്ക് ശമ്പളയിനത്തിലും മറ്റുതരത്തിലും നൽകിയിട്ടുള്ള തുക എത്രയെന്നും പ്രത്യേകം ലഭ്യമാക്കാമോ;

സർക്കാർ നിയമിച്ചിട്ടുള്ള പ്രോസിക്യൂട്ടർമാർ, സ്പെഷ്യൽ പ്രോസിക്യൂട്ടർമാർ എന്നിവര്‍ക്ക് പുറമേ കേസുകൾ വാദിക്കാൻ സുപ്രീംകോടതി, ഹൈക്കോടതി, മറ്റ് കോടതികൾ എന്നിവിടങ്ങളിൽ അഭിഭാഷകരെ നിയോഗിച്ചിട്ടുണ്ട് എങ്കിൽ ഏതെല്ലാം കേസുകൾക്ക് വേണ്ടിയാണ് അത് എന്നും അതിനുവേണ്ടി നിയോഗിക്കപ്പെട്ട അഭിഭാഷകർക്ക് ഫീസിനത്തിലും യാത്രപടിയായും മറ്റുതരത്തിലും നൽകിയിട്ടുള്ള തുക എത്രയെന്നും പ്രത്യേകം അറിയിക്കാമോ?

നിലവില്‍ പുന:പരിശോധനയിലോ ഭേദഗതിയിലോ ഉള്ള സംസ്ഥാന നിയമങ്ങള്‍ എതൊക്കെയാണെന്ന് വിശദമാക്കാമോ;

കാലഹരണപ്പെട്ട നിയമങ്ങള്‍ റദ്ദാക്കാന്‍ പ്രത്യേക സമിതി രൂപീകരിച്ചിട്ടുണ്ടോ; ഉണ്ടെങ്കില്‍ ആരൊക്കെയാണ് അതിലെ അംഗങ്ങളെന്ന് അറിയിക്കാമോ?

കുറ്റ്യാടി മണിമല നാളികേര പാര്‍ക്കില്‍ വ്യവസായങ്ങള്‍ ക്ഷണിക്കുന്നതിന്റെ ഭാഗമായി സംരംഭകരുടെ യോഗം വിളിച്ചു ചേര്‍ക്കാൻ ഉദ്ദേശിക്കുന്നുണ്ടോ; വിശദമാക്കാമോ?

ഈ സർക്കാർ അധികാരത്തിൽ വന്നതിനുശേഷം വ്യവസായ വകുപ്പിന്റെ കീഴിലുളള പൊതുമേഖലാ-സ്വയംഭരണ, സഹകരണ സ്ഥാപനങ്ങളിൽ ആഡിറ്റ് പൂർത്തിയാക്കിയവയിൽ ലാഭത്തിൽ പ്രവർത്തിക്കുന്നവയും നഷ്ടത്തിൽ പ്രവർത്തിക്കുന്നവയും ഏതെല്ലാമാണെന്നും അവയുടെ ലാഭ-നഷ്ടം എത്രയാണെന്നും വിശദമാക്കാമോ;

2024-2025 സാമ്പത്തിക വർഷത്തിൽ പ്രവർത്തന ലാഭം കൈവരിച്ച സ്ഥാപനങ്ങൾ ഏതെല്ലാമാണെന്ന് വ്യക്തമാക്കാമോ;

ലാഭത്തിലായിരുന്ന സ്ഥാപനങ്ങൾ നഷ്ടത്തിലാകുന്നതിനുളള കാരണങ്ങൾ എന്തെല്ലാമാണെന്നും അവ ലാഭത്തിലാക്കുവാനുളള എന്തെല്ലാം നടപടികളാണ് സ്വീകരിച്ചിട്ടുളളതെന്നും വിശദമാക്കാമോ?

സംസ്ഥാനത്ത് വ്യവസായ വകുപ്പിന് കീഴിലുള്ള പൊതുമേഖലാ സ്ഥാപനങ്ങള്‍ ഏതെല്ലാമെന്നും ഇവയില്‍ നിലവില്‍ ലാഭത്തില്‍/നഷ്ടത്തില്‍ പ്രവര്‍ത്തിക്കുന്നത് ഏതെല്ലാമെന്ന് ലാഭ/നഷ്ട കണക്ക് തരം തിരിച്ച് വ്യക്തമാക്കുമോ;

നഷ്ടത്തില്‍ പ്രവര്‍ത്തിക്കുന്ന പൊതുമേഖലാ സ്ഥാപനങ്ങളെ സമയബന്ധിതമായി ലാഭത്തിലേയ്ക്ക് ഉയര്‍ത്തിക്കൊണ്ടുവരാന്‍ എന്തൊക്കെ നടപടികളാണ് സ്വീകരിച്ചുവരുന്നതെന്ന് വ്യക്തമാക്കാമോ?

2016 മുതല്‍ നാളിതുവരെ കിനാലൂര്‍ കെ. എസ്. ഐ. ഡി. സി.-യില്‍ എത്ര പുതിയ വ്യവസായങ്ങള്‍ ആരംഭിച്ചിട്ടുണ്ടെന്ന് വിശദമാക്കാമോ;

കിനാലൂര്‍ കെ. എസ്. ഐ. ഡി. സി.-യില്‍ പുതിയ വ്യവസായങ്ങള്‍ ആരംഭിക്കുന്നതിന് നിലവില്‍ സ്ഥലം ലഭ്യമാണോ; വിശദമാക്കാമോ;

കിനാലൂര്‍ കെ. എസ്. ഐ. ഡി. സി.-യുടെ ഇന്റേണല്‍ റോഡ് നിര്‍മ്മാണ പ്രവൃത്തിയില്‍ കാലതാമസം നേരിട്ടത് ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ?

കഴിഞ്ഞ 5 വര്‍ഷക്കാലം വ്യാവസായിക രംഗത്തും സംരംഭകരുമായി ബന്ധപ്പെട്ടും കണ്ണൂര്‍ ജില്ലയില്‍ ഉണ്ടായ മുന്നേറ്റങ്ങളുടെ സംക്ഷിപ്ത രൂപം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം സംസ്ഥാനത്തെ ഈസ് ഓഫ് ഡൂയിംഗ് ബിസിനസ് റാങ്കിങ് മെച്ചപ്പെടുത്തുവാനും അതുമൂലം കൂടുതല്‍ നിക്ഷേപം ലഭിക്കുവാനും എടുത്ത നടപടികള്‍ വിശദമാക്കാമോ;

ഈ സര്‍ക്കാര്‍ ആവിഷ്കരിച്ച വ്യവസായ വികസന പരിപാടികളുടെ ഭാഗമായി ടെക്നോപാര്‍ക്ക്, ഇന്‍ഫോപാര്‍ക്ക്, സൈബര്‍പാര്‍ക്ക് എന്നിവിടങ്ങളിലായി എത്ര പേര്‍ക്ക് പുതുതായി തൊഴില്‍ നല്‍കാനായിട്ടുണ്ട്; വിശദമാക്കാമോ;

വിവിധ പദ്ധതികളിലൂടെ വ്യവസായരംഗത്ത് എത്രകോടി രൂപയുടെ പുതിയ നിക്ഷേപം കൊണ്ടുവരാന്‍ സാധിച്ചിട്ടുണ്ടെന്ന് അറിയിക്കുമോ;

വനിതാ സംരംഭകര്‍ക്കായി എന്തെല്ലാം പദ്ധതികളാണ് വ്യവസായ വകുപ്പ് ആവിഷ്കരിച്ച് നടപ്പിലാക്കിയിട്ടുള്ളത് വിശദമാക്കുമോ?

നവീനമായ സാങ്കേതികവിദ്യാ സൗകര്യങ്ങളോടെയുള്ള അടിസ്ഥാന സൗകര്യ വികസനം വ്യവസായ പാർക്കുകളുടെ വളർച്ചയ്ക്ക് ഏറെ പ്രധാനമാണ് എന്നത് പരിശോധിച്ചിട്ടുണ്ടോ; വ്യവസായ വികസനത്തിന് ആവശ്യമായ അടിസ്ഥാന സൗകര്യങ്ങള്‍ ഒരുക്കുന്നതില്‍ സംസ്ഥാനം മുന്‍പന്തിയിലെത്തിയിട്ടുണ്ടോ; വിശദമാക്കാമോ;

വ്യവസായ പ്രവര്‍ത്തനത്തിന് പര്യാപ്തമായ അടിസ്ഥാന സൗകര്യങ്ങളോടെയുള്ള റെഡി-ടു-യൂസ് പ്ലാറ്റ്ഫോം സംസ്ഥാനത്തെ വ്യവസായ പാര്‍ക്കുകളില്‍ ലഭ്യമാക്കിയിട്ടുണ്ടോ;

വ്യവസായ പാര്‍ക്കുകളെ ദേശീയ-സംസ്ഥാന പാതകളുമായി നേരി‍‍ട്ട് ബന്ധിപ്പിക്കുന്നതിന് പ്രത്യേക പദ്ധതികള്‍ നടപ്പിലാക്കിയിട്ടുണ്ടോ; വിശദമാക്കാമോ;

സംരംഭകര്‍ക്ക് വന്‍ മുതല്‍മുടക്കില്ലാതെ വേഗത്തില്‍ സംരംഭങ്ങള്‍ ആരംഭിക്കുന്നതിനായി പ്ലഗ് & പ്ലേ ആശയത്തിന്റെ ഭാഗമായി സ്റ്റാന്‍ഡേര്‍ഡ് ഡിസൈന്‍ ഫാക്ടറികള്‍ എന്ന പദ്ധതി നടപ്പിലാക്കിയിയിട്ടുണ്ടോ; വിശദമാക്കാമോ?

ഈ സർക്കാർ അധികാരത്തിൽ വന്നശേഷം വ്യവസായ വകുപ്പിന് കീഴിൽ നടത്തിയ എല്ലാ നിക്ഷേപ സംഗമങ്ങളെയും സംബന്ധിച്ച വിശദാംശം നൽകാമോ;

പ്രസ്തുത നിക്ഷേപ സംഗമങ്ങളിൽ പങ്കെടുത്ത വിദേശ കമ്പനികളെയും, സ്വദേശ കമ്പനികളെയും സംബന്ധിച്ച വിശദാംശം ലഭ്യമാക്കാമോ;

സംസ്ഥാനത്ത് മൂന്നുലക്ഷം കോടി രൂപയുടെ നിക്ഷേപം നടത്താൻ തയ്യാറായി വന്ന് മുഖ്യമന്ത്രിയുമായി കൂടിക്കാഴ്ച നടത്തി എന്ന് അദ്ദേഹം അവകാശപ്പെട്ട വിദേശ കമ്പനിയെ സംബന്ധിച്ച വിശദാംശം നൽകാമോ; പ്രസ്തുത കമ്പനിയുമായി എന്തെങ്കിലും ധാരണപത്രം ഒപ്പു വച്ചിട്ടുണ്ടോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്ന ശേഷം കോഴിക്കോട് സൗത്ത് നിയോജക മണ്ഡലത്തില്‍ വ്യവസായ വകുപ്പ് മുഖേന നടപ്പിലാക്കിയ പദ്ധതികളുടെ വിശദാംശം ലഭ്യമാക്കാമോ?

ഈ സര്‍ക്കാര്‍ അധികാരമേറ്റ ശേഷം നാളിതുവരെ വ്യവസായ വകുപ്പ് മുഖേന അരുവിക്കര നിയോജകമണ്ഡലത്തില്‍ അനുവദിച്ച വിവിധ പദ്ധതികള്‍, അവയുടെ ഫണ്ട് വിവരം എന്നിവ അറിയിക്കാമോ;

സംരംഭക വര്‍ഷം പദ്ധതി പ്രകാരം എത്ര യൂണിറ്റുകളാണ് ഈ കാലയളവില്‍ മണ്ഡലത്തില്‍ പുതിയതായി ആരംഭിച്ചിട്ടുള്ളതെന്ന് വ്യക്തമാക്കുമോ?

സംരംഭക വര്‍ഷം പദ്ധതിയിലൂടെ കോഴിക്കോട് ജില്ലയില്‍ എത്ര സംരംഭങ്ങള്‍ ആരംഭിച്ചു എന്ന് വിശദമാക്കാമോ?

സംസ്ഥാനത്ത് 2021-ന് ശേഷം 100 കോടി രൂപയിലധികം മുതൽ മുടക്കി സംസ്ഥാന സർക്കാറിന്റെ ധനസഹായത്തോടെ തുടങ്ങിയ വ്യവസായ പദ്ധതികൾ ഏതെല്ലാമാണെന്ന് വ്യവസായം, മുതൽമുടക്ക്, തുടങ്ങിയ വർഷം, ആരംഭിച്ച ജില്ല, സർക്കാർ ധനസഹായം, പ്രസ്തുത പദ്ധതി മൂലം നേരിട്ട് ലഭിക്കുന്ന ജോലി തുടങ്ങിയ വിശദാംശങ്ങള്‍ സഹിതം ലഭ്യമാക്കുമോ;

ചെറുകിട, സൂക്ഷ്മ സംരംഭങ്ങൾ തുടങ്ങിയവർക്ക് സബ്സിഡി ഇനത്തിൽ ഈ കാലയളവിൽ എത്ര തുക നൽകാനുണ്ടെന്ന് ജില്ല തിരിച്ചുള്ള വിശദാംശങ്ങള്‍ ലഭ്യമാക്കുമോ?

സ്വിറ്റ്സർലൻഡിലെ ദാവോസിൽ നടന്ന ലോക സാമ്പത്തിക ഫോറത്തിൽ, സംസ്ഥാനത്തെ വ്യവസായ രംഗത്തെ പുത്തൻ സാധ്യതകൾ ലോകത്തിന് മുന്നിൽ അവതരിപ്പിക്കാൻ സാധിച്ചിട്ടുണ്ടോ; വിശദമാക്കാമോ;

രാജ്യത്തെ ആഗോള ബിസിനസിനുള്ള കവാടമായി കേരളത്തെ മാറ്റുകയെന്ന ലക്ഷ്യം സാധൂകരിക്കുന്നതിനായി പ്രസ്തുത സാമ്പത്തിക ഫോറത്തില്‍ നടത്തിയിട്ടുള്ള ഇടപെടലുകള്‍ വിശദീകരിക്കാമോ;

കഴിഞ്ഞ വര്‍ഷം സാമ്പത്തിക ഫോറത്തില്‍ നടത്തിയിട്ടുള്ള പ്രവര്‍ത്തനങ്ങളുടെ തുടര്‍ച്ചയായി ഉണ്ടായിട്ടുള്ള നേട്ടങ്ങള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

മുന്‍ വര്‍ഷങ്ങളില്‍ ലോക സാമ്പത്തിക ഫോറത്തില്‍ നിന്നും നിക്ഷേപം സ്വീകരിക്കുന്നതിന് കഴിഞ്ഞിരുന്നോ; വ്യക്തമാക്കാമോ?

സംസ്ഥാനത്ത് ലഭ്യമായ അപൂര്‍വ്വ ധാതുക്കളുടെ സാധ്യതകള്‍ പഠിക്കുന്നതിനും കൂടുതല്‍ കാര്യക്ഷമമായി ഈ രംഗത്തെ ഉപയോഗപ്പെടുത്തുന്നതിനും ലക്ഷ്യമിടുന്നുണ്ടോയെന്ന് വ്യക്തമാക്കാമോ;

ഇതിനായി സംസ്ഥാനത്ത് റെയര്‍ എര്‍ത്ത് കോറി‍ഡോര്‍ രൂപീകരണം സര്‍ക്കാരിന്റെ പരിഗണനയിലുണ്ടോയെന്ന് വിശദമാക്കാമോ;

റെയര്‍ എര്‍ത്ത് കോറിഡോര്‍ നടപ്പാക്കുന്നതിനനുകൂലമായ ഏതെല്ലാം ഘടകങ്ങള്‍ സംസ്ഥാനത്തുണ്ടെന്നാണ് വിലയിരുത്തിയിട്ടുള്ളതെന്ന് വിശദമാക്കാമോ;

സംസ്ഥാന ബജറ്റില്‍ പ്രഖ്യാപിക്കപ്പെട്ട ഈ പദ്ധതി നടപ്പാകുന്നതോടുകൂടി സംസ്ഥാനത്തുണ്ടാകുമെന്ന് പ്രതീക്ഷിക്കുന്ന നേട്ടങ്ങള്‍ എന്തൊക്കെയാണെന്ന് അറിയിക്കാമോ?

സംസ്ഥാനത്തെ സിറ്റി ഗ്യാസ് പദ്ധതിയുടെ നിലവിലെ പുരോഗതി വിലയിരുത്തിയിട്ടുണ്ടോ; എങ്കില്‍ ജില്ല തിരിച്ചുള്ള വിശദാംശം ലഭ്യമാക്കാമോ;

സിറ്റി ഗ്യാസ് പദ്ധതി സമയബന്ധിതമായി പൂര്‍ത്തീകരിക്കുന്നതിന് ആവശ്യമായ നടപടികള്‍ സ്വീകരിച്ചിട്ടുണ്ടോയെന്ന് വ്യക്തമാക്കാമോ;

പ്രസ്തുത പദ്ധതി കൂടുതല്‍ സ്ഥലങ്ങളിലേക്ക് വ്യാപിപ്പിക്കുന്നതിന് നടപടി സ്വീകരിക്കുമോ?

കേരളത്തിലെ യുവജനങ്ങൾക്ക് സംസ്ഥാനത്തിനകത്ത് തന്നെ തൊഴിൽ ചെയ്യാനാകുംവിധം സംവിധാനങ്ങൾ ശക്തിപ്പെടുത്തുന്നതിൽ എം. എസ്. എം. ഇ കൾ ഉൾപ്പെടെയുള്ള വ്യവസായ സംരംഭങ്ങൾക്ക് വലിയ പങ്ക് വഹിക്കാനാകുമെന്നത് പരിശോധിച്ചിട്ടുണ്ടോ;

മികവുറ്റ മനുഷ്യവിഭവശേഷിയും ടാലന്റ് പൂളും നിലവിലുള്ള കേരളത്തിൽ വ്യവസായങ്ങൾക്കും സംരംഭങ്ങൾക്കും അനുയോജ്യമായ അന്തരീക്ഷം രൂപപ്പെടുത്താന്‍ സർക്കാരിന് കഴിഞ്ഞിട്ടുണ്ടോ; എങ്കിൽ വിശദമാക്കാമോ;

മൂല്യാധിഷ്ഠിത ഭക്ഷ്യസംസ്കരണ മേഖലയിലുള്ള എം. എസ്. എം. ഇ കൾക്ക് ലോകബാങ്കിന്റെ സഹകരണത്തോടെ ധനസഹായം നൽകുന്ന പദ്ധതി പരിഗണനയിലുണ്ടോ; വിശദമാക്കാമോ;

എം. എസ്. എം. ഇ കളേക്കാൾ ചെറിയ സംരംഭങ്ങളായ നാനോ സംരംഭങ്ങളെ ശക്തിപ്പെടുത്താന്‍ പ്രത്യേക പദ്ധതി പരിഗണനയിലുണ്ടോ; വിശദമാക്കാമോ?

കേരളത്തിൽ ആരംഭിച്ച വ്യവസായങ്ങളെ സംരക്ഷിക്കാത്തതു മൂലം മറ്റു സംസ്ഥാനങ്ങളിലേക്ക് അവ മാറ്റപ്പെടുന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത വ്യവസായങ്ങളെ സംരക്ഷിക്കുന്നതു സംബന്ധിച്ച സര്‍ക്കാര്‍ നയം വ്യക്തമാക്കാമോ;

ദശകങ്ങളായി പ്രവര്‍ത്തിക്കുന്നതും വിദേശനാണ്യം നേടിത്തന്നുകൊണ്ടിരിക്കുന്നതുമായ വ്യവസായ സ്ഥാപനങ്ങള്‍ സര്‍ക്കാര്‍ സംവിധാനങ്ങളുടെ തെറ്റായ ഇടപെടലുകള്‍ മൂലം സംസ്ഥാനത്തു നിന്നും പ്രവര്‍ത്തനം മാറ്റുന്നതായി ശ്രദ്ധയില്‍പ്പെട്ടിട്ടുണ്ടോ;

എങ്കില്‍ സ്വീകരിച്ച നടപടികള്‍ വിശദമാക്കാമോ?

പുതുക്കാട് മണ്ഡലത്തിലെ ചിറ്റിശ്ശേരിയിലെ മുകുന്ദപുരം താലൂക്ക് മണ്‍പാത്ര കുടില്‍ വ്യവസായ സഹകരണ സംഘത്തിന്റെ ഉടമസ്ഥതയിലുളള സ്ഥലത്തുനിന്നും 20 സെന്റ് സ്ഥലം വില്‍പ്പന നടത്തുന്നതിനായി, ഖാദി ബോര്‍ഡിന്റെ അനുമതി ലഭിച്ച സാഹചര്യത്തില്‍ ബന്ധപ്പെട്ട വകുപ്പിന്റെ അനുമതി ലഭ്യമാക്കാന്‍ നടപടി സ്വീകരിക്കുമോ;

മേൽ സൂചിപ്പിച്ച കാര്യത്തിൽ സമര്‍പ്പിച്ച അപേക്ഷയിന്മേലുള്ള നടപടി ഏത് ഘട്ടത്തിലാണെന്ന് അറിയിക്കുമോ?

തിരൂർ നിയോജക മണ്ഡലത്തിൽ വെറ്റില വ്യവസായം പരിപോഷിപ്പിക്കുന്നതിന് 2016 മുതൽ നാളിതുവരെ സ്വീകരിച്ച നടപടികൾ എന്തെല്ലാമാണെന്ന് വ്യക്തമാക്കാമോ;

തിരൂരിലെ വെറ്റില സംസ്കരണത്തിനും വ്യവസായികമായ വിപണനത്തിനും വ്യവസായ വകുപ്പ് തുക നീക്കിവെച്ചിട്ടുണ്ടെങ്കിൽ അത് സംബന്ധിച്ച വിവരം 2016 മുതൽ സാമ്പത്തിക വർഷം തിരിച്ച് ലഭ്യമാക്കാമോ;

തിരൂരിലെ വെറ്റില കർഷകർക്ക് വേണ്ടി വ്യവസായ വകുപ്പ് ആവിഷ്കരിച്ചിട്ടുള്ള പദ്ധതികളുടെ വിശദാംശം ലഭ്യമാക്കാമാ?

കൊല്ലം നീണ്ടകര മുതല്‍ ആലപ്പുഴ തോട്ടപ്പളളി വരെയുളള തീരപ്രദേശങ്ങളിലെ കരിമണല്‍ നിക്ഷേപത്തിന്റെ സംസ്ക്കരണത്തിനായി എന്തെങ്കിലും പദ്ധതി ആവിഷ്ക്കരിക്കാന്‍ ഉദ്ദേശിക്കുന്നുണ്ടോ;

വിഴിഞ്ഞം തുറമുഖത്ത് നിന്ന് കൊല്ലത്തേയും കൊച്ചിയേയും ബന്ധപ്പെടുത്തി റെയര്‍ എര്‍ത്ത് കോറിഡോര്‍ സ്ഥാപിക്കാന്‍ തീരുമാനിച്ചിട്ടുണ്ടോ;

എങ്കിൽ ഇതുമൂലം സംസ്ഥാനത്തിനുണ്ടാകുന്ന നേട്ടങ്ങള്‍ എന്തെല്ലാമാണെന്നു വിശദമാക്കാമോ?

കൊച്ചി, ബംഗളുരു വ്യവസായ ഇടനാഴിയുടെ രണ്ടാംഘട്ട പ്രവൃത്തികള്‍ നിലവില്‍ ഏത് ഘട്ടത്തിലാണെന്ന് വ്യക്തമാക്കാമോ?

പാലക്കാട് വ്യവസായ സ്മാര്‍ട്ട് സിറ്റിയുടെ ഭാഗമായ കണ്ണബ്ര വ്യവസായ പാര്‍ക്കില്‍ 179 ഭൂവുടമകളില്‍ നിന്നും എത്ര ഏക്കര്‍ ഭൂമിയാണ് ഏറ്റെടുത്തിട്ടുള്ളതെന്ന് വ്യക്തമാക്കാമോ;

പ്രസ്തുത പാര്‍ക്കില്‍ ഏതെല്ലാം വ്യവസായ സംരംഭങ്ങളാണ് നടപ്പിലാക്കുവാന്‍ ഉദ്ദേശിക്കുന്നതെന്നും നിലവില്‍ ഏറ്റെടുത്ത ഭൂമിയുടെ എത്ര ശതമാനമാണ് വ്യവസായങ്ങള്‍ക്കായി വിനിയോഗിക്കുന്നതെന്നും വ്യക്തമാക്കാമോ?

ഈ സർക്കാർ അധികാരത്തിൽ വന്നതിന് ശേഷം കാസർഗോഡ് ജില്ലയിൽ പുതുതായി വ്യവസായ പാർക്കുകൾ ആരംഭിച്ചിട്ടുണ്ടോ എന്ന് വ്യക്തമാക്കാമോ;

എങ്കിൽ ഈ പാർക്കുകളുടെ നിലവിലെ പ്രവ‍ർത്തന പുരോഗതി വ്യക്തമാക്കാമോ;

ജില്ലയിൽ പുതുതായി വ്യവസായ സംരംഭങ്ങൾ ആരംഭിക്കുന്നതിന് വ്യവസായ പാർക്കുകളിൽ സ്ഥലം ലഭ്യമാണോ എന്ന് വ്യക്തമാക്കാമോ?

കാസര്‍കോട് നഗരത്തില്‍ ആസ്ട്രല്‍ വാച്ചസ് പ്രവര്‍ത്തിച്ചിരുന്ന സ്ഥലത്ത് പുതുതായി ഏതെങ്കിലും വ്യവസായ സംരംഭം ആരംഭിക്കാന്‍ സര്‍ക്കാര്‍ തീരുമാനിച്ചിട്ടുണ്ടോ; എങ്കിൽ തീരുമാനത്തിന്റെയോ ഉത്തരവിന്റെയോ പകര്‍പ്പ് ലഭ്യമാക്കാമോ;

പുതുതായി തുടങ്ങാന്‍ ഉദ്ദേശിക്കുന്ന സംരംഭത്തിനാവശ്യമായ തുക എത്രയാണെന്നും പ്രസ്തുത തുക എങ്ങനെ കണ്ടെത്തുമെന്നും വ്യക്തമാക്കുമോ;

ഈ സർക്കാരിന്റെ കാലയളവിൽ മേൽപ്പറഞ്ഞതുമായി ബന്ധപ്പെട്ട് എന്തെങ്കിലും പ്രാരംഭ നടപടികള്‍ ആരംഭിക്കുമോ; വ്യക്തമാക്കാമോ?

സംരംഭക വര്‍ഷം പദ്ധതിയുടെ ഭാഗമായി കോട്ടയം ജില്ലയില്‍ പുതിയതായി എത്ര സംരംഭങ്ങള്‍ ആരംഭിച്ചിട്ടുണ്ടെന്നും അവ ഏതെല്ലാമാണെന്നും നിയോജക മണ്ഡലം തിരിച്ച് വ്യക്തമാക്കുമോ;

പ്രസ്തുത സംരംഭങ്ങളിലൂടെ എത്ര തൊഴിലവസരങ്ങള്‍ സൃഷ്ടിക്കാന്‍ സാധിച്ചുവെന്ന് വ്യക്തമാക്കുമോ?

2021-25 കാലഘട്ടത്തില്‍ തൊടുപുഴ നിയോജക മണ്ഡലത്തില്‍ വ്യവസായ വകുപ്പിനുകീഴില്‍ നടപ്പിലാക്കിയ പദ്ധതികള്‍ ഏതൊക്കെ; വിശദാംശം ലഭ്യമാക്കാമോ?

കഴിഞ്ഞ സർക്കാരിന്റെയും ഈ സർക്കാരിന്റെയും കാലത്ത് സംസ്ഥാനത്ത് പുതിയതായി ആരംഭിച്ച ഫാക്ടറികളുടെ എണ്ണം എത്ര; ജില്ല തിരിച്ച് വർഷാടിസ്ഥാനത്തിലുള്ള കണക്ക് ലഭ്യമാക്കുമോ;

കഴിഞ്ഞ സർക്കാരിന്റെയും ഈ സർക്കാരിന്റെയും കാലത്ത് നടത്തിയ വിവിധ ഇൻവെസ്റ്റ്മെന്റ് മീറ്റുകൾ, ഗ്ലോബൽ സമിറ്റുകൾ എന്നിവയിൽ ഒപ്പുവച്ച എം. ഒ. യു.(MoU)കളിൽ എത്ര ശതമാനം മാത്രം യഥാർത്ഥ നിക്ഷേപമായി മാറി; എത്ര പ്രോജക്ടുകൾ ഭൂമിയിടപാട്, പരിസ്ഥിതി അനുമതി, ലോക്കൽ എതിർപ്പ് മുതലായ കാരണങ്ങളാൽ നടപ്പിലാകാതെ നിൽക്കുന്നു; പ്രഖ്യാപിച്ച തൊഴിലവസരങ്ങളിൽ എത്ര എണ്ണം യഥാർത്ഥമായി സൃഷ്ടിച്ചു;

കിൻഫ്ര, കെ. എസ്. ഐ. ഡി. സി. തുടങ്ങിയ ഏജൻസികളുടെ ഇൻഡസ്ട്രിയൽ പാർക്കുകളിൽ എത്ര ശതമാനം ഭൂമി ഉപയോഗത്തിലുണ്ട്; ഉപയോഗിക്കാത്ത ഭൂമിയുടെ വിസ്തൃതി എത്ര; പുതിയ വ്യവസായികൾക്ക് ഭൂമി ലഭിക്കാൻ നേരിടുന്ന തടസ്സങ്ങൾ എന്തെല്ലാം;

ഈ സര്‍ക്കാരിന്റെ കാലത്ത് വിവിധ ബജറ്റുകളിലായി വ്യവസായ വകുപ്പിന് അനുവദിച്ച മൂലധന ചെലവ് എത്രയാണ്; ആ ചെലവിന്റെ ഫലമായി ജി. ഡി. പി.-യില്‍ വ്യവസായ മേഖലയുടെ ശതമാന വളര്‍ച്ച എത്രയായി; ചെലവും ഫലവും തമ്മിലുള്ള അനുപാതം ലഭ്യമാക്കാമോ;

സംസ്ഥാനത്തിന്റെ മൊത്ത ആഭ്യന്തര ഉല്‍പാദനത്തില്‍ (ജി. എസ്. ഡി. പി.) വ്യവസായ മേഖലയുടെ സംഭാവന കഴിഞ്ഞ അഞ്ച് വര്‍ഷത്തിനിടെ എത്ര ശതമാനം വീതമാണെന്ന് അറിയിക്കുമോ; സംസ്ഥാനം അവകാശപ്പെടുന്ന തരത്തിലുള്ള വ്യാവസായിക വളര്‍ച്ചയ്ക്ക് ആനുപാതികമായി സാമ്പത്തിക വളര്‍ച്ച സംസ്ഥാനം കൈവരിക്കാത്തത് എന്തുകൊണ്ട്; ഈ സ്ഥിതി വ്യാവസായിക വളര്‍ച്ചയെന്നത് പൊള്ളയായ അവകാശവാദമാണെന്ന വിമര്‍ശനം ക്ഷണിച്ചു വരുത്തിയിട്ടുണ്ടോ; വ്യക്തമാക്കാമോ?

വ്യവസായ വകുപ്പ് വിവിധ പദ്ധതികളില്‍ ഉള്‍പ്പെടുത്തി 2016-17 മുതല്‍ മാവേലിക്കര മണ്ഡലത്തില്‍ നടപ്പിലാക്കിയ വിവിധ പ്രവൃത്തികളുടെ തുക ഉള്‍പ്പെടെയുളള വിശദാംശവും അവയുടെ തല്‍സ്ഥിതിയും ലഭ്യമാക്കാമോ?

ആർട്ടിഫിഷ്യൽ ഇന്റലിജൻസ് മേഖലയിൽ കേരളത്തെ ഒരു ഹബ്ബാക്കി മാറ്റുമെന്ന് പ്രഖ്യാപിച്ച സാഹചര്യത്തിൽ പുതിയ ജനറേറ്റീവ് എ. ഐ. നയം വ്യവസായ സംരംഭങ്ങളെ എങ്ങനെയാണ് സഹായിക്കുന്നതെന്ന് വിശദമാക്കുമോ;

സംസ്ഥാനത്തെ വ്യവസായ സൗഹൃദ റാങ്കിംഗ് ഉയർത്താൻ ഏകജാലക സംവിധാനത്തിൽ (കെ-സ്വിഫ്റ്റ്) വരുത്തിയ പുതിയ മാറ്റങ്ങൾ ഫലപ്രദമാണോ എന്ന് വിശദമാക്കുമോ?

മുന്‍കാലങ്ങളില്‍ നിന്നും വ്യത്യസ്തമായി കേരളത്തില്‍ സംരംഭകത്വം സാധ്യമാകുമെന്നതിലേയ്ക്ക് വ്യവസായികളുടെയും പൊതുസമൂഹത്തിന്റേയും കാഴ്ചപ്പാടിനെ മാറ്റിക്കൊണ്ടുവരുവാന്‍ ഈ സര്‍ക്കാരിന്റെ പ്രവര്‍ത്തനങ്ങള്‍ക്കായിട്ടുണ്ടോ; വ്യക്തമാക്കുമോ;

വ്യവസായ മേഖലയില്‍ സംരംഭകരുടെ പരാതി പരിഹരിക്കുന്നതില്‍ വീഴ്ച വരുത്തുന്ന ഉദ്യോഗസ്ഥരില്‍ നിന്നും പിഴ ഈടാക്കുന്നതുള്‍പ്പെടെ ശക്തമായ പരാതി പരിഹാര സംവിധാനം കൊണ്ടുവന്നിട്ടുണ്ടോ; വ്യക്തമാക്കുമോ?

സംസ്ഥാനത്ത് വ്യവസായ സൗഹൃദ അന്തരീക്ഷം സൃഷ്ടിക്കാന്‍ നിലവിലെ സര്‍ക്കാര്‍ സ്വീകരിച്ച നടപടികള്‍ വിശദമാക്കുമോ;

ഇത്തരത്തില്‍ സ്വീകരിച്ച നടപടികളുടെ ഭാഗമായി സംസ്ഥാനത്തിന് ആര്‍ജ്ജിക്കുവാന്‍ കഴിഞ്ഞ നേട്ടങ്ങള്‍ വിശദമാക്കുമോ?

തൃക്കാക്കര മണ്ഡലത്തിൽ 2016 -17 മുതൽ 2025 -26 വരെയുള്ള കാലയളവിൽ വ്യവസായ വകുപ്പ് മുഖേന നടപ്പിലാക്കിയ പദ്ധതികൾ ഏതെല്ലാമെന്ന് വിശദമാക്കാമോ;

മേൽപ്പറഞ്ഞതിൽ ഓരോ പദ്ധതിക്കും അനുവദിച്ചിട്ടുള്ള തുക, പ്രസ്തുത പദ്ധതികളുടെ നിലവിലെ സ്ഥിതി എന്നിവ സംബന്ധിച്ച വിശദാംശം ലഭ്യമാക്കുമോ?

ഈ സർക്കാർ അധികാരത്തിൽ വന്നശേഷം നാളിതുവരെ മഞ്ചേരി നിയോജക മണ്ഡലത്തിൽ വ്യവസായ വകുപ്പു മുഖേന നടപ്പിലാക്കിയ പദ്ധതികൾ ഏതൊക്കെയാണ്; വിശദാംശം ലഭ്യമാക്കാമോ;

പ്രസ്തുത മണ്ഡലത്തിൽ വ്യവസായ വകുപ്പിന്റെ എത്ര പദ്ധതികൾ പൂർത്തിയായി; ഇനി ഏതൊക്കെയാണ് പൂർത്തിയാകാനുള്ളത്; വർഷം തിരിച്ച് കണക്കുകൾ ലഭ്യമാക്കാമോ;

മഞ്ചേരി നിയോജക മണ്ഡലത്തിൽ വ്യവസായ വകുപ്പ് നടപ്പിലാക്കാൻ തീരുമാനിച്ച പദ്ധതികളിൽ ഭരണാനുമതി നൽകിയ പദ്ധതികൾ ഏതൊക്കെയാണ്; അവയിൽ ഏതൊക്കെ പദ്ധതികൾ പൂർത്തിയായിട്ടുണ്ടെന്നും ഏതൊക്കെ പദ്ധതികളാണ് പൂർത്തിയാകാനുള്ളതെന്നും വിശദമാക്കാമോ;

പ്രസ്തുത മണ്ഡലത്തിൽ വ്യവസായ വകുപ്പ് നടപ്പിലാക്കിയ പദ്ധതികൾക്കായി ചെലവഴിച്ച തുക എത്രയാണെന്നും 2021 മുതൽ 2026 വരെയുള്ള കണക്കുകൾ വർഷം തിരിച്ചും നൽകാമോ?

വനിതകൾക്ക് സ്വയംതൊഴിൽ തുടങ്ങുന്നതിനായി എന്തെല്ലാം സഹായങ്ങളാണ് നൽകി വരുന്നതെന്ന് വിശദമാക്കാമോ;

ഇവരുടെ സംരംഭകത്വ വികസനത്തിനായി എന്തെല്ലാം സഹായങ്ങളാണ് ആസൂത്രണം ചെയ്തു നടപ്പാക്കാൻ ഉദ്ദേശിക്കുന്നത്?

ഈ സർക്കാർ അധികാരത്തിൽ വന്നതിനുശേഷം സ്വിറ്റ്സർലാൻഡിലെ ദാവോസിൽ നടന്ന ലോക സാമ്പത്തിക ഫോറത്തിൽ സംസ്ഥാനം പങ്കെടുത്തിട്ടുണ്ടോ; എങ്കിൽ എത്ര തവണ പങ്കെടുത്തിട്ടുണ്ട്;

ഓരോ ഉച്ചകോടിയിലും കേരളത്തെ പ്രതിനിധീകരിച്ച് ആരെല്ലാമാണ് പങ്കെടുത്തിട്ടുളളതെന്നും ആയതിന് എത്ര രൂപ ചെലവായെന്നും വ്യക്തമാക്കാമോ;

ഓരോ ഉച്ചകോടിയിലും സംസ്ഥാനത്തിന് ലഭിച്ച നേട്ടങ്ങൾ എന്തൊക്കെയാണെന്ന് വ്യക്തമാക്കാമോ; ഇത് മൂലം ലഭിച്ച നിക്ഷേപങ്ങളുടെയും തൊഴിലവസരങ്ങളുടെയും കണക്കുകൾ വ്യക്തമാക്കാമോ;

ലോക സാമ്പത്തിക ഉച്ചകോടിയിൽ പങ്കെടുത്ത മറ്റ് ദക്ഷിണേന്ത്യൻ സംസ്ഥാനങ്ങൾക്ക് ലഭിച്ച നേട്ടങ്ങൾ കേരളത്തിന് ലഭിച്ചിട്ടില്ല എന്ന കാര്യം ശ്രദ്ധയിൽപ്പെട്ടിട്ടുണ്ടോ; എങ്കിൽ അത് പരിഹരിക്കുന്നതിന് എന്തെല്ലാം നടപടികൾ സ്വീകരിച്ചിട്ടുണ്ടെന്ന് വ്യക്തമാക്കാമോ?

രാജ്യത്ത് നിലവിൽ വന്ന ഇന്ത്യ- യു.എസ്. ഇടക്കാല വ്യാപാര കരാർ സംസ്ഥാനത്തെ വ്യാവസായിക, വ്യാപാര രംഗത്ത് ഉണ്ടാക്കുന്ന പ്രത്യാഘാതങ്ങൾ പരിശോധിച്ചിട്ടുണ്ടോ; വിശദമാക്കാമോ;

ഉഭയകക്ഷി കരാർ പ്രകാരം അമേരിക്കയിൽ നിന്നും തീരുവയില്ലാതെ കാർഷിക, വ്യാവസായിക ഉല്പന്നങ്ങൾ ഇറക്കുമതി ചെയ്യുകയും സംസ്ഥാനത്തുനിന്നുളള ഉല്പന്നങ്ങൾ ഉയ‍ർന്ന തീരുവ ഈടാക്കി കയറ്റുമതി ചെയ്യുന്നതുമായ അനിതരസാധാരണ സാഹചര്യം സ‍ൃഷ്ടിക്കുന്ന പ്രശ്നങ്ങൾ ശ്രദ്ധയിൽപ്പെട്ടിട്ടുണ്ടോ; വ്യക്തമാക്കാമോ;

പ്രസ്തുത കരാര്‍ സംസ്ഥാനത്തെ ഏതെല്ലാം ഉല്പന്നങ്ങളുടെ ഉല്പാദനത്തെയും കയറ്റുമതിയെയും പ്രതികൂലമായി ബാധിക്കുമെന്ന് പരിശോധിച്ചിട്ടുണ്ടോ; അറിയിക്കാമോ;

പ്രസ്തുത വ്യാപാര കരാറിന്റെ പൂർണ്ണ വിവരങ്ങൾ സംസ്ഥാന സർക്കാരിൽ ലഭ്യമാണോ; വിശദാംശം നൽകാമോ?

സംരംഭക വര്‍ഷം പദ്ധതിയുടെ ഭാഗമായി സംസ്ഥാനത്ത് ഇതേവരെ ആരംഭിച്ച സംരംഭങ്ങളില്‍ എത്രപേര്‍ക്ക് ഇതിന്റെ പ്രയോജനം ലഭിച്ചിട്ടുണ്ടെന്ന് വിശദമാക്കാമോ;

വാമനപുരം മണ്ഡലത്തില്‍ ഈ സര്‍ക്കാരിന്റെ കാലയളവില്‍ വ്യവസായ വകുപ്പ് മുഖാന്തിരം എത്ര സംരംഭങ്ങള്‍ ആരംഭിച്ചിട്ടുണ്ടെന്നും എത്ര പേര്‍ക്ക് ഇതിന്റെ പ്രയോജനം ലഭിച്ചിട്ടുണ്ടെന്നും പഞ്ചായത്ത് തിരിച്ച് വിശദമാക്കാമോ?

ക്വാറി, ക്രഷര്‍ മേഖലയില്‍ നിലവിലുള്ള നിയന്ത്രണങ്ങള്‍ നിര്‍മ്മാണ മേഖലയെയും വിവിധ റോഡ് പണികളെയും തടസ്സപ്പെടുത്തുന്ന സാഹചര്യത്തില്‍ ഇതിനെ മറികടക്കാന്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

പാറശ്ശാല നിയോജക മണ്ഡലത്തില്‍ നിലവില്‍ പ്രവര്‍ത്തിച്ചുവരുന്നതും പ്രവര്‍ത്തനരഹിതമായിട്ടുള്ളതുമായ കെെത്തറി നെയ്ത്ത് സഹകരണ സംഘങ്ങള്‍ ഏതൊക്കെയാണെന്ന് വ്യക്തമാക്കാമോ;

ഈ മണ്ഡലത്തിലെ പ്രവര്‍ത്തനരഹിതമായ കെെത്തറി സംഘങ്ങളുടെ പ്രവര്‍ത്തനം പുനരാരംഭിക്കുന്നതിനും സാമ്പത്തിക പ്രതിസന്ധി നേരിടുന്ന സംഘങ്ങളെ പുനരുജ്ജീവിപ്പിക്കുന്നതിനുമായി എന്തൊക്കെ നടപടികളാണ് സ്വീകരിച്ചു വരുന്നത്;

കെെത്തറി തൊഴിലാളികളുടെ ക്ഷേമം ഉറപ്പാക്കുന്നതിനും ഉല്‍പന്നങ്ങള്‍ക്ക് വിപണി കണ്ടെത്തുന്നതിനുമായി പാറശ്ശാല മണ്ഡലം കേന്ദ്രീകരിച്ച് പ്രത്യേക പാക്കേജുകളോ പദ്ധതികളോ നടപ്പിലാക്കാന്‍ ഉദ്ദേശിക്കുന്നുണ്ടോ; എങ്കില്‍ അതിന്റെ വിശദാംശം ലഭ്യമാക്കാമോ;

സംഘങ്ങള്‍ നവീകരിക്കുന്നതിനും ആധുനിക തറികള്‍ സ്ഥാപിക്കുന്നതിനുമായി നിലവില്‍ നല്‍കിവരുന്ന സാമ്പത്തിക സഹായങ്ങള്‍ എന്തൊക്കയാണെന്ന് അറിയിക്കാമോ?

കൈത്തറി മേഖലയുടെ വളര്‍ച്ചയ്ക്ക് പുതിയ സാധ്യതകള്‍ കണ്ടെത്തുക എന്ന ലക്ഷ്യം മുന്‍നിര്‍ത്തി പ്രഖ്യാപിച്ച മട്ടന്നൂര്‍ മണ്ഡലത്തിലെ കാഞ്ഞിരോട് കൈത്തറി ഗ്രാമം പദ്ധതി നടപ്പിലാക്കുന്നതിന് വിശദമായ പ്രോജക്ട് റിപ്പോര്‍ട്ട് തയ്യാറാക്കി സമര്‍പ്പിച്ചിട്ടുണ്ടോ; ഇതുമായി ബന്ധപ്പെട്ട് എന്തൊക്കെ നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ;

പ്രസ്തുത പദ്ധതിക്ക് ഈ വര്‍ഷത്തെ ബജറ്റില്‍ എത്ര തുക നീക്കിവച്ചിട്ടുണ്ട്; വിശദാംശം ലഭ്യമാക്കാമോ?

മാവേലിക്കര മണ്ഡലത്തില്‍ കൈത്തറി സഹകരണ സംഘത്തിന്റെ ഉടമസ്ഥതയില്‍ കണ്ടിയൂരിലുള്ള സ്ഥലത്തിന്റേയും കെട്ടിടങ്ങളുടേയും വിശദവിവരം ലഭ്യമാക്കുമോ;

ടി സ്ഥലം ആയുര്‍വേദ ആശുപത്രിയുടെ പ്രവര്‍ത്തനങ്ങള്‍ക്ക് വിട്ടുനല്‍കാന്‍ ആവശ്യമായ നടപടികള്‍ സ്വീകരിക്കുമോ?

ഹാൻവീവിൽ നിലവിൽ എന്തൊക്കെ ആനുകൂല്യങ്ങളാണ് വിതരണം ചെയ്യാൻ കുടിശ്ശിക ഉള്ളത്; വിശദാംശം നൽകാമോ; വിവിധ കുടിശ്ശികകൾ പൂർണമായും വിതരണം ചെയ്യാൻ നിലവിൽ എത്ര തുക ആവശ്യമായിവരും;

ഹാൻവീവിന് വിവിധയിനങ്ങളിലായി നിലവിൽ സർക്കാർ നൽകാനുള്ള കുടിശികയുടെ വിശദാംശം നൽകാമോ;

നടപ്പ് സാമ്പത്തിക വർഷത്തെ ബജറ്റിൽ ഹാൻവീവ് നൽകിയ പ്രൊജക്റ്റ്‌ പ്രകാരം തുക അനുവദിച്ചു നൽകിയിട്ടുണ്ടോ; വിശദാംശം വ്യക്തമാക്കുമോ;

ഹാൻവീവിന്റെ പ്രതിസന്ധി പരിഹരിക്കാൻ അടിയന്തര നടപടികൾ സ്വീകരിക്കുമോ ?

മുകുന്ദപുരം മണ്‍പാത്ര കുടില്‍ വ്യവസായ സഹകരണ സംഘത്തിന്റെ ഓഡിറ്റോറിയം നിര്‍മ്മാണം പൂര്‍ത്തിയാക്കുന്നതിനായി സംഘത്തിന്റെ ഉടമസ്ഥതയിലുളള സ്ഥലത്തുനിന്നും 20 സെന്റ് സ്ഥലം വില്‍ക്കുന്നതിന് അനുമതി ലഭിക്കുന്നതിനുളള നടപടി സ്വീകരിച്ചിട്ടുണ്ടോ;

ഖാദി ബോര്‍ഡ് പ്രസ്തുത അപേക്ഷ പരിഗണിച്ച് അനുമതി നല്‍കിയ സാഹചര്യത്തില്‍ വകുപ്പിന്റെ അനുമതി ലഭ്യമാക്കുന്നതിന് നടപടി സ്വീകരിക്കുമോ?

കയർ മേഖലയെ സംരക്ഷിക്കാൻ സ്വീകരിച്ച നടപടികൾ എന്തൊക്കെയെന്ന് വ്യക്തമാക്കുമോ;

കയർ തൊഴിലാളികളുടെ സേവന വേതന വ്യവസ്ഥകൾ പരിഷ്‌ക്കരിക്കാൻ എന്തൊക്കെ നടപടികളാണ് സ്വീകരിച്ചു വരുന്നതെന്ന് വ്യക്തമാക്കുമോ ?

കയർ തൊഴിലാളി ക്ഷേമനിധി ബോർഡിൽ നിലവിൽ പെൻഷൻ ആനുകൂല്യങ്ങൾ ഉൾപ്പെടെ വിതരണം ചെയ്യാൻ കുടിശികയുള്ള ആനുകൂല്യങ്ങൾ ഏതൊക്കെയാണെന്ന് വിശദമാക്കാമോ;

പ്രസ്തുത കുടിശികകൾ പൂർണ്ണമായും വിതരണം ചെയ്യുന്നതിനായി ബോർഡിന് നിലവിൽ ആവശ്യമായ തുക എത്രയാണെന്നും നടപ്പ് സാമ്പത്തിക വർഷത്തെ ബജറ്റിൽ ഈ ഇനത്തിൽ ക്ഷേമനിധി ബോർഡിന് അനുവദിച്ചിരിക്കുന്ന തുക എത്രയാണെന്നും വ്യക്തമാക്കുമോ;

ഈ സർക്കാരിന്റെ കാലയളവിൽ കയർ തൊഴിലാളികളുടെ ക്ഷേമനിധി വിഹിതം വർധിപ്പിച്ചിട്ടുണ്ടോ; എങ്കിൽ എത്ര രൂപയിൽ നിന്നും എത്ര രൂപയായാണ് വർദ്ധിപ്പിച്ചതെന്നും വർദ്ധനവ് ഏത് തീയതി മുതലാണ് പ്രാബല്യത്തിൽ വന്നതെന്നും ആയതിന് അനുപാതികമായി തൊഴിലുടമയുടെ വിഹിതം വർദ്ധിപ്പിച്ചിട്ടുണ്ടോ വ്യക്തമാക്കാമോ?

കോഴിക്കോട് ജില്ലയിലെ കുന്നത്തറ സി.വി.സി.എസ്. 268 എന്ന സംഘത്തിന്റെ വര്‍ക്ക് ഷെഡ് പ്രവൃത്തിക്ക് സര്‍ക്കാര്‍ ഫണ്ട് അനുവദിച്ചിരുന്നോയെന്നും എത്ര തുകയാണ് അനുവദിച്ചിരുന്നതെന്നും പ്രസ്തുത പ്രവൃത്തി നടപ്പിലാക്കുന്നതില്‍ കാലതാമസം നേരിട്ടിട്ടുണ്ടോയെന്നും വിശദമാക്കാമോ?

കയര്‍ മേഖലയിലെ തൊഴിലാളികള്‍ക്ക് ശാസ്ത്രീയ പരിശീലനം ലഭ്യമാക്കുന്നതിനും പൂര്‍ണ്ണ യന്ത്രവൽകരണം സാധ്യമാക്കുന്നതിനും എന്തൊക്കെ നടപടികള്‍ സ്വീകരിച്ചുവരുന്നുവെന്ന് വ്യക്തമാക്കുമോ;

ദേശീയ പാതയുടെ നിര്‍മ്മാണത്തില്‍ കയര്‍ ഭൂവസ്ത്രം ഉപയോഗിക്കണമെന്ന കേരളത്തിന്റെ ആവശ്യം കേന്ദ്ര സര്‍ക്കാര്‍ അംഗീകരിച്ചിട്ടുണ്ടോ; എങ്കില്‍ ഇതുമൂലം കയര്‍ വ്യവസായത്തിന് ഉണ്ടാകുന്ന നേട്ടങ്ങൾ എന്തൊക്കെയാണെന്ന് വ്യക്തമാക്കുമോ?

കയർഫെഡില്‍ എല്‍. ഡി. ക്ലാർക്ക് നിയമനങ്ങൾ പി.എസ്.സി. മുഖാന്തരമാണോ നടത്തുന്നത്; വ്യക്തമാക്കുമോ; എങ്കിൽ നിയമനങ്ങൾ പി. എസ്. സി.ക്ക് വിട്ടിട്ടുള്ളത് എന്ന് മുതലാണെന്ന് വ്യക്തമാക്കുമോ;

നിലവിൽ പി. എസ്. സി. വഴി നിയമനത്തിനായി എല്‍.ഡി. ക്ലാർക്ക് തസ്തികയിൽ ലിസ്റ്റ് നിലവിലുണ്ടോ; ഉണ്ടെങ്കിൽ ജനറൽ കാറ്റഗറിക്കും സൊസൈറ്റി കാറ്റഗറിക്കും പ്രത്യേകം ലിസ്റ്റ് നിലവിലുണ്ടോ; ഉണ്ടെങ്കിൽ റാങ്ക് ലിസ്റ്റിന്റെ കാലാവധി എന്നവസാനിക്കുമെന്ന് വ്യക്തമാക്കാമോ;

കാറ്റഗറി നമ്പർ 70/2021 (ലോവർ ഡിവിഷൻ ക്ലാർക്ക് പാർട്ട് II, സൊസൈറ്റി കാറ്റഗറി)-ൽ നിയമനങ്ങൾക്കായി എത്ര ഒഴിവുകളാണ് റിപ്പോർട്ട് ചെയ്തിട്ടുള്ളതെന്നും ഇതിൽനിന്ന് എത്രപേർക്ക് നിയമനം ഇതുവരെ നൽകിയിട്ടുണ്ടെന്നുമുള്ള വിശദാംശങ്ങൾ നൽകാമോ;

നിലവിൽ കയർഫെഡിൽ എല്‍. ഡി. ക്ലർക്ക് തസ്തികയിൽ എത്ര ഒഴിവുകളുണ്ട്; ഈ ഒഴിവുകൾ പി. എസ്. സി. ക്ക് റിപ്പോർട്ട് ചെയ്തിട്ടുണ്ടോ; അറിയിക്കുമോ;

നിലവിൽ കയർഫെഡില്‍ എല്‍. ഡി. ക്ലാർക്ക് തസ്തികയിൽ താൽക്കാലിക അടിസ്ഥാനത്തിൽ ആളുകൾ ജോലി ചെയ്യുന്നുണ്ടോ; ഉണ്ടെങ്കിൽ എത്രപേർ ഇത്തരത്തിൽ ജോലി ചെയ്യുന്നുണ്ടെന്ന വിശദാംശം ലഭ്യമാക്കാമോ;

കയർഫെഡിൽ താൽക്കാലിക അടിസ്ഥാനത്തിൽ ആളുകൾ ജോലി ചെയ്യുന്നുണ്ടെങ്കിൽ ഈ ഒഴിവുകൾ പി.എസ്.സി.ക്ക് അടിയന്തരമായി റിപ്പോർട്ട് ചെയ്യുന്നതിനുള്ള നടപടികൾ സ്വീകരിക്കുമോ?