വളര്‍ത്തു മൃഗങ്ങളില്‍ കണ്ടുവരുന്ന രോഗങ്ങള്‍ പ്രതിരോധിക്കുന്നതിന് എന്തെല്ലാം പദ്ധതികളാണ് നടപ്പിലാക്കി വരുന്നതെന്ന് വിശദമാക്കാമോ ;

കന്നുകാലികള്‍ക്കുണ്ടാകുന്ന രോഗങ്ങള്‍ ചികിത്സിക്കാൻ കര്‍ഷകരുടെ വീടുകളിലെത്തി പരിശോധന നടത്തുന്നത്തിനുള്ള നടപടി സ്വീകരിക്കുമോ ?

മൃഗസംരക്ഷണ വകുപ്പ് 2021 മുതല്‍ 2024 വരെ ഗുരുവായൂര്‍ മണ്ഡലത്തില്‍ വിവിധ പദ്ധതികള്‍ക്കായി എത്ര രൂപ അനുവദിച്ചിട്ടുണ്ട് എന്ന് വ്യക്തമാക്കാമോ?

ഈ സർക്കാരിന്റെ കാലയളവിൽ ഇതുവരെ ഓരോ സാമ്പത്തിക വർഷവും മൃഗസംരക്ഷണ വകുപ്പിന് ബജറ്റിൽ വകയിരുത്തിയ തുകയും അനുവദിച്ച തുകയും ചെലവഴിച്ച തുകയും എത്രയാണെന്ന് വ്യക്തമാക്കുമോ;

തെരുവ് നായ്ക്കളെ നിയന്ത്രിക്കുന്നതിനുള്ള അനിമല്‍ ബര്‍ത്ത് കണ്‍ട്രോൾ പദ്ധതി നടപ്പാക്കുന്നതിൽ മൃഗസംരക്ഷണ വകുപ്പിന് എന്തൊക്കെ ചുമതലകളാണ് ഉള്ളത്; പ്രസ്തുത ചുമതലകൾ നിറവേറ്റുന്നതിൽ എന്തെങ്കിലും പ്രായോഗിക ബുദ്ധിമുട്ടുകൾ നേരിടുന്നുണ്ടോ; തദ്ദേശസ്വയംഭരണ വകുപ്പുമായി ഫലപ്രദമായ ഏകോപനത്തിലൂടെ പ്രസ്തുത പദ്ധതി കാര്യക്ഷമമാക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

ഇരിക്കൂര്‍ മണ്ഡലത്തിൽ മൃഗസംരക്ഷണ വകുപ്പ് ഏതെല്ലാം പദ്ധതികളാണ് 2021-22 മുതൽ നടപ്പിലാക്കി വരുന്നതെന്ന് അറിയിക്കുമോ;

പ്രസ്തുത പദ്ധതികൾ ഓരോന്നിന്റെയും പ്രവർത്തന പുരോഗതിയുടെ വിശദാംശം പഞ്ചായത്ത്/മുനിസിപ്പാലിറ്റി അടിസ്ഥാനത്തിൽ വിശദമാക്കുമോ?

വാമനപുരം മണ്ഡലത്തില്‍ മൃഗസംരക്ഷണ വകുപ്പിന്റെ കീഴില്‍ പ്രവര്‍ത്തിക്കുന്ന സ്ഥാപനങ്ങള്‍ ഏതെല്ലാമാണെന്നും ഈ സര്‍ക്കാരിന്റെ കാലത്ത് പ്രസ്തുത സ്ഥാപനങ്ങളുടെ അടിസ്ഥാന വികസനത്തിനായി എന്തെല്ലാം പദ്ധതികള്‍ നടപ്പിലാക്കിയിട്ടുണ്ടെന്നും ഓരോന്നിനും ചെലവാക്കിയ തുക എത്രയെന്നും വിശദമാക്കുമോ;

പ്രസ്തുത വകുപ്പിന് കീഴില്‍ പാലോട് പ്രവര്‍ത്തിക്കുന്ന സിയാദ് (സ്റ്റേറ്റ് ഇന്‍സ്റ്റിറ്റൂട്ട് ഫോര്‍ അനിമല്‍ ഡീസീസസ്) എന്ന സ്ഥാപനത്തില്‍ എന്തെല്ലാം പ്രവര്‍ത്തനങ്ങളാണ് നടന്നുവരുന്നതെന്ന് അറിയിക്കാമോ; വിശദാംശം നൽകാമോ?

കുട്ടനാട്ടിലെ താറാവ് കര്‍ഷകരുടെ പ്രശ്നങ്ങള്‍ പരിഹരിക്കാന്‍ എന്തൊക്കെ പുതിയ നടപടികള്‍ സ്വീകരിക്കുമെന്ന് വ്യക്തമാക്കുമോ;

പക്ഷിപ്പനി മൂലം താറാവുകള്‍ കൂട്ടത്തോടെ ചത്തൊടുങ്ങിയ കേസുകളില്‍ നഷ്ടപരിഹാരം യഥാസമയം നല്‍കുന്നതിന് നടപടികള്‍ സ്വീകരിക്കുമോ; വിശദാംശം ലഭ്യമാക്കുമോ?

കറുകച്ചാല്‍, നെടുങ്കുന്നം വെറ്ററിനറി ആശുപത്രികളുടെ പുതിയ കെട്ടിട നിർമ്മാണ പുരോഗതി വ്യക്തമാക്കാമോ;

ഇതിനായി ഭരണാനുമതി ലഭ്യമാക്കിയിട്ടുണ്ടോയെന്നും തുക എത്രയാണെന്നും അറിയിക്കാമോ; ഇല്ലെങ്കില്‍ എന്താണ് തടസ്സമെന്നും എന്നത്തേക്ക് അനുമതി നല്കാനാകുമെന്നും വ്യക്തമാക്കാമോ;

പ്രസ്തുത ആശുപത്രികള്‍ക്ക് പുതിയ കെട്ടിടം നിർമ്മിക്കുന്നതിന് അടിയന്തരമായി അനുമതി ലഭ്യമാക്കാമോ?

സംസ്ഥാനത്തെ വെറ്ററിനറി ആശുപത്രികൾ സ്മാർട്ട് ആക്കുന്നതിന് തീരുമാനിച്ചിട്ടുണ്ടോ; എങ്കിൽ ഇതു മുഖേന എന്തെല്ലാം സേവനങ്ങളും സൗകര്യങ്ങളുമാണ് അധികമായി പൊതുജനങ്ങൾക്ക് നൽകാൻ ഉദ്ദേശിക്കുന്നതെന്ന് വ്യക്തമാക്കുമോ?

മൃഗസംരക്ഷണ വകുപ്പ് ഡയറക്ടറേറ്റിന്റെ 11/07/2024 ലെ എ.എച്ച്.ഡി./1457/2024-കെ2 നമ്പര്‍ ഉത്തരവ് പ്രകാരം അസിസ്റ്റന്റ് ഫീൽഡ് ഓഫീസർ തസ്തികയിൽ നിന്നും ഫീൽഡ് ഓഫീസർ തസ്തികയിലേക്ക് സ്ഥാനക്കയറ്റം നൽകിയതിലൂടെ ഉണ്ടായ ഒഴിവുകളിലേക്ക് താഴ്ന്ന തസ്തികകൾ ആയ അഗ്രികൾച്ചറൽ ഫീൽഡ് ഓഫീസർ, ലൈവ്സ്റ്റോക്ക് ഇൻസ്‌പെക്ടർ ഗ്രേഡ് 1, ലൈവ്സ്റ്റോക്ക് ഇൻസ്‌പെക്ടർ ഗ്രേഡ് 2 തസ്തികളിലേക്കുള്ള സ്ഥാനക്കയറ്റം വേഗത്തിലാക്കാൻ നടപടികൾ സ്വീകരിച്ചിട്ടുണ്ടോയെന്ന് വ്യക്തമാക്കാമോ; ഉണ്ടെങ്കിൽ ആനുപാതിക സ്ഥാനകയറ്റ ഉത്തരവ് എന്ന് പ്രസിദ്ധീകരിക്കും എന്ന് വ്യക്തമാക്കാമോ;

ഇപ്രകാരം ആനുപാതികമായി സ്ഥാനക്കയറ്റം നടത്തുമ്പോൾ ലൈവ്സ്റ്റോക്ക് ഇൻസ്‌പെക്ടർ ഗ്രേഡ് 2 തസ്തികയിൽ ഓരോ ജില്ലയിലും ഉണ്ടാവുന്ന സ്ഥാനകയറ്റ ഒഴിവുകൾ എത്ര എന്ന് വ്യക്തമാക്കാമോ;

മൃഗസംരക്ഷണ വകുപ്പിലെ ലൈവ്സ്റ്റോക്ക് ഇൻസ്‌പെക്ടർ തസ്തികയുടെ സ്ഥാനകയറ്റം പ്രസിദ്ധീകരിച്ച 05/07/2024 ലെ എ.എച്ച്.ഡി./1789/2024-കെ4 Part (1) നമ്പര്‍ ഉത്തരവ് വന്നതിന് ശേഷം ലൈവ്സ്റ്റോക്ക് ഇൻസ്‌പെക്ടർ തസ്തികകൾ ആയ അഗ്രികൾച്ചറൽ ഫീൽഡ് ഓഫീസർ, ലൈവ്സ്റ്റോക്ക് ഇൻസ്‌പെക്ടർ ഗ്രേഡ് 1 തസ്തികളിൽ നിന്നും 25/09/2024 വരെ എത്ര ജീവനക്കാർ ആണ് വിരമിച്ചിട്ടുള്ളതെന്ന് വ്യക്തമാക്കാമോ;

ഒ.എ(ഇ)212/2024 & 735/2024 നമ്പർ കേസുകളിൽ ബഹു. കേരള അഡ്മിനിസ്ട്രേറ്റീവ് ട്രിബ്യൂണലിന്റെ 26/06/2024 ലെ അന്തിമ ഉത്തരവ് പ്രകാരം നടപടികൾ സ്വീകരിച്ചിട്ടുണ്ടോ; ഉണ്ടെങ്കിൽ ആയതു എന്ന് നടപ്പിൽ വരും എന്ന് വ്യക്തമാക്കാമോ;

ലൈവ്സ്റ്റോക്ക് ഇൻസ്‌പെക്ടർ ഗ്രേഡ് 2 തസ്തികയുടെ നിയമനം സംസ്ഥാനതലത്തിൽ ആക്കാനുള്ള നടപടികൾ സ്വീകരിച്ചിട്ടുണ്ടോയെന്ന് വ്യക്തമാക്കാമോ;

ലൈവ്സ്റ്റോക്ക് ഇൻസ്‌പെക്ടർ തസ്തികയുടെ യോഗ്യതയിൽ നിലവിലുള്ള വി.എച്ച്.എസ് .ഇ കോഴ്സ് ആയ ലൈവ്സ്റ്റോക്ക് മാനേജ്മെന്റിനോടൊപ്പം എൻ.എസ്.ക്യൂ.എഫ്-ന്റെ ഭാഗമായി പേര് മാറിയ വി.എച്ച്.എസ്.ഇ കോഴ്സ് കൾ ആയ ഡി.എഫ്.ഇ. & എസ്.പി.എഫ്. എന്നിവ ഉൾപ്പെടുത്താൻ തീരുമാനം എടുത്തിട്ടുണ്ടോയെന്ന് വ്യക്തമാക്കാമോ?

കണ്ണൂര്‍ ജില്ലയിലെ കണ്ണവം വനമേഖലയിലുണ്ടായ ഉരുള്‍പൊട്ടലിന്റെ ഭാഗമായി മട്ടന്നൂര്‍ മണ്ഡലത്തിലെ വിവിധ തദ്ദേശസ്ഥാപനങ്ങളില്‍ വലിയ നാശനഷ്ടം ഉണ്ടാവുകയും അനവധി കന്നുകാലികള്‍ ഉള്‍പ്പെടെയുള്ള വളര്‍ത്തുമൃഗങ്ങള്‍ നഷ്ടമാവുകയും ചെയ്തത് ശ്രദ്ധയില്‍പ്പെട്ടിട്ടുണ്ടോ; പ്രസ്തുത ദുരന്തത്തെ നേരിടുന്നതിന് മൃഗസംരക്ഷണ വകുപ്പ് എന്തൊക്കെ നടപടികള്‍ സ്വീകരിച്ചുവെന്ന് വ്യക്തമാക്കാമോ;

വളര്‍ത്തുമൃഗങ്ങളും മറ്റും നഷ്ടപ്പെട്ട കര്‍ഷകര്‍ക്ക് ആവശ്യമായ സഹായങ്ങള്‍ നല്‍കുന്നതിന് നടപടികള്‍ സ്വീകരിച്ചിട്ടുണ്ടോ; ഉണ്ടെങ്കില്‍ വിശദമാക്കാമോ;

കന്നുകാലി കര്‍ഷകര്‍ ഉൾപ്പെടെയുള്ളവരെ സഹായിക്കുന്നതിന് പ്രത്യേക പാക്കേജ് പരിഗണിക്കുമോ; വിശദാംശം നൽകാമോ ?

സംസ്ഥാനത്ത് അനിമല്‍ ഹസ്ബന്ററി വകുപ്പിലും മറ്റ് ഇതര വകുപ്പുകളിലും സുവോളജി ബിരുദ/ബിരുദാനന്തര ബിരുദധാരികൾക്കുള്ള തൊഴില്‍ സാദ്ധ്യത നഷ്ടപ്പെട്ട് ഇവര്‍ മറ്റ് സംസ്ഥാനങ്ങളിലും വിദേശ രാജ്യങ്ങളിലും പോകുന്ന കാര്യം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് പരിഹരിക്കുവാന്‍ എന്തെല്ലാം നടപടികളാണ് സ്വീകരിക്കുന്നത്; വിശദമാക്കാമോ;

പ്രസ്തുത ബിരുദ/ബിരുദാനന്തരബിരുദധാരികൾക്കു് നിലവില്‍ എന്തെല്ലാം തൊഴില്‍ സാദ്ധ്യതകളാണ് ഏര്‍പ്പെടുത്തിയിരിക്കുന്നത്; വിശദമാക്കാമോ?

കേരളത്തിന് പാലുല്പാദനത്തില്‍ സ്വയംപര്യാപ്തത കൈവരിക്കുന്നതിന് കഴിഞ്ഞിട്ടുണ്ടോ;

ഇതിനായി സ്വീകരിച്ചു വരുന്ന നടപടികൾ എന്തെല്ലാമാണ്; വിശദാംശം നല്‍കുമോ;

പശുക്കുട്ടിയുടെ ജനനം മുതല്‍ പരിപാലനത്തിനും വളര്‍ച്ചയ്ക്കും ഉതകുന്ന തരത്തില്‍ പ്രത്യേക പദ്ധതി ആവിഷ്കരിച്ചിട്ടുണ്ടോ; വ്യക്തമാക്കുമോ;

പാലില്‍ നിന്നും മൂല്യവര്‍ദ്ധിത ഉല്പന്നങ്ങള്‍ ഉണ്ടാക്കുന്നതിനായി പ്രത്യേക പദ്ധതികള്‍ ആവിഷ്കരിച്ച് നടപ്പാക്കി വരുന്നുണ്ടോ; വിശദാംശം നല്‍കുമോ?

മാവേലിക്കര മണ്ഡലത്തില്‍ ക്ഷീര ഗ്രാമം പദ്ധതി നടപ്പിലാക്കുവാന്‍ സ്വീകരിച്ച നടപടികള്‍ വിശദമാക്കാമോ?

കാഞ്ഞങ്ങാട് മണ്ഡലത്തിൽ ഏതെല്ലാം പഞ്ചായത്തുകളെയാണ് ക്ഷീര ഗ്രാമം പദ്ധതിയിൽ നാളിതുവരെ ഉൾപ്പെടുത്തിയിട്ടുള്ളതെന്ന് വ്യക്തമാക്കാമോ;

അതിന്റെ ഭാഗമായി എന്തൊക്കെ പദ്ധതികളാണ് ഓരോ പഞ്ചായത്തിലും നടപ്പിലാക്കിയതെന്ന് വിശദമാക്കാമോ?

ക്ഷീരോത്പാദക രംഗത്ത് ആധുനിക സാങ്കേതികവിദ്യകള്‍ പ്രയോജനപ്പെടുത്തി മോഡല്‍ ഫാമുകള്‍ ആരംഭിക്കുന്നതിന് നടപടി സ്വീകരിക്കുമോ; വിശദമാക്കാമോ?

വ്യവസായികാടിസ്ഥാനത്തിൽ ഡയറിഫാം നടത്തുന്ന ക്ഷീര കർഷകർക്കായി സർക്കാർ എന്തെല്ലാം വികസന പദ്ധതികൾ നടപ്പിലാക്കി വരുന്നുണ്ടെന്ന് വിശദമാക്കാമോ;

വ്യാവസായികാടിസ്ഥാനത്തിൽ എത്ര ഡയറി ഫാം പ്രവ‍ർത്തിച്ച് വരുന്നുണ്ടെന്നുള്ള കണക്ക് ജില്ല തിരിച്ച് വ്യക്തമാക്കാമോ; ഈ ഡയറി ഫാമുകളിൽ ഏതെല്ലാം ഇനത്തിലെ പശുക്കളാണ് കൂടുതലായി കണ്ടു വരുന്നതെന്ന് വിശദമാക്കാമോ?

2024-25 വർഷത്തിൽ ക്ഷീരകർഷകർക്കായി നടപ്പിലാക്കി വരുന്നതും ഇനി നടപ്പാക്കാൻ ഉദ്ദേശിക്കുന്നതുമായ പദ്ധതികൾ എന്തെല്ലാമെന്ന് വിശദമാക്കാമോ?

സംസ്ഥാനത്ത് പാലുല്പാദനം വര്‍ദ്ധിപ്പിക്കുന്നതിന് എന്തെല്ലാം പദ്ധതികളാണ് ആവിഷ്കരിച്ചിട്ടുള്ളത്;

പാലുല്‍പാദനത്തിന്റെ പ്രോത്സാഹനത്തിനായി കാസര്‍ഗോഡ് ജില്ലയില്‍ 2021 മുതല്‍ നാളിതുവരെ എത്ര രൂപ ചെലവഴിച്ചിട്ടുണ്ട് എന്ന് വ്യക്തമാക്കാമോ;

പാലില്‍ നിന്നുള്ള മൂല്യവര്‍ദ്ധിത ഉല്പന്നങ്ങളുടെ ഉല്പാദനവും വിതരണവും പ്രോത്സാഹിപ്പിക്കുന്നതിനും വര്‍ദ്ധിപ്പിക്കുന്നതിനും നടപ്പിലാക്കുന്ന പദ്ധതികള്‍ വിശദമാക്കാമോ?

ഇൗ സര്‍ക്കാര്‍ അധികാരത്തില്‍ വന്ന ശേഷം പാലുല്പാദനം വര്‍ദ്ധിപ്പിക്കുന്നതിനായി സ്വീകരിച്ചിട്ടുള്ള നടപടികള്‍ വിശദമാക്കാമോ? ഇ?

കേരള കോ-ഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷനിൽ ജീവനക്കാരുടെ എത്ര സ്ഥിരം തസ്തികകൾ ഒഴിഞ്ഞു കിടക്കുന്നുണ്ടെന്ന് അറിയിക്കുമോ; പ്രസ്തുത ഒഴിവുകള്‍ നികത്തുന്നതിന് നടപടി സ്വീകരിക്കുമോ; വിശദമാക്കാമോ;

കേരള കോ-ഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷനിലെ ഏതെല്ലാം തസ്തികകളിലേക്കാണ് പി.എസ്‌.സി. വഴി നിയമനം നടത്തുന്നതെന്ന് അറിയിക്കുമോ; നാളിതുവരെ ഏതെല്ലാം തസ്തികകളിലായി എത്ര നിയമനം പി.എസ്‌.സി. വഴി നടന്നിട്ടുണ്ട്; വിശദാംശങ്ങൾ ലഭ്യമാക്കുമോ?

മായം കലര്‍ന്ന പാലും പാലുല്പന്നങ്ങളും പിടിച്ചെടുത്ത് ലാബില്‍ പരിശോധന നടത്തി നടപടിയെടുക്കാനുള്ള അധികാരം ക്ഷീര വികസന വകുപ്പിന് കൂടി ലഭ്യമാക്കാന്‍ ഉദ്ദേശിക്കുന്നുണ്ടോയെന്ന് വ്യക്തമാക്കാമോ;

ഇക്കാര്യത്തില്‍ സ്വീകരിച്ച തുടര്‍ നടപടി വിശദീകരിക്കാമോ;

ക്ഷീര വികസന വകുപ്പ് ഓണക്കാലത്ത് ഊര്‍ജ്ജിത പാല്‍ പരിശോധന നടത്തിയിരുന്നോ; വിശദമാക്കാമോ;

ഇപ്രകാരം പരിശോധന നടത്തിയിട്ടുണ്ടെങ്കില്‍ സബ്-സ്റ്റാന്‍ഡേര്‍ഡ് മില്‍ക്ക്, ഭക്ഷ്യയോഗ്യമല്ലാത്ത പാലുകള്‍ എന്നിവ കണ്ടെത്തിയിട്ടുണ്ടോ;ഉണ്ടെങ്കില്‍ അതിന്മേല്‍ സ്വീകരിച്ച തുടര്‍ നടപടി വിശദമാക്കാമോ?

സംസ്ഥാനത്ത് ക്ഷീര സഹകരണ സംഘങ്ങള്‍ മുഖേന സംഭരിക്കുന്ന പാലിന് നല്‍കുന്ന വില ലിറ്ററിന് എത്രയാണെന്ന് അറിയിക്കാമോ;

ക്ഷീര കർഷകർക്ക് പാല്‍ വില നല്‍കുന്നതില്‍ കുടിശ്ശികയുണ്ടോ എന്ന് അറിയിക്കാമോ; എങ്കില്‍ എത്ര മാസത്തെ കുടിശ്ശികയുണ്ടെന്ന് വ്യക്തമാക്കാമോ;

മണലൂര്‍ മണ്ഡലത്തിലെ താണവീഥി പാലുല്‍പ്പാദക സഹകരണ സംഘം വഴി സംഭരിച്ച പാല്‍ വില ക്ഷീര കർഷകർക്ക് നൽകുന്നതിൽ കുടിശ്ശികയായിട്ടുണ്ടോ എന്നും എത്ര രൂപ കുടിശ്ശികയുണ്ടെന്നും അറിയിക്കാമോ;

കുടിശ്ശികയുണ്ടെങ്കില്‍ അത് എത്രയുംവേഗം കൊടുത്ത് തീര്‍ക്കാന്‍ നടപടി സ്വീകരിക്കുമോ; വിശദാംശങ്ങള്‍ നല്‍കാമോ?

പൂക്കോട് വെറ്ററിനറി സർവകലാശാലയിൽ ആൾക്കൂട്ട മർദ്ദനത്തെ തുടർന്ന് മരണപ്പെട്ട സിദ്ധാർത്ഥന്റെ മരണവുമായി ബന്ധപ്പെട്ട് സസ്പെൻഷനിലായിരുന്ന ഡീനിനെയും അസിസ്റ്റന്റ് വാർഡനെയും സർവീസിൽ തിരികെ പ്രവേശിപ്പിക്കുന്നതിന് സര്‍വകലാശാല തീരുമാനമെടുക്കുകയുണ്ടായോ;

ഇവരെ ജോലിയിൽ തിരികെ പ്രവേശിപ്പിക്കുന്നത് തടഞ്ഞുകൊണ്ട് ചാൻസിലർ വൈസ്-ചാൻസിലർക്ക് കത്ത് നൽകിയിട്ടുണ്ടോ;

സിദ്ധാർത്ഥന്റെ മരണം സംബന്ധിച്ച് അന്വേഷണത്തില്‍ ഇവരെ കുറ്റവിമുക്തരാക്കിയിട്ടുണ്ടോ; ഏതു സാഹചര്യത്തിലാണ് ഡീനിനെയും അസിസ്റ്റന്റ് വാർഡനെയും തിരിച്ചെടുക്കുന്നതിന് അധികൃതർ തീരുമാനമെടുത്തത്; വിശദമാക്കാമോ?

പാലക്കാട് ജില്ലയില്‍ എത്ര മൊബെെല്‍ വെറ്ററിനറി യൂണിറ്റുകള്‍ പ്രവര്‍ത്തിക്കുന്നുണ്ട്; അത് എവിടെയെല്ലാം; വ്യക്തമാക്കാമോ;

പാലക്കാട് ജില്ലയിലെ കൂടുതല്‍ ബ്ലോക്ക് പഞ്ചായത്തുകളില്‍ മൊബൈല്‍ വെറ്ററിനറി യൂണിറ്റുകളുടെ സേവനം ലഭ്യമാക്കുന്നതിനുള്ള നടപടി സ്വീകരിക്കുമോ; വിശദ വിവരങ്ങള്‍ ലഭ്യമാക്കാമോ?