വ്യവസായ സൗഹൃദാന്തരീക്ഷം സൃഷ്ടിക്കാനുള്ള കര്‍മ്മപദ്ധതിയും പരിഷ്കാരങ്ങളും നടപ്പാക്കുന്നതിൽ കേരളം രാജ്യത്ത് ഒന്നാം സ്ഥാനം നേടിയിട്ടുണ്ടോ; വിശദമാക്കുമോ;

ഏകജാലക സംവിധാനം, യൂട്ടിലിറ്റി അനുമതികൾ, റവന്യു സർട്ടിഫിക്കറ്റുകൾ ലഭ്യമാക്കുന്നതിലെ കാര്യക്ഷമത, ഗതാഗത സൗകര്യങ്ങൾ, എംപ്ലോയ്‍മെന്റ് എക്സ്ചേഞ്ച് സേവനം, നികുതി സംവിധാനത്തിലെ കാര്യക്ഷമത തുടങ്ങിയ മേഖലകളിലെ മികച്ച പ്രകടനം ഒന്നാം സ്ഥാനം നേടുന്നതിന് സഹായകമായിട്ടുണ്ടോ; വിശദമാക്കാമോ;

ആർട്ടിഫിഷ്യൽ ഇന്റലിജൻസ് അടക്കമുള്ള മേഖലകളിൽ ഉയർന്ന വേതനം ലഭ്യമാകുന്ന തൊഴിലുകൾ ഉറപ്പാക്കുന്നതിനു നടപ്പാക്കിയ വ്യവസായ വികസന പരിപാടികളിലൂടെ കഴിഞ്ഞിട്ടുണ്ടോ; ഇത്തരം കൂടുതൽ വ്യവസായ സ്ഥാപനങ്ങൾ ഇപ്പോള്‍ സംസ്ഥാനത്തേക്കെത്തുന്നുണ്ടോ; എങ്കിൽ വിശദമാക്കുമോ;

മുണ്ടക്കൈ-ചൂരല്‍മല-അട്ടമല പ്രദേശങ്ങളിലെ സൂക്ഷ്മ-ചെറുകിട-ഇടത്തരം സംരംഭങ്ങള്‍ അടങ്ങിയ എണ്‍പതോളം യൂണിറ്റുകള്‍ ഉരുള്‍പൊട്ടലില്‍ നഷ്ടമായെന്നത് ശ്രദ്ധയിൽപ്പെട്ടിട്ടുണ്ടോ; പ്രസ്തുത പ്രദേശങ്ങളിലെ സൂക്ഷ്മ-ചെറുകിട- ഇടത്തരം സംരംഭങ്ങള്‍ക്ക് ഊന്നല്‍ നല്‍കിയുള്ള നൂതന പദ്ധതികള്‍ തയ്യാറാക്കാന്‍ ഉദ്ദേശിക്കുന്നുണ്ടോ; എങ്കിൽ വിശദമാക്കുമോ?

സംസ്ഥാനത്ത് സ്വർണ്ണ കച്ചവടത്തിൽ നിന്ന് വൻതോതിൽ നികുതി ചോരുന്ന സാഹചര്യത്തിൽ, ബിസിനസ്-ടു-ബിസിനസ് സ്വർണ്ണ ഇടപാടുകൾക്ക് ഇ-വേ ബിൽ ഏർപ്പെടുത്തി വിജ്ഞാപനം പുറപ്പെടുവിച്ചിട്ടുണ്ടോ; ഇല്ലെങ്കിൽ അതിനു കാലതാമസം വരുത്തുന്നതിനുള്ള കാരണം വ്യക്തമാക്കുമോ;

ഈ കാര്യത്തിൽ കേന്ദ്രാനുമതി ലഭിച്ചിട്ടുണ്ടോ; എങ്കിൽ എന്നാണ് ലഭിച്ചതെന്നും അതിൽ നിശ്ചയിച്ചിരിക്കുന്ന തുക എത്രയാണെന്നും വിശദമാക്കുമോ;

സ്വർണ്ണ വ്യാപാരികളുടെ ജി.എസ്.ടി റിട്ടേണിലെ വാർഷിക നീക്കിയിരിപ്പിന്റെ മുഖവില ഇൻകംടാക്സ് മാതൃകയിൽ യഥാർത്ഥ മാർക്കറ്റ് വില അനുസരിച്ച് ഫസ്റ്റ് ഇൻ ഫസ്റ്റ് ഔട്ട് രീതിയിൽ പരിഷ്കരിക്കാൻ ജി.എസ്.ടി കൗൺസിലിൽ ആവശ്യപ്പെടുമോ; വ്യക്തമാക്കുമോ?

സംസ്ഥാനം നേരിടുന്ന ഗുരുതരമായ സാമ്പത്തിക പ്രതിസന്ധി മൂലം വികസന പ്രവർത്തനങ്ങൾ മാറ്റിവയ്ക്കാനും വെട്ടിച്ചുരുക്കാനും തീരുമാനിച്ചിട്ടുണ്ടോ; വിശദമാക്കുമോ;

പദ്ധതി നടത്തിപ്പിനുള്ള തുക അനുവദിക്കുന്നതിൽ പരിധി നിശ്ചയിച്ചിട്ടുണ്ടോ; വ്യക്തമാക്കുമോ;

പ്രസ്തുത തീരുമാനങ്ങൾ അടിസ്ഥാനസൗകര്യ വികസന പദ്ധതികളെ എപ്രകാരം ബാധിക്കുമെന്ന് വിലയിരുത്തിയിട്ടുണ്ടോ; വിശദമാക്കുമോ?

സാമൂഹ്യ സുരക്ഷിതത്വവും ക്ഷേമവും കണക്കിലെടുത്ത് സഹകരണ മേഖലയില്‍ നടപ്പാക്കുന്ന വിവിധ പദ്ധതികളുടെ നിര്‍വ്വഹണം വിലയിരുത്തിയിട്ടുണ്ടോ; വിശദാംശം നല്‍കുമോ;

സമൂഹത്തിലെ പിന്നാക്കം നില്‍ക്കുന്ന ജനവിഭാഗങ്ങളെ സംരക്ഷിക്കുന്നതിനും അവരെ ചേര്‍ത്തു പിടിക്കുന്നതിനുമായി നടപ്പാക്കുന്ന പദ്ധതികള്‍ വിജയകരമാണോയെന്നു വിശദമാക്കുമോ;

മുണ്ടക്കെെ ഉരുള്‍പ്പൊട്ടലില്‍ സര്‍വ്വതും നഷ്ടപ്പെട്ട ജനവിഭാഗങ്ങളുടെ സഹകരണ സ്ഥാപനങ്ങളിലെ വായ്പകള്‍ എഴുതിത്തള്ളുന്നതിനുള്ള നടപടിക്രമങ്ങള്‍ പൂര്‍ത്തീകരിച്ചിട്ടുണ്ടോ; വിശദീകരിക്കുമോ?

ക്ഷേമപദ്ധതി ആനുകൂല്യങ്ങൾ മുടങ്ങുന്നത് സാധാരണക്കാരായ ജനങ്ങളെ ദുരിതത്തിലാക്കുന്നത് ഗൗരവത്തോടെ കാണുന്നുണ്ടോ; വിശദമാക്കുമോ;

സാമൂഹ്യക്ഷേമ പദ്ധതികളിലെ ആനുകൂല്യങ്ങളും ജീവനക്കാർക്കുള്ള കുടിശികകളും വിതരണം ചെയ്യുമെന്ന് നിയമസഭയിൽ ചട്ടം 300 പ്രകാരം മുഖ്യമന്ത്രി നടത്തിയ പ്രസ്താവനയുടെ അടിസ്ഥാനത്തിൽ ആനുകൂല്യ വിതരണത്തിനായി തുക അനുവദിക്കാൻ സാധിച്ചിട്ടുണ്ടോ; ആകെ കുടിശികയുടെ എത്ര ശതമാനം തുക അനുവദിച്ചിട്ടുണ്ട്; വ്യക്തമാക്കുമോ;

കുടിശിക വിതരണത്തിന് ആവശ്യമായ തുക അനുവദിക്കാൻ സാധിക്കാത്തതിന്റെ കാരണങ്ങൾ വ്യക്തമാക്കുമോ;

ക്ഷേമ പദ്ധതികളിലെ ആനുകൂല്യങ്ങളുടെ കുടിശിക വിതരണം ചെയ്യുന്നതിന് ആവശ്യമായ തുക കണ്ടെത്തുന്നതിന് അടിയന്തര നടപടി സ്വീകരിക്കുമോ?

വീടുകളിൽ പ്രകൃതിവാതകം എത്തിക്കുന്ന സിറ്റി ഗ്യാസ് പദ്ധതിയുടെ പ്രവർത്തന പുരോഗതി വിശദമാക്കുമോ;

സംസ്ഥാനത്തെ ഏതെല്ലാം ജില്ലകളിൽ പ്രവൃത്തികൾ ആരംഭിച്ചിട്ടുണ്ടെന്ന് വ്യക്തമാക്കുമോ; ഇതിനായി ഏതെല്ലാം ഏജൻസികളെയാണ് ചുമതലപ്പെടുത്തിയിരിക്കുന്നതെന്നും അവരുമായി കരാറിൽ ഏർപ്പെട്ടിട്ടുണ്ടോയെന്നും അറിയിക്കുമോ;

പ്രസ്തുത പദ്ധതിയിൽ സർക്കാരിന്റെ ഇടപെടൽ സംബന്ധിച്ച വിശദാംശം നല്‍കുമോ;

പ്രസ്തുത പദ്ധതിയുടെ നടത്തിപ്പിന് സംസ്ഥാനത്തിന്റെ വിഹിതം എത്രയാണ്; ഈയിനത്തിൽ ഇതുവരെ എന്തു തുക ചെലവഴിച്ചെന്ന് വിശദമാക്കുമോ?

സഹകരണ മേഖലയുടെ ആധുനികീകരണത്തിനും സാങ്കേതികവിദ്യാധിഷ്ഠിത ഇടപാടുകള്‍ പ്രോത്സാഹിപ്പിക്കുന്നതിനുമുള്ള പദ്ധതികള്‍ നടപ്പാക്കിവരുന്നുണ്ടോ; വിശദമാക്കുമോ;

ഇതിന്റെ ഭാഗമായി കേരള ബാങ്കിന്റെ പ്രവര്‍ത്തനം നവീകരിക്കുന്നതിന് സ്വീകരിച്ചിട്ടുള്ള നടപടികള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

പ്രാഥമിക കാര്‍ഷിക വായ്പാ സംഘങ്ങളില്‍ ഏകീകൃത സോഫ്റ്റ്‍വെയര്‍ നടപ്പാക്കുന്നതിനായി ആവിഷ്കരിച്ചിട്ടുള്ള പദ്ധതിയുടെ പുരോഗതി വിശദമാക്കുമോ;

സഹകരണ സര്‍വീസ് പരീക്ഷകള്‍ ഓണ്‍ലൈന്‍ സംവിധാനത്തില്‍ നടത്താന്‍ തീരുമാനിച്ചിട്ടുണ്ടോയെന്ന് അറിയിക്കുമോ?

കേന്ദ്ര സർക്കാരിന്റെ വികലമായ സാമ്പത്തിക നയങ്ങൾ കാരണം രൂപപ്പെട്ട സാമ്പത്തിക ഞെരുക്കത്തിന്റെയും പ്രകൃതി ദുരന്തങ്ങൾ സൃഷ്ടിച്ച പ്രതിസന്ധിയുടെയും പശ്ചാത്തലത്തില്‍ ഓണക്കാലത്ത് പൊതുവിപണിയിൽ പണമെത്തിക്കുന്നതിന് നടത്തിയ ഇടപെടലുകൾ ഫലപ്രദമായിട്ടുണ്ടോ; വിശദമാക്കുമോ;

പ്രവർത്തനമില്ലാത്ത കശുവണ്ടി ഫാക്ടറികളിലെ തൊഴിലാളികൾക്ക് ഓണക്കാലത്ത് എക്സ് ഗ്രേഷ്യ അനുവദിക്കുവാൻ നടപടി സ്വീകരിച്ചിരുന്നുവോ ; വിശദമാക്കുമോ;

കുടിശികയായ ക്ഷേമ പെൻഷൻ വിതരണം ഈ വർഷവും അടുത്ത വർഷവുമായി വിതരണം ചെയ്തു തീർക്കുമെന്ന പ്രഖ്യാപനം യാഥാർത്ഥ്യമാക്കുന്നതോടനുബന്ധിച്ച് ക്ഷേമ പെൻഷൻ കുടിശികയുടെ എത്ര ഗഡു ഈ ഓണക്കാലത്ത് വിതരണം ചെയ്യുവാൻ കഴിഞ്ഞിട്ടുണ്ട്; വ്യക്തമാക്കുമോ?

കെ.എസ്.ഇ.ബി. ദ്വൈമാസ ബില്ലിംഗിന് പകരം പ്രതിമാസ ബില്ലിംഗ് സമ്പ്രദായം ഏർപ്പെടുത്താൻ ​ഉദ്ദേശിക്കുന്നുണ്ടോ;

പ്രതിമാസ ബില്‍ തയ്യാറാക്കുന്നതിനായി പുതിയ ക്രമീകരണങ്ങൾ ഏർപ്പെടുത്താൻ ആലോചിക്കുന്നുണ്ടോ;

ഉപഭോക്താക്കളെ സ്വയം മീറ്റർ റീഡിംഗ് എടുക്കാൻ അനുവദിക്കുമോ; എങ്കിൽ അതിന്റെ ചാർജ് കണക്കാക്കാൻ സംവിധാനമുണ്ടോ; വിശദമാക്കുമോ?

സംസ്ഥാനത്ത് സ്മാർട്ട് മീറ്റർ പദ്ധതി നടപ്പാക്കാൻ സ്വീകരിച്ചിട്ടുള്ള നടപടികളുടെ പുരോഗതി വ്യക്തമാക്കുമോ;

സ്മാർട്ട് മീറ്റർ പദ്ധതി നടപ്പാക്കാൻ ടെൻഡർ നടപടികൾ പുരോഗമിക്കുന്ന സാഹചര്യത്തിൽ സമയത്തിനനുസരിച്ച് വൈദ്യുതി നിരക്കിൽ വർദ്ധന നടപ്പാക്കുന്നതിനായി ടൈം ഓഫ് ഡേ മീറ്റർ സ്ഥാപിക്കുന്നതിനുള്ള നടപടികളും സ്വീകരിച്ചിട്ടുണ്ടോ; പ്രസ്തുത മീറ്ററിന്റെ പ്രവർത്തനം ഏത് രീതിയിലാണെന്നും ഇതു സ്ഥാപിക്കുന്നതിനായി എത്ര രൂപയുടെ ചെലവ് വരുമെന്ന കണക്കും ലഭ്യമാക്കുമോ;

കേന്ദ്ര നിബന്ധനപ്രകാരം സംസ്ഥാനത്തെ എല്ലാ ഉപഭോക്താക്കൾക്കും 2026 ഡിസംബറോടെ സ്മാർട്ട് മീറ്റർ സ്ഥാപിക്കണം എന്നിരിക്കെ ടി.ഒ.ഡി മീറ്റർ സ്ഥാപിക്കാനുള്ള നടപടികളുടെ പ്രസക്തി എന്താണ്; വ്യക്തമാക്കുമോ?

സംസ്ഥാനത്തെ കയർ വ്യവസായ മേഖല ഗുരുതരമായ പ്രതിസന്ധി നേരിടുന്നത് ശ്രദ്ധയിൽപ്പെട്ടിട്ടുണ്ടോ; വ്യക്തമാക്കുമോ;

കയർ മേഖലയിൽ ദീർഘകാലമായി വേതന പരിഷ്കരണം നടപ്പാക്കിയിട്ടില്ലാത്ത സാഹചര്യത്തിൽ അടിയന്തരമായി വേതനം പരിഷ്കരിക്കാൻ നടപടി സ്വീകരിക്കുമോ എന്നു വ്യക്തമാക്കുമോ;

ഉൽപാദന ചെലവിലെ വർദ്ധനവും പച്ചത്തൊണ്ടിന്റെ ദൗര്‍ലഭ്യവും മറ്റു തൊഴിൽ മേഖലയെ അപേക്ഷിച്ച് വേതനം കുറവാണെന്നതും ഉൾപ്പെടെയുള്ള പ്രതിസന്ധികൾ നേരിടുന്ന കയർ മേഖലയെ പുനരുജ്ജീവിപ്പിക്കുവാൻ സമഗ്രമായ പദ്ധതി ആവിഷ്കരിക്കുമോ; വിശദാംശം നൽകുമോ?

പാലക്കാട് വ്യവസായ നഗരം നിർമ്മിക്കാനുള്ള കേന്ദ്രസർക്കാരിന്റെ തീരുമാനപ്രകാരം അടിസ്ഥാന സൗകര്യങ്ങൾ ഒരുക്കുന്നതിന് സ്വീകരിച്ചിട്ടുള്ള നടപടികൾ വിശദമാക്കുമോ;

ഈ വ്യവസായ നഗരത്തിൽ എത്ര കോടി രൂപയുടെ നിക്ഷേപം ഉണ്ടാകുമെന്നാണ് പ്രതീക്ഷിക്കുന്നത്; വിശദമാക്കുമോ;

പ്രസ്തുത പദ്ധതിയിൽ എന്തെല്ലാം വ്യവസായ സംരംഭങ്ങളാണ് തുടങ്ങാൻ ആലോചിക്കുന്നതെന്നും അതിലൂടെ എത്രപേർക്ക് തൊഴിൽ നൽകാൻ കഴിയുമെന്നാണ് പ്രതീക്ഷിക്കുന്നതെന്നും വ്യക്തമാക്കുമോ?

വ്യവസായ വികസനത്തില്‍ രാജ്യത്ത് ഉന്നത സ്ഥാനത്തേക്ക് സംസ്ഥാനത്തെ എത്തിക്കുന്നതിനായി ഈ സർക്കാർ നടത്തിയിട്ടുള്ള പ്രവര്‍ത്തനങ്ങള്‍ ഫലപ്രാപ്തിയിലെത്തിയിട്ടുണ്ടോ; വിശദമാക്കുമോ;

ഇക്കാലയളവില്‍ സംസ്ഥാനത്ത് സമാഹരിക്കാനായ നിക്ഷേപം എത്രയെന്ന് അറിയിക്കുമോ;

രാജ്യത്ത് വ്യവസായ സൗഹൃദ റാങ്കിങ്ങിൽ നിലവില്‍ സംസ്ഥാനത്തിന്റെ സ്ഥാനം എത്രയാണെന്ന് അറിയിക്കുമോ?

ഈ സർക്കാരിന്റെ നാലാം നൂറുദിന കർമപരിപാടികൾക്ക് വ്യവസായ വകുപ്പ് തുടക്കം കുറിച്ചിട്ടുണ്ടോ; വിശദമാക്കുമോ;

പ്രസ്തുത കർമ്മപരിപാടിയില്‍ സംരംഭ സഭ, സൂപ്പർ കപ്പാസിറ്റർ ഉൽപ്പാദന പ്ലാന്റ്‌, കെ.എം.എം.എല്‍-ല്‍ ആസിഡ് റിക്കവറി പ്ലാന്റിന്റെ നിർമ്മാണം എന്നിവ ഉള്‍പ്പെടുത്തിയിട്ടുണ്ടോ; വിശദമാക്കുമോ;

പ്രസ്തുത പരിപാടിയുടെ ഭാഗമായി നിക്ഷേപകരുടെ സംസ്ഥാനതല സംഗമം സംഘടിപ്പിക്കുവാന്‍ ഉദ്ദേശിക്കുന്നുണ്ടോ; വ്യക്തമാക്കുമോ;

‘ഒരു തദ്ദേശസ്വയംഭരണ സ്ഥാപനം ഒരു ഉൽപ്പന്നം’ എന്ന പദ്ധതി വ്യവസായ വകുപ്പിന്റെ നൂറുദിന കർമ്മപരിപാടിയില്‍ ഉള്‍പ്പെടുത്തിയിട്ടുണ്ടോ; വിശദമാക്കുമോ?

മലപ്പുറം, ഇടുക്കി, കാസർഗോഡ് എന്നീ പിന്നാക്ക ജില്ലകളിൽ അപേക്ഷിക്കുന്നവർക്ക് ആവശ്യാനുസരണം വൈദ്യുതി കണക്ഷൻ നൽകാൻ കഴിയാത്ത അവസ്ഥ നിലവിൽ ഉണ്ടോ;

ഈ ജില്ലകളിലെ വൈദ്യുതി ക്ഷാമം പരിഹരിക്കാൻ സ്പെഷ്യൽ പാക്കേജ് നടപ്പാക്കാൻ ഉദ്ദേശിക്കുന്നുണ്ടോ?;

പ്രസ്തുത പ്രദേശങ്ങളിൽ പുതിയ സബ്സ്റ്റേഷനുകൾ, ട്രാൻസ്ഫോർമറുകൾ, ലൈനുകളുടെ വിപുലീകരണം എന്നിവയ്ക്ക് തുക വകയിരുത്തിയിട്ടുണ്ടോ എന്നും ഈ പണികൾ എന്നത്തേക്ക് പൂർത്തിയാക്കാൻ കഴിയുമെന്നുമുള്ള വിശദാംശം ലഭ്യമാക്കുമോ?

വിഴിഞ്ഞം അന്താരാഷ്ട്ര തുറമുഖത്തിന്റെ സാധ്യതകള്‍ പ്രയോജനപ്പെടുത്തുന്നതിനായി വ്യവസായ മേഖലയില്‍ നടപ്പാക്കാനുദ്ദേശിക്കുന്ന പ്രവര്‍ത്തനങ്ങള്‍ വിശദമാക്കാമോ;

കയറ്റുമതി പ്രോത്സാഹിപ്പിക്കുന്നതിനും ആഭ്യന്തര ഉല്പാദനം വര്‍ദ്ധിപ്പിക്കുന്നതിനും ലക്ഷ്യമിട്ട് കയറ്റുമതി നയം രൂപീകരിക്കുന്നത് പരിഗണനയിലുണ്ടോ; വ്യക്തമാക്കുമോ;

ചരക്കുനീക്കവുമായി ബന്ധപ്പെട്ട് ലോജിസ്റ്റിക് പാര്‍ക്കുകളും ലോജിസ്റ്റിക് ടൗണുകളും സ്ഥാപിക്കുന്നതിനു തീരുമാനിച്ചിട്ടുണ്ടോ; വിശദമാക്കുമോ?

ഖാദി മേഖലയിലെ തൊഴിലാളികൾക്ക് വേതന ഇനത്തിൽ നൽകേണ്ട സർക്കാർ വിഹിതം മുടങ്ങിയതിനാൽ തൊഴിലാളികൾ കടുത്ത പ്രതിസന്ധി നേരിടുന്നത് ഗൗരവത്തോടെ കാണുന്നുണ്ടോ; വിശദമാക്കുമോ;

തൊഴിലാളികൾക്കുള്ള ഇൻകം സപ്പോർട്ട് സ്കീം, വസ്ത്രങ്ങൾക്കുള്ള റിബേറ്റ് എന്നിവ ഉൾപ്പെടെ കുടിശിക പൂർണ്ണമായും വിതരണം ചെയ്യുന്നതിന് അടിയന്തര നടപടി സ്വീകരിക്കുമോ; വ്യക്തമാക്കുമോ;

ഉല്പന്നങ്ങളുടെ വൈവിധ്യവൽക്കരണത്തിലൂടെ കൂടുതൽ വിപണി കണ്ടെത്തി ഖാദി മേഖലയുടെ പ്രതിസന്ധി പരിഹരിക്കുന്നതിന് നടപടി സ്വീകരിക്കുമോ; വിശദമാക്കുമോ?

സംസ്ഥാനത്ത് പുരപ്പുറ സോളാര്‍ പ്ലാന്റുകള്‍ കൂടുതലായി അനുവദിക്കാന്‍ സ്വീകരിച്ചുവരുന്ന നടപടികള്‍ എന്തൊക്കെയാണെന്ന് വ്യക്തമാക്കുമോ;

പ്രധാനപ്പെട്ട വ്യവസായ മേഖലകളില്‍ സോളാര്‍ പദ്ധതികൾ നിര്‍ബന്ധമാക്കാന്‍ നടപടി സ്വീകരിക്കുമോ; എങ്കില്‍ വിശദാംശം ലഭ്യമാക്കുമോ?

സംസ്ഥാനത്ത് നടപ്പ് സാമ്പത്തിക വർഷം എത്ര തവണ ട്രഷറി നിയന്ത്രണം ഏർപ്പെടുത്തിയിട്ടുണ്ട്; നിലവിൽ ട്രഷറി നിയന്ത്രണം ഏർപ്പെടുത്തിയിട്ടുണ്ടോ; എങ്കിൽ വിശദമാക്കുമോ;

ട്രഷറി നിയന്ത്രണം തദ്ദേശ സ്വയംഭരണ സ്ഥാപനങ്ങൾക്കും ബിൽ ഡിസ്കൗണ്ടിംഗ് സംവിധാനത്തിനും ബാധകമാക്കിയിട്ടുണ്ടോ; എങ്കിൽ വിശദമാക്കുമോ;

ട്രഷറി നിയന്ത്രണം തദ്ദേശ സ്വയംഭരണ സ്ഥാപനങ്ങളിലെ പദ്ധതി നിർവ്വഹണത്തെ പ്രതിസന്ധിയിലാക്കുമെന്നതിനാൽ ബിൽ ഡിസ്കൗണ്ടിംഗ് സംവിധാനം ഉൾപ്പെടെ തദ്ദേശ സ്വയംഭരണ സ്ഥാപനങ്ങളെ ട്രഷറി നിയന്ത്രണത്തിൽനിന്നും ഒഴിവാക്കുന്നതിന് അടിയന്തര നടപടി സ്വീകരിക്കുമോ; വിശദമാക്കുമോ?

സഹകരണ മേഖലയുടെ ഉന്നമനം ലക്ഷ്യമിട്ട് നടപ്പാക്കുന്ന നയപരിപാടികളുടെ ഭാഗമായി സഹകരണ പുനരുദ്ധാരണ നിധി സംസ്ഥാനത്ത് നടപ്പാക്കാൻ സാധിച്ചിട്ടുണ്ടോ; വിശദമാക്കുമോ;

പ്രതിസന്ധി മൂലം ദുര്‍ബലമാകുന്ന സംഘങ്ങളുടെ പുനരുദ്ധാരണം ലക്ഷ്യമിടുന്ന പ്രസ്തുത നിധിയുടെ പ്രവര്‍ത്തനം നിയന്ത്രിക്കുന്നതിനായി ചുമതലപ്പെടുത്തിയിട്ടുള്ള ഉന്നതാധികാര സമിതിയുടെ ഘടനയും പ്രവര്‍ത്തനവും വിശദീകരിക്കുമോ;

പ്രസ്തുത നിധിയുടെ പ്രവര്‍ത്തനത്തിനാവശ്യമായ മൂലധനം ഏതു രീതിയില്‍ കണ്ടെത്തുന്നതിനാണ് വ്യവസ്ഥ ചെയ്തിട്ടുള്ളതെന്ന് വിശദീകരിക്കുമോ; നിധിയില്‍ നിന്നും ധനസഹായം അനുവദിക്കുന്നതിനുള്ള നടപടി ആരംഭിച്ചിട്ടുണ്ടോ; വ്യക്തമാക്കുമോ?

ലോകത്തിലെ പ്രധാനപ്പെട്ട ഒരു വാണിജ്യ കേന്ദ്രമാക്കി വിഴിഞ്ഞം തുറമുഖത്തെ മാറ്റാനുള്ള നടപടി സ്വീകരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

രാജ്യത്തെ ആദ്യത്തെ ട്രാൻസ്ഷിപ്മെന്റ് തുറമുഖമായി പ്രവർത്തിക്കാൻ വിഴിഞ്ഞത്തിന് കേന്ദ്ര തുറമുഖമന്ത്രാലയത്തിന്റെ അനുമതി ലഭിച്ചുിട്ടുണ്ടോ; എങ്കിൽ ഇതോടെ മദർഷിപ്പുകൾക്ക് അടുക്കാനും ചരക്കുകൾ കൈമാറ്റം ചെയ്യാനും സംവിധാനമുള്ള ഇന്ത്യയിലെ ആദ്യ തുറമുഖമായി വിഴിഞ്ഞം മാറിയിട്ടുണ്ടോ എന്ന് അറിയിക്കുമോ;

വിഴിഞ്ഞം പദ്ധതിപ്രദേശത്ത് സര്‍ക്കാര്‍ നേരിട്ടും അദാനി വിഴിഞ്ഞം പോര്‍ട്ട് പ്രൈവറ്റ് ലിമിറ്റഡുമായി ചേര്‍ന്നും സാമൂഹിക പ്രതിബദ്ധതാ പദ്ധതി പ്രകാരം സ്വീകരിച്ചിട്ടുള്ള നടപടികൾ എന്തെല്ലാമാണെന്ന് വിശദമാക്കുമോ;

വിഴിഞ്ഞം അന്താരാഷ്ട്ര തുറമുഖ പദ്ധതി പൂര്‍ത്തീകരിക്കുന്നതിനോടൊപ്പം ഏതെല്ലാം അനുബന്ധ പശ്ചാത്തലസൗകര്യ വികസന പദ്ധതികളാണ് ആസൂത്രണം ചെയ്തുവരുന്നത്; പശ്ചാത്തല സൗകര്യ വികസന പദ്ധതികളില്‍ പ്രധാനപ്പെട്ട ഔട്ടർ ഏരിയ ഗ്രോത്ത് കോറിഡോർ പദ്ധതിയുടെ പ്രവർത്തന പുരോഗതി വിലയിരുത്തിയിട്ടുണ്ടോ; വിശദമാക്കുമോ?

സംസ്ഥാനം നേരിടുന്ന സാമ്പത്തിക പ്രതിസന്ധിമൂലം വാർഷിക പദ്ധതികളുടെ അടങ്കൽ തുക വെട്ടിക്കുറയ്ക്കാൻ തീരുമാനിച്ചിട്ടുണ്ടോ; വിശദമാക്കുമോ;

എങ്കിൽ പ്രസ്തുത തീരുമാനം ഭരണാനുമതി നൽകിയ പദ്ധതികളെ എപ്രകാരം ബാധിക്കുമെന്നാണ് കരുതുന്നതെന്നു വിശദമാക്കുമോ;

ഭരണാനുമതി നൽകിയ പദ്ധതികളുടെ അനിവാര്യത പരിശോധിക്കാൻ എന്തെങ്കിലും സംവിധാനം ഏർപ്പെടുത്തിയിട്ടുണ്ടോ; വിശദമാക്കുമോ?

ഹരിതഗൃഹ വാതകങ്ങളുടെ പുറന്തള്ളല്‍ പരമാവധി കുറച്ച് നെറ്റ് സീറോ കാര്‍ബണ്‍ എമിഷന്‍ എന്ന ലക്ഷ്യത്തിലേക്ക് എത്തിച്ചേരണമെന്ന ഐക്യരാഷ്ട്രസഭയുടെ ആഹ്വാനം ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

സംസ്ഥാനത്തെ ജലാശയങ്ങളിൽ ലവണത്തിന്റെയും മറ്റ് മൂലകങ്ങളുടെയും തോത് കുറവായതുകൊണ്ട് ഹരിത ഹൈഡ്രജൻ ഉല്പാദനത്തിന് അനുകൂലമായ സാഹചര്യമാണുള്ളതെന്നത് പരിശോധിച്ചിട്ടുണ്ടോ; വിഴിഞ്ഞം അന്താരാഷ്ട്ര തുറമുഖം, കൊച്ചി തുറമുഖം എന്നിവ കേന്ദ്രീകരിച്ച് ഹരിത ഹൈഡ്രജൻ പാർക്കുകൾ ഉൾപ്പെടെയുള്ള വന്‍കിട പദ്ധതികൾ നടപ്പാക്കാൻ സ്വകാര്യ കമ്പനികൾ താൽപ്പര്യം അറിയിച്ചിട്ടുണ്ടോ; വിശദമാക്കുമോ;

കൊച്ചി, തിരുവനന്തപുരം, ആലപ്പുഴ എന്നിവി‌ടങ്ങൾ കേന്ദ്രീകരിച്ച്‌ കേന്ദ്ര ശാസ്ത്ര സാങ്കേതിക വകുപ്പിന്റെ ഹൈഡ്രജൻവാലിയും ഹൈഡ്രജൻ ഹബ്ബും സ്ഥാപിക്കുവാന്‍ ഉദ്ദേശിക്കുന്നുണ്ടോ; വിശദമാക്കുമോ;

പുതുതലമുറ ഇ.വി.ചാര്‍ജ്ജിംഗ് സംവിധാനങ്ങള്‍ ഉയര്‍ന്ന നിക്ഷേപവും അടിസ്ഥാന സൗകര്യങ്ങളും ആവശ്യമുള്ളവയാണെന്നത് ശ്രദ്ധയിൽപ്പെട്ടിട്ടുണ്ടോ; എങ്കില്‍ പുതുതലമുറ ഇ.വി.ചാര്‍ജ്ജിംഗ് സംവിധാനങ്ങള്‍ നടപ്പിലാക്കുന്നതിന് പൊതു-സ്വകാര്യ പങ്കാളിത്തത്തിലൂടെ നിക്ഷേപം ആകര്‍ഷിക്കേണ്ടത് അത്യന്താപേക്ഷിതമാണെന്നത് പരിശോധിച്ചിട്ടുണ്ടോ; വിശദമാക്കുമോ?

നാലാം നൂറ് ദിന പരിപാടിയുടെ ഭാഗമായി സഹകരണ മേഖലയില്‍ നടപ്പാക്കുന്ന പദ്ധതികളുടെ പുരോഗതി വിലയിരുത്തിയിട്ടുണ്ടോ; വിശദമാക്കുമോ;

ഇതിന്റെ ഭാഗമായി അക്ഷര നഗരിയായ കോട്ടയത്തെ അക്ഷര ടൂറിസം ഹബ്ബാക്കി മാറ്റുന്ന പദ്ധതി നടപ്പാക്കി വരുന്നുണ്ടോ; വ്യക്തമാക്കുമോ;

നാലാം നൂറ് ദിന പരിപാടിയുടെ ഭാഗമായി ഗിഗ് വര്‍ക്കേഴ്സിന് ഗുണകരമായ പദ്ധതികള്‍ സഹകരണ വകുപ്പു മുഖേന നടപ്പാക്കാന്‍ ഉദ്ദേശിക്കുന്നുണ്ടോ; വിശദാംശം നല്‍കുമോ;

സഹകരണ മേഖലയിൽ വ്യവസായ പാര്‍ക്കുകള്‍ സ്ഥാപിക്കുന്നത് സംബന്ധിച്ച പ്രവര്‍ത്തനങ്ങള്‍ പൂര്‍ത്തിയാക്കിയിട്ടുണ്ടോ; വിശദീകരിക്കുമോ?

ഈ സര്‍ക്കാരിന്റെ കാലയളവില്‍ ശബരിമല മാസ്റ്റര്‍പ്ലാന്‍ പദ്ധതിയില്‍ ഉള്‍പ്പെട്ട പ്രവൃത്തികള്‍ വേഗത്തിലാക്കാന്‍ കഴിഞ്ഞിട്ടുണ്ടോ; വിശദമാക്കുമോ;

കഴിഞ്ഞ രണ്ട് സാമ്പത്തിക വര്‍ഷങ്ങളിൽ ശബരിമല മാസ്റ്റര്‍ പ്ലാനിലുള്‍പ്പെട്ട ഏതെല്ലാം പദ്ധതികള്‍ക്കാണ് ഭരണാനുമതി നല്കിയിട്ടുള്ളതെന്നു വിശദമാക്കുമോ;

പ്രസ്തുത പദ്ധതിക്കായി നടപ്പ് സാമ്പത്തികവര്‍ഷം എന്തു തുകയാണ് ബജറ്റില്‍ നീക്കി വച്ചിട്ടുള്ളത്; വ്യക്തമാക്കുമോ;

ശബരിമല റോപ് വേ പദ്ധതിയുടെ നിര്‍വ്വഹണ പുരോഗതി വിലയിരുത്തിയിട്ടുണ്ടോ; വിശദാംശം നല്‍കുമോ?

അന്തർസംസ്ഥാന ചരക്കുനീക്കത്തിൽ കാര്യക്ഷമമായ പരിശോധനയില്ലാത്തതിനാൽ വ്യാപകമായ നികുതി വെട്ടിപ്പ് നടക്കുന്നതായ ആക്ഷേപം പരിശോധിച്ചിട്ടുണ്ടോ; വിശദമാക്കുമോ;

ചെക്ക്പോസ്റ്റുകൾ പൂർണമായും ഒഴിവാക്കിയ സാഹചര്യത്തിൽ നികുതി വെട്ടിപ്പ് തടയാൻ സംസ്ഥാനാതിർത്തികളിൽ ഏർപ്പെടുത്തിയിരിക്കുന്ന സംവിധാനങ്ങൾ എന്തെല്ലാമാണെന്ന് അറിയിക്കുമോ;

നികുതി വെട്ടിപ്പ് തടയുന്നതിനായുള്ള ഇ-വേ ബിൽ സമ്പ്രദായത്തിന്റെ പുരോഗതി വിശദമാക്കുമോ?

സംസ്ഥാനത്തിനാവശ്യമായ വൈദ്യുതി കുറഞ്ഞ ചെലവില്‍ കണ്ടെത്തുകയെന്ന ലക്ഷ്യം കൈവരിക്കുന്നതിനായി നടപ്പാക്കുന്ന കരാറുകളുടെ ഭാഗമായി സോളാര്‍ എനർജി കോര്‍പ്പറേഷനില്‍ നിന്നും വൈദ്യുതി വാങ്ങുന്നതിന് ധാരണയായിട്ടുണ്ടോ; വിശദമാക്കുമോ;

പകല്‍സമയത്ത് കുറഞ്ഞ നിരക്കില്‍ ലഭിക്കുന്ന വൈദ്യുതി സംഭരിക്കുന്നതിന് നിലവില്‍ സംവിധാനം ഏര്‍പ്പെടുത്തിയിട്ടുണ്ടോ; വിശദീകരിക്കുമോ;

സോളാര്‍ എനർജി കോര്‍പ്പറേഷന്റെ സഹായത്തോടെ വൈദ്യുതി സംഭരിക്കുന്നതിനായി ബാറ്ററി എനർജി സ്റ്റോറേജ് സിസ്റ്റം സ്ഥാപിക്കുന്നതിന് തീരുമാനിച്ചിട്ടുണ്ടോ; വിശദാംശം നല്‍കുമോ?

സഹകരണ മേഖലയില്‍ തനതായ മാതൃകകളും നൂതന പദ്ധതികളും നടപ്പിലാക്കാന്‍ ഉദ്ദേശിക്കുന്നുണ്ടോ; വ്യവസായം, ഉപഭോക്തൃസേവനം, ഭവനനിര്‍മ്മാണം എന്നീ മേഖലകളില്‍ സഹകരണ പ്രസ്ഥാനങ്ങളുടെ ഇടപെടല്‍ കൂടുതല്‍ ശക്തമാക്കു‍വാ‍‍‍ന്‍ നടപടികള്‍ സ്വീകരിച്ചിട്ടുണ്ടോ; വിശദമാക്കുമോ;

വിദേശ രാജ്യങ്ങളിലേക്കുള്ള വിദ്യാർത്ഥികളുടെ കുടിയേറ്റത്തിന്റെ പശ്ചാത്തലത്തില്‍ സംസ്ഥാനത്തെ വിദ്യാർത്ഥികളുടെയും യുവജനങ്ങളുടെയും നൈപുണ്യം നാടിന് പ്രയോജനപ്പെടുത്തുന്നതിന് സഹകരണ മേഖലയില്‍ പദ്ധതികള്‍ പരിഗണനയിലുണ്ടോ; വിശദമാക്കാമോ;

തൊഴിലന്വേഷകരുടെ നൈപുണ്യശേഷി വികസിപ്പിക്കുന്നതിന് വിദ്യാർത്ഥികൾക്കും യുവജനങ്ങൾക്കും കോഴ്സ് ഫീ വായ്പയായി നൽകുന്ന പദ്ധതി സഹകരണ മേഖലയില്‍ നടപ്പിലാക്കിയിട്ടുണ്ടോ; വിശദമാക്കാമോ?

കേരളത്തോടുള്ള കേന്ദ്രസര്‍ക്കാരിന്റെ തെറ്റായ സാമ്പത്തികനയങ്ങള്‍ തിരുത്താന്‍ സ്വീകരിച്ചു വരുന്ന നടപടികള്‍ വ്യക്തമാക്കുമോ;

ഇത്തരം തെറ്റായ സാമ്പത്തിക നയങ്ങള്‍ക്കെതിരെ മറ്റു സംസ്ഥാനങ്ങളെക്കൂടി പങ്കെടുപ്പിച്ച് ശക്തമായ പ്രക്ഷോഭം സംഘടിപ്പിക്കുമോ; വിശദമാക്കുമോ?

മലപ്പുറം, ഇടുക്കി, കാസർഗോഡ് എന്നീ പിന്നാക്ക ജില്ലകളിലെ വോൾട്ടേജ് ക്ഷാമം പരിഹരിക്കുന്നതിന് എന്തെങ്കിലും പദ്ധതി ആവിഷ്കരിക്കാൻ ഉദ്ദേശിക്കുന്നുണ്ടോ; വ്യക്തമാക്കുമോ;

എങ്കിൽ പ്രസ്തുത പദ്ധതിയിൽ ഓരോ ജില്ലയ്ക്കും എത്ര കോടി രൂപ വീതമാണ് അനുവദിക്കുന്നതെന്നും അവ എന്നത്തേക്ക് പൂർത്തിയാക്കാൻ കഴിയുമെന്നാണ് പ്രതീക്ഷിക്കുന്നതെന്നും വ്യക്തമാക്കുമോ?